-
ប៉ូលិសមីយ៉ាន់ម៉ាចាប់ខ្លួនមនុស្សជិត៥០០នាក់ហើយ ចាប់តាំងពីផ្ទុះបាតុកម្មតវ៉ាប្រឆាំងនឹងរដ្ឋប្រហារយោធា
មីយ៉ាន់ម៉ា៖ រដ្ឋាភិបាលយោធាមីយ៉ាន់ម៉ា បានចេញដីកាចាប់ខ្លួនបុគ្គលមានប្រជាប្រិយភាព០៦នាក់ដែលបានបំផុសអោយបុគ្គលិករដ្ឋជាច្រើន ធ្វើកូដកម្មមិនចូលធ្វើការ ខណៈចំនួនអ្នកដែលត្រូវបានចាប់ខ្លួនគិតចាប់តាំងពីថ្ងៃផ្ទុះរដ្ឋប្រហារយោធាក្នុងខែនេះ បានកើនឡើង ជិត៥០០នាក់ ។ កងទ័ពមីយ៉ាន់ម៉ាបានប្រកាសនៅថ្ងៃពុធនេះថា បុគ្គលទាំង០៦នាក់ដែលអាជ្ញាធរកំពុងតាមប្រមាញ់នេះ ក្នុងនោះរួមមានអ្នកដឹកនាំខ្សែភាពយន្ដ សិល្បៈករ និងតារាចម្រៀងម្នាក់ បាននិងកំពុងរងការចោទពីបទញុះញង់ឱ្យបុគ្គលិករដ្ឋចូលរួមក្នុងបាតុកម្មតវ៉ា ។ បទល្មើសនេះ អាចនឹងនាំអោយបុគ្គលជាប់ទោសទាំងនោះ ត្រូវបានកាត់ទោសជាប់ពន្ធធនាគាររយៈពេល០២ឆ្នាំ ។ គួរបញ្ជាក់ផងដែរថា កាលពីថ្ងៃពុធនេះ កងកម្លាំងសន្តិសុខមីយ៉ាន់ម៉ាបានបើកការបាញ់បង្ក្រាបទៅលើហ្វូងបាតុករនៅក្នុងទីក្រុង ម៉ាន់ដាឡាយ ជាក្រុងធំបំផុតទី២របស់ប្រទេសមីយ៉ាន់ម៉ា ខណៈពួកគេប្រឈមមុខជាមួយក្រុមកម្មករផ្លូវដែក ដែលនាំគ្នាបិទចរាចរណ៍រថភ្លើង ជាផ្នែកមួយនៃបាតុកម្មប្រឆាំងនឹងទង្វើ ដែលពួកគេចោទថា រដ្ឋប្រហារយោធា ហើយជាលទ្ធផលនោះ មានមនុស្សម្នាក់របួស ៕ ប្រភព៖ Reuters
-
ថៃមានគ្រូពេទ្យស្លាប់ដោយសារកូវីដ១៩ លើកដំបូង ជាអ្នកស្លាប់ទី៨៣
វេជ្ជបណ្ឌិតម្នាក់នៅក្នុងខេត្ត ម៉ាហា សារ៉ាកខាម បានស្លាប់ដោយសារតែជំងឺកូវីដ១៩ ជាគ្រូពេទ្យដំបូងដែលបានស្លាប់ដោយសារតែជំងឺកូវីដ១៩ នៅក្នុងប្រទេសនេះ។ វេជ្ជបណ្ឌិត Panya Hanphanitphan វ័យ៦៦ឆ្នាំ បានស្លាប់នៅមន្ទីរពេទ្យ Srinagrind នៅ Khon Kaen វេលាម៉ោង១៖១៩នាទី រំលងអធ្រាត ឈាងចូលថ្ងៃទី១៨ កុម្ភៈ ២០២១។ បូកបញ្ជូលទាំងការស្លាប់គ្រូពេទ្យរូបនេះ ធ្វើឲ្យអ្នកស្លាប់នៅជំងឺកូវីដ១៩ កើនដល់៨៣នាក់។ ព្រឹកថ្ងៃទី១៨ កុម្ភៈនេះ មានអ្នកជំងឺកូវីដ១៩ ចំនួន១៥០នាក់ទៀត កើនដល់ ២៥១១១នាក់ ជាសះស្បើយ ២៣៩៤៦នាក់ ស្មើនឹង៩៥.៣ភាគរយ៕
