ជប៉ុន៖  តួលេខជនរងគ្រោះបាត់បង់ជីវិត នៅក្នុងគ្រោះរញ្ជួយដីកម្រិត៦.១រ៉ិចទ័រ ដែលបានវាយប្រហារខេត្តអូសាកា ភាគខាងលិចប្រទេសជប៉ុននោះ បានបន្តកើន ឡើងដល់៤នាក់ហើយ និងមនុស្សជាង៣៨០នាក់ផ្សេងទៀតទទួលរងរបួស ខណៈ មានការព្រមានថា គ្រោះធម្មជាតិនេះ អាចនឹងកើតឡើងទៀតនៅទីតំាំងដដែល ។ បើតាមប្រព័ន្ធផ្សាយជប៉ុន គ្រោះរញ្ជួយដីកម្រិតកម្រិតធ្ងន់ដែលមានជម្រៅ១០គីឡូ ម៉ែត្រក្រោមផ្ទៃដីនេះ ពុំបានបង្កជារលកយក្សស៊ូណាមិនោះឡើយ តែវាបានបង្កការ ខូចខាតធ្ងន់ធ្ងរដល់ហេដ្ឋារចនាសម្ព័ន្ធជារួមនៅក្នុងតំបន់ ។ ហើយគ្រោះមហន្តរាយ នេះដែរ ក៏បានបង្ខំអោយរោងចក្រជាច្រើននៅក្នុងតំបន់ផ្អាកសកម្មភាពរបស់ខ្លួនជា បណ្ដោះអាសន្ន ដោយឡែកសេវាកម្មរថភ្លើងជាច្រើនបានបើកដំណើរការឡើងវិញ ហើយ ។ សូមបញ្ជាក់ថា គ្រោះរញ្ជួយដីនៅជប៉ុន តែងតែកើតឡើងជាញឹកញប់មានទាំងកំរិត ធ្ងន់ និងស្រាល ដោយសារតែប្រទេសមួយនេះស្ថិតនៅលើខ្សែក្រវាត់ភ្លើង ដែល លាតសន្ធឹងពីតំបន់ប៉ាស៊ីហ្វិកខាងត្បូងកាត់តាមឥណ្ឌូនេស៊ី និងជប៉ុន ទៅដល់ អាឡាស់កា នៅភាគខាងជើងប៉ាស៊ីហ្វិក ហើយចាក់ចុះមកឆ្នេរអាមេរិកខាងជើង កណ្ដាល និងខាងត្បូងថែមទៀត ៕

សហរដ្ឋអាមេរិក៖ ប្រធានាធិបតីអាមេរិក លោក ដូណាល់ ត្រាំ បានអះអាងក្នុងថ្ងៃ ច័ន្ទ ដើមសប្តាហ៍នេះថា រូបលោកបានដាក់ចេញនូវបទបញ្ជាអោយបង្កើតកងអង្គ ភាពទី៦ នៃកងកម្លាំងប្រដាប់អាវុធរបស់សហរដ្ឋអាមេរិក ដែលផ្តោតសំខាន់លើការ ការពារទីអវកាស ។ បច្ចុប្បន្នអង្គភាពទាំង៥នៃកងកម្លាំងប្រដាប់អាវុធរបស់សហ រដ្ឋអាមេរិក រួមមាន៖ កងទ័ពជើងគោក កងនាវាចម្បំាង កងទ័ពជើងទឹក កងទ័ព អាកាស និងកងឆ្មាំការពារដែនសមុទ្រ ។ ថ្លែងក្នុងកិច្ចប្រជុំមួយរបស់ក្រុមប្រឹក្សាអវកាសជាតិអាមេរិក លោក ដូណាល់ ត្រាំ បានគួសបញ្ជាក់ថា រូបលោកបានបង្គាប់អោយក្រសួងការពារជាតិទាំងមូល និងមន្ទីរបញ្ចកោណធ្វើការចាប់ផ្តើមភ្លាមៗនូវដំណើរការចំបាច់ផ្សេងៗ សម្រាប់ការបង្កើត យោធាការពារទីអវកាស ។ ប្រធានាធិបតីអាមេរិករូបនេះ បានសង្កត់ធ្ងន់ថា កងទ័ពថ្មីនេះ គឺមានលក្ខណៈដាច់ដោយឡែក ប៉ុន្តែស្មើភាពជាមួយកងទ័ពអាកាសអាមេរិក ហើយថា វាមិនទាន់គ្រប់ គ្រាន់នោះទេ ដោយត្រឹមតែមានវត្តមានអាមេរិកនៅទីអវកាស គឺយើងត្រូវមាន អំណាចរបស់អាមេរិកនៅក្នុងទីអវកាសផងដែរ ៕

ចិន៖ រដ្ឋាភិបាលក្រុងប៉េកំាងបានបន្តធ្វើការសងសឹក ចំពោះការគំរាមកំហែងផ្នែក សេដ្ឋកិច្ចបែបឯតោភាគីរបស់ប្រធានាធិបតីអាមេរិកលោក ដូណាល់ ត្រាំ តាម រយៈការព្រមានបង្កើនពន្ធថ្មីទៀតទៅលើឧស្ម័នធម្មជាតិ និងប្រេងឆៅ ព្រមទាំង ផលិតផលផ្នែកថាមពលជាច្រើនផ្សេងទៀត ។ យោងតាមស្ថិតិរបស់ក្រសួងថាមពលអាមេរិក បានអោយដឹងថា ចិនធ្វើការនាំ ចូលប្រេងឆៅប្រមាណ៣៦៣.០០០បារ៉ែលជារៀងរាល់ថ្ងៃពីសហរដ្ឋអាមេរិក និង ប្រហែលជា២០០.០០០បារ៉ែលនៃអនុផលប្រេងដទៃៗទៀតក្នុងមួយថ្ងៃ ។ ដូច្នេះ សង្គ្រាមពាណិជ្ជកម្មរវាងសហរដ្ឋអាមេរិក និងចិន បាននឹងកំពុងធ្វើអោយក្រុម ហ៊ុនតូចធំៗក្នុងប្រទេសទាំងពីរមានការព្រួយបារម្ភ និងជម្រញអោយបញ្ឈប់ផង ដែរ ដោយសារទង្វើនេះនឹងបង្កការខាតបង់ទាំងសងខាង ។សូមជម្រាបថា ចិនបានគំរាមដំឡើងពន្ធលើផលិតផលផ្នែកថាមពលរបស់សហ រដ្ឋអាមេរិក ដើម្បីជាការឆ្លើយតបចំពោះការបង្កើនពន្ធលើទំនិញចិនក្នុងទំហំជាទឹក ប្រាក់៥០ពាន់លានដុល្លារអាមេរិក ដែលត្រូវបានដាក់ចេញដោយប្រធានាធិបតីអាមេរិក លោក ដូណាល់ ត្រាំ ។ ហើយការដំឡើងពន្ធរបស់ចិននេះដែរ នឹងដាក់ កំហិតមិនអោយក្រុមហ៊ុនចម្រាញ់វត្ថុធាតុដើមចិន ធ្វើការទិញឧស្ម័នធម្មជាតិ ឬ ប្រេងឆៅរបស់សហរដ្ឋអាមេរិកឡើយ ដែលជាហេតុអាចបង្កឲ្យមានការប៉ះពាល់ជាខ្លាំងដល់ទីផ្សារថាមពលសហរដ្ឋអាមេរិក ៕

