កូរ៉េខាងត្បូង៖ ប្រធានាធិបតីកូរ៉េខាងត្បូងលោក មូន ចេអ៊ីន នៅថ្ងៃចន្ទនេះ បានអំពាវនាវឱ្យកូរ៉េខាងជើងងាកមករកដំណោះស្រាយរួមគ្នាមួយ តាមរយៈការសន្ទនាគ្នា ជាជាងការប្រើប្រាស់ធម៌ក្តៅ នេះបើតាមសារព័ត៌មាន CGTN នៅយប់ថ្ងៃទី១៥ ខែមិថុនា ឆ្នាំ២០២០ ។ ការអំពាវនាវខាងលើនេះរបស់លោក មូន ចេអ៊ីន ធ្វើឡើងក្រោយប្អូនស្រីបង្កើតរបស់មេដឹកនាំកូរ៉េខាងជើង និងជាអនុប្រធានទី១ នៃគណៈកម្មាធិការកណ្តាល នៃគណបក្សពលករកូរ៉េខាងជើង លោកស្រី គីម យ៉ូចុង បានព្រមានថា ខ្លួនអាចនឹងសងសឹងកូរ៉េខាងត្បូងដោយប្រើធម៌ក្តៅ បើសិនទីក្រុងសេអ៊ូលនៅតែមិនអាចស្វែងរកដំណោះស្រាយ ជុំវិញការបង្ហោះខិត្តប័ណ្ណរិះគន់មេដឹងនាំកំពូល នៃទីក្រុងព្យុងយ៉ាងទេនោះ ។ ពាក់ព័ន្ធនឹងបញ្ហាខាងលើ ប្រធានាធិបតីកូរ៉េខាងត្បូងរូបនេះបានសង្កត់ធ្ងន់ថា  ដល់ពេលហើយដែលកូរ៉េខាងជើង និងកូរ៉េខាងត្បូង ងាកមកស្វែងរកដំណោះស្រាយរួមគ្នាមួយ វាដល់ពេលហើយ ព្រោះយើងមិនអាចអង្គុយរង់ចាំឲ្យស្ថានការណ៍ឲ្យល្អប្រសើរឡើងខ្លួនឯងនោះឡើយ ដោយលោករំពឹងថា កូរ៉េខាងជើងនឹងបើកទ្វារសន្ទនាឲ្យបានកាន់តែធំ សម្រាប់ភាគីទាំងពីរផងដែរ ៕

កូរ៉េខាងជើង៖ ប្អូនស្រីរបស់មេដឹកនាំកូរ៉េខាងជើងលោក គីម ជុងអ៊ុន គឺលោកស្រី គីម យ៉ូ ចុង បានគំរាមចាត់វិធានការយោធាប្រឆាំងនឹងរដ្ឋាភិបាលក្រុងសេអ៊ូល ហើយថែមទាំងហៅកូរ៉េខាងត្បូងថា ជា “សត្រូវ” នេះបើតាមសារព័ត៌មាន CGTN នៅថ្ងៃទី១៥ ខែមិថុនា ឆ្នាំ២០២០ ។ ការព្រមានបែបនេះរបស់លោកស្រី គីម យ៉ូ ចុង បានកើតមានឡើងស្របពេលដែលលោកស្រីបានរិះគន់រដ្ឋាភិបាលក្រុងសេអ៊ូល ចំពោះការធ្លាក់ចុះទំនាក់ទំនងទ្វេភាគី និងការអសមត្ថភាពរបស់អាជ្ញាធរកូរ៉េខាងត្បូង ក្នុងការរារាំងកុំឱ្យពួកសកម្មជនបង្ហោះខិត្តប័ណ្ណកាត់ព្រំដែន ដើម្បីនាំសារប្រឆាំងនឹងកូរ៉េខាងជើង ។ បន្ថែមលើនេះ លោកស្រី គីម យ៉ូ ចុង បានធ្វើការគំរាមជាថ្មីដោយថា រដ្ឋាភិបាលក្រុងសេអ៊ូលនឹងបានឃើញក្នុងពេលឆាប់ៗ នូវការដួលរលំការិយាល័យទំនាក់ទំនងកូរ៉េដែលគ្មានតម្លៃនៅតំបន់សួនឧស្សាហកម្មកេសុង ជាប់ព្រំដែន ។ សូមជម្រាបផងដែរថា ការិយាល័យទំនាក់ទំនងនៅតំបន់សួនឧស្សាហកម្មកេសុង ត្រូវបានបង្កើតឡើងជាលទ្ធផលនៃកិច្ចព្រមព្រៀងសំខាន់មួយ រវាងប្រមុខដឹកនាំកំពូលកូរ៉េខាងជើងលោក គីម ជុងអ៊ុន និងប្រធានាធិបតីកូរ៉េខាងត្បូងលោក មូន ជែអ៊ីន កាលពីឆ្នាំ២០១៨ ៕

ជប៉ុន៖ ក្រុមហ៊ុនបច្ចេកវិទ្យា អ៊ីធើស្ទេឡា តិចណូឡូជី បានបាញ់រ៉ុក្កែតមានឈ្មោះ Momo-5 របស់ខ្លួនចេញពីទីតាំងមួយនៅព្រឹកថ្ងៃអាទិត្យម្សិលមិញ ប៉ុន្ដែម៉ាស៊ីនរបស់រ៉ុក្កែតបានឈប់មួយរំពេច ក្រោយហោះបានមួយនាទី ហើយក៏បានធ្លាក់ចូលក្នុងទឹកសមុទ្រ នេះបើតាមសារព័ត៌មាន CGTN នៅថ្ងៃទី១៥ ខែមិថុនា ឆ្នាំ២០២០ ។ បើតាមក្រុមហ៊ុនដែលមានមូលដ្ឋាននៅភាគខាងជើងកោះ ហុកកៃដូ ខាងលើនេះ គ្រាប់រ៉ុក្កែតបានបាញ់ និង ហោះបានកម្ពស់ប្រហែល១១គីឡូ ម៉ែត្រ មុនពេលផ្អៀងធ្លាក់ចូលសមុទ្រ ព្រោះផ្នែកខ្លះនៃម៉ាស៊ីនត្រូវបានខូចខាត ហើយតួមិនអាចរក្សាទិសដៅបាន ។ គ្រាប់រ៉ុក្កែត Momo-5 ដែលមានប្រវែងប្រហែល១០ម៉ែត្រមានអង្កត់ផ្ចិត ៥០ សង់ទី ម៉ែត្រ និងមានទំងន់១តោនខាងលើនេះ ត្រូវបានគេរំពឹងថា នឹងក្លាយជាឧបករណ៍សាកល្បងចាប់សញ្ញានាវាចរណ៍ តាមប្រព័ន្ធផ្កាយរណប ដែលក្រុមហ៊ុនកំពុងអភិវឌ្ឍន៍ ។ សូមរំលឹថា ដំបូងឡើយ គ្រាប់រ៉ុក្កែត Momo-5 គ្រោងបាញ់បង្ហោះទៅកាន់ទីអវកាស ចាប់តាំងពីខែមករាមកម្ល៉េះ ប៉ុន្ដែត្រូវបានពន្យារពេលដោយសារតែមានបញ្ហាជាមួយឧបករណ៍ទំនាក់ទំនង ៕

ម៉ារ៉ុក៖ ព្រះមហាក្សត្រម៉ារ៉ុកព្រះចៅ មហាម៉េដ ទី៦ បានទទួលការវះកាត់បេះដូង ប្រកបដោយជោគជ័យហើយ នៅក្នុងមន្ទីរពេទ្យនៃរាជធានីរ៉ាបាត របស់ប្រទេសអាហ្វ្រិកខាងជើងមួយនេះ។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នាព្រឹកថ្ងៃចន្ទ ទី១៥ ខែមិថុនា ឆ្នាំ២០២០។ ងាកទៅកាន់បញ្ហាជំងឺរាតត្បាតសកល COVID-19 ដែលកំពុងរាតត្បាតពិភពលោកវិញ ប្រទេសម៉ារ៉ុកមានករណីឆ្លងសរុប ៨,៧៩៣ករណី ក្នុងនោះស្លាប់ ២១២នាក់ និងជាសះស្បើយឡើងវិញ ៧,៧៦៥នាក់ នៅក្នុងចំណោមប្រជាជនសរុបជិត ៣៧លាននាក់។ ព្រះចៅ មហាម៉េដ ទី៦ បានកើតមានព្រះរោគបេះដូងលោតមិនប្រក្រតី ឬសម្ពាធឈាមឡើងខ្ពស់ ដែលនាំឲ្យក្រុមគ្រូពេទ្យទូលថ្វាយសារណែនាំ ឲ្យទ្រង់ទទួលការព្យាបាលតាមរយៈការវះកាត់។ ការវះកាត់បានធ្វើឡើងជាលើកដំបូងកាលពីខែកុម្ភៈ ឆ្នាំ២០១៨ នៅទីក្រុងប៉ារីស ប្រទេសបារាំង ដែលបានធ្វើឲ្យចង្វាក់បេះដូងព្រះអង្គដំណើរការជាធម្មតាវិញ ហើយសម្រាប់ការវះកាត់លើកទី ២ ត្រូវបានធ្វើឡើងនៅក្នុងរដ្ឋធានីរបស់ម៉ារ៉ុកផ្ទាល់ ដោយទទួលបានជោគជ័យបន្ថែមទៀត។ គួរបញ្ជាក់ថា ព្រះចៅ មហាម៉េដ ទី៦ មានព្រះជន្មាយុ ៥៦ព្រះវស្សា បានឡើងគ្រងរាជ្យសម្បត្តិនៅប្រទេសម៉ារ៉ុក កាលពីខែកក្កដា ឆ្នាំ១៩៩៩ ក្រោយព្រះបិតារបស់ទ្រង់ គឺព្រះចៅ ហាស្សាន ទី២ បានសោយទិវង្គត៕…

សហរដ្ឋអាម៉េរិក៖ នៅក្នុងបទសម្ភាសន៍ជាមួយទូរទស្សន៍ Fox News នៅថ្ងៃសៅរ៍ សប្តាហ៍មុន (ម៉ោងក្នុងតំបន់) លោក ដូណាល់ ត្រាំ និយាយថា នឹងចុះចេញពីតំណែងដោយសន្តិវិធី បើសិនជាលោកចាញ់ការបោះឆ្នោតជ្រើសរើសប្រធានា ធិបតីអាម៉េរិកនៅថ្ងៃទី០៣ ខែវិច្ឆិកា ឆ្នាំ២០២០ខាងមុខនេះ ។ ហើយស្របពេលជាមួយគ្នានោះដែរ ប្រធានាធិបតីអាម៉េរិករូបនេះ ថែមទាំងបានអះអាងដែរថា វានឹងក្លាយជារឿងមិនល្អសម្រាប់សហរដ្ឋអាម៉េរិកទាំងមូល បើលោកពិតជាមិនអាចជាប់ឆ្នោតមួយអាណត្តិទៀតមែននោះ ។ ការកត់សម្គាល់បែបនេះរបស់លោក ដូណាល់ ត្រាំ ធ្វើឡើងក្រោយបេក្ខជនប្រធានាធិបតីអាម៉េរិកមកពីខាងគណបក្សប្រជាធិបតេយ្យ លោក ចូ បៃដិន និយាយថា យោធាអាម៉េរិកនឹងអូសលោក ត្រាំ ចេញពីសេតវិមាន ក្នុងករណីដែលលោកចាញ់ការបោះឆ្នោត ហើយនៅតែក្រាញននាលមិនព្រមចុះចេញពីតំណែង ៕