-
ប្រមុខការទូតអាមេរិកបញ្ជាក់ថា សហរដ្ឋអាមេរិកនឹងបង់ប្រាក់ជំពាក់ដល់អង្គការសុខភាពពិភពលោកចំនួន២០០លានដុល្លារនៅចុងខែកុម្ភៈខាងមុខ
អាមេរិក៖ រដ្ឋមន្ត្រីការបរទេសអាមេរិកលោក អាន់ថូនី ប្លីនខិន នៅថ្ងៃពុធនេះប្រកាសថា សហរដ្ឋអាមេរិកនឹងបង់ប្រាក់ជាង២០០លានដុល្លារ ដែលជាចំណែកបរិច្ចាគរបស់ខ្លួនអោយអង្គការសុខភាពពិភពលោក (WHO) នៅចុងខែកុម្ភៈខាងមុខនេះ ។ លោក ប្លីនខិន និយាយថា ថ្ងៃនេះខ្ញុំរីករាយនឹងអះអាងថា យ៉ាងយូរត្រឹមចុងខែនេះ អាមេរិកមានបំណងបង់ប្រាក់ជាង២០០លានដុល្លារដល់ WHO… នេះជាការបោះជំហានដ៏សំខាន់មួយឆ្ពោះទៅកាន់ការបំពេញកាតព្វកិច្ចហិរញ្ញវត្ថុ ក្នុងនាមជាសមាជិកអង្គការសុខភាពពិភពលោក និងវាឆ្លុះបញ្ចាំងការតាំងចិត្តរបស់យើងជាថ្មី ដើម្បីធានាថា WHO មានការគាំទ្រដែលខ្លួនត្រូវការដើម្បីដឹកនាំការឆ្លើយតបសកលចំពោះជំងឺឆ្លង ។ ប្រមុខការទូតអាមេរិករូបនេះបន្ថែមថា សហរដ្ឋអាមេរិកក៏នឹងផ្តល់ការគាំទ្រហិរញ្ញវត្ថុដ៏សំខាន់ដល់កម្មវិធី COVAX សំរាប់ចែកចាយវ៉ាក់សាំង Covid-19 ទៅកាន់បណ្តាប្រទេសក្រីក្រក្នុងពិភពលោកផងដែរ ។ អាមេរិកមានជំនឿថា ពហុភាគីនិយម អង្គការសហប្រជាជាតិ និង WHO មានសារសំខាន់ ដោយមិនត្រឹមតែសំរាប់ការឆ្លើយតបនឹង Covid-19 និងមនុស្សធម៌ដ៏មានប្រសិទ្ធភាពមួយទេ តែក៏ដើម្បីស្ថាបនាសមត្ថភាពសុខភាពសកលរឹងមាំឡើង និងសន្តិសុខសំរាប់អនាគត ៕ ប្រភព៖ CNBC
-
សហរដ្ឋអាមេរិកចោទប្រកាន់ជនជាតិកូរ៉េខាងជើង០៣រូបពីបទវាយប្រហារផ្នែកព័ត៌មានវិទ្យាលួចលុយពីធនាគារជុំវិញពិភពលោក១.៣ពាន់លានដុល្លារ
