ថៃ៖ ទីភ្នាក់ងារព័ត៌មាន រ៉យទ័រ បានចុះផ្សាយថា តួលេខសរុបនៃអ្នកឆ្លងមេរោគ COVID-19 នៅទូទាំងប្រទេសថៃ បន្តកើនឡើងដល់១៧៧ករណីហើយ បន្ទាប់ពីទើបរកឃើញករណីឆ្លងថ្មីចំនួន៣០នាក់ទៀត នេះបើតាមលេខាធិការអចិន្ត្រៃយ៍នៃក្រសួងសុខាភិបាលថៃ លោក សុខុម កញ្ចណាភីម៉ៃ នៅថ្ងៃទី១៧ ខែមីនា ឆ្នាំ២០២០ ។ លោក សុខុម កញ្ចណាភីម៉ៃ បានលើកឡើងថា ក្នុងចំណោមករណីឆ្លងថ្មីទាំងអស់ខាងលើនេះ មាន១១ករណីជាប់ទាក់ទងនឹងព្រឹត្តិ ការណ៍ប្រកួតកីឡាប្រដាល់មួយនៅទីក្រុងបាងកក និង១៩ករណីទៀត គឺជាអ្នកដែលបានធ្វើប្រាស្រ័យទាក់ទងជិតស្និទ្ធជាមួយជនបរទេស ។ សូមជម្រាបថា ភាគច្រើននៃករណីឆ្លងនៅក្នុងប្រទេសថៃ គឺ៧០-៨០ភាគរយត្រូវបានរកឃើញនៅក្នុងទីក្រុងបាងកក ហើយមកទល់នឹងពេលនេះ អ្នកជំងឺឆ្លងវីរុស COVID-19 ម្នាក់បានស្លាប់ និង៤១នាក់ទៀតបានជាសះស្បើយ ៕

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រំា បានថ្លែងថា ការប្រកាសដាក់ប្រទេសក្នុងគ្រាមានអាសន្ន អាចនឹងបញ្ចប់រហូតដល់ចប់រដូវក្ដៅ ឬក៏អាចយូរជាងនេះ នេះបើតាមសារព័ត៌មាន BBC នៅថ្ងៃទី១៧ ខែមីនា ឆ្នាំ២០២០។ គិតត្រឹមថ្ងៃទី១៦ ខែមីនានេះ សហរដ្ឋអាម៉េរិកមានអ្នកឆ្លងវីរុស COVID-19 ប្រមាណ៤ពាន់៦រយករណី និងស្លាប់៨៥នាក់ ហើយបើតាមសាកលវិទ្យាល័យ ចនស៍ ហូបឃីនស៍ ករណីឆ្លងនៅទូទាំងពិភពលោក កើនឡើងជាង១៨ម៉ឺននាក់ និងស្លាប់ជាង៧ពាន់១រយនាក់ ។ ជាវិធានការទប់ស្កាត់នោះ លោក ដូណាល់ ត្រាំ បានសង្កត់ធ្ងន់ថា ក្នុងរយៈពេល១៥ថ្ងៃនេះ កុំប្រមូលផ្ដុំ ឬជួបជុំគ្នាចាប់ពីមនុស្ស១០នាក់ឡើងទៅ ហើយត្រូវបញ្ជៀសឱ្យបានការចូលក្លឹបរាត្រី ភោជនីយដ្ឋាន ក្លិបហាត់ប្រាណ ឬកន្លែងដែលមានមនុស្សប្រមូលផ្ដុំគ្នាច្រើន ។ ចំណែកឯមនុស្សចាប់ ឬអ្នកមានជំងឺប្រចាំកាយត្រូវស្ថិតនៅក្នុងផ្ទះ កំឡុងពេលនៃការប្រកាសដាក់ប្រទេសក្នុងគ្រាមានអាសន្ន ៕

