-
បេសកជនពិសេសអង្គការសហប្រជាជាតិព្រមានពីការផ្ទុះឡើងអំពើហិង្សានៅមីយ៉ាន់ម៉ា ខណៈលោកស្រី ស៊ូជី រងការចោទប្រកាន់ថ្មីមួយទៀត
មីយ៉ាន់ម៉ា៖ បេសកជនពិសេសរបស់អង្គការសហប្រជាជាតិ ទទួលបន្ទុកកិច្ចការប្រទេសមីយ៉ាន់ម៉ាព្រមានថា អំពើហិង្សាអាចនឹងផ្ទុះឡើងនៅថ្ងៃពុធនេះ ស្របពេលដែលក្រុមបាតុករប្រឆាំងរដ្ឋប្រហារ និងយោធាមីយ៉ាន់ម៉ា ត្រូវបានគេរំពឹងថា នឹងប្រឈមមុខដាក់គ្នាសាជាថ្មីម្តងទៀត ។ កងទ័ពមីយ៉ាន់ម៉ាត្រូវបានដាក់ពង្រាយបន្ថែមទៅកាន់ទីក្រុងជាច្រើន ខណៈរដ្ឋាភិបាលយោធាមីយ៉ាន់ម៉ាបានកាត់ផ្ដាច់ប្រព័ន្ធអ៊ីនធើណិតស្ទើរតែទាំងស្រុង ឈានចូលដល់ថ្ងៃទី៣ គិតត្រឹមព្រឹកថ្ងៃពុធនេះ ដើម្បីទប់ស្កាត់ និងបង្រ្កាបបាតុកម្មតវ៉ា ។ ជុំវិញបញ្ហានេះដែរ បេសកជនពិសេសរបស់អង្គការសហប្រជាជាតិ ទទួលបន្ទុកកិច្ចការប្រទេសមីយ៉ាន់ម៉ាលោក ថម អ៊ែនឌ្រូស៍ បាននិយាយនៅក្នុងសេចក្តីថ្លែងការណ៍មួយថា ខ្ញុំពិតជាមានការព្រួយបារម្ភជាខ្លាំង ចំពោះអំពើហិង្សាទ្រង់ទ្រាយធំ ដែលអាចផ្ទុះឡើងនៅថ្ងៃពុធនេះ ដែលយើងមិនធ្លាប់បានឃើញ ចាប់តាំងពីមានរដ្ឋប្រហារដណ្ដើមអំណាចពីរដ្ឋាភិបាលស៊ីវិលកាលពីថ្ងៃទី០១ ខែកុម្ភៈមក ៕ ប្រភព៖ AP
-
អង្គការសុខភាពពិភពលោកសម្តែងការព្រួយបារម្ភ ក្រោយផ្ទុះជំងឺអេបូឡាសាជាថ្មីទៀតក្នុងប្រទេសអាហ្វ្រិកចំនួនពីរ
ស្វីស៖ អង្គការសុខភាពពិភពលោក (WHO) បានសម្តែងការព្រួយបារម្ភ ពាក់ព័ន្ធនឹងការឆ្លងរាតត្បាតនៃជំងឺ អេបូឡា នៅក្នុងប្រទេសអាហ្វ្រិកចំនួនពីរ ។ អគ្គនាយកអង្គការសុខភាពពិភពលោក (WHO) លោក អាដាណម ហ្គេប្រេយ៉េសឹស បានបញ្ជាក់ក្នុងសន្និសិទសារព័ត៌មានថា អាជ្ញាធរក្នុងប្រទេសហ្គីណេបានប្រកាសពីឆ្លងរាតត្បាតដាច់ដោយឡែកមួយនៃជំងឺអេបូឡា ក្រៅពីការផ្ទុះមួយត្រូវបានរកឃើញនៅសាធារណរដ្ឋប្រជាធិបតេយ្យកុងហ្គោកាលពីសប្តាហ៍មុន ។ បើតាមអគ្គនាយក (WHO) ០៤ករណីត្រូវបានគេរាយការណ៍រកឃើញនៅសាធារណរដ្ឋប្រជាធិបតេយ្យកុងហ្គោ និង០៣ករណីទៀតនៅហ្គីណេ ខណៈអង្គការសុខភាពពិភពលោកក៏បាននិងកំពុងធ្វើការងារយ៉ាងជិតស្និទ ជាមួយអាជ្ញាធរសុខាភិបាលរបស់ប្រទេសទាំងពីរផងដែរ ។ គួរបញ្ជាក់ផងដែរថា ការផ្ទុះវីរុស អេបូឡា នៅអាហ្វ្រិកខាងលិចកាលពីឆ្នាំ២០១៤-២០១៦កន្លងទៅ បានសម្លាប់ជីវិតមនុស្សរហូតដល់ជាង១ម៉ឺន១ពាន់៣រយនាក់ ដោយមានករណីឆ្លងជាង២ម៉ឺន៨ពាន់៦រយករណីឯណោះ ៕ ប្រភព៖ ស៊ីនហួរ
-
ប្រធាន WTO ថ្មីសន្យាលើកយកការប្រយុទ្ធប្រឆាំងនឹងជំងឺ Covid-19 ជាបញ្ហាអាទិភាពរបស់ខ្លួន
ស្វីស៖ លោកស្រី ង៉ូហ្ស៊ី អូកុនចូ អ៊ីវាឡា ដែលទទួលការតែងតាំងជាផ្លូវការនៅថ្ងៃចន្ទនេះ ជាប្រធានអង្គការពាណិជ្ជកម្មពិភពលោក (WTO) នោះ បានសន្យាលើកយកការប្រយុទ្ធប្រឆាំងនឹងជំងឺកូវីដ១៩ជាបញ្ហាអាទិភាពរបស់ខ្លួន ការលើកកម្ពស់លំហូរវ៉ាក់សាំងសេរី និងការផ្គត់ផ្គង់គ្រឿងបរិក្ខា ព្រមទាំងបង្កើតយន្តការដោះស្រាយជម្លោះនានាជាដើម ។ លោក អូកុនចូ អ៊ីវាឡា បាននិយាយប្រាប់អ្នកសារព័ត៌មានថា យើងរងភាពតក់ ស្លុតពីរយ៉ាងពីជំងឺរាតត្បាត មួយគឺបញ្ហាសុខភាព និងម្យ៉ាងទៀតគឺបញ្ហាសេដ្ឋកិច្ច ដែលកំពុងធ្វើអោយមានការប្រកួតប្រជែងយ៉ាងច្រើន ហើយវាក៏នាំមកនូវគ្រោះមហន្តរាយសេដ្ឋកិច្ចដល់ផ្នែកជាច្រើនរបស់ពិភពលោក ។ WTO នៅត្រង់ចំនុចនេះក្នុងពេលនេះក៏កំពុងប្រឈមមុខនូវការប្រកួតប្រជែងជាច្រើនដែរ… ដូច្នេះវាមិនអាចធ្វើការងារដូចធម្មតានៅ WTO បានទេ ។ លោកស្រីបានសង្កត់ធ្ងន់ទៀតថា យើងក៏មានបញ្ហាខ្វះការជឿទុកចិត្តដែលបានបង្កើតឡើងតាមពេលវេលាផងដែរ មិនមែនតែរវាងសហរដ្ឋអាមេរិក និងចិនប៉ុណ្ណោះទេ តែក៏រវាងសមាជិកប្រទេសកំពុងអភិវឌ្ឍ និងអភិវឌ្ឍផងដែរ ។សូមបញ្ជាក់ថា អ្នកការទូតនីហ្សេរីយ៉ា លោកស្រី ង៉ូហ្ស៊ី អូកុនចូ អ៊ីវាឡា ត្រូវបានជ្រើសរើសជាប្រធានអង្គការពាណិជ្ជកម្មពិភពលោក (WTO) ដែលជាស្ត្រីដំបូងនិងអាហ្វ្រិកដំបូង ដែលត្រូវមកដឹកនាំស្ថាប័នពាណិជ្ជកម្មពិភពលោកមួយនេះ ៕ ប្រភព៖ ស៊ីនហួរ
-
ប៉ូលិសមីយ៉ាន់ម៉ាដាក់ការចោទប្រកាន់ថ្មីមួយទៀតប្រឆាំងនឹងលោកស្រី អោងសាន ស៊ូជី
