-
ក្រុមហ៊ុន Moderna នឹងប្រគល់វ៉ាក់សាំង Covid-19 ចំនួន១០០លានដូសអោយសហរដ្ឋអាមេរិកនៅត្រឹមចុងត្រីមាសទី១ ឆ្នាំ២០២១
អាមេរិក៖ ក្រុមហ៊ុនជីវបច្ចេកវិទ្យាវិទ្យាសាស្រ្តអាមេរិក ម៉ូឌែណា កំពុងដំណើរការរៀបចំដើម្បីប្រគល់វ៉ាក់សាំងបង្ការជំងឺ COVID-19 របស់ខ្លួនប្រមាណ១០០លានដូសឲ្យទៅសហរដ្ឋអាមេរិកនៅត្រឹមចុងត្រីមាសទី១ឆ្នាំ២០២១នេះ ជាមួយនឹងវ៉ាក់សាំង២០០លានដូសជាចំនួនសរុប ដែលនឹងត្រូវប្រគល់ជូនសហរដ្ឋអាមេរិកនៅដំណាច់៣ខែបន្ទាប់ ។ ក្រុមហ៊ុន ម៉ូឌែណា បានបញ្ជាក់ថា ខ្លួនបានផ្គត់ផ្គង់វ៉ាក់សាំងប្រមាណ៣០,៤លានដូសហើយគិតរហូតមកដល់ពេលនេះ នេះបើតាមការបញ្ជាក់ពីមជ្ឈមណ្ឌលបង្ការ និងគ្រប់គ្រងជំងឺសហរដ្ឋអាមេរិក ។ ក្រុមហុន ម៉ូឌែណា ក៏បានឲ្យដឹងកាលពីដើមខែនេះដែរថា ខ្លួននឹងផលិតវ៉ាក់សាំង COVID-19 ប្រមាណ៦០០លានដូសក្នុងឆ្នាំ២០២១នេះ កើនឡើង១០០លានដូសពីការព្យាករណ៍កាលពីពេលមុន ។ ក្រុមហ៊ុន ម៉ូឌែណា ក៏បន្ថែមទៀតថា ខ្លួននឹងបន្តការវិនិយោគ និងបន្ថែមបុគ្គលិក ដើម្បីបង្កើនសមត្ថភាព ផលិតវ៉ាក់សាំងអោយបាន១ពាន់លានដូសនៅឆ្នាំ២០២១នេះ ៕ ប្រភព៖ Reuters
-
ហ្វីលីពីនប្រកាសពីការរកឃើញករណីឆ្លងវីរុស Covid-19 ទម្រង់ថ្មីក្នុងសហគមន៍
ហ្វីលីពីន៖ អាជ្ញាធរសុខាភិបាលហ្វីលីពីនបានអះអាងពីការរកឃើញករណីឆ្លងក្នុងសហគមន៍ នៃវីរុសអង់គ្លេសបម្លែងខ្លួនប្រភេទថ្មី ដែលឆ្លងខ្លាំងជាងមេរោគកូរ៉ូណាទៅទៀត ។ អនុរដ្ឋលេខាធិការក្រសួងសុខាភិបាលហ្វីលីពីន លោកស្រី ម៉ារៀ រ៉ូសារីអូ វើហ្សេ បានប្រាប់សារព័ត៌មាន ANC ថា ឥឡូវនេះ យើងមានករណីឆ្លងក្នុងសហគមន៍ ដែលបុគ្គលមានផ្ទុកវីរុសទម្រង់ថ្មីបានចម្លងដល់សហគមន៍ និងក្រុមគ្រួសាររបស់ពួកគេ ។ បើតាមក្រសួងសុខាភិបាលហ្វីលីពីន វីរុស B117 បានរីករាលដាលក្នុងចំណោមមនុស្សចំនួន១២នាក់នៅខេត្ត Bontoc ភាគខាងជើង ។ ករណីដំបូងនៃវីរុសអង់គ្លេសនេះ ត្រូវបានរកឃើញលើជនជាតិហ្វីលីពីនម្នាក់ ដែលធ្វើដំណើរមកពីប្រទេសអារ៉ាប់រួម ។ គួរបញ្ជាក់ផងដែរថា ពិភពលោកកំពុងព្យាយាមទប់ស្កាត់ការរីករាលដាលនៃវីរុស B117 ថ្វីបើមានបម្រាមធ្វើដំណើរ, ការបិទទីតាំង និងវិធានការរឹតបន្តឹងនៅក្នុងប្រទេសជាច្រើនក៏ដោយ ចំពេលមានការព្រួយបារម្ភថា វាមិនត្រឹមតែឆ្លងខ្លាំងជាងជំងឺ Covid-19 ទេ ប៉ុន្តែវាក៏សម្លាប់មនុស្សសាហាវជាង Covid-19 ផងដែរ ៕ប្រភព៖ Reuters