សហរដ្ឋអាម៉េរិក៖ ការធ្វើតេស្តវ៉ាក់សាំងលើមនុស្សលើកដំបូង ដើម្បីប្រឆាំងនឹងវីរុស COVID-19 បានចាប់ផ្តើមហើយនៅសហរដ្ឋអាម៉េរិក នេះបើតាមសារព័ត៌មាន BBC នៅថ្ងៃទី១៧ ខែមីនា ឆ្នាំ២០២០។ ទីភ្នាក់ងារសារព័ត៌មាន AP បានរាយការណ៍ថា អ្នកជម្ងឺ០៤នាក់បានទទួលការចាក់ថ្នាំនៅឯមជ្ឈមណ្ឌលស្រាវជ្រាវ ខាយសឺ ក្នុងទីក្រុងសៀតថល រដ្ឋធានីវ៉ាស៊ីនតោន ។ បើតាមក្រុមអ្នកជំនាញ ការធ្វើតេស្តវ៉ាក់សាំងលើមនុស្សនេះ វានៅត្រូវការពេលយូរខែទៀត ទើបអាចបញ្ជាក់បានថា វាពិតមានប្រសិទ្ធភាព និងមានសុវត្ថិភាព ក្នុងការប្រើប្រាស់ជាទូទៅបាន ។សូមបញ្ជាក់ថា ការធ្វើតេស្ដលើវ៉ាក់សាំងនេះ គឺជាជំហានមួយដ៏សំខាន់សម្រាប់ក្រុមអ្នកវិទ្យាសាស្ត្រ ដើម្បីបើកផ្លូវឆ្ពោះទៅការធ្វើតេស្ដទ្រង់ទ្រាយធំមួយ បើការធ្វើពិសោធន៍ខាងលើទទួលបានលទ្ធផលល្អ ៕

កូរ៉េខាងត្បូង៖ ប្រធានាធិបតីកូរ៉េខាងត្បូង លោក មូន ចេអ៊ីន ថ្លែងថា រូបលោកមានជំនឿចិត្តខ្ពស់ថា កូរ៉េខាងត្បូងនឹងអាចយកឈ្នះលើមេរោគ COVID-19 បាននាពេលដ៏ខ្លីខាងមុខ ខណៈអត្រានៃករណីឆ្លងថ្មីនៅតែបន្តធ្លាក់ចុះ នេះបើតាមសារព័ត៌មាន CNA នៅថ្ងៃទី១៧ ខែមីនា ឆ្នាំ២០២០ ។ ការកត់សម្គាល់បែបនេះរបស់លោក មូន ចេអ៊ីន ត្រូវបានធ្វើឡើងស្របពេលដែលអាជ្ញាធរសុខាភិបាលកូរ៉េខាងត្បូង បានរាយការណ៍ពីករណីឆ្លងថ្មីៗនៃវីរុស COVID-19 ចំនួន៨៤ករណីបន្ថែមទៀតនៅទូទាំងប្រទេស ដែលវាជាថ្ងៃទីបីជាប់ៗគ្នាហើយ ដែលកូរ៉េខាងត្បូងបានរាយការណ៍ថា មានការឆ្លងប្រចាំថ្ងៃតិចជាង ១០០ករណី ។ បើតាមមជ្ឈមណ្ឌលកូរ៉េសម្រាប់ការគ្រប់គ្រង និងបង្ការជំងឺ KCDC រហូតមកទល់នឹងពេលនេះ ប្រទេសកូរ៉េខាងត្បូងមានអ្នកឆ្លងសរុបចំនួន៨.៣២០ករណី ក្នុងនោះមានអ្នកជំងឺ៨១នាក់ស្លាប់ និង ១.៤០១នាក់ផ្សេងទៀតបានជាសះស្បើយឡើងវិញ ៕

