សហរដ្ឋអាម៉េរិក៖ ក្រុមហ៊ុន Apple កំពុងតែព្យាយាមបង្កើនចំនួនលក់ iPhone ក្នុងប្រទេសចិន តាមរយៈការបញ្ចុះតម្លៃលក់។ សារព័ត៌មាន National Business Daily បានរាយការណ៍ថា ខ្លួនទទួលបានដំណឹងនេះ ក្រោយពីមានតម្រូវការទាបពេញមួយត្រីមាសទី៤ ឆ្នាំ២០១៨ ពេលនេះ Apple បានបន្ថយតម្លៃលក់ iPhone 8, iPhone 8 Plus, iPhone XR, iPhone XS និង iPhone XS Max ក្នុងប្រទេសចិន។ ជាមធ្យម iPhone ប៉ុន្មានម៉ូដែលខាងលើនេះត្រូវបានបន្ថយតម្លៃប្រមាណ៥៩ដុល្លារ (៤០០យ័ន)។ ម៉ូដែលដែលបន្ថយថ្លៃច្រើនជាងគេនោះគឺ iPhone XR ដែលបច្ចុប្បន្ននេះមានតម្លៃប្រមាណ ៧៧០ដុល្លារ ដែលថោកជាងពីមុនប្រមាណ៦៦ដុល្លារ។ ប្រភពបញ្ជាក់ថា ការបញ្ចុះតម្លៃនេះមិនមាននៅហាង Apple Store ឬ វិបសាយផ្លូវការរបស់ Apple នៅប្រទេសចិននោះទេ។ ផ្ទុយមកវិញអតិថិជនត្រូវរកទិញ…

រុស្ស៊ី៖ ដើម្បីពង្រឹងសម្ថភាពកម្លាំងទាហានជើងទឹកឱ្យកាន់តែរឹងមំាខ្លាំងក្លានោះ នៅដើមឆ្នាំ២០១៩នេះ រុស្ស៊ីនឹងធ្វើការបង្កើនការធ្វើសមយុទ្ធបាញ់គ្រាប់ពិតជាច្រើន ដោយនៅក្នុងខែមករានេះ មានសមយុទ្ធដល់ទៅ៤លើកបានឡើងគម្រោងរួចរាល់ហើយ។ មជ្ឈមណ្ឌលប្រកាសព័ត៌មានស្តីពីចរាចរណ៍ដែនអាកាសអន្តរជាតិ NOTAM បានផ្សាយថា ក្រុមនាវាចម្បាំងរបស់រុស្ស៊ីឈរជើងនៅដែនសមុទ្រមេឌីទែរ៉ាណេ នឹងធ្វើសមយុទ្ធបាញ់គ្រាប់ពិតចំនួន៤លើកនៅក្នុងខែមករា ដើមឆ្នាំ២០១៩នេះ ស្ថិតនៅក្នុងដែនសមុទ្រមេឌីទែរ៉ាណេ ជិតឆ្នេរសមុទ្រប្រទេសស៊ីរី។ បើតាមប្រភពដដែលបន្តថា កម្លាំងទាហានរុស្ស៊ីបានស្នើដល់បណ្តាមធ្យោបាយធ្វើដំណើរនៅតាមដែនសមុទ្រមេឌីទែរ៉ាណេបង្វែរទិសដៅ ដោយទាហានជើងទឹករុស្ស៊ីនឹងធ្វើសមយុទ្ធបាញ់គ្រាប់ពិតដល់ទៅ៤លើក គឺលើកទីមួយចាប់ពីថ្ងៃទី៩ ដល់ទៅ១០ លើកទីពីរចាប់ពីថ្ងៃទី១៦ ដល់ទី១៧ លើកទីបីចាប់ពីថ្ងៃទី២៣ ដល់ទី២៤ និងលើកទី៤ ចាប់ពីថ្ងៃទី៣០ ដល់ទី៣១ ខែមករានេះ។ សូមបញ្ជាក់ថា ក្រសួងការពារជាតិរុស្ស៊ីតែងតែប្រកាសឲ្យបិទតំបន់មួយចំនួននៅសមុទ្រមេឌីទែរ៉ានេ ដើម្បីធ្វើសមយុទ្ធ ជាក់ស្តែងកាលពីខែកញ្ញា ឆ្នាំ២០១៨ រុស្ស៊ី ក៏បានបិទផ្លូវសមុទ្រដ៏សំខាន់មួយនេះក្នុងរយៈពេល៨ថ្ងៃផងដែរ នៅពេលដែលទាហានជើងទឹក និងជើងអាកាសរុស្ស៊ីធ្វើសមយុទ្ធ៕

