រុស្ស៊ី៖ ប្រធានាធិបតីរុស្ស៊ីលោក វ៉្លាឌីមៀ ពូទីន នៅថ្ងៃទី០៥ ខែកុម្ភៈនេះ (ម៉ោងក្នុងតំបន់) បានថ្លែងអះអាងថា ប្រទេសរបស់លោកបានប្រុងប្រៀបខ្លួនរួចជាស្រេចហើយ ក្នុងការផ្តល់ជំនួយចាំបាច់នានាដល់ប្រទេសចិន ដើម្បីប្រយុទ្ធប្រឆាំងនឹងវីរុសផ្លូវដង្ហើមកូរ៉ូណាថ្មី ។ ប្រធានាធិបតីរុស្ស៊ីរូបនេះបាននិយាយយ៉ាងដូច្នេះថា ប្រទេសចិន និង យើងទាំងអស់គ្នា កំពុងប្រឈមមុខនូវគ្រោះថ្នាក់នៃការរីករាលដាលនៃការឆ្លងវីរុសដ៏កាចសាហាវនេះ ។ លោក ពូទីន បានបន្ថែមទៀតថា អាជ្ញាធរចិនបាននឹងកំពុងចាត់វិធានការយ៉ាងតឹងរ៉ឹង និង ម៉ឹងម៉ាត់បំផុត ដើម្បីបញ្ឈប់ការរីករាលដាលនៃវីរុសកូរ៉ូណា ។ សូមបញ្ជាក់ជាថ្មីថា របាយការណ៍ផ្លូវការពីអាជ្ញាធរចិននៅព្រឹកថ្ងៃទី០៦ ខែកុម្ភៈនេះ បានឲ្យដឹងថា ចំនួនមនុស្សស្លាប់ដោយសារវីរុសកូរ៉ូណាថ្មី 2019-nCoV បានកើនឡើងដល់៥៦៤នាក់ហើយ ខណៈមនុស្សរហូតដល់ ២៨,០៦០នាក់បានឆ្លង ខណៈតួលេខនេះត្រូវបានរំពឹងថា នឹងបន្តកើនឡើងបន្ថែមទៀត ៕  

សហរដ្ឋអាមេរិក៖ ប្រធានសភាតំណាងរាស្ត្រអាមេរិក លោកស្រី ណាន់ស៊ី ផេឡូស៊ី បាននិយាយថា ថ្ងៃនេះ ប្រធានាធិបតី និង បក្សសាធារណរដ្ឋ បានធ្វើឱ្យមានភាពគ្មានច្បាប់ទម្លាប់ ហើយបានបដិសេធប្រព័ន្ធត្រួតពិនិត្យ និង តុល្យភាពនៃរដ្ឋធម្មនុញ្ញរបស់យើង ។ ការលើកឡើងបែបនេះរបស់លោកស្រី ផេឡូស៊ី ធ្វើឡើងក្រោយសមាជិកព្រឹទ្ធ សភាបានបោះឆ្នោតលុបចោលការចោទប្រកាន់ពីបទរំលោភអំណាច ក្នុងសំឡេង៥២ទល់នឹង៤៨សំឡេង និង បទចោទប្រកាន់បង្កការរាំងស្ទះដល់ការងារស៊ើបអង្កេតរបស់សភាក្នុងសំឡេង៥៣ទល់នឹង៤៧សំឡេង ។លោកស្រី ផេឡូស៊ី បានសង្កត់ធ្ងន់ថា លោកប្រធានាធិបតីនៅតែជាការគំរាមកំហែងចំពោះលទ្ធិប្រជាធិបតេយ្យរបស់អាមេរិក ដោយការទទូចរបស់លោកថា លោកស្ថិតនៅលើច្បាប់ ហើយថា លោកអាចធ្វើឱ្យខូចដល់ការបោះឆ្នោត ប្រសិនបើលោកចង់ ។ សូមបញ្ជាក់ថា សារព័ត៌មាន CNN ដោយផ្អែកលើមនុស្សម្នាក់ ដែលបានចូលរួមក្នុងកិច្ចប្រជុំបិទទ្វារមួយរបស់សមាជិកសភាតំណាងរាស្ត្របក្សប្រជាធិបតេយ្យ នៅព្រឹកថ្ងៃទី០៥ ខែកុម្ភៈនេះ (ម៉ោងក្នុងតំបន់) បានចុះផ្សាយថា នៅក្នុងជំនួបនោះលោកស្រី ផេឡូស៊ី បានហៅសុន្ទរកថាលោក ត្រាំ គឺជារឿងដ៏អាម៉ាស់ និងពោរពេញដោយការកុហុកជាច្រើន លោកស្រីថា លោក ត្រាំ បានកាត់ចោលការពិតចេញ…

