-
លោក ចូ បៃដិន នឹងយកឱកាសក្នុងថ្ងៃស្បថចូលកាន់តំណែងរបស់ខ្លួន អំពាវនាវអោយសហរដ្ឋអាមេរិកមានឯកភាពជាតិឡើងវិញ (Video)
អាមេរិក៖ ទីប្រឹក្សារបស់ប្រធានាធិបតីជាប់ឆ្នោតអាមេរិកលោក ចូ បៃដិន យល់ឃើញថា លោក បៃដិន នឹងយកឱកាសក្នុងថ្ងៃស្បថចូលកាន់តំណែងជាប្រធានា ធិបតីទី៤៦របស់សហរដ្ឋអាមេរិក ដើម្បីអំពាវនាវអោយប្រជាជនអាមេរិកមានឯកភាពជាតិគ្នាឡើងវិញ ។ បើតាមលោក ខូឌី ខីនណាន់ ដែលជាអតីតប្រធានតែងសុន្ទរកថាសម្រាប់អតីតប្រធានាធិបតីអាមេរិក លោក បារ៉ាក់ អូបាម៉ា ស្ថានភាពបច្ចុប្បន្នដែលលោក បៃដិន កំពុងប្រឈមមុខគឺពិតជាអាក្រក់បំផុត… ប៉ុន្តែលោកជឿថា លោក បៃដិន នឹង ក្លាយជាប្រធានាធិបតីដ៏ល្អម្នាក់សម្រាប់ពេលវេលានេះ ពីព្រោះលោកមានគោលនយោបាយផ្ទាល់ខ្លួន និងមិនមែនជាមនុស្សនិយាយបំភ្លៃការពិត ។ សូមជម្រាបថា លោក ចូ បៃដិន នឹងត្រូវស្បថចូលកាន់តំណែងជាប្រធានាធិបតីអាមេរិកថ្មីនៅថ្ងៃទី២០ ខែមករានេះ (ម៉ោងក្នុងតំបន់) ។ ហើយបច្ចុប្បន្ននេះ វិបត្តិ COVID-19 ភាពបាត់បង់ការងារធ្វើ និងការបែកបាក់យ៉ាងជ្រៅនៅក្នុងចំណោមអ្នកនយោបាយ និងប្រជាជនអាមេរិក ជាបញ្ហាប្រឈមជាអាទិភាពដែល លោក ចូ បៃដិន ត្រូវដោះស្រាយ ៕ប្រភព៖ AP
-
មេទ័ពកំពូលអ៊ីរ៉ង់សើចចំអកអោយសហរដ្ឋអាមេរិក ចំពេលមានភាពចលាចលកើតឡើងជាបន្តបន្ទាប់ នៅមុនថ្ងៃលោក ចូ បៃដិន ស្បថចូលកាន់តំណែង (Video)
អ៊ីរ៉ង់៖ ឧត្តមសេនីយ៍ជាន់ខ្ពស់អ៊ីរ៉ង់បានសើចចំអកអោយសហរដ្ឋអាមេរិក ក្រោយកងកម្លាំងប្រដាប់អាវុធ និងឆ្មាំជាតិត្រូវបានដាក់ពង្រាយសំដៅការពាររដ្ឋធានីវ៉ាស៊ីនតោន ពីអំពើហិង្សាណាមួយផ្សេងទៀត ក្នុងអំឡុងពេលលោក ចូ បៃដិន ស្បថចូលកាន់តំណែងជាប្រធានាធិបតីទី៤៦របស់សហរដ្ឋអាមេរិក ។ នាយឧត្តមសេនីយ៍ ម៉ូហាម៉េដ ហូសិន បាហ្គើរី មេបញ្ជាការនៃកងកម្លាំងប្រដាប់អាវុធអ៊ីរ៉ង់បាននិយាយនៅក្នុងពិធីមួយនៅថ្ងៃចន្ទនេះថា វាជារឿងគួរអោយហួសចិត្តមួយ ដែលសហរដ្ឋអាមេរិកសង្ឃឹមថា អាចផ្តួលរំលំរដ្ឋាភិបាលអ៊ីរ៉ង់ ប៉ុន្តែពេលនេះសហរដ្ឋអាមេរិកកំពុងមានភាពវឹកវរទៅវិញ ។ លោក បាហ្គើរី បានសង្កត់ធ្ងន់ទៀតថា ពួកគេចង់អោយសាធារណរដ្ឋឥស្លាមមិនចង់ឃើញខួប៤០ឆ្នាំនៃបដិវត្តរបស់ខ្លួន