-
បណ្តារដ្ឋមន្រ្តីការបរទេសអាស៊ាននឹងជួបប្រជុំគ្នាស្តីពីវិបត្តិក្នុងប្រទេសមីយ៉ាន់ម៉ានៅថ្ងៃអង្គារនេះ
សង្ហិបុរី៖ រដ្ឋមន្រ្តីការបរទេសសិង្ហបុរីលោក Vivian Balakrishnan បញ្ជាក់ថា បណ្តារដ្ឋមន្រ្តីការបរទេសរបស់សមាគមប្រជាជាតិអាស៊ីអាគ្នេយ៍ នឹងបើកកិច្ចប្រជុំពិសេសមួយនៅថ្ងៃអង្គារនេះ ដើម្បីពិភាក្សាអំពីវិបត្តិនៅប្រទេសមីយ៉ាន់ម៉ា ដោយលោកអំពាវនាវឲ្យមានការដោះលែងមេដឹកនាំលោកស្រី អោងសាន ស៊ូជី ជាបន្ទាន់ ។ ប្រមុខការទូតសិង្ហបុរីរូបនេះបានថ្លែងនៅក្នុងសភានៅថ្ងៃចន្ទម្សិលមិញថា កិច្ចប្រជុំរដ្ឋមន្ត្រីការបរទេសអាស៊ានពិសេសមួយ នឹងត្រូវកោះប្រជុំតាមរយៈវីដេអូខុនហ្វើរិន នៅថ្ងៃអង្គារនេះ និងជាកន្លែងដែលយើងនឹងស្តាប់តំណាងអាជ្ញាធរយោធាមីយ៉ាន់ម៉ា ។ លោកបានអំពាវនាវឲ្យអាជ្ញាធរយោធាមីយ៉ាន់ម៉ា បញ្ឈប់ពីការប្រើប្រាស់កម្លាំងហួសហេតុ ហើយត្រូវចាត់វិធានការជាបន្ទាន់ ដើម្បីសម្រាលស្ថានការណ៍ ក៏ដូចជាទប់ស្កាត់ការបង្ហូរឈាម ការប្រើអំពើហិង្សា និងករណីស្លាប់បន្ថែមទៀត ។ បន្ថែមលើនេះ លោក Vivian Balakrishnan ក៏បានជំរុញផងដែរឲ្យគ្រប់ភាគីទាំងអស់នៅក្នុងប្រទេសមីយ៉ាន់ម៉ា ចូលរួមកិច្ចពិភាក្សាដើម្បីស្វែងរកដំណោះស្រាយនយោបាយរយៈពេលវែង រួមទាំងវិធីដើម្បីវិលត្រឡប់ទៅរកផ្លូវនៃការឈានទៅរកលទ្ធិប្រជាធិបតេយ្យ ៕ ប្រភព៖ Bangkok Post
-
អ្នកឆ្លង COVID-19 នៅទូទាំងពិភពលោកកើនឡើង១១៤លាន៩៩ម៉ឺននាក់ ក្នុងនោះស្លាប់២លាន៥៥ម៉ឺននាក់ និងជាសះស្បើយ៩០លាន៧០ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១១៤លាន៩៩ម៉ឺន១ពាន់៨៩ករណី ក្នុងនោះមានអ្នកជម្ងឺសរុបចំនួន២លាន៥៥ម៉ឺន១៩២នាក់ស្លាប់ និង ជាសះស្បើយឡើងវិញសរុបចំនួន៩០លាន៧០ម៉ឺន៧ពាន់៤២២នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០២ ខែមិនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៩លាន៣១ម៉ឺន៤ពាន់២៥៤នាក់ ស្លាប់ចំនួន៥២ម៉ឺន៧ពាន់២២៦នាក់ និងជាសះស្បើយចំនួន១៩លាន៨១ម៉ឺន៧ពាន់៥៣២នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១១លាន១២ម៉ឺន៣ពាន់៦១៩នាក់ ស្លាប់ចំនួន១៥ម៉ឺន៧ពាន់២៧៥នាក់ និងជាសះស្បើយ១០លាន៧៩ម៉ឺន៦ពាន់៥៥៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ១០លាន៥៨ម៉ឺន៩ពាន់៦០៨នាក់ ស្លាប់២៥ម៉ឺន៥ពាន់៨៣៦នាក់ និងជាសះស្បើយ៩លាន៤៥ម៉ឺន៧ពាន់១០០នាក់ ៕ ប្រភព៖ worldometers
-
ភូមា៖ លោកស្រី ស៊ូជី បង្ហាញមុខក្នុងតុលាការលើកដំបូង តាំងពីមានរដ្ឋប្រហារ
លោកស្រី អ៊ួង សានស៊ូជី មេដឹកនាំរដ្ឋាភិបាលស៊ីវិលរបស់មីយ៉ាន់ម៉ា នៅថ្ងៃចន្ទ ទី១ មីនា ២០២១នេះ បានបង្ហាញខ្លួនក្នុងតុលាការ តាមប្រព័ន្ធវីដេអូ ដោយមេធាវីរបស់លោកស្រីបញ្ជាក់ថា ជាលើកដំបូង តាំងពីកើតមានរដ្ឋប្រហារយោធា កាលពីខែមុន ដែលបណ្តាលឲ្យមានមហាបាតុកម្មដ៏ធំមកដល់ពេលនេះ។ ការបង្ហាញមុខរបស់លោកស្រី ក៏ស្របពេលដែលក្រុមបាតុករគាំទ្រលោកស្រីបានធ្វើសកម្មភាពតវ៉ាជាថ្មីទៀត ទូទាំងប្រទេស រហូតដល់មានការប៉ះទង្គិចជាមួយ អាជ្ញាធរបណ្តាលឲ្យស្លាប់មនុស្សយ៉ាងតិច ១៨នាក់ កាលពីម្សិលមិញ ជាតួលេខអ្នកស្លាប់បង្ហាញដោយអង្គការសហប្រជាជាតិ។ លោកស្រី អ៊ួងសាន ស៊ូជី ក្នុងវ័យ៧៥ឆ្នាំ បានបង្ហាញមុខ ដោយមានសុខភាពល្អធម្មតា នៅក្នុងតុលាការ នេះបើតាមមេធាវីរបស់លោកស្រី គឺលោក Khin Maung Zaw បានប្រាប់សារព័ត៌មានបរទេសបែបនេះ ពេលសម្រាកសវនាការ៕
-
លោក ដូណាល់ ត្រាំ អះអាងថា លោកអាចនឹងឈរឈ្មោះសម្រាប់មុខតំណែងប្រធានាធិបតីអាមេរិកទៀតនៅឆ្នាំ២០២៤
អាមេរិក៖ អតីតប្រធានាធិបតីអាមេរិកលោក ដូណាល់ ត្រាំ នៅថ្ងៃអាទិត្យម្សិលមិញ បានបង្ហើបថា រូបលោកអាចនឹងឈរឈ្មោះសម្រាប់មុខតំណែងប្រធានាធិបតីសហរដ្ឋអាមេរិកសាជាថ្មីម្តងទៀតនៅឆ្នាំ២០២៤ខាងមុខនេះ ។ អតីតប្រធានាធិបតីអាមេរិករូបនេះ បានប្រាប់ក្នុងសន្និសិទអភិរក្សក្នុងទីក្រុង អរលែនដូ រដ្ឋ ផ្ល័ររីដា ថា យើងជួបជុំគ្នារសៀលនេះ ដើម្បីនិយាយពីអនាគត គឺនិយាយពីអនាគតរបស់យើង… និយាយពីអនាគតគណបក្សរបស់យើង