-
នគរបាលមីយ៉ាន់ម៉ាផ្តើមប្រើកាំភ្លើងបាញ់ទឹកបង្ក្រាបបាតុកររាប់ម៉ឺននាក់
នគរបាលក្នុងរដ្ឋធានីណៃពីដោ ប្រទេសមីយ៉ាន់ម៉ាបានប្រើប្រាស់កាំភ្លើងបាញ់ទឹកបង្ក្រាបក្រុមបាតុករ នៅថ្ងៃចន្ទ ទី៨ កុម្ភៈនេះ ខណៈដែលពួកសកម្មជនបានធ្វើសកម្មភាពតវ៉ាប្រឆាំងនឹងរដ្ឋប្រហារយោធា កាលពីសប្តាហ៍មុននោះ។ពលរដ្ឋម្នាក់ឈ្មោះថា Kyaw Kyaw បាននិយាយថា «នគរបាលបានប្រើប្រាស់កាំភ្លើងបាញ់សម្អាតដងផ្លូវ។»រូបភាពតាមបណ្តាញសង្គមបានបង្ហាញពីការរងរបួសពីការបង្ក្រាបនេះ ពោលគឺនៅពេលដែលត្រូវបានបាញ់ឲ្យផ្អឹបនឹងដី។បាតុកររាប់ម៉ឺននាក់បានជួបជុំគ្នា ប៉ុន្មានថ្ងៃមកនេះ ដើម្បីតវ៉ាប្រឆាំងនឹងក្រុមយោធា ដែលបានធ្វើរដ្ឋប្រហារទម្លាក់លោកស្រី អ៊ួងសានស៊ូជី ហើយទាមទារឲ្យត្រលប់មកប្រជាធិបតេយ្យឡើងវិញ៕ ប្រភពពី CNA
-
លោក ចូ បៃដិន អះអាងជាថ្មីថា សហរដ្ឋអាមេរិកនឹងមិនដកទណ្ឌកម្មសេដ្ឋកិច្ចពីអ៊ីរ៉ង់ជាមុនឡើយ បើសិនទីក្រុងតេហេរ៉ង់មិនឈប់ចម្រាញ់សារធាតុអ៊ុយរ៉ាញ៉ូម
អាមេរិក៖ ប្រធានាធិបតីអាមេរិក ចូ បៃដិន បញ្ជាក់ជាថ្មីថា ប្រទេសរបស់លោកនឹងមិនដកទណ្ឌកម្មសេដ្ឋកិច្ចប្រឆាំងប្រទេសអ៊ីរ៉ង់ជាមុនឡើយ ខណៈណាទីក្រុងតេហេរ៉ង់បញ្ឈប់ការចម្រាញ់សារធាតុអ៊ុយរ៉ាញ៉ូម ក៏ដូចជាមិនអនុវត្តកាតព្វកិច្ចនៃកិច្ចព្រមព្រៀងនុយក្លេអ៊ែរជាមុននោះទេ ។ ក្នុងកិច្ចសម្ភាសជាមួយទូរទស្សន៍ CBS នៅថ្ងៃអាទិត្យម្សិលមិញ លោក បៃដិន បានឆ្លើយថា ទេ! នៅពេលត្រូវបានសួរថាតើអាមេរិកនឹងលើកទណ្ឌកម្មជាមុន ដើ ម្បីបញ្ចុះបញ្ចូលអ៊ីរ៉ង់ឲ្យត្រឡប់មកគោរពកិច្ចព្រមព្រៀង ឬយ៉ាងណា? ប៉ុន្តែលោក បៃដិន ងក់ក្បាលជាសញ្ញាយល់ព្រម នៅពេលអ្នកសម្ភាសន៍និយាយថា អាមេរិកនឹងលើកទណ្ឌកម្ម បើសិនជាអ៊ីរ៉ង់បញ្ឈប់ការចម្រាញ់សារធាតុអ៊ុយរ៉ានីញ៉ូម ។ ការកត់សម្គាល់ខាងលើនេះរបស់លោក បៃដិន បានកើតមានឡើងស្របពេលរដ្ឋមន្ត្រីការបរទេសអ៊ីរ៉ង់ លោក ចាវ៉ាដ ហ្សារីហ្វ បានដាក់លក្ខខណ្ឌឱ្យអាមេរិកត្រូវចូលរួមកិច្ចព្រមព្រៀងនេះវិញឲ្យបានមុនថ្ងៃទី២១ ខែកុម្ភៈ ព្រោះសភាអ៊ីរ៉ង់ដែលកាន់កាប់ដោយអ្នកមានទំនោរប្រឆាំងអាមេរិក បានអនុម័តច្បាប់ឱ្យរដ្ឋាភិបាលបង្កើនសកម្មភាពនុយក្លេអ៊ែរ បើសិនអាមេរិកមិនដកទណ្ឌកម្មសេដ្ឋកិច្ចនៅត្រឹមថ្ងៃទី២១ ខែកុម្ភៈខាងមុខនេះទេនោះ ៕ ប្រភព៖ ស៊ីនហួរ
