-
នាយករដ្ឋមន្រ្តីសង្ហិបុរីអបអរសាទរលោកស្រី អោងសាន ស៊ូជី ក្រោយគណបក្សរបស់លោកស្រីទទួលបានជ័យជំនះក្នុងការបោះឆ្នោតសកល
មីយ៉ាន់ម៉ា៖ នាយករដ្ឋមន្រ្តីសង្ហិបុរីលោក លី សៀនឡុង នៅថ្ងៃព្រហស្បតិ្តនេះ បានអបអរសាទរលោក អោងសាន ស៊ូជី និងគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី បន្ទាប់ពីទទួលបានជ័យជំនះក្នុងការបោះឆ្នោតសកលកាលពីថ្ងៃអាទិត្យចុងសប្តាហ៍មុន នេះបើតាមក្រសួងការបរទេសសង្ហិបុរី ចេញផ្សាយដោយសារព័ត៌មាន AFP នៅថ្ងៃទី១៣ ខែវិច្ឆិកា ឆ្នាំ២០២០ ។ បើតាមលទ្ធផលបោះឆ្នោតផ្លូវការ ក្រោយការបោះឆ្នោតសកលធ្វើឡើងកាលពីថ្ងៃទី០៨ ខែវិច្ឆិកានេះ គណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អោងសាន ស៊ូជី ទទួលបានអាសនៈសរុបចំនួន ៣៤៤ នៅក្នុងសភាទាំងពីរជាន់ថ្នាក់របស់មីយ៉ាន់ម៉ា ឬស្មើនឹង ៨០% នៃអាសនៈសរុបដែលបក្សនេះទទួលបានកាលពីអាណត្តិឆ្នាំ២០១៥ ។ លទ្ធផលបោះឆ្នោតផ្លូវការចេញផ្សាយនៅព្រឹកថ្ងៃសុក្រនេះបង្ហាញថា គណបក្សកាន់អំណាចមីយ៉ាន់ម៉ារបស់លោកស្រី អោងសាន ស៊ូជី ទទួលបានអាសនៈគ្រប់គ្រាន់នៅក្នុងសភាទាំងពីរ ដើម្បីបង្កើតរដ្ឋាភិបាលនៅអាណត្តិថ្មីដោយខ្លួនឯង ។ ហើយគិតត្រឹមព្រឹកថ្ងៃសុក្រដដែលនេះ ការរាប់សន្លឹកឆ្នោតនៅតែកំពុងបន្តនៅឡើយ ដោយនៅសល់៦៤អាសនៈទៀតមិនទាន់មានម្ចាស់នៅឡើយទេ ៕
-
ចិនទទួលជោគជ័យក្នុងការបាញ់បង្ហោះផ្កាយរណប 6G ដំបូងបង្អស់របស់ពិភពលោកចូលទៅក្នុងគន្លងតារាវិថី
ចិន៖ សារព័ត៌មានរ៉យទ័រចេញផ្សាយថ្មីៗនេះថា ចិនបានបាញ់បង្ហោះដោយជោគ ជ័យនូវអ្វីដែលត្រូវបានពិពណ៌នាថា ជាផ្កាយរណបអ៊ីនធឺណេត 6G ដំបូងបង្អស់របស់ពិភពលោក ទៅក្នុងលំហអាកាសដើម្បីសាកល្បងបច្ចេកវិជ្ជាមួយនេះ ។ វាបានចូលទៅក្នុងគន្លងគោចរ រួមជាមួយផ្កាយរណបចំនួន១២ផ្សេងទៀតមកពីមជ្ឈមណ្ឌលបាញ់បង្ហោះផ្កាយរណប Taiyuan Satellite Launch Center ក្នុងខេត្តសានស៊ី ។ ឧស្សាហកម្មទូរគមនាគមន៍នៅតែមានរយៈពេលជាច្រើនឆ្នាំទៀត ពីការយល់ព្រមលើលក្ខណៈពិសេសរបស់ 6G ដូច្នេះមិនទាន់ប្រាកដថា បច្ចេកវិទ្យាដែលត្រូវបានសាកល្បងនឹងក្លាយជាលក្ខណៈស្ដង់ដារនៅលើកក្រោយនោះទេ ។ សូមជម្រាបថា ផ្កាយរណបខាងលើនេះ បានផ្ទុកនូវបច្ចេកវិទ្យាដែលនឹងត្រូវបានប្រើប្រាស់សម្រាប់ការត្រួតពិនិត្យគ្រោះមហន្តរាយលើដំណាំ និង ការការពារលើបញ្ហាភ្លើងឆេះព្រៃជាដើម ។ ព្រោះវាពាក់ព័ន្ធនឹងការប្រើប្រាស់រលកតេរ៉ាហឺត ដែលមានប្រេកង់ខ្ពស់ ដើម្បីសម្រេចបាននូវល្បឿនបញ្ជូនទិន្នន័យខ្លាំងជាងប្រព័ន្ធ 5G ជាច្រើនដង ដែលនោះជាសមត្ថភាពរបស់វា ៕
