ប្រធានកម្មវិធីបន្ទាន់ផ្នែកសុខភាពរបស់អង្គការសុខភាពពិភពលោក លោក Mike Ryan បានប្រកាសឲ្យពិភពលោកទាំងមូលប្រុងប្រយ័ត្នខ្ពស់ដើម្បីទប់ទល់នឹងវីរុសឆ្លងកូរ៉ូណា ដែលផ្ទុះឡើងក្នុងទីក្រុង Wuhan ប្រទេសចិនកាលពីពេលថ្មីៗនេះ នេះបើតាមការចេញផ្សាយរបស់សារព័ត៌មាន BBC ។ លោកថាអង្គការសុខភាពពិភពលោក នឹងបើកកិច្ចប្រជុំនៅថ្ងៃព្រហស្បតិ៍នេះ ដើម្បីពិភាក្សាថាតើវីរុសនេះ បង្កើតជាគ្រោះអាសន្នសម្រាប់សុខភាពទូទាំងពិភពលោកឬយ៉ាងណា។ យ៉ាងណាមិញ លោក Mike បានធ្វើការសរសើររដ្ឋាភិបាលចិនដែលបានឆ្លើយតបនឹងការប្រយុទ្ធប្រឆាំងនឹងជំងឺឆ្លង ដោយលើកឡើងថាបញ្ហាប្រឈមពិតជាធំធេងណាស់ ប៉ុន្តែការឆ្លើយតបរបស់ចិនពិតជាសមស្រប។ លើសពីនេះ លោកបានបន្ថែមថាក្រុមអ្នកជំនាញអន្ដរជាតិ កំពុងតែរៀបចំធ្វើដំណើរទៅកាន់ប្រទេសចិនដើម្បីធ្វើការជាមួយអ្នកជំនាញនៅទីនោះ ដើម្បីសិក្សាបន្ថែមពីរបៀបដែលជំងឺនេះឆ្លងពីមនុស្សម្នាក់ទៅម្នាក់ទៀត៕ធ.ដ

ពលរដ្ឋអាមេរិកប្រមាណ ២០០នាក់ ដែលត្រូវបានជម្លៀសខ្លួនពីប្រទេសចិន នៅចំពោះមុខការវាយលុកនៃវីរុសកូរ៉ូណាប្រភេទថ្មី (2019-nCoV) បានមកដល់មូលដ្ឋានទ័ពអាមេរិកមួយនៅរដ្ឋកាលីហ្វរញ៉ា នៅថ្ងៃពុធម្សិលមិញ (ពេលវេលាក្នុងតំបន់នៅអាមេរិក) ហើយពួកគេនឹងត្រូវស្ថិតនៅទីនោះ សម្រាប់រយៈពេលយ៉ាងហោច ៧២ម៉ោងដើម្បីរង់ចាំការវាយតម្លៃឲ្យបានច្បាស់ ទៅលើស្ថានភាពសុខភាពរបស់ពួកគេ។ ពលរដ្ឋអាមេរិកទាំងជិត ២០០នាក់នោះដែលភាគច្រើនជាមន្រ្តីទូត និងក្រុមគ្រួសាររបស់ពួកគេ ត្រូវបានជម្លៀសចេញពីទីក្រុងវូហាន (Wuhan) របស់ចិន តាមរយៈយន្តហោះពិសេសមួយដែលរដ្ឋាភិបាលអាមេរិក បានរៀបចំបញ្ជូនទៅកាន់ប្រទេសចិន ក្រោយមានការព្រមព្រៀងជាមួយនឹង រដ្ឋាភិបាលទីក្រុងប៉េកាំង។ មិនទាន់មាននរណាម្នាក់ បង្ហាញរោគសញ្ញាគួរឲ្យសង្ស័យនៅឡើយទេ ប៉ុន្តែអាជ្ញាធរអាមេរិកបានអះអាងថា នឹងបន្តធ្វើការតាមដានអ្នក ទាំងនោះយ៉ាងយកចិត្តទុកដាក់។ ដោយឡែកកន្លងមកនេះ ក៏មានករណីអ្នកផ្ទុកវីរុសកូរ៉ូណាប្រភេទថ្មីចំនួន ០៥ករណីនៅសហរដ្ឋអាមេរិកផងដែរ៕ធ.ដ