អាមេរិក៖ ក្រសួងយុត្តិធម៌អាមេរិក នៅថ្ងៃពុធនេះបានចោទប្រកាន់លើមន្ត្រីចារកម្មយោធាកូរ៉េខាងជើង០៣រូប ពីបទដឹកនាំយុទ្ធនាការវាយប្រហារផ្នែកព័ត៌មានវិទ្យា លួចលុយអេឡិចត្រូនិកគ្រីបតូ និងលុយពីធនាគារជាច្រើន នៅជុំវិញពិភពលោកប្រមាណ១.៣ពាន់លានដុល្លារ ។ ក្រសួងយុត្តិធម៌អាមេរិកបានបញ្ជាក់ថា មន្ត្រីចារកម្មយោធាកូរ៉េខាងជើងជាបុរសទាំង០៣រូបខាងលើ ត្រូវបានគេបញ្ជាក់អត្តសញ្ញាណមានឈ្មោះ លោក ចុន ឆាងយ៉ុក លោក គីម អ៊ីល និងលោក ផាក ជីនយ៉ុក ។ មន្ត្រីទាំងនេះ បម្រើការអោយការិយាល័យស៊ើបការណ៍សម្ងាត់ទូទៅកូរ៉េខាងជើង ដែលជាក្រុមការងារព័ត៌មានវិទ្យា ត្រូវបានអ្នកជំនាញសន្តិសុខស្គាល់ថា ជាក្រុមវាយប្រហារឡាហ្សារឹស ឬ APT 38 ៕ ប្រភព៖ Reuters
-
ប្រមុខអង្គការសហប្រជាជាតិជំរុញអោយមានផែនការសកល ដើម្បីការទទួលបានវ៉ាក់សាំង Covid-19 ដោយយុត្តិធម៌
ស្វីស៖ អគ្គលេខាអង្គការសហប្រជាជាតិលោក អាន់តូនីញ៉ូ ហ្គូទែរ៉េស នៅថ្ងៃពុធនេះ បានរិះគន់ការចែកចាយវ៉ាក់សាំង Covid-19 មិនស្មើគ្នា និងមិនយុត្តិធម៌ជាទូទៅ ដោយលោកបានទាមទារអោយមានកិច្ចខិតខំសកលមួយ ដើម្បីប្រជាជនទាំងអស់នៅគ្រប់ប្រទេស អាចចាក់វ៉ាក់សាំងក្នុងពេលឆាប់ៗតាមដែលអាចធ្វើបាន ។ លោក ហ្គូទែរ៉េស បានប្រាប់កិច្ចប្រជុំមួយរបស់ក្រុមប្រឹក្សាសន្តិសុខអង្គការសហប្រជាជាតិថា មានតែប្រទេសចំនួន១០ប៉ុណ្ណោះបានចាក់វ៉ាក់សាំង៧៥ភាគរយ នៃវ៉ាក់សាំងទាំងអស់ដែលចាក់កន្លងមក ខណៈប្រទេស១៣០មិនទាន់បានចាក់វ៉ាក់សាំងមួយដូសនៅឡើយទេ លោកថា នៅពេលដ៏សំខាន់នេះ សមភាពវ៉ាក់សាំងគឺជាការធ្វើតេស្តសីលធម៌ធំបំផុតនៅចំពោះមុខសហគមន៍សកលលោក ។ ជាមួយគ្នានេះ លោក ហ្គូទែរ៉េស ក៏បានអំពាវនាវអោយមហាអំណាចសេដ្ឋកិច្ចធំៗក្នុងពិភពលោកនៅក្នុងក្រុមប្រទេស G20 បង្កើតក្រុមការងារគ្រាអាសន្នមួយដើម្បីបង្កើតផែនការ និងសម្របសម្រួលការអនុវត្តវា ហើយនឹងការផ្តល់ហិរញ្ញប្បទាន ហើយថា ក្រុមការងារនេះគួរមានសមត្ថភាពប្រមែប្រមូលបណ្តាក្រុមហ៊ុនឱសថ និងអ្នកដើរតួឧស្សាហកម្ម និងឡូជីស្ទិកសំខាន់ៗ ៕ ប្រភព៖ AFP
-
ថៃនឹងទទួលបានវ៉ាក់សាំង Covid-19 ពីក្រុមហ៊ុនចិន Sinovac ក្នុងជំហានដំបូងនៅសប្តាហ៍ក្រោយនេះ
