-
លោក ចូ បៃដិន បញ្ជាអោយពាក់ម៉ាស និងធ្វើចត្តាឡីស័កចំពោះអ្នកដំណើរចូលមកកាន់សហរដ្ឋអាមេរិក ដើម្បីទប់ស្កាត់ Covid-19
អាមេរិក៖ ប្រធានាធិបតីអាមេរិកលោក ចូ បៃដិន បានបោះជំហ៊ាននភ្លាមៗ នៅក្នុងរយៈពេលមួយថ្ងៃនៃការឡើងកាន់តំណែង តាមរយៈកិច្ចខិតខំប្រឹងប្រែង ដើម្បីសម្របសម្រួលថ្នាក់សហព័ន្ធ សម្រាប់ការប្រយុទ្ធប្រឆាំង COVID-19 ដោយលោកបានបង្កើនសកម្មភាពធ្វើតេស្តរកវីរុស និង ការចាក់វ៉ាក់សាំង ជាពិសេសការពង្រឹងការពាក់ម៉ាស ។ នៅក្នុងថ្ងៃដែលលោក បៃដិន ឈានជើងចូលសេតវិមានដំបូង លោកបានរិះគន់ថា កម្មវិធីចាក់វ៉ាក់សាំងនៅសហរដ្ឋអាមេរិក ដែលត្រូវបានដាក់ចេញដោយរដ្ឋបាលមុន គឺជាភាពបរាជ័យដ៏គួរអោយភ័យខ្លាច ។ លោកបន្ថែមថា អ្វីៗគ្រប់យ៉ាងនឹងវិវឌ្ឍកាន់តែអាក្រក់ មុននឹងស្ថានការណ៍អាចចាប់ផ្តើមប្រសើរឡើងវិញ ដោយលោកបានហៅរយៈពេល៩៩ថ្ងៃខាងមុខនេះថា ជាពេលវេលានៃការធ្វើសង្គ្រាម ។ សូមជម្រាបថា បទបញ្ជាប្រតិបត្តិរបស់លោក ចូ បៃដិន ដែលត្រូវបានចុះហត្ថលេខានៅថ្ងៃព្រហស្បតិ៍នេះ នឹងបង្កើតឡើងនូវក្រុមប្រឹក្សាភិបាលធ្វើតេស្ត ដើម្បីបង្កើនសកម្មភាពធ្វើតេស្តរកជំងឺ COVID-19 នៅទូទាំងប្រទេស ជំរុញការផ្គត់ផ្គង់សម្ភារៈដែលខ្វះខាតកន្លងមក បង្កើតច្បាប់-បទដ្ឋាន សម្រាប់អ្នកដំណើរមកពីបរទេស និងការផ្តល់ធនធានដោយផ្ទាល់ទៅកាន់សហគមន៍ជនជាតិភាគតិច ដែលរងការវាយប្រហារធ្ងន់ធ្ងរ ដោយសារវីរុសនេះ ៕ប្រភព៖ Reuters
-
អ្នកជំនាញជំងឺឆ្លងអាមេរិកនិយាយថា សហរដ្ឋអាមេរិកនឹងបន្តជាសមាជិកភាពរបស់ WHO ហើយចូលរួមក្នុងកម្មវិធីវ៉ាក់សាំង COVAX ដើម្បីចែកចាយដល់ប្រទេសក្រីក្រ
អាមេរិក៖ សហរដ្ឋអាមេរិកស្ថិតក្រោមរដ្ឋបាលរបស់លោកប្រធានាធិបតី ចូ បៃដិន នឹងបង្កើនការចូលរួមជាមួយកម្មវិធីវ៉ាក់សាំង COVAX ដែលមានគោលបំណងចែកចាយវ៉ាក់សាំងអោយដល់ប្រទេសក្រីក្រ នេះបើតាមប្រធានទីប្រឹក្សាវេជ្ជសាស្ត្រអាមេរិកលោក អាន់តូនី ហ្វូស៊ី ប្រាប់ទៅកាន់កិច្ចប្រជុំរបស់អង្គការសុខភាពពិភពលោក WHO តាមរយៈវីដេអូមួយ ។ លោក