យ៉ាងតិចមនុស្ស២៧នាក់ ក្នុងខេត្តចំនួន២នៃប្រទេសអ៊ីរ៉ង់ បានបាត់បង់ជីវិតដោយសារពុលស្រា ក្នុងរយៈពេល១យប់។ ករណីស្លាប់នេះ គឺព្រោះតែពួកគេបានផឹកស្រាដែលមានផ្ទុកជាតិអាល់កុលច្រើនហួសកម្រិតកំណត់ ក្រោយជឿស្លុងតាមពាក្យចចាមអារ៉ាមថា វាជួយសម្លាប់ COVID-19 ។ ពាក្យចចាមអារ៉ាមដែលគ្មានប្រភពច្បាស់លាស់មួយ បានផ្សព្វផ្សាយពាសពេញប្រទេសអ៊ីរ៉ង់ថា ការផឹកស្រា នឹងជួយសម្លាប់ជំងឺផ្លូវដង្ហើមកូរ៉ូណា COVID-19។ ក្រោយមានពាក្យចចាមអារ៉ាមបែបនេះ គេឃើញមាន ករណីពុលស្រាកាន់តែច្រើនឡើងកើតមានក្នុងមន្ទីរពេទ្យនានាក្នុងប្រទេសអ៊ីរ៉ង់។ គិតត្រឹមថ្ងៃពុធ ទី ១១ ខែមីនា អ៊ីរ៉ង់ បានរកឃើញករណីឆ្លង COVID-19 ជាង៨ពាន់ករណី ហើយមានអ្នកស្លាប់ ២៩១នាក់ ខណៈអ្នកជាសះស្បើយជាង២៧០០នាក់៕

ថៃ៖  សារព័ត៌មាន Mailonline បានចេញផ្សាយថា អាជ្ញាធរក្នុងខេត្ត ឈៀងរ៉ៃ ភាគ ខាងជើងប្រទេសថៃបានសម្រេចថានឹងធ្វើការ ផ្សព្វផ្សាយពីកន្លែងអាងទឹកក្ដៅ១០ កន្លែង ក្នុងខេត្តដើម្បីទាក់ទាញ ភ្ញៀវទេសចរក្នុងតំបន់ឡើងវិញក្រោយមានការធ្លាក់ចុះ៧០ % ដោយសារការរាលដាល នៃ Covid-19។ ក្រោយការស្ទាបស្ទង់ ភ្នាក់ងារ ទេសចរ, សណ្ឋាគារ, ភោជនីយដ្ឋាន និងហាង វត្ថុអនុស្សាវរីយ៍ផ្សេង ៗ នឹងរៀប ចំកម្មវិធី ដំណើរ កម្សាន្ដសម្រាប់ ភ្ញៀវ ដោយសារតែកម្ដៅក្ដៅនឹងអាងទឹក នឹងធ្វើ ឲ្យមានសុវត្ថិភាព ពីមេរោគហើយតំបន់នេះជាតំបន់ធម្មជាតិ មិន មានមនុស្សច្រើន កុះករនោះទេ។ ការិយាល័យ ទេសចរក្នុងខេត្តឈៀងរ៉ៃ និងការិយាល័យមួយចំនួន ទៀត បានធ្វើការស្ទាបស្ទង់ អាងទឹកក្ដៅជាង១០កន្លែងដែលត្រូវបាន អភិវឌ្ឍ ឲ្យសមស្របទៅ នឹងគ្រប់ ប្រភេទភ្ញៀវទេសចរ ទាំង អស់ ជា ពិសេស ភ្ញៀវ ដែល មាន…

