នាយករដ្ឋមន្ត្រីនៃប្រទេសឡាវ Thongloun Sisoulith នៅថ្ងៃអង្គារ ទី១ តុលា ២០១៩នេះ បានដឹកនាំគណៈប្រតិភូជាន់ខ្ពស់បំពេញទស្សនកិច្ចផ្លូវការ នៅប្រទេសវៀតណាម។ ដំណើរទស្សនកិច្ចរយៈពេល៣ថ្ងៃនេះ ធ្វើឡើងតបតាមអញ្ជើញរបស់សមភាគីវៀតណាម ង្វៀន សួនហ្វុក។ វៀតណាម និងឡាវ ត្រូវបានគេដឹងថា មានទំនាក់ទំនងមិត្តភាពជាប្រពៃណី សាមគ្គីភាពពិសេស និងជាដៃគូកិច្ចសហប្រតិបត្តិការគ្រប់វិស័យ៕ម.ន

ក្រុមហ៊ុន ចានហ្គាន ម៉ាសឺដា (Changan Mazda) ដែលជាក្រុមហ៊ុនសហការរួមគ្នារវាងក្រុមហ៊ុន ឆុងឈីង ចានហ្គាន និងម៉ាសឺដា នឹងប្រកាសប្រមូលរថយន្ត៧៧១១២គ្រឿង មកធ្វើការជួសជុលវិញ ដោយសារតែម៉ូទ័របូមសាំងមានបញ្ហា។ នេះបើតាមនិយ័តករទីផ្សារប្រទេសចិន ចេញផ្សាយដោយសារព័ត៌មានស៊ីនហួរ នៅថ្ងៃទី២៩ កញ្ញា ២០១៩។ គេហទំព័ររបស់រដ្ឋបាលជាតិទទួលបន្ទុកនិយ័តករទីផ្សារប្រទេសចិន បានឲ្យដឹងថា ដោយចាប់ពីថ្ងៃទី២២ វិច្ឆិកា ការប្រកាសប្រមូលមកវិញគឺមានសម្រាប់រថយន្តសេរី Mazda CX-5 ជំនាន់ទី២ ដែលផលិតនៅចន្លោះពីថ្ងៃទី៨ សីហា ២០១៧ ដល់ ខែកក្តដា ២០១៩។ ប្រភពថា ផ្នែកមានបញ្ហានៃម៉ូទ័របូមសាំងនៃរថយន្តទាំងនេះ បើមិនធ្វើការជួសជុលទេ អាចនាំឲ្យមានបញ្ហាសាំង ហើយធ្វើឲ្យម៉ាស៊ីនឈប់ដំណើរការភ្លាម។ ក្រុមហ៊ុនសន្យាថា នឹងដោះដូរគ្រឿងបន្លាស់ដោយគិតថ្លៃជូនអតិថិជនវិញ ដើម្បីធានាសុវត្ថិភាព៕ធ.ដ

