សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ នៅថ្ងៃពុធសប្តាហ៍នេះ បានប្រកាសថា រូបលោកយល់ព្រមពន្យារពេលដំឡើងពន្ធលើទំនិញចិនតម្លៃ២៥០ពាន់លានដុល្លារចំនួនពីរសប្តាហ៍។ លោក បានបង្ហោះសារនៅលើបណ្តាញធ្វីតធើថា យើងបានយល់ព្រមក្នុងកាយវិការសុឆន្ទៈ ដើម្បីលើកការដំឡើងពន្ធលើទំនិញតម្លៃ២៥០ពាន់លានដុល្លារ ពោលគឺ២៥% ទៅ ៣០% ចាប់ពីថ្ងៃទី០១ ខែតុលា ទៅថ្ងៃទី១៥ ខែតុលាដដែលនេះ។ ប្រធានាធិបតីអាម៉េរិករូបនេះ បាននិយាយទៀតថា ការពន្យារពេលនេះ ត្រូវបានស្នើសុំដោយឧបនាយករដ្ឋមន្ត្រីចិនលោក លីវ ហ៊ី និងដោយសារតែសាធារណរដ្ឋប្រជាមានិតចិន នឹងប្រារព្ធខួបលើកទី៧០ របស់ពួកគេ នៅថ្ងៃទី០១ ខែតុលាខាងមុខ។សូមបញ្ជាក់ថា ក្រុមអ្នកចរចាកំពូលប្រទេសទាំងពីរ ត្រូវបានគេរំពឹងថា នឹងកោះចរចាគ្នាឡើងវិញនៅទីក្រុងវ៉ាស៊ីនតោន នាដើមខែក្រោយ បន្ទាប់ពីរដូវក្តៅដ៏ក្តៅគគុក ដែលក្នុងនោះទំនាក់ទំនងពាណិជ្ជកម្មរវាងប្រទេសទាំងពីរ គឺកាន់តែយ៉ាប់យ៉ឺនយ៉ាងខ្លាំង ហើយរដ្ឋាភិបាលទាំងពីរបានប្រកាសរលកថ្មីនៃពន្ធគយ នៅក្នុងការប្រឈមមុខដាក់គ្នា ដែលកំពុងទាញទម្លាក់កំណើនសេដ្ឋកិច្ចពិភពលោក៕ម.ន

អ៊ីរ៉ង់៖ ប្រធានាធិបតីអ៊ីរ៉ង់ លោក ហាសាន់ រូហានី បានព្រមានជាថ្មីទៀតនៅថ្ងៃពុធនេះថា ប្រទេសរបស់លោកនឹងកាន់តែបន្ថយការគោរពចំពោះកិច្ចព្រមព្រៀងនុយក្លេអ៊ែរអ៊ីរ៉ង់ថែមទៀត ហើយថា  ការស្រេកឃ្លានចង់បានសង្រ្គាមរបស់សហរដ្ឋអាម៉េរិកនឹងទទួលបរាជ័យ។ការកត់សម្គាល់បែបនេះរបស់លោក ហាសាន់ រូហានី បានកើតមានឡើង បន្ទាប់ពីអ្នកនាំពាក្យរដ្ឋាភិបាលអ៊ីរ៉ង់ បានចេញមុខស្វាគមន៍ ចំពោះការបណ្តេញទីប្រឹក្សាសន្តិសុខជាតិអាម៉េរិក លោក ចន បូលតុន ចេញពីតំណែង ដោយនិយាយថា ការសម្រេចចិត្តរបស់លោក ដូណាល់ ត្រាំ នេះ នឹងទប់ស្កាត់កុំឲ្យផ្ទុះសង្រ្គាម។ប្រធានាធិបតីអ៊ីរ៉ង់រូបនេះ បានសង្កត់ធ្ងន់ថា ខណៈសត្រូវបានដាក់សម្ពាធជាអតិបរមាមកលើយើង ពួកយើងត្រូវបានឆ្លើយតប តាមរយៈការតស៊ូជម្នះ ខណៈការលើកឡើងនេះ ទំនងជាចង់សំដៅលើការដាក់ទណ្ឌកម្មរបស់សហរដ្ឋអាម៉េរិក និងបញ្ហាកិច្ចព្រមព្រៀងនុយក្លេអ៊ែរអ៊ីរ៉ង់៕ម.ន