តួកគី៖ រដ្ឋមន្ត្រីការបរទេសតួកគីលោក ម៉េវលូត ខាវូសូគ្លូ បានថ្លែងអះអាងថា ប្រទេសរបស់លោកអាចនឹងពិចារណាក្នុងការទិញប្រព័ន្ធមីស៊ីលការពារដែនអាកាស Patriot របស់សហរដ្ឋអាម៉េរិក នៅក្នុងលក្ខខណ្ឌសមរម្យណាមួយ។ កាលពីពេលថ្មីៗនេះ ប្រតិភូរដ្ឋាភិបាលអាម៉េរិកមួយក្រុមត្រូវបានគេរាយការណ៍ថា បានព្យាយាមបញ្ចុះបញ្ចូលទីក្រុងអង់ការ៉ា ឲ្យបោះបង់ចោលការទិញប្រព័ន្ធមីស៊ីល S-400 របស់រុស្ស៊ី ហើយងាកមកទិញប្រព័ន្ធមីស៊ីល Patriot របស់ខ្លួនវិញ ប៉ុន្តែសំណើរបស់ទីក្រុងវ៉ាស៊ីនតោន ត្រូវបានតួកគីបដិសេធចោល។ ថ្លែងក្នុងបទសម្ភាសន៍ជាមួយទូរទស្សន៍រដ្ឋ នៅថ្ងៃព្រហស្បត្តិ៍សប្តាហ៍នេះ ប្រមុខការទូតតួកគីរូបនេះបានសង្កត់ធ្ងន់ថា ទីក្រុងអង់ការ៉ាអាចនឹងបោះបង់ចោលគម្រោងទិញប្រព័ន្ធមីស៊ីល Patriot របស់សហរដ្ឋអាម៉េរិកគ្រប់ពេល បើសិនជាទីក្រុងវ៉ាស៊ីនតោននៅតែបង្ខំឱ្យទីក្រុងអង់ការ៉ា បញ្ឈប់គម្រោងទិញប្រព័ន្ធមីស៊ីលការពារដែនអាកាស S-400 ពីរុស្ស៊ីនោះ៕

ឡាវ៖ នៅក្នុងកិច្ចព្រមព្រៀងត្រីភាគី ដែលក៏ពាក់ព័ន្ធនឹងវៀតណាមផងដែរនោះ រុស្ស៊ីបានទទួលទំនិញរថក្រោះសម័យសង្គ្រាមលោកលើកទី២ ធុន T-34/85 ចំនួន៣០គ្រឿងមកពីឡាវ ដែលត្រូវបានដាក់ប្រើក្នុងកងកម្លាំងប្រដាប់អាវុធឡាវចាប់តាំងពីឆ្នាំ១៩៨៧។ ពួកវានឹងចូលរួមក្នុងក្បួនព្យុហយាត្រាដាក់ក្នុងសារមន្ទីរ និងអាចត្រូវបានយកទៅថតខ្សែភាពយន្តដែលឧបត្ថម្ភគាំទ្រដោយរដ្ឋរុស្ស៊ី។ បើតាមក្រសួងការពារជាតិរុស្ស៊ី រថក្រោះ T-34s ដែលនៅលាបរូបទង់ជាតិឡាវនៅឡើយ បានមកដល់កំពុងផែ វ្ល៉ាឌីវ៉ូស្តុក របស់រុស្ស៊ីនៅថ្ងៃទៅ០៩ ខែមករានេះ ដោយពួកវានឹងត្រូវបញ្ជូនទៅកាន់ទីក្រុងណារ៉ូ-ហ្វូមីន ដែលជាទីតាំងកងពលរថក្រោះ។ រូបភាពក្នុងបណ្តាញសង្គមកាលពីខែមុនបង្ហាញថា