ហ្វូស៊ី បន្តថា សហរដ្ឋអាមេរិកនឹងបន្តផ្តល់មូលនិធិដល់ទីភ្នាក់ងារសុខាភិបាលរបស់អង្គការសហប្រជាជាតិ ខណៈដែលប្រធានាធិបតីអាមេរិកលោក ចូ បៃដិន ងាកទៅរកកិច្ចសហប្រតិបត្តិការអន្តរជាតិកាន់តែខ្លាំង ក្នុងការប្រយុទ្ធប្រឆាំងនឹងជំងឺ Covid-19 តាមរយៈការចាប់ផ្តើមផែនការតំលៃ១.៩លានលានដុល្លារ ដើម្បីដោះស្រាយជំងឺរាតត្បាតនៅក្នុងស្រុកផងដែរ ។ លោក ហ្វូស៊ី បានប្រាប់ទៅកិច្ចប្រជុំរបស់ WHO តាមរយៈវីដេអូទៀតថា ស្ថិតក្រោមកាលៈទេសៈដ៏លំបាក អង្គការបានប្រមូលផ្តុំសហគមន៍វិទ្យាសាស្ត្រស្រាវជ្រាវ និងអភិវឌ្ឍន៍ ដើម្បីពន្លឿនការផលិតវ៉ាក់សាំង ការព្យាបាល និងការធ្វើរោគវិនិច្ឆ័យ ។ ទន្ទឹមគ្នា ប្រធានាធិបតីអាមេរិកថ្មីក៏កំពុងស្វះស្វែងចាក់វ៉ាក់សាំងការពារដល់មនុស្ស១០០លាននាក់ក្នុងរយៈពេល១០០ថ្ងៃ បង្កើនការប្រើប្រាស់ម៉ាស់ និងការធ្វើតេស្ត ពង្រីកកម្លាំងសុខភាពសាធារណៈ និងផ្តល់ជំនួយសង្គ្រោះបន្ទាន់បន្ថែមទៀតដល់អ្នកដែលកំពុងជួបការលំបាកពីការរឹតត្បិត ៕ប្រភព៖ Reuters
-
មនុស្ស០៥នាក់ស្លាប់ ក្នុងហេតុការណ៍អគ្គិភ័យឆាបឆេះរោងចក្រផលិតវ៉ាក់សាំង Covid-19 ធំជាងគេបំផុតរបស់ពិភពលោកក្នុងប្រទេសឥណ្ឌា
ឥណ្ឌា៖ យ៉ាងហោចណាស់មានមនុស្ស០៥នាក់បានបាត់បង់ជីវិត បន្ទាប់ពីអគ្គិភ័យដ៏សន្ធោសន្ធៅមួយ បានឆាបឆេះរោងចក្រផលិតវ៉ាក់សាំង COVID-19 មួយកន្លែង ដែលធំជាងគេបំផុតរបស់ពិភពលោកនៅក្នុងប្រទេសឥណ្ឌា ។ ប្រភពបានអោយដឹងថា អគ្គិភ័យខាងលើនេះ បានឆាបឆេះនៅវិទ្យាស្ថានសេរ៉ូមឥណ្ឌា (SII) ដែលជាក្រុមហ៊ុនផលិតវ៉ាក់សាំងធំជាងគេបំផុតលើពិភពលោក និងជាទីដែលវ៉ាក់សាំងរាប់លានដូសរបស់ក្រុមហ៊ុន Oxford / AstraZeneca កំពុងផលិតនៅទីនោះ ។ ភ្លាមៗនោះ នៅមិនទាន់មានព័ត៌មានណាមួយបញ្ជាក់ពីគ្រោះថ្នាក់ និងមូលហេតុនៃអគ្គិភ័យនៅឡើយទេ ប៉ុន្តែគេជឿថា វាឆាបឆេះចេញពីអគារមួយ ដែលកំពុងសាងសង់ ហើយមិនមែនជាកន្លែងស្តុកវ៉ាក់សាំងទេ ៕ប្រភព៖ CNA
-
លោក Elon Musk សន្យាផ្តល់រង្វាន់១០០លានដុល្លារ សម្រាប់ការអភិវឌ្ឍបច្ចេកវិទ្យាដែលល្អបំផុត ដើម្បីចាប់យកការបំភាយកាបូនឌីអុកស៊ីត
