-
ក្រុមហ៊ុន ម៉ូឌែណា បញ្ជាក់ថា វ៉ាក់សាំង Covid-19 របស់ខ្លួនមានប្រសិទ្ធភាព ដើម្បីប្រយុទ្ធប្រឆាំងនឹងវីរុសកូរ៉ូណាទម្រង់ថ្មី
អាមេរិក៖ ក្រុមហ៊ុន Moderna បានបញ្ជាក់នៅថ្ងៃចន្ទនេះថា ការសិក្សារបស់មន្ទីរពិសោធន៍បានបង្ហាញថា វ៉ាក់សាំង Covid-19 របស់ខ្លួននឹងនៅតែអាចប្រយុទ្ធប្រឆាំងជាមួយវីរុសកូរ៉ូណាទម្រង់ថ្មី ដែលមានប្រភពនៅអង់គ្លេស និង អាហ្វ្រិកខាងត្បូង ។ វីរុស COVID-19 ទម្រង់ថ្មី ឬមានលេខកូតសម្គាល់ B.1.1.7 ត្រូវបានគេជឿជាក់ថា មានសមត្ថភាពចម្លងជំងឺបានយ៉ាងឆាប់រហ័ស ពោលគឺ៧០ភាគរយលើសវីរុស COVID-19 បច្ចុប្បន្ន ហើយកុមារអាចនឹងប្រឈមមុខនូវការឆ្លងវីរុសទម្រង់ថ្មីនេះខ្ពស់ជាងគេ ។ បើតាមនាយកប្រតិបត្តិរបស់ក្រុមហ៊ុនជីវបច្ចេកវិទ្យាអាមេរិក Moderna លោក Stephane Bancel យើងត្រូវបានលើកទឹកចិត្តដោយទិន្នន័យថ្មីទាំងនេះ ដែលជួយពង្រឹងទំនុកចិត្តរបស់យើងថា វ៉ាក់សាំបង្ការជំងឺ COVID-19 របស់ក្រុមហ៊ុន Moderna គួរតែអាចប្រឆាំងនឹងវីរុស COVID-19 ទម្រង់ថ្មី ដែលទើបតែរកឃើញថ្មីៗនេះ ៕ ប្រភព៖Reuters
-
ឥណ្ឌាហាមឃាត់កម្មវិធី App របស់ចិនចំនួន ៥៩ រួមមានទាំង TikTok ជាអចិន្រ្តៃយ៍ ចំពេលយោធាប្រទេសទាំងពីរប៉ះទង្គិចគ្នាជាថ្មីទៀតនៅព្រំដែន
ឥណ្ឌា៖ ក្រសួងអេឡិចត្រូនិច និងបច្ចេកវិទ្យាព័ត៌មានឥណ្ឌាបានចេញសេចក្ដីជូនដំណឹងថ្មីថា រដ្ឋាភិបាលឥណ្ឌាបានសម្រេចហាមឃាត់កម្មវិធី App របស់ចិនចំនួន ៥៩ ក្នុងនោះរួមមានទាំង TikTok ជាអចិន្រ្តៃយ៍ ។ ស្របពេលជាមួយគ្នានេះដែរ អ្នកនាំពាក្យរដ្ឋាភិបាលឥណ្ឌាបានថ្លែងប្រាប់សារព័ត៌មាន Times of India ថា រដ្ឋាភិបាលមិនពេញចិត្តនឹងការឆ្លើយបត ឬការពន្យល់របស់ក្រុមហ៊ុន App ទាំង៥៩នោះទេ ដួច្នេះហើយទើបរដ្ឋាភិបាលសម្រេចចិត្តបិទកម្មវិធីទាំងនោះជាអចិន្រ្តៃយ៍ ។ សូមរំលឹកផងដែរថា កន្លងមក រដ្ឋាភិបាលឥណ្ឌាបានទុកឱកាសអោយកម្មវិធី App ទាំង៥៩ខាងលើនេះ ធ្វើការបកស្រាយ និងពន្យល់ពីគោលជំហរបស់ពួកគេ ក្នុងការអនុលោមតាមច្បាប់ប្រទេសឥណ្ឌា ជាពិសេសគឺច្បាប់ការងារ ភាពជាឯកជន និង សន្តិសុខសុវត្ថិភាព ទិន្នន័យផ្ទាល់ខ្លួន និងសន្តិសុខជាតិ ៕ ប្រភព៖Reuters