ក្រសួងសុខាភិបាលជប៉ុនទើបតែបានប្រកាសឲ្យដឹងថា ពលរដ្ឋជប៉ុន ០៣នាក់ក្នុងចំណោមជាង ២០០នាក់ ដែលត្រូវបានជម្លៀសខ្លួនចេញពីប្រទេសចិន ត្រូវបានក្រុមគ្រូពេទ្យធ្វើតេស្ត និងរកឃើញថា ពួកគេបានឆ្លងវីរុសកូរ៉ូណាប្រភេទថ្មី (2019-nCoV) ខណៈបច្ចុប្បន្នចំនួនអ្នកផ្ទុកវីរុសនេះនៅជប៉ុនបានកើនដល់ ១១ករណី ។ មនុស្សទាំង ០៣នាក់ខាងលើបានមកដល់ប្រទេសជប៉ុនវិញ កាលពីថ្ងៃពុធម្សិលមិញ តាមជើងហោះហើរពិសេសដំបូង ដែលរដ្ឋាភិបាលជប៉ុនបានបញ្ជូនទៅកាន់ប្រទេសចិន ដើម្បីជម្លៀសពលរដ្ឋជប៉ុនចេញពីទីក្រុង វូហាន (Wuhan) ជាទីដែលវីរុសកូរ៉ូណាថ្មីបានផ្ទុះឡើងដំបូង ហើយនាពេលនេះវាបានផ្តាច់ជីវិតមនុស្សកើនដល់ ១៧០នាក់ និងចម្លងដល់ជាង ៧,៧០០នាក់ នៅក្នុងប្រទេសចិន ហើយបើរាប់ទាំងនៅប្រទេស ដទៃៗទៀតទូទាំងពិភពលោកគឺមានការឆ្លងជាង ៧,៨០០ករណី៕ធ.ដ

ចិន៖ អាជ្ញាធរចិននៅព្រឹកថ្ងៃទី៣០ ខែមករានេះបានរាយការណ៍ថា តួលេខជនរងគ្រោះបាត់បង់ជីវិតដោយសារវីរុសផ្លូវដង្ហើម កូរ៉ូណាថ្មី (Coronavirus) បានកើនឡើងដល់១៧០នាក់ និងមនុស្សប្រមាណ៧.៧១១នាក់ផ្សេងទៀតបានឆ្លង នេះបើតាមសារព័ត៌មានចិន CGTN ។ អាជ្ញាធរខេត្តហ៊ូប៉ី និងទីក្រុងអ៊ូហាន ដែលជាចំណុចស្នូលនៃការផ្ទុះវីរុសកូរ៉ូណាថ្មី បានបញ្ជាក់ថា មនុស្សសរុបចំនួន១៦២នាក់បានស្លាប់ក្នុងតែខេត្តមួយនេះ និងមានអ្នកឆ្លង៤.៥៨៦ករណី ប៉ុន្តែអ្វីដែលពិសេសនោះគឺមានអ្នកជំងឺចំនួន១២៨នាក់ បានធូរស្បើយពីជំងឺទូទាំងប្រទេសចិន ។ ដោយឡែកអ្នកជំងឺម្នាក់ដែលបានឆ្លងវីរុសផ្លូវដង្ហើមកូរ៉ូណាថ្មី (2019-nCoV) នៅក្នុងខេត្តគួយចូវ ភាគខាងត្បូងប្រទេសចិន ត្រូវបានក្រុមគ្រូពេទ្យព្យាបាលឲ្យបានជាសះស្បើយឡើងវិញ នៅថ្ងៃទី២៩ ខែមករានេះ ។ ខាងក្រោមនេះគឺជាតួលេខតាមបណ្តាប្រទេស, ទីក្រុង និងកោះជុំវិញពិភពលោក ដែលឆ្លងមេរោគកូរ៉ូណាប្រភេទថ្មី៖១៖ ប្រទេសចិន ឆ្លង ៧,៧១១នាក់ ក្នុងនោះស្លាប់ ១៧០នាក់ ២៖ ថៃ ១៤ករណី ៣៖ ទីក្រុងហុងកុង ០៨ករណី ៤៖ កោះតៃវ៉ាន់ ០៨ករណី ៥៖ ជប៉ុន ១១ករណី ៦៖ ទីក្រុងម៉ាកាវ…

ចិន៖ មន្ទីរពេទ្យបណ្តោះអាសន្នចំនួន០២កន្លែង ដែលមានសមត្ថភាពផ្ទុកគ្រែសរុបរហូតដល់២.៦០០គ្រែ បាននិងស្ថិតក្រោមដំណើរការសាងសង់នៅក្នុងទីក្រុងអ៊ូហាន ដើម្បីទទួលយកអ្នកជំងឺដែលឆ្លងវីរុសផ្លូវដង្ហើមកូរ៉ូណាថ្មី ។ បើតាមសារព័ត៌មានចិន CGTN នៅថ្ងៃទី៣០ ខែមករានេះ មន្ទីរពេទ្យ ហ៊ូសិនសាន (Huoshenshan) ដែលមានផ្ទៃក្រឡា២៥.០០០ម៉ែត្រការ៉េ និង មានសមត្ថភាពផ្ទុកគ្រែសម្រាកចាប់ពី ៧០០ ទៅ ១.០០០គ្រែនោះ ត្រូវបានគេរំពឹងថា នឹង ដាក់ឲ្យប្រើប្រាស់ជាផ្លូវការនៅក្នុងថ្ងៃច័ន្ទ ទី០៣ ខែកុម្ភៈខាងមុខនេះ ។ ដោយឡែកមន្ទីរពេទ្យបណ្តោះអាសន្នមួយទៀតឈ្មោះ ឡេសិនសាន ដែលមានសមត្ថភាពធំជាងនេះត្រូវបានគេរំពឹងថា នឹងបើកដំណើរការជាផ្លូវការនៅថ្ងៃពុធ ទី០៥ ខែកុម្ភៈខាងមុខ ។ យ៉ាងណាមិញ គម្រោង ឡេសិនសាន បានពង្រីកផែនការសាងសង់របស់ខ្លួននៅថ្ងៃទី២៩ ខែមករានេះ ដែលនឹងមានរហូតដល់ទៅ១.៦០០ គ្រែ ៕ធ.ដ    

សហរដ្ឋអាមេរិក៖ ប្រធានាធិបតីអាមេរិកលោក ដូណាល់ ត្រាំ បានបង្ហាញគម្រោងសន្តិភាពរបស់លោកសម្រាប់តំបន់មជ្ឈិមបូព៌ា នៅក្នុងសប្តាហ៍នេះ ដោយមាននាយករដ្ឋមន្ត្រីអ៊ីស្រាអែលលោក ប៊ិនចាមីន ណឺតាន់យ៉ាហ៊ូ ឈរនៅក្បែរលោកនៅឯសេតវិមាន ។ប្រធានាធិបតីអាមេរិករូបនេះបាននិយាយយ៉ាងដូច្នេះថា ទស្សនវិស័យរបស់ខ្ញុំ គឺផ្ដល់ឱកាសឈ្នះឈ្នះសម្រាប់ភាគីទាំងពីរ ដែលនោះគឺដំណោះស្រាយបែបប្រាកដនិយមមួយសម្រាប់អ៊ីស្រាអែល និងប៉ាឡេស្ទីន ដែលអាចដោះស្រាយហានិភ័យចំពោះសន្តិសុខអ៊ីស្រាអែល ដែលបណ្ដាលមកពីការទាមទារឋានៈជារដ្ឋឯករាជ្យរបស់ប៉ាឡេស្ទីន ។ ទន្ទឹមគ្នា