ចិន៖ ចិន បានកោះហៅឯកអគ្គរដ្ឋទូតអាល្លឺម៉ង់នៅក្នុងទីក្រុងប៉េកាំង បន្ទាប់ពីមានជំនួបកាលពីពេលថ្មីៗនេះរវាងលោក ចូស៊ោ វុង ដែលជាសកម្មជនក្រុងហុងកុង និងរដ្ឋមន្រ្តីការបរទេសអាល្លឺម៉ង់ ហេកូ ម៉ាអាស់ ដោយបានប្រកាសថា ជំនួបនោះនឹងធ្វើឲ្យប៉ះពាល់ទំនាក់ទំនងទ្វេភាគី។ថ្លែងនៅក្នុងសន្និសីទសារព័ត៌មានមួយនៅក្នុងទីក្រុងបែរឡំាង ឯកអគ្គរដ្ឋទូតចិនប្រចាំប្រទេសអាល្លឺម៉ង់លោក Ken Wu បានស្តីបន្ទោសជាសាធារណៈដល់បេសកកជនអាល្លឺម៉ង់ នៅក្នុងការជំទាស់ប្រឆាំងជំនួបកាលពីថ្ងៃពុធសប្តាហ៍នេះ ពោលគឺពីរថ្ងៃក្រោយរដ្ឋមន្រ្តីការបរទេសអាល្លឺម៉ង់ បានជួបជាមួយលោក វុង នៅក្នុងទីក្រុងប៉េកាំង។ ឯកអគ្គរដ្ឋទូតចិនប្រចំាប្រទេសអាល្លឺម៉ង់រូបនេះ បន្ថែមទៀតថា ជំនួបនេះនឹងមានផលវិបាកអវិជ្ជមានដល់ទំនាក់ទំនងទ្វេភាគី ហើយភាគីចិនត្រូវតែមានប្រតិកម្ម។សូមរំលឹកថា លោក វុង គឺជាសកម្មជនក្រុងហុងកុងបានទៅដល់ទីក្រុងបែរឡាំង ប្រទេសអាល្លឺម៉ង់ កាលពីយប់ថ្ងៃចន្ទដើមសប្តាហ៍នេះ ហើយត្រូវបានស្វាគមន៍ដោយរដ្ឋមន្រ្តីការបរទេសអាល្លឺម៉ង់លោក ហេកូ ម៉ាអាស់។ បើតាមលោកលោក Ken Wu សមាជិកសភាអាល្លឺម៉ង់ ក៏បានជួបជាមួយលោក វុង ផងដែរ៕ម.ន

