-
ប្អូនស្រីបង្កើតមេដឹកនាំកូរ៉េខាងជើងនិយាយថា ទំនាក់ទំនងអន្តរកូរ៉េកាន់តែអាក្រក់មួយកម្រិតទៀត ក្រោយកូរ៉េខាងត្បូងរិះគន់វិធានការការពារ Covid-19 របស់កូរ៉េខាងជើង
កូរ៉េខាងជើង៖ ប្អូនស្រីបង្កើតរបស់មេដឹកនាំកំពូលកូរ៉េខាងជើង លោក គីម ជុងអ៊ុន គឺលោកស្រី គីម យ៉ូជុង នៅថ្ងៃពុធនេះបានថ្លែងវាយប្រហារលើរដ្ឋមន្ត្រីការបរទេសកូរ៉េខាងត្បូង បន្ទាប់ពីនិយាយរិះគន់ដល់វិធានការការពារ Covid-19 របស់កូរ៉េខាងជើង និងបានព្រមានថា ទង្វើនេះ នឹងធ្វើអោយភាពជាប់គាំងនៃទំនាក់ទំនងអន្តរកូរ៉េកាន់តែអាក្រក់ខ្លាំងមួយកម្រិតទៀត នេះបើតាមសារព័ត៌មានយ៉ុបហាប់នៅថ្ងៃទី០៩ ខែធ្នូ ឆ្នាំ២០២០ ។ ថ្លែងនៅក្នុងសេចក្តីប្រកាសមួយ ចុះផ្សាយដោយទីភ្នាក់ងារសារព័ត៌មានរដ្ឋកូរ៉េខាងជើង KCNA នៅព្រឹកថ្ងៃពុធនេះ លោកស្រី គីម យ៉ូជុង បានបញ្ជាក់ថា សម្តីរបស់គាត់ បង្ហាញអោយឃើញពីការនិយាយស្តីទាំងគ្មានការពិចារណា ដោយវាកាន់តែធ្វើអោយភាពជាប់គាំងក្នុងទំនាក់ទំនងខាងជើង និងខាងត្បូងកាន់តែអាក្រក់ខ្លាំងឡើង ហើយថា ពួកយើងនឹងមិនបំភ្លេចសម្តីរបស់គាត់ ហើយគាត់ប្រហែលជាត្រូវទទួលការតបស្នងជាទីគាប់ចិត្តសម្រាប់រឿងនេះ ។ សូមជម្រាបថា ប្រតិកម្មរបស់លោកស្រី គីម យ៉ូជុង ខាងលើនេះ កើតមានឡើងបន្ទាប់ពីកាលពីសប្តាហ៍មុន រដ្ឋមន្ត្រីការបរទេសកូរ៉េខាងត្បូងលោកស្រី កាង ឃ្យុងវ៉ា បានថ្លែងក្នុងវេទិកាមួយនៅប្រទេសបារ៉ែនថា កូរ៉េខាងជើងមិនបានឆ្លើយតបទៅនិងកិច្ចសហប្រតិបត្តិការទប់ស្កាត់ Covid-19 តាមព្រំដែន ដែលអំពាវនាវដោយកូរ៉េខាងត្បូងនោះឡើយ ហើយថា អ្វីដែលទីក្រុងព្យុងយ៉ាងប្រកាសថា ប្រទេសខ្លួនគ្មានករណីឆ្លង Covid-19 សូម្បីតែមួយ គឺជារឿងពិបាកជឿ…
-
អ៊ីស្រាអែលនឹងចាប់ផ្តើមចាក់វ៉ាក់សាំង Covid-19 ទ្រង់ទ្រាយធំនៅថ្ងៃទី២០ ខែធ្នូខាងមុខ
