-
យន្តហោះមួយគ្រឿងរបស់ឥណ្ឌូណេស៊ីបាត់ដំណឹងជាមួយនឹងមនុស្សសរុបជាង៥០នាក់
ឥណ្ឌូណេស៊ី៖ យន្តហោះដឹកអ្នកដំណើររបស់ក្រុមហ៊ុន ស្រ៊ីវីចាយ៉ា ប្រភេទ Boeing 737-500 មានជើងហោះហើរ SJY182 បានបាត់ដំណឹងជាមួយមនុស្សជិះនៅលើនោះសរុបជាង៥០នាក់ នេះបើតាមអាជ្ញាធរឥណ្ឌូណេសុី ចុះផ្សាយដោយសារព័ត៌មាន CNA នៅយប់ថ្ងៃទី០៩ ខែមករា ឆ្នាំ២០២១ ។ យន្តហោះ Boeing 737-500 ខាងលើនេះ មានអាយុកាលធ្វើប្រតិបត្តិការ២៧ឆ្នាំមកហើយ ហើយវាបានបាត់ដំណឹងកាលពីវេលាម៉ោង ៣៖៤០នាទី (ម៉ោងក្នុងតំបន់) ។ បើតាមក្រសួងដឹកជញ្ជូនឥណ្ឌូណេស៊ី យន្តហោះដឹកអ្នកដំណើរខាងលើនេះ បានចាកចេញពីអាកាសយានដ្ឋានទីក្រុងហ្សាការតា កាលពីវេលាម៉ោង ២៖៣៥នាទី (ម៉ោងក្នុងតំបន់) ហើយគ្រោងទៅចុះចតនៅអាកាសយានដ្ឋាន ផុនធាណាក់ ស្ថិតនៅក្នុងខេត្ត កាលីម៉ាន់តាន់ខាងលិច ។ រហូតមកទល់ពេលនេះ អាកាសចរណ៍ Sriwijaya Air មិនទាន់ចេញសេចក្តីថ្លែងការណ៍អ្វីទៀតឡើយ ដោយត្រូវរង់ចាំការបញ្ជាក់ ព័ត៌មានផ្លូវការបន្ថែមពីអាជ្ញាធរឥណ្ឌូណេស៊ី ដែលកំពុងតាមរកយន្តហោះនោះ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៨៩លាននាក់ ក្នុងនោះស្លាប់ជាង១លាន៩២ម៉ឺននាក់ និងជាសះស្បើយជាង៦៤លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៨៩លាន៣៥ម៉ឺន៨ពាន់៩៨៦ករណី ក្នុងនោះមានអ្នកជម្ងឺសរុបចំនួន១លាន៩២ម៉ឺន២ពាន់១៥៦នាក់ស្លាប់ និង ជាសះស្បើយឡើងវិញសរុបចំនួន៦៤លាន១ម៉ឺន៥២៩នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៩ ខែមករា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២២លាន៤៥ម៉ឺន៦ពាន់៩០២នាក់ ស្លាប់ចំនួន៣៧ម៉ឺន៨ពាន់១៤៩នាក់ និងជាសះស្បើយចំនួន១៣លាន២៥ម៉ឺន៩ពាន់៩៤៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៤៣ម៉ឺន២ពាន់៥២៦នាក់ ស្លាប់ចំនួន១៥ម៉ឺន៨៣៥នាក់ និងជាសះស្បើយ១០លាន៥ម៉ឺន៦ពាន់៦៥១នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៨លាន១ម៉ឺន៥ពាន់៩២០នាក់ ស្លាប់២០ម៉ឺន១ពាន់៥៤២នាក់ និងជាសះស្បើយ៧លាន១១ម៉ឺន៤ពាន់៤៧៤នាក់ ៕
-
មេដឹកនាំក្រុម ហេបូឡា នៅលីបង់បញ្ជាក់ថា ប៊ូតុងនុយក្លេអ៊ែរស្ថិតនៅក្នុងដៃមនុស្សល្ងីល្ងើឆ្កួតដូចលោក ដូណាល់ ត្រាំ (Video)
