-
សហរដ្ឋអាមេរិកព្រមានថា នឹងពិចារណាលើការឆ្លើយតបខាងយោធា ដើម្បីសងសឹងការវាយប្រហារដោយគ្រាប់រ៉ុក្កែតមកលើមូលដ្ឋានកងទ័ពខ្លួននៅអ៊ីរ៉ាក់
អាមេរិក៖ សេតវិមានបានព្រមានថា សហរដ្ឋអាមេរិកអាចនឹងពិចារណាការឆ្លើយតបខាងយោធាចំពោះការវាយប្រហារដោយគ្រាប់រ៉ុក្កែតនៅថ្ងៃពុធនេះ ដែលបានវាយប្រហារចំមូលដ្ឋានទ័ពអាកាសមួយនៅភាគខាងលិចអ៊ីរ៉ាក់ ជាកន្លែងដែលកងទ័ពអាមេរិក និងកងកម្លាំងចម្រុះបោះទីតាំង ដែលនេះបានបង្កើនការព្រួយបារម្ភអំពីការផ្ទុះឡើងនៃអំពើហិង្សាសាជាថ្មី ។ អ្នកម៉ៅការអាមេរិកម្នាក់បានស្លាប់ បន្ទាប់ពីគ្រាប់រ៉ុក្កែតយ៉ាងតិច១០គ្រាប់បានធ្លាក់លើមូលដ្ឋាននេះ ហើយមកទល់ពេលនេះ នៅពុំទាន់មានក្រុមសកម្មប្រយុទ្ធណាមួយចេញមុខអះអាងទទួលខុសត្រូវចំពោះការវាយប្រហារនេះនៅឡើយទេ ។ នៅពេលសួរអំពីការវាយប្រហារខាងលើនេះ ប្រធានាធិបតីអាមេរិកលោក ចូ បៃដិន បានប្រាប់អ្នកយកព័ត៌មានថា យើងកំពុងតាមដានរឿងនោះឥឡូវនេះ ហើយថាអរគុណព្រះគ្មាននរណាម្នាក់ត្រូវបានសម្លាប់ដោយគ្រាប់រ៉ុក្កែតនោះទេ ប៉ុន្តែមនុស្សម្នាក់ដែលជាអ្នកម៉ៅការបានស្លាប់ដោយសារគាំងបេះដូង ។ ប៉ុន្តែយើងកំពុងកំណត់អត្តសញ្ញាណអ្នកដែលទទួលខុសត្រូវ ហើយយើងនឹងធ្វើការវិនិច្ឆ័យអំពីការឆ្លើយតប ។ គួរបញ្ជាក់ថា ភាពតានតឹងខ្លាំងឡើងជាមួយកងជីវពលគាំទ្រដោយអ៊ីរ៉ង់នៅអ៊ីរ៉ាក់អាចនាំឱ្យមានការវាយប្រហារកាន់តែច្រើន ដោយធ្វើឱ្យស្មុគស្មាញដល់បំណងរបស់រដ្ឋបាលលោក បៃដិន ដើម្បីបើកការចរចាជាមួយអ៊ីរ៉ង់ ជុំវិញកិច្ចព្រមព្រៀងនុយក្លេអ៊ែរឆ្នាំ២០១៥ ៕
-
អង្គការសហប្រជាជាតិបញ្ជាក់ថា មនុស្ស៣៨នាក់ស្លាប់ក្នុងការតវ៉ាដ៏បង្ហូរឈាមក្នុងប្រទេសមីយ៉ាន់ម៉ា
មីយ៉ាន់ម៉ា៖ អង្គការសហប្រជាជាតិបាននិយាយថា មនុស្ស៣៨នាក់បានបាត់បង់ជីវិត នៅថ្ងៃពុធនេះ ក្នុងថ្ងៃដ៏បង្ហូរឈាមបំផុតនៃវិបត្តិក្នុងប្រទេសមីយ៉ាន់ម៉ា ខណៈដែលរដ្ឋាភិបាលយោធាកំពុងផ្គើននឹងការថ្កោលទោសរបស់អន្តរជាតិ ជុំវិញការធ្វើរដ្ឋប្រហាររបស់ខ្លួន ជាមួយនឹងការបង្ក្រាបដ៏ឃោរឃៅ ។ សម្ពាធអន្តរជាតិកំពុងកើនឡើង ។ មហាអំណាចលោកខាងលិចបានវាយប្រហារពួកឧត្តមសេនីយ៍ម្តងហើយម្តងទៀតជាមួយនឹងការដាក់ទណ្ឌកម្ម