អ៊ីតាលី៖ រដ្ឋាភិបាលអ៊ីតាលីបានរាយការណ៍ពីចំនួនអ្នកឆ្លងថ្មីនៃមេរោគ COVID-19 ចំនួន៥៦៦ករណីបន្ថែមទៀត នៅថ្ងៃទី០១ ខែមិនា (ម៉ោងក្នុងតំបន់) ដែលប្រការនេះ ធ្វើឱ្យចំនួនសរុបនៃអ្នកឆ្លងជម្ងឺរលាកសួតនេះសរុបកើនឡើងដល់១ពាន់៦៩៤ករណី ។ ស្របពេលជាមួយគ្នានេះដែរ ទីភ្នាក់ងារការពារជនស៊ីវិលរបស់អ៊ីតាលីបានរាយការណ៍ថា ក្នុងចំណោមសរុបនៃអ្នកឆ្លងមេរោគ COVID-19 ក្នុងនោះមានចំនួនអ្នកស្លាប់កើនឡើងដល់៣៤នាក់ហើយ ។ ប៉ុន្តែទន្ទឹមគ្នា បើតាមប្រធានទីភ្នាក់ងារខាងលើនេះ នៅក្នុងចំនោមអ្នកឆ្លងមេរោគ COVID-19 ទាំងអស់ ក្នុងនោះមនុស្ស៨៣នាក់បានជះស្បើយ ៕ធ.ដ

អាហ្វហ្គានីស្ថាន៖ ប្រធានាធិបតីអាហ្វហ្គានីស្ថាន លោក Ashraf Ghani នៅថ្ងៃទី០១ ខែមិនា (ម៉ោងក្នុងតំបន់) បាននិយាយថា រដ្ឋាភិបាលរបស់លោកមិនមានការប្តេជ្ញាថា នឹងដោះលែងអ្នកទោសតាលីបង់ចំនួន៥ពាន់នាក់នោះទេ ។ លោក Ghani បានថ្លែងនៅក្នុងសន្និសីទកាសែតមួយក្នុងរដ្ឋធានី កាប៊ុល ថា ការទាមទាររបស់ក្រុមឧទ្ទាមអាចនឹងត្រូវបានដាក់បញ្ចូលទៅក្នុងរបៀបវារៈ នៃកិច្ចសន្ទនាដែលនឹងធ្វើឡើងក្នុងពេលខាងមុខនេះ ។ លោក Ghani បានសង្កត់ធ្ងន់ថា សមត្ថកិច្ចក្នុងការដោះលែងអ្នកទោសគឺអាស្រ័យលើរដ្ឋាភិបាលអាហ្វហ្គានីស្ថានមិនមែនសហរដ្ឋអាមេរិកនោះទេ‍ ហើយថា រដ្ឋាភិបាលរបស់លោកនឹងមិនទទួលយកសម្ពាធលើការដោះដូរអ្នកទោសនោះទេ ។ គួរបញ្ជាក់ថា សហរដ្ឋអាមេរិក និង ក្រុមតាលីបង់បានយល់ព្រមចុះហត្ថលេខាលើកិច្ចព្រមព្រៀងមួយ ដែលនឹងបើកផ្លូវឆ្ពោះទៅរកសន្តិភាពបញ្ចប់សង្រ្គាមដ៏រុំារ៉ៃនៅក្នុងប្រទេសអាហ្វហ្គានីស្ថាន អស់រយៈពេលជាង១៨ឆ្នាំមកនេះ ។ កិច្ចព្រមព្រៀងសន្តិភាពខាងលើ ត្រូវបានចុះហត្ថលេខានៅក្នុងទីក្រុងដូហា ប្រទេសកាតា នៅថ្ងៃទី២៨ ខែកុម្ភ ក្រោមវត្តមានរដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ និងមេដឹកនាំក្រុមតាលីបង់ ។ ហើយការដោះលែងអ្នកទោសតាលីបង់ គឺជាផ្នែកមួយនៃកិច្ចព្រមព្រៀងសន្ដិភាពលក្ខណៈប្រវត្តិសាស្ត្រ ដែលសហរដ្ឋអាមេរិកបានចុះហត្ថលេខាជាមួយនឹងក្រុមតាលីបង់ ៕ធ.ដ …