ប៉ុន្តែអគារសភាផ្ទាល់របស់ពួកគេត្រូវបានឡោមព័ទ្ធ ។ មន្ត្រីរបស់ពួកគេបានសម្តែងការព្រួយបារម្ភថា កិត្យានុភាពរបស់ពួកគេកំពុងត្រូវបានបំផ្លាញនៅចំពោះមុខពិភពលោក ហើយឥឡូវនេះ កងកម្លាំងប្រដាប់អាវុធអាមេរិកកំពុងប្រុងជើងការ សម្រាប់ពិធីស្បថចូលកាន់តំណែងប្រធានាធិបតីថ្មី ៕ប្រភព៖ RT
-
លោកជំទាវទី១ មេឡានៀ ត្រាំ និយាយថា អំពើហិង្សាមិនដែលជាចម្លើយ ហើយក៏មិនត្រូវបានចាត់ទុកថា ជាភាពសុច្ចរិតនោះដែរ (Video)
អាមេរិក៖ ភរិយារបស់ប្រធានាធិបតីអាមេរិកជិតផុតអាណត្តិលោក ដូណាល់ ត្រាំ គឺលោកជំទាវទីមួយ មេឡានៀ ត្រាំ នៅក្នុងវីដេអូមួយបានចេញសារលាទៅកាន់សហរដ្ឋអាមេរិក ពោលគឺពីរថ្ងៃមុនពេលបញ្ចប់អាណត្តិស្វាមីរបស់លោកស្រី ។ នៅក្នុងវីដេអូដែលបានចេញផ្សាយនៅលើ Twitter នាថ្ងៃចន្ទនេះ លោកស្រី មេឡានៀ ត្រាំ បាននិយាយថា ប្រជាជនអាមេរិករបស់ខ្ញុំ… វាជាកិត្តិយសដ៏ធំបំផុតនៃជីវិតរបស់ខ្ញុំ ដែលបានបម្រើការជាស្ត្រីទីមួយរបស់សហរដ្ឋអាមេរិក ។ ជាមួយគ្នានេះ លោកស្រីក៏បានអំពាវនាវដល់ពលរដ្ឋអាមេរិកអោយឈប់ងប់ងល់នឹងអ្វីគ្រប់យ៉ាងដែលពួកគេបានធ្វើ ហើយចងចាំជានិច្ចថា អំពើហិង្សាមិនដែលជាចម្លើយ ហើយនឹងមិនត្រូវបានចាត់ទុកថា ជាភាពសុច្ចរិតនោះទេ ។ លោកស្រីក៏បានថ្លែងអំណរគុណដល់សមាជិកយោធា និងអ្នកអនុវត្តច្បាប់ ប៉ុន្តែមិនបាននិយាយដោយផ្ទាល់នូវការរំលោភបំពានលើវិមានកាពីតូលអាមេរិកនៅថ្ងៃទី០៦ ខែមករា ដោយក្រុមកុបករគាំទ្រស្វាមីលោកស្រីនោះទេ ។ លោកស្រីក៏បានលើកឡើងពីការរីករាលដាលនៃជំងឺ Covid-19 ដែលកំពុងកើនឡើងនៅសហរដ្ឋអាមេរិក ខណៈវាបានឆ្លងដល់មនុស្សជាង១៩លាននាក់ និងស្លាប់ជាង៣៩ម៉ឺន៨ពាន់នាក់ ហើយជាចំនួនខ្ពស់បំផុតនៅលើពិភពលោក ។ សូមជម្រាបថា លោកស្រី មេឡានៀ ត្រាំ ត្រូវបានគេរាយការណ៍ថា នឹងក្លាយជាស្ត្រីទីមួយដំបូងបង្អស់នាសម័យទំនើបនេះ ដែលមិនស្វាគមន៍ស្ត្រីទីមួយថ្មីគឺលោកស្រី ជៀល បៃដិន សម្រាប់ការឡើងកាន់តំណែងរបស់លោក ចូ បៃដិន រួមជាមួយនឹងស្វាមីរបស់លោកស្រី ៕…
-
វិមានសភាអាមេរិកត្រូវបិទជាបណ្តោះអាសន្ន ក្រោយមានភ្លើងឆេះនៅក្បែរនោះ