លីបង់៖ មេដឹកនាំក្រុម ហេបូឡា នៅលីបង់ លោក សាយយ៉េដ ហាសាន់ ណាស្រាឡា នៅថ្ងៃសុក្រនេះនិយាយថា ព្រឹត្តិការណ៍ថ្មីៗនេះនៅសហរដ្ឋអាមេរិកនឹងមានផលវិបាកជាសកល ហើយលោកបានអធិស្ឋានដល់ព្រះការពារពិភពលោករហូតដល់ថ្ងៃទី២០ ខែមករាខាងមុខ នៅពេលដែលលោក ចូ បៃដិន ស្បថចូលកាន់តំណែងជាប្រធានាធិបតីថ្មីរបស់សហរដ្ឋអាមេរិកជាផ្លូវការ នេះបើតាមសារព័ត៌មានរ៉យទ័រនៅថ្ងៃទី០៩ ខែមករា ឆ្នាំ២០២១ ។ ប៊ូតុងនុយក្លេអ៊ែរស្ថិតនៅក្នុងដៃរបស់មនុស្សល្ងីល្ងើឆ្កួត ដែលហៅឈ្មោះថា ត្រាំ …ព្រះនឹងការពារពិភពលោកពីអ្វីដែលគាត់អាចធ្វើបាន នេះបើតាមការបញ្ជាក់របស់មេដឹកនាំនៃអង្គការដែលគាំទ្រដោយអ៊ីរ៉ង់ នៅក្នុងសុន្ទរកថាតាមទូរទស្សន៍ ។ លោក ណាស្រាឡា បន្ថែមថា ការអុកឡុកនៅវិមានសភាដោយអ្នកគាំទ្ររបស់លោក ត្រាំ កាលពីថ្ងៃពុធសប្តាហ៍នេះ បានបង្ហាញពីប្រធានាធិបតីត្រៀមសម្លាប់ប្រជាជនរបស់ខ្លួនដើម្បីរក្សាអំណាច ។ លោកបានសង្កត់ធ្ងន់ទៀតថា មនុស្ស០៥នាក់ រួមទាំងមន្រ្តីប៉ូលិសអគារសភា និងស្ត្រីម្នាក់ត្រូវបានបាញ់ដោយប៉ូលិសនោះ បានស្លាប់នៅក្នុងកុបកម្មនៅវិមានកាពីតូល… វាគឺជាឧទាហរណ៍តូចមួយនៃអ្វីដែលលោក ត្រាំ បានប្តេជ្ញាចិត្តក្នុងរយៈពេល០៤ឆ្នាំរបស់លោកនៅក្នុងប្រទេសមួយចំនួនទៀត ៕
-
Twitter សម្រេចបិទគណនីរបស់លោក ដូណាល់ ត្រាំ ជាអចិន្ត្រៃយ៍ ក្រោមហេតុផលថា អាចមានហានិភ័យនៃការញុះញង់អោយផ្ទុះអំពើហិង្សាបន្ថែមទៀត (Video)
អាមេរិក៖ ក្រុមហ៊ុនបណ្តាញសង្គម Twitter នៅថ្ងៃសុក្រនេះ សម្រេចបិទគណនី Twitter របស់ប្រធានាធិបតីអាមេរិកលោក ដូណាល់ ត្រាំ ជាអចិន្ត្រៃយ៍ ក្រោមហេតុផលថា អាចមានហានិភ័យនៃការញុះញង់អោយផ្ទុះអំពើហិង្សាបន្ថែមទៀត ក្រោយមានការអុកឡុកនៅវិមានសភាអាមេរិក នេះបើតាមសារព័ត៌មានរ៉យទ័រនៅ ថ្ងៃទី០៩ ខែមករា ឆ្នាំ២០២១ ។ បន្ទាប់ពីការត្រួតពិនិត្យយ៉ាងដិតដល់លើការបង្ហោះសារនាពេលថ្មីៗនេះ ដោយគណនី @realDonaldTrump ហើយនិងខ្លឹមសារទាំងនោះ យើងបានសម្រេចផ្អាកគណនីនេះជាអចិន្រ្តៃយ៍ ដោយសារហានិភ័យនៃការញុះញង់អោយផ្ទុះអំពើហិង្សាបន្ថែមទៀត នេះបើតាមសេចក្តីថ្លែងការណ៍របស់ក្រុមហ៊ុន Twitter ។ សូមជម្រាបផងដែរថា នេះគឺជាលើកដំបូងហើយ ដែលក្រុមហ៊ុនបណ្តាញសង្គមដ៏ល្បីរបស់សហរដ្ឋអាមេរិកមួយនេះ បានសម្រេចបិទជាអចិន្ត្រៃយ៍នូវគណនី Twitter របស់ប្រមុខដឹកនាំរដ្ឋ ៕