អគ្គិភ័យឆាបឆេះរោងចក្រមួយកន្លែង នៅភាគខាងកើតប្រទេសចិន ស្លាប់មនុស្ស១៩នាក់។ នេះបើតាមអាជ្ញាធរនៅថ្ងៃចន្ទ ទី៣០ កញ្ញា ២០១៩នេះ ជាហេតុការណ៍ឆេះរោងចក្រចុងក្រោយបំផុត ដែលមានមនុស្សស្លាប់ក្នុងផ្នែកឧស្សាហកម្មប្រទេសនេះ។ អគ្គិភ័យនេះបានកើតមាន កាលពីថ្ងៃអាទិត្យម្សិលមិញ នៅរោងចក្រស្ថិតក្នុងតំបន់ Ninghai ខេត្ត Zhejiang ភាគខាងកើតប្រទេសចិន។ នេះបើតាមមន្ត្រីក្នុងតំបន់នោះបង្ហាញឲ្យដឹងតាមរយៈបណ្តាញសង្គម Weibo។ ប្រភពបន្តថា ហេតុការណ៍ដែលកំពុងស្ថិតក្រោមការស៊ើបអង្កេតនេះបានកើតមានឡើងនៅរោងចក្រជាកម្មសិទ្ធិរបស់ក្រុមហ៊ុន Ruiqi Daily Necessities។ សារព័ត៌មាន Channelnewsasia បានចេញផ្សាយថា ហេតុការណ៍ឆេះរោងចក្រតែងតែកើតមាននៅប្រទេសចិន ខណៈដែលស្តង់ដារសុវត្ថិភាពនៅមានកម្រិត។ កាលពីខែមីនា មានការផ្ទុះរោងចក្រគីមី១កន្លែង នៅខេត្ត Jiangsu ស្លាប់មនុស្ស៧៨នាក់ របួសរាប់រយនាក់។ ក្នុងរយៈពេល៤ខែក្រោយមក គឺខែកក្តដា មានករណីផ្ទុះដ៏ធំមួយ ស្លាប់មនុស្ស១៥នាក់ នៅឯរោងចក្រឧស្ម័ន១កន្លែង នាភាគកណ្តាលប្រទេសចិន៕ធ.ដ

សហរដ្ឋអាមេរិក៖ នៅថ្ងៃ អាទិត្យ សប្តាហ៍មុននេះ តាមរយៈបណ្តាញសង្គមធ្វីតធើ ប្រធានាធិបតីអាមេរិកលោក ដូណាល់ ត្រាំ បានប្រកាសចង់ជួបជាមួយអ្នកដែលទម្លាយកិច្ចសន្ទនាតាមទូរស័ព្ទរវាងលោក និង ប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡិនស្កាយ ។ការកត់សម្គាល់បែបនេះរបស់លោក ដូណាល់ ត្រាំ បានធ្វើឡើងស្របពេលដែលប្រធានាធិបតីអាមេរិករូបនេះ កំពុងប្រឈមមុខនឹងការស៊ើបអង្កេត ដើម្បីដំណើរការនីតិវិធីចោទប្រកាន់ពីសំណាក់គណបក្សប្រជាធិបតេយ្យ ក្រោយបែកធ្លាយកិច្ចសន្ទនាតាមទូរស័ព្ទជាមួយសមភាគីអ៊ុយក្រែន លោក វ៉ូឡូឌីមៀ ហ្សេឡិនស្កាយ ។ក្រុមសមាជិកសភានៃបក្សប្រជាធិបតេយ្យបានចោទប្រកាន់លោក ត្រាំ ថា បានគំរាមកំហែងកាត់បន្ថយកញ្ចប់ថវិកាយោធា ដើម្បីបង្ខំឱ្យអ៊ុយក្រែនបើកការស៊ើបអង្កេតបទពុករលួយប្រឆាំងនឹងលោក ចូ បៃដិន ដែលជាគូប្រជែងដ៏មានសក្ដានុពលម្នាក់របស់លោក សម្រាប់ការបោះឆ្នោតប្រធានាធិបតីនៅឆ្នាំ២០២០ ។ យ៉ាងណាមិញ ប្រធានាធិបតីអាមេរិកលោក ដូណាល់ ត្រាំ បានប្រកាសច្រានចោលរាល់ការចោទប្រកាន់ខាងលើ ៕            