ហើយអង់គ្លេសបានអំពាវនាវឱ្យមានកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ នៅថ្ងៃសុក្រសប្តាហ៍នេះ ។ បន្ទាប់ពីការស្លាប់កាលពីថ្ងៃពុធម្សិលមិញ សហរដ្ឋអាមេរិកបាននិយាយថា ខ្លួនកំពុងពិចារណាលើសកម្មភាពបន្ថែមទៀត ។ តែមកទល់ពេលនេះ រដ្ឋាភិបាលយោធាហាក់មិនអើពើចំពោះការថ្កោលទោសជាសកល ដោយឆ្លើយតបនឹងការងើបបះបោរប្រឆាំងខ្លួន ដោយប្រើកម្លាំងបាយខ្លាំងឡើង ។ ប្រេសិតអង្គការសហប្រជាជាតិប្រចាំនៅប្រទេសមីយ៉ាន់ម៉ា លោកស្រី គ្រីស្ទីន ស្រាន័រ បួជេន័រ បានប្រាប់អ្នកយកព័ត៌មាននៅថ្ងៃពុធនេះថា គិតតែត្រឹមថ្ងៃនេះ មនុស្ស៣៨នាក់បានស្លាប់… និងថា មនុស្សសរុបជាង៥០នាក់ហើយបានស្លាប់ ចាប់តាំងពីយោធាបានកាន់កាប់អំណាច ក្នុងនោះមានអ្នករងរបួសជាច្រើននាក់ទៀត ។ ជាមួយគ្នានេះ លោកស្រីបានអំពាវនាវឱ្យអង្គការសហប្រជាជាតិចាត់វិធានការយ៉ាងម៉ឺងម៉ាត់ ប្រឆាំងនឹងពួកឧត្តមសេនីយ៍ ដោយបន្ថែមថា នៅក្នុងការសន្ទនារបស់លោកស្រីជាមួយពួកគេថ្មីៗនេះ ពួកគេបានច្រានចោលការគំរាមកំហែងនៃការដាក់ទណ្ឌកម្ម ។ លោកស្រីនិយាយថា ខ្ញុំនឹងបន្តទៅមុខទៀត យើងនឹងមិនចុះចាញ់ឡើយ ៕ ប្រភព៖ CNA
-
អ្នកឆ្លង COVID-19 នៅទូទាំងពិភពលោកកើនឡើង១១៥លាន៧៦ម៉ឺននាក់ ក្នុងនោះស្លាប់២លាន៥៧ម៉ឺននាក់ និងជាសះស្បើយ៩១លាន៤៦ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១១៥លាន៧៦ម៉ឺន៥ពាន់៤០៥ករណី ក្នុងនោះមានអ្នកជម្ងឺសរុបចំនួន២លាន៥៧ម៉ឺន១ពាន់៧៥៦នាក់ស្លាប់ និង ជាសះស្បើយឡើងវិញសរុបចំនួន៩១លាន៤៦ម៉ឺន៦ពាន់៩៣១នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៤ ខែមិនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៩លាន៤៥ម៉ឺន៦ពាន់៣៧៧នាក់ ស្លាប់ចំនួន៥៣ម៉ឺន១ពាន់៦៥២នាក់ និងជាសះស្បើយចំនួន២០លាន៣ពាន់៣២៥នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១១លាន១៥ម៉ឺន៦ពាន់៧៤៨នាក់ ស្លាប់ចំនួន១៥ម៉ឺន៧ពាន់៤៧១នាក់ និងជាសះស្បើយ១០លាន៨២ម៉ឺន៤ពាន់២៣៣នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ១០លាន៧២ម៉ឺន២ពាន់២២១នាក់ ស្លាប់២៥ម៉ឺន៩ពាន់៤០២នាក់ និងជាសះស្បើយ៩លាន៥៩ម៉ឺន១ពាន់៥៩០នាក់ ៕ ប្រភព៖ worldometers
-