ឥណ្ឌា៖ រដ្ឋាភិបាលឥណ្ឌានឹងផ្អាកសម្បទានពាណិជ្ជកម្មជាមួយសហរដ្ឋអាមេរិក ហើយថែមទំាងសម្រេចដំឡើងពន្ធនាំចូលលើផលិតផលចំនួន៣០មុខរបស់មហាអំណាចនេះរហូតដល់៥០ភាគរយផងដែរ ដើម្បីជាការឆ្លើយតបទៅនឹងការដំឡើង ពន្ធនាំចូលលើកដែកថែប និងអាលុយមីញ៉ូមរបស់ប្រធានាធិបតីអាមេរិក លោក ដូណាល់ ត្រាំ ។ រដ្ឋាភិបាលឥណ្ឌាកាលពីពេលថ្មីៗកន្លងទៅនេះ បានផ្ញើលិខិតមួយទៅកាន់អង្គការ ពាណិជ្ជកម្មពិភពលោក ហៅកាត់ថា WTO ដើម្បីបញ្ជាក់ប្រាប់ពីគំរោងដំឡើងពន្ធ របស់ខ្លួន ដែលគិតជាសរុបគំរោងដំឡើងពន្ធនេះ លើមុខផលិតផលសហរដ្ឋអាមេ រិក៣០មុខ ដែលមានតម្លៃគិតជាប្រាក់ស្មើនឹងជាង២៤០លានដុល្លារអាមេរិក ។យោងតាមបញ្ជីផលិតផលដែលត្រូវដំឡើងពន្ធរបស់រដ្ឋាភិបាលឥណ្ឌា បានអោយ ដឹងថា ផលិតផលនាំចូលពីសហរដ្ឋអាមេរិក៣០មុខនឹងត្រូវជាប់កាតព្វកិច្ចដំឡើង ពន្ធ ហើយក្នុងនោះការដំឡើងពន្ធ៥០ភាគរយ នឹងត្រួវអនុវត្តលើម៉ូតូមានកម្លំាង ចាប់ពី៨០០ccឡើងទៅ ស្របពេលដែលផ្លែប៉ោមជាប់ពន្ធ២៥ភាគរយ ព្រមទំាង ផ្លែ almonds និងផ្លែ walnuts ២០ភាគរយ ៕

(ហ្គាហ្សា)៖ កងយន្តហោះចម្បំាងអ៊ីស្រាអ៊ែលជាច្រើនគ្រឿង បានបើកការវាយ ប្រហារតាមផ្លូវអាកាសដ៏ក្តៅគគុកមួយ ទៅលើមូលដ្ឋានយោធាចំនួន៩កន្លែងដែល ស្ថិតនៅក្នុងទីតាំងយុទ្ធសាស្ត្រចំនួន៣ធំៗ នៅភាគខាងជើងតំបន់ ហ្គាហ្សាស្ទ្រីព ។ ស្របពេលជាមួយគ្នានេះដែរ កងកម្លាំងស្វ័យការពារអ៊ីស្រាអ៊ែល បានគួសបញ្ជាក់ ថា ទីតាំងដែលពួកគេបើកការវាយប្រហារនោះ គឺជាតំបន់គ្រប់គ្រងដោយក្រុមហាម៉ាស់ ហើយរហូតមកទល់ពេលនេះ មិនទាន់មានសេចក្តីរាយការណ៍អំពីការខូច ខាត ឬក៏ចំនួនមនុស្សរងគ្រោះនៅឡើយនោះទេ ។ការវាយប្រហាររបស់កងយន្តហោះចម្បាំងអ៊ីស្រាអ៊ែល គឺធ្វើឡើងដើម្បីឆ្លើយតបទៅ នឹងការបង្ហោះខ្លែង និងបាឡុងផ្ទុកគ្រាប់បែក ដែលអ៊ីស្រាអ៊ែលអះអាងថា បានហោះចេញពីតំបន់ហ្គាហ្សា និងធ្លាក់លើទឹកដីអ៊ីស្រាអ៊ែល ខណៈអ៊ីស្រាអ៊ែលក៏បានព្រមានផងដែរថា ទង្វើភេរវកម្មបែបនេះ នឹងទទួលបានការវាយប្រហារតបទៅវិញរឹតតែធ្ងន់ ៕