អាមេរិក៖ វិមានសភាអាមេរិកត្រូវបានបិទ នៅថ្ងៃចន្ទនេះ ក្រោយមានការគម្រាមកំហែងសន្តិសុខផ្នែកខាងក្រៅ ជាពិសេសមានអគ្គីភ័យមួយបានឆាបឆេះឡើងនៅប្លុក ដែលនៅមិនឆ្ងាយពីវិមាន ចំពេលមានការរឹតបន្តឹងសន្តិសុខជាច្រើនថ្ងៃ មុនពេលលោក ចូ បៃដិន ស្បថចូលកាន់តំណែងជាផ្លូវការ ។បើតាមអ្នកនៅក្បែរវិមានបានរាយការណ៍ថា មានផ្សែងហ៊ុយត្រូវបានគេមើលឃើញថា អណ្តែតឡើងនៅក្បែរខាងក្រោយវិមានសភា ។ រហូតមកទល់ពេលនេះ ប៉ូលិសបានបង្កើនការការពារសន្តិសុខ បន្ទាប់ពីអ្នកគាំទ្រលោក ដូណាល់ ត្រាំ បានសម្រុកចូលអគារវាយប្រហារលើប៉ូលិសកាលពីពេលថ្មីៗនេះ ។ហើយបច្ចុប្បន្ននេះ វិមានសភាអាមេរិកត្រូវបានដាក់ពង្រាយកម្លាំងយោធាការពារ នៅមុនពេលពិធីឡើងកាន់តំណែងជាប្រធានាធិបតីរបស់លោក ចូ បៃដិន នៅសប្តាហ៍នេះ ៕ប្រភព៖ Reuters
-
មន្រ្តីរបស់លោក ចូ បៃដិន និយាយថា សហរដ្ឋអាមេរិកនឹងមិនដកបម្រាមធ្វើដំណើរចូលប្រទេសខ្លួនឡើយ បើទោះបីជាលោក ដូណាល់ ត្រាំ ទើបប្រកាសក៏ដោយ (Video)
អាមេរិក៖ អ្នកនាំពាក្យរបស់ប្រធានាធិបតីជាប់ឆ្នោតអាមេរិកលោក ចូ បៃដិន បានច្រានចោលការប្រកាសរបស់លោក ដូណាល់ ត្រាំ នៅថ្ងៃចន្ទនេះថា បម្រាមលើអ្នកដំណើរទាំងឡាយមកពីប្រទេសអឺរ៉ុប និង ប្រេស៊ីល នឹងត្រូវដកចេញវិញនៅថ្ងៃទី១៦ ខែមករា ឆ្នាំ២០២១ខាងមុខនេះ ។មន្រ្តីជាន់ខ្ពស់របស់លោក បៃដិន បានបង្ហោះសារនៅលើ Twitter ថា យោងតាមអនុសាសន៍នៃក្រុមវេជ្ជសាស្រ្តរបស់យើង រដ្ឋបាលលោក បៃដិន នឹងមិនដកបម្រាមលើវិធានការរឹតបន្តឹងនៅថ្ងៃទី២៦ ខែមករាខាងមុខនេះឡើយ ។ ជាក់ស្តែង យើងមានផែនការរឹងបន្តឹងវិធានការសុខភាពសាធារណ ជុំវិញការធ្វើដំណើរអន្តរជាតិ ដើម្បីទប់ស្កាត់ការឆ្លងរាតត្បាតនៃជំងឺ Covid-19 ។ការកត់សម្គាល់បែបនេះរបស់មន្រ្តីលោក បៃដិន បានកើតមានឡើងក្រោយប្រធានាធិបតីអាមេរិកជិតផុតអាណត្តិ លោក ដូណាល់ ត្រាំ បានចេញបទបញ្ជាប្រតិបត្តិមួយនៅថ្ងៃចន្ទនេះ ដោយបញ្ជាឱ្យលុបចោលបម្រាមធ្វើដំណើរចូលមកកាន់សហរដ្ឋអាមេរិក ដែលអនុវត្តលើបណ្ដាប្រទេសអឺរ៉ុប ក្នុងនោះរួមមាន អង់ គ្លេស និងប្រេស៊ីល ដែលពីដំបូងឡើយត្រូវបានដាក់ ដោយសារបារម្ភពីការឆ្លងរាតត្បាតនៃជំងឺ COVID-19 ៕ប្រភព៖ Reuters
-
សហរដ្ឋអាមេរិក និងចិនប៉ះទង្គិចគ្នា ពាក់ព័ន្ធនឹងដំណើរទស្សនកិច្ចរបស់មន្ត្រីជំនាញអង្គការ WHO នៅទីក្រុងវូហាន
ស្វីស៖ សហរដ្ឋអាមេរិក នៅថ្ងៃចន្ទនេះ បានទទូចឲ្យចិនអនុញ្ញាតឲ្យក្រុមជំនាញមកពីអង្គការសុខភាពពិភពលោក WHO ធ្វើកិច្ចសម្ភាសន៍ជាមួយអ្នកថែសុខភាព អតីតអ្នកជំងឺ COVID-19 និងអ្នកបម្រើការងារនៅមន្ទីរពិសោធន៍ក្នុងទីក្រុងវូហាន ខណៈសំណើនេះកំពុងធ្វើអោយទីក្រុងប៉េកាំងរិះគន់ត្រលប់ទៅវិញ ។ក្រុមជំនាញរបស់អង្គការ WHO ដែលមានសមាជិក ១០នាក់បានទៅដល់ទីក្រុងវូហាន ភាគកណ្តាលប្រទេសចិន កាលពីសប្តាហ៍មុននេះ ប៉ុន្តែពួកគេត្រូវស្ថិតនៅក្នុងការធ្វើចត្តាឡីស័ក សម្រាប់រយៈពេល១៤ថ្ងៃ ទៅតាមបទបញ្ជាផ្នែកសុខាភិបាល ។ អំឡុងពេលពីរសប្តាហ៍នៃចត្តាឡីស័កនោះ ក្រុមជំនាញ WHO បានជួបពិភាក្សា និងស្វែងយល់បញ្ហាជាទូទៅតាមប្រព័ន្ធវីដេអូខុនហ្វ្រិន មុននឹងពួកគេអាចចាប់ផ្តើមដំណើរការស៊ើបអង្កេតជាផ្លូវការ នៅក្រោយបញ្ចប់ចត្តាឡីស័ក ។ លោក ហ្គារែត ហ្គ្រីតស៍ប៊ី ជាមន្ត្រីតំណាងរបស់អាមេរិក ដែលកំពុងចូលរួមដឹកនាំក្រុមខាងលើនេះដែរនិយាយថា ចិនគួរតែចែករំលែកនូវព័ត៌មានគ្រប់យ៉ាង អំពីការស្រាវជ្រាវផ្នែកវិទ្យាសាស្ត្ររបស់ខ្លួន បូករួមទាំងគំរូតាងបានមកពីការស្រាវជ្រាវលើសត្វ មនុស្ស និងបរិស្ថាននៅទីផ្សារមួយក្នុងទីក្រុង វូហាន ដែលគេជឿជាក់ថា ជាចំណុចផ្ទុះដំបូងនៃមេរោគកូរ៉ូណា (SARS-CoV-2) កាលពីចុងឆ្នាំ២០១៩ ។ជាមួយគ្នានេះ អគ្គនាយកនៃការិយាល័យឆ្លើយតបបន្ទាន់ ចំណុះឲ្យគណៈកម្មការសុខាភិបាលជាតិចិន លោក ស៊ុន យ៉ាង បានប្រាប់គណៈប្រធានប្រតិបត្តិរបស់ WHO ក្នុងកិច្ចប្រជុំតាមវីដេអូខុនហ្វ្រិនថា ការសិក្សានានាដើម្បីស្វែងរកប្រភពដើមនៃវីរុស គឺជាធម្មជាតិនៃការស្រាវជ្រាវផ្នែកវិទ្យាសាស្ត្រ… វាត្រូវការជាចាំបាច់នូវកិច្ចសម្របសម្រួល…
-
ថៃគ្រោងអនុញ្ញាតអោយប្រើវ៉ាក់សាំង Covid-19 របស់ក្រុមហ៊ុន Oxford-AstraZeneca ក្នុងករណីបន្ទាន់នៅសប្តាហ៍នេះ (Video)