-
លោក ដូណាល់ ត្រាំ អះអាងថា នឹងមិនចូលរួមពិធីស្បថចូលកាន់តំណែងរបស់លោក ចូ បៃដិន ឡើយ (Video)
អាមេរិក៖ ប្រធានាធិបតីអាមេរិកលោក ដូណាល់ ត្រាំ នៅថ្ងៃសុក្រនេះអះអាងថា លោកនឹងមិនទៅចូលរួមពិធីស្បថចូលកាន់តំណែងរបស់លោក ចូ បៃដិន ដែលនឹងប្រព្រឹត្តទៅនៅថ្ងៃទី២០ ខែមករានោះឡើយ ខណៈការអះអាងបែបនេះកើតមានឡើងមួយម៉ោងក្រោយលោកសន្យាផ្ទេរអំណាចដោយសន្តិវិធី នេះបើតាមសារព័ត៌មានរ៉យទ័រនៅថ្ងៃទី០៩ ខែមករា ឆ្នាំ២០២១ ។ ឆ្លើយតបនឹងការប្រកាសខាងលើនេះរបស់លោក ដូណាល់ ត្រាំ នោះ ប្រធានា ធិបតីជាប់ឆ្នោតអាមេរិកលោក ចូ បៃដិន បាននិយាយថា អវត្តមានរបស់លោក ត្រាំ នឹងជារឿងល្អ ក៏ប៉ុន្តែលោកស្វាគមន៍វត្តមានរបស់អនុប្រធានាធិបតីអាមេរិកលោក ម៉ៃក៍ ភែន ប្រសិនបើលោក ភែន សម្រេចចិត្តចូលរួម ។ សូមជម្រាបផងដែរថា តាមទម្លាប់ ប្រធានាធិបតីដែលផុតអាណត្តិ និងប្រធានា ធិបតីថ្មីដែលជាប់ឆ្នោត គឺតែងតែធ្វើដំណើរទៅកាន់វិមានសភាអាមេរិករួមគ្នា ដើម្បីចូលរួមពិធីស្បថចូលកាន់តំណែង ដែលវាគឺជានិមិត្តសញ្ញាតំណាងអោយការផ្ទេរអំណាចដោយសន្តិវិធី ៕
-
លោក ចូ បៃដិន និយាយថា គណបក្សប្រជាធិបតេយ្យត្រៀមខ្លួនរួចរាល់ហើយ ដើម្បីបោះឆ្នោតដកលោក ដូណាល់ ត្រាំ ចេញពីតំណែងម្តងទៀត (Video)
អាមេរិក៖ ប្រធានាធិបតីជាប់ឆ្នោតអាមេរិកលោក ចូ បៃដិន នៅថ្ងៃសុក្រនេះថ្លែងថា ដល់ពេលហើយដែលសភាត្រូវសម្រេចចិត្តបោះឆ្នោត ដើម្បីដកតំណែងពីប្រធានាធិបតីអាមេរិកលោក ដូណាល់ ត្រាំ ជាលើកទី២ ខណៈដែលក្រុមអ្នកប្រជាធិបតេយ្យនៅក្នុងសភាតំណាងរាស្រ្ត គ្រោងនឹងបង្ហាញការចោទប្រកាន់ពីការប្រព្រឹត្តមិនត្រឹមត្រូវនៅថ្ងៃចន្ទនេះ បន្ទាប់ពីអ្នកគាំទ្រដ៏ឃោរឃៅរបស់លោក ត្រាំ បានចូលអុកឡុកអគារសភា ដែលនេះជាការវាយប្រហារលើលទ្ធិប្រជាធិបតេយ្យសហរដ្ឋអាមេរិក នេះបើតាមសារព័ត៌មានរ៉យទ័រនៅថ្ងៃទី០៩ ខែមករា ឆ្នាំ២០២១ ។ លោក បៃដិន បាននិយាយថា អ្វីដែលមនុស្ស៨១លាននាក់បានក្រោកឈរ ហើយនិយាយថា វាដល់ពេលដែលគាត់ (លោក ត្រាំ) ត្រូវទៅហើយ ។ វិធីលឿនបំផុតដែលនឹងកើតឡើង គឺយើងនឹងស្បថចូលកាន់តំណែងនៅថ្ងៃទី២០ ។ តើមានអ្វីកើតឡើង មុន រឺក្រោយនោះ គឺជាសាលក្រមដែលសភាត្រូវធ្វើ ប៉ុន្តែនេះជាអ្វីដែលខ្ញុំទន្ទឹងរង់ចាំ គឺគាត់ (លោក ត្រាំ) ចាកចេញពីតំណែង ។ ដោយឡែកសមាជិកព្រឹទ្ធសភាបក្សសាធារណរដ្ឋលោកស្រី Lisa Murkowski នៅថ្ងៃសុក្រនេះ ក៏បានអំពាវនាវអោយលោក ត្រាំ លាលែងពីតំណែងផងដែរ ដោយលោកស្រីបានប្រាប់សារព័ត៌មាន Anchorage Daily News ដូច្នេះថា…