អ៊ីតាលី៖ អាជ្ញាធរអ៊ីតាលីបានរាយការណ៍ពីករណីឆ្លងវីរុស COVID-19 ចំនួន៣៤៩នាក់បន្ថែមទៀត គិតត្រឹមរយៈពេលពេញមួយថ្ងៃទី១៦ ខែមីនា ដែលប្រការនេះបានធ្វើឱ្យចំនួនសរុបនៃអ្នកស្លាប់នៅទូទាំងប្រទេស បន្តកើនឡើងដល់ ២.១៥៨នាក់ នេះបើតាមសារព័ត៌មាន CNA ។ ចំនួនអ្នកជំងឺដែលបានស្លាប់ប្រចាំថ្ងៃ ដោយសារវីរុស COVID-19 ត្រូវបានអាជ្ញាធរអ៊ីតាលី  រកឃើញថា បានកើនឡើងទ្វេដងនៅក្នុងរយៈពេល០២ថ្ងៃចុងក្រោយនេះ ខណៈបច្ចុប្បន្នអ្នកឆ្លងជម្ងឺផ្លូវដង្ហើមថ្មីនេះនៅអ៊ីតាលី មានចំនួនសរុប២ម៉ឺន៧ពាន់៩៨០ករណី បើប្រៀបធៀបជាមួយរយៈពេល០៤ថ្ងៃមុន ដែលមានចំនួនតែ ១ម៉ឺន៥ពាន់១១៣ករណី ។ បច្ចុប្បន្នអ៊ីតាលីដែលមានប្រជាជនជាង៦០លាននាក់ កំពុងអនុវត្តន៍វិធានការបិទប្រទេសទាំងមូលរហូតដល់ថ្ងៃទី០៣ ខែមេសាខាងមុខ ខណៈចំនួនអ្នកស្លាប់ និងឆ្លងវីរុស COVID-19 មិនទាន់មានភាពធូរស្រាលសោះ ដែលជាហេតុធ្វើឱ្យប្រទេសអឺរ៉ុបមួយនេះ ក្លាយជាប្រទេសកំពុងរងគ្រោះធ្ងន់ធ្ងរជាងគេបំផុត ។ ទន្ទឹមគ្នានេះ អង្គការសុខាភាពពិភពលោក WHO បានក៏បានប្រកាសដែរថា អឺរ៉ុបបានក្លាយជាចំណុចកណ្ដាលថ្មីនៃជម្ងឺរាតត្បាតជាសកល COVID-19 ៕

វៀតណាម៖  ដោយសារតែបញ្ហារីករាលដាលជំងឺកូវីដ១៩ ថ្មីៗនេះ ទីក្រុងហូជីមិញប្រទេសវៀតណាមបានចេញបញ្ជារឲ្យបិទ រោងកុន ក្លិបកម្សាន្ត ហាងហ្គេម ហាងម៉ាស្សា ហាងខារ៉ាអូខេ ទាំងអស់នៅក្នុងទីក្រុងត្រូវបិទទ្វារឈប់ដំណើរជាបណ្ដោះអាសន្ន ដោយចាប់ផ្តើមបិទ ចាប់ពីថ្ងៃទី១៥ មីនាមក។ ទន្ទឹមនឹងនោះ នឹងពន្យារការចូលរៀនរបស់សិស្សសាលាទាំងអស់ ដល់ថ្ងៃទី៥ ខែមេសា។ ខណៈសិស្សសាលាវៀតណាមទាំងអស់ មិនបានទៅរៀនតាំងពីមុនចូលឆ្នាំចិនមកម្ល៉េះ ដោយសារវីរុសខាងលើ។ សកម្មភាពខាងលើ ត្រូវបានរដ្ឋាភិបាលបញ្ចេញមក នៅពេលប្រទេសមួយនេះ មានអ្នកឆ្លងរោគកូរ៉ូណាថ្មីដល់ទៅ ៥៥នាក់ ព្យាបាលជាដាច់ ១៦នាក់៕

