-
ដូចតាមការគ្រោងទុក! ប្រធានាធិបតីអាមេរិកជាប់ឆ្នោតលោក ចូ បៃដិន ចាប់ផ្តើមបង្ហាញឈ្មោះគណៈរដ្ឋមន្រ្តីនៃរដ្ឋបាលរបស់ខ្លួនហើយ
អាមេរិក៖ សារព័ត៌មាន CNA ចុះផ្សាយនៅថ្ងៃអង្គារនេះថា ប្រធានាធិបតីអាមេរិកជាប់ឆ្នោត លោក ចូ បៃដិន បានទទួលស្គាល់ជាផ្លូវការហើយថា លោកនឹងតែងតាំងមន្រ្តីការទូតជើងចាស់មួយរូបគឺលោក ថូនី ប្លីងខិន អោយធ្វើជារដ្ឋមន្ត្រីការបរទេសអាមេរិកក្នុងអាណត្តិថ្មីខាងមុខនេះ ។ ជាមួយគ្នានេះ អតីតរដ្ឋមន្ត្រីការបរទេសអាមេរិកលោក John Kerry នឹងត្រូវក្លាយជាប្រេសិតពិសេសទទួលបន្ទុកកិច្ចការងារប្រឆាំងនឹងបញ្ហាប្រែប្រួលអាកាសធាតុ ក្នុងនោះផងដែរ លោកស្រី Janet Yellen ក៏នឹងត្រៀមខ្លួនក្លាយទៅជាប្រធានរតនាគាជាតិ ជាស្ត្រីដំបូងបង្អស់ក្នុងប្រវត្តិសាស្ត្ររបស់សហរដ្ឋអាមេរិក ។ ដោយឡែកលោក បៃដិន ក៏នឹងតែងតាំងលោក Alejandro Mayorkas ជារដ្ឋមន្រ្តីសន្តិសុខមាតុភូមិអាមេរិកផងដែរ ។ ការទទួលស្គាល់របស់លោក ចូ បៃដិន ធ្វើឡើងក្នុងពេលប្រកាសពីការតែងតាំងមន្ត្រីជាន់ខ្ពស់ផ្នែកសន្តិសុខជាតិ និងនយោបាយការបរទេស សម្រាប់រដ្ឋបាលថ្មីរបស់លោកនៅថ្ងៃចន្ទសប្ដាហ៍នេះ (ម៉ោងក្នុងតំបន់) ពោលគឺជិត២ខែ មុននឹងលោកត្រូវស្បថចូលកាន់តំណែងប្រធានាធិបតីអាមេរិកទី ៤៦ ជាផ្លូវការ នៅថ្ងៃទី២០ ខែមករា ឆ្នាំ២០២១ ៕
-
បាតុករថៃគ្រោងប្រមូលផ្តុំគ្នាជាថ្មីនៅថ្ងៃពុធសប្តាហ៍នេះ ដើម្បីបន្តធ្វើបាតុកម្មទ្រង់ទ្រាយធំក្នុងទីក្រុងបាងកក
ថៃ៖ សារព័ត៌មាន AFP ចុះផ្សាយនៅថ្ងៃអង្គារនេះថា រដ្ឋធានីបាងកក របស់ប្រទេសថៃ កំពុងប្រឈមនឹងបាតុកម្មទ្រង់ទ្រាយធំមួយទៀត នៅថ្ងៃពុធសប្តាហ៍នេះ ខណៈក្រុមបាតុករគ្រោងប្រមូលផ្តុំគ្នានៅឯការិយាល័យរាជសម្បត្តិ ដែលជាភ្នាក់ងារគ្រប់គ្រងទ្រព្យសម្បត្តិនៃរបបរាជានិយមថៃ ។ ភាពចលាចលកន្លងមកនេះក្នុងប្រទេសថៃ បានផ្ទុះឡើងដោយសារក្រុមចលនានិស្សិតថៃបានតវ៉ាអស់ជាច្រើនខែមកហើយ ក្នុងនោះសញ្ញាម្រាមដៃបីរបស់ពួកគេ នៅតែត្រូវបានប្រើប្រាស់ ដើម្បីទាមទារចំណុចសំខាន់ៗចំនួន ០៣ ទីមួយគឺលោក ប្រាយុទ្ធ ចាញ់អូចា ត្រូវចុះចេញពីតំណែងនាយករដ្ឋមន្ត្រី