កូរ៉េខាងត្បូង៖ រដ្ឋមន្រ្តីការបរទេសកូរ៉េខាងត្បូង លោកស្រី កាង គ្យុងវ៉ា បានលើក ឡើងថា ប្រទេសលោកស្រីបានដាក់គោលដៅនឹងសម្រេចឲ្យបាននូវការបិទបញ្ចប់ ជាផ្លូវការនៅចុងឆ្នាំ២០១៨នេះ ចំពោះកិច្ចព្រមព្រៀងសន្តិភាពនៃសង្រ្គាមកូរ៉េ ដែលបានកើតឡើងពីឆ្នាំ១៩៥០ ដល់ឆ្នាំ១៩៥៣ ដែលកាលនោះវាបានបញ្ឈប់ទៅ តាម រយៈបទឈប់បាញ់គ្នាប៉ុណ្ណោះ ។ ប្រធានាធិបតីកូរ៉េខាងត្បូងលោក មូន ជែអ៊ីន នាពេលថ្មីៗនេះ បានសង្ឃឹមថា ជំនួប កំពូលរវាងអាមេរិក-កូរ៉េខាងជើង ដែលទើបបញ្ចប់ទៅនោះ នឹងជួយត្រួសត្រាយផ្លូវ ឆ្ពោះទៅរកការរំសាយអាវុធនុយក្លេអ៊ែរទាំងស្រុង ព្រមទាំងសន្តិភាពពេញលេញនៅ ក្នុងតំបន់ ក្រោយពីលោក ត្រាំ និងលោក គីម បានជួបគ្នានៅកោះ សេនតូសា របស់សិង្ហបុរី ហើយបានចុះហត្ថលេខាលើសេចក្តីថ្លែងការណ៍រួម ដែលបង្ហាញពីការប្តេជ្ញាចិត្តរៀងៗខ្លួន ដើម្បីចាប់ផ្តើមទំនាក់ទំនងថ្មី និងកសាងសន្តិភាពយូរអង្វែងនៅលើ ឧបទ្វីបកូរ៉េ ។ប្រមុខដឹកនំាកំពូលកូរ៉េខាងជើង លោក គីម ជុងអ៊ុន បានបើកកិច្ចប្រជុំមួយជាប្រវត្តិ សាស្រ្តកាលពីខែមេសាកន្លងទៅនេះ ជាមួយប្រធានាធិបតីកូរ៉េខាងត្បូង លោក មូន ជែអ៊ីន ដោយមេដឹកនាំទាំងពីរបានព្រមព្រៀងគ្នាសហការដើម្បីដោះស្រាយភាព តានតឹងទ្វេភាគីដោយសន្តិវិធី ។ ជាមួយគ្នានេះ រដ្ឋមន្រ្តីការបរទេសកូរ៉េខាងត្បូង…

ក្រុមប្រឹក្សាជាតិរៀបចំការបោះឆ្នោតកូឡុំប៊ី ហៅកាត់ថា CNE បានចេញលទ្ធផលជា ផ្លូវការថា លោក អ៊ីវ៉ាន់ ឌូកេ បានទទួលជ័យជម្នះក្នុងការបោះឆ្នោតជុំចុងក្រោយ ដើម្បីជ្រើសរើសជាប្រធានាធិបតីថ្មី ជាមួយសំឡេងគាំទ្រ៥៤ភាគរយ បន្ទាប់ពីពី សន្លឹកឆ្នោតជាង៩៩ភាគរយត្រូវបានរាប់ ។ បេក្ខភាពដែលអ្នកនយោបាយស្តាំនិយមមានវ័យ៤១ឆ្នាំរូបនេះ នឹងត្រូវស្បថចូល កាន់តំណែងជាផ្លូវការនៅខែសីហាខាងមុខ បន្តពីប្រធានាធិបតីចប់អាណត្តិលោក ចូអាន ម៉ានូអែល សាន់តូស ដែលជាអ្នកសម្រេចបាននូវកិច្ចព្រមព្រៀងសន្តិភាព ជាមួយក្រុមឧទ្ទាម ហ្វាក់ និងទទួលបានពានរង្វាន់ណូប៊ែលសន្តិភាព ដោយសារតែកិច្ចខិតខំប្រឹងប្រែងនេះថែមទៀតផង ។សូមជម្រាបថា លោក អ៊ីវ៉ាន់ ឌូកេ នឹងក្លាយជាប្រធានាធិបតីវ័យក្មេងជាងគេរបស់ ប្រទេសកូឡុំប៊ី គិតចាប់តាំងពីឆ្នាំ១៨៧២មក ក្រោយរូបលោកទទួលបានសំឡេង ឆ្នោតគាំទ្រចំនួន១០,៣៤០,៣១៣សន្លឹក ខណៈគូប្រជែងរបស់លោក ដែលជាអ្នកឆ្វេងនិយម គឺលោក ហ្គូស្តាវ៉ូ ផេត្រូ ឈរនៅលេខរៀងទីពីរ ជាមួយសំឡេងគាំទ្រ ៤១.៨៣ភាគរយ ដែលស្មើនឹង៨.០១៦.៤០២សន្លឹកឆ្នោត ៕

