-
ទីបំផុតឥណ្ឌូណេស៊ីទទួលបានវ៉ាក់សាំង Covid-19 ដំបូងចំនួន១.២លានដូសពីក្រុមហ៊ុនផលិតឱសថ ស៊ីណូវ៉ាក់ របស់ចិន
ឥណ្ឌូនេស៊ី៖ សារព័ត៌មានរ៉យទ័រចុះផ្សាយនៅថ្ងៃ០៧ ខែធ្នូនេះថា ឥណ្ឌូណេស៊ីបានទទួលវ៉ាក់សាំងការពារ COVID-19 ដំបូង ដែលដឹកតាមកប៉ាល់ពីប្រទេសចិនហើយ នៅថ្ងៃអាទិត្យសប្តាហ៍មុននេះ ។ ប្រធានាធិបតីឥណ្ឌូណេស៊ីលោក ចូកូ វីដូដូ ក៏បានធ្វើសេចក្តីប្រកាសមួយតាមប្រព័ន្ធអនឡាញដែរថា ឥប្រទេសរបស់លោកបានទទួលវ៉ាក់សាំងកូវីដ-១៩ ជាលើកដំបូងចំនួន១.២លានដូសពីក្រុមហ៊ុនចិន ស៊ីណូវ៉ាក់ (Sinovac Biotech) ដែលវ៉ាក់សាំងប្រភេទនេះ ឥណ្ឌូណេស៊ីធ្លាប់ទទួកយកមកធ្វើតេស្តទ្រង់ទ្រាយធំកាលពីខែសីហាកន្លងទៅនេះ។ ប្រធានាធិបតីឥណ្ឌូណេស៊ីរូបនេះ បានសង្កត់ធ្ងន់ថា ប្រទេសរបស់លោកនឹងត្រៀមទទួលវ៉ាក់សាំងដដែលនេះ ចំនួន១.៨លានដូសទៀតនៅដើមខែមករា ឆ្នាំ២០២១ ហើយថា នៅពេលដែលយើងសម្រេចថានឹងប្រើវាបាន នោះយើងអាចចាប់ផ្តើមចាក់វ៉ាក់សាំង ហើយអ្វីគ្រប់ៗយ៉ាងនឹងត្រូវត្រៀមអោយរួចរាល់ ៕
-
ក្រុមហ៊ុនឱសថចិន Sinovac វិនិយោគ៥១៥លានដុល្លារ ដើម្បីជំរុញផលិតកម្មផលិតវ៉ាក់សាំង Covid-19
ចិន៖ ក្រុមហ៊ុនផលិតឱសថចិន ស៊ីណូវ៉ាក់ បាយអូធិច បានផ្តល់ប្រាក់៥១៥លានដុល្លារដល់ក្រុមហ៊ុនក្នុងស្រុកមួយ ដើម្បីបង្កើនសមត្ថភាពផលិតវ៉ាក់សាំង Covid-19 ខណៈក្រុមហ៊ុននេះត្រូវបានគេរំពឹងថា នឹងបញ្ចេញចាក់អោយសាធារណៈជនទូទៅក្នុងខែធ្នូនេះតែម្តង នេះបើតាមសាររ៉យទ័រនៅថ្ងៃទី០៧ ខែធ្នូ ឆ្នាំ២០២០ ។ ជាមួយគ្នានេះ ក្រុមហ៊ុន Sino Biopharmaceutical របស់ចិនបានបញ្ជាក់នៅថ្ងៃចន្ទនេះថា អង្គភាពធុរកិច្ចមួយនឹងវិនិយោគប្រាក់៥១៥លានដុល្លារទៅក្នុងក្រុមហ៊ុន Sinovac Life Sciences ដែលជាសាខាមួយរបស់ក្រុមហ៊ុនផលិតឱសថ Sinovacដើម្បីជួយអភិវឌ្ឍ និងផលិតវ៉ាក់សាំង CoronaVac ។ បើតាម Sinovac Biotech ខ្លួនរំពឹងថា នឹងផលិតវ៉ាក់សាំង Covid-19 ចំនួន៣០០លានដូសក្នុងមួយឆ្នាំ និងមានបំណងសង់បញ្ចប់រោងចក្រផលិតវ៉ាក់សាំងទី២នៅយ៉ាងយូរត្រឹមចុងឆ្នាំ២០២០ខាងមុខ ដើម្បីបង្កើនផលិតកម្មវ៉ាក់សាំងប្រចាំឆ្នាំអោយដល់៦០០លានដូស ៕
