-
មន្ត្រីសុខាភិបាលថៃ៣៦នាក់ហើយ ដែលបានឆ្លងជំងឺកូវីដ១៩ ក្នុងរលកទី២
មជ្ឈមណ្ឌលគ្រប់គ្រងស្ថានភាពកូវីដ១៩ ហៅកាត់ថា CCSA នៅប្រទេសថៃបានប្រកាស នៅថ្ងៃសុក្រទី១៩ កុម្ភៈនេះថា បុគ្គលិកសុខាភិបាលនៅប្រទេសថៃចំនួន៣៦នាក់ហើយ ដែលបានឆ្លងជំងឺកូវីដ១៩ អំឡុងការផ្ទុះរលកទី២។ មន្ត្រីទាំងនោះរួមមានទាំង គិលានុប្បដ្ឋាយិកា វេជ្ជបណ្ឌិត និស្សិតពេទ្យ និងអ្នកបកប្រែឲ្យអ្នកជំងឺទៀតផង។ ក្រៅពីនេះ ក៏មានបុគ្គលិកនៅផ្នែកស្តុក ទំនាក់ទំនងសាធារណៈ និងមន្ត្រីខាងហិរញ្ញវត្ថុដែរ។ ថ្មីៗនេះ ក៏មានវេជ្ជបណ្ឌិតថៃម្នាក់បានស្លាប់ដោយសារតែជំងឺកូវីដ១៩ដែរ ជាការស្លាប់គ្រូពេទ្យដំបូងដោយសារជំងឺនេះ ក្នុងប្រទេសថៃ៕
-
លោក ចូ បៃដិន លុបចោលការសម្រេចរបស់រដ្ឋបាលលោក ដូណាល់ ត្រាំ ពាក់ព័ន្ធនឹងការដាក់ទណ្ឌកម្មឡើងវិញលើអ៊ីរ៉ង់
អាមេរិក៖ រដ្ឋបាលលោក ចូ បៃដិន សម្រេចលុបចោលការដាក់ទណ្ឌកម្មឡើងវិញរបស់អតីតប្រធានាធិបតីអាមេរិក លោក ដូណាល់ ត្រាំ លើប្រទេសអ៊ីរ៉ង់ ដែលជាសេចក្តីប្រកាសនេះ អាចនឹងជួយទីក្រុងវ៉ាស៊ីនតោនឆ្ពោះទៅរកកិច្ចព្រមព្រៀងនុយក្លេអ៊ែរឆ្នាំ២០១៥ឡើងវិញ ដើម្បីរំសាយកម្មវិធីនុយក្លេអ៊ែររបស់ទីក្រុងតេហេរ៉ង់ ។ កន្លងមក លោក ដូណាល់ ត្រាំ បានដកសហរដ្ឋអាមេរិកចេញពីកិច្ចព្រមព្រៀង ដែលគេស្គាល់ថា JCPOA ខាងលើនេះកាលពីឆ្នាំ២០១៨ ដោយលោកបានចោទថា ប្រទេសអ៊ីរ៉ង់បានបំពាន និងមិនបានអនុវត្តតាមកិច្ចព្រមព្រៀងនេះ ។ យ៉ាងណាមិញ ឯកអគ្គរដ្ឋទូតស្តីទីអាមេរិកប្រចាំនៅអង្គការសហប្រជាជាតិលោក រីឆាដ មៀលស៍ តាងនាមឲ្យលោក ចូ បៃដិន បានផ្ញើលិខិតមួយទៅកាន់ក្រុមប្រឹក្សាសន្តិសុខអង្គការសហប្រជាជាតិ ដោយបញ្ជាក់ថា សហរដ្ឋអាមេរិកបានសម្រេចលុបចោលវិញ នូវលិខិតចំនួន ០៣ របស់រដ្ឋបាលលោក ដូណាល់ ត្រាំ កាលពីថ្ងៃទី១៩ ខែកញ្ញាកន្លងទៅ ដែលបានសម្រេចដាក់ទណ្ឌកម្មរបស់អង្គការសហប្រជាជាតិឡើងវិញលើអ៊ីរ៉ង់ ។ បន្ថែមលើនេះ ក្រសួងការបរទេសអាមេរិកក៏បានប្រកាសផងដែរថា សហរដ្ឋអាមេរិកនឹងទទួលយកការអញ្ជើញពីសហភាពអឺរ៉ុប ដើម្បីចូលរួមក្នុងកិច្ចប្រជុំមួយ ដែលមានការចូលរួមពីសំណាក់បណ្តាប្រទេសជាហត្ថលេខី នៃកិច្ចព្រមព្រៀងនុយក្លេអ៊ែរអ៊ីរ៉ង់ដូចជា អង់គ្លេស បារាំង អាល្លឺម៉ង់ រុស្ស៊ី ចិន…