មីយ៉ាន់ម៉ា៖ ប៉ូលិសមីយ៉ាន់ម៉ាបានដាក់ការចោទប្រកាន់ថ្មីមួយទៀតប្រឆាំងនឹងលោកស្រី អោងសាន ស៊ូជី ពីបទរំលោភច្បាប់គ្រប់គ្រងគ្រោះមហន្តរាយធម្មជាតិរបស់ប្រទេស ដែលការចោទប្រកាន់នេះត្រូវបានប្រើជាញឹកញាប់ ដើម្បីកាត់ទោសមនុស្សដែលប្រឆាំងនឹងការរឹតត្បិតវីរុសកូរ៉ូណា ។ ការចោទប្រកាន់ថ្មីខាងលើនេះ អាចនឹងធ្វើឲ្យលោកស្រី ស៊ូជី ត្រូវឃុំខ្លួនមិនកំណត់ពេលដោយគ្មានការជំនុំជម្រះ ក្រោយយោធាបានផ្លាស់ប្តូរក្រមព្រហ្មទណ្ឌកាលពីសប្តាហ៍មុន ។ ក្រមព្រហ្មទណ្ឌថ្មីអនុញ្ញាតអោយឃុំខ្លួនមនុស្សដោយមិនចាំបាច់មានការអនុញ្ញាតពីតុលាការ ។ ការពិន័យជាអតិបរមាចំពោះការរំលោភលើច្បាប់វីរុសកូរ៉ូណា គឺត្រូវជាប់ពន្ធនាគាររយៈពេល០៣ឆ្នាំ ។ ស្របពេលជាមួយគ្នានេះដែរ លោកប្រធានាធិបតី វីន ម្យីនត៍ ដែលកំពុងជាប់ឃុំដូចលោកស្រី ស៊ូជី ដែរនោះ ក៏កំពុងប្រឈមមុខនឹងការចោទប្រកាន់នៅក្រោមច្បាប់ដូចគ្នានេះដែរ សម្រាប់ការប្រមូលផ្តុំជាសាធារណៈ ចំពេលមានការរីករាលដាលនៃវីរុសដ៏កាចសាហារមួយនេះ ៕ ប្រភព៖ AP
-
យោធាមីយ៉ាន់ម៉ាអះអាងថា អ្វីដែលខ្លួនធ្វើមិនមែនជារដ្ឋប្រហារទេ ហើយធានាថា នឹងរៀបចំការបោះឆ្នោតឡើងវិញ
មីយ៉ាន់ម៉ា៖ យោធាមីយ៉ាន់ម៉ាបានធានាអះអាងជាថ្មីថា ខ្លួននឹងរៀបចំការបោះឆ្នោតឡើងវិញ និង ប្រគល់អំណាចទៅដល់គណបក្សដែលឈ្នះ ហើយបានបដិ សេធថា ការទម្លាក់រដ្ឋាភិបាលដែលជាប់ឆ្នោតនោះ គឺជារដ្ឋប្រហារ និងបានថ្កោលទោសចំពោះក្រុមបាតុករដែលបានបង្កឲ្យមានអំពើហិង្សា និងបំភិតបំភ័យមន្ត្រីរដ្ឋាភិបាលផងដែរ ។ មន្ត្រីជាន់ខ្ពស់យោធាមីយ៉ាន់ម៉ា លោកឧត្តមសេនីយ៍ទោ ហ្សរ មីន ថាន់ ជាអ្នកនាំពាក្យនៃក្រុមប្រឹក្សារដ្ឋមីយ៉ាន់ម៉ា ដែលកំពុងកាន់អំណាចបណ្តោះអាសន្ន បាននិយាយនៅថ្ងៃអង្គារនេះថា គោលបំណងរបស់យើង គឺរៀបចំការបោះឆ្នោត និងប្រគល់អំណាចដល់គណបក្សដែលឈ្នះ… យើងធានាថា ការបោះឆ្នោតនឹងត្រូវធ្វើឡើង ។ យ៉ាងណាមិញ យោធាមីយ៉ាន់ម៉ានៅតែមិនទាន់ប្រកាសនៅឡើយទេថា ការបោះឆ្នោតជាថ្មីនឹងប្រព្រឹត្តទៅនៅពេលណានោះ ។ ឆ្លើយតបចំពោះសំនួរអំពីការឃុំខ្លួនម្ចាស់ពានរង្វាន់ណូបែលសន្តិភាព លោកស្រី អោងសាន ស៊ូជី និងលោកប្រធានាធីបតី វីន ម្យីនត៍ វិញ អ្នកនាំពាក្យយោធារូបនេះបានត្រឹមបញ្ជាក់ថា យោធានឹងធ្វើអ្វីៗគ្រប់យ៉ាងដោយស្របទៅតាមរដ្ឋធម្មនុញ្ញ ៕ ប្រភព៖ AFP
