សហរដ្ឋអាម៉េរិក៖ បន្ទាប់ពីបាននិយាយថា យោធានៅព្រំដែនអាចបាញ់ជនអន្តោប្រវេសន៍ ដែលឆ្លងចូលព្រំដែនអាមេរិកដោយខុសច្បាប់ ប្រសិនបើពួកគេចោលដុំថ្មមកលើកងទ័ពនោះ លោក ដូណាល់ ត្រាំ បានធ្វើការលើកឡើងសាជាថ្មី នៅចំពោះមុខក្រុមអ្នកសារព័ត៌មានថា កងទ័ពមិនចាំបាច់ធ្វើបែបនោះឡើយ ប៉ុន្តែប្រសិនបើជនភៀសខ្លួនគប់ដុំថ្មមកលើយោធាអាមេរិក ពួកគេនឹងត្រូវចាប់ឃាត់ខ្លួនសម្រាប់រយៈពេលយ៉ាងយូរ។

សហរដ្ឋអាម៉េរិក៖ រដ្ឋបាលប្រធានាធិបតីអាមេរិកលោក ដូណាល់ ត្រាំ បានប្រកាសនៅថ្ងៃសុក្រសប្តាហ៍នេះថា ខ្លួននឹងធ្វើការដាក់ទណ្ឌកម្មទាំងអស់ឡើងវិញលើប្រទេសអ៊ីរ៉ង់ បន្ទាប់ពីមានការលើកលែង ស្ថិតក្រោមកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ។

រុស្ស៊ី៖ នៅក្នុងដំណើរទស្សនៈកិច្ចទៅកាន់ប្រទេសរុស្ស៊ី របស់ប្រធានាធិបតីគុយបា លោក មីហ្គែល ឌីអាស់ ខាណែល នៅក្នុងថ្ងៃសុក្រសប្តាហ៍នេះ ទទួលបានការគាំទ្រ និង ផ្តល់ជំនួយជាទឹកប្រាក់៥០លានដុល្លារអាមេរិកពីទីក្រុងម៉ូស្គូ ដើម្បីទិញសម្ភារៈយោធាពីរុស្សី ក្នុងនោះរួមមានរថពាសដែក ឧទ្ធម្ភគច័ក្រ រថក្រោះ និង អាវុធធុនស្រាល ។ នៅក្នុងជំនួបពិភាក្សាកាលពីថ្ងៃសុក្រម្សិលមិញ មេដឹកនាំគុយបាលោក ឌីអាស់ ខាណែល និងប្រធានាធិបតីរុស្ស៊ីលោក វ៉្លាឌីមៀរ ពូទីន បានចុះកិច្ចព្រមព្រៀងសហប្រតិបត្តិការណ៍យុទ្ធសាស្ត្រទ្វេភាគី ហើយបើតាមសេចក្តីប្រកាសរួមនោះ មេដឹកនាំទាំងពីរបានថ្កោលទោសដល់ការដាក់ទណ្ឌកម្មជាឯកតោភាគីរបស់សហរដ្ឋអាមេរិកដែលគ្មានហេតុផល និងបង្កឲ្យមានអស្ថេរភាព ។

តួកគី៖ ប្រធានាធិបតីតួកគីលោក រីសេប តាយយីប អ៊ឺដូហ្គែន បានចោទប្រកាន់ជាលើកដំបូងថា អារ៉ាប៊ីសាអូឌីត ជាអ្នកធ្វើឃាតអ្នកកាសែត ចាម៉ាល់ ខាហ្សូកជី ដោយផ្ទាល់ដៃ ។ លោក អ៊ឺដូហ្គែន បានសរសេនៅក្នុងអត្ថបទមួយចុះផ្សាយនៅលើកាសែត វ៉ាស៊ីនតោន ប៉ុស្តិ៍ ថា យើងដឹងថា មានបញ្ជាឲ្យសម្លាប់លោក ខាហ្សូកជី ពីមន្រ្តីជាន់ខ្ពស់បំផុតរបស់រដ្ឋាភិបាលអារ៉ាប៊ី សាអូឌីត ។ ប៉ុន្តែលោកគ្មានជំនឿថា ស្តេចសាល់ម៉ាន់ មានការជាប់ពាក់ព័ន្ធនោះទេ ។

តួកគី៖ ប្រធានាធិបតីតួកគីលោក តាយយីប អឺដូហ្គាន់ និងសមភាគីអាម៉េរិកលោក ដូណាល់ ត្រាំ នៅក្នុងថ្ងៃព្រហស្បត្តិ៍សប្តាហ៍នេះ បានឯកភាពគ្នាតាមរយៈកិច្ចសន្ទនាតាមទូរសព្ទ សំដៅបោះជំហានស្ថាបនាឆ្ពោះទៅរកការពង្រឹងចំណងសម្ព័ន្ធភាពរវាងប្រទេសទាំងពីរឡើងវិញ។ បើតាមការិយាល័យសារព័ត៌មានប្រធានាធិបតីតួកគី មេដឹកនាំទាំងពីរថែមទាំងបានជជែកពិភាក្សាគ្នាផងដែរ ពាក់ព័ន្ធនឹងបញ្ហាប្រទេសស៊ីរី ក្នុងនោះរួមមានខេត្តម៉ាន់ប៊ី និងខេត្តអ៊ីដលីប ដោយសង្កត់ធ្ងន់ទៅលើការរក្សាទំនាក់ទំនងជិតស្និទ្ធ ជុំវិញបញ្ហាទ្វេភាគី និងក្នុងតំបន់។ នាឱកាសនោះដែរ លោក អឺដូហ្គាន់ បានប្រកាសធ្វើការថ្កោលទោសករណីបាញ់ប្រហារនៅព្រះវិហារជ្វីសកាលពីថ្ងៃសៅរ៍ ចុងសប្តាហ៍មុននេះ ក្នុងទីក្រុងភីតស្បឺគ រដ្ឋផេនស៊ីលវ៉ានៀ និងបានចូលរួមរំលែកទុក្ខដ៏ក្រៀមក្រំជាមួយក្រុមគ្រួសារជនរងគ្រោះផងដែរ។

