-
អ្នកឆ្លង COVID-19 នៅទូទាំងពិភពលោកកើនឡើងជិត៦២លាននាក់ ក្នុងនោះស្លាប់ជាង១លាន៤៤ម៉ឺននាក់ និងជាសះស្បើយជិត៤៣លាននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៦១លាន៩៨ម៉ឺន៨ពាន់៥៤ករណី ក្នុងនោះមានអ្នកជម្ងឺសរុបចំនួន១លាន៤៤ម៉ឺន៩ពាន់១១៤នាក់ស្លាប់ និង ជាសះស្បើយឡើងវិញសរុបចំនួន៤២លាន៧៨ម៉ឺន៧ពាន់៥៦៥នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៨ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១៣លាន៤៥ម៉ឺន៤ពាន់២៥៤នាក់ ស្លាប់ចំនួន២៧ម៉ឺន១ពាន់២៦នាក់ និងជាសះស្បើយចំនួន៧លាន៩៤ម៉ឺន៥ពាន់៥៨២នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន៣៥ម៉ឺន១ពាន់២២៤នាក់ ស្លាប់ចំនួន១៣ម៉ឺន៦ពាន់២៣៨នាក់ និងជាសះស្បើយ៨លាន៧៥ម៉ឺន៨ពាន់៨៨៦នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន២៣ម៉ឺន៨ពាន់៣៥០នាក់ ស្លាប់១៧ម៉ឺន១ពាន់៩៩៨នាក់ និងជាសះស្បើយ៥លាន៥៣ម៉ឺន៦ពាន់៥២៤នាក់ ៕
-
កូវីដ១៩៖ ថៃចុះកុងត្រាទិញទាំងវ៉ាក់សាំងនិងបច្ចេកវិទ្យាដើម្បីផលិតខ្លួនឯង ពីក្រុមហ៊ុនអង់គ្លេស-ស៊ុយអ៊ែតហើយ
ប្រទេសថៃបានចុះកិច្ចព្រមព្រៀងជាមួយក្រុមហ៊ុន AstraZeneca ក្នុងការផ្គត់ផ្គង់វ៉ាក់សាំងប្រឆាំងកូវីដ១៩ និង បច្ចេកវិទ្យាផលិតផលក្នុងស្រុក ពីក្រុមហ៊ុនអង់គ្លេស-ស៊ុយអ៊ែតមួយនេះ។ ការចុះកិច្ចព្រមព្រៀង កាលពីថ្ងៃសុក្រ ទី២៧ វិច្ឆិកា ២០២០ធ្វើឡើង ក្នុងពេលមានសេចក្តីរាយការណ៍ថា ក្រុមហ៊ុនកំពុងរៀបចំកម្មវិធីតេស្តជាសកលថ្មី ក្រោយត្រូវបានគេរិះគន់លើការតេស្ត ដំណាក់កាលដំបូង ដែលបានបង្ហាញថា មានប្រសិទ្ធិភាព៩០ភាគរយ យ៉ាងណាក៏ដោយ នាយកប្រតិបត្តិរបស់ក្រុមហ៊ុន AstraZeneca គឺលោក Pascal Soriot បាននិយាយថា លោកមិនគិតថា ការតេស្តបន្ថែមទៀតនេះត្រូវការការឯកភាពពីអង់គ្លេស និងសហភាពអឺរ៉ុបទៀតទេ។ ក្រៅពីការផ្គត់ផ្គង់វ៉ាក់សាំងដល់ប្រទេសថៃនោះ ក្រុមហ៊ុន AstraZeneca ក៏នឹងជួយគាំទ្រដល់ផលិតកម្មវ៉ាក់សាំងក្នុងប្រទេសថៃទ្រង់ទ្រាយដ៏ធំ តាមរយៈស្ថាប័ន Siam Bioscience ទៀតផង។ ចំនួនដូសនៃវ៉ាក់សាំងដែលត្រូវបញ្ជូនមកប្រទេសថៃមិនទាន់ត្រូវបានបង្ហាញឲ្យដឹងទេ ប៉ុន្តែ នាយករដ្ឋមន្ត្រីថៃ ប្រាយុទ្ធ ចាន់អូចាធ្លាប់បានអះអាង មុនចុះកិច្ចព្រមព្រៀង ១ថ្ងៃថា កុងត្រានេះគឺជាការបញ្ជាទិញ២៦លានដូស គ្រប់គ្រាន់សម្រាប់មនុស្ស១៣លាននាក់ ខណៈដែលមនុស្សម្នាក់ត្រូវការ២ដូស។ លោក ប្រាយុទ្ធ រំពឹងថា វ៉ាក់សាំងនេះនឹងមកដល់ឆ្នាំក្រោយ ហើយរដ្ឋាភិបាលត្រៀមខ្លួនផ្តល់ជូនពលរដ្ឋទាំងអស់៕
-
ចិនឲ្យអូស្ត្រាលីបង់ពន្ធប្រឆាំងនឹងការលក់បង្ខូចតម្លៃ ចំពោះការនាំចូលស្រា ចាប់ពីស្អែក
ក្រសួងពាណិជ្ជកម្មចិនបានប្រកាសនៅថ្ងៃសុក្រ ទី២៧ វិច្ឆិកា ២០២០នេះថា ខ្លួននឹងអនុវត្តវិធានការបង់ពន្ធប្រឆាំងនឹងការលក់បង្ខូចតម្លៃ ឬ anti-dumping measures ជាបណ្តោះអាសន្ន លើការនាំចូលស្រារបស់អូស្ត្រាលី ចាប់ពីថ្ងៃទី២៨ វិច្ឆិកា ២០២០ស្អែកនេះទៅ។ បើតាមក្រសួងថា ផ្អែកតាមកាតព្វកិច្ចនេះ ចំពោះការនាំចូលស្រាទៅក្នុងប្រទេសចិន តម្រូវឲ្យមានការបង់ពន្ធប្រឆាំងនឹងការលក់បង្ខូចតម្លៃ ចន្លោះពី១០៧.១ទៅ២១២.១ភាគរយ។ ភាគីចិនអះអាងថា ការសម្រេចនេះធ្វើឡើង ក្រោយពេលមានសំណើពីឧស្សាហកម្មស្រាក្នុងប្រទេសចិន ហើយការសម្រេចនេះក៏ស្របនឹងច្បាប់ប្រទេសចិន និងច្បាប់អង្គការពាណិជ្ជកម្មពិភពលោកដែរ។ ចិនគឺជាទីផ្សារដ៏ធំបំផុតរបស់អូស្ត្រាលី លើទំនិញស្រា ក្នុងនោះ ត្រឹម៩ខែ ដើមឆ្នាំ២០២០ មាន៣៩ភាគរយនៃការនាំចេញស្រាសរុបរបស់អូស្ត្រាលី ខណៈដែលប្រទេសទាំងពីរមានទំហំពាណិជ្ជកម្មទ្វេភាគីសរុប ១៧០ពាន់លានដុល្លារអាមេរិក កាលពីឆ្នាំមុន៕
-
នាយករដ្ឋមន្ត្រីថៃត្រូវក្រុមសិទ្ធិមនុស្សប្តឹង ករណីយកច្បាប់ភាពអាសន្នដ៏អាក្រក់ បង្ក្រាបបាតុកម្ម
បណ្តាមេដឹកនាំបាតុកម្ម និងមេធាវីក្រុមសិទ្ធិមនុស្សបានដាក់ពាក្យប្តឹងលើលោកនាយករដ្ឋមន្ត្រីថៃ ប្រាយុទ្ធ ចាន់អូចា និង ឧបនាយករដ្ឋមន្ត្រី ប្រាវីដ វុងស៊ូវុន និងបុគ្គលមួយចំនួនទៀត ទាមទារប្រាក់សំណងជំងឺចិត្ត ៣.