-
សហរដ្ឋអាមេរិកចេញមុខអំពាវនាវអោយយោធាមីយ៉ាន់ម៉ាដោះលែងលោកស្រី ស៊ូជី និងមេដឹកនាំស៊ីវិលជាបន្ទាន់
អាមេរិក៖ សហរដ្ឋអាមេរិកនៅថ្ងៃពុធនេះបានអំពាវនាវអោយរបបយោធាមីយ៉ាន់ម៉ាដោះលែងលោកស្រី អ៊ុងសាន ស៊ូជី ខណៈមេដឹកនាំដែលបណ្តេញចេញពីអំណាចរូបនេះកំពុងរងការចោទប្រកាន់ បន្ទាប់ពីត្រូវបានចាប់ឃុំខ្លួននៅក្នុងរដ្ឋប្រហារកាលពីថ្ងៃចន្ទដើមសប្តាហ៍នេះ ។ អ្នកនាំពាក្យក្រសួងការបរទេសអាមេរិកលោក ណេដ ប្រៃយ៍ បានថ្លែងប្រាប់អ្នកសារព័ត៌មានថា យើងអំពាវនាវអោយយោធាធ្វើការដោះលែងពួកគេទាំងអស់ជាបន្ទាន់ ក្នុងនោះរួមមានលោកស្រី អ៊ុងសាន ស៊ូជី និងមេដឹកនាំស៊ីវិលជាច្រើនរូបផ្សេងទៀត ។ ការអំពាវនាវខាងលើនេះរបស់សហរដ្ឋអាមេរិក បានកើតមានឡើងចំពេលដែលប៉ូលិសបានចោទប្រកាន់ជាផ្លូវការលើកដំបូង ប្រឆាំងនឹងលោកស្រី ស៊ូជី ដោយចោទប្រកាន់មេដឹកនាំដែលត្រូវបានបណ្តេញចេញពីអំណាចរូបនេះថា បានកាន់កាប់អាយកូម ឬវិទ្យុទាក់ទង នាំចូលដោយខុសច្បាប់ និងផ្តល់សិទ្ធិអំណាចដល់យោធានូវហេតុផល ដើម្បីឃុំខ្លួនលោកស្រីរយៈពេលពីរសប្តាហ៍ ។ អ្នកនាំពាក្យគណបក្សសម្ព័ន្ធជាតិដើម្បីលទ្ធិប្រជាធិបតេយ្យលោក គី ថូ បញ្ជាក់ថា ការចោទប្រកាន់ប្រឆាំងនឹងលោកស្រី ស៊ូជី នេះ អាចនឹងផ្តន្ទាទោសលោកស្រីជាប់ពន្ធនាគារអតិបរមា០៣ឆ្នាំ ។ ចំនែកឯលោកប្រធានាធិបតី ដែលត្រូវបានបណ្តេញចេញពីតំណែងលោក វីន មី្យន ក៏ត្រូវបានចោទប្រកាន់ពីបទរំលោភច្បាប់គ្រប់គ្រងគ្រោះមហន្តរាយធម្មជាតិផងដែរ ។ ឯកសារចោទប្រកាន់ដែលលេចធ្លាយចុះថ្ងៃទី០១ ខែកុម្ភៈបង្ហាញថា ពួកគាត់អាចនឹងត្រូវគេឃុំខ្លួនរហូតដល់ថ្ងៃទី១៥ ខែកុម្ភៈខាងមុខនេះ ៕ ប្រភព៖ Reuters
-
សហរដ្ឋអាមេរិកសម្រេចបន្តសន្ធិសញ្ញា New START ជាមួយរុស្ស៊ីរយៈពេល០៥ឆ្នាំទៀត
