-
សភាអាមេរិកបញ្ចេញកញ្ចប់ថវិកា១.៩ពាន់លានដុល្លារ ដើម្បីផ្លាស់ប្ដូរឧបករណ៍ទូរគមនាគមន៍របស់ក្រុមហ៊ុន Huawei និង ZTE ចេញពីទឹកដីសហរដ្ឋអាមេរិក
អាមេរិក៖ សមាជិកសភាអាមេរិកបានសម្រេចចិត្តបញ្ចេញកញ្ចប់ថវិកាចំនួន ១.៩ពាន់លានដុល្លារ ជាប្រាក់ជំនួយសម្រាប់ដក និងផ្លាស់ប្ដូរឧបករណ៍ទូរគមនាគមន៍ក្រុមហ៊ុន Huawei និង ZTE ចេញពីទឹកដីសហរដ្ឋអាមេរិក នេះបើតាមសារព័ត៌ មានរ៉យទ័រនៅថ្ងៃទី២១ ខែធ្នូ ឆ្នាំ២០២០ ។ គណៈកម្មការទំនាក់ទំនងសហព័ន្ធអាមេរិក (FCC) បាននិយាយកាលពីខែមិថុនាថា ការប្រើប្រាស់បណ្ដាញឧបករណ៍ទូរគមនាគមន៍ របស់ក្រុមហ៊ុនចិនធំៗទាំងពីរខាងលើគឺបង្កជាហានិភ័យដល់សន្តិសុខជាតិអាមេរិក និងបានស្នើសុំសភាអាមេរិកដើម្បីផ្លាស់ប្ដូរ ឧបករណ៍ទាំងនោះចេញ ដោយតាមគម្រោងអាចនឹងចំណាយថវិកាច្រើនសន្ធឹក រហូតដល់៨.៣ពាន់លានដុល្លារ ។ ឆ្លើយតបនឹងបញ្ហាខាងលើនេះ ក្រុមហ៊ុន Huawei បាននិយាយកាលពីដើមខែធ្នូនេះថា វាជារឿងមួយដែលមិនយុត្តិធម៌ និងមិនតម្លាភាពសោះ ព្រោះការចោទប្រកាន់របស់អាមេរិកគឺគ្មានភស្ដុតាងច្បាស់លាស់ ផ្ទុយទៅវិញគឺបានបង្កចលា ចលដល់សង្គមជាតិថែមទៀតផង ៕
-
ទីក្រុងបាងកក របស់ប្រទេសថៃ ប្រកាសលុបចោលការអបអរពិធីឆ្លងឆ្នាំវិញ បន្ទាប់ពីផ្ទុះករណីឆ្លង Covid-19 ក្នុងសហគមន៍
ថៃ៖ រដ្ឋបាលទីក្រុងបាងកក BMA ប្រកាសថា រាល់ព្រឹត្តិការណ៍រាប់ថយក្រោយនៃពិធីឆ្លងឆ្នាំថ្មីត្រូវបានលុបចោលវិញ បន្ទាប់ពីករណីថ្មីនៃជំងឺ Covid-19 ត្រូវបានរកឃើញនៅក្នុងទីក្រុងបាងកក និងខេត្តជុំវិញនោះ នេះបើតាមសារព័ត៌មាន The Thaiger នៅថ្ងៃទី២១ ខែធ្នូ ឆ្នាំ២០២០ ។ រដ្ឋបាលទីក្រុងបាងកក BMA ក៏ស្នើសុំឲ្យកម្មករនៅក្នុងទីក្រុងបាងកក ធ្វើការពីផ្ទះផងដែរក្នុងរយៈពេល១៤ថ្ងៃខាងមុខនេះ ។ រហូតមកទល់ពេលនេះ អាជ្ញាធរសុខាភិបាលកំពុងធ្វើការតាមដានយ៉ាងសកម្មនៅតាមការដ្ឋានសំណង់ ភោជនីយដ្ឋាន និងផ្សារចំនួន៤៧២នៅជុំវិញខេត្ត សាមុត សាខន និងទីក្រុងបាងកក ។ វិធានការនេះបានកើតមានឡើងក្រោយរកឃើញករណីឆ្លងជំងឺ Covid-19 ចំនួន៦៨៩ករណីក្នុងរយៈពេល២៤ម៉ោងចុងក្រោយ ដែលភាគច្រើនទាក់ទងទៅនឹងកម្មករចំណាកស្រុកនៅក្នុងឧស្សាហកម្មនេសាទតាមឆ្នេរសមុទ្រ និងផ្សារក្នុងខេត្តរបស់ថៃមួយនេះ ។ ទន្ទឹមគ្នា នាយកដ្ឋានប្រយុទ្ធនឹងជំងឺថៃបាននិយាយថា