-
ចិនជំរុញអោយសហរដ្ឋអាមេរិកបញ្ឈប់ការហាមឃាត់ក្រុមហ៊ុនអាមេរិកបោះទុនក្នុងក្រុមហ៊ុនចិនដែលពាក់ព័ន្ធនឹងយោធា
ចិន៖ ក្រសួងការបរទេសចិននៅថ្ងៃសុក្រនេះបានអំពាវនាវអោយរដ្ឋាភិបាលអាមេរិកបញ្ឈប់ការកំណត់គោលដៅរឹតត្បិតលើក្រុមហ៊ុនរបស់ចិន តាមរយៈការចេញបញ្ជាប្រតិបតិ្តស្តីពីបញ្ហាសន្តិសុខជាតិ ដោយទីក្រុងប៉េកាំងប្តេជ្ញាថា នឹងការពារផលប្រយោជន៍របស់ក្រុមហ៊ុនចិននានា នេះបើតាមសារព័ត៌មាន CGTN នៅថ្ងៃទី១៤ ខែវិច្ឆិកា ឆ្នាំ២០២០ ។ ការលើកឡើងបែបនេះរបស់ក្រសួងការបរទេសចិន ធ្វើឡើងក្រោយ ប្រធានា ធិបតីអាមេរិកលោក ដូណាល់ ត្រាំ បានចុះហត្ថលេខាលើបញ្ជាប្រតិបត្តិមួយនៅថ្ងៃទី ១២ ខែវិច្ឆិកានេះ ដោយហាមឃាត់វិនិយោគិនអាមេរិកបោះទុនក្នុងក្រុមហ៊ុនចិន ដែលទីក្រុងវ៉ាស៊ីនតោនអះអាងថា ពាក់ព័ន្ធនឹងយោធាចិន ។ បើគ្មានអ្វីប្រែប្រួលទេនោះ ចាប់ពីថ្ងៃទី១១ ខែមករាឆ្នាំក្រោយនេះតទៅ បញ្ជាប្រតិបត្តិនឹងហាមឃាត់វិនិយោគិនអាមេរិកពីការបញ្ជាទិញភាគហ៊ុនរបស់ក្រុមហ៊ុនចិនចំនួន៣១ក្រុមហ៊ុន ដែលជាប់ឈ្មោះក្នុងបញ្ជីរបស់ក្រសួងការពារជាតិអាមេរិក ដែលពាក់ព័ន្ធនឹងយោធាចិននៅដើមឆ្នាំ២០២០នេះ ។ សូមជម្រាបថា ក្រុមវិនិយោគិនអាមេរិកមានពេលរហូតដល់ថ្ងៃទី១១ ខែវិច្ឆិកា ឆ្នាំ២០២១ ដើម្បីដកភាគហ៊ុនដែលពួកគេមានចេញពីក្រុមហ៊ុនចិនហាមឃាត់ទាំងនេះ ។ ហើយបម្រាមថ្មីនេះ អាចនឹងប៉ះពាល់ដល់ក្រុមហ៊ុនធំៗរបស់ចិនមួយចំនួនដូចជាក្រុមហ៊ុន China Telecom, China Mobile និងក្រុមហ៊ុនផលិតសម្ភារឃ្លាំមើល Hikvision ជាដើម ៕
-
លោក ដូណាល់ ត្រាំ និយាយថា មានតែពេលវេលាទេទើបអាចប្រាប់បានថា អ្នកណានឹងគ្រប់គ្រងសេតវិមាននៅឆ្នាំក្រោយនេះ