សហរដ្ឋអាមេរិក៖ ហេតុការណ៍បាញ់ប្រហារថ្មីមួយទៀត បានផ្ទុះឡើងនៅមហោ ស្រពសិល្បៈមួយកន្លែង ស្ថិតនៅភាគខាងកើតទីក្រុងទ្រែនតុន រដ្ឋញ៊ូជឺស៊ី នៅព្រឹក ថ្ងៃ អាទិត្យ សប្តាហ៍មុននេះ (ម៉ោងក្នុងតំបន់) បណ្តាលអោយមនុស្ស២២នាក់ទទួល រងរបួស ខណៈខ្មាន់កំាភ្លើងម្នាក់ត្រូវបានបាញ់អោយស្លាប់ ។យោងតាមប្រភពរបស់អាជ្ញាធរក្នុងតំបន់ បានបញ្ជាក់ថា នៅក្នុងករណីផ្ទុះប្រដាប់ អាវុធនេះដែរ មានមនុស្សជាច្រើននាក់ត្រូវបានបញ្ជូនទៅកាន់មន្ទីរពេទ្យ ស្របពេល ដែលបុរសជាជនសង្ស័យម្នាក់អាយុ៣៣ឆ្នាំត្រូវបានបាញ់សម្លាប់ និងជនសង្ស័យផ្សេងទៀតត្រូវចាប់ខ្លួន ហើយអាវុធជាច្រើនក៏ត្រូវគេរកឃើញនៅហ្នឹងកន្លែងហេតុ ។ដោយឡែកក្រុមប៉ូលីសបានអះអាងដែរថា មនុស្សប្រមាណជាង១.០០០នាក់ត្រូវគេជឿជាក់ថា ស្ថិតនៅក្នុងសាលមហោស្រពមួយនេះ ពេលករណីបាញ់ប្រហារផ្ទុះ ឡើង ប៉ុន្តែមិនទាន់មានការបញ្ជាក់ពីមូលហេតុ នៃការបាញ់ប្រហារនេះនៅឡើយទេ ហើយអាជ្ញាធរក៏កំពុងបើកការស៊ើបអង្កេត ថាតើជនសង្ស័យខាងលើនេះ ត្រូវបានប៉ូលីសបាញ់សម្លាប់ ឬជនសង្ស័យដទៃជាអ្នកបាញ់សម្លាប់ ៕

កូរ៉េខាងត្បូង៖ រដ្ឋាភិបាលក្រុងសេអ៊ូល និងវ៉ាស៊ីនតោនត្រូវគេរំពឹងថា នឹងប្រកាស ផ្អាកការធ្វើសមយុទ្ធយោធាទ្រង់ទ្រាយធំទ្វេភាគីនៅក្នុងសប្តាហ៍នេះ ហើយថែមទំាង អះអាងដែរថា ពួកគេនឹងចាប់ផ្តើមសមយុទ្ធឡើងវិញ បើសិនជារដ្ឋាភិបាលក្រុង ព្យុងយ៉ាង បរាជ័យក្នុងការរំសាយអាវុធនុយក្លេអ៊ែរ មិនដូចអ្វីដែលខ្លួនបានសន្យា កន្លងមកនេះ ។ ជាមួយគ្នានោះដែរ អ្នកនាំពាក្យក្រសួងការពារជាតិកូរ៉េខាងត្បូង លោក ឆយ ហ៊ីយន់ ស៊ូ បានបញ្ជាក់ថា ប្រទេសលោកនឹងចាប់ផ្ដើមការធ្វើសមយុទ្ធយោធារយៈពេលពីរ ថ្ងៃ សំដៅបង្កើនសមត្ថភាពការពារទីប្រជុំកោះជម្លោះ ដុកដូ ឬជប៉ុនហៅថា តាកេ ស៊ីម៉ា ស្ថិតនៅឆ្នេរភាគខាងកើតរបស់ខ្លួន ពីការឈ្លានពានជាយកថាហេតុណាមួយ ពីសំណាក់កងកម្លាំងជប៉ុន ។ អ្នកនាំពាក្យក្រសួងការពារជាតិកូរ៉េខាងត្បូងរូបនេះ បានឱ្យដឹងផងដែរថា សមយុទ្ធ យោធាខាងលើនេះ នឹងមានការចូលរួមពីនាវាចម្បាំង៦គ្រឿង និងយន្ដហោះចម្បាំង ៧គ្រឿង ហើយថា សមយុទ្ធយោធាការពារទីប្រជុំកោះ ដុកដូ នេះដែរ គឺជាសមយុទ្ធ យោធាជាទម្លាប់ ដែលធ្វើឡើងក្នុងគោលបំណងពង្រឹង និងបង្កើនសមត្ថភាពការពារ ពីការឈ្លានពានណាមួយដោយកងកម្លាំងបរទេស ៕

ជប៉ុន៖ប្រព័ន្ធផ្សាយផ្សព្វផ្សាយក្នុងតំបន់បានរាយការណ៍ថា គ្រោះរញ្ជួយដីក្នុងកម្រិត ៥.៩រ៉ិកទ័រត្រូវបានតម្លើងដល់៦.១រ៉ិកទ័រ និងមានជម្រៅ១៥.៤គ.មបានវាយប្រហារ លើប្រទេសជប៉ុន ប៉ុន្តែពុំបានបង្កជារលកយក្សស៊ូណាមិឡើយ តែវាបានធ្វើអោយ មនុស្ស៣នាក់បាត់បង់ជីវិតក្នុងនោះមានកុមារីអាយុ៩ឆ្នំាម្នាក់ ខណៈច្រើនជាង២០០ នាក់ផ្សេងទៀតទទួលរងរបួសនៅខេត្ត អូសាកា ភាគខាងលិចប្រទេស ។ គ្រោះមហន្តរាយធម្មជាតិដ៏អាក្រក់នេះ បានកើតឡើងនៅម៉ោង៧និង៥៨នាទីព្រឹក ថ្ងៃ ចន្ទ័ នេះ (ម៉ោងក្នុងតំបន់) ហើយជាមួយគ្នានោះ ករណីអគ្គីភ័យក៏បានកើតមាន ឡើងផងដែរ ដោយសារហេតុការណ៍រញ្ជួយដីនេះ គ្រាដែលមនុស្សជាច្រើនត្រូវបាន គេរាយការណ៍ថា នៅជាប់គាំងក្នុងប្រអប់ជណ្តើរយន្ត ហើយលំនៅឋានជាង ១៧០.០០០ខ្នងនៅខេត្តអូសាកា និងខេត្តហ៊ីយ៉ូហ្គោ កំពុងគ្មានអគ្គិសនីប្រើប្រាស់ ។ដោយឡែកសេវារថភ្លើង និងអាកាសយានដ្ឋានមួយចំនួននៅក្នុងតំបន់ក៏ត្រូវបាន ផ្អាកដំណើរការជាបណ្តោះអាសន្នផងដែរ ហើយបើតាមអាជ្ញាធរជប៉ុនក្នុងតំបននោះ ចំនួនមនុស្សស្លាប់អាចនឹងកើនឡើងថែមទៀត ខណៈរដ្ឋមន្រ្តីគ្រប់គ្រងគ្រោះមហន្ត រាយជប៉ុន លោក ហាជីរ៉ូ អូកូនូជិ បានឲ្យដឹងថា នៅមានមនុស្សជាច្រើនកំពុងជាប់ នៅក្រោមគំនរអគារដែលបានដួលរលំ ហើយក្រុមភ្នាក់ងារជួយសង្រ្គោះក៏កំពុង ព្យាយាមតាមស្វែងរកពួកគេដែរ ៕