ព័ត៌មានអន្តរជាតិថ្ងៃទី០៣ ខែមីនា ឆ្នាំ២០២១
-
កូវីដ១៩៖ វៀតណាមចាក់វ៉ាក់សាំងអង់គ្លេស AstraZeneca ដល់គ្រួសារក្រីក្រមុនគេ សប្តាហ៍នេះ
នាយករដ្ឋមន្ត្រីប្រទេសវៀតណាម ង្វៀន សួនហ្វុក បានបញ្ជាឲ្យក្រសួងសុខាភិបាលចាក់វ៉ាក់សាំងបង្ការជំងឺកូវីដ១៩ ដល់ក្រុមអាទិភាព ក្នុងសប្តាហ៍នេះ។ អំឡុងកិច្ចប្រជុំ កាលពីថ្ងៃទី២ មីនា ២០២១ លោក ហ្វុក បានបញ្ជាក់ថា ក្រុមគ្រួសារក្រីក្រស្ថិតក្រោមការអនុគ្រោះលើការព្យាបាល និងក្រុមអាទិភាពត្រូវបានរដ្ឋាភិបាលវៀតណាមសម្រេចឲ្យចាក់វ៉ាក់សាំងបង្ការកូវីដ១៩ ឲ្យបានលឿន។ ក្រុមអាទិភាព សំដៅលើកម្លាំងនគរបាល យោធា និងបុគ្គលិកពេទ្យ ហើយក្រៅពីនេះ ក៏មានគ្រូបង្រៀន បុគ្គលិកទូត មន្ត្រីអន្តោប្រវេសន៍ និងគយ ដែលធ្វើការលើសេវាកម្មសំខាន់ៗ ដូចជាការដឹកជញ្ជូន មនុស្សអាយុ៦៥ឆ្នាំ ឬ ច្រើនជាងនេះ។ អ្នកដែលកំពុងប៉នប៉ងទៅសិក្សានិងធ្វើការនៅក្រៅប្រទេស និងអ្នករស់នៅតំបន់ផ្ទុះជំងឺកូវីដ១៩ ក៏ស្ថិតក្នុងបញ្ជីអាទិភាពដែរ។ វៀតណាមបានបញ្ជាទិញវ៉ាក់សាំងកូវីដ១៩ពីក្រុមហ៊ុនអង់គ្លេស AstraZeneca ៣០លានដូស ក្នុងនោះ ជាង១១ម៉ឺនដូសត្រូវបានបញ្ជូនមកដល់ហូជីមិញហើយ កាលពីសប្តាហ៍មុន៕ ប្រភពពី vnexpress
-
ជម្លោះកើតឡើងរឿងថាតើនរណាជាអ្នកតំណាងស្របច្បាប់របស់មីយ៉ាន់ម៉ាប្រចាំអង្គការសហប្រជាជាតិ
អាមេរិក៖ រដ្ឋាភិបាលយោធាមីយ៉ាន់ម៉ា និងអគ្គរដ្ឋទូតប្រចាំអង្គការសហប្រជាជាតិ របស់រដ្ឋាភិបាលស៊ីវិលដែលត្រូវបានទម្លាក់ពីអំណាច បានទាស់សម្ដីគ្នាជុំវិញថាតើនរណាជាអ្នកតំណាងស្របច្បាប់របស់មីយ៉ាន់ម៉ានៅប្រចាំស្ថាប័នកំពូលរបស់ពិភពលោកមួយនេះ ។ អគ្គរដ្ឋទូតមីយ៉ាន់ម៉ាប្រចាំអង្គការសហប្រជាជាតិ លោក ខ្យ៉ ម៉ូ ធុន បានប្រកាសផ្ដាច់ទំនាក់ទំនងជាមួយរដ្ឋាភិបាលយោធា នៅចំពោះមុខមហាសន្និបាតអង្គការសហប្រជាជាតិ កាលពីថ្ងៃសុក្រសប្ដាហ៍មុន ហើយសន្យាថា លោកនឹងចូលរួមជួយស្ដាររដ្ឋាភិបាលស៊ីវិលរបស់លោកស្រី អោង សាន ស៊ូជី ឡើងវិញ ។ មួយថ្ងៃបន្ទាប់ រដ្ឋាភិបាលយោធាបានប្រកាសបណ្ដេញលោក ខ្យ៉ ម៉ូ ធុន ចេញពីតំណែងភ្លាមៗ ។ ប៉ុន្តែនៅថ្ងៃចន្ទសប្ដាហ៍នេះ លោក ខ្យ៉ ម៉ូ ធុន បានសរសេរលិខិតមួយច្បាប់ផ្ញើជូនប្រធានមហាសន្និបាតអង្គការសហប្រជាជាតិថា លោកនៅតែកាន់មុខតំណែងនេះដដែល ។ ទោះជាយ៉ាងក៏ដោយ កាលពីថ្ងៃអង្គារសប្ដាហ៍នេះ ក្រសួងការបរទេសមីយ៉ាន់ម៉ា ក៏បានផ្ញើកំណត់ហេតុមួយច្បាប់ទៅកាន់អង្គការសហប្រជាជាតិផងដែរ ដោយបញ្ជាក់ថា លោក ខ្យ៉ ម៉ូ ធុន ត្រូវបានដកតំណែងហើយ ៕ ប្រភព៖ AFP
