-
អង្គការសុខភាពពិភពលោក WHO សង្ឃឹមថា ការចាក់វ៉ាក់សាំង Covid-19 នឹងមានគ្រប់ប្រទេសទាំងអស់នៅអំឡុងខែកុម្ភៈ ឆ្នាំ២០២១
ស្វីស៖ ប្រធានអង្គការសុខភាពពិភពលោក WHO លោក ថេដ្រូស អាដាណម ហ្គេប្រេយែសឹស បានស្នើអោយមានការប្តេជ្ញាចិត្តរួមគ្នា ដូច្នេះក្នុងរយៈពេល១០០ថ្ងៃខាងមុខ ការចាក់វ៉ាក់សាំង Covid-19 ដល់បុគ្គលិកសុខាភិបាល និងអ្នកដែលមានហានិភ័យខ្ពស់នៅក្នុងប្រទេសទាំងអស់អាចចាប់ផ្ដើមក្នុងអំឡុងខែកុម្ភៈ ឆ្នាំ២០២១នេះ ។ ប្រមុខអង្គការ WHO រូបនេះបានសង្កត់ធ្ងន់ថា រដ្ឋាភិបាល ក្រុមហ៊ុនផលិត សង្គមស៊ីវិល និងអ្នកដឹកនាំសាសនា ព្រមទាំងសហគមន៍ត្រូវតែរួបរួមគ្នា ដើម្បីបង្កើតការប្រមូលផ្តុំដ៏ធំបំផុតនៅក្នុងប្រវត្តិសាស្ត្រ សម្រាប់ការចាក់វ៉ាក់សាំង Covid-19 ប្រកបដោយសមធម៌ ។ ជាមួយគ្នានេះ ទីប្រឹក្សាជាន់ខ្ពស់របស់អង្គការសុខភាពពិភពលោក WHO លោកវេជ្ជបណ្ឌិត Bruce Aylward បានបញ្ជាក់ដែរថា អង្គការសុខភាពពិភពលោក WHO កំពុងពន្លឿនការដាក់បញ្ចូលវ៉ាក់សាំងទាំងនេះ តាមរយៈកម្មវិធី COVAX ដែលព្យាយាមធ្វើអោយវ៉ា់ក់សាំងទាំងនេះ ទៅកាន់ប្រទេសដែលមានប្រាក់ចំណូលទាប និងមធ្យម ជាពិសេសតំបន់មានទីផ្សារកម្រិតទាប AMC ចំនួន ៩២ប្រទេសនៅទ្វីបអាហ្រ្វិក អាមេរិក និងអាស៊ី ៕
-
ឥណ្ឌូនេស៊ី៖ ប្រធានាធិបតីបានចាក់វ៉ាក់សាំងកូវីដ១៩មុនគេក្នុងប្រទេស ផ្សាយផ្ទាល់
ប្រធានាធិបតីនៃប្រទេសឥណ្ឌូនេស៊ី លោក Joko Widodo បានចាក់វ៉ាក់សាំងបង្ការវីរុសកូវីដ១៩ ជាវ៉ាក់សាំង CoronaVac របស់ក្រុមហ៊ុនចិន Sinovac Biotech នៅថ្ងៃទី១៣ មករា ២០២១ ធ្វើឲ្យលោកបានក្លាយជាមនុស្សដំបូងក្នុងប្រទេសឥណ្ឌូនេស៊ីដែលបានចាក់វ៉ាក់សាំងកូវីដ១៩នេះ។ លោក Joko Widodo ត្រូវបានគេចាក់វ៉ាក់សាំងនៅវិមានប្រធានាធិបតី ក្នុងក្រុងហ្សាកាតា ក្នុងព្រឹត្តិការណ៍ដែលមានការផ្សាយផ្ទាល់តាមទូរទស្សន៍ជាតិ។ ក្នុងពេលនោះ ក៏មានសមាជិកគណៈរដ្ឋមន្ត្រីផ្សេងៗទៀតចាក់វ៉ាក់សាំងដែរ។ នៅឥណ្ឌូនេស៊ី មានបុគ្គលិកសុខាភិលបាប្រមាណជិត១លាន៥សែននាក់នឹងត្រូវចាប់ផ្តើមចាក់វ៉ាក់សាំងក្នុងសប្តាហ៍នេះ ក្នុងនោះ ច្រើនជាង៥៦ម៉ឺននាក់ត្រូវបានគ្រោងថា នឹងចាក់នៅក្នុងខែមករានេះ ខណៈដែល៩០ម៉ឺននាក់ទៀត ត្រូវចាក់វ៉ាក់សាំង ក្នុងខែកុម្ភះ៕