អ្នកតំណាងប៉ាឡេស្ទីនបានច្រានចោលគម្រោងសន្តិភាពនេះ មុនពេលមើលលើសំណើសន្តិភាពកម្រាស់ ៨០ ទំព័រនេះទៅទៀត ដោយអ្នកតំណាងប៉ាឡេស្ទីនទាំងនេះក៏មិនបានចូលរួមនៅក្នុងការចរចាអំពីគម្រោងសន្តិភាពនេះផងដែរ ។ លោក ត្រាំ យល់ឃើញថា ការច្រានចោលនេះ គឺគ្រាន់តែជាការរាំងស្ទះបណ្ដោះអាសន្នតែប៉ុណ្ណោះ ហើយលោកបានប្រាប់អ្នកដែលចូលរួមក្នុងការប្រកាសរបស់លោកអំពីគម្រោងសន្តិភាពនេះថា លោក បានផ្ញើលិខិតមួយច្បាប់ទៅឲ្យប្រធានាធិបតីប៉ាឡេស្ទីនដោយបញ្ជាក់ថា ប្រសិន បើលោក អាបាស់ ជ្រើសយកវិថីសន្តិភាព សហរដ្ឋអាមេរិក និងប្រទេសជាច្រើនផ្សេងទៀតនឹងគាំទ្រជួយប្រទេសប៉ាឡេស្ទីន តាមមធ្យោ បាយជាច្រើន ។ លោក ត្រាំ សន្យាថា ប្រសិនបើប៉ាឡេស្ទីនឯកភាពតាមគម្រោងសន្តិភាពនេះ នោះនឹងទទួលបានការវិនិយោគពីបរទេសចំនួន៥០ពាន់លានដុល្លារ ការងាររាប់លាន នឹងត្រូវបង្កើតឡើងសម្រាប់ប្រជាពលរដ្ឋប៉ាឡេស្ទីន ក្នុងរយៈពេលជាងមួយទសវត្សរ៍ចុងក្រោយនេះ ហើយផលិតផលក្នុងស្រុកសរុបរបស់ប៉ាឡេស្ទីននឹងកើនពីរដង…

សហរដ្ឋអាមេរិក៖ នៅពេលព្រឹទ្ធសភាពិចារណាបណ្តឹងដកលោកប្រធានាធិបតីចេញពីតំណែង ក្រុមមេធាវីការការពារលោក ដូណាល់ ត្រាំ នៅថ្ងៃទី២៩ ខែមករានេះ បានប្រាប់សមាជិកព្រឹទ្ធសភា១០០នាក់ថា លោក ដូណាល់ ត្រាំ មិនបានធ្វើអ្វីខុសទេ ក្នុងការទាក់ទងជាមួយប្រទេសអ៊ុយក្រែន ។ ដំណើរការចោទប្រកាន់ប្រធានាធិបតីដំណាក់កាលទី១ នៅព្រឹទ្ធសភាបានបញ្ចប់នៅពេលមានការប្រឆាំងគ្នាទាក់ទងនឹងការទទួលយកភស្តុតាងថ្មី និងសាក្សីថ្មី រួមទាំងលោក ចន បូលតុន ដែលជាអតីតទីប្រឹក្សាសន្តិសុខជាតិក្នុងដំណាក់កាលបន្ទាប់ ។ មេធាវីរបស់លោក ដូណាល់ ត្រាំ បានប្រើពេលតែពាក់កណ្តាលប៉ុណ្ណោះនៃពេលវេលារបស់ពួកគេ ដោយបានប្រាប់សមាជិកព្រឹទ្ធសភាថា កិច្ចប្រឹងប្រែងរបស់គណបក្សប្រជាធិបតេយ្យក្នុងការចោទប្រកាន់លោកប្រធានាធិបតីគឺជារឿងគ្រោះថ្នាក់ ។ ប៉ុន្តែការកាត់សេចក្តីនេះនៅវែងឆ្ងាយណាស់ ពីព្រោះមានសម្ពាធកាន់តែកើនឡើងជំរុញឱ្យកោះហៅលោក ចន បូលតុន  មកផ្តល់សក្ខីកម្ម (ធ្វើសាក្សី) ។ គណបក្សប្រជាធិបតេយ្យត្រូវការការគាំទ្រ របស់សមាជិកព្រឹទ្ធសភាគណបក្សសាធារ ណរដ្ឋ៤នាក់ ដើម្បីបានសំឡេងភាគច្រើន៥០%បូក១ ដែលជាសំឡេងចាំបាច់ ក្នុងការជំរុញការកោះហៅសាក្ស៊ីមកផ្តល់សក្ខីកម្ម ។ ទោះជាយ៉ាងណា មិនមែនសមាជិកគណបក្សសាធារណរដ្ឋទាំងអស់ជឿទុកចិត្តលើអ្វីដែលលោក បូលតុន នឹងនិយាយនោះទេ ៕ធ.ដ

អេមីរ៉ាត់អារ៉ាប់រួម៖ ក្រសួងសុខាភិបាលអេមីរ៉ាត់អារ៉ាប់រួម នៅថ្ងៃទី២៨ ខែមករានេះ បានប្រកាសពីការរកឃើញនូវវត្តមានវីរុសកូរ៉ូណាប្រភេទថ្មីនៅក្នុងខ្លួនមនុស្សនៃគ្រួសារមួយ ដែលបានធ្វើដំណើរមកពីទីក្រុងវូហាន របស់ប្រទេសចិន ។ ស្របពេលជាមួយគ្នានេះដែរ ក្រសួងសុខាភិបាលអេមីរ៉ាត់អារ៉ាប់រួមមិនបានការបញ្ជាក់ថា មនុស្សប៉ុន្មាននាក់ក្នុងគ្រួសារនោះ មានផ្ទុកវីរុសឡើយ ប៉ុន្តែអ្នកដែលផ្ទុកវីរុសមានស្ថានភាពសុខភាពនឹងនរធម្មតា ហើយកំពុងស្ថិតក្រោមការតាមដាន ។ ដោយឡែកប្រធានមន្ត្រីសុខាភិបាលរដ្ឋ Victoria លោក Brett Sutton នៅថ្ងៃដដែលនេះ បានទទួលស្គាល់ពីករណីឆ្លងវីរុសកូរ៉ូណាទី២ នៅក្នុងរដ្ឋមួយនេះ ដោយធ្វើឱ្យចំនួនអ្នកឆ្លងសរុបនៅក្នុងប្រទេសអូស្រ្តាលី បន្តកើនឡើងដល់៦នាក់ហើយ ។ បើតាមលោក Brett Sutton ករណីឆ្លងវីរុសកូរ៉ូណាទី២ ត្រូវបានគេរកឃើញនៅលើខ្លួនបុរសម្នាក់មានអាយុ៦០ឆ្នាំ និង ជាអ្នករស់នៅក្នុងរដ្ឋ Victoria ។ បុរសរូបនេះបានធ្លាក់ខ្លួនឈឺតាំងតែពីថ្ងៃ២៣ ខែមករាកន្លងទៅ និងកំពុងស្ថិតនៅក្រោមការព្យាបាលនៅដាច់ឆ្ងាយពីគេឯង ខណៈក្រុមគ្រួសាររបស់លោកកំពុងស្ថិតនៅក្រោមការតាមដានផងដែរ ៕ធ.ដ