អាមេរិក៖ ប្រធានាធិបតីអាមេរិក លោក ដូណាល់ ត្រាំ បញ្ជាក់ថា មានតែពេលវេលាទេ ដែលអាចប្រាប់ថា អ្នកណានឹងចូលសេតវិមាននៅខែមករា ឆ្នាំ២០២១ខាងមុខ នេះបើតាមសុន្ទរកថាជាសាធារណៈលើកដំបូងរបស់លោក ចាប់តាំងពីលោក ចូ បៃដិន ត្រូវបានប្រកាសជាអ្នកឈ្នះក្នុងការបោះឆ្នោតប្រធានាធិបតី ដកស្រង់ចេញផ្សាយដោយសារព័ត៌មាន CGTN នៅថ្ងៃទី១៤ ខែវិច្ឆិកា ឆ្នាំ២០២០ ។ ថ្លែងនៅឯសេតវិមាននៅថ្ងៃសុក្រសប្តាហ៍នេះ លោក ដូណាល់ ត្រាំ បានបញ្ជាក់ជាថ្មីថា រូបលោកនឹងមិនដាក់សហរដ្ឋអាមេរិកនៅក្រោមវិធានការបិទប្រទេស ដើម្បីប្រយុទ្ធប្រឆាំងនឹងជម្ងឺរាតត្បាតសកល COVID-19 នោះទេ ។ នាឱកាសនោះដែរ ប្រធានាធិបតីអាមេរិករូបនេះបានរំពឹងថា វ៉ាក់សាំងប្រឆាំងជម្ងឺ Covid-19 ដែលមានប្រសិទ្ធភាពនឹងអាចផលិតរួចរាល់ សម្រាប់ប្រជាជនទាំងមូលអោយបានឆាប់បំផុតនៅត្រឹមខែមេសា ឆ្នាំក្រោយនេះ ចំពេលមានករណីឆ្លងថ្មីៗកើនឡើងយ៉ាងគំហុក ដែលបានជំរុញអោយអត្រាឆ្លងប្រចាំថ្ងៃហក់ឡើងខ្ពស់មិនធ្លាប់មិនមាន ៕
-
សារព័ត៌មានធំៗរបស់សហរដ្ឋអាមេរិកផ្សាយថា លោក ចូ បៃដិន ឈ្នះសេតវិមានជាមួយអង្គបោះឆ្នោត ៣០៦ ទល់នឹងលោក ដូណាល់ ត្រាំ ២៣២
អាមេរិក ៖ ប្រព័ន្ធផ្សព្វផ្សាយធំៗរបស់សហរដ្ឋអាមេរិកនៅថ្ងៃសុក្រនេះព្យាករណ៍ថា លោក ចូ បៃដិន បានឈ្នះអង្គបោះឆ្នោតតាមរដ្ឋចំនួន ៣០៦ ដែលសម្រេចថា អ្នកណាជាអ្នកឈ្នះសេតវិមាន ខណៈដែលលោក ដូណាល់ ត្រាំ វិញ ទទួលបានអង្គបោះឆ្នោត ២៣២ ។ ទូរទស្សន៍ CNN , ABC និងបណ្តាញទូរទស្សន៍ដទៃទៀតបានលើកឡើងថា លោក ចូ បៃដិន បានពង្រឹងជ័យជម្នះរបស់លោកលើលោក ដូណាល់ ត្រាំ នៅក្នុងការបោះឆ្នោតនៅសហរដ្ឋអាមេរិក ជាមួយនឹងជ័យជម្នះនៅក្នុងរដ្ឋចរជា ដែលជាទំនៀមទម្លាប់បោះឱ្យតែគណបក្សសាធារណរដ្ឋ ។ ជាមួយគ្នានេះ ទូរទស្សន៍ CNN និងទូរទស្សន៍ NBC ព្យាករណ៍ថា លោក ត្រាំ ដែលមានអង្គបោះឆ្នោតចំនួន ៣០៦ ដែរ នៅពេលលោកឈ្នះលោកស្រី ហ៊ីលឡារី គ្លីនតុន ក្នុងឆ្នាំ២០១៦នោះ បានអះអាងទទួលជ័យជម្នះនៅរដ្ឋខារ៉ូលីណាខាងជើង ដោយនាំឱ្យពិន្ទុសរុបចុងក្រោយរបស់លោកនៅពេលនេះ គឺប្រហែល ២៣២ ។ លោក ចូ បៃដិន…
-
កងទ័ពឥណ្ឌា និងប៉ាគីស្ថានផ្ទុះសង្គ្រាមកាំភ្លើងធំនៅតំបន់កាស្មៀ បណ្តាលអោយមនុស្ស១៣នាក់ស្លាប់ និងរងរបួសជាច្រើននាក់