-
វៀតណាមមានធ្លាក់ព្រិល នៅតំបន់ខ្ពង់រាបភាគខាងជើង
តំបន់ខ្ពង់រាបភាគខាងជើងនៃប្រទេសវៀតណាម រួមទាំងទីប្រជុំជន Sa Paផងដែរ មានការធ្លាក់ព្រិលយ៉ាងក្រាស់កំពុងគ្របដណ្តប់លើតំបន់នេះធ្វើឲ្យប្រជាជនវៀតណាមជាច្រើននាក់ កំពុងសម្រុកទៅលេងតំបន់នោះ នេះបើតាមការចេញផ្សាយរបស់ VN Express នាថ្ងៃទី១១ មករា ២០២១។ ព្រិលបានគ្របដណ្តប់ភ្នំ O Quy Ho ក្នុងខេត្ត Lai Chau និងទីប្រជុំជន Sa Pa ដែលជាទិសដៅទេសចរណ៍ដ៏ពេញនិយមក្នុងខេត្ត Lao Cai ចាប់តាំងពីយប់ថ្ងៃអាទិត្យមក៕
-
ព្រះមហាក្សត្រម៉ាឡេស៊ីប្រកាសដាក់ប្រទេសក្នុងគ្រាអាសន្ន សំដៅទប់ស្កាត់ការឆ្លងរីករាលដាល Covid-19 (Video)
ម៉ាឡេស៊ី៖ នៅថ្ងៃអង្គារនេះ ព្រះមហាក្សត្រម៉ាឡេស៊ីព្រះចៅ ស៊ុលតង់ អាប់ឌុលឡាហ៍ បានប្រកាសដាក់ប្រទេសទាំងមូលចូលក្នុងគ្រាមានអាសន្ន ដើម្បីព្យាយាមទប់ស្កាត់ការឆ្លងរាតត្បាតនៃវីរុស COVID-19 នេះបើតាមសេចក្ដីថ្លែងការណ៍ ចេញពីព្រះបរមរាជវាំងម៉ាឡេស៊ី ចុះផ្សាយដោយសារព័ត៌មានរ៉យទ័រនៅថ្ងៃទី១២ ខែមករា ឆ្នាំ២០២១ ។ ការសម្រេចព្រះទ័យរបស់ព្រះមហាក្សត្រម៉ាឡេស៊ី កើតមានឡើងក្រោយទ្រង់បានជួបជាមួយនាយករដ្ឋមន្រ្តីម៉ាឡេស៊ី លោក មូហ៍យីដទីន យ៉ាសស៊ីន នៅវិមានជាតិក្នុងថ្ងៃចន្ទនេះ និងបន្ទាប់ពីលោកនាយករដ្ឋមន្រ្តីម៉ាឡេស៊ីបានប្រកាសដាក់ចេញចាត់វិធានការរឹតបន្តឹងលើការធ្វើដំណើរ ចាប់ពីថ្ងៃទី១៣ ខែមករាតទៅ ដើម្បីទប់ស្កាត់ COVID-19 ។ បើតាមសេចក្ដីថ្លែងការណ៍ចេញពីព្រះបរមរាជវាំងម៉ាឡេស៊ី ការប្រទេសដាក់ក្នុងគ្រាអាសន្នខាងលើនេះ នឹងមានសុពលភាពរហូតដល់ថ្ងៃទី០១ ខែសីហា ឆ្នាំ២០២១ខាងមុខ ឬក៏អាចលឿនជាងនេះ អាស្រ័យទៅលើស្ថានភាព COVID-19 ។ ជាមួយគ្នានេះ ព្រះមហាក្សត្រម៉ាឡេស៊ីក៏បានស្នើឱ្យប្រជាជនម៉ាឡេស៊ីរក្សាភាពស្ងៀមស្ងាត់ និងអត់ធ្មត់ផងដែរ កំឡុងការអនុវត្តវិធានការដាក់ប្រទេសក្នុងគ្រាអាសន្ននេះ ៕
-
លោក ដូណាល់ ត្រាំ និងលោក ម៉ៃ ភែន ជួបពិភាក្សាគ្នាក្នុងសេតវិមាន ខណៈបក្សប្រជាធិបតេយ្យនឹងបោះឆ្នោតដកលោក ត្រាំ ពីតំណែងនៅល្ងាចថ្ងៃអង្គារនេះ (Video)