៥លានបាត ទូទាត់ការខូចខាតដោយសារតែការប្រកាសប្រទេសក្នុងភាពអាសន្នដ៏អាក្រក់ កាលពីខែមុន នេះបើតាមការចេញផ្សាយរបស់បាងកកប៉ុស្តិ៍ នៅថ្ងៃទី២៧ វិច្ឆិកា ២០២០នេះ។ ប្រភពថា ក្រុមតំណាងសមាគមមេធាវីសិទ្ធិមនុស្សបានដាក់ពាក្យប្តឹងនេះទៅតុលាការស៊ីវិល នៅ Ratchadaphisek Road នាថ្ងៃសុក្រនេះ។ ការប្តឹងក៏មានចំពោះអគ្គស្នងការនគរបាលជាតិ ការិយាល័យនគរបាល និងការិយាល័យនាយករដ្ឋមន្ត្រីដែរ។ ក្នុងពាក្យប្តឹងបានលើកឡើងពីការប្រកាសដាក់ប្រទេសក្នុងភាពអាសន្នដ៏អាក្រក់ កាលពីថ្ងៃទី១៥ តុលា ដើម្បីទប់ស្កាត់ក្រុមបាតុករប្រឆាំង ដែលទាមទារឲ្យលោកនាយករដ្ឋមន្ត្រី ប្រាយុទ្ធ ចុះចេញពីតំណែង ផ្លាស់ប្តូររដ្ឋធម្មនុញ្ញ និងកែទម្រង់របបរាជានិយម។ សូមរម្លឹកថា ការប្រកាសដាក់ប្រទេសក្នុងភាពអាសន្នបានធ្វើឡើង កាលពីព្រឹកថ្ងៃទី១៥ តុលា ក្រោយបាតុករបានចូលដល់វិមានរដ្ឋាភិបាលហើយបានបង្ខាំងក្បូនរាជវង្ស កាលពីថ្ងៃទី១៤ តុលា ប៉ុន្តែការប្រកាសត្រូវបានដកចេញវិញ កាលពីថ្ងៃទី២២ តុលា៕
-
ចិនចង់បង្កើតកិច្ចសហការលើទំនាក់ទំនងវិស័យសុខាភិបាល និងស្ថេរភាពវិស័យយោធាជាមួយសហរដ្ឋអាមេរិក
ចិន៖ ទីក្រុងប៉េកាំងរំពឹងថា សហរដ្ឋអាមេរិកនឹងចូលរួមធ្វើការជាមួយចិន ដោយផ្តោតសំខាន់លើវិស័យសុខាភិបាល និងការអភិវឌ្ឍស្ថេរភាពនៃទំនាក់ទំនងយោធា និងយោធារវាងប្រទេសប្រទេសទាំងពីរ នេះបើតាមសារព័ត៌មានស៊ីនហួរនៅថ្ងៃទី២៧ ខែវិច្ឆិកា ឆ្នាំ២០២០ ។ អ្នកនាំពាក្យក្រសួងការពារជាតិចិនលោក Ren Gouqiang បានលើកឡើងបែបនេះ នៅពេលត្រូវបានសាកសួរអំពីការរៀបចំជំនួបនាពេលថ្មីៗនេះ ជាមួយរដ្ឋមន្រ្តីការពារជាតិអាមេរិកស្តីទី ។ លោក Ren បន្តថា ចិនតែងតែគិតគូរសំខាន់លើការអភិវឌ្ឍទំនាក់ទំនងយោធារវាងប្រទេសទាំងពីរ ហើយថា ការរក្សាបាននូវទំនាក់ទំនងយោធា និងយោធាប្រកបដោយសន្តិភាព និងសេ្ថរភាព គឺស្របតាមផលប្រយោជន៍ជាមូលដ្ឋានរបស់ប្រទេសទាំងពីរ និងការរំពឹងទុករួមគ្នារបស់សហគមន៍អន្តរជាតិ ។ លោក Ren បានសង្កត់ធ្ងន់ទៀតថា ចិនសង្ឃឹមថា សហរដ្ឋអាមេរិកនឹងជួបជាមួយចិន ដោយប្រកាន់ខ្ជាប់គោលការណ៍មិនមានជម្លោះ ការមិនប្រឈមមុខដាក់គ្នា ការគោរពគ្នា និងកិច្ចសហប្រតិបត្តិការឈ្នះ – ឈ្នះ ការយោគយល់គ្នាទៅវិញទៅមក ជៀសវាងការយល់ច្រលំ និងការគណនាខុស បន្តផ្តោតលើកិច្ចសហប្រតិបត្តិការ ក៏ដូចជាការគ្រប់គ្រងពេលវេលា គ្រប់គ្រងហានិភ័យ និងភាពខុសគ្នា ៕