ថៃ៖ វ៉ាក់សាំង COVID-19 ដែលផលិតឡើងដោយក្រុមហ៊ុនចិន Sinovac នឹងមកដល់ថៃ នៅសប្តាហ៍ក្រោយ នេះបើតាមការបញ្ជាក់របស់ឧបនាយករដ្ឋមន្រ្តី និងជារដ្ឋមន្រ្តីសុខាភិបាលថៃលោក អាណូធីន ឆើនវីរ៉ាគុល ។ រដ្ឋមន្រ្តីសុខាភិបាលថៃរូបនេះ បានប្រាប់សមាជិកសភាថា ការបញ្ជូនវ៉ាក់សាំងចិនក្នុងជំហានទី១ គ្រោងនឹងទៅដល់ប្រទេសថៃនៅថ្ងៃទី២៤ ខែកុម្ភៈ បន្ទាប់មកលើកទី២ នឹងមកដល់នៅខែក្រោយ និងលើកទីប៣នៅខែមេសាខាងមុខ ។ លោកបន្ថែមទៀតថា វ៉ាក់សាំង AstraZeneca របស់ក្រុមហ៊ុនផលិតឱសថ Siam Bioscience នៅស្រុកផ្ទាល់ នឹងអាចបានប្រើប្រាស់ចាប់ពីចុងខែឧសភា ឬដើមខែមិថុនាខាងមុខ ខណៈដែលវ៉ាក់សាំងទាំងនេះ ក៏នឹងត្រូវចែកចាយដល់ប្រទេសដទៃទៀតផងដែរ ៕ ប្រភព៖ ស៊ីនហួរ
-
អ្នកឆ្លង COVID-19 នៅទូទាំងពិភពលោកកើនឡើង១១០លាន៤៣ម៉ឺននាក់ ក្នុងនោះស្លាប់២លាន៤៤ម៉ឺននាក់ និងជាសះស្បើយ៨៥លាន៣២ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១១០លាន៤៣ម៉ឺន៧២ករណី ក្នុងនោះមានអ្នកជម្ងឺសរុបចំនួន២លាន៤៤ម៉ឺន៩២៨នាក់ស្លាប់ និង ជាសះស្បើយឡើងវិញសរុបចំនួន៨៥លាន៣២ម៉ឺន៣ពាន់៤៨២នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៨ ខែកុម្ភៈ ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៨លាន៤៥ម៉ឺន៣ពាន់៥២៦នាក់ ស្លាប់ចំនួន៥០ម៉ឺន២ពាន់៥៤៤នាក់ និងជាសះស្បើយចំនួន១៨លាន៥៩ម៉ឺន៦ពាន់៤៩៧នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៩៤ម៉ឺន៩ពាន់៥៤៦នាក់ ស្លាប់ចំនួន១៥ម៉ឺន៦ពាន់៣៨នាក់ និងជាសះស្បើយ១០លាន៦៥ម៉ឺន៤ពាន់៧០៦នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៩លាន៩៧ម៉ឺន៩ពាន់២៧៦នាក់ ស្លាប់២៤ម៉ឺន២ពាន់១៧៨នាក់ និងជាសះស្បើយ៨លាន៩៥ម៉ឺន៤៥០នាក់ ៕ ប្រភព៖ worldometers
-
លោក ដូណាល់ ត្រាំ អំពាវនាវអោយសមាជិកបក្សសាធារណរដ្ឋបោះបង់ចោលមេដឹកនាំព្រឹទ្ធសភា លោក ម៉ាកខុននែល បន្ទាប់ពីទើបរួចខ្លួនពីការចោទប្រកាន់