សហរដ្ឋអាម៉េរិក៖ បុរសស្បែកខ្មៅម្នាក់ទៀតត្រូវបានប៉ូលិសបាញ់សម្លាប់ ដែលប្រការនេះ បង្កឱ្យបាតុកម្មតវ៉ាទ្រង់ទ្រាយធំថ្មីមួយទៀត ហើយជាលទ្ធផលនោះ មានមនុស្ស៣៦នាក់ ត្រូវចាប់ខ្លួននៅក្នុងទីក្រុង Atlanta រដ្ឋ Georgia សហរដ្ឋអាម៉េរិក នេះបើតាមសារព័ត៌មាន CGTN នៅថ្ងៃទី១៥ ខែមិថុនា ឆ្នាំ២០២០ ។ ប្រភពបានឱ្យដឹងថា បុរសស្បែកខ្មៅឈ្មោះ Rayshard Brooks អាយុ២៧ឆ្នាំ បានដេកលង់លក់នៅក្នុងរថយន្ដរបស់ខ្លួន នៅក្បែរភោជនីយដ្ឋាន Wendy’s ក្នុងទីក្រុង Atlanta ។ ហើយនៅពេលប៉ូលិសមកដល់ រូបគេបានបដិសេធមិនឱ្យពិនិត្យជាតិស្រវឹង ហើយបានតដៃជាមួយប៉ូលិស ដែលជាហេតុធ្វើឱ្យប៉ូលិសម្នាក់បាញ់ សម្លាប់រូបគេ ។ ក្រោយហេតុការណ៍នេះកើតឡើង បាតុកម្មតវ៉ាក៏បានផ្ទុះឡើងផងដែរ ហើយប៉ុន្មានម៉ោងក្រោយការតវ៉ា ស្នងការប៉ូលិសទីក្រុង Atlanta លោកស្រី Erika Shields បានសម្រេចចិត្តលាលែងចេញពីតំណែង រីឯប៉ូលិសម្នាក់ដែលមានជាប់ពាក់ព័ន្ធបាញ់សម្លាប់ Rayshard Brooks ត្រូវបានបណ្ដេញចេញពីតំណែង ខណៈម្នាក់ទៀតជាប់ពិន័យរដ្ឋបាល ៕

ទុយនីស៊ី៖ ទីបំផុតទុយនីស៊ីបានយកឈ្នះលើជំងឺ COVID-19 ហើយ ខណៈនាយករដ្ឋមន្ត្រីប្រទេសនេះ គឺលោក អេលីយេ ហ្វាកហ្វាក បានអរគុណចំពោះប្រជាជាតិទាំងមូល ដែលរួបរួមគ្នាជាធ្លុងមួយ ទើបអាចសម្រេចបានជ័យជម្នះ នេះបើតាមសារព័ត៌មាន CNA នៅថ្ងៃទី១៥ ខែមិថុនា ឆ្នាំ២០២០ ។ ស្របពេលជាមួយគ្នានេះដែរ ទុយនីស៊ីក៏ត្រៀមបើកផ្លូវអាកាស និងព្រំដែនគោកឡើងវិញនៅថ្ងៃទី២៧ ខែមិថុនាខាងមុខនេះផងដែរ ខណៈភ្ញៀវទេសចរ និងអ្នកដំណើរមកកាន់ប្រទេសអាហ្វ្រិកខាងជើងមួយនេះទាំងអស់ ត្រូវតែគោរពតាមគោលការណ៍រក្សាសុវត្ថិភាព ។ សូមជម្រាបថា ទុយនីស៊ីស្ថិតនៅលំដាប់ទី១២២ ក្នុងចំណោមប្រទេសដែលមានករណីឆ្លងមេរោគ COVID-19 ច្រើនបំផុតលើពិភពលោក គិតចាប់តាំងពីការរកឃើញករណីឆ្លងដំបូងកាលពីថ្ងៃទី០២ ខែមីនាកន្លងមកនេះ ហើយគិតត្រឹមថ្ងៃ១៥ ខែមិថុនា ឆ្នាំ២០២០ ទុយនីស៊ីមានករណីឆ្លងជំងឺនេះសរុប១.០៩៦ករណី ក្នុងនោះអ្នកជំងឺ៤៩នាក់ស្លាប់ និង៩៩៨នាក់ទៀតជាសះស្បើយឡើងវិញ ៕

