-
ទីបំផុតវៀតណាមបើកភ្លើងខៀវអោយប្រើវ៉ាក់សាំង Covid-19 របស់ក្រុមហ៊ុន AstraZeneca ចំពេលរកឃើញអ្នកឆ្លងថ្មីៗ៣៤ករណីទៀត
វៀតណាម៖ ទីបំផុតវៀតណាមបានអនុម័តអោយប្រើវ៉ាក់សាំង COVID-19 របស់ក្រុមហ៊ុនអង់គ្លេស AstraZeneca នៅថ្ងៃសៅរ៍នេះ ស្របពេលដែលប្រទេសអាស៊ីមួយនេះ ក៏បានកត់ត្រាពីអ្នកឆ្លងថ្មីៗចំនួន៣៤ករណីបន្ថែមទៀតផងដែរ ។ ក្រសួងសុខាភិបាលវៀតណាមបានបើកភ្លើងខៀវអោយប្រើវ៉ាក់សាំង Covid-19 របស់ក្រុមហ៊ុន AstraZeneca PLC សម្រាប់ការប្រើប្រាស់ក្នុងស្រុក ខណៈកន្លងមកនេះ រដ្ឋាភិបាលវៀតណាមនិយាយថា ខ្លួនកំពុងស្ថិតក្រោមការពិភាក្សាទិញវ៉ាក់សាំង AstraZeneca ចំនួន៣០លានដូស ។ បើតាមនាយករដ្ឋមន្រ្តីវៀតណាម លោក ង្វៀន សួនហ្វុក វៀតណាមត្រូវតែមានវ៉ាក់សាំងប្រឆាំងនឹងជំងឺ Covid-19 នៅក្នុងត្រីមាសទី ១ ឆ្នាំ២០២១ ។ គិតត្រឹមថ្ងៃទី៣០ ខែមករានេះ នៅទូទាំងប្រទេសវៀតណាមមានចំនួនអ្នកឆ្លង COVID-19 សរុប១ពាន់៦៥៧ករណី ក្នុងនោះស្លាប់៣៥នាក់ និងជាសះស្បើយឡើងវិញ ១ពាន់៤៤៨នាក់ ៕ ប្រភព៖ Reuters
-
អង្គការសហប្រជាជាតិមានកង្វល់ពីចរន្តរដ្ឋប្រហារនៅមីយ៉ាន់ម៉ា
បរទេស៖ អង្គការសហប្រជាជាតិមានកង្វល់ពីចរន្តរដ្ឋប្រហារក្នុងប្រទេសមីយ៉ាន់ម៉ា ដូចគ្នាទៅនឹងក្រុមប្រទេសលោកខាងលិចដែរ ដោយសារតែកងទ័ពមីយ៉ាន់ម៉ាបានប្រកាសថា នឹងដំណើរការ ប្រសិនបើអង្គភាពដែលពាក់ព័ន្ធមិនត្រួតពិនិត្យលើចំណុចដែលមានការសង្ស័យថា ការបោះឆ្នោតកាលពីខែវិច្ឆិកា ឆ្នាំ២០២០មានការលួចបន្លំ ។ ទីភ្នាក់ងារព័ត៌មានបរទេសបានរាយការណ៍ពីទីក្រុង ណៃពីដោ ប្រទេសមីយ៉ាន់ម៉ា នៅថ្ងៃទី២៩ ខែមករានេះថា អង្គការសហប្រជាជាតិបានចេញផ្សាយនូវសេចក្តីថ្លែងការណ៍របស់លោក អាន់តូនីញ៉ូ ហ្គូទែរ៉េស អគ្គលេខាធិការនៅក្នុងថ្ងៃព្រហស្បតិ៍កន្លងទៅនេះ ដោយលោកបានអំពាវនាវដល់គ្រប់ភាគីនៅមីយ៉ាន់ម៉ា ត្រូវគោរពលលទ្ធផលនៃការបោះឆ្នោតសកលកាលពីថ្ងៃទី០៨ ខែវិច្ឆិកា ឆ្នាំ២០២០កន្លងទៅនេះ ។ ស្របពេលជាមួយគ្នានេះដែរ ស្ថានទូតអង់គ្លេស កាណាដា អូស្រ្តាលី និងសហភាពអឺរ៉ុបប្រចាំនៅក្នុងប្រទេសមីយ៉ាន់ម៉ាបានចេញសេចក្តីថ្លែងការណ៍រួមគ្នា សុំអោយកងទ័ពមីយ៉ាន់ម៉ាគោរពតាមបទដ្ឋានប្រជាធិបតេយ្យ ៕