ស្វីស៖ សារព័ត៌មាន Channel News Asia បានចុះផ្សាយនៅថ្ងៃទី១៧ ខែមីនានេះថា ប្រធានអង្គការសុខភាពពិភពលោក WHO លោក ថេដ្រូស អាដាណម ហ្គេប្រេយែសឹស បានប្រាប់ឲ្យគ្រប់ប្រទេសបង្កើនការធ្វើតេស្តលើអ្នកសង្ស័យឆ្លងវីរុស COVID-19 ឲ្យបានកាន់តែខ្លាំងក្លាជាងមុន ខណៈបណ្តាប្រទេសទាំងអស់នៅទ្វីបអឺរ៉ុបកំពុងតែបង្កើនការបិទទ្វាររបស់ពួកគេ ហើយទ្វារនៃសហភាពអឺរ៉ុបទាំង មូលអាចនឹងត្រូវបិទតែម្តងនៅក្នុងពេលឆាប់ៗនេះ ។ ការកត់សម្គាល់បែបនេះរបស់លោក ថេដ្រូស អាដាណម ហ្គេប្រេយែសឹស ត្រូវបានធ្វើឡើងស្របពេលដែលចំនួនអ្នកឆ្លងមេរោគ COVID-19 នៅទូទាំងពិភពលោក បានកើនឡើងដល់ជាង១៦ម៉ឺន៨ពាន់នាក់នៅក្នុងប្រទេសចំនួនជិត១៦០ ខណៈមនុស្សស្លាប់ដោយសារជំងឺរាតត្បាតសកលនេះវិញ ក៏បានកើនឡើងដល់ ៦ពាន់៥រយនាក់ផងដែរ ។ ជាវិធានការទប់ស្កាត់នោះ សហភាពអឺរ៉ុបដែលមានសមាជិក២៧ប្រទេសកំពុងតែពិភាក្សាអំពីការបិទទ្វារទាំងអស់តែម្តង សម្រាប់រយៈ៣០ថ្ងៃមិនឲ្យជនបរទេសចូល ដោយសារតែតំបន់នេះត្រូវបានចាត់ទុកថា ជាចំណុចស្នូលថ្មីនៃការរីករាលដាលនៃវីរុស COVID-19 ទៅកាន់ពិភពលោក បន្ទាប់ពីចិនបានធូរស្រាល ៕

បារាំង៖ រដ្ឋាភិបាលបារាំងបានសម្រេចបិទប្រទេសទាំងស្រុង ឈប់ឱ្យប្រជាជនចេញពីផ្ទះ លើកលែងតែករណីចាំបាច់បំផុត ដែលវិធានការដ៏តឹងរ៉ឹងនេះ ធ្វើឡើងក្នុងគោលបំណងទប់ស្កាត់ការរីករាតត្បាតនៃមេរោគ COVID-19 នេះបើតាមការផ្សាយរបស់វិទ្យុបារាំងអន្តរជាតិ RFI នៅថ្ងៃទី១៧ ខែមីនា ឆ្នាំ២០២០ ។ ប្រធានាធិបតីបារាំងលោក អេម៉ានុយអែល ម៉ាក្រុង នៅថ្ងៃទី១៦ ខែមីនានេះ បានចេញមុខថ្លែងសារដោយផ្ទាល់ទៅកាន់ប្រជាជនបារាំងសារជាថ្មីម្តងទៀត ជុំវិញវិធានការថ្មី ក្នុងការទប់ស្កាត់ការរីករាលដាលនៃមេរោគ COVID-19 ។ ទន្ទឹមគ្នា លោក ម៉ាក្រុង បានប្រកាសឲ្យប្រជាជនទាំងអស់នៅទូទាំងប្រទេស ស្ថិតនៅតែក្នុងផ្ទះ ដោយហាមមិនឲ្យធ្វើដំណើរចេញក្រៅផ្ទះ លើកលែងតែក្នុងករណីចាំបាច់បំផុត ។ លោក ម៉ាក្រុង ក៏បានថ្លែងអំពាវនាវម្តងហើយម្តងទៀតថា បារាំងនៅពេលនេះ កំពុងស្ថិតក្នុងស្ថានភាពសង្រ្គាម គឺសង្រ្គាមទល់នឹងវីរុស COVID-19 ។ សូមបញ្ជាក់ថា ប្រទេសបារាំងកំពុងព្រួយបារម្ភយ៉ាងខ្លាំង ចំពោះការរីករាតត្បាតនៃជំងឺរលាកសួតដ៏កាចសាហាវមួយនេះ ហើយបើតាមរបាយការណ៍នោះ បារាំង មានអ្នកឆ្លងជំងឺ COVID-19 រហូតដល់ទៅ៥ពាន់៤៣៧នាក់ ដោយក្នុងនោះមានអ្នកជម្ងឺ១២៧នាក់ហើយបានបាត់បង់ជីវិត ៕…

