អៀរឡង់៖ ក្រុមហ៊ុនបណ្តាញសង្គមដ៏របស់អាមេរិក គឺ Facebook និង Instagram ត្រូវបានគណៈកម្មការការពារទិន្នន័យអៀរឡង់ (DPC) បើកការស៊ើបអង្កេតចំនួនពីរករណី ក្រោយមានសេចក្ដីរាយការណ៍រិះគន់ផ្ទាល់ពីសំណាក់អ្នកប្រើប្រាស់ និងការបែកធ្លាយទិន្នន័យអ្នកប្រើប្រាស់ជាកុមារ នេះបើតាមសារព័ត៌មានរ៉យទ័រនៅថ្ងៃទី១៩ ខែតុលា ឆ្នាំ២០២០ ។ និយតករសហភាពអឺរ៉ុប និងគណៈកម្ម DPC បានចេញច្បាប់ថ្មី ទាក់ទិននឹងទិន្ន ន័យឯកជនភាពរបស់អ្នកប្រើប្រាស់លើបណ្ដាញអ៊ីនធើណែត ទើបពេលនេះគណៈកម្ម DPC បានចេញសេចក្ដីប្រកាសកោះហៅក្រុមហ៊ុន Facebook ឱ្យចូលខ្លួនមកបំភ្លឺចំនួនពីរករណី ។ ក្នុងនោះករណីទី១ ពាក់ព័ន្ធនឹងការបែកធ្លាយព័ត៌មានផ្ទាល់ខ្លួនរបស់អ្នកប្រើប្រាស់ប្រមាណ១៨នាក់ និងករណីសំខាន់មួយទៀតគឺការការងារទិន្នន័យរបស់កុមារ ។ ច្បាប់ថ្មីរបស់សហភាពអឺរ៉ុបខាងលើនេះ បង្កើតដើម្បីរក្សាសុវត្ថិភាពទិន្នន័យរបស់អ្នកប្រើប្រាស់នៅលើបណ្ដាញសង្គមអ៊ីនធើណែត ក៏ដូចជាកាត់បន្ថយឥទ្ធិពលរបស់ក្រុមហ៊ុនបច្ចេកវិទ្យាធំៗ ដែលកំពុងកើនឡើងខ្លាំងនូវចំនួនអ្នកប្រើប្រាស់ ហើយពួកគេក៏កំពុងតែប្រើប្រាស់អតិថិជន ឬអ្នកប្រើប្រាស់ ដើម្បីទាញយកផលប្រយោជន៍ដោយមិនបានជូនដំណឹងជាមុន ៕

ថៃ៖ ក្រុមអ្នកតវ៉ាប្រឆាំងរដ្ឋាភិបាលថៃរាប់ពាន់នាក់បានកាន់កាប់ផ្លូវបំបែកសំខាន់ៗនៅទីក្រុងបាងកក ដើម្បីធ្វើការតវ៉ាកាលពីថ្ងៃអាទិត្យម្សិលមិញនេះ ដោយផ្គើននឹងការហាមឃាត់ការធ្វើតវ៉ាដែលចូលដល់ថ្ងៃទី០៥ នេះបើតាមសារព័ត៌មានរ៉យទ័រនៅថ្ងៃទី១៨ ខែតុលា ឆ្នាំ២០២០ ។ ការធ្វើបាតុកម្មនៅតែបន្ត ទោះបីជាមានការចាប់ខ្លួនអ្នកតវ៉ារាប់សិបនាក់ និងមេដឹកនាំរបស់ពួកគេ ការប្រើប្រាស់ការបាញ់ទឹក និងការបិទប្រព័ន្ធផ្លូវរថភ្លើងជាច្រើននៅទីក្រុងបាងកក ដើម្បីបង្ក្រាបសកម្មភាពតវ៉ានៅតាមដងផ្លូវអស់រយៈពេល៣ខែមកក៏ដោយ ។ ចលនាតវ៉ាប្រឆាំងដែលដឹកនាំដោយយុវជននេះ បានទទួលរងការវាយបង្ក្រាបខ្លាំងកាលពីសប្តាហ៍មុន ដោយមនុស្សជាច្រើននាក់ត្រូវបានចាប់ខ្លួន បន្ទាប់ពីក្រុមបាតុករបានឡោមព័ទ្ធក្បួនដង្ហែស្តេច និង បានសម្តែងកាយវិការគោរពលទ្ធិប្រជាធិបតេយ្យ ដោយលើកម្រាមដៃ៣ចំពោះព្រះមហាក្សត្រិយានីស៊ូធិតា ។ ទន្ទឹមគ្នា ក្រុមអ្នកច្បាប់ថៃសម្រាប់សិទ្ធិមនុស្សបាននិយាយថា ក្រុមអ្នកតវ៉ាយ៉ាងតិចណាស់៨០នាក់ត្រូវបានចាប់ខ្លួនចាប់តាំងពីថ្ងៃទី១៣ខែតុលាកន្លងមក ដោយអ្នកតវ៉ា២៧នាក់កំពុងត្រូវបានឃុំខ្លួននៅឡើយ ៕