-
ប្រធានាធិបតីអ៊ីរ៉ង់បញ្ជាក់ថា ការដកទណ្ឌកម្មរបស់សហរដ្ឋអាមេរិកគឺជាមធ្យោបាយតែមួយគត់ ដើម្បីស្តារកិច្ចព្រមព្រៀងនុយក្លេអ៊ែរឡើងវិញ
អ៊ីរ៉ង់៖ ប្រធានាធិបតីអ៊ីរ៉ង់ លោក ហាសាន់ រូហានី នៅថ្ងៃអង្គារនេះបានជំរុញឱ្យសហរដ្ឋអាមេរិកដកទណ្ឌកម្មរបស់ខ្លួនវិញ ដើម្បីស្តារកិច្ចព្រមព្រៀងនុយក្លេអ៊ែរ ដែលត្រូវបានគេស្គាល់ថា ជាផែនការសកម្មភាពរួម (JCPOA) នេះបើតាមទីភ្នាក់ងារសារព័ត៌មានផ្លូវការអ៊ីរ៉ង់ IRNA ។ អំឡុងពេលសន្ទនាគ្នាតាមទូរស័ព្ទជាមួយប្រធានាធិបតីបារាំងលោក អែមម៉ានុយអែល ម៉ាក្រុង លោក រូហានី បានគូសបញ្ជាក់ថា កិច្ចព្រមព្រៀងនុយក្លេអ៊ែររវាងអ៊ីរ៉ង់ និងប្រទេសមហាអំណាចមិនអាចចរចារបានទេ ហើយមធ្យោបាយតែមួយគត់ ដើម្បីការពារ និងធ្វើឱ្យកិច្ចព្រមព្រៀងនេះប្រសើរឡើងវិញ គឺសហរដ្ឋអាមេរិកត្រូវដកទណ្ឌកម្មជាមុនសិន ។ ប្រធានាធិបតីអ៊ីរ៉ង់រូបនេះបានសង្កត់ធ្ងន់ថា ការផ្អាកនាពេលថ្មីៗនេះរបស់អ៊ីរ៉ង់ ចំពោះការអនុវត្តដោយស្ម័គ្រចិត្តនៃពិធីសារបន្ថែមរបស់ទីភ្នាក់ងារថាមពលអាតូមិកអន្តរជាតិ (IAEA) គឺស្ថិតនៅក្នុងក្របខ័ណ្ឌនៃច្បាប់ដែលអនុម័តដោយសភាអ៊ីរ៉ង់ ៕ ប្រភព៖ ស៊ីនហួរ
-
កម្មវិធី COVAX របស់ WHO នឹងផ្តល់វ៉ាក់សាំង COVID-19 សរុប២៣៧លានដូសដល់ប្រទេសចំនួន១៤២នៅត្រឹមចុងខែឧសភាខាងមុខ
ស្វីស៖ កម្មវិធី COVAX របស់អង្គការសុខភាពពិភពលោក (WHO) បញ្ជាក់ថា នឹងចែកចាយថ្នាំវ៉ាក់សាំង Covid-19 របស់ក្រុមហ៊ុន អាស្រ្តាហ្សេណេកា ចំនួន២៣៧លានដូសឱ្យទៅប្រទេសចំនួន១៤២ នៅចុងខែឧសភា ឆ្នាំ២០២១ខាងមុខនេះ ខណៈបង្កើនការផ្គត់ផ្គង់វ៉ាក់សាំងជាសកល ។ បើតាមការគ្រោងទុកនោះ ការផ្ដល់វ៉ាក់សាំងដែលផលិតដោយក្រុមហ៊ុន អាស្រ្តាហ្សេណេកា និងវិទ្យាស្ថាន សេរូម របស់ប្រទេសឥណ្ឌា នឹងត្រូវបែងចែកជាកាលវិភាគពីរខែដាច់ដោយឡែកពីគ្នាដោយលើកទី ១ នៅខែកុម្ភៈ ដល់ខែមីនា ឆ្នាំ២០២១ និងលើកទី២ នៅខែមេសាដល់ខែឧសភា ឆ្នាំ២០២១ ។ សូមជម្រាបផងដែរថា COVAX គឺជាគំនិតផ្ដួចផ្ដើមមួយរបស់អង្គការសុខភាពពិភពលោក (WHO) ដែលមានគោលបំណងធានានូវការទទួលបាន វ៉ាក់សាំងប្រកបដោយតម្លាភាព ប្រសិទ្ធភាព និងសុវត្ថិភាព ខណៈកម្មវិធីនេះផ្ដោតជាសំខាន់លើបណ្ដាប្រទេសក្រីក្រ និងប្រទេសមានប្រាក់ចំណូលមធ្យម ៕ ប្រភព៖ CNA
-
កូវីដ១៩៖ ថៃឆ្លងក្នុងសហគមន៍បន្តធ្លាក់ចុះ ត្រឹម២៥នាក់នៅថ្ងៃនេះ
ថៃបានប្រកាសពី ការរកឃើញអ្នកឆ្លងថ្មីនៃជំងឺ COVID-19 ចំនួន៣៥នាក់ថែមទៀត ដែលធ្វើឲ្យចំនួនករណីឆ្លងសរុប នៅក្នុងប្រទេសអាស៊ានមួយនេះបន្តកើនដល់ ២៦១០៨នាក់ នេះបើតាមមជ្ឈមណ្ឌលគ្រប់គ្រងស្ថានការណ៍ COVID-19 ហៅកាត់ថា CCSA របស់ប្រទេសថៃ។ ប្រភពបានឲ្យដឹងថា ក្នុងចំណោមករណីឆ្លងថ្មីៗខាងលើ មាន២៥ករណីជាករណីឆ្លងនៅក្នុងស្រុកផ្ទាល់ និង១០ករណីទៀតជាករណីឆ្លង ដែលត្រូវបានរកឃើញលើអ្នកទើបត្រឡប់មកពីក្រៅប្រទេស ។ គួរបញ្ជាក់ថា ក្នុងចំណោមអ្នកដែលបានឆ្លង COVID-19 ទាំង ២៦,១០៨នាក់ នៅក្នុងប្រទេសថៃ មាន២៥,៤៨៣នាក់ បានជាសះស្បើយវិញ ខណៈ៥៤១នាក់កំពុងនៅបន្តសម្រាកព្យាបាលតាមមន្ទីរពេទ្យ។ ចំណែកតួលេខអ្នកជំងឺដែលស្លាប់ គឺនៅ៨៤នាក់ដដែល៕
-
លោក ចូ បៃដិន បញ្ជាក់ថា សហរដ្ឋអាមេរិកនឹងមានវ៉ាក់សាំង Covid-19 គ្រប់គ្រាន់ សម្រាប់ចាក់ជូនប្រជាជនពេញវ័យទាំងអស់នៅត្រឹមចុងខែឧសភាខាងមុខ
អាមេរិក៖ ប្រធានាធិបតីអាមេរិក លោក ចូ បៃដិន បានគូសបញ្ជាក់ថា ប្រទេសរបស់លោកនឹងមានវ៉ាក់សាំងគ្រប់គ្រាន់ សម្រាប់ចាក់ជូនប្រជាជនពេញវ័យរបស់ខ្លួនទាំងអស់ នៅត្រឹមចុងខែឧសភាខាងមុខនេះ ។ ការអះអាងខាងលើរបស់ប្រធានាធិបតីអាមេរិករូបនេះ ត្រូវបានធ្វើឡើងកំឡុងប្រកាសពីកិច្ចព្រមព្រៀងជាមួយក្រុមហ៊ុនផលិតឱសថអាមេរិក Merck ដែលនឹងជួយផលិតវ៉ាក់សាំង COVID-19 របស់ក្រុមហ៊ុន Johnson & Johnson ។ ស្របពេលជាមួយគ្នានោះដែរ លោក ចូ បៃដិន បាននិយាយថា នេះគឺជាកិច្ចសហប្រតិបត្តិការរវាងបណ្ដាក្រុមហ៊ុន ដែលយើងធ្លាប់បានឃើញរួចហើយ នៅក្នុងសម័យសង្រ្គាមលោក… ហើយយើងនឹងមានវ៉ាក់សាំងគ្រប់គ្រាន់ ដើម្បីផ្គត់ផ្គង់ដល់ប្រជាជនពេញវ័យទាំងអស់នៅត្រឹមចុងខែឧសភាខាងមុខនេះ ៕ ប្រភព៖ Reuters