-
ការចាក់វ៉ាក់សាំង Covid-19 របស់ក្រុមហ៊ុនផលិតឱថស Pfizer និង BioNTech អាចនឹងចាប់ផ្តើមនៅសហរដ្ឋអាមេរិក និងអឺរ៉ុបនាខែក្រោយនេះ
អាមេរិក៖ សារព័ត៌មានរ៉យទ័រចេញផ្សាយនៅថ្ងៃព្រហស្បតិ៍នេះថា ការចាក់វ៉ាក់សាំង Covid-19 របស់ក្រុមហ៊ុនផលិតឱសថដ៏ធំរបស់អាមេរិក ភីហ្វីហ្ស៊ឺ និង បាយអូអិនធិច របស់អាល្លឺម៉ង់ អាចនឹងចាប់ផ្តើមប្រព្រឹត្តទៅនៅមុនថ្ងៃបុណ្យណូអែលខាងមុខនេះ ។ ក្រុមហ៊ុនផលិតឱសថរបស់ប្រទេសទាំងពីរ អាចនឹងទទួលបានការអនុញ្ញាតជាបន្ទាន់ពីស្ថាប័នជំនាញសហរដ្ឋអាមេរិក និង អឺរ៉ុប សម្រាប់ប្រឆាំងនឹងការរីករាលដាលនៃជម្ងឺ Covid-19 នាខែក្រោយនេះ បន្ទាប់ពីលទ្ធផលនៃការសាកល្បងចុងក្រោយបានបង្ហាញថា វាមានអត្រាជោគជ័យរហូតដល់៩៥ភាគរយ ហើយមិនមានផលប៉ះពាល់ធ្ងន់ធ្ងរ ។ ទន្ទឹមគ្នានេះ ការពិសោធន៍ចុងក្រោយបានអះអាងថា ប្រសិទ្ធភាពនៃការចាក់ថ្នាំបង្ការរោគទាំងពីរនេះ ត្រូវបានគេរកឃើញថា មានប្រសិទ្ធភាពគ្រប់ជាតិសាសន៍ និង ក្រុមអាយុ ៕
-
ម៉ាឡេស៊ីចុះកិច្ចព្រមព្រៀងជាមួយចិន ក្នុងគោលបំណងសហការអភិវឌ្ឍវ៉ាក់សាំង Covid-19
ម៉ាឡេស៊ី៖ ម៉ាឡេស៊ី នៅថ្ងៃពុធនេះ បានចុះហត្ថលេខាលើកិច្ចព្រមព្រៀងមួយជាមួយចិន ក្នុងគោលបំណងសហការបង្កើតវ៉ាក់សាំងដែលមានសុវត្ថិភាព និងប្រសិទ្ធភាព ដែលជាផ្នែកមួយនៃកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹង Covid-19 នេះបើតាមសារព័ត៌មានរ៉យទ័រនៅថ្ងៃទី១៨ ខែវិច្ឆិកា ឆ្នាំ២០២០ ។ រដ្ឋមន្ត្រីវិទ្យាសាស្ត្របច្ចេកវិជ្ជា និងការច្នៃប្រឌិតថ្មីម៉ាឡេស៊ីលោក ខៃរី ចាម៉ាលូដឌីន បានចុះហត្ថលេខាលើកិច្ចព្រមព្រៀងជាមួយសមភាគីចិនលោក វ៉ាង ជីកាង នៅក្នុងពិធីមួយតាមអ៊ីនធឺណេត ។ កិច្ចសហប្រតិបត្តិការរវាងប្រទេសទាំងពីរស្ថិតក្រោមកិច្ចព្រមព្រៀងនេះ នឹងត្រូវត្រួតពិនិត្យដោយគណៈកម្មាធិការដឹកនាំដោយរដ្ឋមន្ត្រីក្រសួងការបរទេសប្រទេសទាំងពីរ ដែលត្រូវបានបង្កើតឡើងក្នុងខែតុលាកន្លងទៅ ដើម្បីដោះស្រាយបញ្ហាប្រឈមនៅក្រោយសម័យ Covid-19 ។ សូមជម្រាបផងដែរថា