-
នាយករដ្ឋមន្ត្រីថៃប្រឈមនឹងការបោះឆ្នោតទម្លាក់សេចក្តីទុកចិត្ត ចំពេលផ្ទុះបាតុកម្មជាថ្មី
នាយករដ្ឋមន្ត្រីនៃប្រទេសថៃ លោក ប្រាយុទ្ធ ចាន់អូចា បានប្រឈមនឹងការបោះឆ្នោតទម្លាក់សេចក្តីទុកចិត្តក្នុងរដ្ឋសភា ជាថ្មីទៀត ក្នុងពេលផ្ទុះបាតុកម្មឡើងវិញ នាប៉ុន្មានថ្ងៃមកនេះ។ លោក ប្រាយុទ្ធ ចាន់អូចា កាលពីថ្ងៃទី១៦ កុម្ភៈ ម្សិលមិញ ត្រូវបានក្រុមសមាជិកសភាមកពីគណបក្សប្រឆាំងរិះគន់ធ្ងន់ៗ រឿងដំណោះស្រាយលើវិបត្តិសេដ្ឋកិច្ច ស្របពេលដែលមានបាតុកម្មជាថ្មីជំរុញឲ្យលោកចុះចេញពីតំណែងហើយក៏ជាបាតុកម្មឲ្យធ្វើកំណែទម្រង់របបរាជានិយមដែរ។ សមាជិកសភាបានរិះគន់បែបនេះ អំឡុងការចាប់ផ្តើមពិភាក្សាលើការឈានដល់បោះឆ្នោតទម្លាក់ទំនុកចិត្តលើនាយករដ្ឋមន្ត្រី ដោយក្រុមសមាជិកសភាទាំងនោះបានកំណត់ថា នឹងបោះឆ្នោតនៅថ្ងៃសៅរ៍ សប្តាហ៍នេះ លើជោគវាសនារដ្ឋបាលរបស់លោកប្រាយុទ្ធ អតីតមេដឹកនាំរដ្ឋប្រហារយោធាកាលពីឆ្នាំ២០១៤។ ក្រុមបាតុករបានត្រលប់មកធ្វើព្យុះភ្លៀងនៅតាមដងវិថីវិញ នាប៉ុន្មានសប្តាហ៍នេះ ដោយអំពាវនាវឲ្យលោកនាយករដ្ឋមន្ត្រី ចុះចេញពីតំណែង និងធ្វើការកែប្រែរបបរាជានិយម៕
-
ទាន់ហេតុការណ៍! ស្លាប់មនុស្ស៣៧នាក់ ករណីឡានក្រុង១គ្រឿងធ្លាក់ចូលព្រែក
មានអ្នកដំណើរយ៉ាងតិច៣៧នាក់បានស្លាប់ ក្នុងហេតុការណ៍គ្រោះថ្នាក់ចរាចរណ៍រថយន្តក្រុង១គ្រឿងត្រូវបានបើកធ្លាក់ចុះពីលើស្ពាន ចូលទៅក្នុងព្រែកមួយកន្លែង ក្នុងរដ្ឋ Madhya Pradesh ភាគកណ្តាលប្រទេសឥណ្ឌា នាថ្ងៃអង្គារទី១៦ កុម្ភៈនេះ នេះបើតាមនគរបាលប្រាប់ទីភ្នាក់ងារសារព័ត៌មាន AFP ។ មន្ត្រីនគរបាលប្រចាំស្រុក Dharamveer Singh បាននិយាយថា «មកទល់ពេលនេះ រកឃើញសាកសព៣៧នាក់ ហើយប្រតិបត្តិការសង្គ្រោះនិងរុករកនៅតែបន្តធ្វើ» ខណៈគេដឹងថា មានអ្នកដំណើរចំនួន៤៤នាក់នៅលើរថយន្ត៕
-