-
រដ្ឋបាលលោក ចូ បៃដិន មានផែនការដាក់សហរដ្ឋអាមេរិកចូលក្នុងក្រុមប្រឹក្សាសិទ្ធិមនុស្សនៃអង្គការសហប្រជាជាតិឡើងវិញ
អាមេរិក៖ រដ្ឋបាលលោក ចូ បៃដិន នឹងវិលត្រលប់ទៅចូលរួមក្នុងក្រុមប្រឹក្សាសិទ្ធិមនុស្ស នៃអង្គការសហប្រជាជាតិឡើងវិញ បន្ទាប់ពីអតីតប្រធានាធិបតីអាមេរិកលោក ដូណាល់ ត្រាំ បានដើរចេញពីស្ថាប័នអន្តរជាតិនេះកាលពី០៣ឆ្នាំមុន ។ រដ្ឋមន្រ្តីការបរទេសអាមេរិកលោក អាន់ថូនី ប្លីនខេន នឹងប្រកាសនៅថ្ងៃចន្ទសប្តាហ៍នេះ (ម៉ោងក្នុងតំបន់) អំពីការវិលត្រលប់របស់សហរដ្ឋអាមេរិកទៅចូលរួមក្នុងក្រុមប្រឹក្សាសិទ្ធិមនុស្ស នៃអង្គការសហប្រជាជាតិឡើងវិញ ក្នុងនាមជាសមាជិកអង្កេតការណ៍ នេះបើតាមមន្រ្តីជាន់ខ្ពស់ នៃក្រសួងការបរទេសអាមេរិកនៅថ្ងៃអាទិត្យម្សិលមិញ ។ សូមជម្រាបថា នៅក្នុងឆ្នាំ២០២១នេះ មហាសន្និបាតអង្គការសហប្រជាជាតិនឹងត្រូវបោះឆ្នោតជ្រើសរើសសមាជិកថ្មីសម្រាប់ក្រុមប្រឹក្សាសិទ្ធិមនុស្ស នៃអង្គការសហប្រជាជាតិ ខណៈសមាជិកនីមួយៗត្រូវបោះឆ្នោតជ្រើសរើសសម្រាប់រយៈពេល០៣ឆ្នាំ ហើយមិនអាចកាន់លើសពី០២អាណត្តិជាប់គ្នាឡើយ ៕ ប្រភព៖ Reuters
-
គណបក្ស NLD របស់លោកស្រី ស៊ូជី អំពាវនាវអោយអង្គការសហប្រជាជាតិ និងសហគមន៍អន្តរជាតិកុំទទួលស្គាល់រដ្ឋាភិបាលយោធាមីយ៉ាន់ម៉ា
មីយ៉ាន់ម៉ា៖ គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) ដឹកនាំដោយទីប្រឹក្សារដ្ឋដែលត្រូវបានបណ្តេញចេញគឺលោកស្រី អ៊ុងសាន ស៊ូជី នោះ បានចេញសេចក្តីថ្លែងការណ៍មួយនៅថ្ងៃអាទិត្យម្សិលមិញ ដើម្បីជំរុញអោយអង្គការសហប្រជាជាតិ និងសហគមន៍អន្តរជាតិកុំទទួលស្គាល់ក្រុមប្រឹក្សារដ្ឋបាលថ្មីដែលទើបបង្កើតឡើង ក្រោយរដ្ឋប្រហារយោធា ។ សមាជិកគណៈកម្មាធិការប្រតិបត្តិកណ្តាលគណបក្សសម្ព័ន្ធជាតិដើម្បីលទ្ធិប្រជាធិបតេយ្យ លោក អ៊ុង ខ្យី ន្យីនត៍ បានប្រាប់អ្នកយកព័ត៌មានបរទេសថា រដ្ឋប្រហារនេះមិនស្របតាមរដ្ឋធម្មនុញ្ញទេ ហើយរដ្ឋាភិបាលដឹកនាំដោយប្រធានាធិបតី វីន ម្យីនត៍ ដែលកំពុងជាប់ឃុំឃាំងនៅតែជារដ្ឋាភិបាលស្របច្បាប់ ។ គ្មានប្រទេសណាគួរទទួលស្គាល់របបយោធាទេ ប្រសិនបើពួកគេគោរពបទដ្ឋានប្រជាធិបតេយ្យ ។ គួរបញ្ជាក់ថា ក្រោយរដ្ឋប្រហារកាលពីថ្ងៃទី០១ ខែកុម្ភៈនេះ យោធាមីយ៉ាន់ម៉ាបានចាប់ឃុំខ្លួនលោកស្រី ស៊ូជី និងមន្ត្រីជាន់ខ្ពស់ជាច្រើនរូបទៀតនៃរដ្ឋាភិបាលលោកស្រី ដោយថែមទាំងប្រកាសដាក់ប្រទេសក្នុងគ្រាអាសន្នរយៈពេលមួយឆ្នាំទៀតផង ។ យោធាមីយ៉ាន់ម៉ាបានឱ្យដឹងថា លោកស្រី ស៊ូជី ដែលកំពុងជាប់ឃុំក្នុងផ្ទះមានសុខភាពល្អធម្មតា តែលោកស្រីកំពុងប្រឈមមុខនឹងបទចោទប្រកាន់ពីបទកាន់កាប់វិទ្យុទាក់ទង ឬអាយកូមខុសច្បាប់ ហើយបទចោទនេះអាចឱ្យលោកស្រីជាប់ពន្ធនាគារ០៣ឆ្នាំ ប្រសិនបើត្រូវបានគេកាត់ទោសមែននោះ ៕ ប្រភព៖ Anadolu
-
ប៉ូលិសនៅរដ្ឋធានីណៃពិដោ ប្រើកាណុងបាញ់ទឹកលើក្រុមបាតុករដែលប្រមូលផ្តុំគ្នាតវ៉ានៅថ្ងៃចន្ទនេះ
មីយ៉ាន់ម៉ា៖ ប៉ូលិសនៅរដ្ឋធានីណៃពិដោ បានប្រើប្រាស់កាណុងបាញ់ទឹកលើក្រុមបាតុករ ដែលបានប្រមូលផ្តុំគ្នាតវ៉ានៅថ្ងៃចន្ទនេះ ពោលគឺមួយសប្តាហ៍ក្រោយរដ្ឋប្រហារយោធា ។ កងកម្លាំងប៉ូលិសមីយ៉ាន់ម៉ាបានប្រើកាណុងបាញ់ទឹកលើក្រុមបាតុកររាប់ពាន់នាក់ដោយសារតែសកម្មភាពរបស់ពួកគេកាន់តែមានភាពពុះកញ្ជ្រោល ប៉ុន្តែសកម្ម ភាពតវ៉ាប្រឆាំងនឹងរដ្ឋាភិបាលយោធានៅបន្តទៅមុខដដែល ។ ទន្ទឹមគ្នា ប្រព័ន្ធផ្សព្វផ្សាយសង្គមបានបង្ហាញរូបភាព នៃក្រុមបាតុករមួយចំនួនបានរងរបួស នៅពេលពួកគេដួលទៅលើដីផងដែរ ។ ស្របពេលជាមួយគ្នានោះដែរ ក្រុមប្រឆាំងរដ្ឋប្រហារនៅមីយ៉ាន់ម៉ាក៏បានប្រកូកប្រកាសអោយមនុស្សម្នាចូលរួមធ្វើបាតុកម្មឲ្យកាន់តែច្រើនឡើង នៅក្នុងថ្ងៃចន្ទនេះ មួយសប្តាហ៍ក្រោយទង្វើដែលអន្តរជាតិមើលឃើញថា ជារដ្ឋប្រហារយោធា បានកើតមានឡើង ដើម្បីទម្លាក់រដ្ឋាភិបាលលោក អោង សាន ស៊ូជី ចេញពីអំណាច ៕ ប្រភព៖ CNA
-
អ្នកវិនិយោគវិស័យអចលនទ្រព្យបញ្ជាក់ថា ការទិញ និងលក់អចលនទ្រព្យក្នុងប្រទេសមីយ៉ាន់ម៉ាធ្លាក់ចុះជិត១០០ភាគរយ
