អ៊ីស្រាអែល៖ នៅទីបំផុតយានអវកាស ប៊ីរេសស៊ីត (Beresheet) របស់អ៊ីស្រាអែល ត្រូវបានក្រុមការងារនៃបេសកកម្មនេះ បញ្ជាឲ្យទៅដល់ក្នុងគន្លងក្បែរព្រះចន្ទដោយជោគជ័យហើយ ខណៈកំពុងត្រៀមខ្លួនចុះចតនៅទីនោះនាសប្តាហ៍ក្រោយនេះ។ នៅពេលដែលយានអវកាសអ៊ីស្រាអែលនេះ ចុះទៅជាន់ដល់ដីនៃផ្ទៃព្រះច័ន្ទនោះ អ៊ីស្រាអែលនឹងក្លាយជាប្រទេសទី៤ ដែលបានធ្វើបែបនេះ បន្ទាប់ពីសហរដ្ឋអាម៉េរិក ចិន និងរុស្ស៊ី។ ក្រោយពីសម្រេចជោគជ័យហើយ ក្នុងអំឡុងសប្តាហ៍នេះ យាន ប៊ីរេសស៊ីត នឹងធ្វើការក្រឡឹងជុំវិញឋានព្រះចន្ទដោយសសៀរសន្សឹមៗទៅកាន់តែកៀក ដើម្បីត្រៀមលក្ខណៈសម្រាប់ការព្យាយាមចុះចតនៅថ្ងៃទី១១ ខែមេសា សប្តាហ៍ក្រោយនេះ។ ផ្ទុយទៅវិញ ប្រសិនបើការចូលទៅក្នុងគន្លងក្បែរព្រះចន្ទមិនបានទទួលជោគជ័យទេនោះ គឺមានន័យថា បេសកកម្មអវកាសមួយនេះរបស់អ៊ីស្រាអែលបានបរាជ័យតែម្តង ព្រោះថា យាន រេសស៊ីត អាចនឹងត្រូវទំនាញរបស់ព្រះអាទិត្យស្រូបទាញយកទៅ៕ធ.ដ

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ បានធ្វើទស្សនកិច្ចទៅកាន់ព្រំដែនអាម៉េរិក និងម៉ិកស៊ិក នៅថ្ងៃសុក្រសប្តាហ៍នេះ (ម៉ោងក្នុងតំបន់) ដើម្បីផ្ញើសារទៅកាន់ជនអន្តោប្រវេសន៍ខុសច្បាប់ថា សហរដ្ឋអាម៉េរិកគ្មានឡើយកន្លែងទំនេរសម្រាប់ការជ្រកកោនរបស់ពួកគេ។ បច្ចុប្បន្នយុទ្ធនាការរបស់លោក ដូណាល់ ត្រាំ គឺការតស៊ូប្រឆំាងនឹងវិបត្តិជនអន្តោប្រវេសន៍នៅតាមព្រំដែន ដែលយុទ្ធសាស្រ្តដ៏សំខាន់មួយ ដើម្បីស្វែងរកការគំាទ្រសម្រាប់អាណត្តិថ្មីនៅក្នុងការបោះឆ្នោតនាឆ្នំា២០២០ខាងមុខនេះ។ រហូតមកទល់ពេលនេះ ចំនួនជនអន្តោប្រវេសន៍ និងជនភៀសខ្លួនដែលធ្វើចំណាកស្រុកដោយសារតែអំពើហិង្សានៅប្រទេសអាម៉េរិកកណ្តាល បាននឹងកំពុងកើនឡើងគួរឱ្យកត់សម្គាល់ បើទោះបីជាមានការប្រកាសអាសន្នថ្នាក់ជាតិ និងគំរាមបិទព្រំដែនភាគខាងត្បូងជាប់ម៉ិចស៊ិកទាំងស្រុងពីសំណាក់លោក ត្រាំ ក្តី។ សូមបញ្ជាក់ថា ដោយសារភាពក្រីក្រ និងបទល្មើសផ្សេងៗ រួមទាំងអំពើពុករលួយផងនោះ ប្រទេសហ្គាតេម៉ាឡា ហុងដូរ៉ាស់ និងអែលសាល់វ៉ាឌ័រ បានក្លាយជាប្រភពចម្បងនៃជនអន្តោប្រវេសន៍ដែលព្យាយាមភៀសខ្លួនមកកាន់ទឹកដីសហរដ្ឋអាម៉េរិក៕ធ.ដ

