(ហ្គាហ្សា)៖ កងយន្តហោះចម្បំាងអ៊ីស្រាអ៊ែលជាច្រើនគ្រឿង បានបើកការវាយ ប្រហារតាមផ្លូវអាកាសដ៏ក្តៅគគុកមួយ ទៅលើមូលដ្ឋានយោធាចំនួន៩កន្លែងដែល ស្ថិតនៅក្នុងទីតាំងយុទ្ធសាស្ត្រចំនួន៣ធំៗ នៅភាគខាងជើងតំបន់ ហ្គាហ្សាស្ទ្រីព ។ ស្របពេលជាមួយគ្នានេះដែរ កងកម្លាំងស្វ័យការពារអ៊ីស្រាអ៊ែល បានគួសបញ្ជាក់ ថា ទីតាំងដែលពួកគេបើកការវាយប្រហារនោះ គឺជាតំបន់គ្រប់គ្រងដោយក្រុមហាម៉ាស់ ហើយរហូតមកទល់ពេលនេះ មិនទាន់មានសេចក្តីរាយការណ៍អំពីការខូច ខាត ឬក៏ចំនួនមនុស្សរងគ្រោះនៅឡើយនោះទេ ។ការវាយប្រហាររបស់កងយន្តហោះចម្បាំងអ៊ីស្រាអ៊ែល គឺធ្វើឡើងដើម្បីឆ្លើយតបទៅ នឹងការបង្ហោះខ្លែង និងបាឡុងផ្ទុកគ្រាប់បែក ដែលអ៊ីស្រាអ៊ែលអះអាងថា បានហោះចេញពីតំបន់ហ្គាហ្សា និងធ្លាក់លើទឹកដីអ៊ីស្រាអ៊ែល ខណៈអ៊ីស្រាអ៊ែលក៏បានព្រមានផងដែរថា ទង្វើភេរវកម្មបែបនេះ នឹងទទួលបានការវាយប្រហារតបទៅវិញរឹតតែធ្ងន់ ៕

កូរ៉េខាងត្បូង៖ រដ្ឋមន្រ្តីការបរទេសកូរ៉េខាងត្បូង លោកស្រី កាង គ្យុងវ៉ា បានលើក ឡើងថា ប្រទេសលោកស្រីបានដាក់គោលដៅនឹងសម្រេចឲ្យបាននូវការបិទបញ្ចប់ ជាផ្លូវការនៅចុងឆ្នាំ២០១៨នេះ ចំពោះកិច្ចព្រមព្រៀងសន្តិភាពនៃសង្រ្គាមកូរ៉េ ដែលបានកើតឡើងពីឆ្នាំ១៩៥០ ដល់ឆ្នាំ១៩៥៣ ដែលកាលនោះវាបានបញ្ឈប់ទៅ តាម រយៈបទឈប់បាញ់គ្នាប៉ុណ្ណោះ ។ ប្រធានាធិបតីកូរ៉េខាងត្បូងលោក មូន ជែអ៊ីន នាពេលថ្មីៗនេះ បានសង្ឃឹមថា ជំនួប កំពូលរវាងអាមេរិក-កូរ៉េខាងជើង ដែលទើបបញ្ចប់ទៅនោះ នឹងជួយត្រួសត្រាយផ្លូវ ឆ្ពោះទៅរកការរំសាយអាវុធនុយក្លេអ៊ែរទាំងស្រុង ព្រមទាំងសន្តិភាពពេញលេញនៅ ក្នុងតំបន់ ក្រោយពីលោក ត្រាំ និងលោក គីម បានជួបគ្នានៅកោះ សេនតូសា របស់សិង្ហបុរី ហើយបានចុះហត្ថលេខាលើសេចក្តីថ្លែងការណ៍រួម ដែលបង្ហាញពីការប្តេជ្ញាចិត្តរៀងៗខ្លួន ដើម្បីចាប់ផ្តើមទំនាក់ទំនងថ្មី