សហរដ្ឋអាម៉េរិក៖ ក្រុមហ៊ុនអាកាសចរណ៍ធំបំផុតពីររបស់សហរដ្ឋអាម៉េរិក គឺក្រុមហ៊ុន American និងDelta បានប្រកាសកាត់បន្ថយយ៉ាងគំហុកនូវកាលវិភាគហោះហើររបស់ខ្លួន ទាំងអន្តរជាតិ និងនៅក្នុងស្រុក ដោយសារការធ្លាក់ចុះនៃចំនួនអ្នកដំណើរដែលភ័យខ្លាចការឆ្លងវីរុស COVID-19 ។ ទន្ទឹមគ្នា American ដែលជាក្រុមហ៊ុនអាកាសចរណ៍ធំជាងគេបំផុតនៅលើពិភពលោក បានលើកឡើងថា ខ្លួននឹងកាត់បន្ថយសមត្ថភាពហោះហើរអន្ដរជាតិរបស់ខ្លួន ចំនួន១០ភាគរយនៅរដូវក្តៅនេះ ។ដោយឡែកក្រុមហ៊ុនអាកាសចរណ៍ Delta ក៏បានបញ្ជាក់ដែរថា ខ្លួននឹងកាត់បន្ថយជើងហោះហើរអន្តរជាតិរបស់ខ្លួនចន្លោះពី ២០ភាគរយ ទៅ ២៥ភាគរយ ក៏ដូចជាកាត់បន្ថយជើងហោះហើរក្នុងស្រុកចាប់ពី ១០ភាគរយ ទៅ ១៥ភាគរយផងដែរ ៕

ចិន៖ ប្រធានាធិបតីចិនលោក ស៊ី ជិនពីង បានប្តេជ្ញានៅថ្ងៃទី១០ ខែមីនាថា នឹងធ្វើការតស៊ូយ៉ាងម៉ឹងម៉ាត់បំផុត ដើម្បីទទួលបានជ័យជំនះក្នុងសង្គ្រាមប្រឆាំងនឹងជម្ងឺឆ្លង COVID-19 ខណៈការអះអាងបែបនេះធ្វើឡើងអំឡុងដំណើរទស្សនកិច្ចទៅកាន់ទីក្រុងវូហាន ខេត្តហ៊ូប៉ី ភាគកណ្តាលប្រទេសចិន ។ លោក ស៊ី បានលើកឡើងនាឱកាសចុះទស្សនកិច្ចនៅមន្ទីរពេទ្យ ហួសិនសាន ក្នុងទីក្រុង វូហាន ថា បុគ្គលិកពេទ្យជួរមុខបានបំពេញបេសកកម្មដ៏លំបាកបំផុត ហើយយើងអាចហៅពួកគេថា ជាមនុស្សដែលគួរឱ្យកោតសរសើរបំផុត នៅក្នុងយុគសម័យថ្មីនេះ ដែលសមនឹងទទួលបានការសរសើរខ្ពស់បំផុត ។ តំណាងឲ្យគណៈកម្មាធិការកណ្តាលនៃគណបក្សកុម្មុយនិស្តចិន លោក ស៊ី ជិនពីង ក៏បានចូលរួមរំលែកទុក្ខជូន ចំពោះក្រុមគ្រួសារដែលបានបាត់បង់សមាជិក ដោយសារជំងឺ COVID-19 និងអ្នកដែលបានបូជាជីវិតរបស់ពួកគេ នៅក្នុងខ្សែត្រៀមជួរមុខនេះ ។ សូមជម្រាបថា ក្រៅពីការធ្វើទស្សនកិច្ចនៅមន្ទីរពេទ្យ ពិនិត្យមើលតថភាពជារួមក្នុងទីក្រុងវូហាន និងការជួបសំណេះសំណាលជាមួយមន្ត្រីនានា ដែលកំពុងបម្រើការងារនៅខ្សែត្រៀមជួរមុខនេះ លោក ស៊ី ជិនពីង ក៏បានជំនួបសួរសុខទុក្ខអ្នកជំងឺជាច្រើននាក់ តាមរយៈវីដេអូលីងផងដែរ និងបានជូនពរឲ្យពួកគេឆាប់ជាសះស្បើយឡើងវិញ ៕ …