អ៊ីស្រាអែល៖ អ៊ីស្រាអែលនឹងចាប់ផ្តើមការចាក់វ៉ាក់សាំងប្រឆាំង Covid-19 ដល់ប្រជាជនរបស់ខ្លួននៅថ្ងៃទី២០ ខែធ្នូខាងមុខ នេះបើតាមមន្រ្តីជាន់ខ្ពស់ក្រសួងសុខាភិបាលអ៊ីស្រាអែល ដកស្រង់ចុះផ្សាយដោយសារព័ត៌មានស៊ីនហួរនៅថ្ងៃទី០៩ ខែធ្នូ ឆ្នាំ២០២០ ។ អគ្គនាយកក្រសួងសុខាភិបាលអ៊ីស្រាអែលលោក ហេហ្ស៊ី ឡឺវី បានធ្វើការណែនាំដល់គ្លីនិកសេវាសុខភាព ដែលត្រូវបានកំណត់ដោយរដ្ឋ អោយត្រៀមខ្លួនសម្រាប់មណ្ឌលប្រតិបត្តិការចាក់វ៉ាក់សាំងនៅថ្ងៃទី២០ ខែធ្នូខាងមុខនេះ ។ លោក ឡឺវី បន្ថែមទៀតថា ក្រសួងសុខាភិបាលបាននិងកំពុងធ្វើការទៅលើបញ្ជីអាទិភាពនៃអ្នកទទួលវ៉ាក់សាំង ដែលនឹងត្រូវបញ្ចប់ក្នុងរយៈពេលពីរថ្ងៃទៀតនេះ ខណៈដែលវ៉ាក់សាំងនឹងត្រូវផ្តល់ដោយក្រុមហ៊ុនផលិតឱសថអាមេរិក ភីហ្វីហ្សឺ ។ ដោយឡែកការដឹកជញ្ជូនវ៉ាក់សាំងដំបូងត្រូវបានរំពឹងថា នឹងដឹកមកដល់ទឹកដីរបស់ប្រទេសអ៊ីស្រាអែលនាពេលឆាប់ៗខាងមុខនេះ នៅក្នុងចំណោម០៨លានដូសដែលអ៊ីស្រាអែលបានបញ្ជាទិញកាលពីខែមុន ៕
-
ការចាក់វ៉ាក់សាំង Covid-19 ក្នុងប្រទេសម៉ិចស៊ីកូ នឹងចាប់ផ្តើមនៅចុងខែធ្នូ ឆ្នាំ២០២០នេះ
ម៉ិចស៊ីកូ៖ រដ្ឋាភិបាលម៉ិចស៊ីកូបញ្ជាក់ថា យុទ្ធនាការចាក់វ៉ាក់សាំងប្រឆាំង Covid-19 ក្នុងប្រទេសរបស់ខ្លួន រំពឹងថា នឹងចាប់ផ្តើមនៅមុនដំណាច់ខែធ្នូខាងមុខនេះ ដោយផ្តល់អាទិភាពដល់មន្រ្តីជំនាញផ្នែកសុខាភិបាល និង ក្រុមមនុស្សមានវ័យ ចំណាស់ នេះបើតាមសារព័ត៌មានស៊ីនហួរនៅថ្ងៃទី០៩ ខែធ្នូ ឆ្នាំ២០២០ ។ អនុរដ្ឋមន្រ្តីសុខាភិបាលម៉ិចស៊ីកូលោក ហ៊ូហ្គោ ឡប់ប៉េស ហ្គាថែល បានបញ្ជាក់នៅក្នុងសន្និសិទសារព័ត៌មានមួយថា ការចាក់វ៉ាក់សាំងគួរតែចាប់ផ្តើមនៅថ្ងៃចុងក្រោយនៃសប្តាហ៍ទី៣នៃខែធ្នូ ហើយមានរយៈពេលរហូតដល់ខែកុម្ភៈ ឆ្នាំ២០២១ខាងមុខនេះ ។ ចាប់ផ្តើមនៅក្នុងរដ្ឋធានីម៉ិចស៊ីកូស៊ីតធី ជាទីលំនៅដ្ឋានរបស់ប្រជាជនប្រមាណ២០លាននាក់ ហើយនឹងភាគខាងជើងរដ្ឋ ខូចហុយឡា ។ បើតាមរដ្ឋមន្រ្តីការបរទេសម៉ិចស៊ីកូលោក ម៉ាសែលឡូ អេប្រាដ វ៉ាក់សាំង Covid-19 ចំនួន២៥ម៉ឺនដូសនឹងមកដល់ទឹកដីប្រទេសម៉ិចស៊ីកូនៅក្នុងខែនេះតែម្តង ៕
-
វ៉ាក់សាំងរបស់ក្រុមហ៊ុន Pfizer កាន់តែខិតជិតការអនុញ្ញាតអោយប្រើប្រាស់ ក្រោយទីភ្នាក់ងារចំណីអាហារ និងឱសថអាមេរិកទទួលស្គាល់ពីប្រសិទ្ធភាព