និងនិយាយពីអនាគតប្រទេសជាតិជាទីស្រឡាញ់របស់យើង ។ ជាមួយគ្នានេះ លោក ត្រាំ បានច្រានចោលពាក្យចចាមអារ៉ាមដែលថា លោកប្រហែលជាបង្កើតគណបក្សនយោបាយថ្មី ដោយនិយាយថា នោះជាប្រការល្អមែនទេ? បើយើងចាប់ផ្តើមគណបក្សថ្មី គឺយើងមានតែបំបែកសំឡេងរបស់យើងតែប៉ុណ្ណោះ ដូច្នេះយើងនឹងមិនដែលឈ្នះឡើយ ។ យើងមានគណបក្សសាធារណៈហើយ… យើងនឹងនៅតែបន្តសាមគ្គីគ្នា និងរឹតតែខ្លាំងជាងមុនទ្វេឡើង ។ នាឱកាសនោះដែរ លោក ដូណាល់ ត្រាំ ក៏បានធ្វើការរិះគន់យ៉ាងចាស់ដៃអំពីអ្នកបន្តវេនថ្មីរបស់លោក គឺលោក ចូ បៃដិន ដោយបាននិយាយថា គោលនយោបាយសហរដ្ឋអាមេរិកបានចេញពីអាមេរិកដំបូងទៅអាមេរិកចុងក្រោយ ៕ ប្រភព៖ Reuters
-
អ្នកជំនាញកំពូលផ្នែកជំងឺឆ្លងអាមេរិកជំរុញអោយប្រជាជនខ្លួនទាំងអស់យល់ព្រមចាក់វ៉ាក់សាំងចំនួន០៣ ដែលទើបត្រូវបានអនុម័តអោយប្រើប្រាស់
អាមេរិក៖ អ្នកជំនាញកំពូលផ្នែកជំងឺឆ្លងអាមេរិក លោកវេជ្ជបណ្ឌិត អាន់ថូនី ហ្វូស៊ី បានលើកទឹកចិត្តឱ្យពលរដ្ឋអាមេរិកទាំងអស់ យល់ព្រមចាក់វ៉ាក់សាំងណាមួយក៏បាន ក្នុងចំណោមវ៉ាក់សាំងទាំង០៣ ដែលត្រូវបានអនុញ្ញាតឱ្យប្រើប្រាស់នៅក្នុងសហរដ្ឋអាមេរិក ។ លោកវេជ្ជបណ្ឌិត ហ្វូស៊ី បានថ្លែងអំពាវនាវខាងលើនេះ នៅក្នុងបទសម្ភាសន៍ជាមួយទូរទស្សន៍ NBC កាលពីថ្ងៃអាទិត្យម្សិលមិញ ពោលគឺក្រោយពេលដែលវ៉ាក់សាំង Covid-19 របស់ក្រុមហ៊ុន ចនសុន អ៊ែន ចនសុន (J&J) ត្រូវបានរដ្ឋបាលចំណីអាហារ និងឱសថអាមេរិក (FDA) អនុម័តឱ្យប្រើប្រាស់ក្នុងករណីបន្ទាន់ ដែលធ្វើឱ្យវាក្លាយជាវ៉ាក់សាំងទី ៣ ដែលទទួលបានការអនុញ្ញាតនៅក្នុងសហរដ្ឋអាមេរិក បន្ទាប់ពីវ៉ាក់សាំងក្រុមហ៊ុន ភីហ្វីហ្សឺ-បាយអូអិនធិច និងក្រុមហ៊ុន ម៉ូឌែណា ។ ហើយបន្ទាប់ពីទទួលបានការអនុញ្ញាតនោះ វ៉ាក់សាំងក្រុមហ៊ុន J&J នឹងត្រូវចែកចាយទៅកាន់រដ្ឋនានាទៅទូទាំងសហរដ្ឋអាមេរិក នៅយប់ថ្ងៃអាទិត្យ ឬថ្ងៃចន្ទដើមសប្ដាហ៍នេះ (ម៉ោងក្នុងតំបន់) ហើយតាមរយៈអនុសាសន៍របស់រដ្ឋបាលចំណីអាហារ និងឱសថអាមេរិក FDA អាជ្ញាធរសុខាភិបាលក្នុងតំបន់ និង រដ្ឋមានផែនការចាក់វ៉ាក់សាំងក្រុមហ៊ុន J&J ចំនួន៤លានដូសក្នុងដំណាក់កាលដំបូង ៕ ប្រភព៖ Reuters