-
ថៃមានផែនការចាក់វ៉ាកសាំង Covid-19 ថ្នាក់ជាតិចាប់ពីថ្ងៃទី១៤ ខែកុម្ភៈខាងមុខ ដោយចាប់ផ្តើមពីបុគ្គលិកសុខាភិបាល និងបុគ្គលិកជួរមុខ
ថៃ៖ ថៃមានផែនការចាប់ផ្តើមកម្មវិធីចាក់វ៉ាក់សាំង Covid-19 ថ្នាក់ជាតិរបស់ខ្លួនចាប់ពីថ្ងៃទី១៤ ខែកុម្ភៈខាងមុខនេះ ដោយចាប់ផ្តើមពីបុគ្គលិកសុខាភិបាល និងបុគ្គលិកជួរមុខ នេះបើតាមក្រសួងសុខាភិបាលថៃ ។ រដ្ឋលេខាធិការអចិន្ត្រៃយ៍នៃសុខភាពសាធារណៈថៃលោក គៀធីភូមិ វង្សក្រាជីត បានបញ្ជាក់ថា ដោយសារភាពអាចទទួលបាននូវវ៉ាក់សាំងនៅតែមានកម្រិតនោះ ក្រុមគោលដៅដែលមានហានិភ័យខ្ពស់នៃការឆ្លង នឹងត្រូវចាក់ក្នុងអំឡុងពេលដំណាក់កាលដំបូង ក្នុងចំណោមផែនការចាក់វ៉ាក់សាំងបីដំណាក់កាល ។ សូមរំលឹកថា កាលពីសប្តាហ៍មុន ប្រទេសថៃបានអនុម័តអោយវ៉ាក់សាំងរបស់ក្រុមហ៊ុន អាស្រ្តាហ្សេណេកា សម្រាប់ការប្រើប្រាស់បន្ទាន់ ហើយត្រូវបានគេរំពឹងថា នឹងទទួលបានចំនួន៥ម៉ឺនដូសនៅខែក្រោយពីក្រុមហ៊ុនអង់គ្លេស-ស៊ុយអ៊ែតមួយនេះ។ ថៃក៏នឹងទទួលបាន វ៉ាក់សាំងចំនួន២០ម៉ឺនដូសពីក្រុមហ៊ុនចិន ស៊ីណូវ៉ាក់ បាយអូធិច ផងដែរ ៕ ប្រភព៖ ស៊ីនហួរ
-
អ្នកឆ្លង COVID-19 នៅទូទាំងពិភពលោកកើនឡើងជាង១០០លាននាក់ ក្នុងនោះស្លាប់ជាង២លាននាក់ និងជាសះស្បើយជិត៧៣លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១០០លាន៨២ម៉ឺន៦ពាន់៦៨១ករណី ក្នុងនោះមានអ្នកជម្ងឺសរុបចំនួន២លាន១៦ម៉ឺន៧ពាន់៩២នាក់ស្លាប់ និង ជាសះស្បើយឡើងវិញសរុបចំនួន៧២លាន៨៤ម៉ឺន២ពាន់៥១៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៧ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៦លាន១ម៉ឺន១ពាន់២២២នាក់ ស្លាប់ចំនួន៤៣ម៉ឺន៥ពាន់៤៥២នាក់ និងជាសះស្បើយចំនួន១៥លាន៧៦ម៉ឺន៧ពាន់៤១៣នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៦៩ម៉ឺន២៧៩នាក់ ស្លាប់ចំនួន១៥ម៉ឺន៣ពាន់៧៥១នាក់ និងជាសះស្បើយ១០លាន៣៥ម៉ឺន៩ពាន់៣០៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៨លាន៩៣ម៉ឺន៦ពាន់៥៩០នាក់ ស្លាប់២១ម៉ឺន៨ពាន់៩១៨នាក់ និងជាសះស្បើយ៧លាន៧៩ម៉ឺន៨ពាន់៦៥៥នាក់ ៕ ប្រភព៖ worldometers