-
អ៊ីរ៉ង់បញ្ជាក់ថា ទណ្ឌកម្មសហរដ្ឋអាមេរិកកំពុងជះឥទ្ធិពលអាក្រក់ដល់ការប្រយុទ្ធប្រឆាំងនឹង Covid-19 ក្នុងប្រទេសខ្លួន
អ៊ីរ៉ង់៖ អ្នកតំណាងអចិន្ត្រៃយ៍របស់អ៊ីរ៉ង់ប្រចាំអង្គការសហប្រជាជាតិលោក Majid Takht Ravanchi បានថ្លែងប្រាប់ទីភ្នាក់ងារសារព័ត៌មានក្នុងស្រុកនៅថ្ងៃព្រហស្បតិ៍នេះថា ទណ្ឌកម្មរបស់សហរដ្ឋអាមេរិកប្រឆាំងនឹងអ៊ីរ៉ង់ បានជះឥទ្ធិពលអាក្រក់ដល់ការប្រយុទ្ធប្រឆាំងនឹងជម្ងឺរាតត្បាតជាសកល Covid-19 នេះបើតាមសារព័ត៌មានស៊ីនហួរនៅថ្ងៃទី២៧ ខែវិច្ឆិកា ឆ្នាំ២០២០ ។ លោក Majid Takht Ravanchi បានគូសបញ្ជាក់ថា បច្ចុប្បន្ននេះ អ៊ីរ៉ង់បាននិងកំពុងប្រឈមមុខនឹងការដាក់ទណ្ឌកម្មយ៉ាងតឹងរឹងបំផុត ដែលមិនធ្លាប់មានលើប្រទេសណាមួយឡើយ ហើយដែនកំណត់ទាំងនោះ បានរារាំងយ៉ាងខ្លាំងដល់កិច្ចខិតខំប្រឹងប្រែងរបស់យើង ក្នុងការប្រយុទ្ធប្រឆាំងនឹងជម្ងឺ Covid-19 ។ បើតាមលោក Takht Ravanchi ទណ្ឌកម្មរបស់សហរដ្ឋអាមេរិកបានដាក់កម្រិតលើការចូលប្រើប្រាស់ធនធានហិរញ្ញវត្ថុរបស់អ៊ីរ៉ង់នៅក្នុងប្រទេសមួយចំនួន… ហេតុដូច្នេះហើយអ៊ីរ៉ង់មិនអាចមានលទ្ធភាពទិញថ្នាំ និង ឧបករណ៍វេជ្ជសាស្រ្តដែលចាំបាច់ ក្នុងការទប់ស្កាត់ និងប្រយុទ្ធប្រឆាំងជាមួយវីរុសកូរ៉ូណានោះទេ ។ សូមជម្រាបថា គិតត្រឹមថ្ងៃទី២៧ ខែវិច្ឆិកានេះ នៅទូទាំងអ៊ីរ៉ង់មានអ្នកឆ្លង Covid-19 សរុបកើនដល់៩០ម៉ឺន៨ពាន់៣៤៦ករណី ក្នុងនោះមានអ្នកស្លាប់សរុប៤ម៉ឺន៦ពាន់៦៨៩នាក់ ចាប់តាំងពីវីរុសដ៏កាចសាហាវមួយនេះផ្ទុះឡើងដំបូងក្នុងប្រទេសអ៊ីរ៉ង់កាលពីថ្ងៃទី១៩ ខែកុម្ភៈ ឆ្នាំ២០២០ ៕
-
ថៃទទួលបានភ្ញៀវទេសចរបរទេសជាង១ពាន់នាក់ជាលើកដំបូងនៅក្នុងខែតុលា ឆ្នាំ២០២០ ដែលនេះជាចំនួនដ៏តិចតួចបំផុត បើធៀបនឹងឆ្នាំមុន