ក្រុមហ៊ុនចិន Great Wall សម្លឹងឃើញថៃជាសក្តានុពលល្អប្រចាំតំបន់ ផលិតរថយន្តអគ្គិសនី
ក្រុមហ៊ុនផលិតរថយន្តដ៏ធំនៅប្រទេសចិន Great Wall Motors បានជ្រើសរើសប្រទេសថៃ ជាទីតាំងបង្កើតមជ្ឈមណ្ឌលផលិតរថយន្តអគ្គិសនី ប្រចាំតំបន់។ នេះគឺជាចំណាប់អារម្មណ៍របស់លោក Zhang Jiaming ប្រធានក្រុមហ៊ុន Great Wall Motors ប្រចាំអាស៊ាន ក្នុងពេលដែលលោកបានជួបពិភាក្សាការងារជាមួយនាយករដ្ឋមន្ត្រីថៃ ប្រាយុទ្ធ ចាន់អូចា និងមន្ត្រីជាន់ខ្ពស់ផ្សេងៗទៀត កាលពីម្សិលមិញ។ អ្នកនាំពាក្យរាជរដ្ឋាភិបាលថៃ Anucha Burapachaisri បាននិយាយថា លោកប្រាយុទ្ធបានប្រាប់ភាគីចិន នាពេលនោះថា វាគឺជាកិត្តិយសអស្ចារ្យមួយសម្រាប់ថៃ ដែលត្រូវបានជ្រើសរើសជាទីតាំងផលិត ប្រចាំតំបន់អាស៊ីអាគ្នេយ៍ ដែលសំដៅលើការផលិតរថយន្ត បន្ថយការប្រើប្រាស់ប្រេងសាំង ជាមួយនឹងជំនួយបច្ចេកវិទ្យានិងនវានុវត្តន៍។ ភាគីចិនអះអាងថា ក្រុមហ៊ុនមានផែនការផលិតរថយន្ត៨ម៉ឺនគ្រឿង ក្នុងត្រីមាសដំបូងនៃឆ្នាំ២០២១ នៅប្រទេសថៃ សម្រាប់លក់ទូទាំងតំបន់អាស៊ីអាគ្នេយ៍ និងផ្តល់ឳកាសការងារជាច្រើនដល់ពលរដ្ឋថៃ និងផ្តល់ជំនាញផងដែរ។ ពេលនោះដែរ ក្រុមហ៊ុនចិនមួយនេះក៏បានបរិច្ចាគម៉ាស់៥០ម៉ាស់ ដល់ភាគីថៃ ជាការចូលរួមចំណែកប្រយុទ្ធប្រឆាំងនឹងជំងឺកូវីដ១៩ដែរ៕ ប្រភពពីបាងកកប៉ុស្តិ៍
-
ប្រេសិតពិសេសអង្គការសហប្រជាជាតិព្រមានថា យោធាមីយ៉ាន់ម៉ានឹងទទួលរងផលវិបាកធ្ងន់ធ្ងរ បើសិនហ៊ានឆ្លើយតបខ្លាំងៗលើប្រជាជនដែលកំពុងធ្វើបាតុកម្ម
បរទេស៖ ប្រេសិតពិសេសអង្គការសហប្រជាជាតិលោកស្រី គ្រីស្ទីន ស្កាណឺ ប៊ឺជេនណឺ បានព្រមានមេដឹកនាំយោធាមីយ៉ាន់ម៉ាថា នឹងទទួលរងផលវិបាកធ្ងន់ធ្ងរ ប្រសិនបើមានសកម្មភាពឆ្លើយតបយ៉ាងចាស់ដៃបែបណាមួយលើប្រជាជនមីយ៉ាន់ម៉ាដែលកំពុងធ្វើបាតុកម្មតវ៉ា ។ រដ្ឋាភិបាលយោធាមីយ៉ាន់ម៉ាបានបញ្ជូនទាហានបន្ថែមទៀតមកក្នុងទីក្រុងធំ បើទោះជាចំនួនប្រជាជនចូលរួមបាតុកម្ម មានការថយចុះនៅថ្ងៃទី១៥ ខែកុម្ភៈនេះ បើធៀបនឹងថ្ងៃទី១៤ ខែកុម្ភៈកន្លងទៅ ។ ការបញ្ជូនកម្លាំងទាហានចូលមកក្នុងទីក្រុងធំៗបែបនេះ វាគឺជាសញ្ញាមួយដែលបង្ហាញថា របបសឹកអាចនឹងចាត់វិធានការបង្ក្រាបហិង្សាលើក្រុមអ្នកតវ៉ា ។ បន្ថែមលើនេះ លោកស្រី ស្កាណឺ ប៊ឺជេនណឺ ក៏បានលើកឡើងពីផលវិបាកមួយចំនួន ជុំវិញការកាត់ផ្តាច់អ៊ីនធើណិតនៅមីយ៉ាន់ម៉ា ដែលអាចមានបញ្ហាជាច្រើនដូចជា ប៉ះពាល់វិស័យធនាគារ ភាពតានតឹងនៅក្នុងស្រុក និងវិស័យផ្សេងទៀត ។ យ៉ាងណាមិញ រហូតមកទល់ពេលនេះ រដ្ឋាភិបាលយោធាមីយ៉ាន់ម៉ាមិនទាន់ចាត់វិធានការធ្ងន់ធ្ងរណាមួយលើក្រុមអ្នកតវ៉ានៅឡើយទេ ពោលគឺមានត្រឹមតែសកម្ម ភាពបំបែកក្រុមបាតុករ តាមរយៈការបាញ់ចំពាមកៅស៊ូ បាញ់ទឹក និងគ្រាប់កាំ ភ្លើងជ័រជាដើម ។ ចំណែកក្រុមបាតុករបានចោលដុំឥដ្ឋ និងវត្ថុផ្សេងទៀតដាក់ក្រុមប៉ូលិសបង្ក្រាបបាតុកម្មវិញដែរ ៕ ប្រភព៖ Reuters
-
ថៃកំពុងពិចារណាបន្ថែមរយៈពេលធ្វើចត្តាឡីស័កលើអ្នកដំណើរមកពីតំបន់អាហ្វ្រិក ខណៈទើបរកឃើញអ្នកឆ្លង Covid-19 ថ្មីៗ៧២ករណីទៀតនៅថ្ងៃអង្គារនេះ
ថៃ៖ មជ្ឈមណ្ឌល នៃរដ្ឋបាលគ្រប់គ្រងស្ថានភាពជំងឺ Covid-19 របស់ប្រទេសថៃបាននិងកំពុងពិចារណាបន្ថែមរយៈពេលធ្វើចត្តាឡីស័ក ទៅលើអ្នកដំណើរដែលមកពីតំបន់ទ្វីបអាហ្វ្រិករហូតដល់២១ថ្ងៃ ដើម្បីទប់ស្កាត់ឆ្លងរាលដាលជំងឺ Covid-19 ។ ការបន្ថែមចំនួនថ្ងៃធ្វើចត្តាឡីស័កខាងលើនេះ ជាផែនការឆ្លើយតបទៅនឹងការរកឃើញអ្នកដំណើរជនជាតិថៃម្នាក់ អាយុ៤១ឆ្នាំមានជំងឺ Covid-19 បំប្លែងខ្លួនថ្មីមានប្រភពនៅអាហ្វ្រិកខាងត្បូងនៅលើទឹកដីថៃជាលើកដំបូង ។ បុរសជនជាតិថៃរូបនោះ ជាអ្នកជំនួញធ្វើដំណើរមកពីប្រទេសតង់ហ្សានីបានមកដល់ប្រទេសថៃកាលពីថ្ងៃទី២៩ ខែមករា ឆ្នាំ២០២១ ។ ស្របពេលជាមួយគ្នានេះ អាជ្ញាធរសុខាភិបាលថៃក៏បានកត់ត្រាពីអ្នកឆ្លងថ្មីៗចំនួន៧២ករណីបន្ថែមទៀតផងដែរនៅថ្ងៃអង្គារនេះ ធ្វើអោយតួលេខអ្នកឆ្លង Covid-19 សរុបនៅទូទាំងប្រទេសកើនឡើងដល់២ម៉ឺន៤ពាន់៧៨៦ករណី ចាប់តាំងពីវីរុសដ៏កាចសាហាវមួយនេះផ្ទុះឡើងដំបូងនៅថៃកាលពីខែមករា ឆ្នាំមុន ចំនែកឯអ្នកស្លាប់វិញមិនមាននោះទេ ពោលគឺនៅតែមានចំនួន៨២នាក់ដដែល ៕ ប្រភព៖ Bangkok Post