-
វ៉ាក់សាំងកូវីដ១៩ ផលិតនៅវៀតណាម នឹងផ្តើមចាក់លើមនុស្ស នាថ្ងៃទី១០ ធ្នូ
វៀតណាមនឹងចាប់ផ្តើមចាក់វ៉ាក់សាំងប្រឆាំងកូវីដ១៩ ជាវ៉ាក់សាំងផលិតដោយក្រុមហ៊ុនវេជ្ជសាស្ត្រនៅប្រទេសវៀតណាមឈ្មោះថា Nanogen Pharmaceutical Biotechnology ចាប់ពីថ្ងៃទី១០ ធ្នូ ២០២០ខាងមុខនេះ។ រដ្ឋមន្ត្រីសុខាភិបាលវៀតណាម Nguyen Thanh Long បាននិយាយថា ក្រុមហ៊ុននេះនឹងសហការជាមួយពេទ្យយោធាវៀតណាម ក្នុងការចាប់ផ្តើមប្រមូលកម្លាំងស្ម័គ្រចិត្ត ចូលរួមក្នុងការសាកល្បងចាក់លើមនុស្សលើកដំបូងនេះ ដោយអ្នកស្ម័គ្រចិត្តទាំងនេះនឹងត្រូវផ្តល់វ៉ាក់សាំងឲ្យចាក់ ១សប្តាហ៍ បន្ទាប់។ ក្រសួងសុខាភិបាលថា អ្នកស្ម័គ្រចិត្តចាក់វ៉ាក់សាំងដំបូង មានចំនួនប្រមាណ២០នាក់ មានអាយុចាប់ពី១៨ ដល់ ៤០ឆ្នាំ។ រដ្ឋមន្ត្រីក៏បានប្រាប់ដល់អ្នកពាក់ព័ន្ធត្រៀមរៀបចំការសាកល្បងលើមនុស្ស ដំណាក់កាលទី២ទៀតដែរ។ វៀតណាម បច្ចុប្បន្ននេះ មានស្ថាប័នចំនួន៤កំពុងផលិតវ៉ាក់សាំងប្រឆាំងវីរុសកូវីដ១៩ ហើយក្រៅពី Nanogen ដែលគេផ្តល់អាទិភាពមុនគេនេះ ក៏មានបីស្ថាប័នទៀត រួមមាន៖ Vabiotech, Polyvac និងវិទ្យាស្ថាន Vaccines and Medical Biologicals (IVAC)។ ក្រសួងសុខាភិបាលក៏បានឲ្យដឹងដែរថា វ៉ាក់សាំងផលិតដោយ Nanogen នេះក៏ធ្លាប់តេស្តលើសត្វដែរ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៦៧លាននាក់ ក្នុងនោះស្លាប់ជាង១លាន៥៤ម៉ឺននាក់ និងជាសះស្បើយជាង៤៦លាន៥៧ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦៧លាន៣៨ម៉ឺន៥ពាន់២៨៥ករណី ក្នុងនោះមានអ្នកជម្ងឺសរុបចំនួន១លាន៥៤ម៉ឺន១ពាន់៦៣៨នាក់ស្លាប់ និង ជាសះស្បើយឡើងវិញសរុបចំនួន៤៦លាន៥៧ម៉ឺន៨ពាន់៨៩៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៧ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៥លាន១៥ម៉ឺន៩ពាន់៥២៩នាក់ ស្លាប់ចំនួន២៨ម៉ឺន៨ពាន់៩០៦នាក់ និងជាសះស្បើយចំនួន៨លាន៨៥ម៉ឺន៥ពាន់៥៩៣នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៦៧ម៉ឺន៦ពាន់៨០១នាក់ ស្លាប់ចំនួន១៤ម៉ឺន៥៩០នាក់ និងជាសះស្បើយ៩លាន១៣ម៉ឺន៨ពាន់១៧១នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៦០ម៉ឺន៣ពាន់៥៤០នាក់ ស្លាប់១៧ម៉ឺន៦ពាន់៩៦២នាក់ និងជាសះស្បើយ៥លាន៧៧ម៉ឺន៦ពាន់១៨២នាក់ ៕
-
ទីបំផុតយានអវកាសជប៉ុន Hayabusa-2 ទទួលជោគជ័យ ក្នុងការទម្លាក់គំរូតាងអាចម៍ផ្កាយចុះមកផែនដី
ជប៉ុន៖ ប្រទេសជប៉ុននៅថ្ងៃអាទិត្យម្សិលមិញបញ្ជាក់ថា យានស្រាវជ្រាវ Hayabusa-2 របស់ខ្លួនបានទទួលជោគជ័យទាំងស្រុង ក្នុងការទម្លាក់គំរូតាងអាចម៍ផ្កាយ Ryugu ទៅលើទឹកដីអូស្ត្រាលីខាងត្បូង នេះបើតាមសារព័ត៌មានរ៉យទ័រចុះផ្សាយនៅថ្ងៃទី០៦ ខែធ្នូ ឆ្នាំ២០២០ ។ ឧបករណ៍ផ្ទុកតូចមួយ ត្រូវបានទម្លាក់ទៅលើតំបន់ដាច់ស្រយាល មានចម្ងាយ ៥០០គីឡូម៉ែត្រពីភាគពាយ័ព្យទីក្រុង Adelaide រដ្ឋអូស្ត្រាលីខាងត្បូង ។ វាគឺជាគំរូតាងនៃអាចម៍ផ្កាយទី២ មកកាន់ផែនដី បន្ទាប់ពីបេសកកម្ម Hayabusa កាលពីឆ្នាំ២០១០ បាននាំយកគំរូតាងពីអាចម៍ផ្កាយ Itokawa ។ បើតាមការគ្រោងទុកនោះ គំរូតាងពាក់កណ្តាលនឹងត្រូវចែករំលែករវាងទីភ្នាក់ងារអវកាសជប៉ុន JAXA, ទីភ្នាក់ងារអវកាសអាមេរិក NASA និងអង្គការអន្តរជាតិដទៃទៀត ហើយនៅសល់ប៉ុន្មាន គឺសម្រាប់ការសិក្សាស្រាវជ្រាវពេលក្រោយ ដោយប្រើប្រាស់បច្ចេកវិទ្យាវិភាគថ្មីៗនាថ្ងៃអនាគត ។ យ៉ាងណាមិញ បេសកកម្មរបស់យានស្រាវជ្រាវ Hayabusa-2 មិនទាន់ចប់នោះទេ គឺក្រោយទម្លាក់គំរូតាងរបស់ Ryugu ហើយ វានឹងបន្តឆ្ពោះទៅកាន់គោលដៅជាអាចម៍ផ្កាយចំនួនពីរផ្សេងទៀត ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៦៦លាននាក់ ក្នុងនោះស្លាប់ជាង១លាន៥២ម៉ឺននាក់ និងជាសះស្បើយជិត៤៦លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦៦លាន២៣ម៉ឺន៩១២ករណី