(ក្រុងហ្សេងចូវ ខេត្តហឺណាន)៖ តាមរយៈលិខិតរបស់រដ្ឋបាលក្រុងហ្សេងចូវ ចុះថ្ងៃទី២៦ ខែកុម្ភៈ ឆ្នាំ២០២០ លោក ស៊ូ លីយី (Xu Liyi) អភិបាលក្រុង បានថ្លែងអំណរគុណចំពោះឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា ដែលបានបរិច្ចាកម៉ាស់ពេទ្យចំនួន ០១មុឺន ដល់រដ្ឋបាលក្រុងហ្សេងចូវ សម្រាប់គ្រូពេទ្យប្រើប្រាស់ប្រចាំថ្ងៃដើម្បីទប់ទល់ទៅនឹងការឆ្លងនៃជំងឺរលាកផ្លូវដង្ហើម Covid-19 ដែលនេះជាការឆ្លើយតបទាន់ពេលវេលាចំពោះតម្រូវការជាក់ស្តែង។ លិខិតនេះមានខ្លឹមសារសំខាន់ៗដូចខាងក្រោម៖ ខ្ញុំរីករាយដែលបានទទួលនូវលិខិតរបស់ឯកឧត្តម ថោង ខុន ក្នុងពេលដ៏សំខាន់នេះនៅក្នុងប្រទេសចិន ដែលបាននិងកំពុងប្រយុទ្ធប្រឆាំងនឹងជំងឺឆ្លងមេរោគ (COVID-១៩)។ លិខិតរបស់ឯកឧត្តម បានបញ្ជាក់សំដែងនូវការអាណិតអាសូរ និងការបរិច្ចាកម៉ាស់ពេទ្យ ដល់រដ្ឋបាលក្រុងហ្សេងចូវ តាមរយៈស្ថានតំណាងក្រសួងទេសចរណ៍នៃប្រទេសកម្ពុជា និងបានឆ្លុះបញ្ចាំងពីមិត្តភាពដ៏ជ្រាលជ្រៅរវាងប្រជាជនកម្ពុជា និងចិន ក៏ដូចជាប្រជាជនហ្សេងចូវ ដែលនេះក៏បង្ហាញពីសាមគ្គីភាពរបស់ឯកឧត្តម ជាមួយយើងខ្ញុំក្នុងការប្រយុទ្ធទប់ទល់ជំងឺឆ្លងនេះ។ យើងខ្ញុំសូមកោតសរសើរយ៉ាងជ្រាលជ្រៅចំពោះរឿងនេះ។ នៅថ្ងៃទី ២០ ខែមករា កន្លងទៅ យើងមានការប្រជុំយ៉ាងរាក់ទាក់ និងកក់ក្តៅនៅហ្សេងចូវ។  យើងបានផ្លាស់ប្តូរទស្សនៈ និងឈានដល់ចំណុចទូលំទូលាយនៃការឯកភាពគ្នាលើកិច្ចសហប្រតិបត្តិការទេសចរណ៍ឲ្យកាន់តែស៊ីជម្រៅ និងពង្រឹងការផ្លាស់ប្តូរវប្បធម៌ និងសេដ្ឋកិច្ចរវាងព្រះរាជាណាចក្រកម្ពុជា និងក្រុងហ្សេងចូវ។  តែជាការគួរឱ្យសោកស្តាយ ដោយសារតែការផ្ទុះឡើងនៃជំងឺឆ្លង…

អ៊ីតាលី៖ យោងតាមរបាយការណ៍ថ្មីរបស់អាជ្ញាធរអ៊ីតាលីបានឱ្យដឹងថា តួលេខសរុបនៃអ្នកឆ្លងជម្ងឺ COVID-19 បានកើនឡើងដល់៨៨៨ករណីហើយនៅទូទាំងប្រទេសអ៊ីតាលី បន្ទាប់ពីករណីឆ្លងថ្មីចំនួន២៣៨បន្ថែមទៀតទើបត្រូវបានរកឃើញ គិតត្រឹមថ្ងៃទី២៨ ខែកុម្ភៈ នេះ (ម៉ោងក្នុងតំបន់) ។ បើតាមសារព័ត៌មាន CGTN របស់ចិននោះ នៅក្នុងចំណោមចំនួនសរុបនៃអ្នកឆ្លងវីរុស COVID-19 ទាំង៨៨៨នាក់ខាងលើនេះ ក្នុងនោះមានមនុស្ស២១នាក់បានបាត់បង់ជីវិត ខណៈអ្នកជម្ងឺ៤៦នាក់ផ្សេងទៀតបានជាសះស្បើយ ៕ធ.ដ

កូរ៉េខាងត្បូង៖ តួលេខសរុបនៃអ្នកឆ្លងមេរោគ COVID-19 នៅទូទាំងប្រទេសកូរ៉េខាងត្បូងបានកើនឡើងដល់២ពាន់៩៣១ករណី បន្ទាប់ពីករណីឆ្លងថ្មីចំនួន៥៩៤ករណីបន្ថែមទៀតទើបត្រូវបានរកឃើញ នេះបើតាមរបាយការណ៍ថ្មីរបស់អាជ្ញាធរសុខាភិបាលកូរ៉េខាងត្បូង នៅថ្ងៃទី២៩ ខែកុម្ភៈ ឆ្នាំ២០២០ ។ របាយការណ៍ថ្មីរបស់អាជ្ញាធរសុខាភិបាលកូរ៉េខាងត្បូង ក៏បានឱ្យដឹងដែរថា អ្នកជំងឺសរុប១៦នាក់បានបាត់បង់ជីវិត ដោយសារជំងឺឆ្លង COVID-19 ក្នុងគ្រាដែលរដ្ឋាភិបាលទីក្រុងសេអ៊ូលបាននឹងកំពុងបង្កើនយុទ្ធនាការធ្វើតេស្ត និងព្យាបាលអ្នកឆ្លងទាំងអស់នៅក្នុងទីក្រុងដេគូ និង ខេត្តគ្យុងសាងខាងជើង ។ ស្របពេលជាមួយគ្នានោះដែរ អាជ្ញាធរកូរ៉េខាងត្បូងក៏បានប្រកាសផងដែរថា ប្រទេសសរុបចំនួន៧១ហើយ បានធ្វើការរឹតបន្តឹងការធ្វើដំណើរជាមួយនឹងប្រទេសអាស៊ីបូព៌ាមួយនេះ ដោយសារតែការរីករាលដាលកាន់តែខ្លាំងឡើងនៃមេរោគឆ្លង COVID-19 ៕ធ.ដ

ចិន៖ ចំនួនអ្នកឆ្លងវីរុស COVID-19 សរុបនៅតាមបណ្តាខេត្ត និងតំបន់ចំនួន ៣១នៅទូទាំងប្រទេសចិន បានកើនឡើងដល់៧ម៉ឺន៩ពាន់២៥១ករណី ក្នុងនោះចំនួនអ្នកស្លាប់បានកើនដល់២ពាន់៨៣៨នាក់ នេះបើតាមរបាយការណ៍ថ្មីរបស់អាជ្ញាធរចិននៅថ្ងៃទី២៩ ខែកុម្ភៈ ឆ្នាំ២០២០ ។ នៅថ្ងៃដដែលនេះ អាជ្ញាធរសុខាភិបាលចិនក៏បានរាយការណ៍ឲ្យដឹងផងដែរថា ចំនួនសរុបនៃអ្នកជំងឺដែលបានជាសះស្បើយពីមេរោគ COVID-19 នៅទូទាំងប្រទេសចិន បានកើនឡើងដល់៣ម៉ឺន៩ពាន់៤៩នាក់ហើយ ។ បើតាមរបាយការណ៍ប្រចាំថ្ងៃរបស់គណៈកម្មការសុខាភិបាលជាតិចិន នារយៈពេលពេញមួយថ្ងៃទី២៨ ខែកុម្ភៈនេះ មនុស្សចំនួន២ពាន់៨៨៥នាក់ទៀតបានចាកចេញពីមន្ទីរពេទ្យ ក្រោយពួកគេបានជាសះស្បើយឡើងវិញ ។ ដោយឡែកករណីឆ្លងថ្មីនាថ្ងៃដដែលនោះដែរ មានត្រឹមតែ៤២៣នាក់ ខណៈចំនួនអ្នកស្លាប់គឺ៤៥នាក់ ៕ធ.ដ