អង់គ្លេស៖ សមាជិកសភាមកពីគណបក្សអភិរក្សនិយម និងរដ្ឋមន្រ្តីក្រសួងសុខាភិបាលរបស់អង់គ្លេស លោកស្រី ហាដាញ ដ័ររីស៍ ត្រូវបានគេរាយការណ៍ឲ្យដឹងថា បានឆ្លងមេរោគ COVID-19 បន្ទាប់ពីធ្លាក់ខ្លួនឈឺកាលពីថ្ងៃសុក្រសប្តាហ៍មុន និងត្រូវបានគេធ្វើតេស្តរកវីរុស ។ ការប្រកាសឲ្យដឹងនេះ គឺកើតឡើងបន្ទាប់ពីមានមនុស្ស០៦នាក់ត្រូវបានគេរាយការណ៍ថា បានស្លាប់ដោយសារជំងឺឆ្លង COVID-19 ខណៈចំនួនអ្នកឆ្លងបានកើនឡើងដល់៣៨២នាក់នៅទៅទូទាំងចក្រភពអង់គ្លេស ។ បើតាមប្រភព លោកស្រី ហាដាញ ដ័ររីស៍ បានជួបមនុស្សរាប់រយនាក់នៅក្នុងសភាកាលពីសប្តាហ៍មុន ហើយក៏បានចូលរួមពិធីទទួលភ្ញៀវជាមួយនាយករដ្ឋមន្រ្តីអង់គ្លេសលោក បូរីស ចនសុន ផងដែរ ។ ប្រការនេះវាបានធ្វើឲ្យមានក្តីបារម្មណ៍កាន់ខ្លាំងឡើង ចំពោះហានិភ័យនៃជំងឺដ៏កាចសាហាវនេះនៅទូទាំងអង់គ្លេស ជាពិសេសក្នុងចំណោមមន្ត្រីជាន់ខ្ពស់ ៕

អ៊ីតាលី៖ អាជ្ញាធរអ៊ីតាលីបានរាយការណ៍ពីករណីឆ្លងថ្មីនៃមេរោគ COVID-19 ចំនួន៩៧៧បន្ថែមទៀតនៅថ្ងៃទី១០ ខែមីនា ដែលប្រការនេះ បានធ្វើឱ្យចំនួនអ្នកឆ្លងសរុបនៅទូទាំងប្រទេស បន្តកើនឡើងដល់១ម៉ឺន១៤៩ករណី នេះបើតាមក្រសួងសុខាភិបាលអ៊ីតាលី ។ ទន្ទឹមគ្នា ក្រសួងសុខាភិបាលអ៊ីតាលីបានឱ្យដឹងទៀតថា តួលេខសរុបនៃអ្នកស្លាប់ដោយសារវីរុស COVID-19 ក៏បានបន្តកើនឡើងដល់៦៣១នាក់ផងដែរ ខណៈអ្នកជាសះស្បើយសរុបមានចំនួន១ពាន់៤នាក់ ។ ជាវិធានការទប់ស្កាត់នោះ នាយករដ្ឋមន្រ្តីអ៊ីតាលីលោក ហ្គីវសេបប៉េ កុនតេ បានបិទប្រទេសរបស់លោកទាំងមូលតែម្តង នៅថ្ងៃទី០៩ ខែមីនានេះ (ម៉ោងក្នុងតំបន់) ដើម្បីប្រយុទ្ធប្រឆាំងនឹងវីរុស COVID-19 ដោយហាមឃាត់រាល់ការធ្វើដំណើរ និង បញ្ចប់ទាំង ស្រុងក្នុងការជួបជុំគ្នានៅក្នុងសង្គម ខណៈករណីស្លាប់ និងឆ្លងជំងឺរលាកសួតដ៏សាហាវនេះបាននឹងកំពុងកើនឡើងយ៉ាងខ្លាំង ៕