ក្នុងនោះមានអ្នកជម្ងឺសរុបចំនួន១លាន៥២ម៉ឺន៤ពាន់៤៥៧នាក់ស្លាប់ និង ជាសះស្បើយឡើងវិញសរុបចំនួន៤៥លាន៨១ម៉ឺន២ពាន់៤០៦នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៥ ខែធ្នូ ឆ្នាំ២០២០ ។សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៤លាន៧៧ម៉ឺន២ពាន់៥៣៥នាក់ ស្លាប់ចំនួន២៨ម៉ឺន៥ពាន់៥៥០នាក់ និងជាសះស្បើយចំនួន៨លាន៦៥ម៉ឺន៨ពាន់៨៨២នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៦០ម៉ឺន៨ពាន់៤១៨នាក់ ស្លាប់ចំនួន១៣ម៉ឺន៩ពាន់៧៣៦នាក់ និងជាសះស្បើយ៩លាន៥ម៉ឺន៨ពាន់៨២២នាក់ ។ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៥៣ម៉ឺន៤ពាន់៩៥១នាក់ ស្លាប់១៧ម៉ឺន៥ពាន់៩៨១នាក់ និងជាសះស្បើយ៥លាន៧៤ម៉ឺន៤ពាន់៣៦៩នាក់ ៕
-
ប្រមុខអង្គការ WHO អំពាវនាវអោយគ្រប់គ្នារក្សាការការពារខ្លួន បើទោះបីជាវ៉ាក់សាំង Covid-19 ផលិតជិតបានសម្រេច
ស្វីស៖ សារព័ត៌មានរ៉យទ័រចុះផ្សាយនៅថ្ងៃទី០៥ ខែធ្នូនេះថា អង្គការសុខភាពពិភពលោក WHO ព្រមានដល់រដ្ឋាភិបាល និងប្រជាជនទាំងអស់ មិនត្រូវបោះបង់ចោលវិធានការការពារខ្លួនពីជំងឺ COVID-19 ព្រោះតែឃើញវ៉ាក់សាំងប្រឆាំងនឹងវីរុសនេះជិតសម្រេចបានជោគជ័យនោះឡើយ ។ថ្លែងនៅក្នុងសន្និសិទសារព័ត៌មានមួយពីទីក្រុងហ្ស៊ឺណែវ ប្រទេសស្វីស ប្រធានអង្គការសុខភាពពិភពលោក WHO លោក ថេដ្រូស អាដាណម បានបញ្ជាក់ថាដំណើរការទៅលើវ៉ាក់សាំងនានាបានផ្តល់ឲ្យយើងគ្រប់គ្នានូវការលើកទឹកចិត្តមួយ ហើយយើងអាចចាប់ផ្តើមមើលឃើញពន្លឺនៅខាងចុងនៃផ្លូវដ៏ងងឹត ។ លោកបានសង្កត់ធ្ងន់ថា យ៉ាងណាមិញ អង្គការ WHO ពិតជាមានការព្រួយបារម្ភ ចំពោះការយល់ច្រលំដែលកាន់តែកើនឡើងថា ជំងឺរាតត្បាតសកល COVID-19 នេះបញ្ចប់ទៅហើយ ។សូមជម្រាបថា ការព្រមានបែបនេះរបស់ WHO ធ្វើឡើងបន្ទាប់ពីអង់គ្លេសបានក្លាយជាប្រទេសដំបូងគេនៅលើពិភពលោក ដែលបានអនុម័តជាផ្លូវការឲ្យប្រើប្រាស់វ៉ាក់សាំង COVID-19 របស់ក្រុមហ៊ុនផលិតឱសថអាមេរិកសហការជាមួយអាល្លឺម៉ង់គឺ ភីហ្វីហ្សឺ និង បាយអូអិនធិច នៅក្នុងករណីបន្ទាន់ ៕
