-
រដ្ឋបាលរបស់លោក ដូណាល់ ត្រាំ ប្រើដង្ហើមចុងក្រោយ ដើម្បីដាក់ទណ្ឌកម្មលើចិន អ៊ីរ៉ង់ និងគុយបា (Video)
អាមេរិក៖ រដ្ឋមន្ត្រីការបរទេសអាមេរិកលោក ម៉ៃ ប៉ុមប៉េអូ នៅថ្ងៃសុក្រនេះ បានដាក់ទណ្ឌកម្មលើគោលដៅចម្បងទាំងបីរបស់លោក គឺចិន អ៊ីរ៉ង់ និងគុយបា នៅក្នុងការជំរុញនៅនាទីចុងក្រោយរបស់ខ្លួន នេះបើតាមសារព័ត៌មាន AFP នៅថ្ងៃទី១៦ ខែមករា ឆ្នាំ២០២១ ។ ប្រាំថ្ងៃមុនពេលដែលលោកប្រគល់សោក្រសួងការបរទេសនោះ លោក ប៉ុមប៉េអូបានប្តេជ្ញាដាក់ទណ្ឌកម្មចិន ចំពោះអ្វីដែលអាមេរិកហៅថា ការគាបសង្កត់របស់ចិននៅក្នុងទីក្រុងហុងកុង ដែលជាជំហរគាំទ្រដោយលោក បៃដិន ប៉ុន្តែបានដើរប្រាស់ចាកឆ្ងាយពីគោលដៅរបស់លោក បៃដិន ក្នុងការបន្ធូរបន្ថយភាពតានតឹងជាមួយអ៊ីរ៉ង់ និងគុយបា ។ ប្រមុខការទូតអាមេរិកជិតផុតអាណត្តិរួបនេះ បានថ្កោលទោសចំពោះប្រតិបត្តិការទ្រង់ទ្រាយធំកាលពីថ្ងៃទី០៦ ខែមករា នៅទីក្រុងហុងកុង ដែលក្នុងនោះចិនបានចាប់ខ្លួនមនុស្សចំនួន៥៥នាក់ រួមទាំងមេធាវីជនជាតិអាមេរិកម្នាក់ឈ្មោះ ចន ក្លានស៊ី ។ ទន្ទឹមគ្នា លោក ប៉ុមប៉េអូ បានសង្កត់ធ្ងន់ថា យើងថ្កោលទោសចំពោះសកម្មភាពរបស់សាធារណរដ្ឋប្រជាមានិតចិន ដែលបំផ្លាញសេរីភាព និងដំណើរការប្រជាធិបតេយ្យរបស់ហុងកុង ហើយនឹងបន្តប្រើប្រាស់គ្រប់ឧបករណ៍ទាំងអស់ ដែលអាចប្រើបាន ដើម្បីចាប់អ្នកទាំងនោះមកទទួលខុសត្រូវ ៕
-
លោកស្រី ណាន់ស៊ី ផែលឡូស៊ី ព្រមានថា សមាជិកសភាណាដែលជួយ និងសមគំនិតក្នុងកុបកម្មនៅវិមានសភា អាចប្រឈមមុខនឹងការកាត់ទោសព្រហ្មទណ្ឌ (Video)
អាមេរិក៖ ប្រធានសភាតំណាងរាស្រ្តអាមេរិកលោកស្រី ណាន់ស៊ី ផែលឡូស៊ី នៅថ្ងៃសុក្រនេះបានព្រមានថា សមាជិកសភាណាដែលបានឃុបឃិតជាមួយក្រុមកុបកម្ម អំឡុងពេលអុកឡុកវិមានសភាដ៏ហិង្សាកាលពីថ្ងៃទី០៦ ខែមករានោះ នឹងប្រឈមមុខនូវការកាត់ទោសព្រហ្មទណ្ឌ នេះបើតាមសារព័ត៌មាន ស្ព្រូតនីគ នៅថ្ងៃទី១៦ ខែមករា ឆ្នាំ២០២១ ។ ប្រធានសភារបស់គណបក្សប្រជាធិបតេយ្យរូបនេះ បានបញ្ជាក់នៅក្នុងសន្និសីទសារព័ត៌មានមួយថា បើសិនការពិតត្រូវបានរកឃើញថា