ស្វីស៖ ប្រធានអង្គការសុខភាពពិភពលោកWHOលោក ថេដ្រូស អាដាណម ហ្គេ ប្រេយែសឹស បានបញ្ជាក់ក្នុងសន្និសិទកាសែតនៅថ្ងៃទី២៨ ខែកុម្ភៈថា បច្ចុប្បន្ន យើងបានសម្រេចចិត្តបង្កើនការវាយតម្លៃពីហានិភ័យសកលលោក និង ផលប៉ះពាល់បង្កឡើងដោយវីរុស COVID-19 ដល់កម្រិតខ្ពស់បំផុត ។ ទន្ទឹមគ្នា ប្រធានអង្គការសុខភាពពិភពលោករូបនេះបានសង្កត់ធ្ងន់ថា សត្រូវពិតប្រាកដរបស់មនុស្សមិនមែនជាជំងឺ COVID-19 នោះឡើយ ប៉ុន្តែជាភាពភ័យខ្លាច ពាក្យចចាមអារ៉ាម និងការរើសអើងទៅវិញទេ។គួរបញ្ជាក់ថា បច្ចុប្បន្នយើងអាចនិយាយបានថា មេរោគឆ្លង COVID-19 កំពុងរីករាលដាលដល់គ្រប់ទ្វីបរួចទៅហើយ ខណៈប្រទេសមួយចំនួនដូចជា កូរ៉េខាងត្បូង អ៊ីរ៉ង់ និង អ៊ីតាលីហាក់មានសភាពធ្ងន់ធ្ងរឡើងៗ បន្ទាប់ពីប្រទេសចិនបានបង្ហាញសញ្ញាធូរស្រាលបន្តិច ៕ធ.ដ

កូរ៉េខាងជើង៖ ប្រមុខដឹកនាំកំពូលកូរ៉េខាងជើងលោក គីម ជុងអ៊ុន បានចុះត្រួតពិនិត្យ និង បញ្ជាដោយផ្ទាល់សមយុទ្ធយោធាមួយ ដែលផ្ដោតសំខាន់លើវិធីសាស្ត្រចល័ត និង បង្កើនសមត្ថភាពវាយប្រហារលើសត្រូវ ហើយសមយុទ្ធនេះដែរ បានធ្វើឱ្យលោក គីម ពេញចិត្តយ៉ាងខ្លាំង ។ សមយុទ្ធយោធាខាងលើនេះ ត្រូវបានធ្វើឡើងក្នុងគ្រាដែលលោក គីម ជុងអ៊ុន ក៏បានកោះប្រជុំក្រុមមន្ត្រីរបស់លោកផងដែរ សំដៅណែនាំពីការប្រយុទ្ធប្រឆាំងនឹងជំងឺ COVID-19 ជាមួយការព្រមានពី «ផលវិបាកធ្ងន់ធ្ងរ» នៅក្នុងករណីដែលពួកគេបរាជ័យទប់ស្កាត់ជំងឺឆ្លងមួយនេះ ក្នុងនោះរួមមានដូចជាការបង្កើតការត្រួតពិនិត្យនៅតាមតំបន់ព្រំដែន អាកាសយានដ្ឋាន និងកំពង់ផែនៅទូទាំងប្រទេស ។ សូមជម្រាបថា រហូតមកទល់នឹងពេលនេះ ប្រទេសកូរ៉េខាងជើងមិនទាន់ទទួលស្គាល់ករណីឆ្លងជំងឺ COVID-19 ណាមួយនោះទេ បើទោះជាសារព័ត៌មានកូរ៉េខាងត្បូងខ្លះបានចុះផ្សាយថា ជំងឺរលាកសួតដ៏កាចសាហាវនេះបានឆ្លងចូលកូរ៉េខាងជើងរួចទៅហើយ ហើយថែមទាំងសម្លាប់ប្រជាជនកូរ៉េខាងជើងជាច្រើននាក់ផងដែរ ៕ធ.ដ