-
កូវីដ១៩៖ ថៃរកឃើញវិជ្ជមានជាង៨០០នាក់ទៀត ថ្ងៃនេះ
ថៃបានប្រកាសពីការរកឃើញវិជ្ជមានកូវីដ១៩ ចំនួន៨០២នាក់ទៀត នាថ្ងៃសុក្រ ទី២៩ មករា ២០២១នេះ ក្នុងនោះ មាន២១នាក់គឺជាករណីនាំចូល ក្រៅពីនេះ សុទ្ធតែជាករណីឆ្លងក្នុងសហគមន៍ ហើយភាគច្រើនមាននៅខេត្តសាមុត សាខន។ គួរកត់សម្គាល់ថា ប៉ុន្មានថ្ងៃជាប់ៗគ្នាមកនេះ ថៃមានករណីឆ្លងថ្មីជិត១ពាន់នាក់ ជាប្រចាំថ្ងៃ។ គិតត្រឹមថ្ងៃទី២៩ មករានេះ អ្នកកើតជំងឺកូវីដ១៩បានកើនដក់ ១៧០២៣នាក់ហើយ ស្លាប់៧៦នាក់៕
-
លោក ដូណាល់ ត្រាំ សន្យាជួយអោយគណបក្សសាធារណរដ្ឋគ្រប់គ្រងសភាតំណាងរាស្ត្រឡើងវិញ
អាមេរិក៖ អតីតប្រធានាធិបតីអាមេរិកលោក ដូណាល់ ត្រាំ បានសន្យាថា រូបលោកនឹងព្យាយាមជួយអោយគណបក្សសាធារណរដ្ឋ គ្រប់គ្រងសភាតំណាងរាស្ត្រឡើងវិញ នៅក្នុងការបោះឆ្នោតសភាពាក់កណ្ដាលអាណត្តិនៅឆ្នាំ២០២២ ។ ការអះអាងបែបនេះបានកើតមានស្របពេលដែលលោក ត្រាំ ជួបពិភាក្សាការងារជាមួយប្រធានសភាសំឡេងភាគតិច នៃសភាតំណាងរាស្ត្រមកពីគណបក្សសាធារណរដ្ឋ លោក ខេវិន ម៉ាខាធី នៅឯរម្មណីយដ្ឋាន ម៉ាអេឡាហ្គោ ក្នុងទីក្រុង ផាមប៊ិច រដ្ឋ ផ្ល័ររីដា ជាទីដែលលោក ត្រាំ កំពុងស្នាក់នៅ ចាប់តាំងពីលោកចាកចេញពីសេតវិមាន កាលពីថ្ងៃ២០ ខែមករាកន្លងទៅ ។ ជំនួបរវាងលោក ត្រាំ និងលោក ម៉ាខាធី ខាងលើនេះក៏ត្រូវបានធ្វើឡើងចំពេលដែលលោក ត្រាំ កំពុងប្រឈមមុខនឹងសវនាការមួយនៅក្នុងព្រឹទ្ធសភា នាខែកុម្ភៈខាងមុខនេះ ក្រោយសភាតំណាងរាស្ត្រគ្រប់គ្រងដោយបក្សប្រជាធិបតេយ្យ បោះឆ្នោតចោទប្រកាន់លោកជាផ្លូវការកាលពីថ្ងៃទី១៣ ខែមករា ពីបទញុះញង់ឱ្យក្រុមអ្នកគំាទ្ររូបលោកវាយប្រហារលើវិមានសភា ។ តែទោះជាយ៉ាងណាក៏ដោយ អ្នកវិភាគនយោបាយមួយចំនួននៅតែយល់ឃើញថា អតីតប្រធានាធិបតីអាមេរិករូបនេះ នឹងរួចខ្លួនការពីការកាត់ទោសនៅក្នុងសវនាការព្រឹទ្ធសភាជាថ្មីម្ដងទៀត ដោយសារតែសមាជិកព្រឹទ្ធសភាបក្សសាធារណរដ្ឋ ភាគច្រើននៅតែបន្តគាំទ្ររូបលោកដដែល ៕ ប្រភព៖ Reuters
