-
លោក លី ខឺជាំង អះអាងថា ចិននឹងប្រឆាំងយ៉ាងដាច់ខាតនូវរាល់សកម្មភាពរបស់ក្រុមបំបែកខ្លួនណាមួយ ដែលចង់ទាមទារឯករាជ្យអោយកោះតៃវ៉ាន់
ចិន៖ នាយករដ្ឋមន្ត្រីចិនលោក លី ខឺជាំង អះអាងថា ប្រទេសរបស់លោកនឹងប្រឆាំងដាច់ខាតនូវសកម្មភាពរបស់ក្រុមបំបែកខ្លួនណាមួយ ដែលចង់ទាមទារឯករាជ្យឲ្យកោះតៃវ៉ាន់ ប៉ុន្តែទីក្រុងប៉េកាំងក៏នៅតែប្តេជ្ញាចិត្ត ក្នុងការលើកស្ទួយទំនាក់ទំនងឆ្លងកាត់ច្រកសមុទ្រតៃវ៉ាន់ និងការបង្រួបបង្រួមប្រជាជាតិចិន ។ ថ្លែងក្នុងពិធីបើកសមាជប្រចាំឆ្នាំនៃសភាប្រជាជនចិន លោក លី ខឺជាំង ក៏បានរំលឹកផងដែរអំពីការអនុវត្តយ៉ាងខ្ជាប់ខ្ជួននូវ«គោលនយោបាយចិនតែមួយ» ដោយមានចែងយ៉ាងច្បាស់ថា កោះតៃវ៉ាន់គឺជាផ្នែកមួយរបស់ប្រទេសចិន ។ នាយករដ្ឋមន្រ្តីចិនរូបនេះ នៅចំពោះមុខក្រុមប្រតិភូប្រមាណ៣ពាន់រូបនៅឯសាលវិមានប្រជាជនក្នុងរដ្ឋធានី ប៉េកាំង ក៏បានលើកឡើងផងដែរ អំពីការប្រុងប្រយ័ត្នក្នុងកម្រិតខ្ពស់របស់ចិន ដើម្បីប្រឆាំងនឹងក្រុមបំបែកខ្លួន ដែលកំពុងមានចេតនាស្វែងរកឯករាជ្យភាពអោយកោះតៃវ៉ាន់ ៕ ប្រភព៖ Reuters
-
ព្រឹទ្ធសភាអាមេរិកផ្តល់ថវិកាចំនួន៣០ពាន់លានដុល្លារ ក្នុងការជំរុញឱ្យឧស្សាហកម្មផលិតឈីបក្នុងស្រុក ដើម្បីប្រកួតប្រជែងនឹងចិន
អាមេរិក៖ ព្រឹទ្ធសភាអាមេរិកកំពុងពិចារណាអនុម័តទឹកប្រាក់ចំនួន៣០ពាន់លានដុល្លារ ដើម្បីជំរុញឱ្យឧស្សាហកម្មផលិត ឈីប ក្នុងស្រុកដំណើរការទៅបានល្អ និងបង្កើនការផលិត ដែលវាជាវិធានការណ៍មួយក្នុងការប្រកួតប្រជែងប្រឆាំងនឹង ចិន ។ ជុំវិញព័ត៌មានគម្រោងកញ្ចប់ថវិកាខាងលើនេះ ត្រូវបានព្រឹទ្ធសភាអាមេរិកបដិ សេធមិនផ្ដល់ចម្លើយ ប៉ុន្តែគេបានដឹងថា ថវិកានេះគឺនឹងផ្ដល់ជំនួយទៅលើការផលិតនូវផលិតផលពាក់កណ្ដាលសម្រេច រួមនឹងការស្រាវជ្រាវ និងអភិវឌ្ឍន៍ ដើម្បីបង្កើតមានជាបច្ចេកវិទ្យាថ្មី ។ ប្រភពពីសមាជិកសភាបានបង្ហើបឱ្យដឹងថា ព្រឹទ្ធសភាអាមេរិកគ្រោងអនុម័តលើគម្រោងកញ្ចប់ថវិកា៣០ពាន់លានដុល្លារ ដើម្បីជំរុញវិស័យបច្ចេកវិទ្យាអាមេរិកឱ្យកាន់តែខ្លាំងក្លា ដោយក្នុងនោះរួមមានទាំងការផលិតឈីបផងដែរ ព្រោះថាកន្លងមក សហរដ្ឋអាមេរិកគឺជាប្រទេសដែលឈានមុខលើបច្ចេកវិទ្យា ប៉ុន្តែបែរជាទៅប្រើប្រាស់នូវបច្ចេកវិទ្យា និងឧបករណ៍របស់ចិន ហើយបែរជាប្រកាសថា ឧបករណ៍ទាំងនោះអាចបង្កហានិភ័យដល់សន្តិសុខជាតិ ៕ ប្រភព៖ Reuters
