-
នាយករដ្ឋមន្រ្តីអេស្ប៉ាញត្រូវធ្វើចត្តាឡីស័ក ក្រោយជួបជាមួយប្រធានាធិបតីបារាំងដែលទើបធ្វើតេស្តរកឃើញវិជ្ជមាន Covid-19
អេស្ប៉ាញ៖ នាយករដ្ឋមន្រ្តីអេស្ប៉ាញលោក Pedro Sanchez បាននិងកំពុងធ្វើចត្តាឡីស័ក ឬដាក់ខ្លួននៅដាច់ដោយឡែកពីគេ រហូតដល់ថ្ងៃទី២៤ ខែធ្នូខាងមុខ បន្ទាប់ពីប្រធានាធិបតីបារាំងលោក អ៊ែមម៉ានុយអ៊ែល ម៉ាក្រុង ជាអ្នកដែលលោកបានជួបជាមួយនៅថ្ងៃចន្ទដើមសប្តាហ៍នេះ ត្រូវបានធ្វើតេស្តវិជ្ជមាន Covid-19 នេះបើតាមសេចក្តីថ្លែងការណ៍របស់របស់នាយករដ្ឋមន្រ្តីអេស្ប៉ាញ ដកស្រង់ចុះផ្សាយដោយសារព័ត៌មានស៊ីនហួរនៅថ្ងៃទី១៨ ខែធ្នូ ឆ្នាំ២០២០ ។ សេចក្តីថ្លែងការណ៍ដដែលនេះបានអោយដឹងទៀតថា គាត់ (លោក Pedro Sanchez) នឹងត្រូវផ្អាករាល់សកម្មភាពរបស់លោក ដែលបានគ្រោងទុកសម្រាប់ថ្ងៃខាងមុខ ស្របតាមពិធីសារអនាម័យ ។ បន្ថែមលើនេះ លោកនាយករដ្ឋមន្រ្តីក៏នឹងត្រូវបន្តស្ថិតក្រោមការធ្វើតេស្ត ដើម្បីតាមតានពីស្ថានភាពរបស់គាត់ ហើយបន្ទាប់មកគឺអាស្រ័យលើលទ្ធផល ដើម្បីសម្រេចលើរបៀបវារៈរបស់គាត់សម្រាប់ថ្ងៃខាងមុខទៀត ។ សូមជម្រាបថា នេះមិនមែនជាលើកទី១ទេ ដែលលោក Pedro Sanchez ត្រូវបានបង្ខំចិត្តធ្វើចត្តាឡីស័កដោយខ្លួនលោកផ្ទាល់ ដោយសារតែកន្លងមក រឿងបែបនេះក៏ធ្លាប់កើតឡើងម្តងរួចមកហើយ បន្ទាប់ពីភរិយារបស់លោក គឺលោកស្រី Begona Gomez ត្រូវបានធ្វើតេស្តវិជ្ជមាន Covid-19 កាលពីខែមិនា ឆ្នាំ២០២០ ៕
-
សហភាពអឺរ៉ុបនឹងចាប់ផ្តើមចាក់វ៉ាក់សាំង Covid-19 ដល់ប្រជាជនរបស់ខ្លួននៅចុងខែធ្នូ ឆ្នាំ២០២០នេះ
អាល្លឺម៉ង់៖ ប្រជាជនបណ្តាប្រទេសជាសមាជិកសហភាពអឺរ៉ុប នឹងចាប់ផ្តើមទទួលបានការចាក់វ៉ាក់សាំង COVID-19 ក្នុងរយៈពេល១០ថ្ងៃទៀតនេះ ស្របពេលប្លុកមួយនេះ កំពុងព្យាយាមដេញតាមចក្រភពអង់គ្លេស និងសហរដ្ឋអាមេរិក បន្ទាប់ពីអ្នកខ្លះបានរិះគន់ថា ដំណើរការនៃការអនុម័តវ៉ាក់សាំងរបស់អឺរ៉ុប គឺមានការយឺតយ៉ាងខ្លាំង នេះបើតាមសារព័ត៌មានរ៉យទ័រនៅថ្ងៃទី១៨ ខែធ្នូ ឆ្នាំ២០២០ ។ រដ្ឋមន្ត្រីសុខាភិបាលអាល្លឺម៉លោក Jens Spahn បានថ្លែងនៅមុនពេលកិច្ចប្រជុំតាមប្រព័ន្ធ Online ជាមួយអធិការបតីអាល្លឺម៉ង់លោកស្រី Angela Merkel និងនាយកប្រតិបត្តិពីក្រុមហ៊ុនផលិតវ៉ាក់សាំង BioNTech នៅថ្ងៃព្រហស្បតិ៍នេះថា អាល្លឺម៉ង់នឹងចាប់ផ្តើមចាក់វ៉ាក់សាំងនៅថ្ងៃទី២៧ ខែធ្នូនេះ បើសិន មានការយល់ព្រម តាមការគ្រោងទុក ខណៈបណ្តាប្រទេសអឺរ៉ុបផ្សេងទៀតក៏ចង់ចាប់ផ្តើមនៅថ្ងៃដូចគ្នានេះដែរ ។ ក្នុងនាមជាសមាជិកសហភាពអឺរ៉ុប អាល្លឺម៉ង់ត្រូវមានកាតព្វកិច្ចរង់ចាំទីភ្នាក់ងារឱសថអឺរ៉ុប EMA អនុម័តជាមុនសិន ដើម្បីអាចឲ្យប្រជាជនខ្លួនទទួលចាក់វ៉ាក់សាំងបាន ស្របពេលដែលគេរំពឹងថា ទីភ្នាក់ងារ EMA នឹងធ្វើការប្រកាសនៅថ្ងៃទី២១ ខែធ្នូខាងមុខនេះ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៧៥លាននាក់ ក្នុងនោះស្លាប់ជាង១លាន៦៦ម៉ឺននាក់ និងជាសះស្បើយជាង៥២លាន៨៣ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៧៥លាន២៥ម៉ឺន៥ពាន់៥៥៧ករណី ក្នុងនោះមានអ្នកជម្ងឺសរុបចំនួន១លាន៦៦ម៉ឺន៧ពាន់៣៧១នាក់ស្លាប់ និង ជាសះស្បើយឡើងវិញសរុបចំនួន៥២លាន៨៣ម៉ឺន៦ពាន់៥២៦នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៨ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៧លាន៦២ម៉ឺន៥ពាន់២៩៧នាក់ ស្លាប់ចំនួន៣១ម៉ឺន៧ពាន់៩០៧នាក់ និងជាសះស្បើយចំនួន១០លាន២៩ម៉ឺន១ពាន់៥៧នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៩៧ម៉ឺន៧ពាន់៨៣៤នាក់ ស្លាប់ចំនួន១៤ម៉ឺន៤ពាន់៨២៩នាក់ និងជាសះស្បើយ៩លាន៥២ម៉ឺន៤៤នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៧លាន១១ម៉ឺន១ពាន់៥២៧នាក់ ស្លាប់១៨ម៉ឺន៤ពាន់៨៧៦នាក់ និងជាសះស្បើយ៦លាន១៧ម៉ឺន៧ពាន់៧០២នាក់ ៕
-
កូវីដ១៩៖ ថៃសម្រេចបន្ធូរការរឹតត្បិត ទេសចរមកពី៥៦ប្រទេស ដើម្បីស្តារទេសចរណ៍វិញ