អាមេរិក៖ រដ្ឋមន្រ្តីការបរទេសអាមេរិក លោក អាន់តូនី ផ្លីនខេន នៅថ្ងៃពុធនេះបញ្ជាក់ថា ប្រទេសរបស់លោកបានសម្រេចបន្តសន្ធិសញ្ញារំសាយអាវុធនុយក្លេអ៊ែរ New START ជាមួយរុស្ស៊ីរយៈពេល០៥ឆ្នាំទៀត ដោយនឹងចាប់ផ្តើមពីថ្ងៃទី០៣ ខែកុម្ភៈ ឆ្នាំ២០២១នេះ ។ លោក អាន់តូនី ផ្លីនខេន បានបញ្ជាក់នៅក្នុងសេចក្តីថ្លែងការណ៍របស់ខ្លួនថា លោក ចូ បៃដិន បានសន្យារក្សាប្រជាជនអាមេរិកអោយរួចផុតពីការគំរាមកំហែងនុយក្លេអ៊ែរ ដោយការស្តារភាពជាអ្នកដឹកនាំរបស់សហរដ្ឋអាមេរិកលើការគ្រប់ គ្រងអាវុធ ។ ប្រមុខការទូតអាមេរិករូបនេះបន្ថែមទៀតថា ថ្ងៃនេះសហរដ្ឋអាមេរិកបានបោះជំហានដំបូងឆ្ពោះទៅរកការធ្វើល្អតាមការសន្យា នៅពេលដែលខ្លួនបានបន្តសន្ធិសញ្ញា New START ថ្មីជាមួយរុស្ស៊ីរយៈពេល០៥ឆ្នាំទៀត ។ សូមជម្រាបថា សន្ធិសញ្ញា New START គឺជាកិច្ចព្រមព្រៀងមួយដែលបានចុះហត្ថលេខាកាលពីឆ្នាំ២០១០ រវាងប្រទេសរុស្ស៊ី និងសហរដ្ឋអាមេរិក ហើយនឹងត្រូវចប់សុពលភាពនៅដើមឆ្នាំ២០២១នេះ ។ សន្ធិសញ្ញានេះ មានគោលដៅគ្រប់គ្រងអាវុធនុយក្លេអ៊ែរ និងកាត់បន្ថយវាបន្តិចម្តងៗ ស្របតាមសន្ធិសញ្ញាមិនរីកសាយភាយអាវុធនុយក្លេអ៊ែរឆ្នាំ១៩៦៨ ៕ ប្រភព៖ Moscow Times
-
ក្រុមប្រឹក្សាសន្តិសុខអង្គការសហប្រជាជាតិបរាជ័យ ជុំវិញការព្រមព្រៀងចេញសេចក្តីថ្លែងការណ៍ថ្កោលទោសរដ្ឋប្រហារនៅមីយ៉ាន់ម៉ា
បរទេស៖ ក្រុមប្រឹក្សាសន្តិសុខអង្គការសហប្រជាជាតិ UNSC បានបរាជ័យក្នុងការព្រមព្រៀងលើសេចក្តីថ្លែងការណ៍រួមមួយ ដែលថ្កោលទោសរដ្ឋប្រហារនៅមីយ៉ាន់ម៉ា ក្រោយកិច្ចប្រជុំបន្ទាន់រយៈពេលពីរម៉ោងមិនបានទទួលការគាំទ្រពីចិន ។ ក្រុម អ្នកការទូតនិយាយថា ការពិភាក្សាលើសេចក្តីថ្លែងការណ៍នេះនឹងនៅតែបន្ត ។ កិច្ចប្រជុំខាងលើនេះ បានកើតមានឡើងស្របពេលដែលយោធាបានឃុំខ្លួនលោកស្រី អ៊ុងសាន ស៊ូជី និងមន្រ្តីជាន់ខ្ពស់ជាច្រើនរូបទៀតនៅក្នុងការវាយឆ្មក់មួយកាលពីព្រឹកថ្ងៃចន្ទដើមសប្តាហ៍នេះ ហើយបន្ទាប់មកលោកអគ្គមេបញ្ជាការយោធា មីន អោង ហ្លេង បានឡើងកាន់អំណាច ។ យ៉ាងណាមិញ យោធាមីយ៉ាន់ម៉ាបាននិយាយថា រដ្ឋប្រហាររបស់ខ្លួនគឺមានលក្ខណៈជារដ្ឋធម្មនុញ្ញ ហើយបានសន្យាថា នឹងរៀបចំការបោះឆ្នោតសារជាថ្មី ដោយអះអាងថា ការបោះឆ្នោតកាលពីខែវិច្ឆិកាកន្លងទៅ គឺមានការក្លែងបន្លំសន្លឹកឆ្នោត ។ ចំណែកស្ថានភាពដាក់ប្រទេសក្នុងគ្រាអាសន្ន នឹងនៅតែមានសុពលភាពរយៈពេលមួយឆ្នាំ ៕ ប្រភព៖ Aljazeera
-
ក្រុមប្រទេស G7 ថ្កោលទោសការធ្វើរដ្ឋប្រហារយោធានៅមីយ៉ាន់ម៉ា និងអំពាវនាវអោយបញ្ចប់ការដាក់ប្រទេសនេះក្នុងគ្រាអាសន្ន
បរទេស៖ ក្រុមប្រទេសដែលមានសេដ្ឋកិច្ចជឿនលឿនទាំង៧ ឬ G7 បានថ្កោលទោសការធ្វើរដ្ឋប្រហារយោធានៅមីយ៉ាន់ម៉ា និងបានបង្ហាញពីការព្រួយបារម្ភយ៉ាងជ្រាលជ្រៅរបស់ខ្លួន ជុំវិញការចាប់ខ្លួនលោកស្រី អ៊ុងសាន ស៊ូជី និងមន្រ្តីជានខ្ពស់ជាច្រើនរូបទៀតនៃរដ្ឋាភិបាលរបស់លោកស្រី ។ ក្រុមប្រទេស G7 បានបញ្ជាក់នៅក្នុងសេចក្តីថ្លែងការណ៍របស់ខ្លួនថា ពួកយើង… រដ្ឋមន្រ្តីការបរទេស G7 នៃប្រទេសកាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និង សហរដ្ឋអាមេរិក ព្រមទាំងក្រុមអ្នកតំណាងជាន់ខ្ពស់របស់សហភាពអឺរ៉ុបបានរួបរួមគ្នាថ្កោលទោសរដ្ឋប្រហារនៅមីយ៉ាន់ម៉ា ។ យើងមានការព្រួយបារម្ភជាខ្លាំង ចំពោះការចាប់ឃុំខ្លួនមេដឹកនាំស៊ីវិលមីយ៉ាន់ម៉ា រួមមានទីប្រឹក្សារដ្ឋ លោកស្រី អោងសាន ស៊ូជី និងប្រធានាធីបតី លោក យូ វីន ម្យីនត៍ កាលពីថ្ងៃចន្ទដើមសប្តាហ៍នេះ ។ ទន្ទឹមគ្នា ក្រុមរដ្ឋមន្រ្តីការបរទេស G7 ក៏បានធ្វើការអំពាវនាវអោយយោធាបញ្ចប់ការដាក់ប្រទេសមីយ៉ាន់ម៉ាក្នុងគ្រាមានអាសន្ន ហើយអនុញ្ញាតអោយមានដំណើរការផ្នែកមនុស្សធម៌ដោយគ្មានការរឹតត្បិត ដើម្បីគាំទ្រដល់ជនងាយរងគ្រោះបំផុត ៕ ប្រភព៖ Reuters
-
ក្រសួងព័ត៌មានមីយ៉ាន់ម៉ាព្រមានប្រព័ន្ធផ្សព្វផ្សាយ និង ប្រជាជនកុំអោយចែកចាយពាក្យចចាមអារ៉ាម និងការញុះញង់អោយមានចលាចល
មីយ៉ាន់ម៉ា៖ ក្រសួងព័ត៌មានមីយ៉ាន់ម៉ា បានចេញសេចក្តីថ្លែងការណ៍មួយ ដោយព្រមានបណ្តាញសារព័ត៌មាន និង ប្រជាជនកុំឲ្យចែកចាយពាក្យចចាមអារ៉ាមលើប្រព័ន្ធផ្សព្វផ្សាយសង្គម និង ញុះញង់ឲ្យមានចលាចល ក៏ដូចជាជំរុញឲ្យប្រជាជនសហការជាមួយរដ្ឋាភិបាល ។ ក្រសួងព័ត៌មានមីយ៉ាន់ម៉ាបានបញ្ជាក់ថា