-
អ្នកជំនាញកំពូលផ្នែកសិទ្ធិមនុស្សយូអិនជំរុញអោយដាក់ទណ្ឌកម្មលើរបបយោធាមីយ៉ាន់ម៉ា ជុំវិញការបង្ក្រាបដ៏ឃោរឃៅលើក្រុមអ្នកប្រឆាំងតវ៉ា
ស្វីស៖ អ្នកជំនាញកំពូលផ្នែកសិទ្ធិមនុស្សរបស់អង្គការសហប្រជាជាតិនិយាយថាក្រុមប្រឹក្សាសន្តិសុខអង្គការសហប្រជាជាតិ (UNSC) គួរតែដាក់ទណ្ឌកម្មលើការ ប្រើសព្វាវុធជាសកល និងកំណត់គោលដៅដាក់ទណ្ឌកម្មប្រឆាំងរបបយោធាមីយ៉ាន់ម៉ា ស្របពេលមានការប្រកាសអាសន្ននៃការបង្ក្រាបដ៏ឃោរឃៅលើបាតុកម្មប្រឆាំងនឹងរដ្ឋប្រហារ ។ នៅក្នុងរបាយការណ៍ថ្មីមួយ អ្នករាយការណ៍ពិសេសអង្គការប្រជាជាតិ ទទួលបន្ទុកតាមដានស្ថានភាពសិទ្ធិមនុស្សនៅប្រទេសមីយ៉ាន់ម៉ា លោក Thomas Andrews បានធ្វើការអំពាវនាវអោយសហគមន៍អន្តរជាតិចាត់វិធានការជាបន្ទាន់ និងដាច់អហង្ការ ដើម្បីផ្តល់ការគាំទ្រដល់ការទាមទារលទ្ធិប្រជាធិបតេយ្យត្រឡប់មកវិញនៅក្នុងប្រទេសមីយ៉ាន់ម៉ា ។ លោក Thomas Andrews បាននិយាយទៀតថា ក្រុមប្រឹក្សាសន្តិសុខអង្គការសហប្រជាជាតិ (UNSC) គួរតែដាក់ទណ្ឌកម្មលើការប្រើប្រាស់សព្វាវុធជាសកល និងកំណត់គោលដៅដាក់ទណ្ឌកម្មសេដ្ឋកិច្ចប្រឆាំងនឹងរបបយោធាមីយ៉ាន់ម៉ា ក៏ដូចជាកាត់ផ្តាច់ប្រភពចំណូលរបស់ពួកគេផងដែរ ។ បើតាមរបាយការណ៍នោះ វិបត្តិនៅមីយ៉ាន់ម៉ាក៏គួរតែបញ្ជូនស្ថានភាពនៅក្នុងប្រទេសនេះ ទៅកាន់តុលាការព្រហ្មទណ្ឌអន្តរជាតិ ដើម្បីស៊ើបអង្កេត និងកាត់ទោសឧក្រិដ្ឋកម្មឃោរឃៅដែលបានកើតឡើង រួមមានឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ៕ ប្រភព៖ AP
-
សហរដ្ឋអាមេរិកបង្ហើបពីវិធានការថ្មី ដើម្បីដាក់ទោសលើរបបយោធាមីយ៉ាន់ម៉ា ជុំវិញការធ្វើរដ្ឋប្រហារកាលពីដើមខែកុម្ភៈ