-
នាយករដ្ឋមន្រ្តីឥណ្ឌាបញ្ជាក់ថា វ៉ាក់សាំង Covid-19 អាចនឹងផលិតរួចរាល់នៅឥណ្ឌាក្នុងប៉ុន្មានសប្តាហ៍ខាងមុខនេះ
ឥណ្ឌា៖ សារព័ត៌មានស៊ីនហួរចុះផ្សាយនៅថ្ងៃទី០៥ ខែធ្នូនេះថា នាយករដ្ឋមន្រ្តីឥណ្ឌាលោក ណារិន ដ្រាម៉ូឌី នៅថ្ងៃសុក្រនេះប្រកាសថា វ៉ាក់សាំងការពារជំងឺ Covid-19 អាចនឹងផលិតរួចរាល់នៅក្នុងប្រទេសរបស់ខ្លួនក្នុងរយៈពេលពីរទៅបីសប្តាហ៍ខាងមុខនេះ ។លោក ម៉ូឌី បានបញ្ជាក់ថា តម្លៃវ៉ាក់សាំងបាននិងកំពុងពិភាក្សាជាមួយបណ្តារដ្ឋ ហើយការចែកចាយវ៉ាក់សាំងនៅទូទាំងប្រទេសវិញ នឹងចាប់ផ្តើមនាពេលឆាប់ៗខាងមុខនេះ ពោលគឺនៅពេលដែលរដ្ឋាភិបាលសហព័ន្ធទទួលបានការយល់ព្រមពីក្រុមអ្នកវិទ្យាសាស្រ្តឥណ្ឌា ។នាយករដ្ឋមន្រ្តីឥណ្ឌារូបនេះបានសង្កត់ធ្ងន់ថា វ៉ាក់សាំងចំនួន០៣នៅឥណ្ឌា គឺស្ថិតក្នុងតំណាក់កាលផ្សេងៗគ្នា… អ្នកជំនាញបានរំពឹងថា វ៉ាក់សាំងនេះគឺនឹងមិនប្រើពេលយូរទៀតនោះទេ វាប្រហែលជាពីរទៅបីសប្តាហ៍ទៀតប៉ុណ្ណោះ.. វ៉ាក់សាំងអាចនឹងផលិតរួចរាល់នៅឥណ្ឌា ។ លោក ម៉ូឌី បន្ថែមទៀតថា អាទិភាពដំបូងគេនឹងត្រូវបានផ្តល់ជូនដល់ក្រុមបុគ្គលិកជួរមុខ ដែលជាអ្នកឈានមុខគេក្នុងការប្រយុទ្ធប្រឆាំងនឹងការឆ្លងមេរោគ កូរ៉ូណា ៕
-
រដ្ឋធានីម៉ូស្គូ របស់ប្រទេសរុស្ស៊ី នឹងចាប់ផ្តើមកម្មវិធីចាក់វ៉ាក់សាំង Covid-19 ទ្រង់ទ្រាយធំ
រុស្ស៊ី៖ អភិបាលក្រុងម៉ូស្គូលោក សឺហ្គេ សប់ប្យ៉ាននីន បានប្រកាសនៅថ្ងៃសុក្រនេះថា រដ្ឋធានីរបស់ប្រទេសរុស្ស៊ីនេះ នឹងចាប់ផ្តើមកម្មវិធីចាក់វ៉ាក់សាំងទ្រង់ ទ្រាយធំរបស់ខ្លួន ដើម្បីប្រឆាំងនឹងជំងឺ Covid-19 នេះបើតាមសារព័ត៌មានស៊ីនហួរនៅថ្ងៃទី០៥ ខែធ្នូ ឆ្នាំ២០២០ ។អភិបាលក្រុង ម៉ូស្គូ បានបង្ហោះសារនៅលើបណ្តាញសង្គមរបស់លោកថា បុគ្គលិកពេទ្យ គ្រូបង្រៀន ព្រមទាំងបុគ្គលិកផ្តល់សេវាសង្គម នឹងក្លាយជាអ្នកដំបូងគេដែលបានទទួលការចាក់វ៉ាក់សាំង