អាមេរិក៖ មន្ត្រីជាន់ខ្ពស់អាមេរិកម្នាក់និយាយថា ប្រធានាធិបតីអាមេរិក លោក ដូណាល់ ត្រាំ និងអនុប្រធានាធិបតីអាមេរិកលោក ម៉ៃ ភែន នៅល្ងាចថ្ងៃចន្ទនេះ បានជួបពិភាក្សាគ្នាក្នុងសេតវិមាន ខណៈសមាជិកសភាបក្សប្រជាធិបតេយ្យកំពុងដាក់សម្ពាធអោយលោក ភែន ចូលរួមក្នុងការដកលោក ត្រាំ ពីតំណែង នេះបើតាមសារព័ត៌មាន AP នៅថ្ងៃទី១២ ខែមករា ឆ្នាំ២០២១ ។ បើតាមមន្ត្រីជាន់ខ្ពស់អាមេរិកម្នាក់ក្នុងលក្ខខណ្ឌមិនបញ្ចេញឈ្មោះ លោក ដូណាល់ ត្រាំ គ្មានបំណងលាលែងពីតំណែងប្រធានាធិបតី នៅមុនពេលលោកត្រូវផុតអាណត្តិជាផ្លូវការនៅថ្ងៃទី២០ ខែមករានោះទេ ខណៈលោក ភែន វិញក៏គ្មានបំណងចូលរួមដកលោក ត្រាំ ពីតំណែង តាមរយៈការប្រកាសថា ប្រធា នាធិបតីរូបនេះអសមត្ថភាព តាមការស្នើសុំរបស់សមាជិកសភាបក្សប្រជាធិបតេយ្យនោះដែរ ។ កិច្ចប្រជុំរវាងលោក ត្រាំ និងលោក ភែន ខាងលើនេះ បានកើតមានឡើងចំពេលដែលសមាជិកសភាតំណាងរាស្ត្របក្សប្រជាធិបតេយ្យ នឹងធ្វើការបោះឆ្នោតមួយ នៅល្ងាចថ្ងៃអង្គារនេះ លើដំណោះស្រាយមួយ ដែលនឹងស្នើឱ្យលោក ម៉ៃ ភែន យកច្បាប់វិសោធនកម្មទី២៥មកប្រើ ដើម្បីដកលោក ត្រាំ ពីតំណែង…
-
ឥណ្ឌូនេស៊ី៖ ធ្លាក់យន្តហោះបាន១ថ្ងៃ មានបាក់ដីស្លាប់មនុស្ស១៣នាក់ បាត់ខ្លួនរាប់សិបនាក់ទៀត
បន្ទាប់ពីមានករណីធ្លាក់យន្តហោះ១គ្រឿង ផ្ទុកមនុស្សជាង៦០នាក់ នៅប្រទេសឥណ្ឌូនេស៊ី បានមួយថ្ងៃ ក៏ស្រាប់តែមានករណីបាក់ដីចំនួន២លើក បណ្តាលឲ្យស្លាប់មនុស្ស១៣នាក់ បាត់ខ្លួន២៦នាក់ផ្សេងទៀត ក្នុងប្រទេសមួយនេះទៀត។ អាជ្ញាធរកំពុងព្យាយាមរុករកអ្នកបាត់ខ្លួន ក្នុងករណីបាក់ដីផ្ទួនៗគ្នា នៅក្នុងភូមិមួយនៃខេត្ត West Java កាលពីចុងសប្តាហ៍ នេះបើតាមការការបញ្ជាក់របស់មន្ត្រីនៅថ្ងៃអង្គារ៍ទី១២ មករា ២០២១នេះ។ បំណាក់ដីនេះកើនឡើងក្រោយពេលមានភ្លៀងធ្លាក់ខ្លាំង កាលពីថ្ងៃអាទិត្យ។ រម្លឹកដែរថា យន្ដហោះ Boeing 737-500 ដឹកមនុស្សសរុប ៦២នាក់ ក្នុងនោះរួមមានអ្នកដំណើរ ៥០នាក់ និងក្រុមការងារអាកាសយានិក ១២នាក់ បានធ្លាក់ចូលក្នុងសមុទ្រជា្វ កាលពីថ្ងៃសៅរ៍សប្ដាហ៍មុន ៤នាទីបន្ទាប់ពីហោះចាកចេញពីអាកាសយានដ្ឋានក្នុងរដ្ឋធានីហ្សាកាតា៕