អាមេរិក៖ តាមរយៈបណ្តាញសង្គម Twitter នាយកប្រតិបត្តិក្រុមហ៊ុន Tesla លោក Elon Musk បានសន្យាផ្ដល់រង្វាន់១០០លានដុល្លារ សម្រាប់ការអភិវឌ្ឍបច្ចេកវិទ្យាដែលល្អបំផុត ដើម្បីចាប់យកការបំភាយកាបូនឌីអុកស៊ីត ហើយថា ព័ត៌មានលម្អិតគឺនៅសប្តាហ៍ក្រោយ ។ ជុំវិញនឹងការបង្ហោះសារខាងលើនេះ ត្រូវបានក្រុមអ្នកឃ្លាំមើលនិយាយថា លោក Musk ប្រហែលជាអាចបង្កើតអង្គភាពថ្មីមួយដែលចូលរួម និងទប់ស្កាត់ការបម្រែបម្រួលអាកាសធាតុ ព្រោះថាបើតាមការបញ្ជាក់ពី Tesla និង SpaceX គឺក្រុមហ៊ុនទាំងពីរមិនបានពាក់ព័ន្ធនឹងរឿងនេះទេ ។ សូមជម្រាបថា ការចាប់យកការបំភាយកំដៅផែនដី កំពុងក្លាយជាផ្នែកមួយដ៏សំខាន់នៃផែនការ ដើម្បីរក្សាការបម្រែបម្រួលអាកាស ដែលបច្ចុប្បន្នពិភពលោកទាំងមូលកំពុងតែយកចិត្តទុកដាក់ខ្លាំងបំផុត ប៉ុន្តែបច្ចុប្បន្ននេះនៅមិនទាន់មានបច្ចេកវិទ្យាណាល្អបំផុត ក្នុងការចាប់យកការបំភាយកំដៅផែនដី ឬការបំភាយកាបូនឌីអុកស៊ីតនោះទេ ៕ប្រភព៖ Reuters
-
អ្នកឆ្លង COVID-19 នៅទូទាំងពិភពលោកកើនឡើងជាង៩៨លាននាក់ ក្នុងនោះស្លាប់ជាង២លាន១០ម៉ឺននាក់ និងជាសះស្បើយជាង៧០លាន៤៦ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៩៨លាន៨ម៉ឺន៨ពាន់៧៣១ករណី ក្នុងនោះមានអ្នកជម្ងឺសរុបចំនួន២លាន១០ម៉ឺន៣៨៨នាក់ស្លាប់ និង ជាសះស្បើយឡើងវិញសរុបចំនួន៧០លាន៤៦ម៉ឺន៦ពាន់៩២៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២២ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៥លាន១៩ម៉ឺន៦ពាន់៨៦នាក់ ស្លាប់ចំនួន៤២ម៉ឺន២៨៥នាក់ និងជាសះស្បើយចំនួន១៥លាន១០ម៉ឺន៩៩១នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៦២ម៉ឺន៦ពាន់២០០នាក់ ស្លាប់ចំនួន១៥ម៉ឺន៣ពាន់៦៧នាក់ និងជាសះស្បើយ១០លាន២៨ម៉ឺន២ពាន់៨៨៩នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៨លាន៦៩ម៉ឺន៩ពាន់៨១៤នាក់ ស្លាប់២១ម៉ឺន៤ពាន់២២៨នាក់ និងជាសះស្បើយ៧លាន៥៨ម៉ឺន៧៤១នាក់ ៕
