-
វៀតណាមរកឃើញអ្នកឆ្លង Covid-19 ចំនួន០៩នាក់ទៀត ខណៈបញ្ជាអោយធ្វើចត្តាឡីស័ក២១ថ្ងៃ ក្រោយផ្ទុះករណីឆ្លងក្នុងសហគមន៍
វៀតណាម៖ វៀតណាម នៅថ្ងៃសុក្រនេះ បានកត់ត្រាពីអ្នកឆ្លង COVID-19 ថ្មីៗចំនួន០៩ករណីថ្មីបន្ថែមទៀត ដែលជាការផ្ទុះឡើងជាលើកដំបូងឡើងវិញ ដែលមិនធ្លាប់មានអស់រយៈពេលជិត២ខែ និងបានឆ្លងរាលដាលដល់ទីក្រុងហាណូយ ជាទីកំពុងធ្វើមហាសន្និបាតលើកទី១៣ នៃបក្សកុម្មុយនីស្តវៀតណាម ។ បើតាមក្រសួងសុខាភិបាលវៀតណាម ក្នុងចំណោមករណីឆ្លងថ្មីៗខាងលើ មួយករណីត្រូវបានរកឃើញនៅទីក្រុងហាណូយ ខណៈ០៨ករណីទៀតត្រូវបានរកឃើញនៅជិតទីក្រុង ហៃហ្វុង ខេត្ត ហៃឌុង ខេត្ត ក្វាងនិញ និងខេត្ត បាក់ និញ ដែលនាំឲ្យករណីឆ្លងសរុបនៅក្នុងការផ្ទុះឡើង ដែលត្រូវបានរាយការណ៍កាលពីថ្ងៃព្រហស្បតិ៍ម្សិលមិញនេះ កើនឡើងដល់៩៣ករណី ។ បច្ចុប្បន្នវៀតណាមបានបង្កើនរយៈពេលធ្វើចត្តាឡីស័កពី១៤ថ្ងៃមក២១ថ្ងៃ បន្ទាប់ពីការផ្ទុះកូវីដ១៩ក្នុងសហគមន៍ ។ ឆ្លើយតបនឹងបញ្ហាខាងលើនេះ នាយករដ្ឋមន្ត្រីវៀតណាមលោក ង្វៀន សួនហ្វុក ក៏បានបញ្ជាអោយអ្នកជាប់ពាក់ព័ន្ធនឹងអ្នកឆ្លងចុងក្រោយនេះ ធ្វើចត្តាឡីស័ក២១ថ្ងៃជំនួសអោយ១៤ថ្ងៃដូចសព្វមួយដង ។ វិធានការតឹងរឹងជាងមុននេះ ត្រូវបានប្រកាន់យកដោយសារវៀតណាមកំពុងរងការវាយប្រហារពីវីរុសកូរ៉ូណាប្រភេទថ្មីដូចនៅអង់គ្លេស ដែលឆ្លងលឿន និងអាចសម្លាប់មនុស្សខ្លាំងជាងមុន ៕ ប្រភព៖ Reuters
-
អ្នកឆ្លង COVID-19 នៅទូទាំងពិភពលោកកើនឡើងជាង១០២លាននាក់ ក្នុងនោះស្លាប់ជាង២លាននាក់ និងជាសះស្បើយជាង៧៣លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១០២លាន៣ម៉ឺន៦ពាន់៤៣៨ករណី ក្នុងនោះមានអ្នកជម្ងឺសរុបចំនួន២លាន២០ម៉ឺន៩៥៧នាក់ស្លាប់ និង ជាសះស្បើយឡើងវិញសរុបចំនួន៧៣លាន៨៦ម៉ឺន៥ពាន់៧៦១នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៩ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៦លាន៣៣ម៉ឺន៨ពាន់៦០៧នាក់ ស្លាប់ចំនួន៤៤ម៉ឺន៣ពាន់៧៦៩នាក់ និងជាសះស្បើយចំនួន១៦លាន៧ម៉ឺន១២៧នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៧២ម៉ឺន៩៧១នាក់ ស្លាប់ចំនួន១៥ម៉ឺន៤ពាន់៤៧នាក់ និងជាសះស្បើយ១០លាន៣៩ម៉ឺន៣ពាន់១៦២នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៩លាន៦ម៉ឺន៧៨៦នាក់ ស្លាប់២២ម៉ឺន១ពាន់៦៧៦នាក់ និងជាសះស្បើយ៧លាន៩២ម៉ឺន៣ពាន់៧៩៤នាក់ ៕ ប្រភព៖ worldometers
-
ថៃបន្តឆ្លងកូវីដ១៩ក្នុងសហគមន៍ជាង៧០០នាក់ទៀត ថ្ងៃនេះ
មជ្ឈមមណ្ឌលគ្រប់គ្រងស្ថានភាពកូវីដ១៩នៃប្រទេសថៃ ហៅកាត់ថា CCSA បានប្រកាសនៅថ្ងៃព្រហស្បតិ៍ ទី២៨ មករា ២០២១នេះថា មានករណីឆ្លងថ្មីៗ ចំនួន៧៥៦នាក់ទៀត ត្រឹម២៤ម៉ោង ភាគច្រើនឆ្លងនៅខេត្តសាមុត សាខន ក្នុងចំណោមនេះ មាន១០តែប៉ុណ្ណោះ ដែលជាករណីនាំចូលពីក្រៅប្រទេស។ សូមបញ្ជាក់ដែរថា គិតត្រឹមថ្ងៃទី២៨ មករានេះ ចំនួនឆ្លងកូវីដ១៩នៅប្រទេសថៃបានកើនឡើងដល់១៦២២១នាក់ហើយ ជាសះស្បើយ ១១២៨៧នាក់ហើយ កំពុងសម្រាកព្យាបាលចំនួន៤៨៥៨នាក់ ខណៈអ្នកស្លាប់មាន៧៦នាក់៕
-
កូវីដ១៩៖ ថៃប្រកាសបើកសាលាទូទាំងប្រទេសវិញ លើកលែងតែនៅសាមុត សាខន
ក្រសួងអប់រំប្រទេសថៃបានប្រកាសឲ្យដឹង កាលពីថ្ងៃម្សិលមិញថា គ្រប់សាលារៀនទាំងអស់ លើកលែងតែខេត្តសាមុតសាខន នឹងត្រូវឲ្យបើកទ្វារឡើងវិញ ចាប់ពីថ្ងៃទី១ កុម្ភៈ ឆ្នាំ២០២១ ពោលគឺបន្ទាប់បិទទ្វារក្រោយផ្ទុះក្នុងសហគមន៍ជាថ្មី ផ្តើមចេញពីផ្សារលក់គ្រឿងសមុទ្រមួយ កាលពីចុងខែធ្នូ ២០២០នោះ។ យ៉ាងណាក៏ដោយ សេចក្តីប្រកាសនេះបានឲ្យដឹងដែរថា សាលារៀននៅរាជធានីបាងកក និងខេត្តមួយចំនួនទៀត មិនអនុញ្ញាតឲ្យមានសិស្សក្នុងថ្នាក់លើសពី២៥នាក់ទេ។ រីឯនៅខេត្តសាមុត សាខន ដែលមានអត្រាឆ្លងខ្ពស់ជាងគេ សាលារៀននៅទីនោះតម្រូវឲ្យរៀនពីចម្ងាយ ដដែល៕ ប្រភពពី The Nation
-
កូវីដ១៩៖ វៀតណាមឆ្លងក្នុងសហគមន៍ទៀតហើយក្រោយស្ងាត់ជិត២ខែ ថ្ងៃនេះ ឆ្លងជិត១០០នាក់