ថៃ៖ សារព័ត៌មានរ៉យទ័រចុះផ្សាយថា ក្នុងខែតុលាឆ្នាំនេះ ថៃទទួលបានភ្ញៀវទេសចរបរទេសចំនួន១.២០១នាក់ជាលើកដំបូង គិតចាប់តាំងពីបម្រាមមិនអោយមានទេសចរចូលប្រទេស ចាប់ផ្តើមធ្វើឡើងកាលពីខែមេសាកន្លងមក ដើម្បីទប់ស្កាត់ជម្ងឺ COVID-19 ។ ភ្ញៀវទេសចរបរទេសទាំងអស់បានធ្វើដំណើរកាន់ទិដ្ឋាការពិសេសរយៈពេល៩០ថ្ងៃ ដែលតម្រូវឲ្យមានការធ្វើចត្តាឡីស័ករយៈពេលពីរសប្តាហ៍ ។ តួលេខភ្ញៀវទេសចរបរទេសខាងលើនេះ គឺជាចំនួនដ៏តិចតួចបំផុតមួយ បើធៀបនឹងចំនួនភ្ញៀវទេសចរបរទេសដល់ទៅ៣.០៧លាននាក់ ដែលបានមកដល់ថៃ ក្នុងខែតុលា ឆ្នាំ២០១៩ មុនពេលជំងឺ COVID-19 ផ្ទុះឡើង ។ ក្នុងចន្លោះពីខែមករា ដល់ខែតុលា ឆ្នាំ២០២០ ចំនួនភ្ញៀវទេសចរបរទេសក្នុងប្រទេសថៃ បានធ្លាក់ចុះរហូតដល់៧៩.៥ភាគរយ ពោលគឺថយមកនៅត្រឹម៦.៦៩លាននាក់ ។ បើតាមការព្យាករណ៍របស់ទីភ្នាក់ងាររៀបចំផែនការរបស់រដ្ឋាភិបាលថៃ ក្នុងឆ្នាំនេះនឹងមានភ្ញៀវទេសចរបរទេសចំនួន៦.៧លាននាក់ប៉ុណ្ណោះ ខណៈកាលពីឆ្នាំ២០១៩ មានភ្ញៀវទេសចរបរទេសដល់ទៅចំនួន៣៩.៩លាននាក់ ដែលបានចំណាយប្រាក់៦៣ពាន់លានដុល្លារ ឬប្រមាណ១១.៣ភាគរយនៃផលិតផលក្នុងស្រុកសរុប (GDP) របស់ប្រទេសថៃ ៕
-
ក្រុមហ៊ុន ByteDance មានរយៈពេលមួយសប្តាហ៍ទៀត ក្នុងការសម្រេចចិត្តលក់ TikTok អោយក្រុមហ៊ុនសហរដ្ឋអាមេរិក
អាមេរិក៖ សារព័ត៌មាន CGTN ចុះផ្សាយថា ក្រសួងរតនាគារជាតិអាមេរិកប្រកាសទុករយៈពេល០៧ថ្ងៃទៀត ពោលគឺនៅថ្ងៃទី០៤ ខែធ្នូខាងមុខនេះ អោយក្រុមហ៊ុន ByteDance ក្នុងការសម្រេចចិត្តលក់កម្មវិធីវីដេអូកំសាន្តដ៏ល្បី TikTok អោយក្រុមហ៊ុនអាមេរិក ។ ការពន្យាពេលមួយសប្តាហ៍ទៀតនេះ បានកើតមានឡើងក្រោយការិយាល័យរបស់ប្រធានា ធិបតីអាមេរិកលោក ដូណាល់ ត្រាំ បានពន្យារពេល១៥ថ្ងៃឱ្យក្រុមហ៊ុន ByteDance លក់កម្មវិធី TikTok ឱ្យទៅក្រុមហ៊ុនអាមេរិក ពោលគឺលក់អាជីវកម្ម TikTok ឱ្យដាច់ពីការគ្រប់គ្រង់របស់ក្រុមហ៊ុនចិន ដែលការពន្យារពេលនោះ គឺនឹងផុតកំណត់ត្រឹមថ្ងៃសុក្រសប្តាហ៍នេះហើយ ។ សូមជម្រាបផងដែរថា សហរដ្ឋអាមេរិកបានប្រកាសបិទកម្មវិធី TikTok ក្រោមហេតុផលព្រួយបារម្ភ ឬហានិភ័យអំពីសុវត្ថិភាពអ្នកប្រើប្រាស់ ព្រោះ TikTok អាចជាចារកម្មរបស់រដ្ឋាភិបាលចិន ៕
-