អង់គ្លេស៖ នាយករដ្ឋមន្ដ្រីអង់គ្លេសលោក បូរីស ចនសុន បានប្រកាសថា ប្រទេសរបស់លោកនឹងហាមឃាត់ការលក់រថយន្តម៉ាស៊ីនសាំង និងប្រេងម៉ាស៊ូតថ្មីចាប់ពីឆ្នាំ ២០៣៥ តទៅ។ ការប្រកាសរបស់លោក ចនសុន ដែលបានធ្វើឡើងនៅក្នុងព្រឹត្តិការណ៍ស្តីពីការប្រែប្រួលអាកាសធាតុ COP26 ដែលអង់គ្លេសធ្វើជាម្ចាស់ផ្ទះនេះ បានកាត់បន្ថយចំនួន០៥ឆ្នាំពីកាលបរិច្ឆេទដើម ដែលថា នឹងហាមឃាត់ការលក់រថយន្តទាំងនេះនៅឆ្នាំ ២០៤០ ហើយផែនការថ្មីនេះត្រូវបានរួមបញ្ចូលទាំងរថយន្តកូនកាត់ផងដែរ ។ នាយករដ្ឋមន្រ្តីអង់គ្លេសរូបនេះបាននិយាយថា ការរៀបចំ COP26 គឺជាឱកាសដ៏សំខាន់មួយសម្រាប់អង់គ្លេស និងប្រទេសជាច្រើនទូទាំងពិភពលោក ដើម្បីបង្កើនល្បឿនក្នុងការប្រយុទ្ធប្រឆាំងការប្រែប្រួលអាកាសធាតុ ។ លោកបញ្ជាក់ថា ឆ្នាំ២០២០ ត្រូវតែជាឆ្នាំដែលយើងផ្លាស់ប្តូរចំពោះការឡើងកម្ដៅលើពិភពលោក… វានឹងជាឆ្នាំដែលយើងជ្រើសរើសអនាគតកាន់តែស្អាត កាន់តែបៃតងសម្រាប់ទាំងអស់គ្នា ។ ជាមួយគ្នានេះ លោក ចនសុន ក៏នឹងជំរុញឲ្យប្រទេសផ្សេងទៀតចូលរួមជាមួយ អង់គ្លេស ក្នុងការព្យាយាមឆ្ពោះទៅទិសដៅការបំភាយឧស្ម័នសូន្យត្រឹមឆ្នាំ ២០៥០ តាមរយៈការវិនិយោគលើបច្ចេកវិទ្យាកាន់តែស្អាត និងកិច្ចប្រឹងប្រែងការពារជម្រកធម្មជាតិ ។ គួរបញ្ជាក់ផងដែរថា អង់គ្លេសបានសន្យាថា នឹងកាត់បន្ថយការបំភាយឧស្ម័នផ្ទះកញ្ចក់ឲ្យដល់កម្រិតសូន្យត្រឹមឆ្នាំ ២០៥០ ជាមួយនឹងវិធានការចម្រុះនៃការកាត់បន្ថយ និងការប៉ះប៉ូវការបំពុលខ្យល់ដូចជាការដាំដើមឈើជាដើម ៕ធ.ដ …