-
ថៃ៖ រដ្ឋមន្ត្រីសុខាភិបាលចាក់វ៉ាក់សាំងកូវីដ១៩មុនគេ ជាវ៉ាក់សាំងអង់គ្លេស ដើមខែក្រោយ
រដ្ឋមន្ត្រីក្រសួងសុខាភិបាលថៃលោក Anutin Charnvirakul បានឲ្យដឹងនៅថ្ងៃទី២១ មករា ២០២១នេះថា វ៉ាក់សាំងបង្ការកូវីដ១៩ របស់ក្រុមហ៊ុនអង់គ្លេស AstraZeneca/Oxford ចំនួន៥ម៉ឺនឈុតដំបូងនឹងមកដល់ប្រទេសថៃ ក្នុងសប្តាហ៍ទី១ នៃខែកុម្ភៈ ឆ្នាំ២០២១ខាងមុខនេះ។ លោកបន្ថែមទៀតថា ចំនួននេះគឺជាផ្នែកមួយនៃចំនួនសរុប ២៦លានឈុតឬដូស ដោយ១ដូសតម្ហៃ៥ដុល្លារអាមេរិក ឬ ១៥០បាត ហើយចំនួន៥ម៉ឺនម្ជុលនេះមិនពាក់ព័ន្ធនឹងចំនួនដែលត្រូវផលិតដោយក្រុមហ៊ុនក្នុងស្រុក Siam Bioscience ក្រោមកិច្ចព្រមព្រៀងផ្ទេរបច្ចេកវិទ្យាជាមួយក្រុមហ៊ុន AstraZeneca ទេ ប៉ុន្តែវ៉ាក់សាំងបន្ថែមទៀតនឹងមកដល់ថៃ នៅខែមីនា និងមេសាទៀត។ រដ្ឋមន្ត្រីសុខាភិបាលថៃរូបបន្ថែមទៀតថា លោកបានស្ម័គ្រចិត្ត ជាមនុស្សដំបូងនៅប្រទេសថៃដែលត្រូវចាក់ភ្ជុលវ៉ាក់សាំងរបស់ AstraZeneca នេះ៕ ប្រភពពី The Nation
-
លោក ចូ បៃដិន បញ្ជាអោយដាក់សហរដ្ឋអាមេរិកចូលក្នុងកិច្ចព្រមព្រៀងអាកាសធាតុទីក្រុងប៉ារីសឡើងវិញ (Video)
អាមេរិក៖ ប្រធានាធិបតីអាមេរិកថ្មីលោក ចូ បៃដិន នៅថ្ងៃពុធនេះ បានចុះហត្ថលេខាលើបញ្ជាប្រតិបត្តិមួយ ដើម្បីដាក់សហរដ្ឋអាមេរិកវិលត្រលប់ទៅរកកិច្ចព្រមព្រៀងទីក្រុងប៉ារីសឆ្នាំ២០១៥ ស្តីពីការប្រែប្រួលអាកាសធាតុឡើងវិញ ។ ដំណើរការចូលរួមក្នុងកិច្ចព្រមព្រៀងអន្តរជាតិជាថ្មីនេះ បានចំណាយពេលតែមួយខែប៉ុណ្ណោះ បន្ទាប់ពីអាមេរិកដកខ្លួនចេញជាផ្លូវការ ពោលគឺសហរដ្ឋអាមេរិកបានចាកចេញពីកិច្ចព្រមព្រៀងអាកាសធាតុទីក្រុងប៉ារីសជាផ្លូវការ ត្រឹមតែរយៈពេលខ្លីប៉ុណ្ណោះ គឺកាលពីខែវិច្ឆិកា ឆ្នាំ២០២០កន្លងទៅ ។ សូមជម្រាបថា បន្ទាប់ពីការស្បថចូលកាន់តំណែងជាផ្លូវការហើយនោះ លោក ចូ បៃដិន បានចុះហត្ថលេខាលើបទបញ្ជាប្រតិបត្តិមួយ ក្នុងចំណោមបទបញ្ជាប្រតិបត្តិផ្សេងៗជាច្រើនទៀត ដើម្បីចាប់ផ្តើមចូលរួមក្នុងកិច្ចព្រមព្រៀងអាកាសធាតុឆ្នាំ២០១៥ឡើងវិញ ដោយបានលុបចោលសេចក្តីសម្រេចចិត្តរបស់អតីតប្រធានាធិបតីអាមេរិក លោក ដូណាល់ ត្រាំ ៕ប្រភព៖ ស៊ីនហួរ