មីយ៉ាន់ម៉ា៖ អ្នកវិនិយោគវិស័យអចលនទ្រព្យមីយ៉ាន់ម៉ាបញ្ជាក់ថា ការទិញ និងលក់អចលនទ្រព្យក្នុងប្រទេសមីយ៉ាន់ម៉ាបានធ្លាក់ចុះជិត១០០ភាគរយ បន្ទាប់ពីយោធាបានចាប់ឃុំខ្លួនមេដឹកនាំជាប់ឆ្នោតលោកស្រី អ៊ុង សាន ស៊ូជី និងមន្រ្តីជាន់ខ្ពស់ជាច្រើនរូបទៀតនៃរដ្ឋាភិបាលរបស់លោកស្រី ក្នុងការធ្វើរដ្ឋប្រហារកាលពីថ្ងៃទី០១ ខែកុម្ភៈ ឆ្នាំ២០២១ ។ នាយកគ្រប់គ្រងគេហទំព័រ iMyanmarHouse.com លោក U Nay Min Thu និយាយថា ទីផ្សារអចលនទ្រព្យកំពុងតែឈានទៅរកលទ្ធផលល្អនៅក្នុងសប្តាហ៍ទី៣ និងចុងក្រោយនៃខែមករា ដោយកត់ត្រាជាមធ្យមប្រចាំសប្តាហ៍ពី ២ ទៅ ៣ លានដុល្លារ ទាក់ទងនឹងការលក់ និងការទិញ ប៉ុន្តែតួលេខទាំងនេះបានធ្លាក់ចុះ៩៥ភាគរយចាប់តាំងពីថ្ងៃទី០១ ខែកុម្ភៈកន្លងទៅ ។ ជាមួយគ្នានេះ សហគ្រិនសំណង់និយាយថា វិនិយោគិនបរទេសមួយចំនួនបានបញ្ឈប់ប្រតិបត្តិការរបស់ពួកគេ ។ បើតាមលោក U Kyaw Kyaw Soe ដែលមកពីសហព័ន្ធសហគ្រិនសំណង់មីយ៉ាន់ម៉ា មិនត្រឹមតែការវិនិយោគបរទេសប៉ុណ្ណោះទេ តម្រូវការក្នុងស្រុកក៏នឹងធ្លាក់ចុះផងដែរដោយសារតែស្ថានភាពនយោបាយមានការផ្លាស់ប្តូរ ។ វិស័យសំណង់ និងអចលនទ្រព្យនឹងដំណើរការជាធម្មតាឡើងវិញ ខណៈណាស្ថានភាពនយោបាយមានស្ថេរភាព ៕ ប្រភព៖ Myanmar Times
-
មនុស្សរាប់ម៉ឺននាក់ធ្វើបាតុកម្មប្រឆាំងនឹងការធ្វើរដ្ឋប្រហារនៅទូទាំងប្រទេសមីយ៉ាន់ម៉ា ដើម្បីសម្តែងការគាំទ្រលោកស្រី ស៊ូជី
មីយ៉ាន់ម៉ា៖ មនុស្សរាប់ម៉ឺននាក់បានប្រមូលផ្តុំគ្នានៅទូទាំងប្រទេសមីយ៉ាន់ម៉ា នៅថ្ងៃអាទិត្យម្សិលមិញ ដើម្បីប្រឆាំងនឹងការធ្វើរដ្ឋប្រហារកាលពីសប្តាហ៍មុន ក៏ដូចជាទាមទារឲ្យមានការដោះលែងលោកស្រី អ៊ុងសាន ស៊ូជី នៅក្នុងការតវ៉ាដ៏ធំបំផុតចាប់តាំងពីបដិវត្ត Saffron ឆ្នាំ២០០៧ ដែលបានជួយជំរុញឲ្យមានកំណែទម្រង់លទ្ធិប្រជាធិបតេយ្យ ។ នៅថ្ងៃទី២នៃការតវ៉ាទ្រង់ទ្រាយធំនេះ ក្រុមអ្នកតវ៉ាក្នុងទីក្រុង យ៉ាងហ្គន បានពាក់អាវពណ៌ក្រហម កាន់ទង់ក្រហម និងប៉េងប៉ោងពណ៌ក្រហម