-
លោក ចូ បៃដិន ច្រានចោលបំរាមរបស់រដ្ឋបាលលោក ដូណាល់ ត្រាំ ដែលហាមឃាត់មនុស្សកែភេទចូលបម្រើយោធា
អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃចន្ទនេះ បានចុះហត្ថលេខាលើបទបញ្ជាមួយ ដើម្បីកែប្រែគោលនយោបាយនៃមន្ទីរបញ្ចកោណនៅក្រោមរដ្ឋបាលរបស់លោក ដូណាល់ ត្រាំ ដែលរារាំងមនុស្សកែភេទចូលបម្រើការងារយោធា ។ បទបញ្ជាថ្មីដែលលោក បៃដិន បានចុះហត្ថលេខានៅក្នុងការិយាល័យពងក្រពើ ឬ Oval Office អំឡុងកិច្ចប្រជុំមួយជាមួយរដ្ឋមន្រ្តីការពារជាតិអាមេរិកលោក ឡយ អូស្ទីន នេះ បានច្រានចោលការហាមឃាត់ដែលបញ្ជាដោយអតីតប្រធានាធិបតីអាមេរិកលោក ដូណាល់ ត្រាំ នៅលើបណ្តាញសង្គមធ្វីតធើ នៅឆ្នាំដំបូងរបស់លោកក្នុងពេលបំពេញការងារនៅការិយាល័យប្រធានាធិបតី ។ នៅពេលដែលគាត់បានចុះហត្ថលេខាលើបទបញ្ជាខាងលើ នៅថ្ងៃចន្ទដើមសប្តាហ៍នេះ លោក ចូ បៃដិន បានគូសបញ្ជាក់ថា អ្វីដែលខ្ញុំកំពុងធ្វើ គឺអាចធ្វើឱ្យជនជាតិអាមេរិក ដែលមានសមត្ថភាពទាំងអស់ អាចបម្រើប្រទេសរបស់ពួកគេដោយឯកសណ្ឋាន ។ ការសម្រេចចិត្តនេះ កើតមានឡើងនៅពេលដែលលោក បៃដិន គ្រោងនឹងបង្វែរការយកចិត្តទុកដាក់ទៅលើបញ្ហាសមធម៌ ដែលលោកជឿជាក់ថា នឹងបន្តគ្របដណ្ដប់ស្ទើរតែគ្រប់ផ្នែកទាំងអស់នៃជីវិតរស់នៅរបស់ប្រជាជនអាមេរិក ៕ ប្រភព៖ Reuters
-
សហរដ្ឋអាមេរិកពន្យារពេលអនុវត្តវិធានការរឹតត្បិតលើអ្នកដំណើរមកពីប្រេស៊ីល និងអឺរ៉ុប រួមទាំងអាហ្រ្វិកខាងត្បូង ក្រោយរកឃើញវីរុស Covid-19 ទម្រង់ថ្មី
អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃចន្ទនេះបានចុះហត្ថលេខាលើបទបញ្ជាមួយ ដើម្បីរារាំងអ្នកដំណើរដែលភាគច្រើនមិនមែនជាពលរដ្ឋអាមេរិក ដែលថ្មីៗនេះធ្លាប់ធ្វើដំណើរទៅប្រទេសអាហ្វ្រិកខាងត្បូងនោះ ពីការចូលមកក្នុងសហរដ្ឋអាមេរិក ខណៈវិធានការនេះ នឹងចូលជាធរមានចាប់ពីថ្ងៃទី៣០ ខែមករា ឆ្នាំ២០២១នេះតទៅ ។ ក្រសួងសុខាភិបាលអាមេរិក នៅថ្ងៃចន្ទនេះ បានបញ្ជាក់នៅក្នុងសេចក្តីថ្លែងការណ៍មួយថា ករណីឆ្លងវីរុស Covid-19 ទម្រង់ថ្មីលើកដំបូង ដែលមានប្រភពនៅប្រទេសប្រេស៊ីលនោះ ត្រូវបានគេរកឃើញលើប្រជាជនរស់នៅរដ្ឋមីនីសូតា ដែលថ្មីៗនេះគាត់បានធ្វើដំណើរទៅកាន់ប្រេស៊ីល ។ អ្នកនាំពាក្យសេតវិមានលោកស្រី ចេន ផ្សាគី បានបញ្ជាក់ក្នុងសន្និសិទសារព័ត៌ មានខ្លីថា ជាមួយនឹងការរីករាលដាលនៃជំងឺរាតត្បាតកាន់តែអាក្រក់ និងការឆ្លងរាតត្បាតកាន់តែខ្លាំងឡើងនៃវីរុសកូរ៉ូណាទម្រង់ថ្មីនោះ នេះមិនមែនជាពេលវេលាដែលត្រូវដកការរឹតត្បិតលើការធ្វើដំណើរអន្តរជាតិនោះទេ ។ ជាមួយគ្នានេះ ក្រសួងការបរទេសអាហ្វ្រិកខាងត្បូងនៅពុំទាន់ធ្វើការឆ្លើយតបនៅឡើយទេ ។ គួរបញ្ជាក់ថា បទបញ្ជារបស់លោក បៃដិន ក៏កំណត់ឡើងវិញនូវការហាមឃាត់ការចូលមកក្នុងសហរដ្ឋអាមេរិក ដែលបានកំណត់នឹងផុតសុពលភាពនៅថ្ងៃអង្គារនេះផងដែរ លើអ្នកដំណើរមិនមែនជនជាតិអាមេរិកទាំងអស់ ដែលបានធ្វើដំណើរទៅប្រេស៊ីល ចក្រភពអង់គ្លេស អៀរឡង់ និងប្រទេសចំនួន២៦នៅអឺរ៉ុប ៕ ប្រភព៖ AFP
-
សភាតំណាងរាស្ត្រអាមេរិកបញ្ជូនពាក្យចោទប្រកាន់លោក ត្រាំ ពីបទញុះញុងឱ្យក្រុមកុបករគាំទ្រវាយប្រហារវិមានកាពីតូល ទៅកាន់ព្រឹទ្ធសភាហើយ
អាមេរិក៖ សភាតំណាងរាស្ត្រអាមេរិកនៅថ្ងៃចន្ទនេះ បានបញ្ជូនពាក្យចោទប្រកាន់លើលោក ដូណាល់ ត្រាំ ទៅកាន់ព្រឹទ្ធសភាជាផ្លូវការ ពីបទញុះញង់ឱ្យក្រុមកុបករគាំទ្ររូបលោកចូលអុកឡុងវិមានសភាកាលពីថ្ងៃទី០៦ ខែមករាកន្លងទៅ ។ សវនាការកាត់ទោសលោក ដូណាល់ ត្រាំ នៅក្នុងព្រឹទ្ធសភាត្រូវបានគេរំពឹងថា នឹងប្រព្រឹត្តទៅនៅសប្ដាហ៍ទី២ ក្នុងខែកុម្ភៈខាងមុខនេះ ក្រោយសភាតំណាងរាស្ត្រ បានបោះឆ្នោតចោទប្ដឹងដកតំណែងអតីតប្រធានាធិបតីអាមេរិករូបនេះ កាលពីថ្ងៃទី១៣ ខែមករាកន្លងទៅ ។ បច្ចុប្បន្នទាំងព្រឹទ្ធសភា និងសភាតំណាងរាស្ត្រសុទ្ធតែស្ថិតនៅក្រោមការគ្រប់គ្រង របស់គណបក្សប្រជាធិបតេយ្យ ។ ប៉ុន្តែដើម្បីកាត់ទោសលោក ត្រាំ នោះ ព្រឹទ្ធ សភាអាមេរិកត្រូវរកឱ្យបានសំឡេងពីរភាគបី ឬមានន័យថា ទាល់តែសមាជិកព្រឹទ្ធសភាបក្សសាធារណរដ្ឋ១៧នាក់ យល់ព្រមចូលរួមបក្សប្រជាធិបតេយ្យ ។ ហើយបើសិនលោក ត្រាំ ត្រូវកាត់ទោសមែននោះ លោកក៏អាចនឹងត្រូវព្រឹទ្ធសភា ដកហូតសិទ្ធិឈរឈ្មោះជាបេក្ខជនប្រធានាធិបតីសាជាថ្មី ដែលប្រការនេះមានន័យថា លោកមិនអាចចូលរួមក្នុងការបោះឆ្នោតប្រធានាធិបតីអាមេរិកនៅឆ្នាំ២០២៤ នោះឡើយ ៕ ប្រភព៖ Reuters
-
លោក ដូណាល់ ត្រាំ បើកការិយាល័យផ្ទាល់ខ្លួន ក្នុងនាមជាអតីតប្រធានាធិបតី ខណៈកំពុងរងការចោទប្រកាន់ពីសភាតំណាងរាស្រ្តអាមេរិក
អាមេរិក៖ លោក ដូណាល់ ត្រាំ បានបើកការិយាល័យមួយក្នុងរដ្ឋផ្ល័ររីដា នៅថ្ងៃចន្ទនេះ ដែលនឹងទទួលបន្ទុកចាត់ចែងកាតព្វកិច្ចរបស់លោក ក្នុងនាមជាអតីតប្រធា នាធីបតីអាមេរិកម្នាក់ ក៏ដូចជាបន្តជំរុញរបៀបវារៈ នៃអតីតរដ្ឋបាលរបស់លោក ។ ការប្រកាសពីការបើកការិយាល័យខាងលើនេះ បានកើតមានឡើងចំពេលដែលសភាតំណាងរាស្ត្រអាមេរិក បានបញ្ជូនពាក្យចោទប្រកាន់លើអតីតប្រធានាធិបតីអាមេរិករូបនេះ ទៅកាន់ព្រឹទ្ធសភាជាផ្លូវការនៅថ្ងៃចន្ទនេះ ពីបទញុះញង់ឱ្យក្រុមកុបករគាំទ្ររូបលោកចូលអុកឡុងវិមានសភាកាលពីថ្ងៃទី០៦ ខែមករាកន្លងទៅ ដែលធ្វើអោយមនុស្ស០៥នាក់បាត់បង់ជីវិត ។ យោងតាមសេចក្តីថ្លែងការណ៍មួយបានអោយដឹងថា ការិយាល័យខាងលើនឹងមានតួនាទីរៀបចំកិច្ចការសំខាន់មួយចំនួនរួមមានការទំនាក់ទំនង, សេចក្តីថ្លែងការណ៍, ការបង្ហាញវត្តមាន និងសកម្មភាពផ្លូវការនានារបស់លោក ត្រាំ ក្រោមគោលដៅជំរុញ និង បន្តលើកកម្ពស់ផលប្រយោជន៍ជាតិអាមេរិក ក៏ដូចជាបន្តគោលដៅនៃអតីតរដ្ឋបាលរបស់លោក តាមរយៈការចូលរួមសកម្មភាពផ្សេងៗ ៕ ប្រភព៖ AP
-
ប្រធានាធិបតីអាមេរិកថ្មីចុះហត្ថលេខាលើបញ្ជាប្រតិបត្តិមួយ ដើម្បីជំរុញគោលនយោបាយ “ទិញផលិតផលសហរដ្ឋអាមេរិក”