អាមេរិក៖ សហរដ្ឋអាមេរិកនៅថ្ងៃព្រហស្បតិ៍នេះ បានបង្ហាញពីវិធានការថ្មីដើម្បីដាក់ទោសរបបយោធាមីយ៉ាន់ម៉ា ពាក់ព័ន្ធនឹងការធ្វើរដ្ឋប្រហាររបស់ខ្លួនកាលពីថ្ងៃទី០១ ខែកុម្ភៈកន្លងទៅ តាមរយៈការរារាំងក្រសួងការពារជាតិ និងកិច្ចការមាតុភូមិ ព្រមទាំងក្រុមហ៊ុនរបស់យោធាកំពូល ពីការធ្វើពាណិជ្ជកម្ម ។ ទីក្រុងវ៉ាស៊ីនតោនក៏បានជំរុញអោយប្រទេសមីយ៉ាន់ម៉ា បញ្ចប់ការប្រើប្រាស់យោធា និង ការរឹតត្បិតលើការគ្រប់គ្រងការនាំចេញ ដែលតម្រូវអោយអ្នកផ្គត់ផ្គង់ជនជាតិអាមេរិករបស់ខ្លួន ជួបផលលំបាកក្នុងការទទួលអាជ្ញាប័ណ្ណពីសហរដ្ឋអាមេរិក ក្នុងការដឹកជញ្ជូនទំនិញមួយចំនួនជាដើម ។ វិធានការនេះត្រូវបានធ្វើឡើងជាការឆ្លើយតបនឹងការបង្ក្រាបដ៏បង្ហូរឈាមរបស់យោធាមីយ៉ាន់ម៉ា ទៅលើក្រុមអ្នកប្រឆាំងតវ៉ាដោយសន្តិវិធី ដែលទាមទារអោយមានការដោះលែងមន្រ្តីជាប់ឆ្នោតជាផ្លូវការ ដោយក្នុងនោះរួមមានទាំងលោកស្រី អោង សាន ស៊ូជី ដែលជាមេដឹកនាំជាប់ឆ្នោតសកលកាលពីខែវិច្ឆិកាកន្លងទៅ ។ ប៉ូលិសបានបង្ក្រាបបាតុកម្មដោយប្រើឧស្ម័នបង្ហូរទឹកភ្នែក និងបាញ់គ្រាប់កាំភ្លើងពិតនៅតាមបណ្តាទីក្រុងជាច្រើនទូទាំងប្រទេស ហើយបើតាមអង្គការសហប្រជាជាតិនោះ មានមនុស្សយ៉ាងហោចណាស់៥៤នាក់ហើយបានស្លាប់ ចាប់តាំងពីផ្ទុះរដ្ឋប្រហារយោធា ខណៈមនុស្សជាង១ពាន់៧០០នាក់ត្រូវចាប់ខ្លួន ក្នុងនោះរួមមានអ្នកកាសែត២៩នាក់ផងដែរ ៕ ប្រភព៖ Reuters
-
អគ្គរដ្ឋទូតមីយ៉ាន់ម៉ាតែងតាំងដោយយោធាប្រចាំនៅអង្គការសហប្រជាជាតិប្រកាសលាលែងពីតំណែង
បរទេស៖ អ្នកនាំពាក្យអង្គការសហប្រជាជាតិ នៅថ្ងៃព្រហស្បតិ៍នេះបញ្ជាក់ថា អគ្គរដ្ឋទូតថ្មីរបស់មីយ៉ាន់ម៉ាប្រចាំនៅស្ថាប័នពិភពលោកនេះ បានលាលែងពីតំណែង ដោយនិយាយថា អ្នកកាន់តំណែងមុនរបស់គាត់ ដែលត្រូវបានបណ្តេញដោយរបបយោធានៅតែបន្តធ្វើជាតំណាងប្រទេស ។ ពួកឧត្តមសេនីយ៍បានតែងតាំងឯកអគ្គរដ្ឋទូតរងលោក ទីន មួង នាង ឱ្យអង្គុយកៅអីជំនួសលោក ច ម៉ូ ទុន ។ ប៉ុន្តែកាលពីថ្ងៃព្រហស្បតិ៍នេះ អ្នកនាំពាក្យអង្គការសហប្រជាជាតិលោក ស្តេហ្វាន ឌូហ្សារិក បាននិយាយថា បេសកកម្មរបស់មីយ៉ាន់ម៉ាបានផ្ញើសារទាក់ទងទៅស្ថាប័នពិភពលោកនេះថា