-
នាយករដ្ឋមន្រ្តីអ៊ីស្រាអែលបញ្ជាក់ថា ការផ្អាកលក់យន្តហោះ F-35 របស់សហរដ្ឋអាមេរិក មិនប៉ះពាល់ដល់ទំនាក់ទំនងរវាងអ៊ីស្រាអែល-អេមីរ៉ាត់អារ៉ាប់រួមឡើយ
អ៊ីស្រាអែល៖ នាយករដ្ឋមន្រ្តីអ៊ីស្រាអែលលោក ប៊ិនចាមីន ណឺតាន់យ៉ាហ៊ូ នៅថ្ងៃព្រហស្បតិ៍នេះបញ្ជាក់ថា ការសម្រេចចិត្តផ្អាកកិច្ចព្រមព្រៀងលក់យន្តហោះចម្បាំងដ៏ទំនើប F-35 របស់សហរដ្ឋអាមេរិក ទៅអោយប្រទេសអេមីរ៉ាត់អារ៉ាប់រួម នឹងមិនបង្កផលប៉ះពាល់ដល់ទំនាក់ទំនង រវាងអ៊ីស្រាអែលជាមួយអេមីរ៉ាត់អារ៉ាប់រួមឡើយ ។ ការកត់សម្គាល់បែបនេះរបស់លោក ណឺតាន់យ៉ាហ៊ូ បានកើតមានឡើងបន្ទាប់ពីរដ្ឋបាលថ្មីរបស់ប្រធានាធិបតីអាមេរិកលោក ចូ បៃដិន បានផ្អាកកញ្ចប់នៃការលក់យន្តហោះ F-35 ទៅអោយអេមីរ៉ាត់អារ៉ាប់រួម និងអាវុធទៅអោយអារ៉ាប៊ីសាអូឌីតជាបណ្តោះអាសន្ន ដើម្បីមានឱកាសពិនិត្យសើរើឡើងវិញនូវកញ្ចប់ទាំងនោះ ។ សូមរំលឹកផងដែរថា កន្លងមក កិច្ចព្រមព្រៀងលក់យន្តហោះចម្បាំងដ៏ទំនើប F-35 ត្រូវទទួលបាននូវការអនុម័តយល់ព្រមពីអតីតរដ្ឋបាលរបស់ប្រធានាធិបតីអាមេរិកលោក ដូណាល់ ត្រាំ បន្ទាប់ពីប្រទេសអេមីរ៉ាត់អារ៉ាប់រួមបានព្រមព្រៀងកាលពីឆ្នាំមុន ក្នុងការផ្សារភ្ជាប់ទំនាក់ទំនងជាធម្មតាឡើងវិញជាមួយអ៊ីស្រាអែល ៕ ប្រភព៖ ស៊ីនហួរ
-
ប្រមុខអង្គការសហប្រជាជាតិទទួលការចាក់វ៉ាក់សាំងបង្ការ Covid-19 សម្រាប់ដូសដំបូងរួចរាល់ហើយ
អាមេរិក៖ យោងតាមប្រភពពីគេហទំព័រផ្លូវការរបស់អង្គការសហប្រជាជាតិបានអោយដឹងថា អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូទែរែស នៅថ្ងៃព្រហស្បតិ៍នេះ បានទទួលការចាក់វ៉ាក់សាំងបង្ការជំងឺ COVID-19 សម្រាប់ដូសដំបូងរួចហើយ ។ លោក ហ្គូទែរែស