ប្រព័ន្ធផ្សព្វផ្សាយ និងប្រជាជនមួយចំនួនកំពុងបង្កើនពាក្យចចាមអារ៉ាមនៅលើបណ្តាញសង្គម និងបង្កើតការជួបជុំដើម្បីញុះញង់ ព្រមទាំងចេញសេចក្តីថ្លែងការណ៍ដែលអាចបង្កចលាចល ។ យើងសូមជំរុញឲ្យប្រជាជនកុំធ្វើសកម្មភាពទាំងនេះ ហើយយើងសូមជូនដំណឹងដល់សាធារណៈជនឲ្យសហការ ដោយយោងតាមច្បាប់ដែលមានស្រាប់ និងរដ្ឋាភិបាល ។ យ៉ាងណាមិញ សេចក្តីថ្លែងការណ៍របស់ក្រសួងព័ត៌មានមីយ៉ាន់ម៉ាមិនបានផ្តល់ព័ត៌មានលម្អិតថាតើពាក្យចចាមអារ៉ាម ឬការជួបជុំប្រភេទអ្វីដែលខ្លួនចង់សំដៅនោះទេ គ្រាន់តែបានព្រមានថា បញ្ហានេះ នឹងធ្វើអោយប៉ះពាល់ដល់សាមគ្គីភាពជាមួយប្រជាជន និងអន្តរាយដល់ស្ថិរភាពរបស់ប្រទេស ៕ ប្រភព៖ Myanmar Times
-
យោធាមីយ៉ាន់ម៉ាដោះលែងមនុស្ស៤០០នាក់ ក្រោយចាប់ខ្លួននៅក្នុងរដ្ឋប្រហារ ខណៈលោកស្រី ស៊ូជី បន្តឃុំខ្លួនដដែល
មីយ៉ាន់ម៉ា៖ យោធាមីយ៉ាន់ម៉ាបានដោះលែងមនុស្សប្រមាណ៤០០នាក់ រួមទាំងអតីតសមាជិកសភាមកពីគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) និងបានបញ្ជាអោយពួកគេត្រឡប់ទៅផ្ទះវិញ នេះបើតាមការបញ្ជាក់របស់សមាជិកសភាម្នាក់នៃគណបក្ស NLD ។ ស្របពេលជាមួយគ្នានោះដែរ មន្ត្រីជាន់ខ្ពស់នៃគណបក្សកាន់អំណាចនេះ រួមទាំងមេដឹកនាំបក្សលោកស្រី អ៊ុងសាន ស៊ូជី ទំនងជានៅតែស្ថិតក្រោមការឃុំឃាំងក្នុងផ្ទះដដែរ បន្ទាប់ពីរដ្ឋប្រហារកាលពីថ្ងៃចន្ទដើមសប្តាហ៍នេះ ។ នៅពេលដែលយោធាបានដណ្តើមអំណាច សមាជិកសភាគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) ជាច្រើននាក់បានស្ថិតនៅក្នុងរដ្ឋធានីណៃពិដោ នៅមុនសម័យប្រជុំសភាថ្មីដែលមានអាសនៈ៦៦៤ ដែលនឹងត្រូវកោះប្រជុំនៅពេលក្រោយ ខណៈគណបក្ស NLD បានឈ្នះអាសនៈចំនួន ៣៩៦ នៅក្នុងការបោះឆ្នោតទូទៅកាលពីខែវិច្ឆិកាកន្លងទៅ ៕ ប្រភព៖ ABS-CBN
-