អូស្រា្តលី៖ រដ្ឋាភិបាលអូស្រា្តលីបានជម្រុញឱ្យប្រជាជនខ្លួនមានការប្រុងប្រយ័ត្ន បន្ទាប់ពីពលរដ្ឋអូស្ត្រាលី០៣នាក់ហើយត្រូវបានចាប់ និងឃុំខ្លួននៅក្នុងប្រទេសអ៊ីរ៉ង់ ដោយពុំទាន់មានការបញ្ជាក់ពីមូលហេតុឱ្យបានច្បាស់នៅឡើយទេ ។ ពលរដ្ឋអូស្រ្ដាលីទាំងបីនាក់នេះ មានពីរនាក់ជាស្ត្រី និងម្នាក់ទៀតជាបុរស ដោយស្ត្រីម្នាក់ត្រូវបានឃុំខ្លួនអស់រយៈពេលជិតមួយឆ្នាំមកហើយ ខណៈស្ត្រីម្នាក់ និងបុរសជាគូស្នេហ៍នឹងគ្នាត្រូវបានអាជ្ញាធរអ៊ីរ៉ង់ចាប់ខ្លួនកាលពីប៉ុន្មានខែមុននេះ ។ ជាការឆ្លើយតប រដ្ឋាភិបាលអូស្រ្ដាលីបានចេញសេចក្ដីណែនាំឱ្យប្រជាជនខ្លួន មានការប្រុងប្រយ័ត្នខ្ពស់ និងពិចារណាឱ្យបានច្បាស់ មុនពេលធ្វើដំណើរទៅកាន់ប្រទេសអ៊ីរ៉ង់ ដោយសារតែជនបរទេសក្នុងនោះរួមទាំងអូស្ត្រាលី ទំនងជាប្រឈមមុខនឹងហានិភ័យខ្ពស់ពីការចាប់ និង ឃុំខ្លួនពីសំណាក់អាជ្ញាធរក្រុងតេហេរ៉ង់ ៕ធ.ដ

កូរ៉េខាងជើង៖ សារព័ត៌មានរដ្ឋកូរ៉េខាងជើង KCNA បានចុះផ្សាយនៅថ្ងៃពុធនេះថា មេដឹកនាំកំពូលកូរ៉េខាងជើងលោក គីម ជុងអ៊ុន ចុះធ្វើអធិការកិច្ច និង បញ្ជាដោយផ្ទាល់ ការធ្វើតេស្តជើងទម្រងគ្រាប់រ៉ុក្កែតខ្នាតយក្ស ដែលអាចបាញ់ម្តងបានជាច្រើនគ្រាប់ ។ កំឡុងចុះត្រួតពិនិត្យដោយផ្ទាល់នេះ លោក គីម ជុងអ៊ុន បាននិយាយថា សមត្ថភាពរបស់ប្រព័ន្ធគ្រាប់រ៉ុក្កែតត្រូវបានផ្ទៀងផ្ទាត់ជាលើកចុងក្រោយ នៅក្នុងប្រតិបត្តិការប្រយុទ្ធ ហើយអ្វីដែលត្រូវបន្តធ្វើឡើងជាមួយប្រព័ន្ធបាញ់គ្រាប់រ៉ុក្កែត នោះគឺការធ្វើតេស្ដ ។ សូមរំលឹកថា នៅថ្ងៃអង្គារសប្តាហ៍នេះ កូរ៉េខាងជើងបានបាញ់សាកល្បងមីស៊ីលរយៈចំងាយខ្លីទាំងពីរគ្រាប់ខាងលើ ចេញពីតំបន់ កែឆុន ខេត្ត ព្យុងកាន់ ខាងត្បូង ឆ្ពោះទៅកាន់សមុទ្រជប៉ុន ដោយហោះបានចំងាយ៣៣០គីឡូម៉ែត្រ ៕ធ.ដ

ជប៉ុន៖ នៅថ្ងៃពុធនេះ នាយករដ្ឋមន្រ្តីជប៉ុនលោក អាបេ ស៊ីនហ្សូ បានសម្រេចធ្វើការរុះរើសមាសភាពនៃគណបក្សកាន់អំណាច LDP ស្របពេលដែលប្រទេសជប៉ុនកំពុងប្រឈមនឹងបញ្ហាជាច្រើន ដូចជាផលប៉ះពាល់នៃការដំឡើងពន្ធលើការប្រើប្រាស់ ដែលគ្រោងនឹងធ្វើឡើងនៅថ្ងៃទី០១ ខែតុលាខាងមុខ ។ សម្រាប់ការផ្លាស់ប្តូរដើម្បីជំនួសរដ្ឋមន្រ្តីចំនួន១៧រូបក្នុងចំណោម១៩រូប នៅក្នុងគណៈរដ្ឋមន្រ្តីរបស់លោក អាបេ ខាងលើ គឺជាការរុះរើទ្រង់ទ្រាយធំលើកដំបូងចាប់តាំងពីខែតុលាមក បន្ទាប់ពីគណបក្សប្រជាធិបតេយ្យសេរីរបស់លោក អាបេ និងដៃគូចម្រុះរបស់ខ្លួន គឺគណបក្សកូមេតូ ទទួលបានជ័យជម្នះនៅក្នុងការបោះឆ្នោតសភាជាន់ខ្ពស់នៅរដូវក្តៅ ។ សូមបញ្ជាក់ថា នៅខែវិច្ឆិកា ឆ្នាំ២០១៩នេះ លោក អាបេ ស៊ីនហ្សូន នឹងក្លាយជានាយករដ្ឋមន្រ្តីជប៉ុន ដែលកាន់អំណាចបានយូរជាងគេបង្អស់ គិតចាប់តាំងពីលោកបានត្រឡប់មកកាន់តំណែងនេះវិញកាលពីឆ្នាំ២០១២ ៕ធ.ដ