ទីពីរគឺការកែប្រែរដ្ឋធម្មនុញ្ញអោយដូចមុនឆ្នាំ២០១៩ និងទី៣ គឺការធ្វើកំណែទម្រង់រាជានិយម ដែលផ្តល់អំណាចជ្រុលពេកដល់ព្រះមហាក្សត្របច្ចុប្បន្ន ។ សូមជម្រាបផងដែរថា ភាពតានតឹងកំពុងកើនឡើងយ៉ាងក្តៅគគុក ពាក់ព័ន្ធនឹងបាតុកម្មតវ៉ានៅទូទាំងប្រទេសអាស៊ីមួយនេះ ក្រោយប៉ូលីសថៃ កាលពីសប្ដាហ៍មុន បានបាញ់មនុស្សចំនួន០៦នាក់អោយរងរបួស និង បានប្រើឧស្ម័នបង្ហូរទឹកភ្នែក រួមទាំងកាណុងបាញ់ទឹកពណ៌លើក្រុមបាតុករនៅតាមដងផ្លូវក្នុងទីក្រុងបាងកក ៕
-
លោក ដូណាល់ ត្រាំ សម្រេចចិត្តបើកភ្លើងខៀវអោយមន្ត្រីរដ្ឋបាលរបស់ខ្លួនរៀបចំផ្ទេរអំណាចទៅលោក ចូ បៃដិន
អាមេរិក៖ សារព័ត៌មានស៊ីនហួរចុះផ្សាយនៅថ្ងៃអង្គារនេះថា ប្រធានាធិបតីអាមេរិកលោក ដូណាល់ ត្រាំ បានប្រាប់ក្រុមមន្ត្រីរដ្ឋបាលចាត់ចែងកិច្ចការទូទៅ (GSA) អោយរៀបចំដំណើរការផ្ទេរអំណាចទៅអោយលោក ចូ បៃដិន ជាផ្លូវការ ។ ស្របពេលជាមួយគ្នានេះដែរ ប្រធានរដ្ឋបាលចាត់ចែងកិច្ចការទូទៅ GSA លោកស្រី អេមមីលី មើហ្វី បានសរសេរលិខិតមួយច្បាប់ជូនលោក ចូ បៃដិន ថា យោងលើការវិវត្តថ្មីៗជុំវិញការតវ៉ាតាមផ្លូវច្បាប់ និងការទទួលស្គាល់លទ្ធផល នៃការបោះឆ្នោតទាំងអស់នោះ ខ្ញុំក៏រៀបចំបញ្ជូនលិខិតនេះនៅថ្ងៃនេះ ដើម្បីផ្ទេរធនធាន និងសេវាកម្មទាំងទាំងឡាយជូនដល់អ្នក (លោក បៃដិន ) ។ ដោយឡែកមន្រ្តីការិយាល័យរបស់រដ្ឋបាលចាត់ចែងកិច្ចការទូទៅ GSA ក៏បានអោយដឹងផងដែរថា លោកស្រី អេមមីលី មើហ្វី នឹងចុះហត្ថលេខាទទួលស្គាល់ការផ្ទេរសិទ្ធិនេះ នៅពេលអ្នកឈ្នះឆ្នោតជាប្រធានាធិបតីរបស់សហរដ្ឋអាមេរិកថ្មីត្រូវបានប្រកាសជាផ្លូវការ ៕
-
បេក្ខភាពវ៉ាក់សាំង Covid-19 ចំនួន០២របស់ប្រទេសថៃ ឈានដល់ដំណាក់កាលធ្វើតេស្តលើមនុស្សហើយ
ថៃ៖ វិទ្យាស្ថានស្រាវជ្រាវវ៉ាក់សាំងជាតិរបស់ថៃនៅថ្ងៃចន្ទនេះប្រកាសថា បេក្ខភាពវ៉ាក់សាំង Covid-19 ចំនួន០២ ក្នុងចំណោមវ៉ាក់សាំងចំនួន០៧របស់ថៃ ត្រូវបានទទួលជោគជ័យក្នុងការធ្វើតេស្តទៅលើសត្វ ហើយបន្ទាប់មកនឹងបន្តទៅសាកល្បងទៅលើមនុស្សវិញម្តង នេះបើតាមសារព័ត៌មានស៊ីនហួរនៅថ្ងៃទី២៤ ខែវិច្ឆិកា ឆ្នាំ២០២០ ។ នាយកវិទ្យាស្ថានខាងលើនេះ គឺលោកវេជ្ជបណ្ឌិត Nakorn Premsri