-
លោក ចូ បៃដិន និងប្រមុខអង្គការសហប្រជាជាតិពិភាក្សាអំពីការពង្រឹងភាពជាដៃគូដោះស្រាយ Covid-19 និងបញ្ហាប្រែប្រួលអាកាសធាតុ
អាមេរិក៖ ប្រធានាធិបតីជាប់ឆ្នោតអាមេរិកលោក ចូ បៃដិន បាននិយាយជាមួយអគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូដទែរ៉េស នៅថ្ងៃចន្ទនេះ ដោយពិភាក្សាអំពីតម្រូវការសម្រាប់ភាពជាដៃគូ ដើម្បីប្រយុទ្ធប្រឆាំងនឹងជំងឺ Covid-19 និងការប្រែប្រួលអាកាសធាតុជាបញ្ហាពីរ ដែលលោក ដូណាល់ ត្រាំ បានបដិសេធដំណោះស្រាយពហុភាគី នេះបើតាមសារព័ត៌មានរ៉យទ័រនៅថ្ងៃ០១ ខែធ្នូ ឆ្នាំ២០២០ ។ លោក ដូណាល់ ត្រាំ បានសំដៅទៅលើការប្រែប្រួលអាកាសធាតុថា ជាការបោកបញ្ឆោត ហើយនៅឆ្នាំ២០១៧ បានដកសហរដ្ឋអាមេរិកចេញពីកិច្ចព្រមព្រៀងពិភពលោក ដើម្បីដោះស្រាយការប្រែប្រួលអាកាសធាតុ ជាការសម្រេចចិត្តដែលបានចូលធរមាននៅថ្ងៃទី០៤ ខែវិច្ឆិកាកន្លងទៅ ។ ដោយឡែកលោក ចូ បៃដិន បានសន្យាថា នឹងចូលរួមកិច្ចព្រមព្រៀងនេះឡើងវិញ ដែលបានព្រមព្រៀងកាលពីឆ្នាំ២០១៥ ។ ក្រុមរបស់លោក បៃដិន បាននិយាយក្នុងសេចក្តីថ្លែងការណ៍មួយថា លោក បៃដិន និងលោក ហ្គូដទែរ៉េស ក៏បានពិភាក្សាផងដែរអំពី ការដោះស្រាយតម្រូវការមនុស្សធម៌ ការជម្រុញការអភិវឌ្ឍប្រកបដោយចីរភាព ការលើកកម្ពស់សន្តិភាព និងសន្តិសុខ ការដោះស្រាយជម្លោះ និងការលើកកម្ពស់លទ្ធិប្រជាធិបតេយ្យ និងសិទ្ធិមនុស្ស ។ លោក…
-
អ្នកជំនាញអាមេរិកបញ្ជាក់ថា ចិនផ្តល់វ៉ាក់សាំង Covid-19 ដល់មេដឹកនាំកំពូលកូរ៉េខាងជើង
ចិន៖ សារព័ត៌មានរ៉យទ័រចុះផ្សាយនៅថ្ងៃទី០១ ខែធ្នូនេះថា ចិនបានផ្តល់វ៉ាក់សាំង COVID-19 ទៅអោយមេដឹកនាំកំពូលកូរ៉េខាងជើង លោក គីម ជុងអ៊ុន និងក្រុមគ្រួសាររបស់លោកផងដែរ នេះបើតាមអ្នកជំនាញអាមេរិក ដែលដកស្រង់ដោយប្រភពចំនួនពីរបានមកពីក្រុមស៊ើបការណ៍សម្ងាត់ជប៉ុន (មិនបញ្ចេញអត្តសញ្ញា ណ) ។ អ្នកជំនាញអាមេរិកឈ្មោះ ហារី កាហ្ស៊ីយ៉ានីស