អ៊ីរ៉ង់៖ ទីភ្នាក់ងារព័ត៌មាន Reuters បានចុះផ្សាយនៅថ្ងៃទី១៦ ខែមីនានេះថា បើតាមអាជ្ញាធរអ៊ីរ៉ង់ អ្នកជំងឺឆ្លងវីរុស COVID-19 ចំនួន១២៩នាក់បន្ថែមទៀតបានបាត់បង់ជីវិត។ បើបូកបន្ថែមតួលេខថ្មីខាងលើនេះ បានធ្វើឲ្យចំនួនសរុបនៃអ្នកស្លាប់ដោយសារមេរោគ COVID-19 នៅទូទាំងប្រទេស កើនឡើងដល់៨៥៣នាក់ ហើយករណីអ្នកឆ្លងក៏បានកើនឡើងដល់ជាង១ម៉ឺន៤ពាន់៩៩១នាក់ផងដែរ បន្ទាប់ពីករណីឆ្លងចំនួន១ពាន់៥៣នាក់ត្រូវបានទទួលស្គាល់ ។ គួរបញ្ជាក់ថា ប្រទេសអ៊ីរ៉ង់បានប្រកាសពីការរកឃើញករណីអ្នកឆ្លងដំបូង កាលពីថ្ងៃទី ១៩ ខែកុម្ភៈកន្លងទៅហើយជាវិធានការទប់ស្កាត់ការឆ្លងមេរោគ COVID-19នោះ រដ្ឋាភិបាលទីក្រុងតេហេរ៉ង់បានអំពាវនាវឱ្យប្រជាជនស្ថិតនៅក្នុងផ្ទះដូចទៅនឹងបណ្តាប្រទេសដទៃទៀតផងដែរ ៕

ម៉ាឡេស៊ី៖ នាយករដ្ឋមន្ត្រីម៉ាឡេស៊ី លោក Muhyiddin Yassin បានថ្លែងថា ប្រទេសរបស់លោកនឹងហាមពលរដ្ឋរបស់ខ្លួនធ្វើដំណើរចេញក្រៅប្រទេស ហើយហាមឃាត់ជនបរទេសទាំងអស់ចូលមកក្នុងប្រទេស សម្រាប់រយៈពេល០២សប្ដាហ៍ ដោយចាប់ផ្ដើមពីថ្ងៃទី១៨ ខែមីនាតទៅ នេះបើតាមសារព័ត៌មាន CNA ។ ចំណែកឯពិធីជួបជុំនៅតាមទីសាធារណៈ សកម្មភាពនានានៅក្នុងប្រទេសទាំង មូល មានដូចជាព្រឹត្តិការណ៍សាសនា ជំនួបកីឡា សកម្មភាពវប្បធម៌ និងសង្គម នឹងត្រូវបានផ្អាកជាបណ្ដោះអាសន្ន ។ នាឱកាសថ្លែងទៅកាន់ប្រជាជាតិម៉ាឡេស៊ី តាមកញ្ចក់ទូរទស្សន៍នៅថ្ងៃទី១៦ ខែមីនា នាយករដ្ឋមន្ត្រីម៉ាឡេស៊ីរូបនេះបាននិយាយថា បទបញ្ញត្តិទាំងនេះ គឺជាផ្នែកមួយនៃការរឹតត្បិតការធ្វើដំណើរ ដែលអនុម័តដោយរដ្ឋាភិបាលម៉ាឡេស៊ី ក្នុង គោលបំណងបង្ការ និងទប់ស្កាត់ការរីករាលដាលនៃជំងឺ COVID-19 ។ គួរបញ្ជាក់ថា អាជ្ញាធរសុខាភិបាលម៉ាឡេស៊ីបានរាយការណ៍ពីការរកឃើញអ្នកឆ្លងថ្មីនៃវីរុស COVID-19 ចំនួន១២៥នាក់ទៀត ក្នុងនោះមាន៩៥ករណីមានជាប់ទាក់ទងជាមួយនឹងពិធីជួបជុំលក្ខណៈសាសនា ដែលបានប្រព្រឹត្តទៅនៅព្រះវិហារអ៊ីស្លាមមួយកន្លែង ស្ថិតក្នុងតំបន់ ស្រ៊ី ផេថាលីង ទីក្រុងគូឡាំឡាំពួរ ។ បើធ្វើការបូកបន្ថែមនឹងករណីថ្មីនេះ តួលេខសរុបនៃអ្នកឆ្លងវីរុស COVID-19 នៅម៉ាឡេស៊ីបានកើនដល់៥៥៣ករណី ក្នុងនោះអ្នកជំងឺជាង៤០នាក់បានជាសះស្បើយ…