និងកសាងសន្តិភាពយូរអង្វែងនៅលើ ឧបទ្វីបកូរ៉េ ។ប្រមុខដឹកនំាកំពូលកូរ៉េខាងជើង លោក គីម ជុងអ៊ុន បានបើកកិច្ចប្រជុំមួយជាប្រវត្តិ សាស្រ្តកាលពីខែមេសាកន្លងទៅនេះ ជាមួយប្រធានាធិបតីកូរ៉េខាងត្បូង លោក មូន ជែអ៊ីន ដោយមេដឹកនាំទាំងពីរបានព្រមព្រៀងគ្នាសហការដើម្បីដោះស្រាយភាព តានតឹងទ្វេភាគីដោយសន្តិវិធី ។ ជាមួយគ្នានេះ រដ្ឋមន្រ្តីការបរទេសកូរ៉េខាងត្បូង…

ក្រុមប្រឹក្សាជាតិរៀបចំការបោះឆ្នោតកូឡុំប៊ី ហៅកាត់ថា CNE បានចេញលទ្ធផលជា ផ្លូវការថា លោក អ៊ីវ៉ាន់ ឌូកេ បានទទួលជ័យជម្នះក្នុងការបោះឆ្នោតជុំចុងក្រោយ ដើម្បីជ្រើសរើសជាប្រធានាធិបតីថ្មី ជាមួយសំឡេងគាំទ្រ៥៤ភាគរយ បន្ទាប់ពីពី សន្លឹកឆ្នោតជាង៩៩ភាគរយត្រូវបានរាប់ ។ បេក្ខភាពដែលអ្នកនយោបាយស្តាំនិយមមានវ័យ៤១ឆ្នាំរូបនេះ នឹងត្រូវស្បថចូល កាន់តំណែងជាផ្លូវការនៅខែសីហាខាងមុខ បន្តពីប្រធានាធិបតីចប់អាណត្តិលោក ចូអាន ម៉ានូអែល សាន់តូស ដែលជាអ្នកសម្រេចបាននូវកិច្ចព្រមព្រៀងសន្តិភាព ជាមួយក្រុមឧទ្ទាម ហ្វាក់ និងទទួលបានពានរង្វាន់ណូប៊ែលសន្តិភាព ដោយសារតែកិច្ចខិតខំប្រឹងប្រែងនេះថែមទៀតផង ។សូមជម្រាបថា លោក អ៊ីវ៉ាន់ ឌូកេ នឹងក្លាយជាប្រធានាធិបតីវ័យក្មេងជាងគេរបស់ ប្រទេសកូឡុំប៊ី គិតចាប់តាំងពីឆ្នាំ១៨៧២មក ក្រោយរូបលោកទទួលបានសំឡេង ឆ្នោតគាំទ្រចំនួន១០,៣៤០,៣១៣សន្លឹក ខណៈគូប្រជែងរបស់លោក ដែលជាអ្នកឆ្វេងនិយម គឺលោក ហ្គូស្តាវ៉ូ ផេត្រូ ឈរនៅលេខរៀងទីពីរ ជាមួយសំឡេងគាំទ្រ ៤១.៨៣ភាគរយ ដែលស្មើនឹង៨.០១៦.៤០២សន្លឹកឆ្នោត ៕

សហរដ្ឋអាមេរិក៖ ហេតុការណ៍បាញ់ប្រហារថ្មីមួយទៀត បានផ្ទុះឡើងនៅមហោ ស្រពសិល្បៈមួយកន្លែង ស្ថិតនៅភាគខាងកើតទីក្រុងទ្រែនតុន រដ្ឋញ៊ូជឺស៊ី នៅព្រឹក ថ្ងៃ អាទិត្យ សប្តាហ៍មុននេះ (ម៉ោងក្នុងតំបន់) បណ្តាលអោយមនុស្ស២២នាក់ទទួល រងរបួស ខណៈខ្មាន់កំាភ្លើងម្នាក់ត្រូវបានបាញ់អោយស្លាប់ ។យោងតាមប្រភពរបស់អាជ្ញាធរក្នុងតំបន់ បានបញ្ជាក់ថា នៅក្នុងករណីផ្ទុះប្រដាប់ អាវុធនេះដែរ មានមនុស្សជាច្រើននាក់ត្រូវបានបញ្ជូនទៅកាន់មន្ទីរពេទ្យ ស្របពេល ដែលបុរសជាជនសង្ស័យម្នាក់អាយុ៣៣ឆ្នាំត្រូវបានបាញ់សម្លាប់ និងជនសង្ស័យផ្សេងទៀតត្រូវចាប់ខ្លួន ហើយអាវុធជាច្រើនក៏ត្រូវគេរកឃើញនៅហ្នឹងកន្លែងហេតុ ។ដោយឡែកក្រុមប៉ូលីសបានអះអាងដែរថា មនុស្សប្រមាណជាង១.០០០នាក់ត្រូវគេជឿជាក់ថា ស្ថិតនៅក្នុងសាលមហោស្រពមួយនេះ ពេលករណីបាញ់ប្រហារផ្ទុះ ឡើង ប៉ុន្តែមិនទាន់មានការបញ្ជាក់ពីមូលហេតុ នៃការបាញ់ប្រហារនេះនៅឡើយទេ ហើយអាជ្ញាធរក៏កំពុងបើកការស៊ើបអង្កេត ថាតើជនសង្ស័យខាងលើនេះ ត្រូវបានប៉ូលីសបាញ់សម្លាប់ ឬជនសង្ស័យដទៃជាអ្នកបាញ់សម្លាប់ ៕

កូរ៉េខាងត្បូង៖ រដ្ឋាភិបាលក្រុងសេអ៊ូល និងវ៉ាស៊ីនតោនត្រូវគេរំពឹងថា នឹងប្រកាស ផ្អាកការធ្វើសមយុទ្ធយោធាទ្រង់ទ្រាយធំទ្វេភាគីនៅក្នុងសប្តាហ៍នេះ ហើយថែមទំាង អះអាងដែរថា ពួកគេនឹងចាប់ផ្តើមសមយុទ្ធឡើងវិញ បើសិនជារដ្ឋាភិបាលក្រុង ព្យុងយ៉ាង បរាជ័យក្នុងការរំសាយអាវុធនុយក្លេអ៊ែរ មិនដូចអ្វីដែលខ្លួនបានសន្យា កន្លងមកនេះ ។ ជាមួយគ្នានោះដែរ អ្នកនាំពាក្យក្រសួងការពារជាតិកូរ៉េខាងត្បូង លោក ឆយ ហ៊ីយន់ ស៊ូ បានបញ្ជាក់ថា ប្រទេសលោកនឹងចាប់ផ្ដើមការធ្វើសមយុទ្ធយោធារយៈពេលពីរ ថ្ងៃ សំដៅបង្កើនសមត្ថភាពការពារទីប្រជុំកោះជម្លោះ ដុកដូ ឬជប៉ុនហៅថា តាកេ ស៊ីម៉ា ស្ថិតនៅឆ្នេរភាគខាងកើតរបស់ខ្លួន ពីការឈ្លានពានជាយកថាហេតុណាមួយ ពីសំណាក់កងកម្លាំងជប៉ុន ។ អ្នកនាំពាក្យក្រសួងការពារជាតិកូរ៉េខាងត្បូងរូបនេះ បានឱ្យដឹងផងដែរថា សមយុទ្ធ យោធាខាងលើនេះ នឹងមានការចូលរួមពីនាវាចម្បាំង៦គ្រឿង និងយន្ដហោះចម្បាំង ៧គ្រឿង ហើយថា សមយុទ្ធយោធាការពារទីប្រជុំកោះ ដុកដូ នេះដែរ គឺជាសមយុទ្ធ យោធាជាទម្លាប់ ដែលធ្វើឡើងក្នុងគោលបំណងពង្រឹង និងបង្កើនសមត្ថភាពការពារ ពីការឈ្លានពានណាមួយដោយកងកម្លាំងបរទេស ៕

