-
កូវីដ១៩៖ អ្នកស្ម័គ្រចិត្តមុនគេ ចាក់វ៉ាក់សាំងវៀតណាមអះអាងថាមានជំនឿចិត្ត
អ្នកស្រី Minh Anh បានដកដង្ហើមវែងៗ មុនពេលចុះកិច្ចព្រមព្រៀងធ្វើជាស្ម័គ្រចិត្តមុនគេ ក្នុងការចាក់វ៉ាក់សាំងប្រឆាំងកូវីដ៩ ផលិតក្នុងប្រទេសវៀតណាម ជាកម្មវិធីសាកល្បងចាក់លើមនុស្ស ដំណាក់កាលដំបូងរបស់វៀតណាម។ ស្ត្រីវ័យ២៥ឆ្នាំរូបនេះបានយល់ព្រមធ្វើជាអ្នកស្ម័គ្រចិត្តមុនគេ ក្នុងការចាក់វ៉ាក់សាំងប្រឆាំងកូវីដ១៩ របស់ស្ថាប័នវេជ្ជសាស្ត្រ Nanocovax ដោយគាត់បានឯកភាពផ្លូវការ នៅព្រឹកថ្ងៃព្រហស្បតិ៍ ទី១០ ធ្នូ ២០២០នេះ ហើយគេដឹងថា គាត់រៀននៅសកលវិទ្យាល័យវេជ្ជសាស្ត្រយោធាវៀតណាម នៅក្រុងហាណូយ ហៅកាត់ថា VMMU ។ អ្នកស្រី Minh Anh បាននិយាយថា « បើនិយាយថា ខ្ញុំមិនបារម្ភឬមិនខ្លាចនោះ វាមិនមែនការពិតទេ ប៉ុន្តែខ្ញុំមានមានជំនឿចិត្ត យ៉ាងណាក៏ដោយ បើទោះបីជាមានប្រសិទ្ធិភាពក៏ដោយ ខ្ញុំនឹងតាមដានប្រុងប្រយ័ត្ន ជាអាទិភាពដែរ។ ប្រសិនបើការសាកល្បងនេះមិនមានដំណើរការល្អ ខ្ញុំអាចបញ្ឈប់គ្រប់ពេល»។ អ្នកស្រីបន្ថែមទៀតថា មានការបញ្ជាក់ប្រាប់ច្បាស់លាស់ នៅពេលចាក់ទៅក្នុងរាងកាយរបស់គាត់ ហើយនឹងត្រូវពិនិត្យសុខភាពទៀងទាត់។ ការដាក់វ៉ាក់សាំងលើមនុស្សដំណាក់កាលដំបូងនេះត្រូវការអ្នកស្ម័គ្រចិត្ត ៦០នាក់ ក្នុងនោះ មាន៣០នាក់ហើយបានព្រមព្រៀងហើយ នាព្រឹកមិញនេះ៕ ប្រភពពី VN Express
-
អេមីរ៉ាត់អារ៉ាប់រួមចុះបញ្ជីវ៉ាក់សាំង Covid-19 របស់ក្រុមហ៊ុនផលិតឱសថចិន Sinopharm បន្ទាប់ពីបង្ហាញប្រសិទ្ធភាព៨៦ភាគរយ
អេមីរ៉ាត់អារ៉ាប់រួម៖ អេមីរ៉ាត់អារ៉ាប់រួម នៅថ្ងៃពុធនេះ បានចុះបញ្ជីជាផ្លូវការនូវវ៉ាក់សាំងប្រឆាំង Covid-19 ដែលអភិវឌ្ឍន៍ឡើងដោយក្រុមហ៊ុនផលិតឱសថយក្សចិន Sinopharm និងនិយាយថា វាមានប្រសិទ្ធភាព៨៦ភាគរយ យោងតាមការវិភាគនៃការសាកល្បងដំណាក់កាលទី៣ នេះបើតាមសារព័ត៌មានរ៉យទ័រនៅថ្ងៃទី០៩ ខែធ្នូ ឆ្នាំ២០២០ ។ ទីភ្នាក់ងារព័ត៌មានរដ្ឋ WAM របស់អេមីរ៉ាត់អារ៉ាប់រួមនិយាយថា ក្រសួងសុខាភិបាលបានប្រកាសពីការចុះបញ្ជីជាផ្លូវការ នូវវ៉ាក់សាំងនេះដោយមិនបានបញ្ជាក់ពីរបៀបដែលវាត្រូវបានគេប្រើប្រាស់នោះទេ ។ ការប្រកាសនេះ គឺជាការបោះឆ្នោតដ៏គួរឲ្យទុកចិត្តមួយដោយអាជ្ញាធរសុខាភិបាលរបស់អារ៉ាប់រួម ក្នុងការធានាសុវត្ថិភាព និងប្រសិទ្ធភាពវ៉ាក់សាំងនេះ ។ សូមជម្រាបថា វ៉ាក់សាំងនេះ បានឆ្លងកាត់ការសាកល្បងដំណាក់កាលទីបីនៅក្នុងប្រទេសអេមីរ៉ាត់អារ៉ាប់រួមចាប់តាំងពីខែកក្កដា ហើយវាត្រូវបានអនុម័តសម្រាប់ការប្រើប្រាស់ជាបន្ទាន់សម្រាប់បុគ្គលិកសុខាភិបាលក្នុងខែកញ្ញាកន្លងទៅ ។ យ៉ាងណាមិញ មន្ត្រីសុខាភិបាលក៏បានពិនិត្យឡើងវិញ នូវការវិភាគបណ្តោះអាសន្នរបស់ក្រុមហ៊ុន Sinopharm ចំពោះការសាកល្បងព្យាបាលដំណាក់កាលទី៣ ដែលបង្ហាញថា វាមានប្រសិទ្ធភាព៨៦ភាគរយប្រឆាំងនឹងវីរុសដ៏កាចសាហាវមួយនេះ ៕
-
ទីភ្នាក់ងារឱសថអឺរ៉ុប EMA បញ្ជាក់ថា ឯកសារវ៉ាក់សាំង Covid-19 របស់ក្រុមហ៊ុន Pfizer-BioNTech ត្រូវបានគេលួច
អឺរ៉ុប៖ ក្រុមហ៊ុនផលិតឱសថអាមេរិក-អាល្លឺម៉ង់ ភីហ្វីហ្សឺ-បាយអូអិនធិច នៅថ្ងៃពុធនេះបញ្ជាក់ថា ឯកសារពាក់ព័ន្ធនឹងការអភិវឌ្ឍវ៉ាក់សាំង Covid-19 របស់ពួកគេត្រូវបានចូលមើលដោយខុសច្បាប់ តាមរយៈការវាយប្រហារផ្នែកព័ត៌មានវិទ្យា នេះបើតាមសារព័ត៌មានរ៉យទ័រចុះផ្សាយនៅថ្ងៃទី១០ ខែធ្នូ ឆ្នាំ២០២០ ។ ជាមួយគ្នានេះ EMA ជាទីភ្នាក់ងារដែលអនុញ្ញាតអោយប្រើប្រាស់ថ្នាំនៅទូទាំងសហភាពអឺរ៉ុប បានបញ្ជាក់ថា ខ្លួនត្រូវរងគ្រោះដោយសារការវាយប្រហារតាមអ៊ីនធើណិត ហើយឯកសារដែលទាក់ទងនឹងវ៉ាក់សាំង Covid-19 ត្រូវបានគេលួច ។ ហើយបើតាមក្រុមហ៊ុន ភីហ្វីហ្សឺ-បាយអូអិនធិច នោះ ពាក្យស្នើសុំបទប្បញ្ញត្តិរបស់ខ្លួនត្រូវបានគេចូលមើលក្នុងអំឡុងការវាយប្រហារនេះ ។ ជុំវិញបញ្ហានេះដែរ នៅក្នុងសេចក្តីថ្លែងការណ៍ខ្លីមួយនៅលើគេហទំព័ររបស់ខ្លួន ទីភ្នាក់ងារឱសថអឺរ៉ុប EMA មិនបានផ្តល់ព័ត៌មានលម្អិតអំពីលក្ខណៈ នៃការវាយប្រហារតាមអ៊ីនធើណិតនេះទេ ដោយគ្រាន់តែនិយាយថា ការស៊ើបអង្កេតពេញលេញកំពុងចាប់ផ្តើមឡើង ខណៈ EMA កំពុងធ្វើការលើការអនុម័តវ៉ាក់សាំង Covid-19 ចំនួនពីរ ដែលខ្លួនរំពឹងថា នឹងបញ្ចប់ក្នុងពេលប៉ុន្មានសប្តាហ៍ទៀត ៕
-
ថៃបើកទ្វារទទួលទេសចរណ៍បរទេសជុំវិញពិភពលោក ដោយមិនខ្វល់ពីស្ថានភាព Covid-19 ដើម្បីស្តារវិស័យទេសចរណ៍ឡើងវិញ
ថៃ៖ ដើម្បីស្តារវិស័យទេសចរណ៍ដែលលិចលង់ស្ទើរដល់ចំណុចសូន្យទៅហើយនោះ រដ្ឋាភិបាលថៃបានប្រកាសបើកទ្វារទទួលភ្ញៀវទេសចរបរទេសជុំវិញពិភពលោក ដោយមិនខ្វល់ពីស្ថានភាពជំងឺកូវិដ១៩នោះទេ តាមរយៈកម្មវិធីផ្តល់ទិដ្ឋិការស្នាក់នៅរយៈពេលវែង នេះបើតាមសារព័ត៌មានបាងកកប៉ុស្តិ៍នាពេលថ្មីៗ ។ ការប្រកាសនេះ ធ្វើឡើងក្រោយនាយករដ្ឋមន្ត្រីថៃលោក ប្រាយុទ្ធ ចាន់អូចា បានអះអាងជាសាធារណៈថ្មីៗនេះថា ប្រទេសរបស់លោកមិនបានធ្លាក់ចូលក្នុងរលករាតត្បាតនៃជំងឺ Covid-19លើកទី២នោះទេ ។ បើតាមអ្នកនាំពាក្យរដ្ឋាភិបាលថៃ លោក Rachada Dhnadirek បានបញ្ជាក់ថា ភ្ញៀវទេសចរបរទេសទាំងអស់តម្រូវអោយធ្វើចត្តាឡីស័ករយៈពេល១៤ថ្ងៃ មុននឹងអនុញ្ញាតអោយដើរលេងដោយសេរី ។ តាមរយៈកម្មវិធីផ្តល់ទិដ្ឋិការរយៈពេលវែង ភ្ញៀវទេសចរទាំងអស់អាចស្នាក់នៅប្រទេសថៃចាប់ពី៣០ទៅ៦០ថ្ងៃ ។ ក្រៅពីបើកទ្វារផ្ទះទទួលទេសចរណ៍បរទេសនោះ ថៃនៅមានផែនការធំៗជាច្រើនទៀត ដើម្បីជួយស្តារឧស្សាហកម្មទេសចរណ៍របស់ខ្លួនអោយរស់ឡើងវិញ ៕
-
អូស្ត្រាលីគ្រោងអនុវត្តច្បាប់ថ្មីនាពេលឆាប់ៗនេះ ដើម្បីតម្រូវអោយក្រុមហ៊ុន Google និង Facebook បង់ប្រាក់ដល់ស្ថាប័នព័ត៌មាន