សមាជិកសភា គឺជាអ្នកឃុបឃិតក្នុងការបះបោរនេះ ហើយប្រសិនបើពួកគេជួយ និងជំរុញមានការញុះ ញង់នោះ ការដាក់ទោសត្រូវតែមាន ។ ស្របពេលជាមួយគ្នានេះដែរ លោកស្រី ណាន់ស៊ី ផែលឡូស៊ី បានផ្តល់សិទ្ធិអោយឧត្តមសេនីយឯក Russel L. Honouré មេបញ្ជាការកងទ័ពចូលនិវត្តន៍ ដើម្បីធ្វើការពិនិត្យឡើងវិញជាបន្ទាន់ នូវហេដ្ឋារចនាសម្ព័ន្ធសន្តិសុខ ដំណើរការ និងនីតិវិធីអន្តរកម្ម ព្រមទាំងការបញ្ជា និងត្រួតពិនិត្យសកម្មភាពនេះជាដើម ៕
-
លោក ដូណាល់ ត្រាំ នឹងចាកចេញពីរដ្ឋធានីវ៉ាស៊ីនតោន នៅថ្ងៃដែលលោក ចូ បៃដិន ស្បថឡើងកាន់តំណែងជាផ្លូវការ (Video)
អាមេរិក៖ ស្របពេលដែលលោក ចូ បៃដិន នឹងចាប់ផ្តើមពិធីស្បថឡើងកាន់តំណែងជាប្រធានាធិបតីទី៤៦ របស់សហរដ្ឋអាមេរិក នៅថ្ងៃពុធសប្តាហ៍ក្រោយនោះ លោក ដូណាល់ ត្រាំ ក៏កំពុងរៀបចំផែនការផងដែរដើម្បីចាកចេញពីរដ្ឋធានីវ៉ាស៊ីនតោន នេះបើតាមសារព័ត៌មានរ៉យទ័រនៅថ្ងៃទី១៦ ខែមករា ឆ្នាំ២០២១ ។ ប្រភពបានអោយដឹងថា ប្រធានាធិបតីជិតផុតអាណត្តិរូបនេះ នឹងធ្វើដំណើរទៅកាន់មូលដ្ឋាន អាន់ឌ្រូស៍ ដែលស្ថិតនៅក្រៅរដ្ឋធានីវ៉ាស៊ីតោន ជាកន្លែងចតយន្តហោះពិសេស Air Force One ដើម្បីរៀបចំពិធីលាគ្នាមួយ ។ បន្ទាប់មកលោក ដូណាល់ ត្រាំ នឹងធ្វើដំណើរទៅកាន់រមណីយដ្ឋាន ម៉ាអាឡាហ្គោ ក្នុងទីក្រុង ផាមប៊ីច រដ្ឋផ្លរីដា ជាទីដែលលោកនឹងស្នាក់នៅ សម្រាប់បន្តកិច្ចការផ្សេងៗទៀត ជាពិសេសគឺការព្យាយាមរក្សាឥទ្ធិពលរបស់លោកនៅក្នុងគណបក្សសាធារណរដ្ឋ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៩៤លាននាក់ ក្នុងនោះស្លាប់ជាង២លាននាក់ និងជាសះស្បើយជាង៦៧លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៩៤លាន៣១ម៉ឺន៥ពាន់៣៣១ករណី ក្នុងនោះមានអ្នកជម្ងឺសរុបចំនួន២លាន១ម៉ឺន៧ពាន់៩១៣នាក់ស្លាប់ និង ជាសះស្បើយឡើងវិញសរុបចំនួន៦៧លាន៣៤ម៉ឺន៦ពាន់៦៤០នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៦ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៤លាន១០ម៉ឺន២ពាន់៤២៩នាក់ ស្លាប់ចំនួន៤០ម៉ឺន១ពាន់៨៥៦នាក់ និងជាសះស្បើយចំនួន១៤លាន២២ម៉ឺន៨ពាន់៩៦៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៥៤ម៉ឺន៣ពាន់៦៥៩នាក់ ស្លាប់ចំនួន១៥ម៉ឺន២ពាន់១៣០នាក់ និងជាសះស្បើយ១០លាន១៧ម៉ឺន៩ពាន់៧១៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន៨លាន៣៩ម៉ឺន៤ពាន់២៥៣នាក់ ស្លាប់២០ម៉ឺន៨ពាន់២៩១នាក់ និងជាសះស្បើយ៧លាន៣៦ម៉ឺន១ពាន់៣៧៩នាក់ ៕
-
លោក ចូ បៃដិន បង្ហាញកញ្ចប់ជំនួយសេដ្ឋកិច្ចថ្មីមួយ ដែលមានទំហំទឹកប្រាក់រហូតដល់១.៩ទ្រីលានដុល្លារ (Video)
បរទេស ៖ ប្រធានាធិបតីជាប់ឆ្នោតអាមេរិកលោក ចូ បៃដិន បានធ្វើការប្រកាសបង្ហាញពីផែនការកញ្ចប់ថវិកាជំនួយសេដ្ឋកិច្ចថ្មីមួយ ដែលមានទំហំរហូតទៅដល 1.9 ទ្រីលានដុល្លារ នេះបើតាមសារព័ត៌មានរ៉យទ័រនៅថ្ងៃទី១៥ ខែមករា ឆ្នាំ២០២១ ។ ប្រសិនបើសំណើដែលបានបញ្ជូនទៅសភានេះត្រូវបានអនុម័តនោះ វាក៏នឹងមានបញ្ចូលជាមួយនឹងកញ្ចប់ថវិកាសម្រាប់ចំណាយរបស់ពលរដ្ឋអាមេរិកប្រមាណជាង១ទ្រីលានដុល្លារផងដែរ ដែលវានឹងត្រូវប្រើប្រាស់ដោយការផ្តល់ជូនជាសាច់ប្រាក់ផ្ទាល់ដល់ពលរដ្ឋអាមេរិកទាំងអស់គឺ១.៤០០ដុល្លារក្នុងម្នាក់ ។ កញ្ចប់ជំនួយក៏ត្រូវបានគេដឹងដែរថា មានរួមទាំងកញ្ចប់ថវិកាសម្រាប់ប្រយុទ្ធប្រឆាំងនឹងវិរុសកូវីដប្រមាណ៤១៥ពាន់លានដុល្លារ ព្រមទាំងកញ្ចប់ជំនួយសម្រាប់អាជីវកម្មខ្នាតតូចប្រមាណ៤៤០ពាន់លានដុល្លារផងដែរ ។ លោក បៃដិន ក៏ធ្លាប់បានបញ្ជាក់អំពីផែនការរបស់លោក ដែលនឹងប្រើប្រាស់កញ្ចប់ប្រាក់ដល់ទៅ២០ពាន់លានដុល្លារ សម្រាប់តែការងារចាក់វ៉ាក់សាំងជូនពល រដ្ឋអាមេរិក និងមានទាំងការពន្លឿនការចាក់វ៉ាក់សាំងឲ្យបានលឿនបំផុតទាំងនៅក្នុងក្រុង និងនៅតាមទីជនបទ ខណៈដែលអាមេរិកបានទទួលស្គាល់វ៉ាក់សាំងចំនួនពីរហើយគិតមកទល់ពេលនេះ ប៉ុន្តែអ្នកជំនាញកំពុងអំពាវនាវឲ្យមានការបង្កើនល្បឿនការងារថែមទៀត ៕
-
ចំនួនអ្នកស្លាប់កើនដល់៣៤នាក់ បន្ទាប់ពីគ្រោះរញ្ជួយដីដ៏កក្រើកវាយប្រហារឥណ្ឌូណេស៊ី (Video)