រដ្ឋមន្ត្រីសុខាភិបាលវៀតណាម នៅថ្ងៃព្រហស្បតិ៍ទី ២៨ មករា ២០២១នេះ បាននិយាយថា មានករណីឆ្លងកូវីដ១៩ចំនួន៨១ករណីថ្មីទៀត ជាប់ពាក់ព័ន្ធនឹង២ករណីដែលត្រូវបានប្រកាស នាព្រឹកមិញនេះ ដែលបានបញ្ចប់ភាពគ្មានឆ្លងក្នុងសហគមន៍ក្នុងប្រទេស រយៈពេលជិតខែមកនេះ។ លោក Nguyen Thanh Long បានប្រកាសក្នុងកិច្ចប្រជុំមន្ត្រីជាន់ខ្ពស់ នៅថ្ងៃនេះ ហើយករណីថ្មីៗនេះបានកើតឡើង ត្រឹមប៉ុន្មានសប្តាហ៍មុនពេលមានពិធីបុណ្យចូលឆ្នាំថ្មី ដែលជាធម្មតា នឹងមានការជួបជុំគ្នានៅខាងក្រៅច្រើន។ រដ្ឋមន្ត្រីរូបនេះបានប្រាប់ដល់មន្ត្រីពាក់ព័ន្ធទូទាំងប្រទេស ពង្រឹងការគ្រប់គ្រងកូវីដ១៩ ក្រោយផ្ទុះជាថ្មីនេះ៕ ប្រភពពីCNA
-
ក្រុមប្រឆាំងនឹងលោក ចូ បៃដិន ត្រៀមបង្កអំពើហិង្សា
សហរដ្ឋអាមេរិក៖ ក្រសួងសន្តិសុខរបស់អាមេរិកប្រកាស ឲ្យប្រជាពោលរដ្ឋមានការប្រុងប្រយ័ត្នពីអំពើភេរវកម្មទូទាំងសហរដ្ឋកាលពីថ្ងៃពុធ ទី២៧ មករា ព្រោះអាចមានគ្រោះថ្នាក់ពីក្រុមជ្រុលនិយមដែលប្រឆាំងនឹងលោក ចូ បៃដិន ក្នុងឋានៈជាប្រធានាធិបតី។ ជាពិសេសនៅក្នុងអំឡុងពេលនៃការចាប់ផ្តើមនីតិវិធីនៃការដកហូតមុខតំណែងអតីតប្រធានាធិបតី ដូ ណាល់ត្រាំ នៅក្នុងពាក់កណ្តាលខែកុម្ភៈខាងមុខនេះ។ សេចក្តីប្រកាសនេះធ្វើឡើង២ថ្ងៃក្រោយពីប៉ង់តាហ្គោន បានថ្លែងអះអាងថា កងកម្លាំងការពារមាតុភូមិជាច្រើនពាន់នាក់ដែលត្រូវបញ្ជូនឲ្យទៅប្រចាំការក្នុងទីក្រុងវ៉ាស៊ីងតោន សម្រាប់ពិធីស្បថចូលកកាន់តំណែងរបស់លោក ចូ បៃដិន ត្រូវបន្តប្រចាំការរហូតដល់ខែមីនា ដោយសារមានព័ត៌មានពី FBI ជូនដំណឹងថាអាចមានអំពើប្រទូស្តរាយជាច្រើនអាចកើតឡើង។ សភាពការណ៍បែបនេះជាលើកដំបូងហើយដែលសហរដ្ឋអាមេរិកបានប្រកាសឲ្យមានការប្រុងប្រយ័ត្នបណ្តាលមកពីពួកជ្រុលនិយមបង្កឡើងក្នុងផ្ទៃក្នុងរបស់សហរដ្ឋខ្លួនឯង។ សកម្មភាពនេះកើតមានឡើងបន្ទាប់ពីថ្ងៃទី២៦ មករាដែលខាងក្រសួងយុត្តិធម៌បានបង្ហាញឲ្យដឹងថា