ឥណ្ឌា៖ កងកម្លាំងឥណ្ឌា និងប៉ាគីស្ថាន នៅថ្ងៃសុក្រនេះ បានធ្វើសង្គ្រាមកាំភ្លើងធំដ៏ខ្លាំងនៅតំបន់សងខាងព្រំដែនកាស្មៀរវាងប្រទេសទាំងពីរ ហើយជាលទ្ធផលនោះ មានមនុស្សស្លាប់យ៉ាងតិច១៣នាក់ និងរាប់សិបនាក់ទៀតរងរបួស នេះបើតាមសារព័ត៌មានរ៉យទ័រនៅថ្ងៃទី១៤ ខែវិច្ឆិកា ឆ្នាំ២០២០ ។ អ្នកនាំពាក្យយោធា និងប៉ូលិសឥណ្ឌាបានបញ្ជាក់ថា ទាហានឥណ្ឌា៤នាក់និងជនស៊ីវិល៤នាក់បានស្លាប់ ហើយមនុស្ស១២នាក់ទៀតរងរបួស ។ រីឯប៉ាគីស្ថានវិញនិយាយថា មនុស្ស៥នាក់ស្លាប់ និង៣១នាក់រងរបួសនៅខាងទឹកដីរបស់ខ្លួន ។ ភាពតានតឹងខាងលើនេះ បានកើតឡើង០៣ថ្ងៃក្រោយពីទាហានឥណ្ឌា៣នាក់និងជនសកម្មប្រយុទ្ធ៣នាក់ត្រូវបានសម្លាប់ ក្នុងការបាញ់តគ្នានៅតាមព្រំដែនកាស្មៀ ។ ការប្រយុទ្ធគ្នាចុងក្រោយនេះបានផ្ទុះឡើងកាលពីដើមថ្ងៃសុក្រ ដោយភាគីទាំងពីរចោទប្រកាន់គ្នាថា បាញ់ផ្លោងបង្ករឿង ហើយការបាញ់ផ្លោងបានបន្តដល់យប់ ។ ការប៉ះទង្គិចគ្នាដោយកាំភ្លើងធំ និងកាំភ្លើងយន្តត្រូវបានរាយការណ៍នៅតាមខ្សែបន្ទាត់ព្រំដែនប្រវែង៧៤០គីឡូម៉ែត្រ ដែលខណ្ឌចែកប្រទេសគូប្រជែងមានសព្វា វុធនុយគ្លេអ៊ែរទាំងពីរនេះ ៕
-
អ្នកឆ្លង COVID-19 នៅទូទាំងពិភពលោកកើនឡើងជិត៥៤លាននាក់ ក្នុងនោះស្លាប់ជាង១លាន៣០ម៉ឺននាក់ និងជាសះស្បើយជាង៣៧លាន៥២ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥៣លាន៧៤ម៉ឺន៦ពាន់៩៤៤ករណី ក្នុងនោះមានអ្នកជម្ងឺសរុបចំនួន១លាន៣០ម៉ឺន៩ពាន់៤០៨នាក់ស្លាប់ និង ជាសះស្បើយឡើងវិញសរុបចំនួន៣៧លាន៥២ម៉ឺន៣ពាន់៩៧៣នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៤ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១១លាន៦ម៉ឺន៤ពាន់៣៦៤នាក់ ស្លាប់ចំនួន២៤ម៉ឺន៩ពាន់៩៧៥នាក់ និងជាសះស្បើយចំនួន៦លាន៧៨ម៉ឺន៩ពាន់១៤៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៨លាន៧៧ម៉ឺន៣ពាន់៤៧៩នាក់ ស្លាប់ចំនួន១២ម៉ឺន៩ពាន់២២៥នាក់ និងជាសះស្បើយ៨លាន១៦ម៉ឺន៣ពាន់៥៧២នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៥លាន៨១ម៉ឺន៩ពាន់៤៩៦នាក់ ស្លាប់១៦ម៉ឺន៤ពាន់៩៤៦នាក់ និងជាសះស្បើយ៥លាន២៦ម៉ឺន៧ពាន់៥៦៧នាក់ ៕