អាមេរិក៖ ប្រធានាធិបតីអាមេរិក លោក ចូ បៃដិន ចុះហត្ថលេខាលើបទបញ្ជាប្រតិ បត្តិមួយនៅថ្ងៃចន្ទនេះ ដែលនឹងផ្តល់អោយក្រុមហ៊ុន និងផលិតផលអាមេរិកជាអាទិភាព ក្នុងការចុះកិច្ចសន្យាជាមួយរដ្ឋាភិបាលសហព័ន្ធ ខណៈរដ្ឋបាលថ្មីព្យា យាមជំរុញការផលិតក្នុងស្រុក ។ បទបញ្ជាប្រតិបត្តិដែលស្ថិតនៅក្រោមគោលនយោបាយ “ទិញផលិតផលអាមេរិក ឬ Buy American” នេះ នឹងជំរុញនូវការបង្កើតការងារ ព្រមទាំងបង្កើនការវិនិយោគ ដែលនេះជាផ្នែកមួយនៃការសន្យារបស់លោក បៃដិន នៅក្នុងយុទ្ធនាការ “កសាងអ្វីៗអោយល្អប្រសើរឡើងវិញ ឬ Build Back better” ដើម្បីបង្កើនកំណើនសេដ្ឋកិច្ច ដែលកំពុងរងគ្រោះដោយសារវិបត្តិ COVID-19 ។ សូមជម្រាបថា រដ្ឋាភិបាលអាមេរិកបានចំណាយប្រាក់៦០០ពាន់លានដុល្លារជារៀងរាល់ឆ្នាំ លើកិច្ចសន្យានានាជាមួយក្រុមហ៊ុនអាមេរិក ដើម្បីទីភ្នាក់ងារ ឬក្រសួងរបស់ខ្លួនទិញផលិតពីក្រុមហ៊ុនអាមេរិក និងបង្កើតការផលិតនៅក្នុងស្រុក ឬ Made in America ក៏ប៉ុន្តែក្រុមហ៊ុនអាមេរិកធំៗភាគច្រើន បែរជាមានរោងចក្រខ្លួនឯងនៅតាមបណ្ដាប្រទេសដទៃច្រើនជាងនៅក្នុងស្រុកទៅវិញ៕ ប្រភព៖ AFP
-
ចិនអះអាងថា វត្តមានយោធាអាមេរិកនៅដែនសមុទ្រចិនខាងត្បូង នឹងមិនអំណោយផលចំពោះសន្តិភាព និងស្ថេរភាពក្នុងតំបន់ឡើយ
ចិន៖ អ្នកនាំពាក្យក្រសួងការបរទេសចិនលោក Zhao Lijian បានថ្លែងប្រាប់អ្នកសារព័ត៌មាននៅថ្ងៃនេះថា សហរដ្ឋអាមេរិកតែងតែបញ្ជូនយន្ដហោះ និងនាវាទៅកាន់សមុទ្រចិនខាងត្បូង ដើម្បីបង្ហាញសាច់ដុំរបស់ខ្លួន ប៉ុន្តែទាំងនេះនឹងមិនអំណោយផលចំពោះសន្តិភាព និងស្ថេរភាពនៅក្នុងតំបន់នោះទេ ។ ការអត្ថាធិប្បាយបែបនេះរបស់លោក Zhao Lijian បានកើតមានឡើងក្រោយនាវាដឹកយន្តហោះអាមេរិកមួយក្រុម ដែលដឹកនាំដោយនាវាដឹកយន្តហោះចម្បាំងអាមេរិក USS Theodore Roosevelt អមដោយនាវាចម្បាំងចំនួន០៣គ្រឿងទៀត បានចូលដល់សមុទ្រចិនខាងត្បូង កាលពីថ្ងៃសៅរសប្តាហ៍កន្លងទៅ ដើម្បីលើកកម្ពស់សិទ្ធិសេរីភាព នៃការធ្វើនាវាចរណ៍ដែនសមុទ្រ ។ ពាក់ព័ន្ធនឹងសកម្មភាពខាងលើនេះដែរ ចិនតែងតែរិះគន់ជាច្រើនលើកច្រើនសារ ជុំវិញវត្តមានរបស់នាវាកងទ័ពជើងទឹកអាមេរិក ដែលបានចូលទៅកៀកកោះដែលខ្លួនកាន់កាប់នៅសមុទ្រចិនខាងត្បូង ខណៈវៀតណាម ម៉ាឡេស៊ី ហ្វីលីពីន ប្រ៊ុយណេ និងតៃវ៉ាន់ សុទ្ធតែអះអាងថា ខ្លួនមានចំណែកដែរ ៕ ប្រភព៖Reuters