លោក ទីន មួង នាង បានដាក់លិខិតលាលែងពីតំណែងរបស់លោក ដោយរំលឹកថា លោក ច ម៉ូ ទុន នៅតែជាតំណាងអចិន្ត្រៃយ៍របស់មីយ៉ាន់ម៉ាប្រចាំអង្គការសហប្រជាជាតិ ។ សកម្មភាពខាងលើកើតឡើងក្រោយការប្រឈមមុខដាក់គ្នាមួយ ដោយលោក ច ម៉ូ ទុន បានសរសេរលិខិតទៅប្រធានមហាសន្និបាតអង្គការសហប្រជាជាតិកាលពីថ្ងៃចន្ទនេះ ដើម្បីអំពាវនាវថា រដ្ឋប្រហារនេះគឺខុសច្បាប់ ដូច្នេះយោធាគ្មានសិទ្ធិក្នុងការដកគាត់ចេញទេ និងថា ដូច្នេះលោកសូមបញ្ជាក់ប្រាប់អ្នកថា លោកនៅតែជាតំណាងអចិន្ត្រៃយ៍របស់មីយ៉ាន់ម៉ានៅអង្គការសហប្រជាជាតិ ៕ ប្រភព៖ AFP
-
អ្នកឆ្លង COVID-19 នៅទូទាំងពិភពលោកកើនឡើង១១៦លាន២១ម៉ឺននាក់ ក្នុងនោះស្លាប់២លាន៥៨ម៉ឺននាក់ និងជាសះស្បើយ៩១លាន៨៨ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១១៦លាន២១ម៉ឺន៦ពាន់៥៨០ករណី ក្នុងនោះមានអ្នកជម្ងឺសរុបចំនួន២លាន៥៨ម៉ឺន១ពាន់៦៤៩នាក់ស្លាប់ និង ជាសះស្បើយឡើងវិញសរុបចំនួន៩១លាន៨៨ម៉ឺន៤ពាន់២៤៩នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៥ ខែមិនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៩លាន៥២ម៉ឺន៦ពាន់៨៦នាក់ ស្លាប់ចំនួន៥៣ម៉ឺន៣ពាន់៦៣៦នាក់ និងជាសះស្បើយចំនួន២០លាន៩ម៉ឺន៣ពាន់៤៤២នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១១លាន១៧ម៉ឺន៣ពាន់៥៧២នាក់ ស្លាប់ចំនួន១៥ម៉ឺន៧ពាន់៥៨៤នាក់ និងជាសះស្បើយ១០លាន៨៣ម៉ឺន៨ពាន់២១នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ១០លាន៧៩ម៉ឺន៦ពាន់៥០៦នាក់ ស្លាប់២៦ម៉ឺន១ពាន់១៨៨នាក់ និងជាសះស្បើយ៩លាន៦៣ម៉ឺន៧ពាន់២០នាក់ ៕ ប្រភព៖ worldometers
-
ព័ត៌មានអន្តរជាតិថ្ងៃទី០៤ ខែមីនា ឆ្នាំ២០២១ (Video)
-
សភាតំណាងរាស្រ្តអាមេរិកលុបចោលកិច្ចប្រជុំ បន្ទាប់ពីប៉ូលិសទទួលបានព័ត៌មានពីការវាយប្រហារវិមានសភាសាជាថ្មីរបស់ក្រុមគាំទ្រលោក ដូណាល់ ត្រាំ