គេបានចាប់ពិរុទ្ធជនបន្ថែមជាង១៥០នាក់ដែលមានការពាក់ព័ន្ធ និងការបង្កចលាចលក្នុងរដ្ឋសភា ហើយមានមនុស្សរាប់រយនាក់ទៀតកំពុងស្ថិតនៅក្រោមការស៊ើបអង្កេត។ មានសេចក្តីរាយការណ៍ថា FBI នៅតែតាមប្រមាញ់បុគ្គលដែលលបដាក់គ្រាប់បែក២គ្រាប់ក្បែររដ្ឋសភាកាលពីថ្ងៃទី៦ មករា កន្លងមកដោយប្រកាសផ្តល់រង្វាន់ដល់អ្នកផ្តល់តំរុយចំនួនប្រាក់៧ម៉ឺនប្រាំពាន់ដុល្លាសហរដ្ឋអាមេរិក៕
-
ក្រសួងសន្តិសុខមាតុភូមិអាមេរិកប្រកាសអាសន្នអំពីអំពើភេរវកម្មទូទាំងប្រទេស ក្រោយផ្ទុះកុបកម្មដ៏ហិង្សានៅវិមានសភាកាលពីដើមខែនេះ
អាមេរិក៖ ក្រសួងសន្តិសុខមាតុភូមិអាមេរិកបានប្រកាសអាសន្ន អំពីអំពើភេរវកម្មទូទាំងប្រទេស ដែលផ្អែកលើការគំរាមកំហែងពីក្រុមជ្រុលនិយមក្នុងស្រុកប្រឆាំងនឹងរដ្ឋាភិបាល ដែលជំទាស់ការកាន់តំណែងជាប្រធានាធិបតីរបស់លោក ចូ បៃដិន ។ ក្រសួងសន្តិសុខមាតុភូមិអាមេរិកបានគូសបញ្ជាក់ថា ក្រសួងមិនមានព័ត៌មានណាមួយ ដើម្បីបង្ហាញពីផែនការជាក់លាក់ និងគួរអោយទុកចិត្តបាននោះទេ… ហើយថា ទោះជាយ៉ាងណា កុបកម្មហិង្សានៅតែបន្តកើតមានក្នុងរយៈពេលប៉ុន្មានថ្ងៃថ្មីៗនេះ ហើយយើងនៅតែមានការព្រួយបារម្ភថា បុគ្គលដែលខកចិត្តចំពោះការផ្ទេរអំណាចរបស់រដ្ឋាភិបាល និង ការផ្លាស់ប្តូរប្រធានាធិបតី អាចបន្តប្រមូលផ្តុំមនោគមវិជ្ជាជាច្រើនទៀត ដើម្បីញុះញង់ ឬប្រព្រឹត្តិអំពើហិង្សា ។ សូមជម្រាបថា បើតាមការប្រកាសអាសន្នខាងលើនេះ ក្រុមជ្រុលនិយមអាចធ្វើការវាយប្រហារប្រឆាំងនឹងមន្រ្តីជាប់ឆ្នោត ព្រមទាំងទីតាំងរដ្ឋាភិបាល បន្ទាប់ពីការវាយប្រហារដ៏សាហាវកាលពីថ្ងៃទី០៦ ខែមករាកន្លងទៅ ទៅលើវិមានសភាដោយក្រុមកុបករគាំទ្ររបស់អតីតប្រធានាធិបតីអាមេរិក ដូណាល់ ត្រាំ ដែលជាលទ្ធផលនោះ ធ្វើអោយមនុស្ស០៥នាក់បាត់បង់ជីវិត ៕ ប្រភព៖ Reuters
-
មីយ៉ាន់ម៉ាចាប់ផ្តើមកម្មវិធីចាក់វ៉ាក់សាំង Covid-19 ទូទាំងប្រទេស ដោយផ្តល់អាទិភាពដំបូងដល់បុគ្គលិកសុខាភិបាល (Video)