អង្គការសុខភាពពិភពលោក ហៅកាត់ថា WHO កាលពីថ្ងៃពុធ ទី៥ កុម្ភៈ ម្សិលមិញ បានអំពាវនាវរកជំនួយមនុស្សធម៌ ៦៧៥លានដុល្លារអាម៉េរិក សម្រាប់ផែនការប្រយុទ្ធប្រឆាំងនឹងជំងឺរលាកសួត បង្កដោយវីរុសកូរ៉ូណាថ្មី ជាពិសេស ចំណាយសម្រាប់បណ្តាប្រទេសដែលគិតថា មានហានិភ័យខ្ពស់។ អគ្គលេខាធិការអង្គការ WHO លោក Tedrosបាននិយាយក្នុងសន្និសីទសារព័ត៌មាននៅស្វីសថា «ថ្ងៃនេះ ពួកយើងសូមប្រកាសដាក់ចេញយុទ្ធសាស្ត្រ និងផែនការឆ្លើយតប ដោយពួកយើងស្នើឲ្យមានកញ្ចប់ថវិកា ៦៧៥លានដុល្លារអាម៉េរិក ដើម្បីជួយដល់ផែនការ៣ខែបន្ទាប់ សាររបស់ពួកយើងសម្រាប់សហគមអន្តរជាតិគឺវិនិយោគនៅថ្ងៃនេះ ឬក៏ចំណាយថែមទៀត ពេលក្រោយ»។ លោកបញ្ជាក់ទៀតថា ៦០លានដុល្លារនៃមូលនិធិនេះនឹងប្រើប្រាស់សម្រាប់ប្រតិបត្តិការ WHO ខណៈដែលនៅសេសសលគឺសម្រាប់បណ្តាប្រទេសដែលត្រូវការជំនួយ ទប់ស្កាត់វីរុសមរណៈមួយនេះ៕

ក្រសួងសុខាភិបាលប្រទេសសិង្ហបុរីបានអះអាងកាលពីថ្ងៃទី៥ កុម្ភៈ ម្សិលមិញថា មានការរកឃើញអ្នកមានជំងឺរលាកសួត បង្កដោយវីរុសកូរ៉ូណាថ្មីចំនួន៤នាក់ទៀត ក្នុងនោះ ក្នុងចំណោម៤នាក់នេះ មានម្នាក់គឺជាទារក វ័យ៦ខែ នេះបើតាមការចេញផ្សាយរបស់សារព័ត៌មានសិង្ហបុរី Channel News Asia។ គិតត្រឹមរសៀលថ្ងៃពុធម្សិលមិញ មានមនុស្ស២៨នាក់ហើយនៅក្នុងប្រទេសសិង្ហបុរីដែលបានឆ្លងវីរុសមួយនេះហើយសម្រាប់៤ករណីថ្មីទើបរកឃើញនេះ ក្រសួងសុខាភិបាលថា ៣នាក់ឆ្លងក្នុងស្រុក ហើយម្នាក់ទៀតនាំចូល សំដៅលើស្ត្រីទេសចរចិនម្នាក់មកពីក្រុងអ៊ូហាន។ ក្នុងចំណោមនេះ មានទារកអាយុ៦ខែម្នាក់ គឺជាកូនរបស់ប្តីប្រពន្ធមួយគូជនជាតិសិង្ហបុរី ដែលហើយពួកគេត្រូវបានបញ្ជូនទៅសម្រាកព្យាបាល នៅក្នុងបន្ទប់ដាច់ដោយឡែក៕

សហរដ្ឋអាម៉េរិក៖ លោក ដូណាល់ ត្រាំ នៅតែអាចរក្សាតំណែងជាប្រធានាធិបតីអាម៉េរិកដដែល ក្រោយព្រឹទ្ធសភាសម្រេចចិត្តបោះឆ្នោតមិនទម្លាក់រូបលោកចេញពីតំណែង ។ សម្រាប់ការបោះឆ្នោតសម្រេចនៅថ្ងៃទី០៥ ខែកុម្ភៈនេះ (ម៉ោងក្នុងតំបន់) សមាជិកព្រឹទ្ធសភាបានបោះឆ្នោតលុបចោលការចោទប្រកាន់ពីបទរំលោភអំណាច ក្នុងសំឡេង៥២ទល់នឹង៤៨សំឡេង និង បទចោទប្រកាន់បង្កការរាំងស្ទះដល់ការងារស៊ើបអង្កេតរបស់សភាក្នុងសំឡេង៥៣ទល់នឹង៤៧សំឡេង ។ តាមរយៈការសម្រេចរបស់ព្រឹទ្ធសភាខាងលើ លោក ដូណាល់ ត្រាំ បានក្លាយជាប្រធានាធិបតីទី០៣នៅក្នុងប្រវត្តិសាស្ត្រអាម៉េរិក ដែលគេចផុតពីការដកតំណែងបន្ទាប់ពីលោក ប៊ីល គ្លីនតុន និងលោក អែនឌ្រូ ចនសុន ៕