សហរដ្ឋអាម៉េរិក៖ ប្រធានាធិបតីចិនលោក ស៊ី ជិនពីង និងសមភាគីអាម៉េរិកលោក ដូណាល់ ត្រាំ បានធ្វើកិច្ចពិភាក្សាគ្នាស្តីអំពីបញ្ហាពាណិជ្ជកម្ម ក៏ដូជាវិបត្តិនុយក្លេអ៊ែររបស់កូរ៉េខាងជើង តាមរយៈកិច្ចសន្ទនាតាមទូរសព្ទ។ នេះគឺជាការជជែកគ្នាលើកដំបូងហើយរវាងមេដឹកនាំទាំងពីរក្នុងរយៈពេល៦ខែមកនេះ ស្របពេលដែលបច្ចុប្បន្នមហាអំណាចទាំងពីរកំពុងប្រឈមនឹងភាពតានតឹងខ្លាំង ក្នុងសង្គ្រាមពាណិជ្ជកម្មទ្វេភាគី។ នៅក្នុងបណ្តាញសង្គមធ្វីតធើ លោក ដូណាល់ ត្រាំ បានសរសេរសារបង្ហោះនៅក្នុងថ្ងៃព្រហស្បត្តិ៍នេះថា រូបលោកបានធ្វើកិច្ចសន្ទនាតាមទូរសព្ទដ៏យូរ និងល្អបំផុតជាមួយលោកប្រធានាធិបតី ស៊ី ហើយថា ពួកលោកបានជជែកគ្នាទៅលើប្រធានបទជាច្រើនជាមួយនឹងការសង្កត់ធ្ងន់លើបញ្ហាពាណិជ្ជកម្ម ហើយថែមទាំងពិភាក្សាគ្នាយ៉ាងល្អផងដែរ ពាក់ព័ន្ធនឹងកូរ៉េខាងជើង។

សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ បានសម្រេចដាក់ទណ្ឌកម្មថ្មីមួយទៀត លើការនាំចេញមាសរបស់ប្រទេសវេណេហ្ស៊ុយអេឡា កាលពីថ្ងៃព្រហស្បតិ៍តម្សិលមិញ ជាផ្នែកមួយនៃគោលនយោបាយមោះមុតរបស់ទីប្រឹក្សាជាតិរបស់លោកត្រាំ គឺលោក John Bolton សំដៅប្រឆាំងនឹងវេណេហ្ស៊ុយអេឡា គុយបា និង នីការ៉ាក្វា នេះបើតាមការចេញផ្សាយរបស់សារព័ត៌មាន CGTN។ យោងតាមសារលិខិតមួយច្បាប់ចេញផ្សាយ ដោយសេតវិមាន កាលពីម្សិលមិញ លោក ត្រាំ បានប្រាប់ក្រុមអ្នកបង្កើតច្បាប់ថា លោកបានចុះហត្ថលេខាលើសេចក្តីបង្គាប់បញ្ជាមួយ ដោយហាមពលរដ្ឋអាម៉េរិក និងក្រុមហ៊ុន សហគ្រាសពាក់ព័ន្ធឈប់ទិញមាសពីប្រទេសវ៉េណេហ្ស៊ុយអេឡា។

ចិន៖ លោកស៊ី ជីនភីង ប្រធានរដ្ឋចិន បានអញ្ជើញធ្វើជាអធិបតីក្នុងពិធីសំណេះសំណាលជាមួយតំណាងសហគ្រាសឯកជន ដោយថ្លែងគាំទ្រសហគ្រាសឯកជនឲ្យវិវឌ្ឍរីកចម្រើន និងបោះជំហានទៅរកវេទិកាកាន់តែធំទូលាយ កាលពីថ្ងៃទី១ ខែវិច្ឆិកាម្សិលមិញ។

រុស្ស៊ី៖ នាយករដ្ឋមន្រ្តីរុស្ស៊ីលោក ឌីមីតទ្រី ម៉េវ៉េឌេវ បានសម្រេចដាក់ទណ្ឌកម្មលើជនជាតិអ៊ុយក្រែនចំនួន៣២២នាក់ រួមជាមួយក្រុមហ៊ុន-អង្គភាពរបស់អ៊ុយក្រែនចំនួន៦៨ទៀត ទាក់ទិននឹងបញ្ហាជម្លោះនៅតំបន់ឧបទ្វីបគ្រីមៀ និងវិបត្តិប្រដាប់អាវុធនៅភាគខាងកើតប្រទេសអ៊ុយក្រែន។

តួកគី៖ ប្រមុខរដ្ឋអាជ្ញាតួកគីលោក អ៊ីហ្វេន ហ្វីដាន បានអះអាងជាថ្មីម្ដងទៀតថា អ្នកកាសែតលោក ចាម៉ាល់ ខាហ្សូកជី ត្រូវបានគេសម្លាប់ភ្លាមៗនៅពេលលោកឈានជើងចូលស្ថានកុងស៊ុលអារ៉ាប៊ីសាអីឌីតក្នុងទីក្រុងអ៊ីស្ដង់ប៊ូល ហើយថា សពរបស់លោកត្រូវគេកាត់ និងបំផ្លាញជាកង់ៗក្រោមគម្រោងសម្លាប់រៀបចំទុកជាមុន។