ស្ថិតក្រោមកិច្ចព្រមព្រៀងជាធរមានរយៈពេល០៥ឆ្នាំខាងលើនេះ ប្រទេសម៉ាឡេស៊ីនឹងទទួលបានសិទ្ធិជាអាទិភាព ក្នុងការទទួលបានវ៉ាក់សាំងប្រឆាំងជំងឺ Covid-19 ដែលបង្កើតឡើងដោយប្រទេសចិន ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៥៦លាននាក់ ក្នុងនោះស្លាប់ជាង១លាន៣៥ម៉ឺននាក់ និងជាសះស្បើយជាង៣៩លាន៣៤ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥៦លាន៥៥ម៉ឺន៤ពាន់៩១៣ករណី ក្នុងនោះមានអ្នកជម្ងឺសរុបចំនួន១លាន៣៥ម៉ឺន៤ពាន់៥៥២នាក់ស្លាប់ និង ជាសះស្បើយឡើងវិញសរុបចំនួន៣៩លាន៣៤ម៉ឺន៨ពាន់៥៨៥នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៩ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១១លាន៨៧ម៉ឺន៣ពាន់៧២៧នាក់ ស្លាប់ចំនួន២៥ម៉ឺន៦ពាន់២៥៤នាក់ និងជាសះស្បើយចំនួន៧លាន១៦ម៉ឺន៦ពាន់៩៩៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៨លាន៩៥ម៉ឺន៨ពាន់១៤៣នាក់ ស្លាប់ចំនួន១៣ម៉ឺន១ពាន់៦១៨នាក់ និងជាសះស្បើយ៨លាន៣៨ម៉ឺន១ពាន់៧៧០នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៥លាន៩៤ម៉ឺន៧ពាន់៤០៣នាក់ ស្លាប់១៦ម៉ឺន៧ពាន់៤៩៧នាក់ និងជាសះស្បើយ៥លាន៣៨ម៉ឺន៩ពាន់៨៦៣នាក់ ៕
-
UN ស្នើក្រុមហ៊ុនអាកាសចរចំនួន៤០ ដឹកវ៉ាក់សាំងកូវីដ១៩ទៅចែកឲ្យប្រទេសក្រីក្រខ្លាំង
-
ថៃគ្រោងទិញវ៉ាក់សាំងកូវីដ១៩ពីអង់គ្លេស២៦លានដូស តម្លៃជិត២០០លានដុល្លារ
-
វៀតណាមខាតបង់ជាង១ពាន់លានដុល្លារ ស្លាប់មនុស្ស២៨០នាក់ ព្រោះព្យុះ១៣លើក
-
ទីបំផុតក្រុមហ៊ុន Huawei លក់ចេញប្រេនស្មាតហ្វូន Honor ជាផ្លូវការ
ចិន៖ សារព័ត៌មាន AP ចេញផ្សាយថ្មីៗនេះថា ក្រុមហ៊ុន ហូវៃ បានប្រកាសជាផ្លូវការហើយ ជុំវិញការលក់ប្រេនស្មាតហ្វូន Honor ដើម្បីព្យាយាមជួយប្រេនស្មានហ្វូននេះ អោយរួចផុតពីទណ្ឌកម្មដែលសហរដ្ឋអាមេរិកបានដាក់មកលើក្រុមហ៊ុនបច្ចេកវិទ្យាយក្សរបស់ប្រទេសចិនមួយនេះ ។ យ៉ាងណាមិញ ក្រុមហ៊ុន ហូវៃ មិនបានផ្តល់ព័ត៌មានលម្អិតពាក់ព័ន្ធនឹងតម្លៃនៃការលក់ប្រេនស្មាតហ្វូន Honor ឡើយ ខណៈ ហូវៃ នឹងលែងជាម្ចាស់កាន់កាប់ប្រេនស្មាតហ្វូននេះទៀតហើយ នៅពេលការលក់បញ្ចប់ទៅជាស្ថាពរ ។ ប្រភពបានអោយដឹងថា អ្នកទិញប្រេន Honor គឺក្រុមហ៊ុនមួយដែលដឹកនាំបង្កើតឡើងដោយសហគ្រាសពាណិជ្ជកម្មមួយ ដែលកាន់កាប់ដោយរដ្ឋបាលទីក្រុង Shenzhen របស់ចិន ជាកន្លែងទីស្នាក់ការកណ្តាលរបស់ ហូវៃ ស្ថិតនៅ ។ សហគ្រាសពាណិជ្ជកម្មនោះ គឺក្រុមហ៊ុន Digital China ដែលជាអ្នកចែកចាយស្មាតហ្វូនដ៏ធំរបស់ ហូវៃ និងជាដៃគូសហការដ៏ល្អ ហើយតម្លៃនៃការលក់វិញគឺខ្ទង់១៥ពាន់លានដុល្លារអាមេរិក ៕
-
ការលក់ស្មាតហ្វូននៅជុំវិញពិភពលោក បន្តធ្លាក់ចុះ៦ភាគរយនៅត្រីមាសទី៣ ឆ្នាំ២០២០នេះ
ចិន៖ ការលក់ទូរស័ព្ទឆ្លាតវ៉ៃនៅជុំវិញពិភពលោក នៅនាត្រីមាសទី៣ ឆ្នាំ២០២០នេះ បានធ្លាក់ចុះប្រមាណ៦ភាគរយ ដោយការធ្លាក់ចុះនេះ ត្រូវបានអ្នកជំនាញមើលឃើញថា វាការធ្លាក់ចុះតិចតួច នេះបើតាមរបាយការណ៍វិភាគ និងស្រាវជ្រាវរបស់ក្រុមហ៊ុន ឌីជីថាម រីស៊ើច ដកស្រង់ចេញផ្សាយដោយសារព័ត៌មាន ហ្វូន អារិនណា នាពេលថ្មីៗ ។ នៅក្នុងត្រីមាសទី៣ឆ្នាំនេះ ក្រុមហ៊ុនផលិតស្មាតហ្វូនធំៗចំនួន០២បានប្រជែងគ្នាដណ្ដើមចំណែកទីផ្សារស្មាតហ្វូនសកល ក្នុងនោះ Samsung និង Huawei នាំមុខគេ ព្រោះក្រុមហ៊ុនទាំងពីរនេះបានចេញស្មាតហ្វូនកំពូលៗជាច្រើន ដែលធ្វើឱ្យទាក់ទាញអតិថិជន និង បានចំណាយប្រាក់ទិញ ។ បើតាមក្រុមហ៊ុន ឌីជីថាម រីស៊ើច នៅក្នុងឆ្នាំ២០២០នេះ ស្មាតហ្វូនប្រើប្រាស់បច្ចេកវិទ្យា 5G នឹងមានប្រមាណជា២០ភាគរយ នៃចំនួនស្មាតហ្វូនសរុបដែលបានលក់ ក្នុងនោះចិនជាទីផ្សារស្មាតហ្វូន 5G ធំជាងគេ ៕
-
ទីក្រុងតូក្យូរបស់ជប៉ុនត្រៀមបង្កើនការប្រកាសអាសន្ន Covid-19 ដល់កម្រិតទី៤ ជាកម្រិតខ្ពស់បំផុត
ជប៉ុន៖ ទីក្រុងតូក្យូបាននិងកំពុងត្រៀមបង្កើនការប្រកាសអាសន្នក្នុងកម្រិតទី៤ ដែលជាកម្រិតខ្ពស់បំផុត ចំពេលដែលចំនួនករណីឆ្លងជម្ងឺ Covid-19 នៅក្នុងរដ្ឋធានីរបស់ប្រទេសជប៉ុនមួយនេះ កំពុងកើនឡើងខ្លាំង នេះបើតាមសារព័ត៌មានរ៉យទ័រនៅថ្ងៃទី១៨ ខែវិច្ឆិកា ឆ្នាំ២០២០ ។ សារព័ត៌មានជប៉ុន Nikkei បានចេញផ្សាយថា