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ នៅថ្ងៃចន្ទនេះ បានគូសបញ្ជាក់ថា រដ្ឋាភិបាលអាម៉េរិកគួរតែទទួលបានចំណែកដ៏សំខាន់មួយ នៃតម្លៃលក់នៃប្រតិបត្តិការរបស់កម្មវិធីវីដេអូខ្លី TikTok នៅសហរដ្ឋអាម៉េរិក នេះបើតាមសារព័ត៌មានរ៉យទ័រនៅថ្ងៃទី០៤ ខែសីហា ឆ្នាំ២០២០ ។ អំឡុងសន្និសិទសារព័ត៌មានមួយនៅឯសេតវិមាននាថ្ងៃចន្ទសប្ដាហ៍នេះ លោក ដូណាល់ ត្រាំ បានអះអាងជាថ្មីថា កម្មវិធី TikTok របស់ក្រុមហ៊ុនចិន ByteDance នឹងត្រូវបិទដំណើរការនៅសហរដ្ឋអាម៉េរិក បើសិនជាក្រុមហ៊ុន Microsoft ឬក្រុមហ៊ុនអាម៉េរិកដទៃទៀតមិនអាចទិញយកបណ្ដាញទំនាក់ទំនងសង្គមដ៏មានប្រជាប្រិយភាពមួយនេះបាន នៅត្រឹមថ្ងៃទី១៥ ខែកញ្ញាខាងមុខ ។ សូមជម្រាបថា ដំបូងឡើយលោក ត្រាំ បានប្រកាសថា នឹងចេញបទបញ្ជាប្រតិបត្តិមួយ ដើម្បីបិទកម្មវិធី TikTok ដោយសារបារម្ភពីបញ្ហាសន្តិសុខជាតិ ប៉ុន្តែបន្ទាប់ពី ជួបពិភាក្សាជាមួយនាយកប្រតិបត្តិក្រុមហ៊ុន Microsoft លោក សត្យា ណាឌែលឡា រួចមក ប្រធានាធិបតីអាម៉េរិករូបនេះ បានកែប្រែចិត្តដោយទុកពេល៤៥ថ្ងៃឱ្យក្រុមហ៊ុនចិន ByteDance ពិចារណាលក់ TikTok ឱ្យក្រុមហ៊ុន Microsoft ៕ …

អូស្រ្តាលី៖ វិចតូរៀ ដែលជារដ្ឋមានប្រជាជនច្រើនបំផុតទី២របស់ប្រទេសអូស្ត្រាលីនឹងដាក់ពង្រាយកម្លាំងយោធាជាច្រើន ក្នុងគោលបំណងបង្ខំឲ្យអនុវត្តបទបញ្ជាចត្តាឡីស័ក ក្នុងយុទ្ធនាការប្រយុទ្ធប្រឆាំងនឹង COVID-19 នេះបើតាមសារព័ត៌មានរ៉យទ័រនៅថ្ងៃទី០៤ ខែសីហា ឆ្នាំ២០២០ ។ អភិបាលរដ្ឋវិចតូរៀ លោក ដានីញែល អាន់ឌ្រូ នៅថ្ងៃអង្គារនេះបញ្ជាក់ថា កម្លាំងយោធាប្រមាណ៥០០នាក់នឹងត្រូវដាក់ពង្រាយនៅក្នុងរដ្ឋរបស់លោក នាសប្តាហ៍នេះ ដើម្បីជួយពង្រឹងការអនុវត្តបទបញ្ជាចត្តាឡីស័ក ។ លោកបានសង្កត់ធ្ងន់ថា អាជ្ញាធរនឹងពិន័យប្រាក់៥.០០០ដុល្លារអូស្ត្រាលី ឬស្មើនឹង៤.៨៩៦ដុល្លារអាម៉េរិកចំពោះអ្នករំលោភបទបញ្ជាឲ្យនៅក្នុងផ្ទះ ហើយថា ករណីលើកលែងមានតែការចេញពីផ្ទះទៅឲ្យពេទ្យព្យាបាលគ្រាអាសន្នប៉ុណ្ណោះ ។ រដ្ឋវិចតូរៀ បានដាក់បម្រាមគោចរពេលយប់រួចជាស្រេចហើយនៅសប្តាហ៍នេះ ដោយរឹតបន្តឹងលើចលនាមនុស្សប្រចាំថ្ងៃខ្លាំងឡើង និង បានបញ្ជាឲ្យផ្នែកធំៗនៃសេដ្ឋកិច្ចមូលដ្ឋានបិទ ដើម្បីកាត់បន្ថយល្បឿនរីករាលដាលនៃវីរុសកូរ៉ូណា ។ តែមន្ត្រីអូស្រ្តាលីបានពិនិត្យឃើញថា ជិត១ភាគ៣នៃអ្នកឆ្លង COVID-19 មិនបានដាក់ខ្លួននៅផ្ទះដាច់ដោយឡែកពីគេទេ និង ទាមទារឲ្យមានការដាក់ពិន័យតឹងរ៉ឹងឡើង ៕

