-
តុលាការកំពូលអាមេរិកច្រានចោលពាក្យបណ្តឹងរបស់រដ្ឋតិចសាស់ ដែលមានការគាំទ្រដោយផ្ទាល់ពីលោក ដូណាល់ ត្រាំ
អាមេរិក៖ សារព័ត៌មានរ៉យទ័រចុះផ្សាយនៅថ្ងៃទី១២ ខែធ្នូនេះថា តុលាការកំពូលអាមេរិក នៅថ្ងៃសុក្រនេះ បានទាត់ចោលពាក្យបណ្តឹងរបស់រដ្ឋតិចសាស់ ដែលមានការគាំទ្រដោយផ្ទាល់ពីលោក ដូណាល់ ត្រាំ អោយលុបចោលលទ្ធផលបោះឆ្នោតនៅក្នុងរដ្ឋចំនួន០៤ ។ ស្របពេលជាមួយគ្នានោះដែរ បើតាមសាលក្រមតុលាការ បណ្តឹងរបស់រដ្ឋតិចសាល់ ដើម្បីប្រឆាំងលទ្ធផលបោះឆ្នោតនៅក្នុងរដ្ឋ ចរជា, មីឈីហ្គែន, ភែនស៊ីលវេនៀ និង វីសខុនសិន គឺមិនមានជំហរផ្លូវច្បាប់នោះទេ ។ រដ្ឋទាំងធំៗទាំង០៤ នៅថ្ងៃព្រហស្បតិ៍នេះ ក៏បានដាក់ពាក្យបណ្តឹងទៅកាន់តុលា ការផងដែរ ដើម្បីស្នើសុំឲ្យតុលាការច្រានចោលពាក្យបណ្តឹង ដែលពួកគេចាត់ទុកថា ជារឿងមិនសមហេតុផល និងគ្មានមូលដ្ឋានផ្លូវច្បាប់ ។ បណ្តឹងខាងលើនេះដែរ គឺជាកិច្ចខិតខំប្រឹងប្រែងចុងក្រោយ ដើម្បីប្រឆាំងនឹងលទ្ធផលបោះឆ្នោតដោយក្រុមយុទ្ធនាការ និងក្រុមអ្នកគាំទ្រលោក ត្រាំ ដែលកន្លងមកបានទទួលបរាជ័យនៅក្នុងតុលាការជាច្រើនលើកមកហើយ ៕
-
អង្គការសុខភាពពិភពលោកកំពុងពិចារណាក្នុងការអនុញ្ញាតអោយប្រើវ៉ាក់សាំងរបស់ក្រុមហ៊ុន Pfizer, Moderna និង AstraZeneca ក្នុងករណីបន្ទាន់
ស្វីស៖ វ៉ាក់សាំងប្រឆាំងជំងឺ COVID-19 របស់ក្រុមហ៊ុនផលិតសថ ភីហ្វីហ្សឺ-បាយអូអិនធិច, ម៉ូឌែណ និងអាស្រ្តាហ្សេណេកា កំពុងស្ថិតក្នុងការពិចារណារបស់អង្គការសុខភាពពិភពលោក WHO ក្នុងពេលពីរទៅបីសប្តាហ៍ទៀត មុននឹងបើកភ្លើងខៀវអោយប្រើប្រាស់ក្នុងករណីបន្ទាន់ នេះបើតាមសារព័ត៌មាន AFP នៅថ្ងៃទី១២ ខែធ្នូ ឆ្នាំ២០២០ ។ ស្របពេលជាមួយគ្នានេះដែរ អង្គការសុខភាពពិភពលោក WHO បានបង្ហើបឲ្យដឹងថា បច្ចុប្បន្ននេះមានក្រុមហ៊ុនចំនួន១០ហើយបានចាប់អារម្មណ៍ដាក់ពាក្យមកកាន់អង្គការអន្តរជាតិនេះ ដើម្បីត្រួតពិនិត្យ និង ធ្វើការដាក់ចេញឲ្យប្រើប្រាស់វ៉ាក់សាំងរបស់ពួកគេនៅក្នុងករណីបន្ទាន់ ។ បើតាមអង្គការសុខភាពពិភពលោក WHO នោះ ខ្លួនអាចនឹងអនុម័តឲ្យវ៉ាក់សាំងទាំងបីខាងលើនេះ ប្រើប្រាស់នៅក្នុងប្រទេសមួយចំនួន បើទោះបីជានិយ័តករវេជ្ជសាស្ត្រនៅក្នុងប្រទេសទាំងនោះ មិនទាន់អាចពិនិត្យវ៉ាក់សាំងបានលម្អិតដោយខ្លួនឯងក៏ដោយ ៕