រុស្ស៊ីបានបញ្ជូនចេញរថក្រោះទំនើបមួយក្រុមដំបូងហៅឥន្ទ្រីសធុន T-72B1 ទៅកាន់ឡាវ ដោយរថក្រោះមួយក្រុមនេះ ត្រូវបានគេឃើញនៅក្នុងនាវានៅកំពង់ផែមួយនៅវៀតណាមដែលគេបញ្ជូនចេញ និងដាក់លើរថយន្តសណ្តោងធំៗដឹកទៅកាន់ឡាវ ដែលនឹងត្រូវទទួលរថក្រោះរុស្ស៊ីបន្ថែមទៀត។ រុស្ស៊ីបានបញ្ចេញរថក្រោះទំនើបឥន្ទ្រីស T-72B1 នេះនៅឆ្នាំ២០១០ និងបានលក់មួយក្រុមដំបូងទៅកាន់ប្រទេសនីការ៉ាហ្គ័រ។ វាជាការកែកុនធ្វើឲ្យប្រសើរឡើងពីរថក្រោះធុន T-72Bs ដោយបន្ថែមបន្ទះលោហៈប្រឆាំងនឹងការផ្ទុះ Kontakt-1 កែវឆ្លុះស្វែងរកគោលដៅណាដែលមានកំដៅ និងឡាហ៊្សែរប្រភេទថ្មី កាំភ្លើងលើរថក្រោះបញ្ជាបាញ់ពីចម្ងាយ និងគ្រឿងបរិក្ខារទាក់ទងទំនើប៕  

អង់គ្លេស៖ បន្ទាប់ពីអាកាសយានដ្ឋាន Gatwick ធ្វើឲ្យជើងហោះហើរដល់ទៅ៧០០ជើងត្រូវពន្យារពេល និងអ្នកដំណើរជាង១៤ម៉ឺននាក់ជាប់គាំង បណ្តាលមកពីយន្តហោះគ្មានមនុស្សបើក (Drone) នោះ នៅពេលនេះដែរ អាកាសយានដ្ឋានដ៏មមាញឹកបំផុតនៅអឺរ៉ុបនេះ បន្តផ្អាកហោះហើរមួយទៀតដោយសារតែ UAV។ អាកាសយានដ្ឋានអន្តរជាតិ Heathrow ក្នុងទីក្រុងឡុដ៍ បានបន្តផ្អាកហោះហើរ ក្នុងរយៈពេលជាង១ម៉ោង ក្រោយពេលប្រទះឃើញយន្តហោះគ្មានមនុស្សបើក (Drone) នៅក្នុងអាកាសយានដ្ឋាន ខណៈកាលពី៣សប្តាហ៍កន្លងមក ក៏មានសកម្មភាពដូចគ្នានេះ កើតឡើងនៅក្នុងអាកាសយានដ្ឋាន Gatwick ផងដែរ។ បើតាមការបញ្ជាក់ពីក្រុមអ្នកគ្រប់គ្រងអាកាសយានដ្ឋានខាងលើ បានឲ្យដឹងថា យើងចំាបាច់ត្រូវតែបង្ខំចិត្តផ្អាករាល់ការហោះហើរទាំងអស់ ដើម្បីធានាដល់សុវត្ថិភាពអ្នកដំណើរ ចំណែកការចុះចតវិញ បានធ្វើឡើងធម្មតា។ ដោយឡែករដ្ឋមន្ត្រីក្រសួងចរាចរណ៍អង់គ្លេស លោក Chris Grayling បានប្រកាសថា កម្លាំងទាហានអង់គ្លេសត្រូវបានដាក់ពង្រាយឧបករណ៍តាមដានយន្តហោះគ្មានមនុស្សបើកនៅអាកាសយានដ្ឋាន Heathrow ក៏ដូចជាអាកាសយានដ្ឋាន Gatwick ។ គួរបញ្ជាក់ផងដែរថា ក្នុងមួយថ្ងៃៗអាកាសយានដ្ឋាន Heathrow ទទួលអ្នកដំណើរជាង២សែននាក់ ដោយមានក្រុមហ៊ុនហោះហើរ៨១ក្រុមហ៊ុន ចុះបញ្ជីនៅអាកាសយានដ្ឋាននេះ ដែលត្រូវបានគេចាត់ទុកថា ជាក្រុមហ៊ុនមមាញឹកបំផុតនៅអឺរ៉ុប៕…