អាមេរិក៖ សារព័ត៌មានរ៉យទ័រចុះផ្សាយនៅថ្ងៃទី០៩ ខែធ្នូនេះថា ទីភ្នាក់ងារចំណីអាហារ និងឱសថអាមេរិក FDA បានទទួលស្គាល់ទិន្នន័យប្រសិទ្ធភាព និងសុវត្ថិភាពនៃវ៉ាក់សាំង Covid-19 ដែលផលិតដោយក្រុមហ៊ុនឱសថ ភីហ្វីហ្សឺ ។ ស្របពេលជាមួយគ្នានោះដែរ បុគ្គលិកទីភ្នាក់ងារចំណីអាហារ និងឱសថអាមេរិក FDA ក៏បានបញ្ជាក់ដែរថា ទិន្នន័យប្រសិទ្ធភាព និងសុវត្ថិភាពនៃវ៉ាក់សាំងរបស់ក្រុមហ៊ុន ភីហ្វីហ្សឺ-បាយអូអិនធិច បានបំពេញគ្រប់គ្រាន់តាមលក្ខខណ្ឌ ដើម្បីទទួលបានការការអនុញ្ញាតឱ្យប្រើប្រាស់ជាបន្ទាន់វ៉ាក់សាំង COVID-19 ។ ទោះបីជាយ៉ាងនេះក្តី ទីភ្នាក់ងារ FDA នឹងបើកកិច្ចប្រជុំមួយនៅថ្ងៃព្រហស្បតិ៍សប្ដាហ៍នេះ ដើម្បីពិភាក្សាគ្នាលើការអនុម័តជាចុងក្រោយ ស្ដីពីការអនុញ្ញាតឱ្យប្រើប្រាស់ជាបន្ទាន់នូវវ៉ាក់សាំង COVID-19 របស់ក្រុមហ៊ុនផលិតឱសថអាមេរិក-អាល្លឺម៉ង់ ភីហ្វីហ្សឺ-បាយអូអិនធិច ៕
-
Tesla ក្លាយជាក្រុមហ៊ុនផលិតរថយន្តមានតម្លៃខ្ពស់បំផុតនៅលើទីផ្សារ និង អាចប្រជែងជាមួយ Toyota Motor Volkswagen និង General Motors
អាមេរិក៖ ភាគហ៊ុនរបស់ក្រុមហ៊ុន Tesla ទទួលបានកំណត់ត្រាខ្ពស់នៅថ្ងៃចន្ទនេះ ដែលជម្រុញឱ្យក្រុមហ៊ុនមួយនេះ មានតម្លៃកើនឡើងដល់៦០០ពាន់លានដុល្លារ និង ក្លាយជាក្រុមហ៊ុនផលិតរថយន្តមានតម្លៃខ្ពស់បំផុតនៅលើទីផ្សារ និងអាចប្រជែងជាមួយក្រុមហ៊ុន Toyota Motor, Volkswagen និង General Motors នេះបើតាមសារព័ត៌មានរ៉យទ័រនៅថ្ងៃទី០៩ ខែធ្នូ ឆ្នាំ២០២០ ។ ជាមួយគ្នានេះ ក្រុមហ៊ុន Tesla ក៏បានប្រកាសឱ្យដឹងដែរថា ខ្លួននឹងប្រមូលដើមទុនបន្ថែមទៀតចំនួន៥ពាន់លានដុល្លារ នៅក្នុងដំណាក់កាលទី២ នៃការលក់ហ៊ុន ក្នុងរយៈពេល៣ខែ ខណៈតម្លៃភាគហ៊ុនរបស់ក្រុមហ៊ុនផលិតរថយន្តអគ្គិសនីមួយនេះកើនឡើងខ្ពស់ ។ ដើមទុនថ្មីគឺមានការចូលរួមពីធនាគារធំៗចំនួន១០ មានដូចជា Goldman Sachs, Citigroup Global Markets និង Morgan Stanley ។ បើតាមប្រភពពី Bloomberg Billionaires Index នោះ ការកើនឡើងនៃតម្លៃភាគហ៊ុនរបស់ Tesla ក្នុងឆ្នាំ២០២០នេះ អាចនឹងធ្វើអោយទ្រព្យសម្បត្តិរបស់នាយកប្រតិបត្តិ Tesla លោក Elon Musk កើនឡើងពី២៧ពាន់លានដុល្លារដល់១៥៥ពាន់លានដុល្លារ នាំអោយលោកទំនងជាក្លាយជាកំពូលមហាសេដ្ឋីនៅលើពិភពលោកលំដាប់ទី២…