អូស្រា្តលី៖ អូស្ត្រាលីគ្រោងនឹងអនុវត្តច្បាប់ថ្មីក្នុងពេលឆាប់ៗខាងមុខនេះ ដោយតម្រូវឱ្យក្រុមហ៊ុនបរទេសធំៗមួយចំនួនដូចជា Facebook និង Google ធ្វើការបង់ប្រាក់ទៅឱ្យស្ថាប័នព័ត៌មានក្នុងស្រុក ដើម្បីជាថ្នូរក្នុងការប្រើប្រាស់មាតិកាព័ត៌មានកន្លងមក នេះបើតាមសារព័ត៌មានរ៉យទ័រនាពេលថ្មីៗ ។ យោងតាមសេចក្ដីប្រកាសបានអោយដឹងថា ប្រសិនបើជាខាងក្រុមហ៊ុនបច្ចេកវិទ្យា និងស្ថាប័នព័ត៌មានចរចាគ្នាមិនត្រូវ នោះរដ្ឋាភិបាលនឹងដើរតួជាអាជ្ញាកណ្ដាលក្នុងការដោះស្រាយ និងសម្របសម្រួលជុំវិញបញ្ហាមួយនេះ ។ សូមជម្រាបថា រដ្ឋាភិបាលអូស្ត្រាលីបានសម្រេចបង្កើតច្បាប់ថ្មីនេះឡើង គឺស្ថិតក្នុងគោលបំណងការពារស្នាដៃ និងឱ្យតម្លៃអ្នកកាសែត និងស្ថាប័ន្ធព័ត៌មាន ខណៈគិតមកទល់ពេលនេះ កំពុងតែរៀបចំ និងព្រាងឡើង ដោយក្នុងនោះ តម្រូវឱ្យក្រុមហ៊ុនបច្ចេកវិទ្យាធំៗធ្វើការចរចាជាមួយស្ថាប័នព័ត៌មាន ដើម្បីបានសិទ្ធិប្រើប្រាស់មាតិកាព័ត៌មាន ៕
-
អ្នកវិទ្យាសាស្រ្តអង់គ្លេសកំពុងព្យាយាមសម្រាលភាពភ័យខ្លាច ខណៈមនុស្សពីរនាក់មានប្រតិកម្មធ្ងន់ធ្ងរ ក្រោយចាក់វ៉ាក់សាំង Covid-19
អង់គ្លេស៖ ក្រុមអ្នកវិទ្យាសាស្ត្រអង់គ្លេសបានព្យាយាមសម្រាលភាពភ័យខ្លាចជាសាធារណៈអំពីវ៉ាក់សាំង Pfizer-BioNTech ដែលកំពុងត្រូវបានចាក់នៅទូទាំងប្រទេសអឺរ៉ុបមួយនេះ ក្រោយមានរបាយការណ៍ថា បុគ្គលិក NHS ពីរនាក់ទទួលរងប្រតិកម្មអាឡ័កស៊ីធ្ងន់ធ្ងរ បន្ទាប់ពីការចាក់វ៉ាក់សាំងនៅថ្ងៃ V-Day ក្នុងថ្ងៃពុធម្សិលមិញ នេះបើតាមសារព័ត៌មាន Daily Mail នៅថ្ងៃទី១០ ខែធ្នូ ឆ្នាំ២០២០ ។ បុគ្គលិកថែទាំសុខភាពដែលមិនបញ្ចេញឈ្មោះទាំងពីរនាក់ខាងលើនេះ ត្រូវការការព្យាបាលជាបន្ទាន់ ប៉ុន្តែបានជាសះស្បើយឡើងវិញ បន្ទាប់ពីពួកគេចេញរោគសញ្ញាភ្លាមៗ ក្រោយទទួលបានការចាក់វ៉ាក់សាំង ។ បើទោះបីជាមានប្រតិកម្មអាឡ័កស៊ីពីរករណីក៏ដោយ រដ្ឋាភិបាលអង់គ្លេសនៅតែបន្តចាក់វ៉ាក់សាំងមនុស្សពី៥ពាន់ទៅ៧ពាន់នាក់ក្នុងមួយថ្ងៃនៅទូទាំងប្រទេសដោយប្រើថ្នាំរបស់ Pfizer ។ សូមជម្រាបថា ក្នុងរយៈពេល២៤ម៉ោងនៃកម្មវិធីចាក់ថ្នាំបង្ការរោគដ៏ធំបំផុតមិនធ្លាប់មាននៅក្នុងប្រវត្ដិសាស្ដ្រអង់គ្លេសនោះ និយតករថ្នាំពេទ្យអង់គ្លេសបានប្រាប់ថា អ្នកណាម្នាក់ដែលមានប្រតិកម្មអាឡ័កស៊ីធ្ងន់ធ្ងរទៅនឹងថ្នាំ ឬអាហារមិនគួរត្រូវបានទទួលវ៉ាក់សាំងទេ ។ ទន្ទឹមគ្នា ក្រុមអ្នកវិទ្យាសាស្ត្រអង់គ្លេសបានអំពាវនាវអោយមានភាពស្ងប់ស្ងាត់ ស្របពេលមានការភ័យខ្លាចជាសាធារណៈអំពីគ្រោះថ្នាក់ដែលបង្កឡើងដោយវ៉ាក់សាំងថ្មីនេះ ដែលវាបានគំរាមកំហែងដល់ការបង្អាក់កម្មវិធីចាក់ថ្នាំបង្ការដ៏ធំរបស់ NHS ៕
-
នាយករដ្ឋមន្ត្រីអ៊ីស្រាអែលអះអាងថា នឹងចាក់វ៉ាក់សាំង Covid-19 មុនគេ នៅពេលទទួលបានវ៉ាក់សាំងរបស់ក្រុមហ៊ុនផលិតឱសថអាមេរិក Pfizer
អ៊ីស្រាអែល៖ អ៊ីស្រាអែល នៅថ្ងៃពុធនេះ បានទទួលវ៉ាក់សាំង Covid-19 ក្រុមដំបូងមកពីក្រុមហ៊ុនផលិតឱសថអាមេរិក Pfizer ដោយនាយករដ្ឋមន្ត្រីអ៊ីស្រាអែលលោក ប៊ិនចាមីន ណឺតាន់យ៉ាហ៊ូ បានបញ្ជាក់ថា ទីបញ្ចប់នៃវីរុសឆ្លងនេះកំពុងលេចឡើងលឹមៗ ហើយលោកអះអាងថា នឹងចាក់វាមុនគេ នេះបើតាមសារព័ត៌មាន AFP នៅថ្ងៃទី០៩ ខែធ្នូ ឆ្នាំ២០២០ ។ នាយករដ្ឋមន្ត្រីអ៊ីស្រាអែលរូបនេះបន្ថែមទៀតថា នេះជាការអបអរធំមួយសំរាប់អ៊ីស្រាអែល… ទីអវសាននៃមេរោគនេះ កំពុងលេចចេញជាពន្លឺហើយ… អ្វីដែលសំខាន់ចំពោះខ្ញុំ គឺថា ពលរដ្ឋអ៊ីស្រាអែលនឹងទទួលបានវ៉ាក់សាំង តែខ្ញុំចង់ធ្វើជាគំរូ ដោយចាក់វាមុនគេនៅក្នុងរដ្ឋអ៊ីស្រាអែល ។ គួរបញ្ជាក់ថា ទំនិញដែលដឹកនាំតាមយន្តហោះមកកាន់អ៊ីស្រាអែល នៅថ្ងៃពុធម្សិលមិញ ជាផ្នែកមួយនៃវ៉ាក់សាំង៨លានដូសដែលអ៊ីស្រាអែលទិញពីក្រុមហ៊ុនផលិតឱសថអាមេរិក-អាល្លឺម៉ង់ Pfizer BioNTech ។ តាមពិតវ៉ាក់សាំង Pfizer នៅមិនទាន់ទទួលបានការយល់ព្រមអោយប្រើពីសំណាក់និយ័តករអ៊ីស្រាអែលនៅឡើយទេ តែលោក ណឺតាន់យ៉ាហ៊ូ បាននិយាយថា រូបលោកផ្ទាល់រំពឹងថា នឹងបានការអនុញ្ញាតអោយប្រើជាផ្លូវការនាពេលឆាប់ៗខាងមុខនេះ ៕