-
កូវីដ១៩៖ រដ្ឋមន្ត្រី Peter Szijjarto ថា ហុងគ្រីនឹងតេស្តវ៉ាក់សាំងរុស្ស៊ី ជាង១សប្តាហ៍ទៀត
-
អាល្លឺម៉ង់ថា គ្មានភស្តុតាងបង្ហាញថាស្តេចថៃធ្វើខុសច្បាប់ ក្នុងប្រទេសខ្លួនទេ
-
ក្រុមហ៊ុន American Airlines ចាប់ផ្តើមដំណើរការជើងហោះហើរដឹកអ្នកដំណើរទៅកាន់ចិនឡើងវិញ ក្រោយផ្អាកអស់ជាច្រើនខែដោយសារវិបត្តិ Covid-19
អាមេរិក៖ សារព័ត៌មានរ៉យទ័របានចុះផ្សាយថ្មីៗនេះថា ក្រុមហ៊ុនអាកាសចរណ៍ American Airlines ចាប់ផ្តើមដំណើរការជើងហោះហើរដឹកអ្នកដំណើរទៅកាន់ប្រទេសចិនឡើងវិញ ដែលនាំឱ្យចំនួនជើងហោះហើរប្រចាំសប្តាហ៍របស់អាមេរិកទៅចិនកើនឡើងដល់១០ ។ បើតាមក្រុមហ៊ុនអាកាសចរណ៍របស់សហរដ្ឋអាមេរិកមួយនេះ ជើងហោះហើរលើកដំបូងរបស់ខ្លួនទៅកាន់ចិន បើគិតចាប់តាំងតែពីខែកុម្ភៈមក បានចាកចេញពីអាកាសចរណ៍អន្តរជាតិ DFW ក្នុងរដ្ឋតិចសាស់ ក្នុងថ្ងៃពុធសប្តាហ៍នេះ (ម៉ោងក្នុងតំបន់) ឆ្ពោះទៅកាន់អាកាសយានដ្ឋាន Pudong ក្នុងទីក្រុងសៀងហៃ ដោយកាត់តាមទីក្រុងសេអ៊ូលរបស់កូរ៉េខាងត្បូង ។ សូមរំលឹកផងដែរថា កាលពីខែមិថុនា ឆ្នាំ២០២០ សហរដ្ឋអាមេរិក-ចិនបានព្រមព្រៀងគ្នាលើ ការចាប់ផ្តើមឱ្យមានជើងហោះហើរប្រចាំសប្តាហ៍រវាងប្រទេសទាំងពីរចំនួន៤ជើង សម្រាប់ភាគីម្ខាងៗ បន្ទាប់ពីការធ្វើដំណើរត្រូវបានផ្អាកអស់ជាច្រើនខែ ដោយសារតែការផ្ទុះរីករាលដាលនៃជំងឺ COVID-19 ៕
-
ចាប់ពីខែមិថុនា ឆ្នាំ២០២១ ក្រុមហ៊ុន Google នឹងបញ្ឈប់ការផ្ដល់ជូនទំហំ Storage ឥតគិតថ្លៃនៅលើកម្មវិធី Google Photos