ជប៉ុន៖ប្រព័ន្ធផ្សាយផ្សព្វផ្សាយក្នុងតំបន់បានរាយការណ៍ថា គ្រោះរញ្ជួយដីក្នុងកម្រិត ៥.៩រ៉ិកទ័រត្រូវបានតម្លើងដល់៦.១រ៉ិកទ័រ និងមានជម្រៅ១៥.៤គ.មបានវាយប្រហារ លើប្រទេសជប៉ុន ប៉ុន្តែពុំបានបង្កជារលកយក្សស៊ូណាមិឡើយ តែវាបានធ្វើអោយ មនុស្ស៣នាក់បាត់បង់ជីវិតក្នុងនោះមានកុមារីអាយុ៩ឆ្នំាម្នាក់ ខណៈច្រើនជាង២០០ នាក់ផ្សេងទៀតទទួលរងរបួសនៅខេត្ត អូសាកា ភាគខាងលិចប្រទេស ។ គ្រោះមហន្តរាយធម្មជាតិដ៏អាក្រក់នេះ បានកើតឡើងនៅម៉ោង៧និង៥៨នាទីព្រឹក ថ្ងៃ ចន្ទ័ នេះ (ម៉ោងក្នុងតំបន់) ហើយជាមួយគ្នានោះ ករណីអគ្គីភ័យក៏បានកើតមាន ឡើងផងដែរ ដោយសារហេតុការណ៍រញ្ជួយដីនេះ គ្រាដែលមនុស្សជាច្រើនត្រូវបាន គេរាយការណ៍ថា នៅជាប់គាំងក្នុងប្រអប់ជណ្តើរយន្ត ហើយលំនៅឋានជាង ១៧០.០០០ខ្នងនៅខេត្តអូសាកា និងខេត្តហ៊ីយ៉ូហ្គោ កំពុងគ្មានអគ្គិសនីប្រើប្រាស់ ។ដោយឡែកសេវារថភ្លើង និងអាកាសយានដ្ឋានមួយចំនួននៅក្នុងតំបន់ក៏ត្រូវបាន ផ្អាកដំណើរការជាបណ្តោះអាសន្នផងដែរ ហើយបើតាមអាជ្ញាធរជប៉ុនក្នុងតំបននោះ ចំនួនមនុស្សស្លាប់អាចនឹងកើនឡើងថែមទៀត ខណៈរដ្ឋមន្រ្តីគ្រប់គ្រងគ្រោះមហន្ត រាយជប៉ុន លោក ហាជីរ៉ូ អូកូនូជិ បានឲ្យដឹងថា នៅមានមនុស្សជាច្រើនកំពុងជាប់ នៅក្រោមគំនរអគារដែលបានដួលរលំ ហើយក្រុមភ្នាក់ងារជួយសង្រ្គោះក៏កំពុង ព្យាយាមតាមស្វែងរកពួកគេដែរ ៕

សហរដ្ឋអាមេរិក៖ ក្រសួងការបរទេសអាមេរិកបានព្រមានថា ក្រុមភេវរករទំនងជា កំពុងរៀបចំផែនការបង្កការវាយប្រហារ នៅអំឡុងពេលប្រកួតកីឡាបាល់ទាត់ World Cup នៅក្នុងប្រទេសរ៉ុស្ស៊ី ហើយថា ព្រឹត្តិការណ៍អន្តរជាតិដែលមានលក្ខណៈ ធំធេងបែបនេះ គឺតែងតែស្ថិតនៅក្នុងគោលដៅនៃការវាយប្រហាររបស់ពួកជ្រុល និយម ។ នៅក្នុងសេចក្តីថ្លែងការណ៍របស់ខ្លួន