ថៃ៖ រដ្ឋបាលចំណីអាហារ និងឱសថថៃ ដែលហៅកាត់ថា FDA ត្រូវរំពឹងថា នឹងអនុម័តអោយប្រើវ៉ាក់សាំង Covid-19 របស់ក្រុមហ៊ុនផលិតឱសថអង់គ្លេស Oxford-AstraZeneca នៅសប្តាហ៍នេះ សម្រាប់ការប្រើប្រាស់ក្នុងករណីបន្ទាន់ក្នុងប្រទេសអាស៊ីមួយនេះ ។ស្របពេលជាមួយគ្នានេះដែរ អគ្គនាយកនៃនាយកដ្ឋានគ្រប់គ្រងជំងឺ DCD របស់ក្រសួងសុខាភិបាលថៃ លោកវេជ្ជបណ្ឌិត អប់ផាស់ ខើនកាវីនភុង នៅថ្ងៃចន្ទនេះ និយាយថា FDA កំពុងពិនិត្យមើលឯកសារដែលបានដាក់ជូន ដើម្បីបញ្ជាក់ពីប្រសិទ្ធភាព និងសុវត្ថិភាពនៃវ៉ាក់សាំង Covid-19 ។ លោកវេជ្ជបណ្ឌិតបន្ថែមថា ក្រសួងទំនងជានឹងចាប់ផ្តើមការចាក់ថ្នាំបង្ការជំងឺ Covid-19 របស់ខ្លួនដោយប្រើវ៉ាក់សាំងរបស់ក្រុមហ៊ុន AstraZeneca នៅខែក្រោយនេះ ។ បើតាមអគ្គលេខាធិការរងនៃរដ្ឋបាលចំណីអាហារ និងឱសថថៃ FDA លោកវេជ្ជបណ្ឌិត ស៊ូរ៉ាឆូក តាំងវីវ៉ាត់ ឯកសារដែលបានដាក់ជូនខាងលើនេះ មានព័ត៌មានលម្អិតទាំងគុណភាព និងដំណើរការផលិតវ៉ាក់សាំង ហើយនេះនឹងជួយពន្លឿននៃដំណើរការចុះបញ្ជីរបស់ខ្លួន ។សូមជម្រាបថា បើតាមការគ្រោងទុកនោះ វ៉ាក់សាំងដំបូងនឹងត្រូវចាក់លើក្រុមដែលមានហានិភ័យនៅក្នុងខេត្តចំនួន០៥របស់ប្រទេសថៃ ដែលត្រូវបានកំណត់ថា ជាតំបន់គ្រប់គ្រងជំងឺ Covid-19 អតិបរមា និងតឹងរ៉ឹង ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៩៦លាននាក់ ក្នុងនោះស្លាប់ជាង២លាននាក់ និងជាសះស្បើយជាង៦៨លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៩៦លាន៨ពាន់៧៨៨ករណី ក្នុងនោះមានអ្នកជម្ងឺសរុបចំនួន២លាន៤ម៉ឺន៩ពាន់៣១១នាក់ស្លាប់ និង ជាសះស្បើយឡើងវិញសរុបចំនួន៦៨លាន៦២ម៉ឺន៩ពាន់៨៣នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៩ ខែមករា ឆ្នាំ២០២១ ។សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៤លាន៦២ម៉ឺន៦ពាន់៣៧៦នាក់ ស្លាប់ចំនួន៤០ម៉ឺន៨ពាន់៦២០នាក់ និងជាសះស្បើយចំនួន១៤លាន៥៥ម៉ឺន១ពាន់៦៨៥នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៥៨ម៉ឺន២ពាន់៦៤៧នាក់ ស្លាប់ចំនួន១៥ម៉ឺន២ពាន់៥៩៣នាក់ និងជាសះស្បើយ១០លាន២២ម៉ឺន៧ពាន់៨៥២នាក់ ។ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៨លាន៥១ម៉ឺន២ពាន់២៣៨នាក់ ស្លាប់២១ម៉ឺន៣២៨នាក់ និងជាសះស្បើយ៧លាន៤៥ម៉ឺន២ពាន់៤៧នាក់ ៕
-