-
សហរដ្ឋអាមេរិកសម្រេចអនុញ្ញាតអោយប្រើប្រាស់វ៉ាក់សាំង Covid-19 របស់ក្រុមហ៊ុនផលិតឱសថ Pfizer-BioNTech
អាមេរិក៖ ទីបំផុតរដ្ឋបាលចំណីអាហារ និងឱសថអាមេរិក FDA បានអនុញ្ញាតិឲ្យវ៉ាក់សាំង Covid-19 របស់ក្រុមហ៊ុនផលិតឱសថអាមេរិក-អាល្លឺម៉ង់ Pfizer-BioNTech សម្រាប់ប្រើប្រាស់ជាបន្ទាន់នៅសហរដ្ឋអាមេរិក នេះបើតាមសារព័ត៌មានរ៉យទ័រនៅថ្ងៃទី១២ ខែធ្នូ ឆ្នាំ២០២០ ។ ទន្ទឹមគ្នា រដ្ឋបាលចំណីអាហារ និងឱសថអាមេរិក FDA នៅថ្ងៃសុក្រនេះប្រកាសថា ការប្រើប្រាស់ជាបន្ទាន់ត្រូវបានផ្តល់ជូនតាមអនុសាសន៍របស់គណៈកម្មាធិការប្រឹក្សាយោបល់អំពីវ៉ាក់សាំង និងផលិតផលជីវសាស្ត្រពាក់ព័ន្ធ ។ បើតាម FDA ការបញ្ជូនវ៉ាក់សាំង៣លានដូសដំបូង ទៅកាន់តំបន់ប្រឈមមុខខ្លាំងនៅទូទាំងសហរដ្ឋអាមេរិក នឹងត្រូវចាប់ផ្តើមធ្វើឡើងនៅសប្តាហ៍ក្រោយ ។ សូមជម្រាបថា ការអនុញ្ញាតខាងលើនេះ បានកើតមានឡើងក្រោយក្រុមទីប្រឹក្សាខាងក្រៅនៃរដ្ឋបាលចំណីអាហារ និងឱសថអាមេរិក FDA កាលពីល្ងាចថ្ងៃព្រហ ស្បតិ៍សប្តាហ៍នេះ បានបោះឆ្នោតគាំទ្រក្នុងសំឡេង១៧ទល់៤ ចំពោះវ៉ាក់សាំងនេះ ដោយសម្រេចថា គុណប្រយោជន៍របស់វាមានច្រើនជាងហានិភ័យសម្រាប់ការប្រើប្រាស់ដោយបុគ្គលដែលមានអាយុចាប់ពី១៦ឆ្នាំឡើងទៅ ៕
-
ក្រុមហ៊ុន Pfizer-BioNTech ច្រានចោលព័ត៌មានថា មានមនុស្ស០៦នាក់ស្លាប់ ដោយសារការធ្វើតេស្តវ៉ាក់សាំង Covid-19 របស់ខ្លួន
អាមេរិក៖ ក្រុមហ៊ុនផលិតឱសថ Pfizer-BioNTech បានចេញមុខច្រានចោល បន្ទាប់ពីព័ត៌មានដែលបន្តចែកចាយពាលពេញបណ្តាញទំនាក់ទំនងសង្គមថា មានមនុស្ស០៦នាក់បានស្លាប់ ដោយសារតែទទួលការធ្វើតេស្តវ៉ាក់សាំង COVID-19 របស់ខ្លួននៅដំណាក់កាលចុងក្រោយ នេះបើតាមសារព័ត៌មានរ៉យទ័រនៅយប់ថ្ងៃទី១១ ខែធ្នូ ឆ្នាំ២០២០ ។ នាយកប្រតិបត្តិក្រុមហ៊ុន Pfizer-BioNTech លោកវេជ្ជបណ្ឌិត Bourla បាននិយាយថា ការអះអាងខាងលើនេះ គឺមានផ្នែកមិនពិតច្រើនជាងពិត ពីព្រោះក្នុងចំណោមមនុស្ស០៦នាក់ដែលបាត់បង់ជីវិតនោះ គឺមានតែ០២នាក់ប៉ុណ្ណោះ ដែលទទួលការតេស្តវ៉ាក់សាំង ហើយ០៤នាក់ទៀតគ្មានជាប់ទាក់ទងនឹងវ៉ាក់សាំងនោះទេ ។ ចំពោះបញ្ហាដែលកើតឡើងនៅអង់គ្លេស ដោយបុគ្គលិកសុខាភិបាលអង់គ្លេសពីរនាក់ត្រូវបានគេរាយការណ៍ថា