ឥណ្ឌូណេស៊ី៖ អាជ្ញាធរឥណ្ឌូណេស៊ីបានរាយការណ៍ថា យ៉ាងហោចណាស់មានមនុស្ស៣៤នាក់បាត់បង់ជីវិត និងមនុស្សជាច្រើនរយនាក់បន្ថែមទៀតរងរបួស បន្ទាប់ពីគ្រោះរញ្ជួយដីក្នុងកម្រិត៦.២រ៉ិកទ័រវាយប្រហារខេត្តស៊ូឡាវ៉េស៊ីខាងលិច ដែលស្ថិតនៅលើកោះ ស៊ូឡាវេស៊ី របស់ឥណ្ឌូណេស៊ី នៅព្រឹកថ្ងៃសុក្រនេះតែម្តង នេះបើតាមសារព័ត៌មាន CNA នៅថ្ងៃទី១៥ ខែមករា ឆ្នាំ២០២១ ។ ទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ីបាននិយាយនៅក្នុងសេចក្ដីថ្លែងការណ៍មួយថា គ្រោះរញ្ជួយដីខាងលើ កើតឡើងនៅចំងាយ៦គីឡូម៉ែត្រពីភាគឦសាន្តទីក្រុង ម៉ាចេណេ ដោយមានជម្រៅរញ្ជួយទៅក្នុងដី១០គីឡូម៉ែត្រ ។ អ្នកស្រុករាប់ពាន់នាក់បានភៀសខ្លួនចេញពីផ្ទះសម្បែង និងកំពុងស្នាក់នៅទីកន្លែងសុវត្ថិភាពជាបណ្តោះអាសន្ន ។ ជាមួយគ្នានេះ សណ្ឋាគារមួយ និងការិយាល័យរបស់អភិបាលខេត្តដីកោះ ស៊ូឡាវេស៊ី ត្រូវបានខូចខាតយ៉ាងធ្ងន់ធ្ងរ ហើយការផ្គត់ផ្គង់អគ្គិសនីក៏ត្រូវបានកាត់ផ្តាច់ផងដែរ ។ ដោយឡែកមន្ទីរពេទ្យមួយនៅតំបន់ ម៉ាមូជូ ក៏បានរងការបំផ្លិចបំផ្លាញផងដែរ ដែលជាហេតុធ្វើឲ្យអ្នកជំងឺទាំងអស់ជាប់គាំងនៅក្នុងអគារនោះរង់ចាំក្រុមជួយសង្គ្រោះ ៕
-
ថៃបន្តរកឃើញអ្នកឆ្លងកូវីដ១៩ថ្មីៗចំនួន១៨៨ករណីថែមទៀត ក្នុងនោះ១៥៤ជាករណីឆ្លងក្នុងសហគមន៍ (Video)
ថៃ៖ រដ្ឋាភិបាលថៃបានរាយការណ៍នៅថ្ងៃសុក្រនេះ ពីការរកឃើញអ្នកឆ្លងកូវីដ១៩ថ្មីៗចំនួន១៨៨ករណីបន្ថែមទៀត ក្នុងនោះ១៥៤ជាករណីឆ្លងក្នុងសហគមន៍ និង៣៤ទៀតជាករណីនាំចូល ដែលសរុបនៅទូទាំងប្រទេសកើនឡើងដល់១ម៉ឺន១ពាន់៤៥០ករណីហើយ នេះបើតាមសារព័ត៌មានបាងកកប៉ុស្តិ៍នៅថ្ងៃទី១៥ ខែមករា ឆ្នាំ២០២១ ។ អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩របស់ថៃ លោកវេជ្ជបណ្ឌិត តាវីសីប វីសានុយោធីន បាននិយាយថា ៨១ករណីមានសុខភាពធម្មតា ហើយ៤៧ករណីរកឃើញនៅខេត្តសាមុត សាខន និង២៧ករណីក្នុងទីក្រុងបាងកក ។ ហើយករណីសកម្មបានរកឃើញលើមនុស្ស៧៣នាក់ ក្នុងនោះ៥២នាក់ជាកម្មករចំណាកស្រុកនៅខេត្តសាមុត សាខន ។ ដោយឡែកក្នុងចំណោមករណីឆ្លងនាំចូលទាំង ៣៤ គឺមាន២១ករណីរកឃើញលើអ្នកដំណើរដែលធ្វើចត្តាឡីស័ក ៦ករណីមកពីអាល្លឺម៉ង់ ៣ករណីមកពីតួកគី និងមួយករណីផ្សេងៗទៀតមកពីប៊ែលហ្ស៊ិក ឆេក អេហ្ស៊ីប ហុងគ្រី គុយវែត ប៉ាគីស្ថាន ហ្វីលីពីន រុស្ស៊ី ស្វីស ស៊ូដង់ អេមីរ៉ាត់អារ៉ាប់រួម និងសហរដ្ឋអាមេរិក ។ សូមជម្រាបថា គិតត្រឹមថ្ងៃទី១៥ ខែមករានេះ នៅទូទាំងប្រទេសថៃមានអ្នកឆ្លងសរុប១ម៉ឺន១ពាន់៤៥០ករណី ក្នុងនោះមានអ្នកស្លាប់៦៩នាក់ និងជាសះស្បើយឡើងវិញ៨ពាន់២៨៨នាក់ ៕
-
រដ្ឋបាលលោក ដូណាល់ ត្រាំ ដាក់ក្រុមហ៊ុន Xiaomi ចូលក្នុងបញ្ជីខ្មៅ និងចាត់ទុកជាក្រុមហ៊ុនយោធាកុម្មុយនិស្តចិន
អាមេរិក៖ នៅសល់តែ០៥ថ្ងៃទៀតប៉ុណ្ណោះនឹងផុតតំណែងនោះ រដ្ឋបាលរបស់លោក ដូណាល់ ត្រាំ បានចេញបញ្ជាដាក់ក្នុងក្រុមហ៊ុន Xiaomi ទៅក្នុងបញ្ជីខ្មៅ និងចាត់ទុកជាក្រុមហ៊ុនយោធាកុម្មុយនិស្តចិន នេះបើតាមសារព័ត៌មាន The Verge នៅថ្ងៃទី១៥ ខែមករា ឆ្នាំ២០២១ ។ រដ្ឋបាលរបស់លោក ដូណាល់ ត្រាំ បានប្រើដង្ហើមចុងក្រោយ ដោយដាក់ក្រុមហ៊ុនបច្ចេកវិទ្យាយក្សចិន Xiaomi ទៅក្នុងបញ្ជីខ្មៅ និងបានហាមឃាត់ក្រុមហ៊ុន និងអ្នកវិនិយោគអាមេរិក មិនឲ្យធ្វើជំនួញជាមួយក្រុមហ៊ុនចិនឡើយចាប់ពីខែវិច្ឆិកា ឆ្នាំ២០២១តទៅ ។ ស្របពេលជាមួយគ្នានេះដែរ ប្រធានាធិបតីអាមេរិកជិតផុតអាណត្តិលោក ដូណាល់ ត្រាំ ក៏បានដាក់ក្រុមហ៊ុនធំៗរបស់ចិនជាច្រើនចូលក្នុងបញ្ជីខ្មៅផងដែរ ដោយក្នុងនោះរួមមានក្រុមហ៊ុន Huawei និង Alibaba ជាដើម ៕
-
អង់គ្លេសហាមឃាត់អ្នកធ្វើដំណើរមកពីទ្វីបអាមេរិកខាងត្បូង ក្រោយវីរុស COVID-19 ទម្រង់ថ្មីផ្ទុះឡើងនៅប្រេស៊ីល (Video)
អង់គ្លេស៖ រាល់ការធ្វើដំណើរមកពីប្រទេសនៅទី្វបអាមេរិកខាងត្បូងចូលមកចក្រភពអង់គ្លេស នឹងត្រូវបានហាមឃាត់គិតចាប់ពីថ្ងៃចន្ទតទៅ ហើយបានដាក់បញ្ចូលបន្ថែមប្រទេសចំនួន១៦ទៀតទៅក្នុងបញ្ជីទិសដៅហាមឃាត់ផងដែរ នេះបើតាមរដ្ឋមន្ត្រីក្រសួងដឹកជញ្ជូនអង់គ្លេស លោក Grant Shapps ចុះផ្សាយដោយសារព័ត៌មាន Daily Mail នៅថ្ងៃទី១៥ ខែមករា ឆ្នាំ២០២១ ។ លោក Grant Shapps បាននិយាយថា លោកបាននិងកំពុងចាត់វិធានការបន្ទាន់ នៅក្នុងកិច្ចខិតខំប្រឹងប្រែង