-
ទីក្រុងប៉េកាំងដាក់ទណ្ឌកម្មលោក ម៉ៃ ប៉ុមប៉េអូ និង មន្រ្តីក្រោមរដ្ឋបាលលោក ដូណាល់ ត្រាំ ជិត៣០នាក់ ដោយចោទប្រកាន់ពីបទបំផ្លាញផលប្រយោជន៍ចិន (Video)
ចិន៖ ចិនប្រកាសដាក់ទណ្ឌកម្មលើអតីតមន្រ្តីក្រោមរដ្ឋបាលរបស់ប្រធានាធិបតីអាមេរិកលោក ដូណាល់ ត្រាំ ចំនួន២៨រូប ក្នុងនោះរួមមានទាំងអតីតរដ្ឋមន្រ្តីការបរទេសអាមេរិកលោក ម៉ៃ ប៉ុមប៉េអូ ផងដែរ ដោយទីក្រុងប៉េកាំងអះអាងថា ពួកគេទាំងនោះ បានបំពានអធិបតេយ្យ និងបំផ្លាញផលប្រយោជន៍របស់ចិន ។ ប៉ុន្មានម៉ោងក្រោយរដ្ឋបាលលោក ដូណាល់ ត្រាំ ចប់ទៅ រដ្ឋាភិបាលទីក្រុងប៉េកាំង ក៏បានបញ្ចេញបញ្ជីឈ្មោះមន្រ្តីអាមេរិក ដែលប្រកាន់ជំហរតឹងតែងដាក់ចិន ឬប៉ះពាល់ផលប្រយោជន៍ចិន ដែលត្រូវទទួលទណ្ឌកម្ម ។ បើតាមសេចក្តីថ្លែងការណ៍របស់ក្រសួងការបរទេសចិន អ្នកទាំងនោះបានជ្រៀតជ្រែកចូលមកក្នុងកិច្ចការផ្ទៃក្នុងចិន បំផ្លាញផលប្រយោជន៍របស់ចិន វាយប្រហារប្រជាជនចិន និងបង្អាក់ទំនាក់ទំនងរវាងទីក្រុងប៉េកាំង និង វ៉ាស៊ីនតោនជាដើម ។ ស្ថិតក្រោមទណ្ឌកម្មខាងលើនេះ អ្នកទាំង២៨រូបនោះ ត្រូវបានហាមឃាត់មិនឲ្យចូលទឹកដីចិន និងរកស៊ីនៅក្នុងទីក្រុងចិន ហុងកុង និងម៉ាកាវ ។ ចំណែកក្រុមហ៊ុន វិទ្យាស្ថាន ដែលពាក់ព័ន្ធនឹងអ្នកទាំង២៨រូបនោះ ត្រូវរឹតត្បិតមកធ្វើជំនួញនៅក្នុងប្រទេសចិន ៕ប្រភព៖ Reuters
-
សមាជិកព្រឹទ្ធសភាអាមេរិក០៣រូប មកពីបក្សប្រជាធិបតេយ្យ ស្បថចូលកាន់តំណែងជាផ្លូវការ (Video)
អាមេរិក៖ នៅថ្ងៃពុធនេះ សមាជិកព្រឹទ្ធសភាថ្មី០៣រូបមកពីគណបក្សប្រជាធិបតេយ្យ ក្នុងនោះរួមមានលោក ចូន អូសសូហ្វ លោក រ៉ាផាអ៊ែល វ៉រណក់ខ៍ និងលោក អេឡិច ផាឌីលឡា បានស្បថចូលកាន់តំណែងជាផ្លូវការនៅឯព្រឹទ្ធសភា ក្រោមវត្តមានអនុប្រធានាធិបតីអាមេរិកលោកស្រី កាម៉ាឡា ហារីស ។ បន្ទាប់ពីការស្បថចូលកាន់តំណែងរបស់សមាជិកព្រឹទ្ធសភាថ្មីទាំង០៣រូបនេះ ធ្វើឱ្យសំឡេងរបស់គណបក្សប្រជាធិបតេយ្យឡើងដល់ ៥០សំឡេង រីឯគណបក្សសាធារណរដ្ឋក៏មាន ៥០សំឡេងនៅក្នុងដៃដែរ ។ ប៉ុន្តែដោយសារលោកស្រី ហារីស មានសិទ្ធិបោះឆ្នោតសម្រេចចិត្តចុងក្រោយមួយសំឡេងដែរនោះ ធ្វើឱ្យគណបក្សប្រជាធិបតេយ្យមានសំឡេងភាគច្រើនគ្រប់គ្រងព្រឹទ្ធសភាបាន ខណៈប្រធានព្រឹទ្ធសភាសំឡេងភាគច្រើនបានទៅលើលោក ឆាក់ ស្កាំមើរ រីឯមេដឹកនាំសំឡេងភាគតិចគឺលោក មីច ម៉ាកខុនណែល មកពីគណបក្សសាធារណរដ្ឋ ។ សូមជម្រាបថា បច្ចុប្បន្នទាំងសភាតំណាងរាស្ត្រ និងព្រឹទ្ធសភាសុទ្ធតែស្ថិតនៅក្រោមការគ្រប់គ្រងរបស់គណបក្សប្រជាធិបតេយ្យ ដែលនេះនឹងផ្ដល់ភាពងាយស្រួលដល់រដ្ឋបាលលោក ចូ បៃដិន ក្នុងការដាក់ចេញគោលនយោបាយ ឬច្បាប់ណាមួយ ដែលមិនតម្រូវអោយមានការបោះឆ្នោតតាមសំឡេង២ភាគ៣ ៕ប្រភព៖ Reuters
-
សម្ព័ន្ធមិត្តសហរដ្ឋអាមេរិកសាទរលោក ចូ បៃដិន និង ប្ដេជ្ញាចិត្តត្រៀមធ្វើការជាមួយប្រធានាធិបតីថ្មី (Video)
បរទេស៖ បន្ទាប់ពីពិធីស្បថចូលកាន់តំណែងជាផ្លូវការរបស់លោក ចូ បៃដិន ប្រធានាធិបតីអាមេរិកថ្មី និងលោកស្រី ខាមេឡា ហារីស អនុប្រធានាធិបតីអាមេរិកថ្មីត្រូវបានបញ្ចប់នោះ ថ្នាក់ដឹកនាំពិភពលោក ជាពិសេសសម្ព័ន្ធមិត្តអឺរ៉ុប និងអាស៊ី បានចេញសារសាទរការឡើងកាន់តំណែងនេះ ។ ប្រធានាធិបតីបារំាំងលោក អេម៉ានុយអែល ម៉ាក្រុង បានបង្ហោះសារនៅលើ Twitter ដោយបានជូនពរលោក បៃដិន និងលោកស្រី ហារីស ក្នុងថ្ងៃស្បថចូលកាន់តំណែងដ៏សំខាន់នេះ ហើយថា បារាំង-អាមេរិក នឹងខ្លាំងក្លាជាងមុនក្នុងការដោះស្រាយបញ្ហាប្រឈម ការកសាងអនាគតដ៏រឹងមាំ និងការការពារផែនដី ។ នាយករដ្ឋមន្ត្រីកាណាដាលោក ចាស្ទីន ទ្រូដូ ក៏សាទរដល់លោក បៃដិន និងលោកស្រី ហារីស ផងដែរ និងថា កាណាដានឹងធ្វើការជាមួយរដ្ឋបាល និងសភាអាមេរិក ដើម្បីឲ្យប្រទេសទាំងពីរមានសុវត្ថិភាព វិបុលភាព និងរឹងមាំជាងមុន ។ ជាមួយគ្នានេះ ប្រធានាធិបតីកូរ៉េខាងត្បូងលោក មូន ចេអ៊ីន នាយករដ្ឋមន្រ្តីជប៉ុនលោក ស៊ូហ្កា យ៉ូស៊ីហ៊ីដេ នាយករដ្ឋមន្រ្តីឥណ្ឌាលោក ណារិនដ្រា ម៉ូឌី…