-
សេដ្ឋកិច្ចជប៉ុនងើបឡើងវិញបន្តិច កាលពីត្រីមាសទី៣ ឆ្នាំ២០២០ ក្រោយធ្លាក់ចុះយ៉ាងគំហុក កាលពីអំឡុងត្រីមាសទី២ ឆ្នាំ២០២០
ជប៉ុន៖ សេដ្ឋកិច្ចជប៉ុនបានស្គាល់សញ្ញាងើបឡើងវិញបន្តិច កាលពីត្រីមាសទី៣ ឆ្នាំ២០២០ ពោលគឺចាប់ពីខែកក្កដា ដល់ខែកញ្ញា បន្ទាប់ពីបានធ្លាក់ចុះយ៉ាងគំហុក កាលពីអំឡុងត្រីមាសទី២ ឆ្នាំ២០២០ គឺចាប់ពីខែមេសា ដល់ខែមិថុនា នេះបើតាមសារព័ត៌មាន CNA ។ ដើម្បីជម្រុញកំណើនសេដ្ឋកិច្ចប្រទេសបន្ថែមទៀតនោះ នាយករដ្ឋមន្ត្រីជប៉ុនលោក ស៊ូហ្គា យ៉ូស៊ីហ៊ីដេ បញ្ជាក់ថា ប្រទេសរបស់លោកនឹងរៀបចំអនុវត្តផែនការជម្រុញសេដ្ឋកិច្ចឡើងវិញ តាមរយៈកញ្ចប់ថវិកាសង្គ្រោះ៧៣.៦ទ្រីលានយ៉េន ឬស្មើនឹង៧០៨ពាន់លានដុល្លារ ។ អំឡុងកិច្ចប្រជុំក្រុមប្រឹក្សាប្រតិបត្តិ នៃគណបក្សកាន់អំណាចជប៉ុន LDP នាយករដ្ឋមន្រ្តីជប៉ុនរូបនេះបញ្ជាក់ថា កញ្ចប់ថវិកាសង្គ្រោះសេដ្ឋកិច្ចថ្មីនេះ ក៏នឹងរួមបញ្ចូលនូវការចំណាយនៃឆ្នាំសារពើពន្ធ ដែលមានទឹកប្រាក់សរុប៤០ទ្រីលានយ៉េនផងដែរ ខណៈការសម្រេចចុងក្រោយ និង ជាផ្លូវការធ្វើឡើងនៅក្នុងថ្ងៃអង្គារសប្តាហ៍នេះ ៕
-
លោក ចូ បៃដិន អះអាងថា នឹងចាក់វ៉ាក់សាំង Covid-19 ដល់ប្រជាជន១០០លាននាក់នៅ១០០ថ្ងៃដំបូងនៃការកាន់តំណែង
អាមេរិក៖ ប្រធានាធិបតីជាប់ឆ្នោតសហរដ្ឋអាមេរិកលោក ចូ បៃដិន បានកំណត់គោលដៅចាក់វ៉ាក់សាំងការពារជំងឺ Covid-19 ដល់ប្រជាជនចំនួន១០០លាននាក់ក្នុងរយៈពេល១០០ថ្ងៃដំបូងរបស់លោកនៅក្នុងតំណែង និង ការជម្រុញអោយបើកសាលារៀនឡើងវិញ ក៏ដូចជាការពង្រឹងវិធានការពាក់ម៉ាស់ នេះបើតាមសារព័ត៌មានរ៉យទ័រនៅថ្ងៃទី០៩ ខែធ្នូ ឆ្នាំ២០២០ ។ ប្រធានាធិបតីជាប់ឆ្នោតអាមេរិករូបនេះ បានចូលរួមសន្និសីទសារព័ត៌មានមួយនៅរដ្ឋ ដេឡាវែល ដែលក្នុងអំឡុងពេលនោះ លោកបានណែនាំអគ្គរដ្ឋអាជ្ញារដ្ឋកាលីហ្វ័រនីញ៉ាលោក សាវីយើ បេសេរ៉ា ជារដ្ឋមន្ត្រីក្រសួងសុខាភិបាល និងលោកស្រី រ៉ូឆែល វ៉ាលែនស្គី ជាប្រធានមជ្ឈមណ្ឌលគ្រប់គ្រង និងបង្ការជំងឺ CDC ។ លោក បៃដិន និយាយថា ១០០ថ្ងៃដំបូងរបស់ខ្ញុំ នឹងមិនអាចបញ្ចប់វីរុសកូរ៉ូណាបានទេ… ខ្ញុំមិនអាចសន្យាបានឡើយ ។ លោកបន្តថា ១០០ថ្ងៃដំបូង យើងអាចផ្លាស់ប្តូរទិសដៅនៃជំងឺនេះ និងផ្លាស់ប្តូរជីវិតនៅសហរដ្ឋអាមេរិកឲ្យកាន់តែប្រសើរ ។ លោក បៃដិន ក៏បានព្រមានដែរថា កិច្ចខិតខំប្រឹងប្រែងយកឈ្នះមេរោគនេះ អាចយឺតយ៉ាវ និងជាប់គាំង ប្រសិនបើសភាមិនបញ្ចប់កិច្ចពិភាក្សាទ្វេភាគី និងរកថវិកាជាបន្ទាន់ទេនោះ ៕
-
ឥណ្ឌូណេស៊ីអះអាងថា វ៉ាក់សាំង Covid-19 របស់ក្រុមហ៊ុនផលិតឱសថចិន Sinovac មានប្រសិទ្ធភាពដល់ទៅ៩៧ភាគរយ
ឥណ្ឌូណេស៊ី៖ ក្រុមហ៊ុនឱសថរដ្ឋរបស់ឥណ្ឌូណេស៊ី បាយអូ ហ្វាម៉ា (Bio Farma) នៅថ្ងៃអង្គារនេះបញ្ជាក់ថា ទិន្នន័យបណ្តោះអាសន្នចេញពីការធ្វើតេស្តវ៉ាក់សាំង Covid-19 ដែលផលិតដោយក្រុមហ៊ុនចិន Sinovac បានបង្ហាញថា វាមានប្រសិទ្ធភាពរហូតដល់៩៧ភាគរយ នេះបើតាមសារព័ត៌មានរ៉យទ័រនៅថ្ងៃទី០៩ ខែធ្នូ ឆ្នាំ២០២០ ។ យ៉ាងណាមិញ គេនៅមិនដឹងថាតើលទ្ធផលបណ្តោះអាសន្ននេះ ចេញមកពីការសាកពិសោធន៍ដំណាក់កាលចុងក្រោយឬយ៉ាងណាទេ តែអ្នកនាំពាក្យម្នាក់របស់ក្រុមហ៊ុន បាយអូ ហ្វាម៉ា បាននិយាយថា ក្រុមហ៊ុននៅប្រមូលទិន្នន័យអំពីប្រសិទ្ធភាពរបស់វ៉ាក់សាំងនេះ មកពីការសាកល្បងដំណាក់កាលទី៣នៅឡើយ ។ សូមជម្រាបផងដែរថា កាលពីខែមុននេះ ក្រុមហ៊ុនផលិតឱសថចិន Sinovac បានអះអាងថា មនុស្សពេញវ័យ៩៧ភាគរយដែលទទួលវ៉ាក់សាំងរបស់ខ្លួនតិចដូសក្នុងការសាកល្បងដំណាក់កាលទី១ និងទី២ បានបង្ហាញពីភាពស៊ាំនឹងវីរុស បន្ទាប់ពីការចាក់វ៉ាក់សាំង CoronaVac ៕
-
អ៊ីរ៉ង់ចាប់ខ្លួនជនសង្ស័យមួយចំនួន ដែលជាប់ទាក់ទិននឹងការធ្វើឃាតអ្នកវិទ្យាសាស្ត្រនុយក្លេអ៊ែរ
អ៊ីរ៉ង់៖ សារព័ត៌មានស៊ីនហួរនៅថ្ងៃទី០៩ ខែធ្នូនេះថា ទីប្រឹក្សាប្រធានសភាអ៊ីរ៉ង់នៅថ្ងៃអង្គារនេះបញ្ជាក់ថា សេវាសន្តិសុខអ៊ីរ៉ង់បានកំណត់អត្តសញ្ញាណ និងចាប់ខ្លួនមនុស្សមួយចំនួន ដែលពាក់ព័ន្ធនឹងការធ្វើឃាតអ្នកវិទ្យាសាស្ត្រនុយក្លេអ៊ែរកំពូលរបស់ខ្លួននាពេលថ្មីៗនេះ ។ ទីប្រឹក្សាប្រធានសភាអ៊ីរ៉ង់លោក ហូសិន អាមៀរ អាប់ឌុលឡាហ៊ាន