-
ក្រុមហ៊ុនផលិតឱសថ Pfizer-BioNTech ចាប់ផ្តើមធ្វើតេស្តវ៉ាក់សាំង Covid-19 លើស្ត្រីមានផ្ទៃពោះ
អាមេរិក៖ ក្រុមហ៊ុនផលិតឱសថអាមេរិក-អាល្លឺម៉ង់(ភីហ្វីហ្សឺ-បាយអូអិនធិច)បានចាប់ផ្តើមការសិក្សាជាអន្តរជាតិជាមួយអ្នកស្ម័គ្រចិត្តចំនួន៤ពាន់នាក់ ដើម្បីវាយតម្លៃពីសុវត្ថិភាព និងប្រសិទ្ធភាពនៃវ៉ាក់សាំង Covid-19 របស់ខ្លួន ចំពោះស្ត្រីមានផ្ទៃពោះដែលមានសុខភាពល្អ ។ ក្រុមហ៊ុន ភីហ្វីហ្សឺ-បាយអូអិនធិច បានគូសបញ្ជាក់ថា ស្រ្តីមានផ្ទៃពោះនៅសហរដ្ឋអាមេរិកបានទទួលការចាក់លើកដំបូងរបស់ពួកគេរួចហើយ ខណៈការស្រាវ ជ្រាវថ្មីនេះ នឹងធ្វើតេស្តលើស្ត្រីមានផ្ទៃពោះដែលមានអាយុចាប់ពី ១៨ ឆ្នាំឡើងទៅនៅសហរដ្ឋអាមេរិក កាណាដា អាហ្សង់ទីន ប្រេស៊ីល ឈីលី ម៉ូសំប៊ិក អាហ្វ្រិកខាងត្បូង អង់គ្លេស និងអេស្ប៉ាញ ។ ស្ត្រីនឹងទទួលបានវ៉ាក់សាំងក្នុងអំឡុងពេលសប្តាហ៍ទី២៤ដល់៣៤ នៃការមានគភ៌ ដោយទទួលការចាក់វ៉ាក់សាំង២ដងក្នុងរយៈពេល២១ថ្ងៃ ។ សូមជម្រាបថា ស្ត្រីមានផ្ទៃពោះគឺមានហានិភ័យខ្ពស់ក្នុងការវិវត្តធ្ងន់ធ្ងរនៃជំងឺ Covid-19 ហើយមន្ត្រីសុខាភិបាលសាធារណៈជាច្រើនបានណែនាំឲ្យស្ត្រី ដែលមានហានិភ័យខ្ពស់ត្រូវចាក់វ៉ាក់សាំងការពារជំងឺនេះ បើទោះបីជាគ្មានភស្តុតាងបញ្ជាក់ថា វ៉ាក់សាំងមានសុវត្ថិភាពសម្រាប់ពួកគេក៏ដោយ ៕ ប្រភព៖ Reuters
-
លោក ចូ បៃដិន សន្យាផ្តល់ថវិកា៤ពាន់លានដុល្លារដល់កម្មវិធីចាក់វ៉ាក់សាំង COVAX អំឡុងចូលរួមកិច្ចប្រជុំប្រទេស G7 ក្នុងសប្តាហ៍នេះ
អាមេរិក៖ រដ្ឋបាលប្រធានាធិបតីអាមេរិក លោក ចូ បៃដិន បានសន្យាផ្តល់ថវិកា៤ពាន់លានដុល្លារដល់កម្មវិធីចាក់វ៉ាក់សាំង COVID-19 នៅតាមបណ្ដាប្រទេសក្រីក្រ នេះបើតាមមន្រ្តីអាមេរិកនៅថ្ងៃព្រហស្បតិ៍នេះ (ម៉ោងក្នុងតំបន់) ។ លោក ចូ បៃដិន នឹងប្រើឱកាសជាលើកដំបូងរបស់លោកក្នុងនាមជាប្រធានា ធិបតី អំឡុងកិច្ចប្រជុំ G7 តាមប្រព័ន្ធអនឡាញនៅថ្ងៃសុក្រនេះ (ម៉ោងក្នុងតំបន់) ដើម្បីប្រកាសជាបន្ទាន់នូវការបរិច្ចាគថវិកា២ពាន់លានដុល្លារដល់កម្មវិធី COVAX ដែលដឹកនាំដោយអង្គការសុខភាពពិភពលោក (WHO) ដើម្បីធានានូវការទទួលបានការចាក់វ៉ាក់សាំងប្រកបដោយតម្លាភាពនៅជុំវិញពិភពលោក ។ រីឯថវិកា២ពាន់លានដុល្លារទៀតនឹងត្រូវផ្ដល់ជូនក្នុងរយៈពេល២ឆ្នាំខាងមុខផងដែរ ដើម្បីលើកទឹកចិត្តឱ្យប្រទេសជាម្ចាស់ជំនួយធំៗដទៃចូលរួមចំណែកក្នុងកិច្ចការនេះ ។ សូមជម្រាបថា កម្មវិធី COVAX ដែលដឹកនាំដោយអង្គការសុខភាពពិភពលោក (WHO) មានគោលបំណងផ្ដល់វ៉ាក់សាំងប្រមាណ២ពាន់លានដូសនៅត្រឹមដំណាចឆ្នាំ២០២១នេះ ដោយគ្របដណ្ដប់លើ២០ភាគរយ នៃប្រជាជនងាយរងគ្រោះនៅតាមបណ្ដាប្រទេសក្រីក្រ និងប្រទេសមានប្រាក់ចំណូលមធ្យម ៕ ប្រភព៖ AFP
-
គ្រឿងយន្តស្រាវជ្រាវថ្មី Perseverance របស់អង្គការ NASA ទទួលជោគជ័យ ក្នុងការចុះចតនៅលើភពអង្គារ
អាមេរិក៖ គ្រឿងយន្តស្រាវជ្រាវភពអង្គារថ្មី ភើសេវើរែនស៍ របស់អង្គការ NASA នៅម៉ោង៤៖០០នារសៀល (ម៉ោងក្នុងតំបន់) បានបុកទម្លុះបរិយាកាសភពអង្គារ ដោយប្រើរយៈពេលប្រមាណជា៧នាទី ហើយក្រោយមកកង់ទាំង០៦របស់វាក៏បានប៉ះនឹងដីភពអង្គារប្រកបដោយជោគជ័យ ។ ភើសេវើរែនស៍ មានតួនាទីស្រាវជ្រាវដុំថ្មភពអង្គារ ដើម្បីរកមើលម៉ូលេគុលហ្វូស៊ីល ដែលអាចជាភស្តុនៃជីវិតកាលពីអតីតកាលនៅលើភពអង្គារ ព្រមទាំងធ្វើការសិក្សាអំពីដាននៃបរិយាកាសកាលពីអតីតកាល និងអំពីបរិស្ថានភូមិសាស្ត្រភពអង្គារបន្ថែមទៀតនៅក្នុងរណ្តៅ ឬអតីតបឹងឈ្មោះ ចេហ្សេរ៉ូ ដែលមានមុខកាត់ ៤៥គីឡូម៉ែត្រ ស្ថិតនៅអឌ្ឍគោលខាងជើងភពអង្គារដែលបានចុះចតនោះ ។ រីឯកូនឧទ្ធម្ភាគចក្រ អ៊ីជេននូអ៊ីធី គឺសម្រាប់ធ្វើតេស្តហោះហើរក្នុងបរិយាកាសដ៏ស្តើងនៃភពអង្គារ (ស្មើមិនដល់ ១% នៃកម្រាស់បរិយាកាសផែនដី) ដើម្បីធ្វើការគូសវាសទីតាំងភូមិសាស្ត្រសំខាន់ៗ ជាជំនួយដល់បេសកកម្ម ភើសេវើរែនស៍ ។ សម្រាប់គោលដៅចុងក្រោយរបស់ ភើសេវើរែនស៍ ដែលជាការជីកយកគំរូតាងជាដុំថ្ម និងកម្ទេចដីពីភពអង្គារ រួចវេចខ្ចប់យ៉ាងត្រឹមត្រូវ ដើម្បីដឹកជញ្ជូនមកកាន់ភពផែនដីវិញនោះ គឺអង្គការ NASA ត្រូវការកិច្ចសហការជាមួយអឺរ៉ុប ដែលនឹងកើតឡើងយ៉ាងឆាប់បំផុតនៅឆ្នាំ២០៣១ខាងមុខនេះ ៕ ប្រភព៖ Reuters
-
រដ្ឋធានី ហ្សាការតា របស់ឥណ្ឌូនេស៊ីព្រមានដាក់ពិន័យធ្ងន់ធ្ងរលើអ្នកមិនព្រមចាក់វ៉ាក់សាំង Covid-19
ឥណ្ឌូនេស៊ី៖ រដ្ឋធានីហ្សាការតារបស់ប្រទេសឥណ្ឌូនេស៊ី ព្រមានដាក់ពិន័យប្រជាជនខ្លួនជាប្រាក់រហូតដល់៥លានរូពី ឬស្មើនឹងជាង៣៥៦ដុល្លារ ចំពោះការបដិ សេធចាក់វ៉ាក់សាំងកូវីដ១៩ ដែលនេះជាការដាក់ពិន័យយ៉ាងធ្ងន់ធ្ងរ ក្នុងគោលបំណងធានាឲ្យមានការអនុលោមតាមបទប្បញ្ញត្តិថ្មី ។ បើតាមមន្ត្រីសុខាភិបាលឥណ្ឌូនេស៊ីលោកស្រី ស៊ីទី ណាឌៀ តាមីហ្ស៊ី ការដាក់ទណ្ឌកម្ម គឺជាកិច្ចខិតខំចុងក្រោយរបស់យើង ដើម្បីលើកទឹកចិត្តឲ្យមានការចូលរួមពីប្រជាជន… គោលដៅលើប្រជាជន១៨១.៥លាននាក់ គឺធំធេងណាស់ ។ ជាមួយគ្នានេះ អភិបាលរងក្រុងហ្សាការតាលោក អាម៉េដ រីហ្សា ផាតទ្រា បានបញ្ជាក់ថា អាជ្ញាធរក្រុងគ្រាន់តែអនុវត្តតាមច្បាប់ប៉ុណ្ណោះ ហើយការដាក់ទណ្ឌកម្មបែបនេះ គឺជាមធ្យោបាយចុងក្រោយនៅក្នុងទីក្រុងហ្សាការតា ខណៈទីក្រុងនេះ មានអ្នកឆ្លងជំងឺកូវីដ១៩ប្រហែល១ភាគ៤ ក្នុងចំណោមអ្នកឆ្លងជាង១.២លាននាក់ ។ អភិបាលរងក្រុងហ្សាការតារូបនេះបានសង្កត់ធ្ងន់ថា ប្រសិនបើអ្នកបដិសេធចាក់វ៉ាក់សាំង មានរឿងពីរយ៉ាង មួយគឺជំនួយសង្គមនឹងមិនត្រូវបានផ្តល់ជូនទេ និងមួយទៀតគឺការពិន័យ ។ ការពិន័យ នឹងត្រូវកំណត់ដោយភ្នាក់ងារសុខភាពក្នុងតំបន់ ឬដោយរដ្ឋាភិបាលក្នុងតំបន់ ៕ ប្រភព៖ Reuters
-
ក្រុមប្រឆាំងនឹងរដ្ឋប្រហារបង្ហាញការស្វាគមន៍ ចំពោះការដាក់ទណ្ឌកម្មថ្មីរបស់ចក្រភពអង់គ្លេស និងកាណាដាលើរបបយោធាមីយ៉ាន់ម៉ា
មីយ៉ាន់ម៉ា៖ ក្រុមប្រឆាំងនឹងរដ្ឋប្រហារយោធាបានបង្ហាញការស្វាគមន៍ចំពោះការដាក់ទណ្ឌកម្មថ្មីរបស់ចក្រភពអង់គ្លេស និងកាណាដានៅថ្ងៃសុក្រនេះ ចំពេលដែលក្រុមបាតុករបានត្រៀមធ្វើដំណើរតាមដងផ្លូវ ដើម្បីធ្វើបាតុកម្មប្រចាំថ្ងៃដែលមានរយៈពេល២សប្តាហ៍មកហើយក្នុងប្រទេសអាស៊ីអាគ្នេយ៍មួយនេះ ។ អង់គ្លេសបានដាក់ចេញនូវការបង្កកទ្រព្យសម្បត្តិ និងការហាមឃាត់ការធ្វើដំណើរលើឧត្តមសេនីយ៍ចំនួន០៣រូបនៅក្នុងរបបយោធាមីយ៉ាន់ម៉ា ដើម្បីឆ្លើយតបនឹងការរំលោភសិទ្ធិមនុស្ស ។ ទណ្ឌកម្មនេះនឹងដាក់លើរដ្ឋមន្ត្រីការពារជាតិមីយ៉ាន់ម៉ាលោកឧត្តមសេនីយ៍ មីយ៉ា ទុនអ៊ូ រដ្ឋមន្ត្រីក្រសួងមហាផ្ទៃមីយ៉ាន់ម៉ាលោក សូ ធូត និងអនុរដ្ឋមន្ត្រីការបរទេសមីយ៉ាន់ម៉ាលោក ថន ហ្លាំង ។ រដ្ឋមន្ត្រីការបរទេសអង់គ្លេសលោក ដូមីនិក រ៉ាអាប និយាយថា អង់គ្លេសថ្កោលទោសចំពោះការធ្វើរដ្ឋប្រហារយោធា និងការឃុំខ្លួនលោកស្រី អោងសាន ស៊ូជី និងឥស្សរជននយោបាយដទៃទៀតតាមទំនើងចិត្ត ។ លោកបន្ថែមថា យើងរួមជាមួយសម្ព័ន្ធមិត្តអន្តរជាតិរបស់យើង នឹងចាប់យោធាមីយ៉ាន់ម៉ាឱ្យទទួលខុសត្រូវចំពោះការរំលោភសិទ្ធិមនុស្សរបស់ពួកគេ និងស្វែងរកយុត្តិធម៌សម្រាប់ប្រជាជនមីយ៉ាន់ម៉ា ។ សកម្មភាពកាលពីថ្ងៃព្រហស្បតិ៍ដោយចក្រភពអង់គ្លេសគឺធ្វើឡើងស្របគ្នាជាមួយកាណាដា ដែលបានប្រកាសវិធានការប្រឆាំងនឹងរបបយោធាផងដែរ ៕ ប្រភព៖ Reuters
-
អ្នកឆ្លង COVID-19 នៅទូទាំងពិភពលោកកើនឡើង១១០លាន៨៣ម៉ឺននាក់ ក្នុងនោះស្លាប់២លាន៤៥ម៉ឺននាក់ និងជាសះស្បើយ៨៥លាន៧៧ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១១០លាន៨៣ម៉ឺន៤ពាន់១៤៩ករណី ក្នុងនោះមានអ្នកជម្ងឺសរុបចំនួន២លាន៤៥ម៉ឺន២ពាន់៥១១នាក់ស្លាប់ និង ជាសះស្បើយឡើងវិញសរុបចំនួន៨៥លាន៧៧ម៉ឺន៣ពាន់៣៩៥នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៩ ខែកុម្ភៈ ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៨លាន៥២ម៉ឺន៣ពាន់៥២៤នាក់ ស្លាប់ចំនួន៥០ម៉ឺន៥ពាន់៣០៩នាក់ និងជាសះស្បើយចំនួន១៨លាន៧០ម៉ឺន៣ពាន់៤២១នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៩៦ម៉ឺន២ពាន់១៨៩នាក់ ស្លាប់ចំនួន១៥ម៉ឺន៦ពាន់១២៣នាក់ និងជាសះស្បើយ១០លាន៦៦ម៉ឺន៥ពាន់៦៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ១០លាន៣ម៉ឺន៦២៦នាក់ ស្លាប់២៤ម៉ឺន៣ពាន់៦១០នាក់ និងជាសះស្បើយ៨លាន៩៩ម៉ឺន៥ពាន់២៤៦នាក់ ៕ ប្រភព៖ worldometers
-
មេដឹកនាំសហរដ្ឋអាមេរិក និងអ៊ីស្រាអែលធ្វើកិច្ចពិភាក្សាតាមទូរស័ព្ទជាលើកដំបូង ដែលផ្តោតលើសារៈសំខាន់មួយចំនួន
អាមេរិក៖ ប្រធានាធិបតីអាមេរិកលោក ចូ បៃដិន បានធ្វើកិច្ចពិភាក្សាគ្នាតាមទូរស័ព្ទជាលើកដំបូងជានាយករដ្ឋមន្រ្តីអ៊ីស្រាអែលលោក ប៊ិនចាមីន ណឺតាន់យ៉ាហ៊ូ នៅថ្ងៃពុធម្សិលមិញ ។ នេះជាការហៅទូរស័ព្ទលើកដំបូងរបស់លោក បៃដិន ទៅកាន់មេដឹកនាំនៅតំបន់មជ្ឈិមបូព៌ា ចាប់តាំងពីរូបលោកបានចូលកាន់តំណែងកាលពីថ្ងៃទី២០ ខែមករាកន្លងទៅ ដើម្បីបង្ហាញពីសារៈសំខាន់នៃទំនាក់ទំនងរវាងសហរដ្ឋអាមេរិក និង អ៊ីស្រាអែលដែលមានភាពរឹងមាំអស់រយៈពេលជាច្រើនទសវត្សមកហើយ ។ បើតាមសេតវិមាននោះ លោក បៃដិន និងលោក ណឺតាន់យ៉ាហ៊ូ បានពិភាក្សាអំពីសារៈសំខាន់នៃការបន្តពិគ្រោះយោបល់យ៉ាងជិតស្និទ្ធលើបញ្ហាសន្តិសុខក្នុងតំបន់ និង អ៊ីរ៉ង់ ក៏ដូចជាសារៈសំខាន់នៃការធ្វើការ ដើម្បីជំរុញសន្តិភាពនៅទូទាំងតំបន់រួមទាំងរវាងអ៊ីស្រាអែល និងប៉ាឡេស្ទីន ។ បើតាមការិយាល័យរបស់នាយករដ្ឋមន្រ្តីអ៊ីស្រាអែល លោក បៃដិន បានសរសើរលោក ណឺតាន់យ៉ាហ៊ូ ចំពោះកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹងជំងឺកូវីដ ១៩ និងថា មេដឹកនាំប្រទេសទាំងពីរបានផ្លាស់ប្តូរគំនិតគ្នា ស្តីពីមធ្យោបាយនានាដើម្បីដោះស្រាយជាមួយនឹងជំងឺរាតត្បាតនេះផងដែរ ៕ ប្រភព៖ Reuters
-
មន្ទីរបញ្ចកោណបញ្ជាក់ថា ប្រហែល១ភាគ៣នៃយោធាអាមេរិកបដិសេធចាក់វ៉ាក់សាំង Covid-19
អាមេរិក៖ ប្រហែលមួយភាគបីនៃយោធាអាមេរិកកំពុងបដិសេធក្នុងការទទួលការចាក់វ៉ាក់សាំងបង្ការជំងឺ Covid-19 បើទោះបីជាមានករណីឆ្លងខ្លាំងនៅក្នុងជួរកងកម្លាំងក៏ដោយ នេះបើតាមការបញ្ជាក់របស់មន្រ្តីមន្ទីរបញ្ចកោណ ។ លោកឧត្តមសេនីយ៍ ចេស ចេសហ្វៀរ៉ូរ៉ូ បានបង្ហាញពីអត្រាបដិសេធដ៏ខ្ពស់ខាងលើនេះនៅក្នុងសភា ខណៈដែលក្រសួងការពារជាតិអាមេរិកនៅតែបន្តចាត់ថ្នាក់វ៉ាក់សាំងកូវីដ១៩ជាជម្រើសសំខាន់ ដោយសារតែពួកគេមិនទាន់ទទួលបានការយល់ព្រមពេញលេញពីរដ្ឋបាលឱសថសហព័ន្ធអាមេរិកនៅឡើយទេ ។ ជាមួយគ្នានេះ អ្នកនាំពាក្យមន្ទីរបញ្ចកោណ លោក ចន ឃើប៊ី បាននិយាយថា មិនមានទិន្នន័យលម្អិតអំពីយោធាស្តីពីការចាក់វ៉ាក់សាំងនោះទេ ប៉ុន្តែបានបញ្ជាក់ថា យោធាច្រើនជាង៩១ម៉ឺន៦ពាន់៥រយនាក់ហើយ ដែលត្រូវបានចាក់វ៉ាក់សាំងរហូតមកដល់ពេលនេះ ។ លោក ឃើប៊ី បន្ថែមថា នៅចុងសប្តាហ៍នេះ សមាជិកយោធាជាង១លាននាក់នឹងទទួលការចាក់វ៉ាក់សាំងការពារ ខណៈរដ្ឋមន្រ្តីការពារជាតិអាមេរិកលោក ឡយ អូស្ទីន បានទទួលការចាក់វ៉ាក់សាំងរួចហើយដែរ ។ ប៉ុន្តែដោយសារការចាក់វ៉ាក់សាំងការពារកូវីដ១៩ ត្រូវបានអនុម័តតែលើករណីបន្ទាន់ប៉ុណ្ណោះដូច្នេះពួកគេមិនអាចបង្ខំមនុស្សអោយចាក់បានទេ ៕ ប្រភព៖ AFP