អាមេរិក៖ សភាតំណាងរាស្រ្តអាមេរិកបានសម្រេចលុបចោលផែនការបើកសម័យប្រជុំរបស់ខ្លួន នៅថ្ងៃព្រហស្បតិ៍នេះ ប៉ូលិសវិមានសភាបានបញ្ជាក់នៅក្នុងសេចក្តីថ្លែងការណ៍មួយថា ខ្លួនបានទទួលព័ត៌មាន បន្ទាប់ពីការស៊ើបការណ៍សម្ងាត់មួយ ដែលបានរកឃើញផែនការអាចទៅរួច ក្នុងការវាយប្រហារវិមានសភាសាជាថ្មីម្ដងទៀត ដោយក្រុមអ្នកគាំទ្ររបស់លោក ដូណាល់ ត្រាំ នៅថ្ងៃទី០៤ ខែមីនា ឆ្នាំ២០២១នេះ ។ ប៉ូលិសវិមានសភាបានបន្ថែមថា យើងបានពង្រឹងសន្តិសុខសុវត្ថិភាពឱ្យប្រសើរឡើងវិញរួចទៅហើយ រួមទាំងការបង្កើតរចនាសម្ព័ន្ធសន្តិសុខ និងការបង្កើនចំនួនកងកម្លាំង ដើម្បីធានាការពារវិមានសភា សាធារណៈជន និងមន្ត្រីរបស់យើង ។ បើតាមប៉ូលិសអាមេរិកនោះ ក្រុមស្តាំនិយម ឃ្យូអេណុន (QAnon) បានជជែកគ្នាតាមប្រព័ន្ធអ៊ីនធើណិតថា ថ្ងៃព្រហស្បតិ៍សប្ដាហ៍នេះ គឺជាថ្ងៃស្បថឡើងកាន់តំណែងរបស់លោក ដូណាល់ ត្រាំ ។ ក្រុមស្តាំនិយម ឃ្យូអេណុន មួយចំនួននៅតែជឿជាក់ថា លោក ដូណាល់ ត្រាំ ត្រូវបានគេលួចបន្លំសន្លឹកឆ្នោត ហើយនៅថ្ងៃព្រហស្បតិ៍នេះ ពួកគេអាចនឹងធ្វើការតវ៉ា ដើម្បីទាមទារអំណាចអោយអតីតប្រធានាធិបតីអាមេរិករូបនេះវិញ ៕ ប្រភព៖Reuters
-
លោក ចូ បៃដិន រិះគន់ការសម្រេចចិត្តដកច្បាប់ពាក់ម៉ាស ដើម្បីការពារជំងឺ Covid-19 នៅរដ្ឋ Texas និង Mississippi
អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃពុធនេះបានរិះគន់ចំពោះការសម្រេចចិត្តដកច្បាប់ពាក់ម៉ាសរបស់រដ្ឋតិចសាស់ និងរដ្ឋមីស៊ីស៊ីភី ដោយបានគូសបញ្ជាក់ថា ការឆ្លងរាតត្បាតនៃជំងឺ Covid-19 នៅទូទាំងសហរដ្ឋអាមេរិកគឺស្ថិតនៅឆ្ងាយណាស់ពីភាពធូរស្រាល ។ ថ្លែងប្រាប់អ្នកសារព័ត៌មាននៅឯសេតវិមាន លោក ចូ បៃដិន បាននិយាយថា ខ្ញុំគិតថា វាជាកំហុសឆ្គងដ៏ធំមួយ… ខ្ញុំសង្ឃឹមថា អ្នករាល់គ្នាបានដឹងហើយឥឡូវនេះ ការពាក់ម៉ាសការពារបានធ្វើអោយមានភាពខុសគ្នា… យើងកំពុងស្ថិតស្ថានភាពនៃការដែលអាចផ្លាស់ប្តូរជាមូលដ្ឋាននៃធម្មជាតិនៃជំងឺនេះ ។ លោក បៃដិន បានចង្អុលបង្ហាញទៀតថា ចំនួនអ្នកស្លាប់នៅតែបន្តកើនឡើងលើសពីកន្លះលាននាក់ ។ រឿងចុងក្រោយដែលយើងត្រូវការ គឺត្រូវគិតថា ក្នុងពេលនេះអ្វីគ្រប់នឹងល្អប្រសើរ… ពាក់ម៉ាសរបស់អ្នក