មីយ៉ាន់ម៉ា៖ មីយ៉ាន់ម៉ាបានចាប់ផ្តើមកម្មវិធីចាក់វ៉ាក់សាំង Covid-19 ក្នុងទ្រង់ទ្រាយធំនៅទូទាំងប្រទេសនៅថ្ងៃពុធនេះ ដោយបុគ្គលិកសុខាភិបាលបានក្លាយជាមនុស្សដំបូងគេ ដែលបានចាក់វ៉ាក់សាំង ពោលគឺរយៈពេល០៥ថ្ងៃ បន្ទាប់ពីវ៉ាក់សាំងដំបូងត្រូវបានចែកចាយពីប្រទេសឥណ្ឌា ។ ឥណ្ឌាដែលផលិតវ៉ាក់សាំងក្រោមអាជ្ញាប័ណ្ណក្រុមហ៊ុន Oxford-AstraZeneca បានបរិច្ចាគចំនួន១.៥លានដូសដល់មីយ៉ាន់ម៉ា ដែលគ្រប់គ្រាន់សម្រាប់ចាក់ជូនប្រជាជន៧ម៉ឺន៥ពាន់នាក់ ។ បុគ្គលិកសុខាភិបាលប្រមាណ១០០នាក់បានទទួលការចាក់វ៉ាក់សាំង នៅថ្ងៃពុធម្សិលមិញ នៅឯមជ្ឈមណ្ឌលព្យាបាល អាយ៉េយ៉ាវ៉ាឌី កូវីដ១៩ ក្នុងទីក្រុងយ៉ាំងហ្គោន ដែលជាទីក្រុងធំបំផុតរបស់មីយ៉ាន់ម៉ា ។ ទន្ទឹមគ្នានេះ ទីប្រឹក្សារដ្ឋលោកស្រី អ៊ុងសាន ស៊ូជី មេដឹកនាំមីយ៉ាន់ម៉ា ក៏ត្រូវបានរំពឹងថា នឹងទទួលការចាក់វ៉ាក់សាំងនៅថ្ងៃព្រហស្បតិ៍សប្តាហ៍នេះ ។ សូមជម្រាបថា គិតត្រឹមថ្ងៃទី២៨ ខែមករា ឆ្នាំ២០២១ នៅទូទាំងប្រទេសមីយ៉ាន់ម៉ាមានអ្នកឆ្លងកូវីដ១៩សរុប១៣ម៉ឺន៨ពាន់៨០២ករណី ក្នុងនោះមានអ្នកស្លាប់៣ពាន់៨៩នាក់ និងអ្នកជាសះស្បើយឡើងវិញ១២ម៉ឺន៣ពាន់១៧០នាក់ ៕ ប្រភព៖ ស៊ីនហួរ
-
អតីតរដ្ឋមន្រ្តីការបរទេសអាមេរិកបញ្ជាក់ថា សហរដ្ឋអាមេរិកនឹងធ្វើការជាមួយចិនលើបញ្ហាប្រែប្រួលអាកាសធាតុ (Video)
អាមេរិក៖ សហរដ្ឋអាមេរិកនឹងព្យាយាមរក្សាការចរចាអាកាសធាតុជាមួយចិនដោយទុកដាច់ដោយឡែកសិន នូវភាពមិនចុះសម្រុងគ្នាផ្សេងទៀត ដែលជះឥទ្ធិពលដល់ទំនាក់ទំនងរវាងប្រទេសទាំងពីរ នេះបើតាមការបញ្ជាក់របស់អតីតរដ្ឋមន្ត្រីការបរទេស ដែលបច្ចុប្បន្នជាប្រេសិតអាកាសធាតុរបស់លោក ចូ បៃដិន គឺលោក ចន ឃើរី ។ លោក ចន ឃើរី បានបញ្ជាក់ដូច្នេះថា ឥឡូវនេះទាក់ទងនឹងចិន ជាក់ស្តែងយើងមានការខ្វែងគំនិតគ្នាយ៉ាងធ្ងន់ធ្ងរជាមួយចិនលើបញ្ហាសំខាន់ៗមួយចំនួន ។ បញ្ហានៃការលួចកម្មសិទ្ធិបញ្ញា និង