-
ថៃឆ្លងកូវីដ១៩ក្នុងសហគមន៍ថ្មីៗ ជិត៣០០នាក់ទៀត នៅថ្ងៃទី១២ មករានេះ
នៅថ្ងៃទី១២ មករា ២០២១នេះ ប្រទេសថៃបានប្រកាសពីការឆ្លងក្នុងសហគមន៍នៃជំងឺកូវីដ១៩ ថ្មីៗចំនួន ២៧៨នាក់ទៀត និងមាននាំចូល៩ករណីទៀត សរុបថ្ងៃនេះរកឃើញ ២៨៧នាក់។ ចំនួននេះធ្វើឲ្យថៃមានអ្នកកើតជំងឺកូវីដ១៩ កើនដល់១០៨៣៤នាក់ហើយ ចាប់តាំងពីខែមករា ២០២០មក។ ថ្ងៃនេះ ពុំមានករណីស្លាប់ថ្មីទេ ធ្វើឲ្យអ្នកស្លាប់នៅតែមានចំនួន៦៧នាក់៕ ប្រភពពីបាងកកប៉ុស្តិ៍
-
សហរដ្ឋអាមេរិកដាក់បញ្ចូលគុយបាទៅក្នុងបញ្ជីឈ្មោះប្រទេសគាំទ្រភេរវកម្មឡើងវិញ (Video)
អាមេរិក៖ រដ្ឋបាលរបស់លោក ដូណាល់ ត្រាំ នៅថ្ងៃចន្ទនេះ ដាក់បញ្ចូលគុយបា ទៅក្នុងបញ្ជីខ្មៅប្រទេសគាំទ្រភេរវកម្មឡើងវិញ ដែលប្រការនេះត្រូវបានគេមើលឃើញថា ដើម្បីបង្កឧបសគ្គដល់នយោបាយការទូត នៃរដ្ឋបាលរបស់ប្រធានា ធិបតីជាប់ឆ្នោតអាមេរិកលោក ចូ បៃដិន នេះបើតាមសារព័ត៌មានរ៉យទ័រនៅថ្ងៃទី១២ ខែមករា ឆ្នាំ២០២១ ។ នៅក្នុងសេចក្ដីថ្លែងការណ៍ចេញផ្សាយនៅថ្ងៃចន្ទសប្ដាហ៍នេះ រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ និយាយថា សហរដ្ឋអាមេរិកនឹងបន្តគាំទ្រប្រជាជនគុយបា ដែលចង់បានរដ្ឋាភិបាលប្រជាធិបតេយ្យ និងគោរពសិទ្ធិមនុស្ស សេរីភាព និងសាសនា ហើយថា ការសម្រេចចិត្តបែបនេះរបស់សហរដ្ឋអាមេរិក គឺដោយ សារគុយបាគាំទ្រក្រុមឧទ្ទាមក្នុងប្រទេសកូឡុំប៊ី ដែលមានទំនាក់ទំនងជាមួយវេណេស៊ុយអេឡា ។ សូមរំលឹកផងដែរថា រដ្ឋបាលអតីតប្រធានាធិបតីអាមេរិក លោក បារ៉ាក់ អូបាម៉ា ធ្លាប់បានដកគុយបាចេញពីបញ្ជីខ្មៅនៃប្រទេសគាំទ្រភេរវកម្មកាលពីឆ្នាំ២០១៥ ក្នុងគោលបំណងស្ដារទំនាក់ទំនងការទូតរវាងប្រទេសទាំងពីរឡើងវិញ ៕
-
រដ្ឋមន្ត្រីសន្តិសុខមាតុភូមិអាមេរិកលាលែងពីតំណែង បន្ទាប់ពីចេញមុខរិះគន់លោក ដូណាល់ ត្រាំ ពាក់ព័ន្ធនឹងកុបកម្មនៅវិមានសភា (Video)