បច្ចុបន្នពួកគេកំពុងតាមរកមនុស្សជាង១ម៉ឺននាក់ ដែលអាចមានទំនាក់ទំនងជាមួយពលករចំណាកស្រុកដែលបានឆ្លង Covid-19 ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៧៧លាននាក់ ក្នុងនោះស្លាប់ជិត១លាន៧០ម៉ឺននាក់ និងជាសះស្បើយជាង៥៤លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៧៧លាន១៦ម៉ឺន៦ពាន់៧៧៤ករណី ក្នុងនោះមានអ្នកជម្ងឺសរុបចំនួន១លាន៦៩ម៉ឺន៩ពាន់៤៩៧នាក់ស្លាប់ និង ជាសះស្បើយឡើងវិញសរុបចំនួន៥៤លាន៨ម៉ឺន៥ពាន់៨១៩នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២១ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៨លាន២៦ម៉ឺន៧ពាន់៥៧៩នាក់ ស្លាប់ចំនួន៣២ម៉ឺន៤ពាន់៨៦៩នាក់ និងជាសះស្បើយចំនួន១០លាន៦២ម៉ឺន២ពាន់៨២នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៥ម៉ឺន៦ពាន់២៤៨នាក់ ស្លាប់ចំនួន១៤ម៉ឺន៥ពាន់៨៤៣នាក់ និងជាសះស្បើយ៩លាន៦០ម៉ឺន៥ពាន់៣៩០នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន២៣ម៉ឺន៨ពាន់៦០០នាក់ ស្លាប់១៨ម៉ឺន៦ពាន់៧៧៣នាក់ និងជាសះស្បើយ៦លាន២៤ម៉ឺន៥ពាន់៨០១នាក់ ៕
-
អនុប្រធានាធិបតីអាមេរិក និងភរិយាទទួលការចាក់វ៉ាក់សាំង Covid-19 ដោយផ្សាយបន្តផ្ទាល់នៅលើកញ្ចក់ទូរទស្សន៍ ដើម្បីកសាងទំនុកចិត្តដល់ប្រជាជន
អាមេរិក៖ អនុប្រធានាធិបតីអាមេរិកលោក ម៉ៃ ភែន និងភរិយារបស់លោក គឺលោកស្រី Pence Karen និងវេជ្ជបណ្ឌិតឯកទេសវះកាត់ទូទៅ លោក Jerome Adams បានទទួលការចាក់វ៉ាក់សាំង COVID-19 ដោយផ្សាយបន្តផ្ទាល់នៅលើកញ្ចក់ទូរទស្សន៍ ដើម្បីធានាដល់ប្រជាពលរដ្ឋអាមេរិកថា វ៉ាក់សាំងគឺមានសុវត្ថិភាព នេះបើតាមសារព័ត៌មាន CNA នៅថ្ងៃទី១៩ ខែធ្នូ ឆ្នាំ២០២០ ។ ក្រោយទទួលការចាក់វ៉ាក់សាំងរួចរាល់នៅឯសេតវិមាន លោក ម៉ៃ ភែន បាននិយាយទៅកាន់អ្នកសារព័ត៌មានថា ការបង្កើនទំនុកចិត្តលើវ៉ាក់សាំង វាជាអ្វីដែលនាំយើងមកទីនេះ… ខ្ញុំមិនមានអារម្មណ៍អ្វីប្លែកទេ និងថា ពលរដ្ឋអាមេរិកអាចជឿជាក់បានថា យើងកំពុងមានវ៉ាក់សាំងមួយដែលមានសុវត្ថិភាព ហើយប្រហែលជាប៉ុន្មានម៉ោងទៀតនឹងមានមួយទៀត ។ តាមរយៈការចាក់វ៉ាក់សាំងនេះដែរ អនុប្រធានាធិបតីអាមេរិករូបនេះ បានក្លាយជាមេដឹកនាំពិភពលោក លំដាប់ខ្ពស់បំផុត ដែលទទួលការចាក់វ៉ាក់សាំង COVID-19 មុនគេ នៅថ្ងៃសុក្រនេះ ខណៈដែលប្រធានាធិបតីអាមេរិកជិតផុតអាណត្តិ លោក ដូណាល់ ត្រាំ និងក្រុមគ្រួសាររបស់លោក ហាក់មិនទាន់បង្ហាញពីចេតនាទទួលចាក់វ៉ាក់សាំងនៅឡើយទេ ៕