មានអាយុ៧១ឆ្នាំបានទទួលការចាក់វ៉ាក់សាំង COVID-19 សម្រាប់ដូសដំបូងនៅឯវិទ្យាល័យ អាដឡៃ ស្ទេវិនសុន ក្នុងសង្កាត់ ប្រុនស៍ ដែលមានចម្ងាយប៉ុន្មានគីឡូម៉ែត្រប៉ុណ្ណោះ ពីទីស្នាក់ការកណ្តាលរបស់អង្គការសហប្រជាជាតិនៅបុរីញូយ៉ក ដោយលោកមានសិទ្ធិទទួលបានការចាក់វ៉ាក់សាំងនេះ គឺដោយផ្អែកលើអាយុរបស់លោក ។ សូមជម្រាបថា ប្រជាជននៅទីក្រុងញូយ៉ក ដែលមានអាយុលើសពី៦៥ឆ្នាំត្រូវបានរាប់បញ្ចូលក្នុងក្រុមមនុស្សមានអាទិភាព ក្នុងនោះរួមបញ្ចូលទាំងបុគ្គលិកធ្វើការនៅសាលារៀន បុគ្គលិកផ្នែកដឹកជញ្ជូនសាធារណៈ និង បុគ្គលិកលក់ទំនិញនៅតាមហាង ក៏ដូចជាអាជ្ញាធរដោះស្រាយគ្នាមានអាសន្ន ៕ ប្រភព៖ ស៊ីនហួរ
-
នាយករដ្ឋមន្ត្រីសិង្ហបុរីចាក់វ៉ាក់សាំងបង្ការ Covid-19 របស់ក្រុមហ៊ុន Pfizer-BioNTech សម្រាប់ដូសទី២រួចរាល់ហើយ
សិង្ហបុរី៖ នាយករដ្ឋមន្រ្តីសិង្ហបុរីលោក លី សៀនឡុង នៅថ្ងៃសុក្រនេះបានទទួលការចាក់វ៉ាក់សាំងបង្ការជំងឺ COVID-19 ដែលផលិតឡើងដោយក្រុមហ៊ុន ភីហ្វីហ្សឺ-បាយអូអិនធិច សម្រាប់ដូសទី២រួចរាល់ហើយនៅឯមន្ទីរពេទ្យសិង្ហបុរី បន្ទាប់ពីលោកបានចាក់វ៉ាក់សាំងនេះសម្រាប់ដូសដំបូងនៅថ្ងៃទី០៨ ខែមករាកន្លងទៅ ។ ក្រោយចាក់វ៉ាក់សាំងរួចរាល់ នាយករដ្ឋមន្រ្តីសិង្ហបុរីរូបនេះ បានសរសេរសារបង្ហោះនៅលើគណនីហ្វេសប៊ុករបស់លោកថា វាដូចគ្នាទៅនឹងការចាក់វ៉ាក់សាំងនេះជាលើកដំបូងរបស់ខ្ញុំដែរ ដែលវាមានភាពរហ័ស និងគ្មានភាពឈឺចាប់អី្វទាំងអស់ ។ លោក លី បញ្ជាក់ទៀតថា សិង្ហបុរីកំពុងបង្កើនកម្មវិធីចាក់វ៉ាក់សាំងរបស់ខ្លួន និងកំពុងបើកមជ្ឈមណ្ឌលចាក់វ៉ាក់សាំងបន្ថែមទៀត ហើយថា ចូរទៅចាក់វ៉ាក់សាំង នៅពេលដែលវាដល់វេនរបស់អ្នក… វានឹងមិនត្រឹមតែការពារអ្នកទេ ប៉ុន្តែថែមទាំងការពារគ្រួសារ មិត្តភក្តិ និងមនុស្សគ្រប់គ្នា ដែលអ្នកមានទំនាក់ទំនងជាមួយ ។ សូមជម្រាបថា គិតត្រឹមថ្ងៃទី២៩ ខែមករា ឆ្នាំ២០២១នេះ អ្នកឆ្លង Covid-19 សរុបនៅទូទាំងប្រទេសសិង្ហបុរី មានចំនួន៥ម៉ឺន៩ពាន់៤២៥ករណី ក្នុងនោះមានអ្នកស្លាប់ចំនួន២៩នាក់ និងអ្នកជាសះស្បើយឡើងវិញចំនួន៥ម៉ឺន៩ពាន់១៤៨នាក់ ៕ ប្រភព៖ CNA