-
ក្រសួងសុខាភិបាលថៃស្នើថវិកាជាង១៥០លានដុល្លារឆ្លើយតបបន្ទាន់ រលកថ្មីកូវីដ១៩
ក្រសួងសុខាភិបាលថៃបានស្នើសុំថវិកា ៤.៦៦ពាន់លានបាត ឬ ជាង១៥០លានដុល្លារអាមេរិក សម្រាប់យកមកប្រើប្រាស់ទប់ទល់នឹងរលកថ្មីនៃជំងឺកូវីដ១៩ នេះបើតាមការប្រកាសរបស់អ្នកនាំពាក្យរងនៃរាជរដ្ឋាភិបាលថៃ Traisuree Taisaranakul ប្រកាស នៅថ្ងៃទី៨ មករា ២០២១នេះ។ លោកស្រីថា ថវិកាដែលត្រូវយកពីកញ្ចប់ថវិកាជាតិនេះនឹងផ្តល់លទ្ធភាពឲ្យក្រសួងឆ្លើយតបបន្ទាន់ លើការផ្ទុះជំងឺទ្រង់ទ្រាយធំឡើងវិញនេះ។ ថវិកាជាង១៥៤លានដុល្លារអាមេរិកទាំងនេះនឹងត្រូវយកទៅទិញសម្ភារៈបរិក្ខាចាំបាច់បន្ថែម ព្រមទាំងយកទៅចំណាយលើក្រុមគ្រូពេទ្យជួរមុខស្ម័គ្រចិត្ត៕ ប្រភពពីបាងកកប៉ុស្តិ៍
-
ថៃ៖ ស្ថានីយ៍ទូរទស្សន៍មួយបិទទ្វារអគាររបស់ខ្លួន ក្រោយមានបុគ្គលិកឆ្លងកូវីដ១៩
គណៈគ្រប់គ្រងស្ថានីយ៍ទូរទស្សន៍ TV Channel 3 បានបិទអគារ Maleenon 2របស់ខ្លួន នៅវិថី Rama IV កាលពីយប់មិញនេះ ក្រោយពេលមានបុគ្គលិកម្នាក់បានឆ្លងជំងឺកូវីដ១៩។ អ្នកនាង Pitchayatan Chanput អ្នកអានព័ត៌មានរបស់ទូរទស្សន៍ Channel 3 នាព្រឹកថ្ងៃសុក្រ ទី៨ មករា ២០២១នេះ បានប្រកាសពីការបិទអគារផ្សាយមួយនេះ ដោយនិយាយថា បុគ្គលិកផ្នែកក្រាហ្វិក ជាបុរសម្នាក់ដែលធ្វើការនៅជាន់ទី៥ និងទី៦នៃអគារមួយនេះ បានឆ្លងជំងឺកូវីដ១៩។ អគារទាំងមូលត្រូវបានបិទទ្វារ តាំងពីម៉ោង១០យប់ ថ្ងៃព្រហស្បតិ៍ ទី៧ មករា ២០២១ ហើយបុគ្គលិកនៅលើជាន់ទាំងពីរត្រូវបានគិតថា មានហានិភ័យឆ្លងដ៏ខ្ពស់ ប៉ុន្តែអ្នកគ្រប់គ្នាត្រូវធ្វើតេស្តកូវីដ១៩។ ព្រឹកមិញនេះ ថៃប្រកាសពីការរកឃើញវិជ្ជមានកូវីដ១៩ ចំនួន២០៥នាក់ទៀត ភាគច្រើន ជាការឆ្លងក្នុងសហគមន៍ ផ្តើមចេញពីករណីផ្សារលក់អាហារសមុទ្រក្នុងខេត្តសាមុត សាខន ធ្វើឲ្យថៃ មានកូវីដ១៩កើនដល់ ៩៨៤១នាក់ហើយ គិតត្រឹមព្រឹកថ្ងៃទី៨ មករានេះ៕ ប្រភពពីបាងកកប៉ុស្តិ៍
-