-
ទីភ្នាក់ងារចំណីអាហារ និងឱសថអាមេរិក FDA សម្រេចអនុម័តអោយប្រើវ៉ាក់សាំង Covid-19 របស់ក្រុមហ៊ុន Moderna ក្នុងករណីបន្ទាន់
អាមេរិក៖ ទីបំផុតទីភ្នាក់ងារចំណីអាហារ និងឱសថអាមេរិក FDA នៅថ្ងៃសុក្រនេះ (ម៉ោងក្នុងតំបន់) បានអនុញ្ញាតអោយប្រើវ៉ាក់សាំង Covid-19 របស់ក្រុមហ៊ុនផលិតឱសថ Moderna ក្នុងករណីបន្ទាន់នៅសហរដ្ឋអាមេរិកហើយ នេះបើតាមសារព័ត៌មានស៊ីនហួរនៅថ្ងៃទី១៩ ខែធ្នូ ឆ្នាំ២០២០ ។ ស្របពេលជាមួយគ្នានោះដែរ តាមរយៈបណ្តាញសង្គម Twitter ប្រធានាធិបតីអាមេរិកជិតផុតអាណត្តិ លោក ដូណាល់ ត្រាំ បានសរសេរសារបង្ហោះថា សូមអបអរសាទរ… បច្ចុប្បន្នវ៉ាក់សាំង Covid-19 ក្រុមហ៊ុន Moderna ត្រូវបានអនុញ្ញាតឱ្យប្រើប្រាស់នៅក្នុងករណីបន្ទាន់ហើយ ។ ប្រភពបានអោយដឹងថា សហរដ្ឋអាមេរិកបានបញ្ជាទិញវ៉ាក់សាំង២០០លានដូសពីក្រុមហ៊ុន Moderna ដែលគ្រប់គ្រាន់ចាក់ជូនប្រជាជនអាមេរិក១០០លាននាក់ក្នុងដំណាក់កាលដំបូង ។ បើតាមការគ្រោងទុកនោះ ក្រុមហ៊ុនផលិតឱសថអាមេរិកនេះ នឹងជញ្ជូនវ៉ាក់សាំង២០លានដូសចែកចាយទូទាំងប្រទេសនៅក្នុងខែធ្នូនេះ និង៨០លានដូសនៅក្នុងត្រីមាសទី១ ឆ្នាំ២០២១ ហើយនៅសល់១០០លានដូសទៀតសម្រាប់ត្រីមាសទី២ ឆ្នាំ២០២១ ៕
-
កាណាដារំពឹងថា នឹងទទួលបានវ៉ាក់សាំង Covid-19 របស់ក្រុមហ៊ុន Pfizer ចំនួន៥០ម៉ឺនដូសនៅដើមឆ្នាំក្រោយ ដើម្បីចាក់ជូនប្រជាជនរបស់ខ្លួន
កាណាដា៖ នាយករដ្ឋមន្រ្តីកាណាដា លោក ចាស្ទីន ទ្រូដូ អះអាងថា ប្រទេសរបស់លោកនឹងទទួលបានវ៉ាក់សាំង COVID-19 ពីក្រុមហ៊ុនឱសថអាមេរិក Pfizer ចំនួន៥០ម៉ឺនដូសនៅខែមករា ឆ្នាំ២០២១ខាងមុខ នេះបើតាមសារព័ត៌មាន AP នៅថ្ងៃទី១៩ ខែធ្នូ ឆ្នាំ២០២០ ។ ស្របពេលជាមួយគ្នានោះដែរ នាយករដ្ឋមន្រ្តីកាណាដារូបនេះបានសង្កត់ធ្ងន់ថា ប្រទេសរបស់លោកនឹងទទួលបានវ៉ាក់សាំងនេះចំនួន១២ម៉ឺន៥ពាន់ដូសនៅសប្តាហ៍ក្រោយនេះ និង ២៥ម៉ឺន៥ពាន់ដូសទៀតក្នុងខែធ្នូនេះ ហើយលោកក៏រំពឹងផងដែរថា នឹងទទួលបានវ៉ាក់សាំងពីក្រុមហ៊ុនផលិតឱសថអាមេរិក Moderna ចំនួន ១៦ម៉ឺន៨ពាន់ដូសទៀតនៅមុនដំណាច់ខែធ្នូនេះផងដែរ ។ យ៉ាងណាមិញ រដ្ឋមន្ត្រីសេវាសាធារណៈ និងផ្គត់ផ្គង់កាណាដា លោកស្រី អានីតា អាណាន បានអះអាងថា ប្រទេសរបស់លោកស្រីនឹងមិនមានវ៉ាក់សាំង COVID-19គ្រប់គ្រាន់ឡើយ សម្រាប់អ្នកទាំងឡាយណា ដែលមានបំណងចង់ចាក់វ៉ាក់សាំង រហូតទាល់តែដល់ចុងខែកញ្ញា ឆ្នាំ២០២១ខាងមុខនេះ ៕