ថៃ៖ អ្នកធ្វើដំណើរមកពីប្រទេសចិន អ៊ីរ៉ង់ អ៊ីតាលី និងកូរ៉េខាងត្បូង ចាប់ពេលនេះ ត្រូវតម្រូវឲ្យបង្ហាញសំបុត្រពេទ្យដែលបញ្ជាក់ថា មិនមានផ្ទុកវីរ៉ុស COVID-19 មុននឹងឡើងជិះយន្តហោះធ្វើដំណើរទៅកាន់ប្រទេសថៃ ។ ជាមួយគ្នានេះ អាជ្ញាធរអាកាសចរណ៍ថៃ (CAAT) ប្រកាសថា ប្រសិនបើអ្នកដំណើរណាម្នាក់មិនបង្ហាញសំបុត្រពេទ្យនោះទេ មិនអាចឡើងជិះយន្តហោះបានឡើយ ។ សំបុត្រពេទ្យសម្រាប់អ្នកធ្វើដំណើរទូទៅអាចរកបំពេញបាន នៅលើគេហទំព័ររបស់មន្ទីរគ្រប់គ្រងគ្រោះមហន្តរាយ ។ ក្នុងទម្រង់នោះ វេជ្ជបណ្ឌិតត្រូវប្រកាសឲ្យអ្នកធ្វើដំណើរដែលមិនមានវីរ៉ុស COVID-19 អំឡុងពេល១៤ថ្ងៃ មុនពេលហោះហើរ និងផ្តល់ភស្តុតាងនៃការធ្វើតេស្តអវិជ្ជមានក្នុងរយៈពេល៤៨ម៉ោង មុនពេលហោះហើរ ។ បើតាមគិតមកទល់នឹងពេលនេះ ប្រទេសថៃមានករណីឆ្លងវីរ៉ុស COVID-19 ចំនួន៥៣ករណី ដែលក្នុងនោះអ្នកជំងឺ១៩នាក់កំពុងទទួលការព្យា បាលនៅមន្ទីរពេទ្យ រីឯ៣៣នាក់បានជាសះស្បើយចេញពីមន្ទីរពេទ្យ និងម្នាក់ទៀតបានបាត់បង់ជីវិត ៕

ចិន៖ ប្រធានាធិបតីចិនលោក ស៊ី ជិនពីង បានធ្វើដំណើរដល់ទីក្រុងវូហាន ខេត្តហ៊ូប៉ី នៅព្រឹកថ្ងៃទី១០ ខែមីនានេះ ស្ថិតក្នុងគោលបំណងត្រួតពិនិត្យជាក់ស្តែងនូវសកម្មភាពបង្ការ និងទប់ស្កាត់ការឆ្លងរាលដាលនៃមេរោគ COVID-19 ដែលហាក់មានសភាពធូរស្រាលឡើងវិញជាលំដាប់នាប៉ុន្មានសប្តាហ៍ចុងក្រោយនេះ ។ អំឡុងដំណើរទស្សនកិច្ចនេះ លោក ស៊ី ជិនពីង នឹងទៅពិនិត្យមើលការបំពេញកិច្ចការងាររបស់បុគ្គលិកពេទ្យ មន្ត្រីយោធា និងនាយទាហាន បុគ្គលិកសហគមន៍ មន្ត្រីប៉ូលិស ព្រមទាំងមន្ត្រី និងប្រជាជនស្ម័គ្រចិត្ត ដែលកំពុងស្ថិតក្នុងខ្សែត្រៀមជួរមុខ ក្នុងការប្រយុទ្ធ និងទប់ស្កាត់ការឆ្លងរាលដាលនៃវីរុស COVID-19 ។ ទន្ទឹមគ្នា ប្រធានាធិបតីចិនរូបនេះ ក៏នឹងចុះទៅសួរសុខទុក្ខអ្នកជំងឺជាច្រើននាក់ និងប្រជាជនទាំងអស់នៅក្នុងទីក្រុងវូហាន ខេត្តហ៊ូប៉ី ផងដែរ ៕