កូរ៉េខាងត្បូង៖ នៅថ្ងៃពុធនេះ កូរ៉េខាងត្បូងបានដាក់ពាក្យបណ្តឹងទៅអង្គការពាណិជ្ជកម្មពិភពលោក (WTO) ទាក់ទិននឹងការទប់ស្កាត់ការនាំចេញរបស់ជប៉ុន ដោយបង្កើនភាពតានតឹងនៅក្នុងជម្លោះពាណិជ្ជកម្ម ដែលមិនធ្លាប់មានពីមុនមករវាងប្រទេសជិតខាងអាស៊ីទាំងពីរ ។ ជាមួយគ្នានេះ រដ្ឋមន្រ្តីក្រសួងពាណិជ្ជកម្មកូរ៉េខាងត្បូងលោកស្រី យូ ម្យុងហ៊ី បានឲ្យដឹងនៅក្នុងសន្និសីទសារព័ត៌មានថា ប្រទេសរបស់លោកបានសម្រេចចិត្ត ដាក់ពាក្យបណ្តឹងទៅអង្គការពាណិជ្ជកម្មពិភពលោក ស្តីពីការទប់ស្កាត់ការនាំចេញរបស់ជប៉ុន ប្រឆាំងនឹងវត្ថុធាតុដើមសំខាន់ៗចំនួន៣ សម្រាប់បន្ទះឈីប និងអេក្រង់ ។ វិធានការចុងក្រោយនេះរបស់កូរ៉េខាងត្បូង ត្រូវបានធ្វើឡើងបន្ទាប់ពីជប៉ុនបានចាប់ផ្តើមរឹតត្បិតការនាំចេញវត្ថុធាតុដើមឧស្សាហកម្មសំខាន់ៗចំនួន៣ ទៅកាន់កូរ៉េខាងត្បូង ដែលមានសារៈសំខាន់សម្រាប់ការផលិតបន្ទះឈីប និងអេក្រង់ ដែលអាចបង្កផលប៉ះពាល់យ៉ាងខ្លាំង ដល់ឧស្សាហកម្មបច្ចេកវិទ្យាឆ្អឹងខ្នងរបស់ទីក្រុងសេអ៊ូល ៕ធ.ដ

មនុស្សជាង១ពាន់នាក់ហើយ ដែលបានស្លាប់ដោយសារជំងឺគ្រុនឈាម នៅប្រទេសហ្វីលីពីន តាំងពីដើមឆ្នាំ២០១៩មកនេះ។ នេះបើតាមការបញ្ជាក់របស់មន្ត្រីរដ្ឋាភិបាល កាលពីថ្ងៃអង្គារម្សិលមិញ។ លោក  Enrique Domingo អនុរដ្ឋលេខាធិការក្រសួងសុខាភិបាលហ្វីលីពីន បាននិយាយថា ចាប់ពីថ្ងៃទី១ ខែមករា ដល់ថ្ងៃទី២៤ ខែសីហា ២០១៩ ចំនួនមនុស្សស្លាប់ដោយសារគ្រុនឈាមមានចំនួន១,០២១ នាក់ បើប្រៀបធៀបនឹងពេលដូចគ្នា កាលពីឆ្នាំ២០១៨ មានចំនួនត្រឹមតែ៦២២នាក់។ ប្រភពថា អ្នកស្លាប់មានអាយុចន្លោះពី៥ ទៅ៩ ឆ្នាំ៕ធ.ដ

សារព័ត៌មាន CNN បានចេញផ្សាយ កាលពីម្សិលមិញថា យ៉ាងហោចណាស់ មានអ្នកដំណើរតាមអាកាសជាង១៣,០០០នាក់ កំពុងជាប់គាំងនៅបរទេសក្រោយពេលដែលក្រុមហ៊ុនអាកាសចរបារាំង Aigle Azur ប្រកាសក្ស័យធន កាលពីសប្ដាហ៍មុន។ ក្រសួងដឹកជញ្ជូនបារាំងថា អ្នកដំណើរភាគច្រើនប្រមាណជា ១១,០០០នាក់ ជាប់គាំងនៅប្រទេសអាល់ហ្សេរី ហើយក្រៅពីនេះនៅក្នុងប្រទេសផ្សេងទៀត។ មានអ្នកដំណើរជាង ១៣,០០០នាក់បានទិញសំបុត្រយន្ដហោះរួចមកហើយ ហើយពួកគេនឹងត្រូវធ្វើមាតុភូមិនិវត្តន៍។ ប្រភពបន្តថា ក្នុងចំណោមពួកគេមាន ១១,០០០នាក់ ស្ថិតក្នុងប្រទេសអាល់ហ្សេរី ៦នាក់នៅម៉ាលី និងលីបង់ រុស្ស៊ី និងសេណាហ្កាល់។ នយោជិក ១,១៥០នាក់ និងបុគ្គលិកជាង៥០០នាក់ ក៏ប្រឈមបាត់បង់ការងារផងដែរ។ យ៉ាងណាមិញ អាជ្ញាធរបារាំងកំពុងព្យាយាមសម្រួលការធ្វើមាតុភូមិនិវត្តន៍សម្រាប់អ្នកដំណើរ និងដាក់ដេញថ្លៃក្រុមហ៊ុនខាងលើដើម្បីបន្ដដំណើរការទៅមុខទៀត៕ធ.ដ

កាលពីថ្ងៃទី១០ កញ្ញា ២០១៩ មហាសេដ្ឋីចិន ជេក ម៉ា ដែលជាអ្នកត្រួសត្រាយផ្លូវដល់សេវាកម្មលក់ទំនិញអនឡាយក្នុងប្រទេសចិន បានលាលែងពីតំណែងជាប្រធានក្រុមហ៊ុន Alibaba ជាផ្លូវការ។ បុរសមានទ្រព្យសម្បត្តិជាង៣៨ពាន់លានដុល្លារអាមេរិករូបនេះ ធ្លាប់បានលើកឡើងថា “មុនពេលខ្ញុំមានអាយុ៧០ឆ្នាំ ខ្ញុំអាចធ្វើរឿងមួយចំនួនក្នុងផ្នែកផ្សេងក្នុងវិស័យអប់រំជាដើម”។ លោក ជេក ម៉ា បានប្រកាសពីគោលបំណងលាលែងនេះតាំងពីមួយឆ្នាំមុន។ ទោះបីជាដើរចេញពីតំណែងជាន់ខ្ពស់នៅ Alibaba ប៉ុន្តែរំពឹងថាលោកនឹងបន្តមើលថែអនាគតក្រុមហ៊ុនតាមរយៈ ការធ្វើជាសមាជិកពេញមួយជីវិតជាមួយ Alibaba Partnership ដែលមានសមាជិក ៣៦នាក់។ លោកក៏នឹងអាចទទួលបានភាគហ៊ុន ៦,២២% នៃ Alibaba ផងដែរ៕ធ.ដ