អាមេរិក៖ រដ្ឋមន្ត្រីក្រសួងសន្តិសុខមាតុភូមិស្ដីទីអាមេរិក លោក Chad Wolf បានចុះចេញពីតំណែងនៅថ្ងៃចន្ទនេះ ប៉ុន្មានថ្ងៃក្រោយលោកចេញមុខរិះគន់ប្រធានា ធិបតីអាមេរិកជិតផុតអាណត្តិលោក ដូណាល់ ត្រាំ ទាក់ទិននឹងក្រុមកុបករចូលអុកឡុកវិមានសភា នេះបើតាមសារព័ត៌មានរ៉យទ័រនៅថ្ងៃទី១២ ខែមករា ឆ្នា ២០២១ ។ ការប្រកាសខាងលើនេះ បានធ្វើអោយលោក Chad Wolf ក្លាយជាមនុស្សទី៣ហើយ ដែលបានដើរចេញពីរដ្ឋបាលរបស់លោក ដូណាល់ ត្រាំ បន្ទាប់ពីក្រុមកុបករគាំទ្រប្រធានាធិបតីអាមេរិករូបនេះ ចូលអុកឡុកវិមានសភាកាលពីសប្ដាហ៍មុន ។ ជាមួយគ្នានេះ លោក Chad Wolf មិនបានបញ្ជាក់អោយច្បាស់ៗពីមូលហេតុជុំវិញការសម្រេចចិត្តបែបនេះនោះទេ ខណៈដែលលោកនឹងលាលែងពីតំណែងនៅពាក់កណ្តាលយប់ថ្ងៃចន្ទដើមសប្តាហ៍នេះ ។ សូមជម្រាបថា លោក Chad Wolf បានឡើងកាន់តំណែងជារដ្ឋមន្ត្រីសន្តិសុខ មាតុភូមិស្ដីទីអាមេរិក ចាប់តាំងខែវិច្ឆិកា ឆ្នាំ២០១៩ ប៉ុន្តែតំណែងរបស់លោកមិនទាន់ត្រូវបានទទួលស្គាល់ដោយព្រឹទ្ធសភានៅឡើយទេ ៕
-
ទីភ្នាក់ងារ FBI ព្រមានថា ក្រុមកុបករគាំទ្រលោក ដូណាល់ ត្រាំ អាចនឹងបង្កភាពចលាចលនៅថ្ងៃចូលកាន់តំណែងជាផ្លូវការរបស់លោក ចូ បៃដិន (Video)
អាមេរិក៖ ទីភ្នាក់ងារ FBI បានព្រមានអំពីលទ្ធភាពនៃការតវ៉ាប្រដាប់អាវុធ ដែលនឹងត្រូវធ្វើឡើងនៅទូទាំងសហរដ្ឋអាមេរិកក្នុងរយៈពេលប៉ុន្មានថ្ងៃខាងមុខ មុនពេលលោក ចូ បៃដិន ស្បថចូលកាន់តំណែងជាប្រធានាធិបតីថ្មីរបស់សហរដ្ឋអាមេរិកជាផ្លូវការ នេះបើតាមសារព័ត៌មានរ៉យទ័រនៅថ្ងៃទី១២ ខែមករា ឆ្នាំ២០២១ ។ មានរបាយការណ៍អំពីក្រុមប្រដាប់អាវុធដែលគ្រោងប្រមូលផ្តុំគ្នា នៅឯអគាររដ្ឋាភិបាលក្នុងរដ្ឋទាំង៥០ និងនៅក្នុងទីក្រុងវ៉ាស៊ីនតោន មុនការស្បថចូលកាន់តំណែងរបស់លោក ចូ បៃដិន នៅថ្ងៃទី២០ ខែមករាខាងមុខនេះ ។ ការភ័យខ្លាចនេះបានកើតឡើងស្របពេលផែនការសន្តិសុខត្រូវបានរឹតបន្តឹងសម្រាប់ព្រឹត្តិការណ៍នេះ ។ នៅថ្ងៃអង្គារនេះ លោក បៃដិន បានប្រាប់ក្រុមអ្នកយកព័ត៌មានថា លោកមិនខ្លាចក្នុងការស្បថចូលកាន់តំណែងនៅខាងក្រៅវិមានកាពីតូលអាមេរិកទេ ។ ទាំងរូបលោក និងលោកស្រី Kamala Harris នៅតែត្រូវបានគេរំពឹងថា នឹងស្បថចូលកាន់តំណែងនៅខាងក្រៅអគារ ពោលគឺមានរយៈពេលត្រឹមតែពីរសប្តាហ៍ប៉ុណ្ណោះបន្ទាប់ពីទីនោះ បានក្លាយជាកន្លែងដែលអ្នកគាំទ្ររបស់លោក ត្រាំ ធ្វើកុបកម្មដ៏សាហាវប្រឆាំងនឹងលទ្ធផលឆ្នោត ៕