ប្រទេសថៃ នាថ្ងៃព្រហស្បតិ៍ ទី១៧ ធ្នូ ២០២០នេះ បានសម្រេចបន្ធូរបន្ថយការរឹតត្បិតទេសចរ មកពី៥៦ប្រទេស ក្នុងគោលបំណងស្តារឧស្សាហកម្មទេសចរណ៍ជាតិដែលរងការប៉ះពាល់ពីវិបត្តិជំងឺកូវីដ១៩ឡើងវិញ តែភ្ញៀវទេសចរទាំងនោះនឹងត្រូវតម្រូវឲ្យធ្វើចត្តាឡីស័ក នៅសណ្ឋាគារ ២សប្តាហ៍ដោយ។ អ្នកនាំពាក្យរដ្ឋបាលគ្រប់គ្រងជំងឺកូវីដ១៩ លោក Taweesin Wisanuyothin បានឲ្យដឹងថា ទេសចរមកពីប្រទេសទាំង៥៦ រួមមានទាំងអូស្ត្រាលី បារាំង និងអាមេរិក ផងដែរនោះអាចធ្វើដំណើរចូលមកប្រទេសថៃ ដោយមិនចាំបាច់មានទិដ្ឋាការ ប៉ុន្តែត្រូវការលិខិតបញ្ជាក់ថា គ្មានកូវីដ១៩ ៧២ម៉ោង មុនពេលចេញដំណើរ និង ត្រូវទៅធ្វើចត្តាឡីស័កនៅសណ្ឋាគារណាមួយ។ លោក Taweesin Wisanuyothin បន្ថែមទៀតថា ទេសចរទាំងនោះ ត្រូវធ្វើចត្តាឡីស័ក ២សប្តាហ៍ ក្រោយពេលមកដល់ ហើយទិដ្ឋាការធម្មតា៣០ថ្ងៃនឹងត្រូវពន្យាពេលបន្ថែម ដល់៤៥ថ្ងៃ៕
-
ថ្ងៃនេះ! ថៃមានឆ្លងកូវីដ១៩ ចំនួន២០នាក់ថ្មីទៀត កើនដល់៤២៨១នាក់
ប្រទេសថៃមានករណីឆ្លងជំងឺកូវីដ១៩ ចំនួន២០ករណីថ្មីទៀត នាថ្ងៃព្រហស្បតិ៍ ទី១៧ ធ្នូ ២០២០នេះ សុទ្ធតែជាករណីរកឃើញ ក្រោយការធ្វើចត្តាឡីស័ករបស់ក្រុមអ្នកដំណើរពីក្រៅប្រទេស មានដូចជា ឥណ្ឌា អង់គ្លេស ស្វីស ស៊ុយអ៊ែត បារាំង អាល្លឺម៉ង់ គុយវ៉ែត ប៉ាគីស្ថាន អេមីរ៉ាត់ អារ៉ាប់រួម និងសហរដ្ឋអាមេរិក។ ពួកគេមកពី១០ប្រទេស ហើយចំនួនឆ្លងថ្មីនេះបានធ្វើឲ្យចំនួនឆ្លងសរុបនៅប្រទេសថៃកើនដល់៤២៨១នាក់ហើយ៕ ប្រភពពីបាងកកប៉ុស្តិ៍
-
ទីបំផុត! វៀតណាមចាក់វ៉ាក់សាំងកូវីដ១៩ ផលិតខ្លួនឯង លើមនុស្សហើយ ព្រឹកមិញ
វៀតណាមចាប់ផ្តើមចាក់វ៉ាក់សាំងប្រឆាំងកូវីដ១៩ ដែលខ្លួនផលិតទៅលើក្រុមអ្នកស្ម័គ្រចិត្តហើយ នាព្រឹកថ្ងៃព្រហស្បតិ៍ ទី១៧ ធ្នូ ២០២០ ជាវ៉ាក់សាំង Nanocovax ផលិតក្នុងប្រទេសវៀតណាម នេះបើតាមការចេញផ្សាយរបស់ទីភ្នាក់ងារសារព័ត៌មាន VN Express។ ប្រភពថា បុរស២នាក់ និងស្ត្រីម្នាក់ ក្នុងវ័យប្រមាណជាង២០ឆ្នាំ ដែលមិនត្រូវបានបង្ហាញអត្តសញ្ញាណ ត្រូវបានចាក់វ៉ាក់សាំងនេះ កាលពីវេលាម៉ោង៨ព្រឹកថ្ងៃទី ១៧ ខែ ធ្នូ ២០២០ នៅសកលវិទ្យាល័យវេជ្ជសាស្ត្រយោធា ក្នុងទីក្រុងហាណូយ។ អ្នកស្ម័គ្រចិត្តទាំង៣នាក់នេះមានស្ថានភាពសុខភាពធម្មតា ក្រោយចាក់វ៉ាក់សាំងបាន២ម៉ោង ប៉ុន្តែត្រូវត្រួតពិនិត្យតាមដាន រយៈពេល៧២ម៉ោង។ អ្នកទាំងបីនាក់ស្ថិតក្នុងចំណោមអ្នកស្ម័គ្រចិត្តច្រើនជាង២០០នាក់ ដែលបានចុះឈ្មោះស្ម័គ្រចិត្តទទួលយកការចាក់វ៉ាក់សាំងមកក្នុងខ្លួន ដោយវ៉ាក់សាំងនេះផលិតដោយវិទ្យាស្ថាន Nanogen Pharmaceutical Biotechnology JSC ៕
-
វៀតណាមចាប់ផ្តើមការធ្វើតេស្តចាក់វ៉ាក់សាំង Covid-19 ដែលផលិតក្នុងស្រុកទៅលើមនុស្ស
វៀតណាម៖ ប្រទេសវៀតណាម នៅថ្ងៃព្រហស្បតិ៍នេះ បានចាប់ផ្តើមការសាកល្បងចាក់វ៉ាក់សាំងការពារជំងឺ Covid-19 ដែលមានឈ្មោះថា Nanocovax ផលិតដោយក្រុមហ៊ុនវៀតណាមផ្ទាល់ ទៅលើមនុស្សចំនួន០៣នាក់ នេះបើតាមសារព័ត៌មាន VNExpress នៅថ្ងៃទី១៧ ខែធ្នូ ឆ្នាំ២០២០ ។ បុរស០២នាក់ និងស្ត្រីម្នាក់ត្រូវបានចាក់វ៉ាក់សាំងនៅដំណាក់កាលទី១នេះ នៅម៉ោង០៨ព្រឹកថ្ងៃព្រហស្បតិ៍នេះ នៅឯសកលវិទ្យាល័យពេទ្យយោធាវៀតណាមក្នុងទីក្រុងហាណូយ ដោយពួកគេមានសុខភាពនឹងនរទេ បន្ទាប់ពីការចាក់វ៉ាក់សាំងបានពីរម៉ោង ហើយពួកគេនឹងត្រូវបានអ្នកជំនាញការតាមដានសុខភាពពេញ៧២ម៉ោង ។ អ្នកទាំង៣នេះ ត្រូវបានជ្រើសចេញពីអ្នកស្ម័គ្រចិត្តជាង២០០នាក់ ដែលបានចុះឈ្មោះសុំចូលចាក់សាកល្បងវ៉ាក់សាំងផលិតដោយក្រុមហ៊ុន Nanogen Pharmaceutical Biotechnology JSC សហការជាមួយបណ្ឌិតសភាវេជ្ជសាស្ត្រយោធាវៀតណាម ។ សូមជម្រាបថា ការចាក់សាកល្បងនៅថ្ងៃព្រហស្បតិ៍នេះ ជាផ្នែកនៃការធ្វើតេស្តវ៉ាក់សាំង Nanocovax ដំណាក់កាលទី១នៅវៀតណាម ដោយការសាកល្បងពិសោធន៍លើមនុស្ស ដើម្បីអោយដឹងពីប្រសិទ្ធភាព និងសុវត្ថិភាពថ្នាំ គឺវាទាមទារ០៣ដំណាក់កាល ។ មនុស្ស៥៧នាក់ទៀតក្នុងចំណោម៦០នាក់ដែលត្រូវបានជ្រើសរើសសំរាប់ការសាកល្បងដំណាក់កាលដំបូងនេះ នឹងត្រូវទទួលវ៉ាក់សាំងនៅ០៣ថ្ងៃបន្ទាប់ទៀត ៕
-
នាយករដ្ឋមន្រ្តីបារាំងបញ្ជាក់ថា ប្រជាជនបារាំងអាចនឹងចាក់វ៉ាក់សាំង Covid-19 របស់ក្រុមហ៊ុន Pfizer-BioNTech នៅចុងខែធ្នូ ឆ្នាំនេះ