-
បុគ្គលិកថែទាំសុខភាពម៉ាឡេស៊ីជិត១.៨០០នាក់ធ្វើតេស្តវិជ្ជមាន Covid-19 ខណៈនៅទូទាំងប្រទេសនេះមានអ្នកឆ្លងវីរុសសរុបជាង៩ម៉ឺនករណី
ម៉ាឡេស៊ី៖ ករណីឆ្លង Covid-19 សរុបចំនួន១.៧៧១ករណីត្រូវបានកត់ត្រាក្នុងចំណោមបុគ្គលិកសុខាភិបាលម៉ាឡេស៊ី ក្នុងនោះមាន១.៣៥៩ករណីត្រូវបានរកឃើញក្នុងរលកទី៣ នៃការឆ្លងរាតត្បាតនៃវីរុសដ៏កាចសាហាវមួយនេះ នេះបើតាមក្រសួងសុខាភិបាលម៉ាឡេស៊ី ដកស្រង់ចុះផ្សាយដោយសារព័ត៌មានរ៉យទ័រនៅថ្ងៃទី១៩ ខែធ្នូ ឆ្នាំ២០២០ ។ អគ្គនាយកសុខាភិបាលម៉ាឡេស៊ីលោកវេជ្ជបណ្ឌិត ណ័រ ហ៊ីហ្សាម អាប់ឌុលឡា បញ្ជាក់ថា ក្នុងចំណោមអ្នកដែលឆ្លងជំងឺទាំងនោះ គឺគិលានុបដ្ឋាយិកាមានករណីច្រើនធំជាងគេ ដោយមាន៦៩០ករណីត្រូវបានកត់ត្រា ។ លោកវេជ្ជបណ្ឌិតបន្ថែមទៀតថា ករណីផ្សេងទៀតរួមមានមន្រ្តីពេទ្យ ជំនួយការថែរក្សាសុខភាព ជំនួយការមន្ត្រីពេទ្យ និងមន្រ្តីពេទ្យបញ្ចប់ការសិក្សា ។ សូមជម្រាបថា គិតត្រឹមថ្ងៃទី១៩ ខែធ្នូនេះ នៅទូទាំងប្រទេសម៉ាឡេស៊ីមានអ្នកឆ្លង Covid-19 សរុប៩ម៉ឺន៨១៦ករណី ក្នុងនោះមានអ្នកស្លាប់៤៣២នាក់ និងជាសះស្បើយឡើងវិញ៧ម៉ឺន៥ពាន់២៤៤នាក់ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៧៦លាននាក់ ក្នុងនោះស្លាប់ជាង១លាន៦៨ម៉ឺននាក់ និងជាសះស្បើយជាង៥៣លាន២៨ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៧៦លាន១ម៉ឺន៣ពាន់៤៣៧ករណី ក្នុងនោះមានអ្នកជម្ងឺសរុបចំនួន១លាន៦៨ម៉ឺន១ពាន់២៥៣នាក់ស្លាប់ និង ជាសះស្បើយឡើងវិញសរុបចំនួន៥៣លាន២៨ម៉ឺន២ពាន់១៥២នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៩ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៧លាន៨៨ម៉ឺន៨ពាន់៣៥៣នាក់ ស្លាប់ចំនួន៣២ម៉ឺន៨៤៥នាក់ និងជាសះស្បើយចំនួន១០លាន៣៩ម៉ឺន៤ពាន់២៨៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១០លាន៤ពាន់៨២៥នាក់ ស្លាប់ចំនួន១៤ម៉ឺន៥ពាន់១៧១នាក់ និងជាសះស្បើយ៩លាន៥៥ម៉ឺន៧១២នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន១៦ម៉ឺន៣ពាន់៩១២នាក់ ស្លាប់១៨ម៉ឺន៥ពាន់៦៨៧នាក់ និងជាសះស្បើយ៦លាន១៩ម៉ឺន៨ពាន់១៨៥នាក់ ៕