អារ៉ាប៊ីសាអូឌីត៖ ព្រះអង្គម្ចាស់រាជទាយាទអារ៉ាប៊ីសាអូឌីត ម៉ូហាម៉េដ ប៊ីនសាល់ម៉ាន់ នៅថ្ងៃអាទិត្យសប្តាហ៍មុននេះបានព្រមានថា តម្លៃប្រេងនៅលើទីផ្សារពិភពលោកនឹងឡើងថ្លៃកប់ពពក ខណៈណាសហគមន៍អន្តរជាតិមិនរួមគ្នាចាត់វិធានការទប់ស្កាត់ទង្វើបង្កហេតុរបស់រដ្ឋាភិបាលក្រុងតេហេរ៉ង់ ។ ការថ្លែងបែបនេះរបស់ព្រះអង្គម្ចាស់ ប៊ីនសាល់ម៉ាន់ ធ្វើឡើងបន្ទាប់ពីទ្រង់បានយល់ស្របទៅនឹងការអះអាងរបស់រដ្ឋមន្ត្រីការបរទេសអាមេរិកលោក ម៉ៃ ប៉ុមប៉េអូ ដែលថា ការវាយប្រហារលើរោងចក្រប្រេងអារ៉ាប៊ីសាអូឌីត កាលពីថ្ងៃទី១៤ ខែកញ្ញា គឺជាសកម្មភាពចង់បង្កសង្រ្គាមរបស់អ៊ីរ៉ង់ ។ ព្រះអង្គម្ចាស់រាជទាយាទអារ៉ាប៊ីសាអូឌីតរូបនេះបានសង្កត់ធ្ងន់ថា បើសិនជាពិភពលោកមិនព្រមចាត់វិធានការយ៉ាងតឹងរ៉ឹង ដើម្បីទប់ស្កាត់ទង្វើបង្កហេតុរបស់អ៊ីរ៉ង់ទេ នោះយើងនឹងបានឃើញជម្លោះមួយផ្ទុះឡើងនៅពេលអនាគត ដែលនឹងគំរាមកំហែងដល់ផលប្រយោជន៍ពិភពលោកទាំងមូល ។ យ៉ាងណាមិញ ព្រះអង្គនៅតែចង់បានការដោះស្រាយបញ្ហាទាំងឡាយ ដោយសន្តិវិធីជាជាងការប្រើប្រាស់កម្លាំងយោធា ៕            

អ៊ីរ៉ង់៖ រដ្ឋាភិបាលទីក្រុងតេហេរ៉ង់នឹងធ្វើការឆ្លើយតបយ៉ាងម៉ឺងម៉ាត់នូវរាល់ទង្វើបំពានទំាងឡាយណា ដែលមានចេតនាប្រឆាំងនឹងប្រទេសអ៊ីរ៉ង់ នេះបើតាមរដ្ឋមន្ត្រីការពារជាតិអ៊ីរ៉ង់លោក អាមែរ ហាតាមី ។រដ្ឋមន្ត្រីការពារជាតិអ៊ីរ៉ង់រូបនេះបានថ្លែងព្រមានយ៉ាងដូច្នេះ ក្រោយអ៊ីរ៉ង់បានបាញ់ទម្លាក់យន្តហោះដ្រូនតម្លៃរាប់រយលានដុល្លាររបស់អាមេរិកមួយគ្រឿង នៅលើដែនអាកាសខេត្ត ហ័រមូសហ្គេន កាលពីខែមិថុនាកន្លងទៅនេះ ដោយចោទថា វាបានហោះរំលោភដែនអាកាសអ៊ីរ៉ង់ ។លោក អាមែរ ហាតាមី ថែមទំាងបានអះអាងទៀតថា អ៊ីរ៉ង់មានសមត្ថភាពគ្រប់គ្រាន់នៅក្នុងការទប់ទល់ស្ថានការណ៍គ្រប់កាលៈទេសៈ ដោយមានការប្រយុទ្ធប្រឆាំងក្រុមភេរវករ និង ការបាញ់ទម្លាក់យន្តហោះដ្រូនអាមេរិក ដែលបានហោះបំពានដែនអាកាសអ៊ីរ៉ង់ ៕      