-
អ្នកឆ្លង COVID-19 នៅទូទាំងពិភពលោកកើនឡើងជាង១០០លាននាក់ ក្នុងនោះស្លាប់ជាង២លាន១៤ម៉ឺននាក់ និងជាសះស្បើយជាង៧២លាន២៨ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១០០លាន២៨ម៉ឺន២៥២ករណី ក្នុងនោះមានអ្នកជម្ងឺសរុបចំនួន២លាន១៤ម៉ឺន៩ពាន់៣៨៧នាក់ស្លាប់ និង ជាសះស្បើយឡើងវិញសរុបចំនួន៧២លាន២៨ម៉ឺន៩ពាន់១៦៩នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៦ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៥លាន៨៦ម៉ឺន១ពាន់៥៩៧នាក់ ស្លាប់ចំនួន៤៣ម៉ឺន១ពាន់៣៩២នាក់ និងជាសះស្បើយចំនួន១៥លាន៦១ម៉ឺន៧ពាន់៣៦០នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៦៧ម៉ឺន៧ពាន់៧១០នាក់ ស្លាប់ចំនួន១៥ម៉ឺន៣ពាន់៦២៤នាក់ និងជាសះស្បើយ១០លាន៣៤ម៉ឺន៥ពាន់២៧៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៨លាន៨៧ម៉ឺន២ពាន់៩៦៤នាក់ ស្លាប់២១ម៉ឺន៧ពាន់៧១២នាក់ និងជាសះស្បើយ៧លាន៧០ម៉ឺន៩ពាន់៦០២នាក់ ៕ ប្រភព៖ worldometers
-
ការប៉ះទង្គិចគ្នា រវាងចិន និងឥណ្ឌា
ទីភ្នាក់ងារ ព័ត៌មាន BBE និង AFP បានរាយការណ៍ថា៖ កាលពីថ្ងៃទី២៥ មករា សារព័ត៌មានក្នុងតំបន់របស់ឥណ្ឌា បានរាយការណ៍ថា មានកើតហេតុការណ៍ប៉ះទង្គិចគ្នារវាង ទាហានឥណ្ឌា និងចិន មួយលើកទៀត ក្នុងបរិវេណភាគខាងជើងរបស់រដ្ឋ ស៊ិកឃីម ក្នុងដែនដីរបស់ឥណ្ឌា បណ្តាលឱ្យមានអ្នករងរបួសទាំងសង់ខាង។ ទាហានឥណ្ឌាបានបញ្ជាក់ថា កងយាមល្បាតព្រំដែនរបស់ចិនបានព្យាយាមចូលទៅក្នុងតំបន់របស់ឥណ្ឌា។ ទោះជាយ៉ាងណាក៏ដោយ ខាងកងទ័ពឥណ្ឌាបានខំប្រឹងប្រែងធ្វើឱ្យហេតុការណ៍ វិលត្រឡប់មកធូរស្រាលវិញហើយ។ សំគាល់៖ រដ្ឋស៊ិកឃីម (Sikkim) ត្រូវបានស្ថាបនាជារដ្ឋនៅឆ្នាំ១៦៤២លុះមកដល់ឆ្នាំ១៩៧៥ ក៏បានចូលជារដ្ឋសមាជិករបស់ប្រទេសឥណ្ឌា៕
-
លោក ចូ បៃដិន គ្រោងដាក់បំរាមលើការធ្វើដំណើរពីប្រទេសអាហ្វ្រិកខាងត្បូង ដើម្បីទប់ស្កាត់ការឆ្លងរាតត្បាតនៃវីរុស Covid-19 ទម្រង់ថ្មី (Video)