បានបញ្ជាក់ថា បេក្ខភាពវ៉ាក់សាំង Covid-19 ចំនួន០២ ដែលកំពុងធ្វើតេស្តក្នុងដំណាក់កាលទី២ទៅលើមនុស្សនេះ មួយគឺវ៉ាក់សាំង mRNA ដែលត្រូវបានបង្កើតឡើងដោយមជ្ឈមណ្ឌលស្រាវជ្រាវ Chula VRC និងមួយទៀត គឺវ៉ាក់សាំង DNA ដែលបង្កើតដោយស្ថាប័ន BioNet-Asia ។ បើតាមការរំពឹងទុករបស់មជ្ឈមណ្ឌលស្រាវជ្រាវ Chula VRC នោះ វ៉ាក់សាំង mRNA របស់ខ្លួននឹងឈានចូលដល់ដំណាក់កាលធ្វើតេស្តលើមនុស្សនៅថ្ងៃទី១៩ ខែមេសា ឆ្នាំក្រោយនេះ ។ វ៉ាក់សាំង mRNA នឹងធ្វើតេស្តលើកដំបូងលើអ្នកស្ម័គ្រចិត្តចំនួន៧២នាក់ ហើយប្រសិនបើជោគជ័យនោះ មជ្ឈមណ្ឌលស្រាវជ្រាវ Chula VRC នឹងធ្វើតេស្តលើកទី២លើអ្នកស្ម័គ្រចិត្តចំនួន៦០០នាក់បន្ថែមទៀត ៕
-
ចិនបាញ់បង្ហោះយាន «ឆាងអឺ ៥» ដើម្បីអោយទៅស្រាវជ្រាវនៅផ្នែកមួយនៃព្រះច័ន្ទ និងគំរូតាងមកផែនដីវិញ
ចិន៖ សារព័ត៌មានរ៉យទ័រចុះផ្សាយនៅថ្ងៃអង្គារនេះថា ចិនបាញ់បង្ហោះយានឆាងអឺ ៥ ចេញពីមូលដ្ឋានវិនឆាង ដោយប្រើប្រាស់គ្រាប់រ៉ុក្កែត Long March-5Y នៅម៉ោង ៤៖៣០នាទីទាបភ្លឺ (ម៉ោងក្នុងតំបន់) ស្ថិតនៅខេត្តហៃណាន ភាគខាងត្បូងប្រទេស ក្នុងគោលដៅទៅស្រាវជ្រាវនៅផ្នែកមួយនៃព្រះច័ន្ទ រួចជីកយកគំរូតាង (ដី ឬកម្ទេចថ្ម) ពីទីនោះត្រលប់មកកាន់ភពផែនដីវិញ ។ យាន ឆាងអឺ ៥ នឹងត្រូវប្រើពេលសរុប០៣ថ្ងៃ ដើម្បីធ្វើដំណើរទៅដល់គន្លងគោចរនៅជុំវិញព្រះច័ន្ទ និងត្រៀមដើម្បីធ្វើការចុះចត ។ បេសកកម្ម ឆាងអឺ ៥ នឹងត្រូវចុះចតនៅតំបន់ភ្នំ រឹមខឺ ស្ថិតនៅភូមិភាគពាយ័ព្យនៃព្រះច័ន្ទដែលមានឈ្មោះ អូសិនណឹស ប្រូសែលឡារឹម នៅលើផ្នែកដែរបែរមុខមករកផែនដីយើង ។ បើសិនអ្វីៗដំណើរការដូចការគ្រោងទុកនោះ យានអវកាសរបស់ចិននេះ នឹងប្រមូលគំរូតាង (ថ្មី ឬកម្ទេចដី) នៅលើផ្ទៃឋានព្រះច័ន្ទ ហើយនាំមកយកកាន់ផែនដីវិញ ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៦០លាននាក់ ក្នុងនោះស្លាប់ជាង១លាន៤០ម៉ឺននាក់ និងជាសះស្បើយជាង៤១លាន១៤ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥៩លាន៥០ម៉ឺន១ពាន់៥៤៩ករណី ក្នុងនោះមានអ្នកជម្ងឺសរុបចំនួន១លាន៤០ម៉ឺន១ពាន់៥៦៧នាក់ស្លាប់ និង