សិទ្ធិចូលទៅកាន់ទីផ្សារ បញ្ហាសមុទ្រចិនខាងត្បូង… ខ្ញុំចង់មានន័យថា ចូលទៅមើលក្នុងបញ្ជី យើងដឹងបញ្ហាទាំងអស់នោះ ។ បញ្ហាទាំងនោះនឹងមិនពាក់ព័ន្ធនឹងបញ្ហាអាកាសធាតុនោះទេ ប៉ុន្តែអាកាសធាតុជាបញ្ហាសំខាន់ជាងគេ ដែលយើងត្រូវតែដោះស្រាយ ។ ប្រេសិតអាកាសធាតុអាមេរិករូបនេះបានសង្កត់ធ្ងន់ថា ចិនទទួលខុសត្រូវចំពោះការបំភាយឧស្ម័នលើពិភពលោកចំនួន៣០ភាគរយ និងសហរដ្ឋអាមេរិក១៥ភាគរយ ហើយថា ដូច្នេះវាជារឿងបន្ទាន់ ដែលយើងត្រូវរកវិធីចែកបញ្ហាឱ្យដាច់ ដើម្បីឆ្ពោះទៅមុខទៀត ៕ ប្រភព៖ Reuters
-
រដ្ឋបាលរបស់លោក ចូ បៃដិន ផ្អាកការលក់សព្វាវុធអោយទៅអេមីរ៉ាតអារ៉ាប់រួម និងអារ៉ាប៊ីសាអូឌីតជាបណ្តោះអាសន្ន (Video)
អាមេរិក៖ រដ្ឋបាលរបស់ប្រធានាធិបតីអាមេរិក លោក ចូ បៃដិន បានផ្អាកកញ្ចប់នៃការលក់យន្តហោះចម្បាំង F-35 ទៅអោយអេមីរ៉ាត់អារ៉ាប់រួម និងអាវុធទៅអោយអារ៉ាប៊ីសាអូឌីតជាបណ្តោះអាសន្ន ដើម្បីមានឱកាសពិនិត្យសើរើឡើងវិញនូវកញ្ចប់ទាំងនោះ ។ ការលក់ធំបំផុត គឺកញ្ចប់ទឹកប្រាក់ចំនួន២៣ពាន់លានដុល្លារនៃយន្ដហោះប្រភេទ F-35 ស៊េរីទំនើបដល់អេមីរ៉ាត់អារ៉ាប់រួម ។ បើតាមអ្នកនាំពាក្យក្រសួងការបរទេសអាមេរិក រដ្ឋបាលរបស់លោក បៃដិន កំពុងបញ្ឈប់ជាបណ្តោះអាសន្ន នូវការអនុវត្តការលក់គ្រឿងសព្វាវុធការពារជាតិមួយចំនួន ដើម្បីអនុញ្ញាតអោយអ្នកដឹកនាំទើបចូលកាន់តំណែងថ្មី មានឱកាសពិនិត្យសើរើឡើងវិញ ។ នេះគឺជាសកម្មភាពរដ្ឋបាលធម្មតា សម្រាប់អំឡុងពេលអន្តរកាលភាគច្រើន ហើយបង្ហាញពីការប្តេជ្ញាចិត្តរបស់រដ្ឋបាល ចំពោះតម្លាភាព និងអភិបាលកិច្ចល្អ ។ សូមជម្រាបថា ចំណាត់ការខាងលើនេះ ក៏មានគោលបំណងផងដែរ ដើម្បីធានាការលក់អាវុធរបស់សហរដ្ឋអាមេរិក អោយស្របតាមគោលបំណងយុទ្ធសាស្ត្ររបស់អាមេរិក ក្នុងការកសាងដៃគូសន្តិសុខ ដែលរឹងមាំជាងមុន អាចធ្វើអន្តរប្រតិបត្តិការបាន និង មានសមត្ថភាពសន្តិសុខកាន់តែច្រើន ៕ ប្រភព៖ Reuters