អាមេរិក៖ ប្រធានាធិបតីអាមេរិកលោក ចូ បៃដិន នឹងដាក់បំរាមលើអ្នកដំណើរ ដែលមិនមែនជាពលរដ្ឋអាមេរិកចូលក្នុងប្រទេសខ្លួន ដែលថ្មីៗនេះធ្លាប់បានធ្វើដំណើរទៅប្រទេសអាហ្វ្រិកខាងត្បូង ដោយគិតចាប់ពីថ្ងៃទី៣០ ខែមករានេះតទៅ ដើម្បីទប់ស្កាត់ការឆ្លងរាតត្បាតនៃវីរុស Covid-19 ទម្រង់ថ្មី ។ នៅក្នុងថ្ងៃចន្ទដើមសប្តាហ៍នេះដែរ លោក បៃដិន ក៏កំពុងដាក់បំរាមសាជាថ្មីម្តងទៀតលើអ្នកដំណើរដែលមិនមែនជាពលរដ្ឋអាមេរិកស្ទើរទាំងអស់ ដែលមកពីប្រទេសប្រេស៊ីល ចក្រភពអង់គ្លេស អៀកឡង់ និង២៦ប្រទេសផ្សេងទៀតក្នុងតំបន់អឺរ៉ុប ។ សូមបញ្ជាក់ថា នៅក្នុងរយៈពេល២៤ម៉ោងកន្លងទៅនេះ មនុស្សសរុប១៣ម៉ឺន៥ពាន់១៨២នាក់ទៀតបានឆ្លង COVID-19 ខណៈអ្នកជំងឺ១ពាន់៨៤៤នាក់បានស្លាប់ នៅក្នុងរយៈពេលដូចគ្នានៅទូទាំងសហរដ្ឋអាមេរិក ។ ក្រោយការបូកសរុបទិន្នន័យបន្ថែមខាងលើនេះ នាំឲ្យចំនួនករណីឆ្លង COVID-19 សរុបនៅទូទាំងសហរដ្ឋអាមេរិកកើនឡើងដល់២៥លាន៧០ម៉ឺន២ពាន់១២៥ករណី ក្នុងនោះមានអ្នកស្លាប់សរុបចំនួន៤២ម៉ឺន៩ពាន់៤៩០នាក់ និងជាសះស្បើយឡើងសរុប ១៥លាន៤០ម៉ឺន៩ពាន់៦៣៩លាននាក់ ៕ ប្រភព៖ Reuters
-
ភាពតានតឹងរវាងចិន និងកោះតៃវ៉ាន់ថ្មីៗនេះ ទំនងជាកំពុងធ្វើតេស្តប្រតិកម្មរបស់រដ្ឋបាលលោក ចូ បៃដិន (Video)
អាមេរិក៖ ទីក្រុងវ៉ាស៊ីនតោនបានអះអាងជាថ្មីម្តងទៀត អំពីគាំទ្ររបស់ខ្លួនចំពោះកោះតៃវ៉ាន់ ក្រោយចិនបញ្ជូនយន្ដហោះចម្បាំងជាច្រើនគ្រឿងទៅហោះឆ្វែលកោះតៃវ៉ាន់ ដែលនេះជាសកម្មភាពមួយត្រូវបានគេមើលឃើញថា ជាការធ្វើតេស្ដប្រតិកម្មរបស់រដ្ឋបាលលោក ចូ បៃដិន ។ កាលពីថ្ងៃសៅរ៍សប្តាហ៍កន្លងទៅនេះ ក្រសួងការពារជាតិកោះតៃវ៉ាន់បញ្ជាក់ថា យន្តហោះទម្លាក់គ្រាប់បែក០៨គ្រឿង និង យន្តហោះចម្បាំង០៤គ្រឿងរបស់យោ ធាចិន បានចូលមកដល់ជ្រុងភាគនិរតីនៃតំបន់ដែនអាកាស អាឌីស របស់តៃវ៉ាន់ ខណៈខាងតៃវ៉ាន់ភ្លាមៗនោះបានចល័តប្រព័ន្ធមីស៊ីល ដើម្បីឃ្លាំមើលស្ថានការណ៍ ។ ជុំវិញបញ្ហាខាងលើនេះ អ្នកនាំពាក្យក្រសួងការបរទេសអាមេរិកលោក Ned Price បានបញ្ជាក់នៅក្នុងសន្និសិទសារព័ត៌មាននៅថ្ងៃ អាទិត្យ សប្តាហ៍មុននេះថា យើងជំរុញអោយចិនបញ្ឈប់ជាបន្ទាន់នូវការដាក់សម្ពាធខាងយោធា ការទូត និងសេដ្ឋកិច្ចប្រឆាំងតៃវ៉ាន់ ហើយត្រឡប់មករកកិច្ចសន្ទនាដ៏មានន័យជាមួយតៃវ៉ាន់វិញ ៕គួរបញ្ជាក់ថា ប្រភព៖ Reuters