បានកើតអការៈអាលែកហ្ស៊ី បន្ទាប់ពីទទួលការចាក់វ៉ាក់សាំងCOVID-19របស់ Pfizer-BioNTech នោះ គឺជាករណីស្រាលមួយប៉ុណ្ណោះ ហើយស្ថានភាពពួកគេក៏បានប្រសើរឡើងវិញរួចហើយដែរ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៧១លាននាក់ ក្នុងនោះស្លាប់ជាង១លាន៦០ម៉ឺននាក់ និងជាសះស្បើយជិត៥០លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៧១លាន៤៣ម៉ឺន៧ពាន់៣៤២ករណី ក្នុងនោះមានអ្នកជម្ងឺសរុបចំនួន១លាន៦០ម៉ឺន១ពាន់១៦៨នាក់ស្លាប់ និង ជាសះស្បើយឡើងវិញសរុបចំនួន៤៩លាន៦៣ម៉ឺន៧ពាន់២៣៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១២ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៦លាន២៩ម៉ឺន៥ពាន់៤៥៨នាក់ ស្លាប់ចំនួន៣០ម៉ឺន២ពាន់៧៥០នាក់ និងជាសះស្បើយចំនួន៩លាន៥០ម៉ឺន៧ពាន់៤១៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៨២ម៉ឺន៧ពាន់២៦នាក់ ស្លាប់ចំនួន១៤ម៉ឺន២ពាន់៦៦២នាក់ និងជាសះស្បើយ៩លាន៣២ម៉ឺន៤ពាន់៣២៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៨៣ម៉ឺន៦ពាន់៣១៣នាក់ ស្លាប់១៨ម៉ឺន៤៥៣នាក់ និងជាសះស្បើយ៥លាន៩៥ម៉ឺន៤ពាន់៧៤៥នាក់ ៕
-
កូវីដ១៩៖ មេ UNស្នើឲ្យមានមូលនិធិ៤.២ពាន់លានដុល្លារ ធានាឲ្យប្រទេសក្រីក្របានវ៉ាក់សាំងស្មើភាព
អគ្គលេខាធិការអង្គការសហប្រជាជាតិ (UN) លោក Antonio Guterres កាលពីពេលថ្មីៗនេះ បានព្រមានពីអ្វីដែលគេហៅថា វ៉ាក់សាំងជាតិនិយម ទាក់ទងនឹងវ៉ាក់សាំងប្រឆាំងវីរុសកូវីដ១៩ ហើយលោកបានស្នើឲ្យមានកញ្ចប់ថវិការទ្រង់ទ្រាយធំមួយ ដើម្បីធានាថា ប្រទេសក្រីក្រ ជាពិសេស នៅអាហ្វ្រិកអាចទទួលបានវ៉ាក់សាំងគ្រប់គ្រាន់ ខណៈដែលប្រទេសអ្នកមានពុំមានបញ្ហានឹងការចំណាយ។ លោកAntonio Guterresបានព្រមានបែបនេះ ខណៈដែលក្រុមប្រទេសអ្នកមានកំពុងតម្រង់ជួរទិញវ៉ាក់សាំងកូវីដ១៩ រាប់លានដូស ក្នុងតម្លៃមួយដែលអាចនឹងកាន់តែថ្លៃសម្រាប់ប្រទេសក្រីក្រ។ ក្នុងន័យនេះ លោកAntonio Guterres ថា លោកបានស្នើឲ្យមានកញ្ចប់ថវិកាមូលនិធិ ៤.២ពាន់លានដុល្លារអាមេរិក ក្នុងពេល២ខែទៀត សម្រាប់កម្មវិធីវ៉ាក់សាំង COVAX របស់អង្គការសហប្រជាជាតិ ដើម្បីធានាពីការផ្តល់វ៉ាក់សាំងកម្រិតពិភពលោកស្មើភាពនិងប្រសិទ្ធិភាព៕ ប្រភពពីស៊ីនហួរ
-