ហូឡង់៖ តុលាការព្រហ្មទណ្ឌអន្តរជាតិ ICC បានប្រកាសថ្កោលទោស បន្ទាប់ពីសហរដ្ឋអាម៉េរិកបានអនុញ្ញាតឱ្យដាក់ទណ្ឌកម្មប្រឆាំងនឹងបុគ្គលិករបស់ខ្លួន ដែលជាប់ពាក់ព័ន្ធនឹងដំណើរការស៊ើបអង្កេតរបស់ ICC ជុំវិញការសង្ស័យថា កងទ័ពអាម៉េរិកបានប្រព្រឹត្តឧក្រិដ្ឋកម្មសង្រ្គាមនៅអាហ្វហ្គានីស្ថាន នេះបើតាមសារព័ត៌មានស៊ីនហួរនៅថ្ងៃទី១៣ ខែមិថុនា ឆ្នាំ២០២០ ។ តុលាការព្រហ្មទណ្ឌអន្តរជាតិ ICC បានបញ្ជាក់នៅក្នុងសេចក្តីថ្លែងការណ៍មួយនៅថ្ងៃព្រហស្បត្តិ៍នេះ (ម៉ោងក្នុងតំបន់)ថា ការវាយប្រហាររបស់សហរដ្ឋអាម៉េរិក គឺជារឿងដែលមិនអាចទទួលយក ហើយក៏ជាការជ្រៀតជ្រែកទៅលើនីតិរដ្ឋ និងនីតិវិធីតុលាការ ។ ប្រតិកម្មរបស់តុលាការព្រហ្មទណ្ឌអន្តរជាតិ ICC ខាងលើនេះ ធ្វើឡើងបន្ទាប់ពីប្រធានាធិបតីអាម៉េរិកលោក ដូណាល់ ត្រាំ បានអនុញ្ញាតឲ្យមានការដាក់ទណ្ឌកម្មប្រឆាំងបុគ្គល ដែលជាប់ទាក់ទិននឹងដំណើរការស៊ើបអង្កេតរបស់តុលាការព្រហ្មទណ្ឌអន្តរជាតិ ICC ជុំវិញការសង្ស័យថា កងទ័ពអាមេរិកបានប្រព្រឹត្តឧក្រិដ្ឋកម្មសង្រ្គាមនៅអាហ្វហ្គានីស្ថាន ។ ហើយតាមរយៈបទបញ្ជារបស់លោក ត្រាំ ខាងលើនេះ រដ្ឋមន្រ្តីការបរទេសអាម៉េរិក លោក ម៉ៃ ប៉ុមប៉េអូ នឹងពិភាក្សាជាមួយរដ្ឋមន្រ្តីរតនាគារជាតិ លោក ស្ទេវិន ម៉ានូឈីន ដើម្បីចាត់វិធានការរាំងបង្កកទ្រព្យសម្បត្តិរបស់បុគ្គលិកតុលាការ ICC ដែលពាក់ព័ន្ធក្នុងដំណើរការស៊ើបអង្កេតនោះ នៅទឹកដីរបស់សហរដ្ឋអាម៉េរិក ក៏ដូចជាដាក់បម្រាមធ្វើដំណើរលើបុគ្គលទាំងនោះផងដែរ ៕ …

កូរ៉េខាងជើង៖ កូរ៉េខាងជើង នៅថ្ងៃសុក្រនេះ បានគំរាមចាត់វិធានការដែលពោលពេញដោយការឈឺចាប់ និង វិប្បសារីប្រឆាំងជាមួយកូរ៉េខាងត្បូង ដោយសារតែមិនអាចបញ្ឈប់សកម្មភាពក្រុមបង្ហោះសាររិះគន់របបដឹកនាំក្រុងព្យុងយ៉ាង នៅតាមតំបន់ព្រំដែនរវាងប្រទេសទាំងពីរបាន នេះបើតាមសារព័ត៌មានស៊ីនហួរនៅ ថ្ងៃទី១៣ ខែមិថុនា ឆ្នាំ២០២០ ។ ការព្រមានរបស់ទីក្រុងព្យុងយ៉ាងខាងលើនេះ ធ្វើឡើងស្របកូរ៉េខាងជើងបានចាត់ទុកថា ការបណ្តែតបណ្តោយឲ្យរឿងបែបនេះកើតឡើង គឺជាការបំផ្លាញចោលនូវអ្វីៗដែលប្រធានាធិបតីកូរ៉េខាងត្បូងលោក មូន ចេអ៊ីន និងប្រមុខដឹកនាំកំពូលកូរ៉េខាងជើងលោក គីម ជុងអ៊ុន បានសាងរួមគ្នាកន្លងមក ។ នាពេលថ្មីៗនេះ កូរ៉េខាងជើងក៏បានប្រកាសដែរថា ខ្លួននឹងកាត់ផ្តាច់រាល់ខ្សែបណ្តាញធ្វើទំនាក់ទំនងអន្តរកូរ៉េនៅតាមព្រំដែន ដើម្បីឆ្លើយតបចំពោះកូរ៉េខាងត្បូង ដែលមិនព្រមបញ្ឈប់សកម្មភាពក្រុមបង្ហោះសារប្រឆាំងក្រុងព្យុងយ៉ាង នៅតាមព្រំដែនកាលពីថ្ងៃអង្គារសប្តាហ៍នេះ ។ ភ្លាមៗបន្ទាប់ពីការប្រកាសរបស់កូរ៉េខាងជើង រដ្ឋាភិបាលកូរ៉េខាងត្បូងបានប្រកាសចាត់វិធានការ ដើម្បីទប់ស្កាត់សកម្មភាពបង្កវិវាទនេះ ប៉ុន្តែត្រូវបានគេមើលឃើញថា មិនទាន់មានប្រសិទ្ធភាពឡើយ ៕

សហរដ្ឋអាម៉េរិក៖ ក្នុងពិធីនៅឯវិហារគ្រឹស្ដមួយនៅទីក្រុងដាលឡាស់ នាថ្ងៃព្រហ ស្បត្តិ៍នេះ ប្រធានាធិបតីអាម៉េរិកលោក ដូណាល់ ត្រាំ បានប្រកាសពីគំរោងចុះហត្ថលេខាលើបទបញ្ជាប្រតិបត្តិមួយស្ដីពីស្ថាប័នប៉ូលិស នេះបើតាមសារព័ត៌មានរ៉យទ័រនៅថ្ងៃទី១២ ខែមិថុនា ឆ្នាំ២០២០ ។ ប្រធានាធិបតីអាម៉េរិករូបនេះបញ្ជាក់ថា បទបញ្ជាប្រតិបត្តិនេះ នឹងជួយផ្តល់ប្រឹក្សាដល់ស្ថាប័នប៉ូលិស ឲ្យបង្កើតបទដ្ឋានស្ដង់ដារជាតិមួយ ក្នុងការប្រើប្រាស់កម្លាំងបាយ ក៏ដូចជាគាំទ្រដល់ការបណ្ដុះបណ្ដាល ដ៏ល្អប្រសើរសម្រាប់ស្ថាប័នប៉ូលិស និងកម្មវិធីអ្នកធ្វើការងារសង្គម ដើម្បីងាយស្រួលធ្វើការជាមួយមន្ត្រីអនុវត្តន៍ច្បាប់ ។ ប៉ុន្តែស្របពេលជាមួយគ្នានោះដែរ លោក ដូណាល់ ត្រាំ បានប្រកាសច្រានចោលពាក់ព័ន្ធនឹងសំណើ ឬគំនិតចង់រំសាយ ព្រមទាំងការកាត់បន្ថយហិរញវត្ថុដល់ស្ថានប័នប៉ូលិស ហើយបង្វិលថវិកាទាំងនោះទៅឱ្យកម្មវិធីអប់រំ សុខមាលភាពសង្គម លំនៅដ្ឋាន និងតម្រូវការចំាបាច់នានារបស់សហគមន៍ ៕