សហរដ្ឋអាម៉េរិក៖ ក្រុមហ៊ុន Boeing គ្រោងនឹងកាត់បន្ថយសន្ទុះការផលិតប្រចាំខែនៃយន្តហោះ 737 MAX ដោយចាប់ផ្តើមពីខែនេះតទៅ ដើម្បីផ្តោតការប្រើប្រាស់ធនធានទៅលើកិច្ចប្រឹងប្រែងធ្វើយ៉ាងណាឲ្យ 737 MAX អាចវិលត្រឡប់ទៅហោះលើផ្ទៃអាកាសវិញ នេះបើតាមការបញ្ជាក់របស់នាយកប្រតិបត្តិក្រុមហ៊ុន Boeing លោក ឌេននីស មៀលលែនបឺគ (Dennis Muilenburg)។ នាយកប្រតិបត្តិក្រុមហ៊ុន Boeing រូបនេះ បាននិយាយថា យើងបានសម្រេចកាត់បន្ថយអត្រានៃការផលិតពី៥២គ្រឿងក្នុងមួយខែ មកត្រឹម៤២គ្រឿងវិញ ដោយចាប់ផ្តើមពីពាក់កណ្តាលខែមេសានេះតទៅ ហើយប្តេជ្ញាថា នឹងខិតខំធ្វើការកែសម្រួលប្រព័ន្ធហោះហើររបស់យន្តហោះ 737 MAX ដើម្បីទប់ស្កាត់កុំឲ្យមានគ្រោះថ្នាក់បែបនេះកើតឡើងជាថ្មីម្តងទៀត។ ការអះអាងបែបនេះរបស់លោក ឌេននីស មៀលលែនបឺគ ធ្វើឡើងក្រោយពេលដែលរូបលោកនៅថ្ងៃព្រហស្បតិ៍សប្តាហ៍នេះ បានចេញមុខសុំទោសពិភពលោក និងបានទទួលស្គាល់ជាលើកដំបូងថា កំហុសឆ្គងលើការវិភាគទិន្នន័យនៃប្រព័ន្ធរបស់យន្តហោះ មានជាប់ពាក់ព័ន្ធក្នុងការធ្វើឲ្យយន្តហោះ 737 MAX 8 សរុបពីរគ្រឿងធ្លាក់ ដោយមួយគ្រឿងនៅឥណ្ឌូណេស៊ីកាលពីខែតុលា ឆ្នាំមុន និងមួយគ្រឿងទៀតនៅអេត្យូពី កាលពីខែមីនាឆ្នំានេះ ខណៈហេតុការណ៍ធ្លាក់យន្តហោះទាំងពីរករណីនោះ បានផ្តាច់ជីវិតមនុស្សសរុប៣៤៦នាក់៕ធ.ដ

អង់គ្លេស៖ ការពន្យាពេលធ្វើ Brexit ឬការចាកចេញពីសហភាពអឺរ៉ុបនឹងត្រូវអូសបន្លាយពេលវេលាបន្ថែមទៀតរហូតដល់ថ្ងៃទី៣០ ខែមិថុនា ឆ្នាំ២០១៩ខាងមុខនេះ បន្ទាប់ពីនាយករដ្ឋមន្ត្រីអង់គ្លេស លោកស្រី ថេរ៉េសា មេ បានបញ្ជូនសំបុត្រមួយទៅកាន់សហភាពអឺរ៉ុប ដើម្បីស្នើសុំពន្យារពេលជាថ្មីម្ដងទៀត។ នៅក្នុងសំបុត្រផ្ញើជូនប្រធានក្រុមប្រឹក្សាអឺរ៉ុបលោក ដូណាល់ ថាស់ លោកស្រី មេ បានបញ្ជាក់ថា បើសភាសម្រេចអនុម័តលើកិច្ចព្រមព្រៀងរបស់លោកស្រីក្នុងពេលនេះ នោះអង់គ្លេសអាចនឹងចាកចេញពីសហភាពអឺរ៉ុប នៅមុនការបោះឆ្នោតសភាអឺរ៉ុបនៅថ្ងៃទី២៣ ខែឧសភា ពោលគឺមិនចាំបាច់រង់ចាំដល់ថ្ងៃទី៣០ ខែមិថុនានោះទេ។ គួរបញ្ជាក់ថា ចក្រភពអង់គ្លេសនឹងត្រូវចាកចេញពីសហភាពអឺរ៉ុបនៅថ្ងៃទី១២ ខែមេសានេះ ខណៈកិច្ចព្រមព្រៀង Brexit របស់លោកស្រី មេ ត្រូវបានសភាទាត់ចោល៣ដងរួចមកហើយ បើទោះជាលោកស្រីផ្ទាល់ធ្លាប់សន្យាថា នឹងចុះចេញពីតំណែងឱ្យតែកិច្ចព្រមព្រៀងនេះត្រូវបានសភាអនុម័តក៏ដោយ៕ធ.ដ

រុស្ស៊ី៖ ថ្លែងប្រាប់អ្នកយកព័ត៌មាននៅថ្ងៃសុក្រនេះ (ម៉ោងក្នុងតំបន់) ជំនួយការវិមានក្រឹមលោក យូរី អូហ្សេកកូវ បានបញ្ជាក់ថា ទីក្រុងម៉ូស្គូបាននឹងកំពុងត្រៀមខ្លួនរៀបចំសម្រាប់ការបំពេញទស្សនកិច្ចរបស់មេដឹកនាំកំពូលកូរ៉េខាងជើងលោក គីម ជុងអ៊ុន មកកាន់ប្រទេសរុស្ស៊ី។ ជាមួយគ្នានេះ សារព័ត៌មាន TASS របស់រុស្ស៊ី បានចុះផ្សាយថា ក្រុមមន្រ្តីរបស់ប្រទេសទាំងពីរក៏បាននឹងកំពុងធ្វើកិច្ចពិភាក្សាគ្នាបន្ថែមទៀតផងដែរ ស្តីពីកាលបរិច្ឆេទ និងការធ្វើដំណើរ ហើយតាមលោក យូហ្សេកកូវ នោះ រុស្ស៊ីក៏កំពុងទន្ទឹងរង់ចំាការឆ្លើយតបពីសំណាក់ភាគីកូរ៉េខាងជើង ដោយសារការអញ្ជើញនេះ ត្រូវបានប្រគល់ជាផ្លូវការ។ សូមរំលឹកថា ក្នុងអំឡុងដំណើរទស្សកិច្ចទៅកាន់ទីក្រុងព្យុងយ៉ាង កាលពីខែឧសភាកន្លងទៅ រដ្ឋមន្រ្តីការបរទេសរុស្ស៊ីលោក សឺហ្គៃ ឡាវរូវ បានអញ្ជើញប្រមុខដឹកនាំកំពូលកូរ៉េខាងជើងលោក គីម ជុងអ៊ុន ទៅបំពេញទស្សនកិច្ចនៅប្រទេសរុស្ស៊ី។ នាឱកាសនោះ ប្រមុខការទូតរុស្ស៊ីរូបនេះ បាននិយាយយ៉ាងដូច្នេះថា មកកាន់រុស្ស៊ី ពួកយើងនឹងរីករាយយ៉ាងខ្លាំងដែលជួបអ្នក (លោក គីម ជុងអ៊ុន) នេះបើតាមការលើកឡើងរបស់លោក ឡាវរូវ ទៅកាន់មេដឹកនាំកំពូលកូរ៉េខាងជើង ដែលត្រូវបានចេញផ្សាយដោយក្រសួងការបរទេសរុស្ស៊ី៕ធ.ដ

ក្រុមហ៊ុនផលិតរថយន្តធំៗនៅសហរដ្ឋអាម៉េរិក បានរាយការណ៍ពីការធ្លាក់ចុះការលក់រថយន្តនៅលើទីផ្សារប្រទេសរបស់ខ្លួនក្នុងត្រីមាសទី១ ឆ្នាំ២០១៩នេះ ប៉ុន្តែបានបង្ហាញទំនុកចិត្តលើទីផ្សារ ទោះក្រុមអ្នកឃ្លាំមើលឧស្សាហកម្មនេះមួយចំនួនបានព្យាករមិនល្អសម្រាប់ឆ្នាំនេះ។ អ្នកវិភាគបានឲ្យដឹងថា ការលក់រថយន្តនៅត្រីមាសទី១ បានរងប៉ះពាល់ដោយសារឥទ្ធិពលនៃការបិទរដ្ឋាភិបាលអាម៉េរិក និងការធ្លាក់ចុះទីផ្សារភាគហ៊ុនអាម៉េរិកនៅចុងឆ្នាំ២០១៨ ប៉ុន្តែអ្នកវិភាគទាំងនេះក៏ព្រមានផងដែរអំពីទីផ្សាររថយន្តដែលកំពុងធ្លាក់ចុះ។ ក្រុមហ៊ុន GM បានរាយការណ៍ពីការធ្លាក់ចុះការលក់រថយន្តម៉ូដែលជាច្រើន រួមទាំងរថយន្តប្រភេទ SUV និងភីកអាប់ដែលឈានមុខគេរបស់ខ្លួនផងដែរ ប៉ុន្តែបានបន្ទោសមួយផ្នែកលើការផ្គត់ផ្គង់ដែលមានកម្រិត សម្រាប់រថយន្តភីកអាប់ថ្មី ដែលបានចាប់ផ្តើមផលិតក្នុងអំឡុងត្រីមាសទី១នេះ។ ចំណែកឯក្រុមហ៊ុនផលិតរថយន្ត Fiat Chrysler (FCA,) បានរាយការណ៍ពីការធ្លាក់ចុះការលក់៣ភាគរយក្នុងពេលដូចគ្នានេះមកត្រឹមចំនួន៤៩៨.៤២៥គ្រឿង។ សម្រាប់ខែមីនាឆ្នំានេះ ក្រុមហ៊ុន FCA លក់រថយន្តធ្លាក់ចុះ៧ភាគរយមកនៅត្រឹមចំនួន២០០.៣០៧គ្រឿង។ រីឯក្រុមហ៊ុន Toyota ក៏រាយការណ៍ពីការធ្លាក់ចុះការលក់៥ភាគរយមកនៅត្រឹមចំនួន៥៤៣.៧១៦គ្រឿងនៅត្រីមាសទី១ និងធ្លាក់៣,៥ភាគរយនៅខែមីនាមកត្រឹមចំនួន២១៤.៩៤៧ គ្រឿង និងក្រុមហ៊ុន General Motors ដែលជាក្រុមហ៊ុនផលិតរថយន្តធំបំផុតរបស់អាម៉េរិក លក់រថយន្តបានចំនួន៦៦៥.៨៤០គ្រឿងក្នុងរយៈពេល៣ខែដំបូងក្នុងឆ្នាំនេះ ធ្លាក់ចុះ៧ភាគរយ បើធៀបនឹងរយៈពេលដូចគ្នាកាលពីឆ្នាំ២០១៧។គួរបញ្ជាក់ថា ការធ្លាក់ចុះទាំងនេះមានភាពស្របគ្នាទៅនឹងការព្យាករណ៍របស់ភាគីនានា ដែលបានព្រមានពីការថមថយកំណើនសេដ្ឋកិច្ច ការដំឡើងអត្រាការប្រាក់ និងការកើនឡើងតម្លៃលក់រាយ៕ធ.ដ

អង្គការពាណិជ្ជកម្មពិភពលោក (WTO) បានធ្វើការព្យាករណ៍ថា ពាណិជ្ជកម្មពិភពលោកនៅឆ្នាំ ២០១៩ នេះ រំពឹងថា នឹងកើនឡើងកាន់តែទាប ដោយ WTO បានលើកឡើងពីភាពតានតឹង ដែលរីករាលដាល និងភាពមិនច្បាស់លាស់ផ្នែកសេដ្ឋកិច្ច។ បើតាមឯកសារព្យាករបឋមរបស់ខ្លួនកន្លងមក អង្គការពាណិជ្ជកម្មពិភពលោកមួយនេះ បានព្យាករណ៍ថា កំណើនពាណិជ្ជកម្មនឹងកើនឡើង ៣,៧ ភាគរយនៅឆ្នាំ២០១៩នេះ ប៉ុន្តែអង្គការ WTO បានកែតម្រូវការព្យាករនោះទម្លាក់មកនៅត្រឹម ២,៦ ភាគរយ ដែលបង្ហាញពីការធ្លាក់ចុះពីកំណើន៣ភាគរយដែលបានកត់ត្រាកាលពីឆ្នាំ២០១៨។ ក្នុងការព្យាករប្រចាំឆ្នាំដ៏សំខាន់របស់ខ្លួន អង្គការពាណិជ្ជកម្មពិភពលោកដែលមានសមាជិក១៦៤ប្រទេសនេះ បានលើកឡើងជាថ្មីអំពីបារម្ភពីការគំរាមកំហែងជាប្រព័ន្ធ ដែលអាចបន្តរារាំងដល់សេដ្ឋកិច្ចរបស់ពិភពលោក ជាពិសេសពន្ធនាំចូលសងសឹកគ្នារវាងចិន និងសហរដ្ឋអាម៉េរិក។ ទន្ទឹមគ្នានោះ បើតាមក្រុមសេដ្ឋវិទូនៅអង្គការពាណិជ្ជកម្មពិភពលោក ការពិតដែលថា តួលេខចុងក្រោយមានកម្រិតទាបជាងការព្យាករណ៍បឋមចំនួន១,៤ភាគរយនោះ បញ្ជាក់ពីហានិភ័យនៃការធ្លាក់ចុះខ្លាំង ដែលធ្វើឲ្យប៉ះពាល់ដល់សេដ្ឋកិច្ចពិភពលោក។ យ៉ាងណាមិញ អង្គការ WTO បានឲ្យដឹងទៀតថា សម្រាប់ឆ្នាំ២០១៩នេះ ហានិភ័យនៃការធ្លាក់ចុះជាថ្មីម្តងទៀតមានទម្ងន់ខ្លាំងជាសក្តានុពលនៃការកើនឡើងទៅទៀត ប៉ុន្តែការបន្ធូរបន្ថយភាពតានតឹង ជាពិសេសការលុបចោលវិធានការពាណិជ្ជរឹតបន្តឹង អាចមើលឃើញថា ពាណិជ្ជកម្មនៅឆ្នាំ ២០១៩ នឹងកើនលើសពីការព្យាករណ៍នេះ៕ធ.ដ …

សហរដ្ឋអាម៉េរិក៖ រុស្ស៊ី ចិន និងសហរដ្ឋអាម៉េរិក គួរតែឈប់ចាយលុយលើសព្វាវុធទៀតទៅ ហើយងាកមកវិនិយោគលើការធ្វើដំណើរឆ្ពោះទៅរកការកសាងសន្តិភាពយូរអង្វែងវិញ នេះបើតាមការបញ្ជាក់របស់ប្រធានាធិបតីអាម៉េរិក លោក ដូណាល់ ត្រាំ។ ការកត់សម្គាល់បែបនេះរបស់លោក ដូណាល់ ត្រាំ បានកើតមានឡើងបន្ទាប់ពីរដ្ឋមន្រ្តីការបរទេសអាម៉េរិកលោក ម៉ៃ ប៉ុមប៉េអូ ទើបតែបានប្រាប់ឲ្យអង្គការ NATO ត្រៀមលក្ខណៈដើម្បីប្រឈមនឹងបញ្ហាសន្តិសុខសកលថ្មី ដែលអាចបង្កឡើងដោយរុស្ស៊ី និងចិន។ ប្រធានាធិបតីអាម៉េរិករូបនេះ បានថ្លែងនៅចំពោះមុខអ្នកសារព័ត៌មានថា លោកយល់ថា សហរដ្ឋអាម៉េរិក រុស្ស៊ី និងចិន អាចស្រុះស្រួលគ្នាបាន ហើយបញ្ឈប់ការចំណាយលុយលើសព្វាវុធ រួចងាកមកចាយលើអ្វីដែលមានប្រយោជន៍សម្រាប់ការកសាងសន្តិភាពយូរអង្វែងវិញ។ ជាមួយគ្នានេះ ឧបនាយករដ្ឋមន្រ្តីចិន លោក លីវ ហេ ដែលមានវត្តមាននៅសេតវិមានដែរនោះ បាននិយាយថា លោកយល់ស្របជាមួយគំនិតរបស់លោក ដូណាល់ ត្រាំ៕ធ.ដ

សហរដ្ឋអាម៉េរិក៖ ទីក្រុងវ៉ាស៊ីនតោនបានសម្រេចលុបចោលទិដ្ឋាការចូលមកកាន់សហរដ្ឋអាម៉េរិក សម្រាប់រដ្ឋអាជ្ញានៃតុលាការព្រហ្មទណ្ឌអន្តរជាតិ (ICC) លោកស្រី ហ្វាតូ ប៊ិនសួដា ដោយសារតែការស៊ើបអង្កេតជុំវិញឧក្រិដ្ឋកម្មសង្រ្គាមប្រព្រឹត្តដោយយោធាអាម៉េរិកនៅអាហ្វហ្កានីស្ថាន។ របាយការណ៍មួយរបស់តុលាការព្រហ្មទណ្ឌអន្តរជាតិ ដែលចេញផ្សាយកាលពីឆ្នាំ២០១៦បានបញ្ជាក់ថា យោធាអាម៉េរិកបានប្រព្រឹត្តអំពើទារុណកម្មជាសម្ងាត់នៅតាមមន្ទីរឃុំឃំាងជាច្រើន ដែលប្រតិបត្តិដោយ CIA របស់អាម៉េរិកនៅអាហ្វហ្កានីស្ថាន ខណៈរដ្ឋាភិបាលក្រុងកាប៊ុល និងក្រុមតាលីបង់ក៏បានចោទប្រកាន់ផងដែរពីការប្រព្រឹត្តបទឧក្រិដ្ឋសង្រ្គាម ។ គួរបញ្ជាក់ថា ការសម្រេចចិត្តខាងលើរបស់របស់ក្រសួងការបរទេសអាម៉េរិក មានកើតមានឡើងបន្ទាប់ប្រមុខការទូតអាម៉េរិកលោក ម៉ៃ ប៉ុមប៉េអូ បានព្រមានដែរថា ប្រទេសរបស់លោកនឹងលុបចោលរាល់ទិដ្ឋាការចូលក្នុងប្រទេស សម្រាប់បុគ្គលិកទាំងអស់របស់តុលាការព្រហ្មទណ្ឌអន្តរជាតិ ICC បើនៅតែបន្តស៊ើបអង្កេតប្រឆាំងសហរដ្ឋអាម៉េរិក និងសម្ព័ន្ធមិត្តរបស់ខ្លួន៕ធ.ដ

សហរដ្ឋអាម៉េរិក៖ ពលរដ្ឋអាម៉េរិក និងវេណេស៊ុយអេឡា ត្រូវបានអំពាវនាវឲ្យចាកចេញពីប្រទេសអាម៉េរិកឡាទីនមួយនេះ នៅមុនបាតុកម្មគាំទ្រ និងប្រឆាំងរដ្ឋាភិបាលគ្រោងធ្វើឡើងនៅថ្ងៃសៅរ៍សប្តាហ៍នេះ ស្របពេលមានការដាច់ចរន្តអគ្គិសនីរាប់សប្តាហ៍មកហើយ នេះបើតាមសេចក្តីណែនាំរបស់ស្ថានទូតអាម៉េរិកនៅទីក្រុងការ៉ាកាស់។ បាតុកម្មជាន់គ្នារវាងអ្នកគាំទ្រលោកប្រធានាធិបតី នីកូឡាស់ ម៉ាឌូរ៉ូ និងមេដឹកនាំបក្សប្រឆាំងលោក ចូអាន់ ហ្គៃដូ បានក្លាយជាសាមញ្ញនៅប៉ុន្មានសប្តាហ៍មកនេះ តែបាតុកម្មនៅថ្ងៃសៅរ៍សប្តាហ៍នេះ ត្រូវបានគេរំពឹងថា នឹងធ្វើឡើងជាលក្ខណៈទ្រង់ទ្រាយធំ បន្ទាប់ពីអាជ្ញាធរវេណេស៊ុយអេឡាចាប់ផ្តើមចាត់វិធានការលើមេដឹកនាំបក្សប្រឆាំង ហើយសហរដ្ឋអាម៉េរិកក៏បានព្រមានជាចំហផងដែរ។ គួរបញ្ជាក់ថា វិបត្តិនយោបាយនៅវេណេស៊ុយអេឡា បានផ្ទុះឡើងកាលពីខែមករា ដើមឆ្នាំនេះ នៅពេលមេដឹកនាំបក្សប្រឆាំងដែលគាំទ្រដោយសហរដ្ឋអាម៉េរិក គឺលោក ហ្គៃដូ បានប្រកាសខ្លួនឯងជាប្រធានាធិបតីបណ្តោះអាសន្ន ក្រោយបដិសេធការជាឆ្នោតជាថ្មីរបស់លោក ម៉ាឌូរ៉ូ កាលពីខែឧសភា ។ ប៉ុន្តែរុស្ស៊ី ចិន គុយបា បូលីវី តួកគី និងប្រទេសមួយចំនួនទៀតប្រកាសមិនទទួលស្គាល់លោក ហ្គៃដូ ឡើយ ហើយបន្តគាំទ្រលោក ម៉ាឌូរ៉ូ ជាមេដឹកនាំស្របច្បាប់របស់វេណេស៊ុយអេឡា៕ធ.ដ