-
ការចោទប្រកាន់របស់លោក ដូណាល់ ត្រាំ ជុំវិញសំណុំរឿងលួចបន្លំសន្លឹកឆ្នោតត្រូវបានក្រុមមន្ត្រីរៀបចំការបោះឆ្នោតច្រានចោល
អាមេរិក៖ ក្រុមមន្ត្រីជាន់ខ្ពស់ផ្នែកកិច្ចការបោះឆ្នោតសហព័ន្ធ និងប្រចាំរដ្ឋនានារបស់សហរដ្ឋអាមេរិកនៅថ្ងៃព្រហស្បតិ្តនេះបញ្ជាក់ថា មិនមានភស្ដុតាងណាមួយបញ្ជាក់ពីការបាត់បង់សន្លឹកឆ្នោត ឬ ត្រូវបានផ្លាស់ប្ដូរ ក៏ដូចជាប្រព័ន្ធបោះឆ្នោតមានការលួចបន្លំឡើយ នៅក្នុងការបោះឆ្នោតប្រធានាធិបតីកាលពីថ្ងៃទី០៣ ខែវិច្ឆិកា នេះបើតាមសារព័ត៌មាន AP នៅថ្ងៃទី១៣ ខែវិច្ឆិកា ឆ្នាំ២០២០ ។ ក្រុមមន្ត្រីផ្នែកកិច្ចការបោះឆ្នោតអាមេរិកបានការអះអាងបែបនេះ ក្រោយលោក ដូណាល់ ត្រាំ នៅតែបញ្ជាក់ថា មានការលួចបន្លំសន្លឹកឆ្នោត ដោយមានការលួចលុបចោលសន្លឹកឆ្នោតជាង២.៧លានសំឡេង ដែលប្រជាជនអាមេរិកបោះឆ្នោតឱ្យរូបលោកនៅទូទាំងប្រទេស និង ការលួចសន្លឹកឆ្នោតរាប់ម៉ឺនសន្លឹកពីរូបលោក ទៅឱ្យលោក ចូ បៃដិន នៅក្នុងរដ្ឋ ភែនស៊ីលវេនៀ និងរដ្ឋដទៃៗទៀត ។ ហើយក្រៅពីការអះអាងខាងលើនេះដែរ ក្រុមមន្ត្រីផ្នែកកិច្ចការបោះឆ្នោតអាមេរិកក៏បានច្រានចោលការបញ្ជាក់របស់លោក ដូណាល់ ត្រាំ និងក្រុមអ្នកសាធារណៈរដ្ឋមួយចំនួនដែលចោទប្រកាន់ថា មានការលួចបន្លំសន្លឹកឆ្នោត ទើបនាំឱ្យលោក ដូណាល់ ត្រាំ ចាញ់លោក ចូ បៃដិន នៅក្នុងការបោះឆ្នោតប្រធានាធិបតីអាណត្តិថ្មីនេះផងដែរ ៕
-
សហរដ្ឋអាមេរិកបន្តរកឃើញអ្នកឆ្លង Covid-19 ថ្មីៗជាង១៦ម៉ឺនករណីថែមទៀតក្នុងរយៈពេលមួយថ្ងៃ
អាមេរិក៖ យោងតាមទិន្នន័យពីគេហទំព័រ worldometer បានអោយដឹងនៅថ្ងៃសុក្រនេះថា សហរដ្ឋអាមេរិកបានរាយការណ៍ពីអ្នកឆ្លងជម្ងឺ COVID-19 ថ្មីៗសរុប ១៦ម៉ឺន១ពាន់៥៤១ករណី និងអ្នកស្លាប់១ពាន់១៩០នាក់បន្ថែមទៀតនៅក្នុងរយៈពេល២៤ម៉ោងប៉ុណ្ណោះ ខណៈអត្រាឆ្លងនេះគឺមានកម្រិតខ្ពស់បំផុតនៅលើពិភពលោក នេះបើតាមការដកស្រង់ទិន្នន័យពីគេហទំព័រ worldometer នាព្រឹកថ្ងៃសុក្រ ទី១៣ ខែវិច្ឆិកា ឆ្នាំ២០២០។ នៅថ្ងៃសុក្រនេះ មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក CDC ក៏បានព្យាករណ៍ដែរថា ចំនួនអ្នកស្លាប់ដោយសារ COVID-19 នៅទូទាំងសហរដ្ឋអាមេរិកនឹងកើនឡើងដល់២៨ម៉ឺន២ពាន់នាក់នៅដើមខែធ្នូខាងមុខ ពីព្រោះអាកាសធាតុចាប់ផ្តើមចុះត្រជាក់ខ្លាំង ហើយអ្នកជំងឺដែលមានវ័យចំណាស់នឹងពិបាកស៊ូទ្រាំ ។ ក្រោយការបូកបញ្ជូនចំនួនថ្មីៗខាងលើនេះ នាំឲ្យចំនួនអ្នកឆ្លង COVID-19 សរុបនៅទូទាំងសហរដ្ឋអាមេរិកកើនឡើងដល់១០លាន៨៧ម៉ឺន៣ពាន់៩៣៦នាក់ ក្នុងនោះអ្នកស្លាប់សរុបមាន២៤ម៉ឺន៨ពាន់៥៨៥នាក់ និងជាសះស្បើយឡើងវិញជាង៦លាន៧២ម៉ឺន៧ពាន់នាក់ ។ សូមជម្រាបថា ការធ្វើបាតុកម្ម ការប្រមូលផ្តុំគ្នា និងការតវ៉ាដ៏ចម្រូងចម្រាស់ ដោយមិនបានអនុវត្តវិធានការសុវត្ថិភាព ត្រូវបានគេជឿជាក់ថា ជាកត្តាចម្បងៗដែលជំរុញអោយករណីឆ្លងថ្មីៗនៃជម្ងឺ COVID-19 កើនឡើងយ៉ាងគំហុកបែបនេះ ៕
-
អ្នកឆ្លង COVID-19 នៅទូទាំងពិភពលោកកើនឡើងជាង៥៣លាននាក់ ក្នុងនោះស្លាប់ជិត១លាន៣០ម៉ឺននាក់ និងជាសះស្បើយជាង៣៧លាន២០ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន៥៣លាន៧ម៉ឺន៣ពាន់៦០៩ករណី ក្នុងនោះមានអ្នកជម្ងឺសរុបចំនួន១លាន២៩ម៉ឺន៨ពាន់៥៦៨នាក់ស្លាប់ និង ជាសះស្បើយឡើងវិញសរុបចំនួន៣៧លាន២០ម៉ឺន២ពាន់៤៣៣នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៣ ខែវិច្ឆិកា ឆ្នាំ២០២០ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន១០លាន៨៧ម៉ឺន១ពាន់១៦៥នាក់ ស្លាប់ចំនួន២៤ម៉ឺន៨ពាន់៥៦០នាក់ និងជាសះស្បើយចំនួន៦លាន៧២ម៉ឺន៧ពាន់១៧១នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៨លាន៧២ម៉ឺន៧ពាន់៩០០នាក់ ស្លាប់ចំនួន១២ម៉ឺន៨ពាន់៦៨៦នាក់ និងជាសះស្បើយ៨លាន១១ម៉ឺន៣ពាន់៣៤៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ៥លាន៧៨ម៉ឺន៣ពាន់៦៤៧នាក់ ស្លាប់១៦ម៉ឺន៤ពាន់៣៣២នាក់ និងជាសះស្បើយ៥លាន២៥ម៉ឺន៦ពាន់៧៦៧នាក់ ៕
-
ព្យុះទីហ្វុង Vamco បង្កអោយមានទឹកជំនន់ធ្ងន់ធ្ងរក្នុងរដ្ឋធានីម៉ានីល ខណៈចំនួនអ្នកស្លាប់កើនដល់១១នាក់ និង០៩នាក់ទៀតបាត់ខ្លួន