ជាសះស្បើយឡើងវិញសរុបចំនួន៤១លាន១៤ម៉ឺន៥ពាន់៨៨៨នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៤ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១២លាន៧៧ម៉ឺន៦ពាន់៧៣៧នាក់ ស្លាប់ចំនួន២៦ម៉ឺន៣ពាន់៦៨៧នាក់ និងជាសះស្បើយចំនួន៧លាន៥៤ម៉ឺន៨ពាន់៤៣៥នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៩លាន១៧ម៉ឺន៧ពាន់៧២២នាក់ ស្លាប់ចំនួន១៣ម៉ឺន៤ពាន់២៥៤នាក់ និងជាសះស្បើយ៨លាន៦០ម៉ឺន៣ពាន់៥៧៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៦លាន៨ម៉ឺន៨ពាន់៤នាក់ ស្លាប់១៦ម៉ឺន៩ពាន់៥៤១នាក់ និងជាសះស្បើយ៥លាន៤៤ម៉ឺន៥ពាន់៩៥នាក់ ៕
-
ថៃ៖ លោកប្រាយុទ្ធបដិសេធថាគ្មានរដ្ឋប្រហារថ្មី ឬច្បាប់អាជ្ញាសឹកទប់ទល់នឹងក្រុមបាតុករទេ
-
អាមេរិកដកខ្លួនចេញពីសន្ធិសញ្ញាស្តីពីការបើកចំហដែនអាកាសជាផ្លូវការ
សហរដ្ឋអាមេរិកប្រកាសដកខ្លួនចេញពីសន្ធិសញ្ញាស្តីពីការបើកចំហដែនអាកាសជាផ្លូវការ កាលពីថ្ងៃទី២២ខែវិចិ្ឆកា ២០២០ ដោយរដ្ឋាភិបាលអាមេរិកបានប្រកាសដកខ្លួនចេញពីសន្ធិសញ្ញាស្តីពីការបើកចំហដែនអាកាសជាផ្លូវការចាប់ពីថ្ងៃដដែលនោះតទៅ ។ សេចក្តីថ្លែងការណ៍ដែលក្រុមប្រឹក្សាសន្តិសុខជាតិនៃសេតវិមានអាមេរិកបានចេញផ្សាយតាមបណ្តាញទំនាក់ទំនងសង្គមឱ្យដឹងថា លោក Robert C.O’Brien ជំនួយការប្រធានាធិបតីអាមេរិកទទួលបន្ទុកកិច្ចការសន្តិសុខជាតិបានថ្លែងថា ចាប់ពីពេលសហរដ្ឋអាមេរិកប្រកាសដកខ្លួនចេញពីសន្ធិសញ្ញាស្តីពីការបើកចំហដែនអាកាសមកបានកន្លងទៅអស់រយៈពេល៦ខែហើយ ឥឡូវសហរដ្ឋអាមេរិកមិនមែនជាសមាជិកនៃសន្ធិសញ្ញានេះទៀតទេ ។ ក្រសួងការបរទេសរុស្ស៊ីបានចេញសេចក្តីថ្លែងការណ៍អំពីរឿងនេះដោយលើកឡើងថា សហរដ្ឋអាមេរិកដកខ្លួនចេញពីសន្ធិសញ្ញាស្តីពីការបើកចំហដែនអាកាសគឺមិនត្រឹមតែគ្មានអំណោយផលចំពោះសន្តិសុខរបស់អឺរ៉ុបប៉ុណ្ណោះទេ ថែមទាំងក៏គ្មានអំណោយផលដល់សន្តិសុខរបស់អាមេរិកព្រមទាំងសម្ព័ន្ធមិត្តរបស់អាមេរិកផងដែរ ៕
-
របាយការណ៍៖ វៀតណាមជាប់លេខ១ មានមនុស្សពេញវ័យលេងហ្គេមច្រើនជាងគេក្នុងលោក