-
ទីបំផុតវ៉ាក់សាំង Covid-19 របស់ក្រុមហ៊ុន Pfizer-BioNTech ទទួលបានការអនុម័តអោយប្រើប្រាស់ក្នុងប្រទេសអូស្ត្រាលី (Video)
អូស្រ្តាលី៖ ទីបំផុតវ៉ាក់សាំង Covid-19 របស់ក្រុមហ៊ុន ភីហ្វីហ្សឺ-បាយអូអិនធិច ទទួលបានការអនុម័តអោយប្រើប្រាស់ក្រោមនីតិវិធីធម្មតា ពីរដ្ឋាភិបាលអូស្រ្តាលី ដែលនេះបានធ្វើឱ្យអូស្រ្តាលីកា្លយជាប្រទេសមួយស្ថិតក្នុងចំណោមប្រទេសដំបូងគេ ដែលយល់ព្រមអនុម័តពេញលេញគ្រប់ជ្រុងជ្រោយលើវ៉ាក់សាំងនេះ ។ នាយករដ្ឋមន្ត្រីអូស្ត្រាលី លោក ស្កុត ម៉ូរីសុន បានគូសបញ្ជាក់ថា វ៉ាក់សាំង COVID-19 របស់ក្រុមហ៊ុនផលិតឱសថអាមេរិកសហការជាមួយអាល្លឺម៉ង់នេះ នឹងអនុញ្ញាតឱ្យប្រើប្រាស់លើប្រជាជនអូស្ត្រាលីមានវ័យ១៦ឆ្នាំឡើងទៅ ។ ជាមួយគ្នានេះ រដ្ឋមន្រ្តីសុខាភិបាលអូស្រ្តាលីលោក Greg Hunt បានប្រាប់អ្នកយកព័ត៌មានថា ការចាក់វ៉ាក់សាំងលើក្រុមមនុស្សមានអាទិភាពត្រូវបានគេរំពឹងថា នឹងចាប់ផ្ដើមនៅចុងខែកុម្ភៈខាងមុខនេះ ដោយអាជ្ញាធរនឹងចាក់អោយបាន៨ម៉ឺនដូសក្នុងមួយសប្ដាហ៍ ៕ប្រភព៖ Reuters
-
ថៃបន្តរកឃើញអ្នកឆ្លង Covid-19 ថ្មីៗចំនួន១៨៧ករណី និងមានអ្នកស្លាប់២នាក់ទៀត នៅក្នុងរបាយការណ៍ប្រចាំថ្ងៃចន្ទនេះ (Video)
ថៃ៖ អាជ្ញាធរសុខាភិបាលថៃ នៅថ្ងៃចន្ទដើមសប្តាហ៍នេះ បានកត់ត្រាពីអ្នកឆ្លង Covid-19 ថ្មីៗចំនួន១៨៧ករណី និងមានអ្នកស្លាប់បន្ថែម០២នាក់ទៀត ។ ក្នុងចំណោមករណីឆ្លងថ្មីៗចំនួន១៨៧ករណីខាងលើនេះ ក្នុងនោះមាន១១៦ ករណីត្រូវបានរកឃើញតាមរយៈការស្វែងរកសកម្ម ស្របពេលដែល៦១នាក់ជាករណីឆ្លងក្នុងសហគមន៍ និង ១០នាក់ជាករណីនាំចូល ។ សូមជម្រាបផងដែរថា គិតត្រឹមថ្ងៃទី២៥ ខែមករា ឆ្នាំ២០២១នេះ ចំនួនអ្នកឆ្លង Covid-19 សរុបនៅទូទាំងប្រទេសថៃបានកើនឡើងដល់១ម៉ឺន៣ពាន់៦៨៧ករណី ក្នុងនោះមានអ្នកស្លាប់៧៥នាក់ និងអ្នកជាសះស្បើយឡើងវិញ១ម៉ឺន៦៦២នាក់ ៕ ប្រភព៖ Bangkok Post
-
លោក ចូ បៃដិន សុំទោសចំពោះការទុកអោយកងកម្លាំងឆ្មាំជាតិដែលឈរជើងនៅវិមានសភា ដេកនៅចំណតរថយន្ត (Video)