-
ចិនប្រើភាសាមុតស្រួចទៅកាន់កោះតៃវ៉ាន់ ដោយព្រមានថា ការប្រកាសឯករាជ្យ គឺស្មើនឹងការប្រកាសសង្គ្រាម
ចិន៖ ចិនរឹតបន្តឹងភាសារបស់ខ្លួនចំពោះកោះតៃវ៉ាន់ នៅថ្ងៃព្រហស្បតិ៍នេះ ដោយធ្វើការព្រមាន ក្រោយបង្កើនសកម្មភាពយោធានៅក្បែរកោះនេះថា “ឯករាជ្យមានន័យថាសង្គ្រាម” ហើយថា កងកម្លាំងប្រដាប់អាវុធរបស់ខ្លួនកំពុងធ្វើសកម្មភាពដើម្បីឆ្លើយតបនឹងការញុះញង់ និងការជ្រៀតជ្រែកពីបរទេស ។ អ្នកនាំពាក្យក្រសួងការពារជាតិចិន លោក វូ ឈៀន បានថ្លែងប្រាប់អ្នកសារព័ត៌មានថា កោះតៃវ៉ាន់គឺជាផ្នែកមួយមិនអាចកាត់ផ្តាច់បានពីប្រទេសចិន ហើយថាសកម្មភាពយោធាដែលធ្វើឡើងដោយកងទ័ពរំដោះប្រជាជនចិន នៅច្រកសមុទ្រតៃវ៉ាន់ គឺជាសកម្មភាពចាំបាច់ ដើម្បីដោះស្រាយស្ថានភាពសន្តិសុខបច្ចុប្បន្ននៅច្រកសមុទ្រតៃវ៉ាន់ និងដើម្បីការពារអធិបតេយ្យភាព និងសន្តិសុខជាតិ ។ លោក វូ ឈៀន បានសង្កត់ធ្ងន់ថា ប្រជាជនមួយក្តាប់តូចនៅកោះតៃវ៉ាន់កំពុងស្វះស្វែងប្រកាសឯករាជ្យរបស់កោះនេះ ដូច្នេះយើងព្រមានកម្លាំងឯករាជ្យតៃវ៉ាន់ថា អ្នកដែលលេងជាមួយភ្លើងនឹងរលាកខ្លួនឯង… ឯករាជ្យតៃវ៉ាន់មានន័យថាសង្គ្រាម ។ សូមរំលឹកផងដែរថា កោះតៃវ៉ាន់បានរាយការណ៍ថា យន្តហោះចម្បាំង និងយន្តហោះទម្លាក់គ្រាប់បែករបស់ចិនជាច្រើនគ្រឿង បានចូលទៅក្នុងតំបន់កំណត់អត្តសញ្ញាណការពារដែនអាកាសនៅភាគនិរតីរបស់ខ្លួនកាលពីចុងសប្តាហ៍មុន ជាហេតុជំរុញឱ្យរដ្ឋាភិបាលអាមេរិកអំពាវនាវឱ្យរដ្ឋាភិបាលចិន បញ្ឈប់ការដាក់សម្ពាធលើកោះតៃវ៉ាន់ ៕ ប្រភព៖ Reuters
-
អ្នកជំនាញផ្នែកវេជ្ជសាស្រ្តបញ្ជាក់ថា វ៉ាក់សាំង Novavax មានប្រសិទ្ធភាពប្រឆាំងនឹងវីរុស Covid-19 ទម្រង់ថ្មីនៅចក្រភពអង់គ្លេស