ឥណ្ឌា៖ ក្រុមហ៊ុនផលិតឱសថ Wockhardt Ltd របស់ឥណ្ឌា នឹងផ្គត់ផ្គង់ វ៉ាក់សាំង COVID-19 ចម្រុះច្រើនលានដូសដល់អង់គ្លេស ក្នុងនោះរាប់បញ្ចូល ទាំងវ៉ាក់សាំងមួយ ដែលអភិវឌ្ឍន៍ដោយសាកលវិទ្យាល័យ AstraZeneca និង Oxford នេះបើតាមសារព័ត៌មានរ៉យទ័រនៅថ្ងៃទី០៤ ខែសីហា ឆ្នាំ២០២០ ។ បើតាមក្រុមហ៊ុនផលិតឱសថរបស់ឥណ្ឌានេះ ខ្លួនបានបម្រុងទុកនូវសមត្ថភាពបំពេញ និងបញ្ចប់ ដែលជាជំហានចុងក្រោយ នៃការដាក់វ៉ាក់សាំងទៅក្នុងបំពង់ ឬសឺរ៉ាំង និងវេចខ្ចប់វ៉ាក់សាំងទាំងនោះ ដែលជាផ្នែកមួយ នៃកិច្ចព្រមព្រៀងជាមួយរដ្ឋាភិបាលអង់គ្លេស។ ស្របពេលជាមួយគ្នានោះដែរ រដ្ឋាភិបាលអង់គ្លេសក៏បានរក្សាទុកខ្សែសង្វាក់ផលិតកម្ម បំពេញ និងបញ្ចប់ នៅឯសាខាក្រុមហ៊ុនបុត្រសម្ព័ន្ធ Wockhardt ក្នុងទីក្រុងរិចហ៊ែម ប្រទេសវែល ផងដែរ សម្រាប់ការប្រើប្រាស់ផ្តាច់មុខ ក្នុងរយៈពេល១៨ខែទៀត ដើម្បីធានាដល់ការផ្គត់ផ្គង់ ៕

កូរ៉េខាងត្បូង៖ អាជ្ញាធរកូរ៉េខាងត្បូងនៅថ្ងៃអង្គារនេះបានរាយការណ៍ពីមនុស្ស១៣នាក់បានស្លាប់ និង១៣នាក់បាត់ខ្លួន ខណៈមនុស្សច្រើនជាង១ពាន់នាក់ផ្សេងទៀតបង្ខំចិត្តភៀសខ្លួនចេញពីលំនៅដ្ឋានរបស់ពួកគេ បន្ទាប់ពីភ្លៀងធ្លាក់យ៉ាងសន្ធាប់ជាច្រើនថ្ងៃមកនេះ បានបង្កជាគ្រោះទឹកជំនន់ដ៏ធំសម្បើម នេះបើតាមសារព័ត៌មាន CNA នៅថ្ងៃទី០៤ ខែសីហា ឆ្នាំ២០២០ ។ ឆ្លើយតបនឹងគ្រោះមហន្តរាយធម្មជាតិខាងលើនេះ ប្រធានាធិបតីកូរ៉េខាងត្បូងលោក មូន ចែអ៊ីន បើកកិច្ចប្រជុំបន្ទាន់មួយនៅថ្ងៃអង្គារនេះ ក្រោយលោកបានជំរុញឱ្យអាជ្ញាធរថ្នាក់ជាតិ និង តំបន់បង្កើនកិច្ចខិតខំប្រឹងប្រែងការពារកុំឱ្យមានមនុស្សស្លាប់ ដោយសារតែគ្រោះទឹកជំនន់បន្ថែមទៀត ។ ប្រភពបានឱ្យដឹងទៀតថា ករណីស្លាប់ទាំងអស់ខាងលើនេះ ត្រូវបានគេរាយការណ៍ថា ពួកគេបាត់បង់ជីវិតដោយសារគ្រោះរអិលបាក់ដី និង ត្រូវទឹកគួចយកទៅឆ្ងាយ កំឡុងពេលជិះនៅក្នុងរថយន្ដ ។ បើតាមអាជ្ញាធរកូរ៉េខាងត្បូង ទឹកជំនន់បានជន់លិចផ្ទៃដីស្រែចំការច្រើនជាង៥ពាន់៧៥១ហិកតា រួមទាំងផ្លូវហាយវ៉េយ៍ និងស្ពានសំខាន់ៗមួយចំនួយក្នុងរដ្ឋធានីសេអ៊ូលផងដែរ ៕