ដែលជាពណ៌របស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) របស់លោកស្រី អ៊ុងសាន ស៊ូជី ដោយពួកគេស្រែកថា យើងមិនចង់បានរបបផ្តាច់ការយោធាទេ… យើងចង់បានប្រជាធិបតេយ្យ ។ ក្រុមអ្នកតវ៉ាក្នុងទីក្រុងយ៉ាងហ្គន បានបំបែកគ្នានៅពេលយប់ តែនិយាយថា ពួកគេនឹងវិលត្រឡប់មកវិញ ប្រសិនបើការទាមទាររបស់ពួកគេមិនត្រូវបានឆ្លើយតបទេនោះ ។ ការធ្វើបាតុកម្មនេះភាគច្រើនមានលក្ខណៈអហិង្សា មិនដូចការបង្ក្រាបបង្ហូរឈាមកាលពីឆ្នាំ១៩៩៨ និងឆ្នាំ២០០៧ទេ ៕ ប្រភព៖ Reuters
-
សេវាកម្មអ៊ីនធើណិតនៅមីយ៉ាន់ម៉ាបើកដំណើការឡើងវិញផ្នែកខ្លះ ចំពេលផ្ទុះការតវ៉ាទ្រង់ទ្រាយ់ធំប្រឆាំងនឹងរដ្ឋប្រហារយោធា
មីយ៉ាន់ម៉ា៖ នៅថ្ងៃអាទិត្យម្សិលមិញ ប្រព័ន្ធអ៊ិនធើណិតនៅមីយ៉ាន់ម៉ាត្រូវបានស្តារឡើងវិញផ្នែកខ្លះហើយ ចំពេលដែលការបិទគេហទំព័រ និងប្រព័ន្ធផ្សព្វផ្សាយសង្គមនៅទូទាំងប្រទេសបានបរាជ័យ ក្នុងការទប់ស្កាត់កំហឹងសាធារណៈ និងការតវ៉ាទ្រង់ទ្រាយធំប្រឆាំងនឹងរដ្ឋប្រហារយោធា ដែលបានទម្លាក់លោកស្រី អ៊ុង សាន ស៊ូជី ។ តាមរយៈបណ្តាញសង្គម Twitter អង្គការ ណេតប្លក់ស៍ ដែលជំនាញខាងតាមដាន ការផ្ដាច់ប្រព័ន្ធអ៊ីនធើណិតនៅជុំវិញពិភពលោក បានបញ្ជាក់នៅថ្ងៃអាទិត្យម្សិលមិញថា ប្រព័ន្ធអ៊ិនធើណិតនៅមីយ៉ាន់ម៉ាបានដំណើការឡើងវិញខ្លះហើយ នៅវេលាម៉ោង២រសៀលថ្ងៃអាទិត្យម្សិលមិញ (ម៉ោងក្នុងតំបន់) ខណៈដំណើការនៃបណ្តាញទំនាក់ទំនងសង្គមនៅតែមានកម្រិត ។ សូមជម្រាបថា ក្រោយដណ្តើមអំណាចបាន យោធាមីយ៉ាន់ម៉ាបានបិទខ្ទប់បណ្ដាញទំនាក់ទំនងសង្គមនានាដូចជា Facebook Twitter និង Instagram ដោយសំអាងលើហេតុផលរក្សាស្ថេរភាពជាតិ ព្រមទាំងបានប្រកាសដាក់ប្រទេសក្នុងគ្រាអាសន្នរយៈពេលមួយឆ្នាំ ៕ ប្រភព៖ AFP
-
មនុស្សច្រើនជាង១២៥នាក់ប្រឈមនឹងការស្លាប់ ក្រោយបាត់ខ្លួនក្នុងករណីបាក់ផ្ទាំងទឹកកកចូលទន្លេធ្វើឲ្យធ្លាយទំនប់ទឹកនៅឥណ្ឌា