វៀតណាមបានប្រាក់ជំនួយពីធនាគារADB ព្រោះទប់ស្កាត់កូវីដ១៩ ជោគជ័យ
ធនាគារអភិវឌ្ឍន៍អាស៊ីហៅកាត់ថា ADB បានផ្តល់ថវិកា៦០ម៉ឺនដុល្លារអាមេរិក ដល់វៀតណាមយកទៅប្រើប្រាស់ក្នុងយុទ្ធនាការប្រយុទ្ធប្រឆាំងជំងឺគូវីដ១៩។ សេចក្តីប្រកាសព័ត៌មានរបស់ធនាគារចេញផ្សាយនៅថ្ងៃសុក្រ ទី១១ ធ្នូនេះបានឲ្យដឹងថា ថវិការជំនួយទាំងនេះគឺសម្រាប់សម្ភារៈទប់ស្កាត់កូវីដ១៩ នៅមន្ទីរពេទ្យសួតជាតិ National Lung Hospita នៅក្រុងហាណូយ ដែលមានទឹកប្រាក់៥០ម៉ឺនដុល្លារ ខណៈដែល១០ម៉ឺនដុល្លារទៀត សម្រាប់ការអភិវឌ្ឍបន្ថែម នៅមជ្ឈមណ្ឌលវះកាត់បន្ទាន់ PHEOC នៃក្រសួងសុខាភិបាល។ នាយកធនាគារប្រចាំប្រទេសវៀតណាម Andrew Jeffries បានឲ្យដឹងថា «យើងកោតសរសើរដល់រដ្ឋាភិបាលវៀតណាមឆ្លើយតបរហ័ស បន្ទាន់ និងប្រកបដោយប្រសិទ្ធភាព ចំពោះជំងឺរាតត្បាតកូវីដ១៩» ដោយបន្ថែមទៀតថា ជំនួយនេះគឺមានសម្រាប់ប្រទេសមួយចំនួន ដែលជោគជ័យក្នុងការទប់ស្កាត់វីរុសកូវីដ១៩៕
-
លោក ចូ បៃដិន និងលោកស្រី ខាមេឡា ហារីស ក្លាយជាបុគ្គលល្បីប្រចាំឆ្នាំ ២០២០ “Person of The Year” នៅក្នុងទស្សនាវដ្ដី Time’s Magazine
អាមេរិក៖ ប្រធានាធិបតីជាប់ឆ្នោតអាមេរិកលោក ចូ បៃដិន និងអនុប្រធានាធិបតីរបស់លោក គឺលោកស្រី ខាមេឡា ហារីស នៅថ្ងៃព្រហស្បតិ៍នេះត្រូវបានទស្សនា វដ្តី Time magazine’s 2020 ជ្រើសរើសជាបុគ្គលល្បីប្រចាំឆ្នាំ ២០២០ ឬ “Person of the Year” នេះបើតាមសារព័ត៌មាន AFP នៅថ្ងៃទី១១ ខែធ្នូ ឆ្នាំ២០២០ ។ មេដឹកនាំទាំងពីរបានបង្កើតប្រវត្តិសាស្ត្រនៅថ្ងៃទី០៧ ខែវិច្ឆិកាកន្លងទៅ នៅពេលពួកគេបានផ្តួលលោក ដូណាល់ ត្រាំ នៅក្នុងការបោះឆ្នោតប្រធានាធិបតីអាមេរិក ហើយបានធ្វើអោយលោក ត្រាំ ដឹកនាំប្រទេសបានតែមួយអាណត្តិប៉ុណ្ណោះ ។ លោកស្រី ខាមេឡា ហារីស បានក្លាយជាស្ត្រីស្បែកខ្មៅ និងកូនកាត់អាស៊ីខាងត្បូងដំបូងបង្អស់ជាអនុប្រធានាធិបតីរបស់សហរដ្ឋអាមេរិក ។ សូមជម្រាបផងដែរថា កាលពីឆ្នាំ ២០១៩ ទស្សនាវដ្តី Time’s magazine បានជ្រើសរើសសកម្មជនអាកាសធាតុវ័យក្មេង គឺនាង Greta Thunberg អាយុ១៩ឆ្នាំជនជាតិស៊ុយអែតជាបុគ្គលល្បីប្រចាំឆ្នាំ ២០១៩ ឬ…
-
អូស្ត្រាលីបោះបង់ចោលការផលិតវ៉ាក់សាំង Covid-19 បន្ទាប់ពីលទ្ធផលបង្ហាញវិជ្ជមានវីរុស HIV ចំពោះអ្នកចូលរួមសាកល្បង