វៀតណាម៖ វៀតណាមទទួលបានមកវិញនូវប្រាក់ជាង១ពាន់លានដុល្លារអាម៉េរិក ពីការរកឃើញអំពើពុករលួយ និងបទល្មើសសេដ្ឋកិច្ចនៅឆ្នាំ២០១៨។ នាយកដ្ឋាននគរបាលទទួលបន្ទុកការស៊ើបអង្កេតលើបទល្មើស និងការជួញដូរពាក់ព័ន្ធនឹងបទល្មើសេដ្ឋកិច្ច និងអំពើពុករលួយ នៃក្រសួងសន្តិសុខសាធារណៈប្រទេសវៀតណាមបានប្រកាសថា ខ្លួនបានប្រមូលប្រាក់បានពីបទឧក្រិដ្ឋទាំងនេះវិញជិត២៧ទ្រីលានដុង ឬ ១,១៦ពាន់លានដុល្លារអាម៉េរិក តាមរយៈការស៊ើបអង្កេតក្នុងឆ្នាំ២០១៨ នេះបើតាមការចេញផ្សាយរបស់សារព័ត៌មាន Vietnamnews នៅថ្ងៃទី១០ មករា ២០១៩នេះ។ ផ្អែកតាមប្រភពតួលេខនេះបង្ហាញថា ជិត៥០ភាគរយនៃទំហំសរុប បានពីការបំពានច្បាប់ ហើយបើធៀបនឹងឆ្នាំ២០១៧ ទឹកប្រាក់នេះកើនឡើងប្រមាណ១៨ភាគរយ។ នាយកដ្ឋាននគរបាលទទួលបន្ទុកការស៊ើបអង្កេតលើបទល្មើស និងការជួញដូរពាក់ព័ន្ធនឹងបទល្មើសេដ្ឋកិច្ច និងអំពើពុករលួយបានផ្សព្វផ្សាយរបាយការណ៍នេះ អំឡុងកិច្ចប្រជុំបូកសរុបការងារឆ្នាំ២០១៨ និងត្រៀមទិសដៅឆ្នាំ២០១៩ របស់ខ្លួន កាលពីពេលថ្មីៗនេះ៕

ចិន៖ រដ្ឋាភិបាលចិនបានចេញផ្សាយរបាយការណ៍ថ្មីៗនេះថា ឆ្នាំ២០១៨ ទីផ្សារលក់ (Smart Phone) ស្មាតហ្វូននៅប្រទេសចិន មានការធ្លាក់ចុះប្រមាណ៣៩០លានគ្រឿង ក្នុងឆ្នាំ២០១៨ ដោយបានដាំក្បាលចុះខ្លាំងបំផុត នាខែធ្នូម្តង ដោយមិនមែនមានតែស្មាតហ្វូន Iphone ទេ។ កន្លងទៅ ក្រុមហ៊ុន Apple បានបង្ហាញតួលេខខាតបង់ចំណូលរាប់ពាន់លានដុល្លារនាត្រីមាស ចុងក្រោយ ដោយមូលហេតុចម្បងត្រូវបានលោក Tim Cook ចង្អុលថាមកពីកត្តាធ្លាក់ចុះការលក់ក្នុងទីផ្សារប្រទេសចិន។ យ៉ាងណាមិញ តាមស្ថិតិច្បាស់ការចេញពីរដ្ឋាភិបាលបានឲ្យដឹងថា មិនត្រឹមតែក្រុមហ៊ុន Apple មួយនោះទេ សូម្បីតែ Samsung និងទីផ្សារលក់ទាំងមូលក៏រងផលប៉ះពាល់ខ្លាំងដូចគ្នា។ ក្រសួងឧស្សាហកម្ម និងព័ត៌មានវិទ្យារបស់ប្រទេសចិនបានរាយការណ៍ថាឆ្នាំ២០១៨ ទីផ្សារលក់ស្មាតហ្វូនមានការធ្លាក់ចុះប្រមាណ ១៥,៥ ភាគរយ ស្មើនឹងតួលេខជាក់ស្តែង ៣៩០លានគ្រឿង ដោយបានដាំក្បាលចុះខ្លាំងបំផុត នាខែធ្នូមានដល់ទៅ១៧ភាគរយ។ តាមការព្យាករណ៍នាឆ្នាំបន្ទាប់ ២០១៩ តួលេខនេះក៏នឹងបន្តធ្លាក់ចុះដល់៤០០លានគ្រឿង ពោលជាកំណត់ត្រាបរាជ័យដំបូងពុំធ្លាប់មានក្នុងប្រវត្តិសាស្ត្ររយៈពេល៥ឆ្នាំចុងក្រោយ។ កត្តាសេដ្ឋកិច្ចដែលកំពុងរងភាពតានតឹង ក្នុងប្រទេសចិន រួមនឹងកត្តានៃការអភិវឌ្ឍបច្ចេកវិទ្យារបស់ក្រុមហ៊ុនយក្សដូចជា Apple និង Samsung មានសភាពយឺត…

សហរដ្ឋអាម៉េរិក៖ រដ្ឋមន្រ្តីការបរទេសអាម៉េរិកលោក ម៉ៃ ប៉ុមប៉េអូ បានធ្វើដំណើរទស្សនកិច្ចដោយមិនប្រកាសឱ្យដឹងជាមុន ទៅកាន់ទឹកដីអ៊ីរ៉ាក់នៅថ្ងៃពុធសប្តាហ៍នេះ ដោយរូបលោកត្រូវគេរាយការណ៍ថា បានធ្វើកិច្ចពិភាក្សាជាមួយក្រុមមេដឹកនាំអ៊ីរ៉ាក់ ពាក់ព័ន្ធនឹងរឿងដកកងកម្លំាងចេញពីទឹកដីស៊ីរី។ លោក ប៉ុមប៉េអូ ដែលបច្ចុប្បន្នកំពុងធ្វើទស្សនកិច្ចនៅក្នុងតំបន់មជ្ឈិមបូព៌ានោះ បានជួបពិភាក្សាជាមួយនាយករដ្ឋមន្រ្តីអ៊ីរ៉ាក់លោក អាឌែល អាប់ឌុល ម៉ាឌី និងប្រធានាធិបតីអ៊ីរ៉ាក់លោក បាហំា សាលី នៅក្នុងរដ្ឋធានីបាដដាដ។ បើតាមការបញ្ជាក់របស់ក្រសួងការបរទេសអាម៉េរិក លោក ប៉ុម ប៉េអូ បានធ្វើកិច្ចពិភាក្សាគ្នាស្តីពីកិច្ចសហប្រតិបត្តិការប្រយុទ្ធប្រឆំាងនឹងក្រុមភេវរកររដ្ឋអ៊ីស្លាម ក៏ដូចជាការបង្ហាញគោលជំហរក្នុងការគំាទ្រដល់រដ្ឋាភិបាលអ៊ីរ៉ាក់។ ដោយឡែកការិយាល័យនាយករដ្ឋមន្រ្តីអ៊ីរ៉ាក់បានឱ្យដឹងដែរថា ប្រមុខការទូតអាម៉េរិកបានចង្អុលបង្ហាញថា សហរដ្ឋអាម៉េរិកនឹងមិនប្រញាប់ក្នុងការដកកងទ័ពចេញពីប្រទេសស៊ីរីនោះទេ ប៉ុន្តែនឹងធ្វើវានៅក្នុងលក្ខណៈរៀបចំឱ្យបានល្អ តាមរយៈការទំនាក់ទំនងជាមួយរដ្ឋាភិបាលអ៊ីរ៉ាក់។ យ៉ាងណាមិញ មនុស្សជាច្រើនបានបង្ហាញការព្រួយបារម្ភថា ការដកកងទ័ពអាម៉េរិកអាចនឹងធ្វើឲ្យស្ថានភាពសន្តិសុខក្នុងតំបន់កាន់តែធ្លាក់ដុនដាបខ្លាំងឡើងនៅក្នុងប្រទេសស៊ីរី៕