ចិន៖ របាយការណ៍ផ្លូវការពីអាជ្ញាធរចិននៅព្រឹកថ្ងៃទី០៦ ខែកុម្ភៈនេះបានឲ្យដឹងថា ចំនួនមនុស្សស្លាប់ដោយសារវីរុសកូរ៉ូណាថ្មី 2019-nCoV បានកើនឡើងដល់៥៦៤នាក់ហើយ ខណៈមនុស្សរហូតដល់ ២៨,០៦០នាក់បានឆ្លង។ជាមួយគ្នានេះ ចំនួនអ្នកជំងឺដែលបានជាសះស្បើយ និងត្រូវបានក្រុមគ្រូពេទ្យ អនុញ្ញាតឲ្យត្រឡប់ទៅផ្ទះវិញនោះ បានកើនឡើងដល់១,១៥៣នាក់ហើយ ខណៈកាលពីថ្ងៃទី០៥ខែកុម្ភៈនេះ មានអ្នកជាសះស្បើយបន្ថែមទៀតរហូតដល់២៦១នាក់ ។ ឆ្លើយតបនឹងការកើនឡើងនៃអ្នកជំងឺខាងលើនេះ អាជ្ញាធរចិនបានយកទីតាំងមជ្ឈមណ្ឌលធំៗចំនួន៣កន្លែង ក្នុងនោះរួមមានពហុកីឡាដ្ឋាន ហុងសាន ទីតាំងមជ្ឈមណ្ឌលពិព័រណ៌អន្តរជាតិវូហាន និង អគារវប្បធម៌ជាតិមួយកន្លែង ធ្វើការផ្លាស់ប្តូរទៅជាមន្ទីរពេទ្យសម្រាកបណ្តោះអាសន្ន ដើម្បីទទួលព្យាបាលអ្នកជំងឺផ្ទុកវីរុសកូរ៉ូណាក្នុងទីក្រុងវូហាន ។សូមបញ្ជាក់ថា បណ្ដុំទីតាំងមន្ទីរពេទ្យបណ្តោះអាសន្នទាំងបីខាងលើនេះ នឹងត្រូវរៀបចំបង្កើតឡើងឲ្យមានសម្ភារបរិក្ខារ ដែលអាចផ្ទុកអ្នកជំងឺបានទាំងអស់សរុបចំនួន ៣.៨០០គ្រែ ៕

ហុងកុង៖ ភ្ញៀវទេសចរ១.៨៧១នាក់ ត្រូវបានគេបង្គាប់ឱ្យស្ថិតនៅលើកប៉ាល់ដឹកអ្នកដំណើរមួយគ្រឿង ជាបណ្ដោះអាសន្នក្នុងទីក្រុងហុងកុង និងកំពុងទទួលការពិនិត្យសុខភាពរកវីរុសកូរ៉ូណាថ្មី ក្រោយមនុស្សជាច្រើននាក់ត្រូវគេសង្ស័យថាមានរោគសញ្ញានៃវីរុសដ៏កាចសាហាវនេះ ។ កប៉ាល់ដែលគេឃាត់ទុកនេះមានឈ្មោះថា World Dream និងប្រតិបត្តិការដោយក្រុមហ៊ុន Genting’s Dream ត្រូវបានហាមទម្លាក់ចុះអ្នកដំណើរនៅឯផែ Kai Tak រហូតទាល់តែការធ្វើតេស្ដលើមនុស្ស៣នាក់ ដែលគេសង្ស័យថា បានឆ្លងវីរុសកូរ៉ូណាបញ្ចប់ជាមុនសិន ។ បើតាមទីភ្នាក់ងារព័ត៌មាន Reuters មនុស្សទាំងបីនាក់នេះ គឺមកពីចិនដីគោក ដែលធ្លាប់បានជិះនៅលើកប៉ាល់ World Dream នៅចន្លោះពីថ្ងៃទី២៩ និងថ្ងៃទី២៤ ខែមករាផងដែរនោះ ត្រូវបានគេពិនិត្យឃើញថាបានឆ្លងវីរុសកូរ៉ូណា ។ ប៉ុន្តែខាងកប៉ាល់ World Dream បានអះអាងថា បច្ចុប្បន្នមិនមានអ្នកដំណើរណាម្នាក់នៅលើកប៉ាល់មកពីចិនដីគោកឡើយ ។ កប៉ាល់នេះបានចេញដំណើរពីកោះតៃវ៉ាន់ ហើយមកដល់ទីក្រុងហុងកុង នៅថ្ងៃ០៥ ខែកុម្ភៈនេះ ៕