ហ្វីលីពីន៖ សារព័ត៌មាន AFP ចេញផ្សាយនៅថ្ងៃសុក្រនេះថា ព្យុះទីហ្វុង Vamco ដែលបានបោកបក់មកលើប្រទេសហ្វីលីពីន បានបង្កឲ្យមានគ្រោះទឹកជំនន់នៅរដ្ឋធានីម៉ានីល និងតំបន់តមួយចំនួនទៀតនៅលើកោះលូហ្សូន ជាហេតុធ្វើឲ្យមនុស្សជាច្រើនជាប់គាំងនៅលើដំបូលផ្ទះ ព្រមទាំងមនុស្សស្លាប់កើនដល់១១នាក់ និង០៩នាក់ទៀតបាត់ខ្លួន ។ ប្រភពបានឱ្យដឹងថា ព្យុះទីហ្វុន Vamco ក៏បានការផ្តាច់ចរន្តអគ្គិសនីទ្រង់ទ្រាយធំ នៅផ្នែកជាច្រើននៃទីក្រុងម៉ានីល និងខេត្តជាច្រើនទៀតផងដែរ ។ បើតាមទីភ្នាក់ងារឧតុនិយមហ្វីលីពីន កម្លាំងខ្យល់បក់នៃព្យុះនេះមានចន្លោះពី១៣០ទៅ២០០គីឡូម៉ែត្រក្នុងមួយម៉ោង ហើយវាកំពុងរំកិលឆ្ពោះទៅកាន់សមុទ្រចិនខាងត្បូង ។ សូមជម្រាបថា Vamco គឺជាព្យុះទីហ្វុនទី៣ហើយ ដែលបានបោកបក់មកលើប្រទេសហ្វីលីពីន ចាប់តាំងពីយប់ថ្ងៃពុធសប្តាហ៍នេះ និងនាំមកនូវខ្យល់បោកបក់យ៉ាងសន្ធប់ លាយឡំនិងភ្លៀងធ្លាក់ខ្លាំង ដែលបង្កឱ្យមានការរអិលបាក់ដី និងទឹកជំនន់ភ្លាមៗនៅតាមតំបន់ដែលធ្លាប់រងការវាយប្រហារ ដោយព្យុះទីហ្វុង ហ្គោនី កាលពីដើមខែតុលាកន្លងទៅ ៕
-
រយៈពេល១០ខែឆ្នាំ២០២០នេះ ការលក់រថយន្តរបស់វៀតណាមធ្លាក់ចុះ១៨ភាគរយ បើធៀបនឹងឆ្នាំមុន
វៀតណាម៖ សមាគមអ្នកផលិតរថយន្តវៀតណាមបានបញ្ជាក់ថា ក្នុងរយៈពេល១០ខែឆ្នាំ២០២០នេះ ការលក់រថយន្តសរុបរបស់វៀតណាមមានចំនួន២១ម៉ឺន២ពាន់៤០៩គ្រឿង ខណៈតួលេខនេះមានការធ្លាក់ចុះ១៨ភាគរយ បើធៀបនឹងរយៈពេលដូចគ្នាកាលពីឆ្នាំ២០១៩ នេះបើតាមសារព័ត៌មានស៊ិនហួនយប់ថ្ងៃទី១២ ខែវិច្ឆិកា ឆ្នាំ២០២០ ។ ជាមួយគ្នានេះ ក្រសួងពាណិជ្ជកម្ម និងឧស្សាហកម្មវៀតណាមបានបញ្ជាក់ថា ក្នុងរយៈពេល១០ខែឆ្នាំនេះ វៀតណាមក៏បានចំណាយថវិកាជាង៤.៨ពាន់លានដុល្លារ លើការនាំចូលរថយន្ត និងគ្រឿងសម្រាប់បង្គំផងដែរ ដែលតួលេខនេះមានការធ្លាក់ចុះ២១.៥ភាគរយ បើធៀបនឹងរយៈពេលដូចគ្នាកាលពីឆ្នាំមុន ។ សូមបញ្ជាក់ថា ការលក់រថយន្តដឹកអ្នកដំណើរបានធ្លាក់ចុះ១៨ភាគរយ ដែលមានចំនួន១៥ម៉ឺន៥ពាន់៦៦៣គ្រឿង បើធៀបនឹងរយៈពេលដូចគ្នាកាលពីឆ្នាំមុន រថយន្តពាណិជ្ជកម្ម ដូចជារថយន្តដឹកទំនិញ និងរថយន្តក្រុងបានធ្លាក់ចុះ១៧ភាគរយ មានចំនួន៥ម៉ឺន៣ពាន់៧១១គ្រឿង និងរថយន្តប្រើប្រាស់ក្នុងគោលបំណងពិសេសបានធ្លាក់ចុះ៣២ភាគរយ មានចំនួន៣ពាន់៣៥គ្រឿង ៕
-
ថៃរឹបអូសថ្នាំញៀនកេតាមីន តម្លៃជិត១ពាន់លានដុល្លារអាមេរិក
-
កូវីដ១៩៖ ពលរដ្ឋរវល់ជក់បារីច្រើនពេក ភ្លេចពាក់ម៉ាស់ តួកគីសម្រេចហាមមិនឲ្យជក់
-
ព្រោះកូវីដ១៩ ត្រឹម៦ខែ ក្រុមហ៊ុនអាកាសចរយក្ស Emirates ខាត៣.៤ពាន់លានដុល្លារ