វៀតណាមមានអ្នកលេងហ្គេម ជាមនុស្សពេញវ័យខ្ពស់បំផុត ក្នុងពិភពលោក នៅឆ្នាំ២០២០នេះ នេះបើតាមការស្រាវជ្រាវសកលនៅប្រទេសអាល្លឺម៉ង់ Statista កាលពីពេលថ្មីៗនេះ ។ ប្រភពបន្តថា ៩៤ភាគរយមនុស្សពេញវ័យទាំងនេះបានអះអាងថា ពួកគេលេងហ្គេមយ៉ាងតិច ម្តងៗកាល ខណៈដែលជិត២០ភាគរយអះអាងថា ពួកគេលេងញឹកញាប់ ហើយប្រមាណ៨៥ភាគរយនៃពួកគេ លេងហ្គេមលើទូរស័ព្ទ។ ក្រៅពីវៀតណាម បណ្តាប្រទេសកំពុងអភិវឌ្ឍន៍ផ្សេងៗទៀត ដូចជា នីហ្សេរីយ៉ា ថៃ និងហ្វីលីពីន ក៏មានមនុស្សពេញវ័យលេងហ្គេមច្រើនខ្លាំងផដែរ។ របាយការណ៍នេះត្រូវបានធ្វើឡើង តាមរយៈការស្ទង់មតិ ពីអ្នកឆ្លើយឆ្លង ចន្លោះពី១ពាន់ទៅ៤០ពាន់នាក់ មានវ័យចាប់ពី១៨ទៅ៦៤ឆ្នាំ ក្នុងប្រទេសនិងតំបន់ចំនួន៥៥។ វៀតណាមត្រូវបានគេមើលឃើញថា ទីផ្សារហ្គេមអនឡាញ និង កីឡាអេឡិចត្រូនិកកើនឡើងខ្លាំង ក្នុងនោះដែរ របាយការណ៍របស់កាលពីមុនបង្ហាញថា ចំណូលហ្គេមអនឡាញនៅប្រទេសវៀតណាម ក្នុងឆ្នាំ២០២០នេះ ត្រូវបានរំពឹងថា នឹងកើនដល់១០.១លានដុល្លាអាមេរិក កើនឡើង១៦ភាគរយ ពីឆ្នាំ២០១៩៕ ប្រភពពី VN Express
-
លោក ដូណាល់ ត្រាំ ដាក់ពាក្យប្តឹងឧទ្ធរណ៍ ដើម្បីជំទាស់លទ្ធផលបោះឆ្នោតនៅរដ្ឋ ភែនស៊ីលវេន
អាមេរិក៖ សារព័ត៌មាន AP ចុះផ្សាយនៅថ្ងៃចន្ទនេះថា លោក ដូណាល់ ត្រាំ ដាក់ពាក្យប្តឹងឧទ្ធរណ៍ ពាក់ព័ន្ធនឹងការច្រានចោលរបស់ចៅក្រមសហព័ន្ធ ជុំវិញការព្យាយាមនៃក្រុមយុទ្ធនាការឃោសនាបោះឆ្នោតរបស់លោក ដើម្បីរារាំងការទទួលស្គាល់ជាផ្លូវការ នៃការបោះឆ្នោតនៅរដ្ឋភែនស៊ីលវេនៀ ។ ករណីដដែលៗខាងលើនេះ តែងតែត្រូវបានយកមកធ្វើជាអាវុធវាយប្រហារ ដើម្បីបញ្ឈប់ការឡើងកាន់តំណែងរបស់ប្រធានាធិបតីជាប់ឆ្នោតលោក ចូ បៃដិន ព្រោះរដ្ឋមានអង្គបោះឆ្នោតចំនួន២០រូបមួយនេះ គឺក្ដីសង្ឃឹមធំជាងគេបំផុតសម្រាប់ក្រុមយុទ្ធនាការរបស់លោក ត្រាំ តស៊ូក្តីតាមផ្លូវតុលាការ និងអាចជះឥទ្ធិពលដល់លទ្ធផលបោះឆ្នោតបាន ។ សូមជម្រាបថា ទាំងលោក ដូណាល់ ត្រាំ និងដើមបណ្តឹងផ្សេងទៀតបានជូនដំណឹងអំពីការប្តឹងឧទ្ធរណ៍ទៅតុលាការសហរដ្ឋអាមេរិក នៅថ្ងៃអាទិត្យសប្តាហ៍មុននេះ មួយថ្ងៃក្រោយចៅក្រមសហព័ន្ធម្នាក់បានចេញដីកាច្រានចោលពាក្យបណ្ដឹង ដែលបានប្ដឹងឱ្យលុបចោលសន្លឹកឆ្នោតបោះតាមប្រៃសណីយរាប់លានសន្លឹកនៅក្នុងរដ្ឋភែនស៊ីលវេនៀ ៕