អាហ្វហ្គានីស្ថាន៖ កងកម្លាំងអាមេរិកនៅថ្ងៃទី២៨ ខែមករាបានបញ្ជាក់ថា ពលទាហានអាមេរិកប្រចាំប្រទេសអាហ្វហ្គានីស្ថាន បានរកឃើញសាកសពបុគ្គលិកយោធាអាមេរិកពីរនាក់ដែលបានបាត់បង់ជីវិត នៅពេលយន្តហោះយោធារបស់ពួកគេធ្លាក់នៅអាហ្វហ្គានីស្ថាន ។ យន្ដហោះដែលជួយកងទ័ពក្នុងការប្រាស្រ័យទាក់ទង និង ចែករំលែកព័ត៌មានសម្ងាត់នៅសមរភូមិនោះ បានធ្លាក់ចុះនៅក្នុងតំបន់ដែលគ្រប់គ្រងដោយក្រុមតាលីបង់ នៃខេត្ត Ghazni ប្រទេសអាហ្វហ្គានីស្ថាន កាលពីថ្ងៃទី២៧ ខែមករានេះ ។ ស្នងការប៉ូលិសខេត្ត Ghazni លោក Khaled Wardek បាននិយាយថា កម្លាំងសន្តិសុខអាហ្វហ្គានីស្ថានបានជួយកម្លាំងសហរដ្ឋអាមេរិក កាលពីថ្ងៃ អង្គារ ម្សិលមិញ នៅពេលដែលពួកគេទៅយកអដ្ឋិធាតុពីកន្លែងយន្តហោះធុន E-11A ធ្លាក់ ។ ទន្ទឹមនេះ មន្ត្រីយោធាអាមេរិកបាននិយាយថា គ្មានការចង្អុលបង្ហាញថា យន្ដហោះនេះធ្លាក់ដោយសារសត្រូវបាញ់នោះទេ គឺផ្ទុយពីការអះអាងរបស់ក្រុមតាលីបង់ដែលថា ពួកគេបានបាញ់ទម្លាក់យន្ដហោះនោះ ៕ធ.ដ

អូស្រ្តាលី៖ អ្នកវិទ្យាសាស្ត្រមួយក្រុមនៅអូស្ត្រាលី នៅថ្ងៃទី២៩ ខែមករានេះ បានអះអាងពីជោគជ័យក្នុងការបង្កើតវីរុសកូរ៉ូណា ដោយយកគំរូតាមវីរុសកូរ៉ូណាថ្មី (2019n-CoV) មានប្រភពដើមមកពីទីក្រុងវូហាន ស្ថិតក្នុងគោលដៅរកវិធីសាស្ត្រទប់ស្កាត់ការរីករាលដាលនៃវីរុសដ៏គ្រោះថ្នាក់នេះ ។ វីរុសកូរ៉ូណាដែលក្រុមអ្នកវិទ្យាសាស្ត្រអូស្តា្រលីបង្កើតឡើងនេះ គឺយកគំរូចេញពីវីរុសកូរ៉ណានៅក្នុងខ្លួនអ្នកជំងឺម្នាក់ ដែលបានមកកាន់វិទ្យាស្ថាន ភីធើ ដូហឺធី នៅថ្ងៃទី២៤ខែមករានេះ។ បើតាមក្រុមអ្នកវិទ្យាសាស្ត្រមកពីវិទ្យាស្ថានខាងលើ សំណាក នៃវីរុសកូរ៉ូណានេះ នឹងត្រូវចែករំលែកជាមួយអង្គការសុខភាពពិភពលោក (WHO) និងមន្ទីរពិសោធន៍ជាច្រើននៅជុំវិញពិភពលោក ។ សូមបញ្ជាក់ផងដែរថា សំណាកវីរុសកូរ៉ូណានេះ ក៏នឹងត្រូវបានប្រើប្រាស់ក្នុងការ សាកល្បងលើការបង្កើតប្រព័ន្ធភាពសុំានៃរាង្គកាយមនុស្ស ដែលនឹងជួយដល់ការស្វែងរកវីរុសនៅក្នុងខ្លួនអ្នកជំងឺ ដែលមិនបានបង្ហាញរោគសញ្ញា ព្រមទាំងការបង្កើតវ៉ាក់សាំងជាដើម ៕ធ.ដ