មន្រ្តីជាន់ខ្ពស់ WHO បញ្ជាក់ថា បណ្តាប្រទេសក្រីក្របំផុត នឹងទទួលបានវ៉ាក់សាំង Covid-19 នៅចន្លោះចុងខែមករា និងពាក់កណ្តាលខែកុម្ភៈឆ្នាំនេះ
ស្វីស៖ ប្រធានផ្នែកវ៉ាក់សាំងរបស់អង្គការសុខភាពពិភពលោក WHO លោកស្រី ខេត អូប្រាយអ៊ែន បញ្ជាក់ថា COVAX ដែលជាគម្រោងអន្តរជាតិស្តីពីការទិញ និងចែកចាយវ៉ាក់សាំង COVID-19 សម្រាប់ប្រទេសកំពុងអភិវឌ្ឍនោះ សម្រេចបានកិច្ចព្រមព្រៀងទិញវ៉ាក់សាំងចំនួន២ពាន់លានដូស ហើយដូសដំបូងក្នុងចំណោមនោះ នឹងចាប់ផ្តើមចែកចាយក្នុងរយៈពេលប៉ុន្មានសប្តាហ៍ទៀត នេះបើតាមសារព័ត៌មាន AFP នៅថ្ងៃទី០៨ ខែមករា ឆ្នាំ២០២១ ។ ប្រធានផ្នែកវ៉ាក់សាំងរបស់ WHO រូបនេះបន្ថែមថា វ៉ាក់សាំង COVID-19 ដែលគម្រោង COVAX ទិញបាននោះ នឹងត្រូវចាប់ផ្តើមចែកចាយនៅចន្លោះចុងខែមករា និងពាក់កណ្តាលខែកុម្ភៈ ឆ្នាំ២០២១ខាងមុខនេះហើយ ។ លោកស្រី ខេត អូប្រាយអ៊ែន បានអះអាងទៀតថា សកម្មភាពនេះជាមធ្យោបាយដែលបណ្តាប្រទេសក្រីក្រនៅតំបន់អាហ្រ្វិក និងអាស៊ីខាងត្បូង ក៏ដូចជាប្រទេសដទៃទៀតនៅជុំវិញពិភពលោកដែលចូលរួមក្នុងគម្រោងនេះ ដែលមិនសូវមានលទ្ធភាព ដើម្បីទិញដោយខ្លួនឯងផ្ទាល់អាចទទួលបានវ៉ាក់សាំង COVID-19 ៕
-
នាយករដ្ឋមន្ត្រីសិង្ហបុរីទទួលការចាក់វ៉ាក់សាំង Covid-19 (Video)
សង្ហិបុរី៖ នាយករដ្ឋមន្ត្រីសិង្ហបុរី លោក លី សៀនឡុង បានទទួលការចាក់វ៉ាក់សាំងប្រឆាំងជំងឺកូវីដ១៩ នៅថ្ងៃសុក្រនេះ ជាវ៉ាក់សាំងរបស់ក្រុមហ៊ុនអាមេរិក និងអាល្លឺម៉ង់ ភីហ្វីហ្សឺ-បាយអូអិនធិច នេះបើតាមសារព័ត៌មាន CNA នៅថ្ងៃទី០៨ ខែមករា ឆ្នាំ២០២១ ។ លោក លី សៀនឡុង បានក្លាយជាសមាជិកគណៈរដ្ឋមន្ត្រីដំបូងរបស់សិង្ហបុរី ដែលទទួលការចាក់វ៉ាក់សាំង ដោយលោកបានទទួលវ៉ាក់សាំង ក្នុងយុទ្ធនាការផ្តល់វ៉ាក់សាំងដល់បុគ្គលិកសុខាភិបាល ។ លោក លី បាននិយាយថា លោករីករាយក្នុងការឃើញពីការចាប់ផ្តើមផ្តល់វ៉ាក់សាំងដល់មន្ត្រីសុខាភិបាលជួរមុខនេះ ។ ដូច្នេះ ខ្ញុំឆ្លៀតឳកាសនេះ ចាក់ខ្លួនឯងដែរ ហើយពេលនេះ ខ្ញុំចាក់រួចហើយ ៣០នាទីក្រោយមក ពុំមានអ្វីមិនស្រួលសម្រាប់ខ្ញុំទេ ។ នាយករដ្ឋមន្ត្រីសិង្ហបុរីរូបនេះបន្ថែមទៀតថា លោកនឹងចាក់ម្តងទៀតប្រមាណ៣សប្តាហ៍ក្រោយ ហើយថា ពុំមានការឈឺចាប់ទេ តែមានសារៈសំខាន់ ៕