អាមេរិក៖ អតីតប្រធានាធិបតីអាមេរិកលោក ដូណាល់ ត្រាំ បានថ្លែងវាយប្រហារលើមេដឹកនាំព្រឹទ្ធសភាបក្សសាធារណរដ្ឋលោក មីត ម៉ាកខុននែល មួយថ្ងៃបន្ទាប់ពីសមាជិកព្រឹទ្ធសភាបក្សសាធារណរដ្ឋចំនួន០៧រូបបានចូលរួមជាមួយបក្សប្រជាធិបតេយ្យទាំងអស់៥០រូប ដើម្បីបោះឆ្នោតលើការចោទប្រកាន់លើរូបលោក ពាក់ព័ន្ធនឹងហេតុការណ៍ក្រុមកុបករគាំទ្រលោកចូលអុកឡុងដ៏សាហាវនៅវិមានសភាកាលពីថ្ងៃទី០៦ ខែមករាកន្លងទៅនេះ ។ លោក ដូណាល់ ត្រាំ បានបញ្ជាក់នៅក្នុងសេចក្តីថ្លែងការណ៍មួយថា គណបក្សសាធារណរដ្ឋមិនអាចត្រូវបានគោរព ឬរឹងមាំជាមួយមេដឹកនាំនយោបាយដូចជាព្រឹទ្ធសមាជិក មីត ម៉ាកខុននែល បានឡើយ ។ លោកបន្ថែមថា លោក មីត គឺជាអ្នកនយោបាយស្រងេះស្រងោច ក្រញែក្រញូវ និងមិនចេះញញឹម ហើយប្រសិន បើព្រឹទ្ធសមាជិកគណបក្សសាធារណរដ្ឋបន្តនៅជាមួយគាត់ ពួកគេនឹងមិនឈ្នះម្តងទៀតឡើយ ។ ការថ្លែងវាយប្រហារបែបនេះរបស់លោក ត្រាំ បានកើតមានឡើងក្រោយលោក ម៉ាកខុននែល បាននិយាយកាលពីថ្ងៃសៅរ៍ថា ទោះបីជាលោកបានបោះឆ្នោតដើម្បីសម្រេចឱ្យលោក ត្រាំ រួចខ្លួនពីបទចោទប្រកាន់ក៏ដោយ ក៏អតីតប្រធានាធិបតីរូបនេះ នៅតែមានទំនួលខុសត្រូវខាងសីលធម៌ ចំពោះការអុកឡុកចូលវិមានសភានៅថ្ងៃទី០៦ ខែមករាកន្លងទៅ ៕ ប្រភព៖ ស៊ីនហួរ
-
សហរដ្ឋអាមេរិក និងកាណាដាកំពុងរងការវាយប្រហារពីព្យុះព្រិលទឹកកកដ៏អាក្រក់
អាមេរិក៖ អភិបាលទីក្រុងហ៊ូស្តុន លោក ស៊ីវែស្ទើ ធើណឺ នៅថ្ងៃអង្គារនេះបាននិយាយថា ប្រជាជន១.៣លាននាក់នៅទីក្រុងលោកគ្មានអគ្គិសនីប្រើប្រាស់ឡើយ ហើយបើគិតនៅទូទាំងរដ្ឋតិចសាស់វិញ គឺប្រហែល៤.៤លាននាក់គ្មានអគ្គិសនីប្រើប្រាស់ ។ ទន្ទឹមគ្នា អាជ្ញាធរនៅរដ្ឋតិចសាស់បានរងការរិះគន់ ដោយសារតែបណ្តាញផ្គត់ផ្គង់ថាមពលអគ្គិសនីរបស់រដ្ឋនេះ ពុំអាចបំពេញតម្រូវការបានគ្រប់គ្រាន់ នៅចំពោះមុខការធ្លាក់ព្រិល និងទឹកកកដ៏ខ្លាំងក្លា ដែលជាហេតុបង្កឲ្យមានការដាច់អគ្គិសនីនៅពាសពេញរដ្ឋ ។ បើតាមការព្យាករណ៍នោះ អាកាសធាតុដ៏អាក្រក់នេះនឹងបន្តកើតមានជាច្រើនថ្ងៃទៀតនៅតំបន់ភាគខាងត្បូង និងភាគឦសានសហរដ្ឋអាមេរិក ។ ដោយឡែកនៅក្នុងប្រទេសកាណាដាវិញ ព្យុះព្រិលទឹកកកដ៏អាក្រក់មួយក៏បានវាយប្រហារលើទីក្រុងតូរុនតូ និងតំបន់ព័ទ្ធជុំវិញនោះផងដែរនៅក្នុងថ្ងៃអង្គារសប្តាហ៍នេះ (ម៉ោងក្នុងតំបន់) ដោយគេសង្កេតព្រិលនៅពាសពេញតាមដងផ្លូវក្នុងទីក្រុងនៃរដ្ឋ អូតារីអូ មួយនេះ ៕ ប្រភព៖ Reuters និង ស៊ីនហួរ
-
ជប៉ុនចាប់ផ្តើមយុទ្ធនាការចាក់វ៉ាក់សាំង Covid-19 របស់ក្រុមហ៊ុន Pfizer-BioNTech ដល់បុគ្គលិកសុខាភិបាលក្នុងទីក្រុងតូក្យូ
ជប៉ុន៖ អាជ្ញាធរជប៉ុន នៅថ្ងៃពុធនេះ បានចាប់ផ្តើមកម្មវិធីចាក់វ៉ាក់សាំង COVID-19 របស់ក្រុមហ៊ុន ភីហ្វីហ្សឺ-បាយអូអិនធិច ដល់បុគ្គលិកសុខាភិបាលក្នុងទីក្រុងតូក្យូ ស្របពេលដែលនាយករដ្ឋមន្រ្តីជប៉ុនលោក ស៊ូហ្គា យូស៊ីហ៊ីដេ ព្យាយាមយកឈ្នះលើវីរុសនេះ ហើយធ្វើជាម្ចាស់ផ្ទះកីឡាអូឡាំពិកនៅរដូវក្តៅខាងមុខនេះ ។ អនុរដ្ឋមន្រ្តីសុខាភិបាលជប៉ុនលោក ហ៊ីរ៉ូស៊ី យ៉ាម៉ាម៉ូតុ បានប្រាប់អ្នកយកព័ត៌មាននៅឯមន្ទីរពេទ្យ ក្រោយពេលចាក់វ៉ាក់សាំងថា នេះជាជំហានដំបូងឆ្ពោះទៅរកការបញ្ចប់វីរុសកូរ៉ូណា ។ ដោយឡែកនាយកមជ្ឈមណ្ឌលវេជ្ជសាសស្ត្រតូក្យូ លោក កាហ្ស៊ុយហ៊ីរ៉ូ អារ៉ាគី ក៏បាននិយាយដែរថា ក្នុងនាមជានាយកម្នាក់ ខ្ញុំនាំមុខគេក្នុងការប្រើវា… ខ្ញុំមិនចូលចិត្តចាក់ថ្នាំប៉ុន្មានទេ តែការចាក់នេះមិនឈឺទេ… ខ្ញុំមានអារម្មណ៍ធូរស្រាល ។ សូមជម្រាបថា ជប៉ុនមានផែនការចាក់វ៉ាក់សាំងដំបូងដល់បុគ្គលិកវេជ្ជសាស្ត្រចំនួន៤ម៉ឺននាក់នៅទូទាំងប្រទេស ហើយនឹងសិក្សាពីផលប៉ះពាល់ក្រោយការចាក់២ដូសលើពួកគេ២ម៉ឺននាក់ ។ ជប៉ុនសង្ឃឹមថា នឹងចាក់វ៉ាក់សាំងដល់បុគ្គលិកសុខាភិបាលប្រមាណ៣.៧លាននាក់ចាប់ពីខែមីនាតទៅ និងប្រជាជន៣៦លាននាក់ទៀតចាប់ពីអាយុ៦៥ឆ្នាំឡើងចាប់ពីខែមេសា មុនបន្តទៅដល់ប្រជាជនទូទៅ ៕ ប្រភព៖ Reuters