អូស្រ្តាលី៖ ការផលិតវ៉ាក់សាំងប្រឆាំង Covid-19 នៅអូស្ត្រាលី នៅថ្ងៃសុក្រនេះត្រូវបានបោះបង់ចោល ក្រោយធ្វើតេស្តព្យាបាលបានបង្កើតលទ្ធផលវិជ្ជមានវីរុសHIV មិនពិត ក្នុងចំណោមអ្នកដែលចូលរួមក្នុងការសាកល្បងព្យាបាលដំណាក់កាលដំបូង នេះបើតាមសារព័ត៌មាន CNA នៅថ្ងៃទី១១ ខែធ្នូ ឆ្នាំ២០២០ ។ រដ្ឋមន្ត្រីក្រសួងសុខាភិបាលអូស្ត្រាលីលោក ហ្គ្រេក ហាន់ បញ្ជាក់ថា បេក្ខជនវ៉ាក់សាំងដែលកំពុងស្ថិតក្នុងដំណាក់កាលទី១នៃការសាកល្បងនៅសាកលវិទ្យាល័យឃ្វីនស៍លែន បានប្រើប្រាស់បរិមាណប្រូតេអ៊ីនរបស់វីរុសហ៊ីវតិចតួច សម្រាប់ជាម៉ូលេគុលបង្គំ ប៉ុន្តែបង្កឱ្យមានប្រតិកម្មអង្គបដិប្រាណ ដែលអាចរំខានដល់ការតាមដានរកមេរោគហ៊ីវ ។ ជាមួយគ្នានេះ នាយករដ្ឋមន្ត្រីអូស្រ្តាលីលោក ស្កុត ម៉ូរីសុន និយាយថា លទ្ធផលនេះ បានជំរុញឱ្យរដ្ឋាភិបាលបញ្ឈប់គម្រោងទិញវ៉ាក់សាំងនេះរាប់លានដូស ហើយជំនួសមកវិញ គឺបង្កើនការបញ្ជាទិញវ៉ាក់សាំងប្រឆាំង Covid-19 ផ្សេង គឺពីក្រុមហ៊ុន AstraZeneca និង Novax ៕
-
កូរ៉េខាងត្បូងកំពុងរៀបចំឃ្លាំងដ៏ត្រជាក់បំផុត ដើម្បីស្តុកវ៉ាក់សាំងប្រឆាំង Covid-19 របស់ក្រុមហ៊ុន Pfizer-BioNTech
កូរ៉េខាងត្បូង៖ កូរ៉េខាងត្បូងត្រៀមឃ្លាំងក្លាសេដ៏ធំមួយ មានសីតុណ្ហភាពត្រជាក់បំផុតរបស់ក្រុមហ៊ុន ខូរៀន ស៊ូពើហ្វ្រីស ក្នុងគោលបំណងស្ដុកទុកវ៉ាក់សាំង COVID-19 ដែលបញ្ជាទិញពីក្រុមហ៊ុនផលិតឱសថ ភីហ្វីហ្សឺ-បាយអូអិនធិច ដោយសារវ៉ាក់សាំងនេះ តម្រូវឱ្យរក្សាទុកនៅក្រោមសីតុណ្ហភាព-៧០អង្សាសេ នេះបើតាមសារព័ត៌មានរ៉យទ័រនៅថ្ងៃទី១១ ខែធ្នូ ឆ្នាំ២០២០ ។ ប្រភពបានអោយដឹងថា កូរ៉េខាងត្បូងបានបញ្ជាទិញវ៉ាក់សាំងប្រឆាំងជំងឺ COVID-19 ផលិតឡើងដោយក្រុមហ៊ុនអាមេរិក ភីហ្វីហ្សឺ សហការជាមួយក្រុមហ៊ុនអាល្លឺម៉ង់ បាយអូអិនធិច ចំនួន២០លានដូស ក្រុមហ៊ុន ម៉ូឌែណា ចំនួន២០លានដូស និង អាស្ត្រាហ្សេណេកា ចំនួន២០លានដូស ។ លើសពីនេះទៅទៀតនោះ ប្រទេសអាស៊ីខាងត្បូងមួយនេះក៏ត្រៀមបញ្ជាទិញវ៉ាក់សាំង Covid-19 ចំនួន០៤លានដូសទៀតពីក្រុមហ៊ុន Johnson & Johnson ផងដែរ ហើយវ៉ាក់សាំងទាំងនេះ គឺគ្រប់គ្រាន់ចាក់ជូនប្រជាជនរបស់ខ្លួនចំនួន៣៤លាននាក់នៃប្រជាជនសរុប៥១.៨លាននាក់ ៕