តួកគី៖ រដ្ឋមន្ត្រីក្រសួងសុខាភិបាលតួកគីលោក Fahrettin Koca បានលើកឡើងថា យន្ដហោះដឹកអ្នកដំណើរមួយនៃក្រុមហ៊ុនអាកាសចរណ៍ Pegasus Airlines ដែលហោះមកកាន់អាកាសយានដ្ឋាន Sabiha Gokcen នៅទីក្រុងអ៊ីស្តង់ប៊ុល បានរអិលចេញពីផ្លូវចុះចតដែលសើមរអិល ហើយបានបាក់ជា៣បំណែក បន្ទាប់ពីវាចុះចតកាលពីថ្ងៃទី០៥ខែកុម្ភៈនេះ បណ្តាឱ្យមនុស្ស៣នាក់ស្លាប់ និង១៧៩នាក់ផ្សេងទៀតរងរបួស ។ រដ្ឋមន្ត្រីក្រសួងសុខាភិបាលតួកគីរូបនេះបានគូសបញ្ជាក់ថា មនុស្ស៣នាក់បានបាត់បង់ជីវិតនៅមន្ទីរពេទ្យបន្ទាប់ពីឧបទ្ទវហេតុនេះ លោកបន្ថែមទៀតថា មនុស្ស១៧៩នាក់ផ្សេងទៀត ក្នុងចំណោមអ្នកដំណើរ១៨៣នាក់ និង សមាជិកអាកាសយានិកនៅលើយន្តហោះនេះបានរងរបួស ។ ដោយឡែកអភិបាលក្រុងអ៊ីស្តង់ប៊ុលបាននិយាយថា នៅមុនពេលកើតហេតុការណ៍នេះ យន្តហោះខាងលើ បានហោះចេញពីខេត្ត Izmir ភាគខាងលិចនៃប្រទេសតួកគី ។ យន្តហោះនេះ មិនអាចទប់លំនឹងនៅលើផ្លូវចុះចត ដោយសារអាកាសធាតុអាក្រក់ ហើយបានរអិលចេញពីផ្លូវចុះចតនោះ ចម្ងាយប្រហែល៦០ម៉ែត្រ ។ យន្តហោះ Boeing 737-86J នេះ បានបាក់បែកជា៣បំណែកនៅខាងចុងផ្លូវ នៃផ្លូវចុះចតដែលសើមនេះ ហើយពួកអ្នកដំណើរត្រូវបានជម្លៀសចេញពីកន្លែងនោះ ៕

រុស្ស៊ី៖ នៅត្រឹមចុងឆ្នាំ២០២១ខាងមុខនេះ ឥណ្ឌានឹងទទួលបានប្រព័ន្ធមីស៊ីលការ ពារដែនអាកាស S-400 ពីរុស្ស៊ី ស្របពេលដែលសហរដ្ឋអាម៉េរិកបានព្រមានថា នឹងដាក់ទណ្ឌកម្មសេដ្ឋកិច្ចលើបណ្ដាប្រទេសដែលទិញអាវុធពីទីក្រុងមូស្គូ ។សារព័ត៌មាន RIA Novosti ធ្វើសេចក្ដីរាយការណ៍ខាងលើ ដោយផ្អែកលើប្រភពបានមកពីនាយករងសេវាកម្មសហព័ន្ធ សម្រាប់កិច្ចសហប្រតិបត្តិការបច្ចេកទេសយោធារុស្ស៊ី លោក Vladimir Drozhzhov ដែលថ្លែងនៅឯពិធីតាំងពិព័រណ៍សព្វាវុធឆ្នាំ២០២០ នៅឯទីក្រុង Lucknow ប្រទេសឥណ្ឌា នាពេលថ្មីៗនេះ ។ សូមរំលឺកផងដែរថា ឥណ្ឌាបានចុះហត្ថលេខាទិញប្រព័ន្ធមីស៊ីលការពារដែនអាកាស S-400 មានតម្លៃ៥ពាន់លានដុល្លារអាម៉េរិកពីរុស្ស៊ីកាលពីឆ្នាំ២០១៨ ។ ប៉ុន្តែទន្ទឹមគ្នា សហរដ្ឋអាម៉េរិកក៏បានព្រមានឥណ្ឌាដែរថា អាចនឹងប្រឈមមុខជាប់ទណ្ឌកម្ម បើហ៊ានទិញប្រព័ន្ធមីស៊ីល S-400 ពីរុស្ស៊ីមែននោះ ៕