ដោយសារតែពួកគេជាក្រុមងាយរងគ្រោះបំផុត ខណៈដែលមនុស្ស៥ពាន់នាក់ផ្សេងទៀតបានចុះឈ្មោះរួចរាល់ហើយសម្រាប់ការចាក់វ៉ាក់សាំង ។ការលើកឡើងខាងលើនេះរបស់លោក សឺហ្គេ សប់ប្យ៉ាននីន ត្រូវបានធ្វើឡើងក្រោយប្រធានាធិបតីរុស្ស៊ីលោក វ៉្លាឌីមៀរ ពូទីន នៅថ្ងៃពុធនេះ បានបញ្ជាអោយរដ្ឋាភិបាលចាប់ផ្តើមចាក់វ៉ាក់សាំង Covid-19 ជូនដល់ប្រជាជនជាលក្ខណៈទ្រង់ទ្រាយធំនាសប្តាហ៍ក្រោយនេះ ស្របពេលដែលចំនួនវ៉ាក់សាំងដែលបានផលិតមានប្រមាណជិត២លានដូស ៕
-
លោក ដូណាល់ ត្រាំ បញ្ជាអោយដកកងទ័ពចេញពីសូម៉ាលី បន្ទាប់ពីការកាត់បន្ថយចំនួនទាហាននៅអាហ្វហ្គានីស្ថាន និងអ៊ីរ៉ាក់
អាមេរិក៖មន្ទីរបញ្ចកោណនៅថ្ងៃសុក្រនេះបញ្ជាក់ថា ប្រធានាធិបតីអាមេរិកលោក ដូណាល់ ត្រាំ បានបញ្ជាអោយដកយោធានិងបុគ្គលិកសន្តិសុខអាមេរិកចេញពីប្រទេសសូម៉ាលី ជាទីដែលពួកគេធ្វើប្រតិបត្តិការប្រឆាំងនឹងក្រុមសកម្មប្រយុទ្ធអាល់-សាបាប នេះបើតាមសារព័ត៌មាន CNA នៅថ្ងៃទី០៥ ខែធ្នូ ឆ្នាំ២០២០ ។បើតាមសេចក្តីថ្លែងការណ៍របស់មន្ទីរបញ្ចកោណ លោក ត្រាំ បានបញ្ជាអោយក្រសួងការពារជាតិ និងបញ្ជាការអាហ្វ្រិករបស់សហរដ្ឋអាមេរិក ដូរទីតាំងបុគ្គលិកនិងទ្រព្យសម្បត្តិភាគច្រើនចេញពីសូម៉ាលីយ៉ាងយូរត្រឹមឆ្នាំ២០២១ ។ ប៉ុន្តែក្រសួង ការពារជាតិអាមេរិកបញ្ជាក់ថា សហរដ្ឋអាមេរិកមិនដកចេញ ឬឈប់ចូលរួមពាក់ព័ន្ធជាមួយអាហ្វ្រិកទេ.. យើងបន្តកាត់បន្ថយអង្គការជ្រុលនិយមហិង្សានានា ដែលអាចគំរាមមាតុភូមិរបស់យើង ក្នុងពេលធានាថា យើងបន្តរក្សាគុណតម្លៃយុទ្ធសាស្ត្ររបស់យើងនៅក្នុងការប្រកួតប្រជែងរបស់មហាអំណាច ។សូមបញ្ជាក់ថា បញ្ជាការអាហ្វ្រិកអាមេរិកបានរក្សាទុកទាហាន និងបុគ្គលិកប្រមាណ៧០០នាក់មកពីប្រតិបត្តិការសន្តិសុខអាមេរិក និងក្រុមហ៊ុនម៉ៅការសន្តិសុខឯកជននៅសូម៉ាលី ដែលអង្គភាពទាំងពីរធ្វើប្រតិបត្តិការប្រឆាំងពួកអាល់-សាបាប ហើយជួយបណ្តុះបណ្តាលកងកម្លាំងសូម៉ាលីចាប់តាំងពីដើមទសវត្សរ៍ឆ្នាំ២០០០មក ៕