ក្រសួងការបរទេសអាមេរិកក៏បានបញ្ជាក់ផង ដែរ អោយពលរដ្ឋរបស់ខ្លួនគិតគូរឡើងវិញ បើសិនជាចង់ធ្វើដំណើរទៅកាន់រ៉ុស្ស៊ី ដើម្បីចូលរួមទស្សនាព្រឹត្តិការណ៍ប្រកួតកីឡាបាល់ទាត់ World Cup ដោយផ្ទាល់ នោះ ដើម្បីបង្ការកុំអោយទទួលរងអំពើភេរវកម្ម ។គួរបញ្ជាក់ថា បើទោះបីជាសន្តិសុខត្រូវបានរឹតបន្តឹងកម្រិតខ្ពស់ក៏ដោយ ប៉ុន្តែក្រុម ភេរវករនៅតែអាចបញ្ជ្រៀតចូលកន្លែងប្រមូលផ្តុំមនុស្សម្នាជាច្រើន ដូចជា ពហុកីឡា ដ្ឋាន កន្លែងក្រុមអ្នកគាំទ្របាល់ទាត់ទស្សនាការផ្សាយបន្តផ្ទាល់ កន្លែងរង់ចាំយាន ជំនិះ និងទីសារធារណៈជាច្រើនទៀត ដែលមានមនុស្សប្រមូលផ្តុំកោះករ ៕

ចិន៖ ប្រធានាធិបតីចិន លោក ស៊ី ជិនពីង បានថ្លែងអះអាងថា ប្រទេសលោកនឹង បង្កើនសមត្ថភាពកងទ័ពជើងទឹកអោយកាន់តែរឹងមំា និងខ្លាំងក្លាឡើង ស្ថិតក្នុង គោលបំណងបំពេញបេសកកម្មបម្រើដល់បក្ស និងប្រជាជនចិន ។ ការលើកឡើងរបស់ប្រធានាធិបតីចិនរូបនេះ ត្រូវបានធ្វើឡើងក្នុងអំឡុងការត្រួត ពិនិត្យទីបញ្ជាការកងទ័ពជើងទឹកភាគខាងជើង ដោយក្នុងឱកាសនោះដែរ លោក ស៊ី ថែមទំាងជម្រុញឲ្យគ្រប់កងទ័ពជើងទឹកទាំងអស់ ខិតខំប្រឹងប្រែងដើម្បីពង្រឹង និង ពង្រីកសក្តានុពលយោធាជើងទឹកអោយឈានទៅរករជ្ជកាលថ្មី ជាមួយនឹងភាព ស្មោះត្រង់ បច្ចេកទេសខ្ពស់ និងការធ្វើប្រតិបត្តិការនានា ដោយអនុឡោមទៅតាម ច្បាប់ ។សូមជម្រាបថា លោក ស៊ី ជិនពីង ប្រធានាធិបតីចិន និងជាអគ្គលេខាធិការ នៃគណ កម្មាធិការមជ្ឈិមបក្សកុម្មុយនិស្តចិន ព្រមទាំងជាប្រធាននៃគណកម្មការមជ្ឈិមយោធា នៅក្នុងថ្ងៃ ព្រហស្បត្តិ៍ សប្តាហ៍នេះ បានទស្សនៈកិច្ចទៅកាន់ទីបញ្ជាការទ័ពជើង ទឹកភាគខាងជើង ដែលស្ថិតក្រោមចំណុះនៃកងទ័ពរំដោះប្រជាជនចិន ក្នុងគ្រាដែល បញ្ហាគ្រប់គ្រងសន្តិសុខដែនសមុទ្រ កាន់តែក្លាយជាប្រធានបទក្តៅគគុក សម្រាប់ ថ្នាក់តំបន់ និងអន្តរជាតិ ៕