ចិន៖ អភិបាលក្រុងហុងកុងលោកស្រី ខារី ឡំា នឹងដឹកនំាប្រតិភូមួយក្រុមធ្វើដំណើរទៅកាន់រដ្ឋធានីប៉េកំាង ដើម្បីចូលរួមក្នុងសកម្មភាពផ្សេងៗនាឱកាសដែលប្រទេសចិនប្រារព្ធខួបលើកទី៧០ នៃការបង្កើតសាធារដ្ឋប្រជាមានិតចិន នេះបើតាមរដ្ឋាភិបាលក្រុងស្វយ័តមួយនេះបញ្ជាក់ប្រាប់អ្នកយកសារព័ត៌នៅថ្ងៃ អាទិត្យសប្តាហ៍មុននេះ ។បើតាមប្រភពខាងលើ ក្រុមប្រតិភូរបស់លោកស្រី ខារី ឡំា ក្នុងនោះរួមមានសមាជិកប្រមាណ២៤០នាក់ដែលមកពីក្រុមហ៊ុនតូច-ធំផ្សេងៗគ្នាជាច្រើននៅក្នុងសហគមន៍ក្រុងហុងកុង ដែលគ្រោងនឹងធ្វើដំនើរទៅដល់រដ្ឋធានីប៉េកំាង ប្រទេសចិន នៅក្នុងថ្ងៃ ច័ន្ទ ដើមសប្តាហ៍នេះ (ម៉ោងក្នុងតំបន់) ។បើតាមការគ្រោងទុកនោះ លោកស្រី ឡំា នឹងធ្វើដំណើរត្រឡប់មកវិញនាល្ងាចថ្ងៃទី០១ ខែតុលាខាងមុខនេះ ហើយក្នុងអំឡុងពេលអវត្តមានរបស់លោកស្រី គឺលោក ម៉ាធីវ ឆឹង លេខាធិការនៃរដ្ឋបាលរដ្ឋាភិបាលក្រុងហុងកុង នឹងឡើងកាន់មុខតំណែងជាអភិបាលក្រុងហុងកុងស្តីទី ៕      

អង់គ្លេស៖ នាយករដ្ឋមន្ត្រីអង់គ្លេស លោក បូរីស ចនសុន ទំនងជាកំពុងប្រឈមមុខទៅនឹងការបង្ខំឱ្យចិត្តចាកចេញពីតំណែងនៅក្នុងសប្តាហ៍នេះ ខណៈដែលក្រុមបក្សប្រឆាំងកំពុងព្យយាមធ្វើគ្រប់យ៉ាង ដើម្បីដាក់ជំនួសរដ្ឋបាលបណ្តោះអាសន្នជំនួសរូបគាត់។ ការប្រឹងប្រែងរបស់ក្រុមបក្សប្រឆាំងនេះក៏ត្រូវបានគេមើលឃើញដែរថា ដើម្បីធ្វើយ៉ាងណាឲ្យព្រឹត្តិការណ៍ Brexit ឬ ការចាកចេញពីប្លុកអឺរ៉ុបរបស់អង់គ្លេស នឹងត្រូវបន្តពន្យាពេលបន្ថែមទៀត។ ជាមួយគ្នានេះ សមាជិកសភារបស់គណបក្ស Scottish National Party (SNP) លោក Steward Hosie បាននិយាយថា អាចនឹងមានការបោះឆ្នោតមួយនៅក្នុងរដ្ឋាភិបាលអង់គ្លេសនៅក្នុងសប្តាហ៍នេះ។លោកបន្តថា ប្រសិនបើមានការបោះឆ្នោតមួយ ហើយលោក ចនសុន នឹងចាញ់សំឡេងឆ្នោតនោះ ដូច្នេះមានន័យថា តំណែងជានាយករដ្ឋមន្ត្រីរបស់លោកនឹងត្រូវជំនួសមកវិញដោយ លោក Jeremy Corbyn មេដឹកនាំកម្មករក្នុងរយៈពេលខ្លី។ លោកបន្ថែមទៀតថា បើសិនការឡើងកាន់តំណែងបណ្តោះអាសន្ននឹងអាចធ្វើទៅបាន នោះមានន័យថា អង់គ្លេសនឹងអាចពន្យាពេលម្តងទៀតសម្រាប់ការបែងចែកចេញពីសហភាពអឺរ៉ុប ដែលបានកំណត់យកថ្ងៃទី៣១ ខែតុលាខាងមុខ៕ម.ន  