-
លោក បូរីស ចនសុន ជំរុញអោយប្រជាជនអង់គ្លេសទាំងអស់ចាក់វ៉ាក់សាំង Covid-19 ខណៈមនុស្សជាង២០លាននាក់ហើយបានចាក់វ៉ាក់សាំងសម្រាប់ដូសដំបូង
អង់គ្លេស៖ ប្រជាជនសរុបជាង២០លាននាក់នៅទូទាំងចក្រភពអង់គ្លេស បានទទួលការចាក់វ៉ាក់សាំងការពារ COVID-19 សម្រាប់ដូសដំបូងរបស់ពួកគេរួចរាល់ហើយ នេះបើតាមទិន្នន័យផ្លូវការនៅថ្ងៃអាទិត្យម្សិលមិញ ធ្វើអោយអង់ គ្លេសក្លាយជាប្រទេសដំណើរការកម្មវិធីចាក់វ៉ាក់សាំងលឿនជាងគេបំផុតក្នុងតំបន់ ។ ទន្ទឹមនឹងការបង្ហាញរបាយការណ៍ខាងលើនេះ នាយករដ្ឋមន្រ្តីអង់គ្លេសលោក បូរីស ចនសុន បាននិយាយថា កម្មវិធីចាក់វ៉ាក់សាំងនេះ គឺតំណាងឱ្យសមិទ្ធផលជាតិដ៏ធំមួយរបស់យើង ហើយថា ខ្ញុំសូមជំរុញឱ្យអ្នកទាំងអស់គ្នាមកទទួលការចាក់វ៉ាក់សាំងនេះ នៅពេលដែលដល់វេនអ្នកទាំងអស់គ្នា ព្រោះការចាក់វ៉ាក់សាំងនេះ នឹងធ្វើឱ្យមានភាពខុសប្លែកគ្នា ក្នុងការប្រយុទ្ធរបស់យើង ប្រឆាំងនឹងវីរុស COVID-19 ។ សូមជម្រាបថា យោងតាមទិន្នន័យផ្លូវការបានបង្ហាញថា ប្រជាជនអង់គ្លេសសរុបចំនួន២០,០៩លាននាក់បានទទួលការចាក់វ៉ាក់សាំងការពារ COVID-19 សម្រាប់ដូសដំបូងរបស់ពួកគេរួចរាល់ហើយ ស្របពេលដែលប្រជាជនអង់គ្លេសសរុបជិត ៨០ម៉ឺននាក់ទៀតក៏បានទទួលការចាក់វ៉ាក់សាំងសម្រាប់ដូសទី២ របស់ពួកគេរួចរាល់ហើយដែរ ៕ ប្រភព៖ Reuters
-
ការិយាល័យសិទ្ធិមនុស្សអង្គការសហប្រជាជាតិបញ្ជាក់ថា មនុស្ស១៨នាក់ស្លាប់ អំឡុងការបង្ក្រាបដ៏ហិង្សារបស់ប៉ូលិសមីយ៉ាន់ម៉ាលើអ្នកប្រឆាំងតវ៉ា
មីយ៉ាន់ម៉ា៖ ការិយាល័យសិទ្ធិមនុស្សរបស់អង្គការសហប្រជាជាតិបានបញ្ជាក់ថាប៉ូលិសនៅទូទាំងប្រទេសមីយ៉ាន់ម៉ា នៅថ្ងៃអាទិត្យម្សិលមិញនេះ បានចេញប្រតិបត្តិការបង្ក្រាបដ៏បង្ហូរឈាមបំផុត ទៅលើក្រុមបាតុករប្រឆាំងនឹងរដ្ឋប្រហារយោធា ដែលយ៉ាងហោចណាស់មានមនុស្ស១៨នាក់បានស្លាប់ និង៣០នាក់ទៀតរងរបួស ។ ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយនៅក្នុងសេចក្តីថ្លែងការណ៍មួយថា ការស្លាប់បានកើតឡើងដោយសារតែគ្រាប់កាំភ្លើងពិត ដែលបាញ់ទៅលើហ្វូងមនុស្សនៅទីក្រុងយ៉ាងហ្គោន ទីក្រុងដាវេ ទីក្រុងម៉ាន់ដាឡេ ទីក្រុងមីអ៊ីក ទីក្រុងបាហ្គោ និងទីក្រុងផូកុកគូ ដោយបន្ថែមទៀតថា គ្រាប់បែកពន្លឺ គ្រាប់បែកសំឡេងបង្អើល និងឧស្ម័នបង្ហូរទឹកភ្នែកក៏បានប្រើដែរ ។ គួរបញ្ជាក់ផងដែរថា ចំនួនអ្នកស្លាប់ក្នុងពេលតែមួយថ្ងៃខ្ពស់បំផុតខាងលើនេះ ក្នុងចំណោមក្រុមអ្នកតវ៉ាដែលទាមទារស្តារអំណាចរដ្ឋាភិបាលជាប់ឆ្នោតរបស់លោកស្រី អោង សាន ស៊ូជី ឡើងវិញ បន្ទាប់ពីត្រូវបានទម្លាក់ពីអំណាចក្នុងរដ្ឋប្រហារថ្ងៃទី០១ ខែកុម្ភៈកន្លងទៅ ។ ដោយឡែកមនុស្សប្រមាណ១ពាន់នាក់ត្រូវបានគេជឿថា ត្រូវបានឃុំខ្លួនកាលពីថ្ងៃអាទិត្យម្សិលមិញនេះ ៕ ប្រភព៖ AP
-
សហរដ្ឋអាមេរិកព្រមានចាត់វិធានការបន្ថែមទៀតប្រឆាំងនឹងរដ្ឋប្រហារយោធានៅមីយ៉ាន់ម៉ា ក្រោយមនុស្ស១៨នាក់ស្លាប់ក្នុងការបង្ក្រាបដ៏ហិង្សារបស់ប៉ូលិស
អាមេរិក៖ សហរដ្ឋអាមេរិក អង្គការសហប្រជាជាតិ និងសហភាពអឺរ៉ុប នៅថ្ងៃអាទិត្យម្សិលមិញ បានថ្កោលទោសការបង្ក្រាបដ៏ហិង្សា បន្ទាប់ពីប៉ូលិសមីយ៉ាន់ម៉ាបាញ់គ្រាប់ពិតលើក្រុមបាតុករ ដែលធ្វើអោយស្លាប់មនុស្សយ៉ាងតិច១៨នាក់ នៅក្នុងអំពើហិង្សាដ៏អាក្រក់បំផុតចាប់តាំងពីរដ្ឋប្រហារថ្ងៃ០១ ខែកុម្ភៈមក ។ ទន្ទឹមគ្នា រដ្ឋាភិបាលអាមេរិកបាននិងកំពុងរៀបចំចាត់វិធានការបន្ថែមទៀតនៅប៉ុន្មានថ្ងៃទៀតនេះ ដើម្បីប្រឆាំងនឹងការទទួលខុសត្រូវលើការបង្ក្រាបដ៏ហិង្សាលើក្រុមអ្នកតវ៉ា ក៏ដូចជារដ្ឋប្រហារយោធាក្នុងប្រទេសមីយ៉ាន់ម៉ាផងដែរ នេះបើតាមការបញ្ជាក់របស់ទីប្រឹក្សាសន្តិសុខជាតិអាមេរិកលោក Jake Sullivan នៅថ្ងៃអាទិត្យម្សិលមិញ ។ ជាមួយគ្នានេះ រដ្ឋមន្ត្រីការបរទេសអាមេរិកលោក អាន់ថូនី ប្លីនខិន ក៏បានថ្កោលទោសអ្វីដែលលោកហៅថា អំពើហិង្សាគួរអោយស្អប់ខ្ពើមពីសំណាក់កងកម្លាំងសន្តិសុខមីយ៉ាន់ម៉ា នៅក្នុងការបង្ក្រាបដ៏ប្រល័យលើអ្នកប្រឆាំងតវ៉ា ។ លោក ប្លីនខិន បានបង្ហោះសារនៅលើធ្វីតធើថា យើងឈរយ៉ាងរឹងមាំជាមួយប្រជាជនដ៏ក្លាហានរបស់មីយ៉ាន់ម៉ា និងលើកទឹកចិត្តអោយគ្រប់ប្រទេសនិយាយជាមួយនឹងសម្លេងតែមួយគាំទ្រឆន្ទៈរបស់គេ ៕ ប្រភព៖ Reuters