បារាំង៖ នាយរដ្ឋមន្រ្តីបារាំង លោក ហ្សង់ កាស្តិច នៅថ្ងៃពុធនេះថ្លែងថា ប្រជាជនបារាំងអាចនឹងចាប់ផ្តើមយុទ្ធនាការចាក់វ៉ាក់សាំង COVID-19 របស់ក្រុមហ៊ុនផលិតឱសថ Pfizer-BioNTech នៅសប្តាហ៍ចុងក្រោយនៃខែធ្នូនេះ បើសិនអាជ្ញាធរសហភាពអឺរ៉ុបអនុម័តឲ្យប្រើប្រាស់វ៉ាក់សាំងនេះនាសប្តាហ៍ក្រោយ នេះបើតាមសារព័ត៌មានរ៉យទ័រនៅថ្ងៃទី១៧ ខែធ្នូ ឆ្នាំ២០២០ ។ នាយរដ្ឋមន្រ្តីបារាំងរូបនេះ ធ្លាប់បានប្រាប់ទៅកាន់សភាបារាំងថា យុទ្ធនាការចាក់វ៉ាក់សាំង COVID-19 នៅប្រទេសអឺរ៉ុបមួយនេះ នឹងចាប់ផ្ដើមនៅខែមករា ឆ្នាំ២០២១ខាងមុខ ដោយក្រុមមនុស្សចាស់ជរា និងក្រុមមនុស្សងាយរងគ្រោះដទៃទៀត នឹងទទួលបានការចាក់វ៉ាក់សាំងនេះមុនគេ ។ ប្រទេសបារាំងក៏សង្ឃឹមដែរថា នឹងចាប់ផ្ដើមយុទ្ធនាការចាក់វ៉ាក់សាំង COVID-19 ដល់ប្រជាជនរបស់ខ្លួនប្រមាណ១លាននាក់នៅតាមមជ្ឈមណ្ឌលថែទាំ ក្នុងអំឡុងខែមករា និងខែកុម្ភៈឆ្នាំក្រោយនេះ បន្ទាប់មកប្រជាជនប្រមាណ១៤ទៅ១៥លាននាក់ទៀត គឺនៅចន្លោះខែមីនា និងខែមិថុនា ឆ្នាំ២០២១ ៕
-
នូវែលហ្សេឡង់នឹងបញ្ជាទិញវ៉ាក់សាំង Covid-19 ពីក្រុមហ៊ុន AstraZeneca និង Novavax ដើម្បីចាក់ជូនដល់ប្រជាជនខ្លួនគ្រប់គ្នា
នូវែលហ្សេឡង់៖ នាយករដ្ឋមន្រ្តីនូវែលហ្សេឡង់លោកស្រី ចាស៊ីនដា អាឌើន នៅថ្ងៃព្រហស្បតិ៍នេះថ្លែងថា រដ្ឋាភិបាលរបស់លោកស្រីនឹងទិញវ៉ាក់សាំង Covid-19 ពីក្រុមហ៊ុនផលិតឱសថអង់គ្លេស AstraZeneca និងក្រុមហ៊ុនអាមេរិក Novavax ដែលនេះមានន័យថា រាល់ពលរដ្ឋនូវែលហ្សេឡង់នឹងអាចត្រូវបានចាក់វ៉ាក់សាំងគ្រប់គ្នា នេះបើតាមសារព័ត៌មានស៊ីនហួរនៅថ្ងៃទី១៧ ខែធ្នូ ឆ្នាំ២០២០ ។ លោកស្រីបន្ថែមថា ឥឡូវនេះ យើងមានកិច្ចព្រមព្រៀងជាផ្លូវការជាមួយក្រុមហ៊ុនចំនួន០៤ ដែលគ្របដណ្តប់លើបច្ចេកវិទ្យាវ៉ាក់សាំងចំនួន០៣ប្រភេទផ្សេងៗគ្នា ហើយយើងបានទទួលចំនួនវ៉ាក់សាំងគ្រប់គ្រាន់ សម្រាប់ចាក់ប្រជាជនទាំងមូលរបស់យើង និងនៅតំបន់ប៉ាស៊ីហ្វិក ។ លោកស្រីបញ្ជាក់ទៀតថា