ម៉ិកស៊ិក៖ សារព័ត៌មានរ៉យទ័របានចុះផ្សាយថា ប្រធានាធិបតីម៉ិកស៊ិក លោក អង់ឌ្រេ មែននូអែល ឡុបប៉េស អូប្រាឌ័រ នៅថ្ងៃពុធនេះបានបញ្ជាក់ថា លោកមិនចូលរួមពិភាក្សាពីរឿងសាងសង់ជញ្ជាំងព្រំដែនជាមួយលោក ដូណាល់ ត្រាំ ឡើយ ដោយសំអាងថា វាគឺជាបញ្ហានយោបាយផ្ទៃក្នុងរបស់សហរដ្ឋអាម៉េរិក។ ប្រធានាធិបតីម៉ិកស៊ិកដែលទើបតែឡើងកាន់តំណែងកាលពីខែឆ្នូ ឆ្នាំ២០១៨កន្លងទៅ បានថ្លែងអះអាងបែបនេះ នៅក្នុងសន្និសីទសារព័ត៌មានមួយ និងបន្ទាប់ពីសមភាគីអាម៉េរិកលោក ដូណាល់ ត្រាំ បានអះអាងថា វិបត្តិមនុស្សជាតិកាន់តែរីកធំឡើងនៅព្រំដែនភាគខាងត្បូងជាប់នឹងម៉ិកស៊ិក ហើយថែមទាំងបានទាមទារឲ្យសភាអនុម័តថវិកា ដើម្បីសាងសង់ជញ្ជាំងព្រំដែនជាបន្ទាន់។ សូមបញ្ជាក់បន្ថែមថា ចំនួនជនអន្តោប្រវេសន៍ដែលលួចឆ្លងចូលទឹកដីសហរដ្ឋអាម៉េរិកបានថយចុះពី១,៦លាននាក់នៅឆ្នាំ២០០០ មកនៅត្រឹមតិចជាង៤០០,០០០នាក់នៅឆ្នាំ២០១៨ ។ កាលពីចុងសប្តាហ៍មុន សេតវិមានបានអះអាងថា ភេរវកររាប់ពាន់នាក់ត្រូវបានចាប់ខ្លួន ពេលកំពុងព្យាយាមឆ្លងព្រំដែនអាម៉េរិក-ម៉ិកស៊ិក ក៏ប៉ុន្តែតាមពិតទៅ មានតែប៉ុន្មាននាក់ប៉ុណ្ណោះត្រូវឃាត់ខ្លួន នៅឯព្រលានយន្តហោះនោះ៕

សហរដ្ឋអាម៉េរិក៖ នាយកប្រតិបត្តិក្រុមហ៊ុន Amazon លោក Jeff Bezos បានបញ្ជាក់ថា រូបលោក និងភរិយារបស់លោក គឺអ្នកស្រី MacKenzie បានលែងលះគ្នាហើយ បន្ទាប់ពីបានរៀបការជាមួយគ្នារយៈពេល២៥ឆ្នាំ។ ជីវិតរៀបការរយៈពេល២៥ឆ្នាំកន្លងទៅនេះ ពួកគេមានកូនចំនួន៤នាក់ ក្នុងនោះមានកូនប្រុស៣នាក់ និងកូនស្រីម្នាក់ ប៉ុន្តែមិនទាន់មានការប្រាប់ឲ្យដឹងនោះទេថា ការលែងលះគ្នារបស់គូស្នេហ៍មហាសេដ្ឋីលំដាប់ពិភពលោកនេះ កើតឡើងដោយសារមូលហេតុអ្វី។ យ៉ាងណាមិញ លោក Jeff Bezos ដែលមានជាងគេបំផុតនៅលើពិភពលោក បច្ចុប្បន្នកំពុងមានទ្រព្យសម្បត្តិគិតជាទឹកប្រាក់១៣៧ពាន់លានដុល្លារអាម៉េរិករូបនេះ បានធ្វើការប្រកាសពីការលែងលះរបស់លោក នៅថ្ងៃពុធសប្តាហ៍នេះ តាមរយៈប្រព័ន្ធទំនាក់ទំនងសង្គមធ្វីតធើ៕