ស្ថានការណ៍ នៅសហរដ្ឋអាមេរិកមុនចូលកាន់តំណែងជាប្រធានាធិបតីទី៤៦ របស់លោក Joe Biden កាន់តែផុយស្រួយ ខណៈមានការគំរាមកំហែង ផ្នែកសន្តិសុខខាងក្រៅ និងមានភ្លើងឆេះនៅក្បែរវិមានសភា
វ៉ាស៊ីនតោន៖ ការបិទវិមានសភារបស់សហរដ្ឋអាមេរិក (US Capitol) ដោយសារតែ «ការគម្រាមកំហែងសន្តិសុខផ្នែកខាងក្រៅ», និងបន្ទាប់ពីមានអគ្គីភ័យមួយ ត្រូវបានគេរាយការណ៍ថា បានឆាបឆេះឡើង នៅមិនឆ្ងាយពីវិមាននេះ ។ សារជូនដំណឹងមួយ ត្រូវបានផ្ញើទៅកាន់សមាជិកសភា ដោយរៀបរាប់ថា មិនអនុញ្ញាតឲ្យចូល ឬចេញពីបណ្តុំអគារសភាឡើយ ។ អ្នកនៅក្បែរវិមានបានរាយការណ៍ថា មានផ្សែងហ៊ុយ ត្រូវបានគេមើលឃើញថា បានហ៊ុយឡើង នៅក្បែរខាងក្រោយវិមាន Capitol។ កម្លាំងយោធាការពារ ត្រូវបានពង្រាយ នៅមុនពេលពិធីឡើងកាន់តំណែង ជាប្រធានាធិបតី របស់លោក Joe Biden ដោយសារប៉ូលិសបានបង្កើនការការពារសន្តិសុខ បន្ទាប់ពីអ្នកគាំទ្រលោក ដូណាល់ ត្រាំ បានសម្រុកចូលអគារនេះ។ លោក ហេង វណ្ណា មានកិច្ចសំភាសន៍លោកសាស្ត្រាចារ្យ ស៊ិន សារុន ជុំវិញហេតុការនេះ៕
-
ទីប្រឹក្សាជាន់ខ្ពស់របស់លោក បៃដិន និយាយថា ប្រធានាធិបតីជាប់ឆ្នោតអាមេរិកត្រៀមផែនការសម្រាប់ដោះស្រាយវិបត្តិកំពុងកើតមាននៅសហរដ្ឋអាមេរិក
អាមេរិក៖ ទីប្រឹក្សាជាន់ខ្ពស់របស់ប្រធានាធិបតីជាប់ឆ្នោតអាមេរិកលោក ចូ បៃដិន នៅថ្ងៃអាទិត្យសប្តាហ៍មុននេះ បានបញ្ជាក់ពីផែនការដោះស្រាយវិបត្តិជាច្រើនរបស់សហរដ្ឋអាមេរិកកំពុងជួបប្រទះ ។ទីប្រឹក្សាជាន់ខ្ពស់របស់លោក ចូ បៃដិន គឺលោក រុន ខ្លែន ដែលជាអនាគតប្រធានបុគ្គលិកសេតវិមានបាននិយាយប្រាប់ទូរទស្សន៍ CNN ថា ព្រឹត្តិការណ៍ប៉ុន្មានសប្តាហ៍កន្លងមកនេះបង្ហាញថា សហរដ្ឋអាមេរិកត្រូវបានបំផ្លាញប៉ុណ្ណា… ហើយវាសំខាន់ណាស់ក្នុងការស្តារវាឡើងវិញ ។ការកត់សម្គាល់បែបនេះរបស់លោក រុន ខ្លែន បានកើតមានឡើងចំពេលដែលទីក្រុងវ៉ាស៊ីនតោនកំពុងស្ថិតក្រោមការប្រកាសអាសន្ន ដោយមានកងកម្លាំងឆ្មាំជាតិរាប់ពាន់នាក់ យាមកាមរឹតបន្តឹងសន្តិសុខ បន្ទាប់ពីក្រុមកុបករគាំទ្រលោក ត្រាំ ចូលអុកឡុងនៅវិមានសភានៅថ្ងៃទី០៦ ខែមករា ដែលនាំឱ្យមានការព្រួយបារម្ភនៅក្នុងថ្ងៃស្បថចូលកាន់តំណែងរបស់លោក ចូ បៃដិន ដែលនឹងធ្វើឡើងនៅថ្ងៃទី២០ ខែមករា ឆ្នាំ២០២១ខាងមុខនេះ ៕ប្រភព៖ AFP