កូវីដ១៩៖ ថ្ងៃនេះ ថៃឆ្លង១៩នាក់ទៀត កើនដល់ជិត៤ពាន់នាក់ ស្លាប់៦០នាក់
មជ្ឈមណ្ឌលគ្រប់គ្រងស្ថានភាពកូវីដ១៩ នៃប្រទេសថៃ ហៅកាត់ថា CCSA បានបញ្ជាក់ថា ករណីថ្មីទាំង១៩នាក់នេះត្រូវបានរាយការណ៍ឲ្យដឹង នៅថ្ងៃសុក្រ ទី២៧ វិច្ឆិកានេះ ប៉ុន្តែសុទ្ធតែជាករណីនាំចូល ក្នុងនោះ មាន១៤នាក់គឺជាជនជាតិថៃ។ ប្រភពបន្តថា ករណីថ្មីទាំង១៩នាក់នេះគឺមកពី១១ប្រទេស ក្នុងនោះ ក៏មានក្រុមនិស្សិតថៃ ក្មេងៗ និង អ្នកគ្រូជនជាតិថៃដែរ មកពី១១ប្រទេស។ ការរកឃើញករណីវិជ្ជមានកូវីដ១៩នាក់ថ្មីថែមទៀត ធ្វើឲ្យចំនួនអ្នកកើតកូវីដ១៩ សរុបនៅប្រទេសថៃកើនដល់៣៩៦១នាក់ ប៉ុន្តែជាសះស្បើយ៣៧៩០នាក់ ១១១នាក់កំពុងសម្រាកព្យាបាល ខណៈអ្នកស្លាប់ដោយសារវីរុសនេះ មាន៦០នាក់៕ ប្រភពពីបាងកកប៉ុស្តិ៍
-
លោក ដូណាល់ ត្រាំ និយាយថា នឹងដើរចេញពីសេតវិមាន បើសិនលោក ចូ បៃដិន ត្រូវបានទទួលស្គាល់ជាអ្នកឈ្នះឆ្នោតជាផ្លូវការ
អាមេរិក៖ ក្នុងថ្ងៃបុណ្យរំលឹកគុណ “Thanksgiving” នៅថ្ងៃព្រហស្បតិ៍នេះ ប្រធានាធិបតីអាមេរិក លោក ដូណាល់ ត្រាំ បានប្រាប់អ្នកយកព័ត៌មានថា លោកនឹងចាកចេញពីសេតវិមាន បើសិនជាលោក ចូ បៃដិន ត្រូវបានទទួលស្គាល់ជាផ្លូវការថា ជាអ្នកឈ្នះនៅក្នុងការបោះឆ្នោតប្រធានាធិបតី ដោយអង្គបោះឆ្នោតទាំង ៥៣៨រូប នេះបើតាមសារព័ត៌មានរ៉យទ័រនៅថ្ងៃទី២៧ ខែវិច្ឆិកា ឆ្នាំ២០២០ ។ នាឱកាសនោះដែរ ប្រធានាធិបតីអាមេរិករូបនេះ បានសង្កត់ធ្ងន់ថា ក្នុងកាលៈទេសៈបច្ចុប្បន្ន លោកពិបាកនឹងទទួលស្គាល់ជ័យជម្នះរបស់លោក បៃដិន ហើយក៏មិនបាននិយាយថា លោកនឹងចូលរួមក្នុងពិធីស្បថចូលកាន់តំណែងជាប្រធានា ធិបតីរបស់លោក បៃដិន នោះដែរ ដោយលោកនៅតែអះអាងដដែលថា ការបោះឆ្នោតមានការលួចចបន្លំ ។ សូមជម្រាបថា អង្គបោះឆ្នោតទាំងអស់ នឹងត្រូវជួបជុំគ្នានៅតាមរដ្ឋធានីនីមួយៗប្រចាំរដ្ឋរបស់ខ្លួន នៅថ្ងៃទី១៤ ខែធ្នូខាងមុខនេះ ដើម្បីបោះឆ្នោតជ្រើសរើសប្រធានាធិបតីអាមេរិកទី៤៦ជាផ្លូវការ ហើយដើម្បីជាប់ឆ្នោតលោក បៃដិន ឬលោក ត្រាំ ត្រូវប្រមូលសំឡេងគាំទ្រពីអង្គបោះឆ្នោត២៧០រូប ក្នុងចំណោមអង្គបោះឆ្នោតសរុបទាំង៥៣៨រូប ៕