អ្នកឆ្លង COVID-19 នៅទូទាំងពិភពលោកកើនឡើងជិត១០៥លាននាក់ ក្នុងនោះស្លាប់ជាង២លាននាក់ និងជាសះស្បើយជាង៧៦លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១០៤លាន៩០ម៉ឺន៧ពាន់១៧៩ករណី ក្នុងនោះមានអ្នកជម្ងឺសរុបចំនួន២លាន២៧ម៉ឺន៨ពាន់៥៣៣នាក់ស្លាប់ និង ជាសះស្បើយឡើងវិញសរុបចំនួន៧៦លាន៦៣ម៉ឺន៣ពាន់១៣០នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៤ ខែកុម្ភៈ ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៧លាន១៥ម៉ឺន៤៥៧នាក់ ស្លាប់ចំនួន៤៦ម៉ឺន១ពាន់៩៣០នាក់ និងជាសះស្បើយចំនួន១៦លាន៩០ម៉ឺន៦ពាន់៧៧៨នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៧៩ម៉ឺន១ពាន់១២៣នាក់ ស្លាប់ចំនួន១៥ម៉ឺន៤ពាន់៧៤២នាក់ និងជាសះស្បើយ១០លាន៤៧ម៉ឺន៩ពាន់៥០៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៩លាន៣៣ម៉ឺន៩ពាន់៩២១នាក់ ស្លាប់២២ម៉ឺន៧ពាន់៥៩២នាក់ និងជាសះស្បើយ៨លាន២៣ម៉ឺន៦ពាន់៨៦៤នាក់ ៕ ប្រភព៖ worldometers
-
វៀតណាម៖ អ្នកធ្វើការ៣៧នាក់ក្នុងតំបន់ឧស្សាហកម្មមួយបានឆ្លងកូវីដ១៩
ប្រទេសវៀតណាមបានប្រកាសពីការឆ្លងជំងឺកូវីដ១៩ ចំនួន៥៧នាក់បន្ថែមទៀត ក្នុងនោះដែរ មានឆ្លងក្នុងសហគមន៍ចំនួន៥៦នាក់ ម្នាក់ទៀតនាំចូលពីក្រៅប្រទេស។ នាព្រឹកថ្ងៃព្រហស្បតិ៍ ទី៤ កុម្ភៈ ២០២១នេះ វៀតណាមបានប្រកាសពីរកឃើញឆ្លងក្នុងសហគមន៍ចំនួន៣៧នាក់ ដោយពួកគេសុទ្ធតែជាអ្នកធ្វើការនៅតំបន់ឧស្សាហកម្ម ស្ថិតក្នុងក្រុង Chi Linh ខេត្ត Hai Doung។ រីឯកាលពីល្ងាចថ្ងៃទី៣ កុម្ភៈ វៀតណាមក៏បានប្រកាសពីករណីឆ្លងថ្មីចំនួន២០នាក់ទៀត ក្នុងនោះ មានតែម្នាក់ទេដែលជាករណីនាំចូល ហើយ១៩នាក់ទៀតគឺជាការឆ្លងក្នុងសហគមន៍ ក្នុងនោះ ១៤នាក់នៅ Hải Dương ៤នាក់នៅ Quảng Ninh និងម្នាក់ទៀតនៅ Gia Lai ។ វៀតណាមមានករណីកូវីដ១៩ សរុបចំនួន១៩៤៨នាក់ ជាសះស្បើយ១៤៦១នាក់ ស្លាប់៣៥នាក់៕
-
ការប្រឆាំងតវ៉ានឹងការដណ្តើមអំណាច នៅមីយ៉ាន់ម៉ា