អាមេរិក៖ អ្នកជំនាញផ្នែកវេជ្ជសាស្ត្ររបស់ទូរទស្សន៍ BBC លោក Fergus Walsh បាននិយាយថា វ៉ាក់សាំង Novavax គឺជាវ៉ាក់សាំងដំបូងគេបង្អស់ដែលបង្ហាញ ប្រសិទ្ធភាពប្រឆាំងនឹងវីរុស Covid-19 ទម្រង់ថ្មី ដែលត្រូវបានគេរកឃើញនៅចក្រភពអង់គ្លេស ។ ពាក់ព័ន្ធនឹងការអះអាងខាងលើនេះ នាយករដ្ឋមន្រ្តីអង់គ្លេសលោក បូរីស ចនសុន បានស្វាគមន៍ចំពោះ “ដំណឹងល្អ” នេះ ហើយថា និយតករឱសថរបស់អង់គ្លេសនឹងវាយតម្លៃវ៉ាក់សាំងនេះ ។ វ៉ាក់សាំងការពារវីរុសកូរ៉ូណាថ្មីនេះ បានបង្ហាញប្រសិទ្ធភាពរហូតដល់៨៩.៣ភាគរយ ក្នុងការសាកល្បងខ្នាតធំនៅអង់គ្លេស ខណ់វាត្រូវបានធ្វើតេស្តលើមនុស្សជាង១ម៉ឺន៥ពាន់នាក់ ដែលមានអាយុចន្លោះពី១៨ដល់៨៤ឆ្នាំ ។ សូមបញ្ជាក់ថា Novavax គឺជាវ៉ាក់សាំងទី២ហើយ ដែលបានចូលរួមការសាកល្បងទ្រង់ទ្រាយធំនៅចក្រភពអង់គ្លេស ខណៈវ៉ាក់សាំងមួយទៀតត្រូវបានបង្កើតឡើងដោយសកលវិទ្យាល័យ Oxford ៕ ប្រភព៖ BBC
-
ប្រជាជនសិង្ហបុរីជាង១១ម៉ឺន៣ពាន់នាក់ទទួលការចាក់វ៉ាក់សាំង Covid-19 សម្រាប់ដូសដំបូង និងជាង៥០នាក់ទៀតបញ្ចប់ការចាក់ដូសទី២រួចរាល់ហើយ
សិង្ហបុរី៖ បុគ្គលជាង១១ម៉ឺន៣ពាន់នាក់ទទួលការចាក់វ៉ាក់សាំងបង្ការជំងឺ COVID-19 នូវដូសដំបូងបានរួចរាល់ ខណៈបុគ្គលជាង៥០នាក់ផ្សេងទៀតបានទទួលការចាក់វ៉ាក់សាំងនូវដូសទី២ ដោយបានបញ្ចប់ការទទួលចាក់វ៉ាក់សាំងពេញលេញ នេះបើតាមរបាយការណ៍ថ្មីមួយរបស់ក្រសួងសុខាភិបាលសិង្ហបុរី ។ ក្រសួងសុខាភិបាលសិង្ហបុរី បានលើកឡើងថា ចាប់ពីថ្ងៃចន្ទសប្តាហ៍ក្រោយនេះ គ្លីនិកទាំង២០នៅទូទាំងប្រទេស នឹងចាប់ផ្តើមផ្តល់ការចាក់វ៉ាក់សាំងបង្ការជំងឺ COVID-19 និងថា ចំនួនមនុស្សអាចនឹងកើនឡើងច្រើននៅសប្តាហ៍បន្ទាប់ ខណៈដែលប្រតិបត្តិការចាក់វ៉ាក់សាំងកំពុងបន្តយ៉ាងសកម្ម ។ ទន្ទឹមគ្នា មន្ទីរពហុព្យាបាល និងគ្លីនិកត្រៀមបង្ការសុខភាពសាធារណៈ (PHPCs) ក៏នឹងក្លាយជាកន្លែងបម្រើការ សម្រាប់ការចាក់វ៉ាក់សាំងផងដែរ ខណៈនៅពេលបច្ចុប្បន្នមនុស្សវ័យចំណាស់ អាចទៅទទួលចាក់វ៉ាក់សាំងនៅមន្ទីពហុព្យាបាលចំនួន០៩ និង PHPCs ចំនួន២១កន្លែង ៕ ប្រភព៖ CNA