សហរដ្ឋអាម៉េរិក៖ សហរដ្ឋអាមេរិកបានសម្រេចចិត្តពន្យារពេលរៀបចំកិច្ចប្រជុំកំពូល ជាមួយថ្នាក់ដឹកនាំកំពូលនៃបណ្តាប្រទេសអាស៊ានទាំង១០ ដែលគ្រោងធ្វើឡើងនៅថ្ងៃទី១៤ ខែមីនា ឆ្នាំ២០២០ខាងមុខនេះ នៅទីក្រុងឡាសវេហ្គាស រដ្ឋណេវ៉ាដា ដោយសារការព្រួយបារម្ភកាន់តែខ្លាំងឡើង ចំពោះការរីករាលដាលនៃវីរុស COVID-19 ។ កន្លងមក ប្រធានាធិបតីអាមេរិកលោក ដូណាល់ ត្រាំ បានបញ្ជើញមេដឹកនាំកំពូលនៃបណ្តាប្រទេសអាស៊ានទាំង១០មកជួបលោកនៅទីក្រុងឡាសវេហ្គាស បន្ទាប់ពីលោកបានខកខានមិនបានទៅចូលរួមកិច្ចប្រជុំកំពូលមួយជាមួយអាស៊ាន កាលពីខែវិច្ឆិកា ឆ្នាំ២០១៩ ក្នុងរដ្ឋធានីបាងកក ប្រទេសថៃ ។ សូមបញ្ជាក់ថា ឧបការីរដ្ឋមន្រ្តីការបរទេសទទួលបន្ទុកកិច្ចការអាស៊ី និងប៉ាស៊ីហ្វិករបស់អាមេរិក លោក David Stilwell និង ឧបការីរងរបស់ប្រធានាធិបតីអាមេរិក លោក Matthew Pottinger បានជំរាបជូនឯកអគ្គរាជទូត និងឯកអគ្គរដ្ឋទូតអាស៊ាន តាមរយៈកិច្ចប្រជុំតាមទូរស័ព្ទ (Conference Call) នៅថ្ងៃទី២៨ ខែកុម្ភៈ ឆ្នាំ២០២០ថា លោក ដូណាល់ ត្រាំ បានសម្រេចលើកពេលនៃកិច្ចប្រជុំកំពូលពិសេសអាស៊ាន-សហរដ្ឋអាមេរិក ដើម្បីផ្តោតការយកចិត្តទុកដាក់លើការប្រយុទ្ធប្រឆាំងនឹងការរីករាលដាលនៃជម្ងឺរលាកសួតដ៏កាចសាហាវ Covid-19 ៕ធ.ដ

ស្វីស៖ ប្រធានអង្គការសុខភាពពិភពលោក WHO លោក ថេដ្រូស អាដាណម ហ្គេប្រេយែសឹស បានព្រមាននៅថ្ងៃទី២៧ ខែកុម្ភៈនេះថាការរាលដាលនៃមេរោគឆ្លង COVID-19 នៅខាងក្រៅប្រទេសចិន នៅពេលនេះជាកង្វល់ធំបំផុតរបស់ពិភពលោក ។ ថ្លែងប្រាប់អ្នកយកព័ត៌មាននៅក្នុងសន្និសីទកាសែតប្រចាំថ្ងៃរបស់លោក ក្នុងទីក្រុងហ្ស៊ឺណែវ ប្រទេសស្វីស ថា សហគមន៍សកលស្ថិតនៅចំណុចនៃការធ្វើសេចក្តីសម្រេចធំមួយ ក៏ប៉ុន្តែប្រសិនបើលោកអ្នកចាត់វិធានការខ្លាំងក្លានៅពេលនេះ លោកអ្នកអាចទប់ទល់នឹងជំងឺរលាកសួតដ៏កាចសាហាវមួយនេះបាន ។ ប្រធានអង្គការសុខភាពពិភពលោករូបនេះបន្ថែមទៀតថា លោកអ្នកអាចបញ្ចៀសកុំឱ្យមនុស្សមានជំងឺនេះបាន លោកអ្នកអាចជួយជីវិតមនុស្ស… ។ ការកត់សម្គាល់បែបនេះរបស់លោក ថេដ្រូស អាដាណម ហ្គេប្រេយែសឹស ត្រូវបានធ្វើឡើងស្របពេលដែលអាជ្ញាធរសុខាភិបាលទីក្រុងហុងកុង បានរកឃើញសត្វសុនខមួយក្បាលដែលត្រូវបានគេយកមកធ្វើតេស្តនោះ ពិតជាមានផ្ទុកមេរោគ COVID-19 ប្រាកដមែន ប៉ុន្តែក្រុមជំនាញវេជ្ជសាស្ត្រនៅមិនទាន់អាចបញ្ជាក់ឲ្យច្បាស់លាស់ថា តើសត្វចិញ្ចឹមមួយក្បាលនេះបានឆ្លងជំងឺពីមនុស្សមែន ឬមួយក៏យ៉ាងណានោះទេ ៕