មីយ៉ាន់ម៉ា៖ ជនជាតិ មីយ៉ាន់ម៉ា នៅក្នុងប្រទេសថៃ បានរួបរួមគ្នាប្រឆាំងតវ៉ាទៅនឹងការដណ្តើមអំណាច របស់លោកឧត្តមសេនីយ៍ មិន អង់ ឡាយ ជាអគ្គមេបញ្ជាការកងទ័ព មីយ៉ាន់ម៉ា។ ជនជាតិ មីយ៉ានម៉ា បានប្រមូលផ្តុំគ្នាដើម្បីទាមទារឱ្យទាហានដោះលែង អងសាន ស៊ូជី ដោយគ្មានលក្ខខណ្ឌ។ សកម្មជនរបស់យុវជនរំដោះ ( Free youth) របស់ថៃបានចូលរួមលើកទឹកចិត្តដល់ជនជាតិ មីយ៉ាម៉ា ដែលប្រមូលផ្តុំគ្នាទាមទារយកប្រជាធិបតេយ្យ ពីកងទ័ព មីយ៉ាន់ម៉ា ក្នុងពេលនេះ។ នៅក្នុងទីក្រុង រ៉ង់ហ្គូន ដែលជារដ្ឋធានីចាស់របស់មីយ៉ានម៉ា ប្រជាជនបាននាំគ្នាសំដែងនូវការបដិសេធ មិនទទួលយកនូវទង្វើរបស់ក្រុមយោធាក្នុងពេលនេះ ដោយវាយចាន វាយឆាំង និងវាយខ្ទះព្រមទាំងចុចស៊ីផ្លេរថយន្ត ចំនួន៣០នាទី ។ សកម្មភាពនេះបានកើតឡើងក្រោយពីខាងកងទ័ព មីយ៉ានម៉ា ដណ្តើមអំណាចបានចំនួន២ថ្ងៃ៕
-
មីយ៉ាន់ម៉ាបើកកិច្ចប្រជុំគណៈរដ្ឋមន្រ្តីជាលើកដំបូង បន្ទាប់ពីយោធាធ្វើការរុះរើរដ្ឋមន្រ្តីទ្រង់ទ្រាយធំ
មីយ៉ាន់ម៉ា៖ មីយ៉ាន់ម៉ាបើកកិច្ចប្រជុំលើកដំបូងនូវរដ្ឋមន្ត្រីទើបតែងតាំងថ្មីរបស់ខ្លួន នៅព្រឹកថ្ងៃអង្គារម្សិលមិញ ក្នុងទីក្រុងណៃពិដោរ បន្ទាប់ពីយោធាបានធ្វើការរុះរើគណៈរដ្ឋមន្ត្រីទ្រង់ទ្រាយធំនាពេលថ្មីៗនេះ ។ លោកអគ្គមេបញ្ជាការយោធា មីន អោង ហ្លេង, ប្រធានាធិបតីស្តីទី អ៊ូ មីយីនត៍ ស្វេ និងរដ្ឋមន្ត្រីថ្មី០៩រូបទៀតបានបង្ហាញវត្តមាននៅក្នុងជំនួបនៅឯវិមានប្រធានាធិបតីនេះ ។ នៅក្នុងកិច្ចប្រជុំនោះ លោក មីន អោង ហ្លេង បានបញ្ចេញផែនការសំរាប់អនុវត្តក្នុងអំឡុងពេលដាក់ប្រទេសក្នុងគ្រាអាសន្ននេះ រួមមានការបើកអាគារសាសនា និងវត្ត , បន្តការហោះហើរក្នុងស្រុក និងសេវាសណ្ឋាគារ ព្រមទាំងឧស្សាហកម្ម ស្របតាមវិធានការប្រឆាំងជំងឺកូវីដ១៩ ។ ជាពិសេសការធ្វើអោយសេដ្ឋកិច្ចមានសកម្មភាពឡើងវិញ ដើម្បីបង្កើតឳកាសការងារសំរាប់អ្នកអត់ការងារធ្វើ និងបញ្ជូនពលរដ្ឋមីយ៉ាន់ម៉ាពីបរទេសមកពីប្រទេសទេសភ្លាមៗ ក្នុងអំឡុងពេលពិភពលោកជួបវិបត្តិជំងឺឆ្លង ។ បន្ថែមលើនេះ លោកអគ្គមេបញ្ជាការយោធា មីន អោង ហ្លេង ក៏បានធ្វើការជំរុញអោយសមាជិកគណៈរដ្ឋមន្រ្តីអនុវត្តតាមបទដ្ឋាន សម្រាប់ការធ្វើអោយប្រទេស ប្រសើរឡើងវិញ តាមរយៈការពិគ្រោះយោបល់ពហុភាគី ៕ ប្រភព៖ ស៊ីនហួរ