ដើម្បីទប់ស្កាត់វីរុស COVID-19 ទម្រង់ថ្មីចូលមកកាន់ចក្រភពអង់គ្លេស ។ រដ្ឋមន្ត្រីក្រសួងដឹកជញ្ជូនអង់គ្លេសរូបនេះ វិធានការខាងលើ គឺមានភាពធំជាងការរំពឹងទុកទៅទៀត បើទោះបីជាជនជាតិអង់គ្លេស និងអៀរឡង់មិនត្រូវបានបិទមិនឲ្យឆ្លងកាត់រកគ្នាក្តី ប៉ុន្តែត្រូវតែរស់នៅដាច់ដោយឡែកពីគេរយៈពេល១០ថ្ងៃជាមុនសិន នៅពេលឆ្លងកាត់ព្រំដែន ។ សូមជម្រាបផងដែរថា អង់គ្លេសបានហាមឃាត់គ្រប់អ្នកធ្វើដំណើរទាំងអស់ ដែលមកពីប្រទេសនៅទ្វីបអាមេរិកខាងត្បូង ដើម្បីទប់ស្កាត់នឹងវីរុស COVID-19 ទម្រង់ថ្មី ដែលគេរកឃើញក្នុងប្រទេសប្រេស៊ីល ស្របពេលមានការព្រួយបារម្ភថា វីរុសនេះ អាចធន់នឹងវ៉ាក់សាំង ៕
-
កូរ៉េខាងជើងធ្វើព្យុហយាត្រាបង្ហាញមីស៊ីលឆ្លងទ្វីបបាញ់ចេញពីនាវាមុជទឹកប្រភេទថ្មីរបស់ខ្លួន (Video)
កូរ៉េខាងជើង៖ កងកម្លាំងនុយក្លេអ៊ែរកូរ៉េខាងជើងបានបញ្ចេញមីស៊ីលផ្លោងបំពាក់ក្បាលគ្រាប់នុយក្លេអ៊ែរ បាញ់ចេញពីនាវាមុជទឹកប្រភេទថ្មីមួយ កំឡុងពិធីព្យុហយាត្រាយោធាក្នុងទីក្រុងព្យុងយ៉ាង ដែលនេះទំនងជាការបង្ហាញសាច់ដុំ មុននឹងលោក ចូ បៃដិន ស្បថចូលកាន់តំណែង នេះបើតាមសារព័ត៌មាន AFP នៅថ្ងៃទី១៥ ខែមករា ឆ្នាំ២០២១ ។ ការធ្វើព្យុហយាត្រានេះ ធ្វើឡើងក្រោយកំឡុងសមាជបក្សពលករកូរ៉េ លោក គីម ជុងអ៊ុន បានសន្យាថា កូរ៉េខាងជើងនឹងបង្កើនការអភិវឌ្ឍមីស៊ីល និងអាវុធនុយក្លេអ៊ែរឱ្យកាន់តែមានសមត្ថភាព ដោយលោកបានសង្កត់ធ្ងន់ ថា នេះគឺជាការឆ្លើយតបទៅនឹងនយោបាយប្រឆាំងកូរ៉េខាងជើងរបស់សហរដ្ឋអាមេរិក ដែលនឹងគ្មានការផ្លាស់ប្ដូរឡើយ បើទោះជាលោក បៃដិន ឬក៏នរណាឡើងធ្វើជាប្រធានាធិបតីអាមេរិកក៏ដោយ ។ បើតាមប្រព័ន្ធផ្សព្វផ្សាយកូរ៉េខាងជើង KCNA ព្យុហយាត្រាយោធាខាងលើនេះ ធ្វើឡើងកាលពីយប់ថ្ងៃព្រហស្បតិ៍សប្តាហ៍នេះ នៅឯទីលាន គីម អ៊ីលស៊ុង ដែលយ៉ាងហោចមានមីស៊ីលបាលីស្ទីគ ជាប្រភេទបាញ់ចេញពីនាវាមុជទឹក (SLBM) មានពណ៌ខ្មៅលាយសចំនួន០៤គ្រាប់ ត្រូវបានសម្ញែងក្នុងព្យុហយាត្រា ខណៈអ្នកជំនាញខ្លះយល់ថា នេះគឺជាប្រភេទមីស៊ីលស៊េរីថ្មីមិនធ្លាប់បានឃើញពីមុនមក ៕