អាមេរិក៖ ប្រធានាធិបតីអាមេរិកលោក ចូ បៃដិន បានថ្លែងសុំទោស ក្រោយសមា ជិកមួយចំនួននៃកងកម្លាំងឆ្មាំជាតិ ដែលឈរជើងនៅវិមានសភា ត្រូវបានគេមើលឃើញថា ដេកនៅចំណតរថយន្ត ។ រឿងនេះធ្វើអោយមានកំហឹងក្នុងចំណោមអ្នកនយោបាយ ហើយអភិបាលរដ្ឋមួយចំនួនបានកោះហៅកងទ័ពមកវិញ ដោយសារតែភាពចម្រូងចម្រាស់នេះ ។ ទាហានជាង២ម៉ឺន៥ពាន់នាក់ត្រូវបានដាក់ពង្រាយនៅទីក្រុងវ៉ាស៊ីនតោន ដើម្បីការពារពិធីស្បថចូលកាន់តំណែងជាផ្លូវការរបស់លោក ចូ បៃដិន បន្ទាប់ពីមានអំពើហិង្សាដ៏អាក្រក់នៅវិមានសភាកាលពីថ្ងៃទី០៦ ខែមករាកន្លងទៅ ។ ជុំវិញបញ្ហានេះដែរ លោក បៃ បានទូរស័ព្ទទៅប្រធានការិយាល័យឆ្មាំជាតិនៅថ្ងៃសៅរ៍សប្តាហ៍មុននេះ (ម៉ោងក្នុងតំបន់) ដើម្បីសុំអភ័យទោស និងសួរថាតើលោកអាចធ្វើអ្វីបាន ។ ជាមួយគ្នានេះ ជំទាវទី១ Jill Biden ក៏បានទៅសួរសុខទុក្ខកងទ័ពមួយចំនួនផងដែរ ដើម្បីថ្លែងអំណរគុណដល់ពួកគេផ្ទាល់ ដោយនាំ Biscuit ពីសេតវិមានទៅធ្វើជាអំណោយ ។ លោកស្រីនិយាយថា ខ្ញុំមកថ្ងៃនេះ ដើម្បីថ្លែងអំណរគុណដល់អ្នកទាំងអស់គ្នា ដែលបានរក្សាខ្ញុំ និងក្រុមគ្រួសារឲ្យមានសុវត្ថិភាព ៕ ប្រភព៖ Reuters
-
កងឆ្មាំជាតិចន្លោះពី១៥០ទៅ២០០នាក់ធ្វើតេស្តវិជ្ជមាន Covid-19 ក្រោយពិធីស្បថចូលកាន់តំណែងរបស់លោក ចូ បៃដិន
អាមេរិក៖ កងឆ្មាំជាតិពី១៥០ទៅ២០០នាក់ ដែលដាក់ពង្រាយនៅទីក្រុងវ៉ាស៊ីន តោន ដើម្បីការពារពិធីស្បថចូលកាន់តំណែងជាផ្លូវការរបស់លោក ចូ បៃដិន បានធ្វើតេស្តវិជ្ជមាន Covid-19 ។ រដ្ឋាភិបាលអាមេរិកបានដាក់ចេញវិធានការសន្តិសុខ ដែលមិនធ្លាប់មានពីមុនមកក្នុងទីក្រុងវ៉ាស៊ីនតោន ក្រោយការវាយប្រហារដ៏សាហាវកាលពីថ្ងៃទី០៦ ខែមករាទៅលើវិមានសភា ដោយក្រុមអ្នកគាំទ្រអតីតប្រធានាធិបតីអាមេរិកលោក ដូណាល់ ត្រាំ ។ បើតាមមន្ត្រីម្នាក់ដែលនិយាយក្នុងលក្ខខណ្ឌសុំមិនបញ្ចេញឈ្មោះ ចំនួនកងកម្លាំងឆ្មាំជាតិដែលបានធ្វើតេស្តវិជ្ជមាន Covid-19 អាចនឹងកើនឡើងជាបន្តទៀត ប៉ុន្តែនៅតែជាចំណែកតូចមួយនៃកងទ័ពជាង២ម៉ឺន៥ពាន់នាក់ ដែលត្រូវបានដាក់ពង្រាយនៅក្នុងទីក្រុងកាលពីប៉ុន្មានថ្ងៃមុន ៕ប្រភព៖ Reuters