អាមេរិក៖ សារព័ត៌មានរ៉យទ័រចេញផ្សាយថ្មីៗនេះថា ក្រុមហ៊ុន Google គិតចាប់ពីខែមិថុនា ឆ្នាំ២០២១ខាងមុខនេះ នឹងបញ្ឈប់ការផ្ដល់ជូនទំហំ Storage អោយឥតគិតថ្លៃនៅលើកម្មវិធី Google Photos ។ ស្របពេលជាមួយគ្នានោះដែរ Google មិនបានបញ្ជាក់ពីមូលហេតុនៃការឈប់ផ្ដល់ជូនឥតគិតថ្លៃនេះទេ ប៉ុន្តែបើតាមការបញ្ជាក់ពីប្រភពព័ត៌មានមួយចំនួនបានឱ្យដឹងថា វាដល់ពេលដែល Google ត្រូវប្រមូលចំណូលពីកម្មវិធី Google Photos ព្រោះដាក់ឱ្យប្រើឥតគិតថ្លៃ និងមិនកំណត់ចាប់ពីឆ្នាំ ២០១៥ ។ ក្រុមហ៊ុនបច្ចេកវិទ្យារបស់អាមេរិកបានបញ្ជាក់ថា មានរូបភាពជាង៤ពាន់ពាន់លានរូបភាពត្រូវបានបង្ហោះ ឬ Upload ចូលជារៀងរាល់សប្ដាហ៍ ។ ហើយសម្រាប់អ្នកចង់ប្រើប្រាស់ Google Photos អាចចំណាយ១.៩៩ដុល្លារក្នុងមួយខែ សម្រាប់ទំហំ១០០GB និង២.៩៩ដុល្លារក្នុងមួយខែសម្រាប់ទំហំ២០០GB ៕
-
សមាជិកសភាបក្សសាធារណរដ្ឋបញ្ជាក់ថា រដ្ឋបាលលោក ត្រាំ គួរតែអនុញ្ញាតអោយក្រុមលោក បៃដិន ទទួលបានព័ត៌មានសម្ងាត់នានា
អាមេរិក៖ សារព័ត៌មានរ៉យទ័រចេញផ្សាយនៅថ្ងៃសុក្រនេះថា សមាជិកសភាបក្សសាធារណរដ្ឋជាច្រើនរូប នៅថ្ងៃព្រហស្បតិ្តនេះ បាននិយាយថា រដ្ឋបាលរបស់លោក ដូណាល់ ត្រាំ គួរតែអនុញ្ញាតអោយលោក ចូ បៃដិន ទទួលបានព័ត៌មានលំអិត ទាក់ទិននឹងទិន្នន័យស៊ើបការណ៍សម្ងាត់ ។ ការលើកឡើងបែបនេះហាក់បង្ហាញថា ពួកគេបានទទួលស្គាល់ថា លោក ចូ បៃដិន នឹងចូលកាន់កាប់សេតវិមានក្នុងពេលឆាប់ៗខាងមុខនេះ បើទោះបីជាលោក ដូណាល់ ត្រាំ មិនទទួលស្គាល់បរាជ័យរបស់ខ្លួនក៏ដោយ ។ ប៉ុន្តែរហូតមកទល់ពេលនេះ លោក ដូណាល់ ត្រាំ ត្រូវបានគេរាយការណ៍ថា បានហាមឃាត់ក្រុមមន្ត្រីរបស់លោក មិនអោយធ្វើកិច្ចសហការជាមួយក្រុមមន្ត្រីរបស់ លោក ចូ បៃដិន ឡើយ ស្របពេលលោកកំពុងតវ៉ាជំទាស់លទ្ធផលបោះឆ្នោតតាមផ្លូវតុលាការ ។ សូមជម្រាបផងដែរថា ជាទូទៅ ប្រធានាធិបតីជាប់ឆ្នោតរបស់សហរដ្ឋអាមេរិកតែងតែទទួលបាននូវព័ត៌មានលំអិត ស្តីពីព័ត៌មានសំងាត់នានា ដើម្បីស្វែងយល់ពីការគំរាមកំហែងទាំងឡាយ ដែលត្រូវប្រឈមមុនពេលឡើងកាន់តំណែងជាប្រធានាធិបតីផ្លូវការ ៕