-
ការិយាល័យសិទ្ធមនុស្ស UNជំរុញថៃ ឲ្យកែប្រែច្បាប់ប្រមាថស្តេច ដោយថាបំពានសេរីភាពបញ្ចេញមតិ
ការិយាល័យសិទ្ធិមនុស្សរបស់អង្គការសហប្រជាជាតិ (UN) កាលពីថ្ងៃទី១៨ ធ្នូ ម្សិលមិញ បានអំពាវនាវដល់ប្រទេសថៃធ្វើវិសោធនកម្មលើច្បាប់ប្រមាថព្រះមហាក្សត្រថៃ ដោយការិយាល័យមួយនេះអះអាងថា ច្បាប់នេះ កន្លងមក ត្រូវបានប្រើប្រាស់មកលើសកម្មជនយ៉ាងតិច៣៥នាក់ ក្នុងនោះ ក៏មានកុមារវ័យ១៦ឆ្នាំម្នាក់ដែរ នាប៉ុន្មានសប្តាហ៍មកនេះ។ ការិយាល័យនេះថា ប្រទេសថៃគួរឈប់ប្រើប្រាស់ច្បាប់ ដែលចែងការហាមមិនឲ្យប្រមាថដល់ស្តេច ព្រមទាំង ឈប់ប្រើប្រាស់ការចោទប្រកាន់បទឧក្រិដ្ឋធ្ងន់ធ្ងរផ្សេងៗទៀត លើក្រុមបាតុករ ដោយនិយាយថា ការធ្វើបែបនេះគឺជាការបំពានដល់សេរីភាពនៃការបញ្ចេញមតិ។ ការអំពាវនាវរបស់ក្រុមការិយាល័យសិទ្ធិមនុស្សរបស់អង្គការសហប្រជាជាតិនេះធ្វើឡើង ក្រោយពេលក្រុមបាតុករថៃ ភាគច្រើនជាយុវជន បានទាមទារឲ្យលុបចោលមាត្រា១១២ ករណីកាត់ទោសពីបទប្រមាថអង្គព្រះមហាក្សត្រ ហើយ កន្លងមក ក៏មានការទាមទារ ឲ្យមានការធ្វើវិសោធនកម្មរដ្ឋធម្មនុញ្ញកាត់បន្ថយអំណាចរបស់ព្រះមហាក្សត្រ និងឲ្យលោក ប្រាយុទ្ធ ចាន់អូចា ចុះចេញពីតំណែងនាយករដ្ឋមន្ត្រីទៀតផង៕ ប្រភពពី CNA
-
កូវី១៩៖ អនុប្រធានាធិបតីអាមេរិក Mike Pence បានចាក់វ៉ាក់សាំងហើយ
អនុប្រធានាធិបតីអាមេរិក លោក Mike Pence ត្រូវបានគេចាក់សាំងប្រឆាំងជំងឺកូវីដ១៩ ដោយមានការផ្សាយផ្ទាល់ តាមទូរទស្សន៍ កាលពីថ្ងៃសុក្រ ទី ១៨ ធ្នូ ម្សិលមិញ ជាការផ្សាយផ្ទាល់ដើម្បីធានាជូនពលរដ្ឋអាមេរិកថា វ៉ាក់សាំងនេះគឺសុវត្ថិភាព។ លោក Mike Pence បាននិយាយ នៅក្រោយចាក់វ៉ាក់សាំងថា «ការកសាងជំនឿចិត្តលើវ៉ាក់សាំងនេះគឺជាអ្វីដែលនាំមកសម្រាប់ពួកយើង ទៅនេះ ព្រឹកនេះ» លោកបន្តដោយលេងសើចថា «ខ្ញុំគ្មានអារម្មណ៍មិនស្រូលអ្វីទេ»។ ក្រៅពីលោក ក៏មានមន្ត្រីសំខាន់ៗផ្សេងទៀតរបស់អាមេរិកបានចាក់វ៉ាក់សាំង fizer-BioNTech នេះដែរ ខណៈដែលយុទ្ធនាការចាក់វ៉ាក់សាំងនៅអាមេរិកបាននិងកំពុងបន្តធ្វើ ហើយវ៉ាក់សាំងមួយទៀតរបស់ក្រុមហ៊ុន Moderna ក៏នឹងមានជូនពលរដ្ឋឆាប់ៗដែរ។ ការចាក់វ៉ាក់សាំងនៅអាមេរិកមានរយៈពេល១សប្តាហ៍ហើយ ខណៈដែល៧ថ្ងៃមកនេះដែរ វីរុសកូវីដ១៩បានសម្លាប់ពលរដ្ឋអាមេរិកជាង៣០ម៉ឺននាក់៕ ប្រភពពី CNA