សហរដ្ឋអាម៉េរិក៖ លោក ដូណាល់ ត្រាំ មិនបានទទួលការធ្វើតេស្ដរកមេរោគ COVID-19 នោះទេ បើទោះជាលោកត្រូវបានគេអះអាងថា ធ្លាប់បានទាក់ទងជិតស្និទ្ធជាមួយសមាជិកសភាអាម៉េរិកជាច្រើនរូប ដែលកំពុងអនុវត្តវិធានការស្នាក់នៅដាច់ដោយឡែកពីគេ បន្ទាប់ពីបានប្រាស្រ័យទាក់ទងជាមួយអ្នកផ្ទុកវីរុស ។ កន្លងមក ប្រធានាធិបតីអាម៉េរិករូបនេះ ក៏ធ្លាប់ត្រូវបានអ្នកព័ត៌មានសួរថាតើលោកបានទទួលការធ្វើតេស្ដរកជំងឺកូរ៉ូណាដែរឬអត់ ប៉ុន្តែលោកមិនបានឆ្លើយនឹងសំនួរនេះទេ ដោយលោកដើរចេញពីបន្ទប់សន្និសីទសារព័ត៌មាន ។ ប៉ុន្តែអនុប្រធានា ធិបតីអាម៉េរិក លោក ម៉ៃក៍ ភែន បាននិយាយថា លោកមិនដឹងពីបញ្ហានេះទេ ហើយថា លោកផ្ទាល់ក៏មិនត្រូវបានធ្វើតេស្ដរកជំងឺនេះដូចគ្នា ។ យ៉ាងណាមិញ នៅថ្ងៃទី០៩ ខែមីនានេះ សេតវិមានបានលើកឡើងថា លោក ត្រាំ មិនបានទទួលការធ្វើតេស្ដរក COVID-19 នោះទេ ពីព្រោះជាការពិត លោកមិនមានទំនាក់ទំនងជិតស្និទ្ធជាមួយអ្នកជំងឺណាម្នាក់នោះទេ ហើយក៏មិនមានរោគសញ្ញាគួរឱ្យសង្ស័យអ្វីនោះដែរ ។ បច្ចុប្បន្នលោក ត្រាំ សុខភាពល្អធម្មតា ខណៈក្រុមគ្រូពេទ្យនឹងបន្តតាមដានសុខភាពរបស់លោក យ៉ាងយកចិត្តទុកដាក់ជាទីបំផុត ៕

អង់គ្លេស៖ ចំនួនសរុបនៃអ្នកឆ្លងមេរោគ COVID-19 នៅទូទាំងប្រទេសអង់គ្លេស បន្តកើនឡើងដល់៣១៩ករណីហើយ ក្នុងនោះមានអ្នកជំងឺ០៥នាក់បានបាត់បង់ជីវិត នេះបើតាមសារព័ត៌មានស៊ីនហួរនៅថ្ងៃទី១០ ខែមីនា ឆ្នាំ២០២០ ។ ប្រភពដដែលបានឱ្យដឹងថា ក្នុងចំណោមអ្នកស្លាប់ទាំង០៥នាក់ខាងលើនេះ មានមនុស្សម្នាក់ទើបស្លាប់ ដែលមានវ័យចំណាស់ជាង៧០ឆ្នាំ ហើយក៏មានជំងឺប្រចាំកាយផងដែរ ព្រោះគ្រាន់តែបញ្ជូនទៅកាន់មន្ទីរពេទ្យ ហេលីអើ (St Helier) និងធ្វើតេស្តរកឃើញមានផ្ទុកវីរុសកូរ៉ូណាថ្មីតែប៉ុន្មានម៉ោងនោះ អ្នកជំងឺរូបនេះក៏បានបាត់បង់ជីវិតតែម្តង ។ សូមជម្រាបថា មិនខុសពីករណីនៅប្រទេសផ្សេងៗទៀតឡើយ អ្នកជំងឺដែលបានស្លាប់ដោយសារតែវីរុស COVID-19 នៅប្រទេសអង់គ្លេស ភាគច្រើនបំផុតគឺជាមនុស្សមានវ័យចាស់ជរា និងមានជំងឺប្រចាំកាយស្រាប់ ៕