ហើយបំភ្លេចរឿងឈប់ពាក់ម៉ាស ព្រោះវានៅតែ បញ្ហានៅឡើយ ។ ការអត្ថាធិប្បាយខាងលើនេះរបស់លោក បៃដិន បានកើតមានឡើងបន្ទាប់ពីអភិបាលរដ្ឋតិចសាស់លោក Greg Abbott បាននិយាយនៅថ្ងៃអង្គារនេះថា លោកមានផែនការដកច្បាប់ពាក់ម៉ាសនៅទូទាំងរដ្ឋ និងអនុញ្ញាតឲ្យអាជីវកម្ម និងកន្លែងនានាអាចបើកដំណើរការបាន១០០ភាគរយ ដោយលើកឡើងពីការធ្លាក់ចុះនៃការចូលសម្រាកនៅមន្ទីរពេទ្យ ខណៈមនុស្សកាន់តែច្រើនកំពុងទទួលការចាក់វ៉ាក់សាំងប្រឆាំងនឹង Covid-19 ៕ ប្រភព៖ AFP
-
រដ្ឋបាលលោក ចូ បៃដិន ចាត់ទុកប្រទេសចិនថា ជាការធ្វើតេស្តភូមិសាស្រ្តនយោបាយដ៏ធំបំផុតសម្រាប់សហរដ្ឋអាមេរិក
អាមេរិក៖ ប្រធានាធិបតីអាមេរិកលោក ចូ បៃដិន បានចាត់ទុកការប្រជែងគ្នាកាន់តែខ្លាំងឡើងជាមួយប្រទេសចិនថា ជាបញ្ហាប្រឈមដ៏សំខាន់មួយដែលសហរដ្ឋអាមេរិកកំពុងប្រឈម ដោយប្រមុខការទូតរបស់លោកបានពិពណ៌នាប្រទេសអាស៊ីមួយនេះថា ជាការធ្វើតេស្តភូមិសាស្រ្តនយោបាយដ៏ធំបំផុតប្រចាំសតវត្សរ៍នេះ ។ នៅក្នុងសុន្ទរកថាដ៏សំខាន់លើកដំបូងរបស់ខ្លួន រដ្ឋមន្រ្តីការបរទេសអាមេរិកលោក អាន់តូនី ប្លីនខិន បានសន្យាថា រដ្ឋបាលរបស់លោកប្រធានាធិបតី ចូ បៃដិន នឹងផ្តល់អាទិភាពលើការទូត ជាជាងសកម្មភាពយោធា និងកសាងកិច្ចសហប្រតិបត្តិការជាមួយពិភពលោក លើបញ្ហាប្រឈមជាសកល ដូចជាការប្រែប្រួលអាកាសធាតុ និងជំងឺ Covid-19 ជាដើម ។ លោកបន្ថែមថា ចិនគឺជាប្រទេសតែមួយគត់ដែលមានអំណាចសេដ្ឋកិច្ច ការទូត យោធា និងបច្ចេកវិជ្ជា ដើម្បីប្រជែងយ៉ាងខ្លាំងក្លាទៅលើប្រព័ន្ធអន្ដរជាតិដែលមានស្ថិរភាព និងបើកចំហ ពោលគឺជាច្បាប់គុណតម្លៃ និងទំនាក់ទំនងទាំងអស់ដែលធ្វើឱ្យពិភពលោកដំណើរការតាមរបៀបដែលយើងចង់បាន ។ ប្រមុខការទូតអាមេរិករូបនេះសង្កត់ធ្ងន់ថា ទំនាក់ទំនងរបស់យើងជាមួយចិន នឹងមានការប្រកួតប្រជែង នៅពេលដែលវាគួរតែប្រជែងគ្នា… សហការគ្នានៅពេលដែលវាអាចសហការបាន… និងជាសត្រូវនឹងគ្នា នៅពេលដែលវាត្រូវតែជាសត្រូវនឹងគ្នា… ហើយយើងនឹងដោះស្រាយជាមួយចិនចេញពីជំហរនៃភាពខ្លាំង ៕ ប្រភព៖ AP