ឥណ្ឌា៖ មនុស្សរាប់រយនាក់កំពុងបាត់ខ្លួន និង ត្រូវបានគេព្រួយបារម្ភថាស្លាប់ ក្រោយផ្ទាំងទឹកកកនៃភ្នំហិមាល័យបានបាក់ចូលក្នុងទន្លេ ហើយបង្កជាគ្រោះទឹកជំនន់ដ៏ធំមួយនៅភាគខាងជើងប្រទេសឥណ្ឌា ។ គ្រោះទឹកជំនន់ដ៏អាក្រក់ខាងលើនេះ បានជន់លិចទំនប់ និងហូរកាត់ជ្រលងភ្នំក្នុងរដ្ឋ អ៊ូតារ៉ាខាញ ដោយភូមិជាច្រើនត្រូវបានជម្លៀសចេញទៅកាន់ទីសុវត្ថិភាព ប៉ុន្តែក្រុមមន្រ្តីព្រមានថា មនុស្សជាង១២៥នាក់អាចនឹងបាត់បង់ជីវិតនៅក្នុងហេតុការណ៍នេះ ។ បើតាមប៉ូលិសរដ្ឋ អ៊ូតារ៉ាខាញការបាក់ផ្ទាំងទឹកកកនេះបានកើតឡើងនៅម៉ោងប្រហែល១១និង០០នាទី (ម៉ោងក្នុងតំបន់) ដោយវាបំផ្លាញទំនប់មួយដែលត្រូវបានគេស្គាល់ថា ជាគម្រោងវារីអគ្គិសនី រីស៊ីហ្គានហ្គា ។ ប៉ូលិសរដ្ឋនេះនិយាយទៀតថា មានផលប៉ះពាល់យ៉ាងធំធេងនៅតាមដងទន្លេ ឌូលី ហ្គានហ្គា ដែលធ្វើឲ្យខូចខាតដល់គម្រោងថាមពលមួយផ្សេងទៀត ដែលស្ថិតនៅផ្នែកខាងក្រោមនៃតំបន់ តាវ៉ាន ។ ដោយឡែកអាជ្ញាធរឥណ្ឌាក៏បានបញ្ជាក់ដែរថា ខ្លួនកំពុងបើកប្រតិបត្តិការរុករកមួយ បន្ទាប់ពីផ្ទាំងជម្រាលភ្នំដែលស្ថិតនៅតំបន់តាវ៉ាន នៃរដ្ឋអ៊ូតារ៉ាខាញបានបាក់នៅព្រឹកថ្ងៃអាទិត្យសប្តាហ៍មុននេះ ៕ ប្រភព៖ Reuters
-
អ្នកឆ្លង COVID-19 នៅទូទាំងពិភពលោកកើនឡើងជាង១០៦លាននាក់ ក្នុងនោះស្លាប់ជាង២លាននាក់ និងជាសះស្បើយជាង៧៨លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១០៦លាន៦៧ម៉ឺន៧ពាន់៣៧២ករណី ក្នុងនោះមានអ្នកជម្ងឺសរុបចំនួន២លាន៣២ម៉ឺន៦ពាន់៨១៩នាក់ស្លាប់ និង ជាសះស្បើយឡើងវិញសរុបចំនួន៧៨លាន៣៧ម៉ឺន៥ពាន់៤៣៣នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៨ ខែកុម្ភៈ ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៧លាន៦១ម៉ឺន១ពាន់៤០៣នាក់ ស្លាប់ចំនួន៤៧ម៉ឺន៤ពាន់៩៣៣នាក់ និងជាសះស្បើយចំនួន១៧លាន៣៥ម៉ឺន៤ពាន់៣៨៨នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៨៣ម៉ឺន៨ពាន់៨៤៣នាក់ ស្លាប់ចំនួន១៥ម៉ឺន៥ពាន់១១៤នាក់ និងជាសះស្បើយ១០លាន៥៣ម៉ឺន៣ពាន់៧៦នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៩លាន៥២ម៉ឺន៤ពាន់៦៤០នាក់ ស្លាប់២៣ម៉ឺន១ពាន់៥៦១នាក់ និងជាសះស្បើយ៨លាន៣៩ម៉ឺន៧ពាន់១៨៧នាក់ ៕ ប្រភព៖ worldometers