គឺជាអ្នកដែលបានទទួលប្រភពពីក្រុមស៊ើបការណ៍សម្ងាត់ជប៉ុនខាងលើនេះ បានបញ្ជាក់ចេញពីរដ្ឋធានីវ៉ាស៊ីនតោនថា លោក គីម ជុងអ៊ុន និងក្រុមគ្រួសារលោក ព្រមទាំងមន្ត្រីកំពូលៗរបស់កូរ៉េខាងជើងផងដែរ បានចាក់វ៉ាក់សាំង COVID-19 របស់ចិននោះរួចហើយ ។ ប៉ុន្តែប្រភពខាងលើមិនទាន់អាចបញ្ជាក់បានទេ ថាតើវ៉ាក់សាំងដែលចិនបានផ្តល់អោយកូរ៉េខាងជើងនោះ ជាបេក្ខភាពវ៉ាក់សាំង ឬក៏ជាវ៉ាក់សាំងដែលទទួលបានការអនុម័តប្រកបដោយប្រសិទ្ធភាព និងសុវត្ថិភាព ។ ទន្ទឹមគ្នា ទាំងចិន និង កូរ៉េខាងជើងនៅមិនទាន់បញ្ចេញប្រតិកម្មណាមួយ ចំពោះការអះអាងដោយអ្នកជំនាញខាងលើនេះនៅឡើយទេ ៕
-
ក្រុមហ៊ុនផលិតឱសថ Moderna ស្នើសុំការអនុញ្ញាតជាបន្ទាន់ក្នុងការចាក់វ៉ាក់សាំង Covid-19 របស់ខ្លួនក្នុងសហរដ្ឋអាមេរិក និងអឺរ៉ុប
អាមេរិក៖ សារព័ត៌មាន CNA ចុះផ្សាយនៅថ្ងៃទី៣០ ខែធ្នូនេះថា ក្រុមហ៊ុនផលិតឱសថអាមេរិក ម៉ូឌែណា នឹងដាក់ពាក្យស្នើសុំការអនុញ្ញាតជាបន្ទាន់ ក្នុងការចាក់វ៉ាក់សាំង Covid-19 របស់ខ្លួនក្នុងសហរដ្ឋអាមេរិក និងអឺរ៉ុប ។ សំណើរខាងលើនេះត្រូវបានធ្វើឡើងបន្ទាប់ពីលទ្ធផលថ្មី នៃការតេស្តសាកល្បងបេក្ខជនវ៉ាក់សាំងរបស់ក្រុមហ៊ុនផលិតឱសថអាមេរិក ម៉ូឌែណា មានប្រសិទ្ធភាព ៩៤.១% ក្នុងការការពារកុំឆ្លងជំងឺ និងមានប្រសិទ្ធភាព ១០០% ក្នុងប្រឆាំងនឹងអាការៈធ្ងន់ធ្ងរ ។ សូមជម្រាបថា ម៉ូឌែណា ជាក្រុមហ៊ុនទី២ហើយ ដែលស្វែងរកការអនុញ្ញាតឲ្យប្រើប្រាស់ជាបន្ទាន់ពីរដ្ឋបាលចំណីអាហារ និងឱសថអាមេរិក FDA បន្ទាប់ពីក្រុមហ៊ុន ភីហ្វីហ្ស៊ឺ បានដាក់ពាក្យសុំការអនុញ្ញាតដូចគ្នាកាលពីថ្ងៃទី២០ ខែវិច្ឆិកាកន្លងទៅ ហើយការប្រកាសនេះមានន័យថា ប្រជាជនអាមេរិកខ្លះអាចទទួលបានវ៉ាក់សាំងដូសទី១ ក្នុងរយៈពេលប៉ុន្មានសប្តាហ៍ទៀតនេះ ៕
-
សារព័ត៌មាន The Wall Street Journal រាយការណ៍ថា Facebook នឹងចំណាយប្រាក់១ពាន់លានដុល្លារ ដើម្បីទិញយកក្រុមហ៊ុន «Kustomer»