ជាផ្នែកមួយនៃវិធានការការពារនោះ រដ្ឋាភិបាលក្រុងតូក្យូកំពុងពិចារណាស្នើសុំឱ្យអាជីវកម្មមួយចំនួនកាត់បន្ថយនូវការលក់ដូររបស់ពួកគេ ដោយឡែកសេចក្តីប្រកាសនឹងត្រូវធ្វើឡើងនៅថ្ងៃព្រហស្បតិ៍សប្តាហ៍នេះ (ម៉ោងក្នុងតំបន់) ។ យ៉ាងណាមិញ ពាក់ព័ន្ធនឹងបញ្ហានេះ អាជ្ញាធរក្រុងតូក្យូមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ ។ សូមជម្រាបថា ទីក្រុងតូក្យូបានបន្ទាបកម្រិតប្រកាសអាសន្នដល់ចំណាត់ថ្នាក់ខ្ពស់បំផុតទី២ នៅថ្ងៃទី១០ ខែកញ្ញាកន្លងទៅនេះ បន្ទាប់ពីចំនួនករណីឆ្លងប្រចាំថ្ងៃបានធ្លាក់ចុះពីកម្រិតកំពូលនៃករណីឆ្លង៤០០ករណីនៅរដូវក្តៅ ។ ប៉ុន្តែចាប់តាំងពីដើមខែនេះ ចំនួនអ្នកឆ្លង Covid-19 ប្រចាំថ្ងៃបានកើនឡើងខ្ពស់ ដែលឈានដល់កម្រិតខ្ពស់បំផុតទី៣ ដោយមានអ្នកឆ្លង៣៩៣ករណីកាលពីសប្តាហ៍មុន ៕
-
លោក ដូណាល់ ត្រាំ អាចនឹងដកកងទ័ពចេញពីប្រទេសសូម៉ាលី ដែលជាផ្នែកមួយនៃការដកទ័ពជាសកល
អាមេរិក៖ ប្រធានាធិបតីអាមេរិកលោក ដូណាល់ ត្រាំ អាចនឹងដកកងទ័ពស្ទើរតែទាំងអស់ចេញពីប្រទេសសូម៉ាលី ដែលនេះជាផ្នែកមួយនៃការដកកងទ័ពជាសកលមួយ ដោយក្នុងនោះក៏រួមមានទាំងការដកកងកម្លាំងចេញពីប្រទេសអាហ្វហ្គានីស្ថាន និងអ៊ីរ៉ាក់ផងដែរ នេះបើតាមប្រភពពីមន្រ្តីអាមេរិកក្នុងលក្ខខណ្ឌមិនបញ្ចេញអត្តសញ្ញាណ ដកស្រង់ចេញផ្សាយដោយសារព័ត៌មានរ៉យទ័រនៅថ្ងៃទី១៨ ខែវិច្ឆិកា ឆ្នាំ២០២០ ។ ដំណឹងខាងលើនេះ បានកើតមានឡើងចំពេលដែលរដ្ឋមន្ត្រីការពារជាតិអាមេរិកស្ដីទី លោក គ្រីស្តូហ្វឺ មីលឡឺ ប្រកាសថា សហរដ្ឋអាមេរិកនឹងកាត់បន្ថយចំនួនកងទ័ពរបស់ខ្លួននៅអាហ្វហ្គានីស្ថាន និងអ៊ីរ៉ាក់អោយមកនៅត្រឹម២ពាន់៥រយនាក់ដូចគ្នានៅថ្ងៃទី១៥ ខែមករា ដើមឆ្នាំក្រោយ ។ រហូតមកទល់ពេលនេះ សហរដ្ឋអាមេរិកមានកងទ័ពជិត៤ពាន់៥រយនាក់នៅអាហ្វហ្គានីស្ថាន និងច្រើនជាង៣ពាន់នាក់នៅអ៊ីរ៉ាក់ ហើយការប្រកាសពីគម្រោងកាត់បន្ថយវត្តមានកងទ័ពនេះ ធ្វើឡើងតាមការសន្យារបស់លោក ដូណាល់ ត្រាំ កាលពីយុទ្ធនាការឃោសនាបោះឆ្នោត ក្នុងការបោះឆ្នោតប្រធានាធិបតីកាលពីឆ្នាំ២០១៦ ៕