ប្រសិនបើត្រូវបានបង្ហាញថា មានសុវត្ថិភាព និងប្រសិទ្ធភាពដោយនិយតករឱសថរបស់នូវែលសេឡង់នោះ ពួកគេនឹងផ្តល់ការចាក់វ៉ាក់សាំងដល់ប្រជាជនក្នុងទ្រង់ទ្រាយធំ និងប្រទេសជិតខាងនៅតំបន់ប៉ាស៊ីហ្វិករបស់យើង ។ នាយករដ្ឋមន្រ្តីនូវែលហ្សេឡង់រូបនេះបានសង្កត់ធ្ងន់ថា អាទិភាពដំបូងរបស់យើងគឺការចាក់វ៉ាក់សាំងដល់កម្មករនៅតាមព្រំដែន និងបុគ្គលិកចាំបាច់ដែលមានហានិភ័យខ្ពស់ក្នុងការឆ្លង Covid-19 ។ យើងរំពឹងថា វ៉ាក់សាំងនឹងត្រូវបញ្ជូនទៅឲ្យបុគ្គលិកជួរមុខរបស់យើងនៅត្រីមាសទី២ ឆ្នាំ២០២១ ខណៈការចាក់វ៉ាក់សាំងចំពោះមនុស្សទូទៅនឹងចាប់ផ្តើមនៅឆមាសទី២ ឆ្នាំ២០២១ ផងដែរ ៕
-
ប្រធានាធិបតីជាប់ឆ្នោតសហរដ្ឋអាមេរិកនឹងចាក់វ៉ាក់សាំង Covid-19 នៅសប្តាហ៍ក្រោយនេះ ដើម្បីកសាងទំនុកចិត្តដល់ប្រជាជនរបស់ខ្លួន
អាមេរិក៖ ប្រធានាធិបតីជាប់ឆ្នោតអាមេរិកលោក ចូ បៃដិន នឹងចាក់វ៉ាក់សាំងការពារជំងឺ Covid-19 លើកដំបូងរបស់លោកនាសប្ដាហ៍ក្រោយនេះ ហើយគ្រោងនឹងបង្ហាញជាសាធារណៈតែម្តង ចំពេលដែលអាជ្ញាធរអាមេរិកកំពុងព្យាយាមកសាងទំនុកចិត្តសាធារណៈ សម្រាប់វិធានការដែលថា នឹងបញ្ឈប់វីរុសឆ្លងដ៏កាចសាហាវមួយនេះ នេះបើតាមសារព័ត៌មានរ៉យទ័រនៅថ្ងៃទី១៧ ខែធ្នូ ឆ្នាំ២០២០ ។ ថ្លែងនៅក្នុងវេទិការមួយនៅថ្ងៃពុធនេះ ក្នុងទីក្រុង វីលមីនតុន រដ្ឋ ដេឡាវែល លោក បៃដិន បាននិយាយដូច្នេះថា ខ្ញុំមិនចង់ចាក់វ៉ាក់សាំងមុនគេនោះទេ ប៉ុន្តែខ្ញុំចង់ធ្វើឲ្យប្រាកដថា យើងបង្ហាញដល់ប្រជាជនអាមេរិកថា វាមានសុវត្ថិភាពក្នុងការចាក់វ៉ាក់សាំង ហើយថា នៅពេលខ្ញុំធ្វើវា ខ្ញុំនឹងធ្វើជាសាធារណៈ ដូច្នេះអ្នកទាំងអស់គ្នាអាចធ្វើជាសាក្សីនៃការសំរេចបានរបស់ខ្ញុំ ។ សូមជម្រាបថា វ៉ាក់សាំងរបស់ក្រុមហ៊ុន Pfizer-BioNTech ត្រូវបានអនុញ្ញាតិដោយរដ្ឋបាលចំណីអាហារ និងឱសថអាមេរិក FDA សម្រាប់ប្រើជាបន្ទាន់កាលពីសប្តាហ៍មុន ខណៈ FDA ក៏កំពុងពិចារណាលើការអនុម័តឲ្យប្រើប្រាស់ជាបន្ទាន់សម្រាប់វ៉ាក់សាំងរបស់ក្រុមហ៊ុន Moderna នៅសប្តាហ៍នេះផងដែរ ៕