-
ម៉ាឡេស៊ីមើលឃើញមនុស្សឆ្លង Covid-19 ថ្មីៗចំនួន២,៤៣៧ករណី និងស្លាប់០៩នាក់ទៀតក្នុងថ្ងៃអាទិត្យម្សិលមិញ
ម៉ាឡេស៊ី៖ អាជ្ញាធរសុខាភិបាលម៉ាឡេស៊ីបានរាយការណ៍ឲ្យដឹងថា ខ្លួនបានរកឃើញករណីឆ្លង COVID-19 ថ្មីៗចំនួន២ពាន់៣៧៤ករណីបន្ថែមទៀត នៅថ្ងៃអាទិត្យម្សិលមិញនេះ ។ បើតាមការបញ្ជាក់របស់ក្រសួងសុខាភិបាលម៉ាឡេស៊ី ក្នុងចំណោមករណីឆ្លងថ្មីៗទាំងអស់ខាងលើ មានតែ០២ករណីប៉ុណ្ណោះ ដែលជាប្រភេទនាំចូល ក្រៅពីនោះគឺករណីឆ្លងក្នុងស្រុកទាំងអស់ ។ ក្នុងរយៈពេលដូចគ្នា ម៉ាឡេស៊ីក៏បានកត់ត្រាអ្នកស្លាប់ថ្មីចំនួន០៩នាក់បន្ថែទៀតផងដែរ ។ គិតត្រឹមថ្ងៃអាទិត្យម្សិលមិញនេះ ម៉ាឡេស៊ីបានកត់ត្រាករណីឆ្លងសរុបនៅទូទាំងប្រទេសចំនួន៣០ម៉ឺន៧៥២ករណី ក្នុងនោះស្លាប់១ពាន់១៣០នាក់ និងជាសះស្បើយ២៧ម៉ឺន៣ពាន់៤១៧នាក់ ឬស្មើនឹង៩០.៩% ៕ ប្រភព៖ ស៊ីនហួរ
-
ថៃរកឃើញអ្នកឆ្លង Covid-19 ថ្មីៗចំនួន៧០ករណីទៀតក្នុងថ្ងៃអាទិត្យម្សិលមិញ
ថៃ៖ មជ្ឈមណ្ឌលគ្រប់គ្រងជំងឺ COVID-19 របស់ប្រទេសថៃ (CCSA) នៅថ្ងៃអាទិត្យម្សិលមិញបានរាយការណ៍ពីការរកឃើញនូវករណីឆ្លងជំងឺ COVID-19 ថ្មីៗចំនួន៧០ករណីបន្ថែមទៀត និងពុំមានករណីស្លាប់ត្រូវបានរាយការណ៍ទេ ។ មជ្ឈមណ្ឌលខាងលើនេះបានអោយដឹងទៀតថា ក្នុងចំណោមករណីឆ្លងថ្មីៗនេះ មាន៦២ករណី ជាករណីឆ្លងក្នុងស្រុក ខណៈ០៨ករណីផ្សេងទៀតជាករណីនាំចូល ដែលត្រូវបានរកឃើញនៅលើអ្នកដំណើរដែលបានវិលត្រឡប់មកពីបរទេសវិញ ។ គិតត្រឹមថ្ងៃអាទិត្យម្សិលមិញនេះ ថៃបានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេសចំនួន២ម៉ឺន៥ពាន់៩៥១ករណី ក្នុងនោះស្លាប់៨៣នាក់ និងជាសះស្បើយចំនួន២ម៉ឺន៥ពាន់១២៨នាក់ ៕ ប្រភព៖ Bangkok Post