ចិន៖ ចិនត្រៀមធ្វើព្យុហយាត្រាយោធាដ៏ធំបំផុតមួយ នៅថ្ងៃអង្គារសប្ដាហ៍នេះ នាឱកាសប្រារព្ធខួបលើកទី៧០ នៃការបង្កើតសាធារណរដ្ឋប្រជាមានិតចិន និងដើម្បីបំពេញតាមការសន្យាក្នុងការបង្ហាញអាវុធថ្មីៗផលិតនៅក្នុងស្រុក។ ព្យុហយាត្រាយោធាដ៏ធំបំផុតមួយមិនធ្លាប់មានពីមុនមកនេះ នឹងត្រូវធ្វើឡើងនៅថ្ងៃអង្គារសប្តាហ៍នេះ នៅឯទីលាន Tiananmen ក្រោមវត្តមានប្រធានាធិបតីចិន លោក ស៊ី ជិនពីង ក្រុមមន្ត្រីចិន សាធារណជនដែលត្រូវបានជ្រើសរើស និងមន្ត្រីយោធាបរទេសមកពី៩៧ប្រទេស។ ក្រសួងការពារជាតិចិនបានឱ្យដឹងដែរថា យោធា១ម៉ឺន៥ពាន់នាក់នឹងត្រូវចូលរួមក្នុងព្យុហយាត្រាយោធាខាងលើ ខណៈបរិក្ខារយោធាចំនួន៥៨០គ្រឿង នឹងបង្ហាញខ្លួននៅលើដងផ្លូវ ហើយយន្ដហោះចម្បាំង១៦០គ្រឿងនឹងសម្ដែងការហោះហើរនៅលើអាកាស៕ម.ន

ឥណ្ឌា៖ ក្រុមហ៊ុនអាកាសចរណ៍អឺរ៉ុប Airbus និងអាម៉េរិក Boeing ក៏ដូចជាក្រុមហ៊ុនអាកាសចរណ៍ Ilyushin របស់រុស្ស៊ីកំពុងដណ្តើមយកកិច្ចសន្យាពីប្រទេសឥណ្ឌា ដែលមានតម្លៃ២ពាន់លានដុល្លារ ដែលរំពឹងថា នឹងធ្វើឡើងក្នុងខែវិច្ឆិកា ឬខែធ្នូ ឆ្នំាំ២០១៩នេះ។ កងទ័ពអាកាសឥណ្ឌា (IAF) គ្រោងនឹងចេញដេញថ្លៃជាផ្លូវការមួយ ដើម្បីទិញយន្តហោះដឹករថក្រោះពហុតួនាទីចំនួន៦គ្រឿង (MRTT) បន្ទាប់ពីខ្លួនបានបញ្ចប់កិច្ចសន្យាតម្លៃ២ពាន់លានដុល្លារជាមួយក្រុមហ៊ុន Airbus Defense and Space ក្នុងឆ្នាំ២០១៧។ គួរបញ្ជាក់ថា ប្រទេសឥណ្ឌា បានចេញសេចក្តីស្នើសុំព័ត៌មានទៅសាជីវកម្មអឺរ៉ុប Airbus, ក្រុមហ៊ុន Boeing ដែលមានមូលដ្ឋាននៅសហរដ្ឋអាម៉េរិក និងក្រុមហ៊ុនអាកាសចរណ៍ Ilyushin របស់រុស្ស៊ីកាលពីឆ្នាំមុន៕ម.ន