អាមេរិក៖ សារព័ត៌មាន The Wall Street Journal បានរាយការណ៍ថា ក្រុមហ៊ុន បណ្តាញសង្គមលំដាប់ពិភពលោក Facebook នឹងធ្វើការចំណាយប្រាក់១ពាន់លានដុល្លារ ដើម្បីទិញយក «Kustomer» ជាក្រុមហ៊ុនផ្ដល់សេវាកម្មអតិថិជនតាមប្រព័ន្ធអនឡាញថ្មីមួយ ។ បើតាមសារព័ត៌មានរ៉យទ័រ ប្រសិនបើ Facebook ទិញក្រុមហ៊ុន Kustomer មែននោះ ក្រុមហ៊ុនបណ្តាញសង្គមយក្សមួយនេះ នឹងពង្រីកការផ្ដល់សេវាកម្ម និងការសន្ទនាជាមួយអ្នកប្រើប្រាស់បន្ថែមទៀតនៅក្នុងកម្មវិធី Facebook Messenger និង Instagram ។ ប្រភពដដែលបានអោយដឹងទៀតថា ក្រុមហ៊ុន Facebook ក៏នឹងដាក់ចូលសេវាកម្មថ្មីនេះ ទៅកាន់កម្មវិធី WhatsApp ផងដែរ ខណៈ WhatsApp កំពុងតែសាកល្បងក្នុងការលក់ទំនិញតាមអនឡាញនៅលើកម្មវិធីរបស់ខ្លួន ៕
-
ចាប់ពីឆ្នាំ២០២២ កាណាដានឹងចាប់ផ្ដើមប្រមូលពន្ធលើក្រុមហ៊ុនផ្ដល់សេវាកម្មឌីជីថល
កាណាដា៖ សារព័ត៌មានរ៉យទ័រចុះផ្សាយនៅថ្ងៃទី០១ ខែធ្នូនេះថា កាណាដានឹងដាក់ពន្ធលើសាជីវកម្ម ដែលផ្តល់សេវាកម្មឌីជីថលចាប់ពីឆ្នាំ២០២២ខាងមុខ លើក្រុមហ៊ុនបច្ចេកវិទ្យាធំៗ ប៉ុន្តែក្រុមហ៊ុនទាំងនោះ មានសិទ្ធិមកពិភាក្សាជាមួយរដ្ឋាភិបាលដើម្បីដោះស្រាយបញ្ហាពន្ធ នេះបើតាមក្រសួងហិរញ្ញវត្ថុកាណាដា ។ បើតាមការគ្រោងទុកនោះ ការដាក់ពន្ធលើក្រុមហ៊ុនផ្ដល់សេវាកម្មឌីជីថលខាងលើនេះ នឹងត្រូវចាប់ផ្តើមអនុវត្តពីថ្ងៃទី០១ ខែមករា ឆ្នាំ២០២២តទៅ ដោយសារតែពេលនេះ ទុកពេលអោយមានការសិក្សាបន្ថែមទាំងហានិភ័យ និងបញ្ហាសេដ្ឋកិច្ចជាតិ ។ បន្ថែមលើនេះ នាយកដ្ឋានសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ចកាណាដាក៏កំពុងសិក្សា និងស្វែងរកវិធីសាស្រ្តរួមមួយ ដើម្បីធានាអោយបាននូវក្រុមហ៊ុនឌីជីថលដូចជា Google និង Facebook ងាយស្រួលក្នុងការបង់ពន្ធ ជាពិសេសពន្ធដែលជាករណីលើកលែង ប៉ុន្តែទោះជាយ៉ាងណាក៏ក្រុមហ៊ុនទាំងនេះនៅតែជាប់ពន្ធផងដែរ ៕
-