-
កាណាដាក្លាយជាប្រទេសទី៣ ដែលបើកភ្លើងខៀវអោយប្រើប្រាស់វ៉ាក់សាំងCovid-19 របស់ក្រុមហ៊ុនផលិតឱសថ Pfizer-BioNTech
កាណាដា៖ និយតករសុខភាពកាណាដា នៅថ្ងៃពុធនេះ បានបើកភ្លើងខៀវអោយប្រើប្រាស់វ៉ាក់សាំង Covid-19 របស់ក្រុមហ៊ុនផលិតឱសថ Pfizer-BioNTech ហើយ ខណៈការយល់ព្រមនេះ កើតឡើងមួយថ្ងៃបន្ទាប់ពីអង់គ្លេសក្លាយជាប្រទេសដំបូងគេនៅលើពិភពលោក ដែលចាប់ផ្តើមការចាក់វ៉ាក់សាំងនេះ នេះបើតាមសារព័ត៌មានរ៉យទ័រនៅថ្ងៃទី១០ ខែធ្នូ ឆ្នាំ២០២០ ។ ជាមួយគ្នានេះ នាយករដ្ឋមន្ត្រីកាណាដាលោក ចាស្ទីន ទ្រូដូ បាននិយាយថា វ៉ាក់សាំង៣ម៉ឺនដូសនឹងត្រូវដឹកមកដល់កាណាដានៅសប្ដាហ៍ក្រោយ ហើយវ៉ាក់សាំងជាច្រើនទៀតនឹងមកដល់តាមក្រោយ ។ សរុបទៅ រដ្ឋាភិបាលកាណាដាបានទិញវ៉ាក់សាំងចំនួន២០លានដូស ដែលគ្របគ្រាន់ក្នុងការចាក់ដល់មនុស្សចំនួន១០លាននាក់ ហើយក៏កំពុងពិចារណាទិញ៥៦លានដូសបន្ថែមទៀតផងដែរ ។ សូមជម្រាបថា សម្រេចចិត្តខាងលើនេះ បានធ្វើអោយកាណាដាក្លាយជាប្រទេសទី៣ បន្ទាប់ពីអង់គ្លេស និងបារ៉ែន ដែលបានអនុញ្ញាតអោយប្រើប្រាស់បន្ទាន់ នូវវ៉ាក់សាំងប្រឆាំង COVID-19 របស់ក្រុមហ៊ុនអាមេរិក-អាល្លឺម៉ង់ Pfizer- BioNTech ៕
-
អ្នកដំណើរ២ពាន់នាក់ត្រូវធ្វើចត្តាឡីស័ក ក្រោយមនុស្សម្នាក់ធ្វើតេស្តវិជ្ជមានជំងឺCovid-19 ក្នុងនាវាទេសចរណ៍សិង្ហបុរី
សង្ហិបុរី៖ អ្នកដំណើរម្នាក់នៅលើនាវាទេសចរណ៍របស់ក្រុមហ៊ុន Royal Caribbean មកពីប្រទេសសិង្ហបុរី បានធ្វើតេស្តវិជ្ជមាន Covid-19 ដែលជាហេតុបង្ខំអោយមនុស្សប្រហែល២ពាន់នាក់ ត្រូវធ្វើចត្តាឡីស័កនៅក្នុងកាប៊ីនរបស់ពួកគេ ហើយនាវា Quantum of the Seas បានវិលត្រឡប់មកគោកវិញនៅថ្ងៃពុធម្សិលមិញ នេះបើតាមសារព័ត៌មានរ៉យទ័រនៅថ្ងៃទី០៩ ខែធ្នូ ឆ្នាំ២០២០ ។ កាពីទែននាវា Quantum of the Seas បានប្រាប់អ្នកដំណើរថា ភ្ញៀវម្នាក់មិនស្រួលខ្លួន ហើយត្រូវបានធ្វើតេស្តវិជ្ជមានជំងឺ Covid-19 ។ លោកបន្តថា យើងសូមសំណូមពរដល់ភ្ញៀវទាំងអស់ដែលមានជំងឺដូចជាទឹកនោមផ្អែម និងជំងឺបេះដូងជាដើមត្រូវទាក់ទងទៅសេវាកម្មភ្ញៀវ ហើយថា នាវាបានវិលត្រឡប់ទៅគោកវិញ ពោលគឺមួយថ្ងៃមុនពេលបញ្ចប់ដំណើរទេសចរណ៍រយៈពេលបួនថ្ងៃ តាមការគ្រោងទុករបស់ខ្លួន ។ ដំណើរកម្សាន្តរបស់ក្រុមហ៊ុន Royal Caribbean ចេញពីប្រទេសសិង្ហបុរីបានចាប់ផ្តើមកាលពីសប្តាហ៍មុន ពោលគឺជាលើកដំបូងរបស់ក្រុមហ៊ុននេះ ចាប់តាំងពីខ្លួនបានបញ្ឈប់ប្រតិបត្តិការជាសកលនៅក្នុងខែមីនាកន្លងទៅ ដោយសារតែជំងឺរាតត្បាតជាសកល Covid-19 ៕
-
SpaceX ធ្វើតេស្តនាវាអវកាសរបស់ខ្លួន ដែលគ្រោងនឹងប្រើវាដឹកជញ្ជូនមនុស្សទៅកាន់ភពអង្គារក្នុងពេល៦ឆ្នាំទៀត
អាមេរិក៖ សារព័ត៌មានរ៉យទ័រចុះផ្សាយនៅថ្ងៃទី១០ខែធ្នូនេះថា ក្រុមហ៊ុន SpaceX បានធ្វើតេស្តនាវាអវកាស Starship របស់ខ្លួន នៅថ្ងៃពុធនេះ ដោយគំរូនាវានោះបានហោះឡើងលើអាកាសក្នុងរយៈពេល៦នាទីកន្លះ ប៉ុន្តែនៅពេលចុះមកវិញ វាមិនបានចុះចតដោយសុវត្ថិភាពឡើយ គឺជ្រុលបុកដីបណ្តាលអោយផ្ទុះឆេះ ។ ការធ្វើតេស្តនាវាអវកាស Starship នេះ គឺក្រុមហ៊ុនអវកាសឯកជនមួយនេះគ្រោងសម្រេចអោយបានរយៈកម្ពស់១២.៥គីឡូម៉ែត្រពីផ្ទៃផែនដី ប៉ុន្តែសម្រាប់លទ្ធផលជាក់ស្តែងនៃការសម្រេចបាននោះ គឺ SpaceX មិនទាន់ប្រកាសជាផ្លូវការនោះឡើយ ។ សូមជម្រាបថា ការបាញ់បង្ហោះខាងលើនេះ ធ្វើឡើងចេញពីមូលដ្ឋានដាច់ស្រយាលមួយស្ថិតនៃរដ្ឋតិចសាស់ ភាគខាងត្បូងសហរដ្ឋអាមេរិក ។ វាគឺជាការធ្វើតេស្តថ្មីមួយ ហើយគិតមកទល់ពេលនេះសម្រេចបានគោលដៅកម្ពស់ខ្ពស់បំផុតរបស់ Starship ដែលលោក Elon Musk កន្លងមកធ្លាប់បានអះអាងថា នឹងអាចដឹកជញ្ជូនមនុស្សទៅកាន់ភពអង្គារនៅយ៉ាងហោចណាស់០៦ឆ្នាំទៀត ៕