ត្រូវបានទីភ្នាក់ងារសារព័ត៌មាន ISNA ដកស្រង់សម្តីចុះផ្សាយថា ជនល្មើសនៃការធ្វើឃាតនេះ នឹងមិនអាចរត់គេចពីសំណាញ់ច្បាប់បានទេ ។ អ្នកវិទ្យាសាស្ត្រនុយក្លេអ៊ែរអ៊ីរ៉ង់លោក ម៉ូសេន ហ្វាគ្រីហ្សាដេស បានស្លាប់ដោយសាររបួសធ្ងន់នៅក្នុងមន្ទីរពេទ្យកាលពីថ្ងៃទី២៧ ខែវិច្ឆិកាកន្លងទៅ បន្ទាប់ពីការវាយប្រហារដោយអាវុធលើរថយន្តរបស់គាត់ នៅក្នុងសង្កាត់ អាបសាដ មានចម្ងាយ៦០គីឡូម៉ែត្រភាគឦសានរដ្ឋធានី តេហេរ៉ង់ ។ ដោយឡែកបើតាមអ្នកនាំពាក្យឆ្មាំបដិវត្តឥស្លាមអ៊ីរ៉ង់លោក រ៉ាមីហ្សាន ហ្ស៊ារីហ្វ បានប្រកាសកាលពីថ្ងៃអាទិត្យសប្តាហ៍កន្លងទៅថា ឧបករណ៍បញ្ជាដោយផ្កាយរណបត្រូវបានប្រើ ក្នុងការធ្វើឃាតលោក ហ្វាគ្រីហ្សាដេស ខណៈអ៊ីរ៉ង់បានចោទប្រកាន់អ៊ីស្រាអែលថា ជាអ្នកនៅពីក្រោយការធ្វើឃាតនេះ ៕
-
SpaceX នឹងទទួលបានជំនួយហិរញ្ញវត្ថុជិត៩០០លានដុល្លារពីរដ្ឋាភិបាលអាមេរិក ដើម្បីយកទៅអភិវឌ្ឍន៍បណ្តាញផ្កាយរណបអ៊ីនធើណិតរបស់ខ្លួន
អាមេរិក៖ ក្រុមហ៊ុនអវកាសអាមេរិក SpaceX នឹងទទួលបានជំនួញហិរញ្ញវត្ថុចំនួន៨៨៥.៥លានដុល្លារ ពីគណៈកម្មការទូរគមនាគមន៍ FCC របស់រដ្ឋាភិបាលអាមេរិក ដើម្បីគាំទ្រដល់គម្រោងកសាងបណ្តាញផ្កាយរណបអ៊ីនធើណិត Starlink នេះបើតាមសារព័ត៌មាន ស្ពូតនីគ នៅថ្ងៃទី០៨ ខែធ្នូ ឆ្នាំ២០២០ ។ ទឹកប្រាក់ដែល SpaceX នឹងទទួលបាននោះ ស្ថិតក្រោមកម្មវិធីដេញថ្លៃដំណាក់កាលទី១ ដែលមានទំហំសរុប៩.២ពាន់លានដុល្លារ ហើយជាផ្នែកនៃគម្រោងមូលនិធិ សម្រាប់ផ្តល់ឱកាសអភិវឌ្ឍន៍បែបឌីជីថលនៅតាមទីជន បទអាមេរិក Rural Digital Opportunity Fund របស់គណៈកម្មការ FCC ដែលមានទំហំ២០.៤ពាន់លានដុល្លារ ។ ទឹកប្រាក់នៃគម្រោងមូលនិធិនេះ នឹងត្រូវចែកចាយក្នុងអំឡុងពេល១០ឆ្នាំខាងមុខនេះ ។ ម្យ៉ាងវិញទៀត កម្មវិធីដេញថ្លៃដំណាក់កាលទី១ នៃគម្រោងមូលនិធិខាងលើនេះក៏ជាផ្នែកមួយនៃកិច្ចប្រឹងប្រែងរបស់គណៈកម្មការទូរគមនាគមន៍ FCC ក្នុងការជំរុញឲ្យក្រុមហ៊ុនផ្តល់សេវាអ៊ីនធើណិតនៅក្នុងសហរដ្ឋអាមេរិក ព្យាយាមនាំយកសេវាកម្មពួកវាទៅកាន់តំបន់ដាច់ស្រយាលឆ្ងាយៗ ដែលពិបាកនឹងទៅដល់ ៕