ក្រុមហ៊ុនអាកាសចរណ៍ EasyJet របស់អង់គ្លេស នឹងសហការជាមួយក្រុមហ៊ុនធ្វើតេស្តរក Covid-19 ដើម្បីផ្តល់ការបញ្ចុះតម្លៃដល់អ្នកដំណើរ
អង់គ្លេស៖ សារព័ត៌មានរ៉យទ័រចុះផ្សាយនៅថ្ងៃ៣០ ខែវិច្ឆិកាថា ក្រុមហ៊ុនអាកាសចរណ៍អង់គ្លេស EasyJet នឹងសហការជាមួយក្រុមហ៊ុនធ្វើតេស្តរក COVID-19 ក្នុងការផ្តល់ការបញ្ចុះតម្លៃដល់អ្នកធ្វើដំណើរ ដើម្បីព្យាយាមជម្រុញការធ្វើដំណើរបន្ថែមទៀត ។ ក្រោយមានការរឹតត្បិតលើការធ្វើដំណើរអស់រយៈពេលជាច្រើនខែ ក្រុមហ៊ុនអាកាសចរណ៍ និងអាកាសយានដ្ឋានកំពុងសហការជាមួយក្រុមហ៊ុនធ្វើតេស្តរក Covid-19 ដើម្បីធ្វើអោយការធ្វើតេស្តរកវីរុសកាន់តែមានភាពងាយស្រួល និងមានតម្លៃថោកជាងមុន ។ សូមជម្រាបថា ចាប់ពីថ្ងៃទី១៥ ខែធ្នូខាងមុខនេះ ច្បាប់នៃការធ្វើដំណើរនៅអង់គ្លេសនឹងមានការផ្លាស់ប្តូរ ដូច្នេះបើសិនអ្នកធ្វើដំណើរម្នាក់ទទួលបានលទ្ធផលអវិជ្ជមាន ពីការធ្វើតេស្តដោយថវិកាខ្លួនឯងនោះ ពួកគេអាចកាត់បន្ថយការរស់នៅដាច់ដោយឡែកពីគេ ពីរយៈពេល១៤ថ្ងៃមកនៅត្រឹម៥ថ្ងៃវិញ ៕
-
អាជ្ញាធរផ្នែកអវកាសចិនបញ្ជាក់ថា បេសកកម្មឆាងអឺទី៥ ត្រៀមខ្លួនចុះចតនៅឋានព្រះច័ន្ទ ដើម្បីប្រមូលយកគំរូតាងមកកាន់ផែនដីវិញ
ចិន៖ សារព័ត៌មានស៊ីនហួរចុះផ្សាយនៅថ្ងៃទី៣០ ខែវិច្ឆិកាថា យាននៃបេសកកម្ម ឆាងអឺទី៥បានផ្តាច់ខ្លួនជាផ្លូវការពីយានដែលជាផ្កាយរណប ហើយកំពុងតែត្រៀមរៀបចំធ្វើការចុះចតនៅលើផ្ទៃព្រះច័ន្ទ ដើម្បីប្រមូលយកគំរូតាងពីដីនៅទីនោះ នេះបើតាមអាជ្ញាធរផ្នែកអវកាសចិន ។ បេសកកម្មឆាងអឺទី៥មានយានដែលដើរតួនាទីផ្សេងៗគ្នា ដោយនៅថ្ងៃចន្ទនេះ យានសម្រាប់ចុះចតហៅថា លែនដឺ អមជាមួយនឹងយានសម្រាប់ហោះឡើងទៅវិញហៅថា អាសិនដឺ ត្រូវបានបញ្ជាអោយផ្តាច់ខ្លួនដោយជោគជ័យចេញពីយានដែលជាផ្កាយរណបហៅថា អរប៊ីតឺ ដើម្បីត្រៀមចុះទៅជាន់លើផ្ទៃព្រះច័ន្ទ ។ យាន អរប៊ីតឺ នឹងស្ថិតគន្លងអវកាសរបស់ព្រះច័ន្ទ ដើម្បីរង់ចាំអោយយាន អាសិនដឺ នាំយកគំរូតាងនៃដីរបស់ព្រះច័ន្ទ ដែលប្រមូលបានដោយយាន លែនដឺ ។ បន្ទាប់មកទៀត យាន អរប៊ីតឺ នឹងចាកចេញពីគន្លងព្រះច័ន្ទ ដើម្បីឆ្ពោះមកកាន់ភពយើងវិញ ។ យាន អរប៊ីតឺ នឹងទម្លាក់គំរូតាងនោះ តាមរយៈយានមួយផ្សេងទៀតហៅថា រីថឺនខាប់ស៊ុល ដែលសម្រាប់ចុះមកកាន់ផែនដី ។ បេសកកម្មនេះ ត្រូវគេរំពឹងថា នឹងបញ្ចប់ជាស្ថាពរនៅថ្ងៃទី១៦ និងទី១៧ ខែធ្នូ ឆ្នាំ២០២០ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៦៣លាននាក់ ក្នុងនោះស្លាប់ជាង១លាន៤៧ម៉ឺននាក់ និងជាសះស្បើយជិត៤៤លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦៣លាន៥៨ម៉ឺន៤ពាន់៤៣០ករណី ក្នុងនោះមានអ្នកជម្ងឺសរុបចំនួន១លាន៤៧ម៉ឺន៣ពាន់៧៣៨នាក់ស្លាប់ និង ជាសះស្បើយឡើងវិញសរុបចំនួន៤៣លាន៩៧ម៉ឺន៩ពាន់៤២៣នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០១ ខែធ្នូ ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៣លាន៩១ម៉ឺន៩ពាន់៨៧០នាក់ ស្លាប់ចំនួន២៧ម៉ឺន៤ពាន់៣៣២នាក់ និងជាសះស្បើយចំនួន៨លាន២២ម៉ឺន២ពាន់៨៧៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៤៦ម៉ឺន៣ពាន់២៥៤នាក់ ស្លាប់ចំនួន១៣ម៉ឺន៧ពាន់៦៥៩នាក់ និងជាសះស្បើយ៨លាន៨៨ម៉ឺន៨ពាន់៥៩៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៣៣ម៉ឺន៦ពាន់២៧៨នាក់ ស្លាប់១៧ម៉ឺន៣ពាន់១៦៥នាក់ និងជាសះស្បើយ៥លាន៦០ម៉ឺន១ពាន់៨០៤នាក់ ៕
-
កូវីដ១៩៖ វៀតណាមឆ្លងក្នុងសហគមន៍ជាថ្មីទៀតហើយ ក្រោយស្ងប់ជិត៣ខែ
វៀតណាមបានអះអាងកាលពីម្សិលមិញ អំពីការឆ្លងក្នុងសហគមន៍ជាថ្មីទៀតនៃជំងឺកូវីដ១៩ ជាករណីឆ្លងក្នុងស្រុកលើកដំបូង ក្នុងពេល៨៩ថ្ងៃមកនេះ ពោលគឺបន្ទាប់ពីករណីក្រុងដាណាង ដែលជាការផ្ទុះក្នុងសហគមន៍ដំបូង ដោយពេលនោះហើយ ទើបវៀតណាមចាប់ផ្តើមមានករណីស្លាប់បន្តបន្ទាប់។ ករណីឆ្លងក្នុងស្រុកនេះគឺកើតមានចំពោះបុរសវ័យ៣២ឆ្នាំម្នាក់ ដែលមានទំនាក់ទំនងជាមួយនារីធ្វើការលើយន្តហោះម្នាក់ ដែលផ្ទុកកូវីដ១៩ ក្រោយត្រលប់មកពីជប៉ុន ២សប្តាហ៍មុន។ អាជ្ញាធរបញ្ជាក់ថា ករណីចុងក្រោយនេះ មុនពេលដឹងថាបានឆ្លង បានធ្វើការនៅមជ្ឈមណ្ឌលបង្រៀនភាសារមួយ ទៅហាងកាហ្វេ និងខារ៉ាអូខេ ហើយទីតាំងដែលអ្នកជំងឺបានទៅទាំងអស់ត្រូវបានគេបិទទ្វារអស់ហើយ។ វៀតណាមមានករណីកូវីដ១៩ ចំនួន១៣៤៧នាក់ហើយ ហើយជាប្រចាំថ្ងៃ វៀតណាមនៅតែមានករណីនាំចូល ជាមធ្យម ៥នាក់។ ករណីថ្ងៃចន្ទម្សិលមិញនេះត្រូវបានប្រកាសឲ្យដឹង ក្រោយពេលប៉ុន្មានថ្ងៃ ក្រសួងសុខាភិបាលបានព្រមានពីការផ្ទុះជាថ្មី ក្នុងសហគម ខណៈរដូវរងាបានចាប់ផ្តើមនោះ៕
-
រដ្ឋបាលរបស់លោក ដូណាល់ ត្រាំ កត់ឈ្មោះក្រុមហ៊ុន SMIC និង CNOOC របស់ចិន ទៅក្នុងបញ្ជីខ្មៅនៃក្រុមហ៊ុនគាំទ្រដោយយោធាចិន
អាមេរិក៖ សារព័ត៌មានរ៉យទ័រចុះផ្សាយនៅថ្ងៃទី៣០ ខែវិច្ឆិកានេះថា រដ្ឋបាលរបស់លោក ដូណាល់ ត្រាំ កត់ឈ្មោះក្រុមហ៊ុនផលិតបន្ទះឈីបឈានមុខគេរបស់ចិន SMIC និង ក្រុមហ៊ុនផលិតប្រេង និងឧស្ម័នជាតិចិនCNOOC ទៅក្នុងបញ្ជីខ្មៅនៃក្រុមហ៊ុនគាំទ្រដោយយោធាចិន ដោយនឹងហាមឃាត់ក្រុមហ៊ុនទាំងនេះមិនអោយធ្វើពាណិជ្ជកម្មជាមួយវិនិយោគិនអាមេរិកទៀតឡើយ ។ ទីភ្នាក់សារព័ត៌មានរ៉យទ័រក៏ធ្លាប់បានរាយការណ៍កាលដើមខែនេះដែរថា ក្រសួងការពារជាតិអាមេរិកបានកំណត់ក្រុមហ៊ុនចិនចំនួន០៤បន្ថែមទៀតថា ជាកម្មសិទ្ធិ ឬគ្រប់គ្រងដោយយោធាចិន ដែលធ្វើឲ្យក្រុមហ៊ុនចិនសរុបចំនួន៣៥រងផលប៉ះពាល់ ។ បើតាមឯកសារ និងប្រភពដ៏គួរឲ្យទុកចិត្តចំនួន០៣ផ្សេងៗពីគ្នាបានអោយដឹងថា បញ្ជីនោះរួមមានក្រុមហ៊ុនបច្ចេកវិទ្យាសំណង់ចិន ក្រុមហ៊ុនប្រឹក្សាវិស្វកម្មអន្តរជាតិចិន ក្រុមហ៊ុន SMIC និងក្រុមហ៊ុន CNOOC ជាដើម ។ សូមជម្រាបថា វិធានការថ្មីខាងលើនេះ គឺស្របទៅតាមគោលនយោបាយប្រឆាំងនឹងប្រទេសចិនរបស់លោក ដូណាល់ ត្រាំ ដែលនឹងធ្វើអោយរដ្ឋបាលថ្មីរបស់លោក ចូ បៃដិន ស្ថិតក្រោមជំហរដ៏លំបាក ខណៈសំឡេងប្រឆាំងទីក្រុងប៉េកាំង នៅក្នុងសភាអាមេរិកកំពុងតែកើនឡើងទាំងក្រុមសាធារណរដ្ឋ និង ប្រជាធិបតេយ្យ ៕