សហរដ្ឋអាម៉េរិក៖ ឧទ្ធម្ភាគចក្រមួយគ្រឿងបានហោះទៅបុកតំបន់ផ្ទះចល័តមួយកន្លែង ក្នុងតំបន់កណ្តាលនៃរដ្ឋផ្ល័ររីដា សហរដ្ឋអាម៉េរិក កាលពីពេលថ្មីៗនេះ បណ្តាលឲ្យស្លាប់មនុស្ស២នាក់ និងរបួសមនុស្សម្នាក់ទៀត។ ជនរងគ្រោះ ត្រូវបានគេបញ្ជូលទៅព្យាបាលនៅមន្ទីរពេទ្យ។ មន្ត្រីផ្លូវការមិនទាន់បញ្ជាក់ពីមូលហេតុនៃឧប្បត្តិហេតុនេះនៅឡើយទេ។ អ្នកស្លាប់ទាំងពីរនាក់ត្រូវបានរាយការណ៍ថា គឺជាមនុស្សនៅលើឧទ្ធម្ភាគចក្រ រីឯអ្នករបួស គឺជាអ្នកនៅទីតាំងនោះ។ ផ្ទះចល័តមួយត្រូវបានបំផ្លាញ ហើយមួយទៀតក៏ខូចខាតខ្លះដែរ ក្នុងហេតុការណ៍ដែលបានកើតឡើង កាលពីអង្គារសប្តាហ៍នេះ។  សូមបញ្ជាក់ថា តំបន់រងគ្រោះ Sebring នោះគឺជាសហគមន៍សម្រាប់ប្រជាជនប្រមាណ១ម៉ឺននាក់ ស្ថិតចំកណ្តាលរដ្ឋផ្ល័ររីដាតែម្តង៕ម.ន

បារាំង៖ រដ្ឋមន្ត្រីការបរទេសបារាំងលោក ចាំង វយ៉េស ឡឺ ត្រាំង បានព្រមានទុកជាមុនថា ប្រទេសរបស់លោកនឹងមិនរារែកឡើយ ក្នុងការចាត់វិធានការដាក់ទណ្ឌកម្មប្រឆាំងនឹងអារ៉ាប៊ីសាអូឌីត បើសិនជារដ្ឋនេះពិតជាត្រូវបានគេរកឃើញថា មានជាប់ពាក់ព័ន្ធនឹងការសម្លាប់អ្នកកាសែត លោក ចាម៉ាល់ ចាហ្សូកជី។

រុស្ស៊ី៖ ក្រសួងការពារជាតិរុស្ស៊ីបានអះអាងថា ជនស៊ីវិលច្រើនជាង១២០នាក់ ត្រូវបានសម្លាប់នៅក្នុងការវាយប្រហារតាមផ្លូវអាកាសរបស់ក្រុមចម្រុះអន្តរជាតិដឹកនាំដោយសហរដ្ឋអាម៉េរិក នៅឯភាគខាងកើតប្រទេសស៊ីរី គិតពេញមួយខែតុលានេះ។

ឥណ្ឌូណេស៊ី៖ ក្រុមអ្នកស៊ើបអង្កេតឥណ្ឌូណេស៊ីបាននិយាយថា ពួកគេបានកំពុងធ្វើដំណើរឆ្ពោះទៅកន្លែងដែលប្រអប់ខ្មៅរបស់យន្ដហោះ Lion Air ដែលបានធ្លាក់ បន្ទាប់ពីបានកំណត់ទីតាំងនៃការធ្លាក់យន្តហោះនេះកាលពីថ្ងៃពុធម្សិលមិញ ពោលគឺ២ថ្ងៃក្រោយយន្តហោះនេះ បានធ្លាក់ជាមួយនឹងមនុស្សជិះនៅលើនោះចំនួន១៨៩នាក់។

ហ្វីលីពីន៖ ក្រុមមន្ត្រីហ្វីលីពីនបាននិយាយថា ចំនួនអ្នកស្លាប់បន្តកើនឡើងដល់៩នាក់ហើយ ក្នុងនោះរួមមានកុមារផងដែរ ខណៈដំបូងឡើយ ក្រុមអ្នកជួយសង្គ្រោះបានទាញសាកសពមនុស្ស៤នាក់ និងអ្នកនៅរស់រាន់មានជីវិតចំនួន៤នាក់ ហើយមនុស្ស១៩នាក់ផ្សេងទៀតនៅតែបន្តបាត់ខ្លួនកាលពីថ្ងៃពុធម្សិលមិញនេះ បន្ទាប់ពីបំណាក់ដីដែលបង្កឡើងដោយខ្យល់ព្យុះខ្លាំង បានរលំបាក់សង្កាត់លើអគាររដ្ឋាភិបាលពីរកន្លែងនៅប្រទេសហ្វីលីពីនភាគខាងជើង។

ន័រវែស៖ អង្គការ NATO បានលើកឡើងថា ក្រុមប្រទេសជាសម្ព័ន្ធមិត្តនឹងពុំផ្លាស់ប្តូរផែនការធ្វើសមយុទ្ធយោធាខ្នាតធំបំផុតរបស់ខ្លួន ដែលបាននិងកំពុងប្រព្រឹត្តទៅនៅឯប្រទេសន័រវែសឡើយ បើទោះជារុស្ស៊ីបានប្រកាសថា ខ្លួននឹងធ្វើតេស្តមីស៊ីលនាថ្ងៃទី០១ដល់ថ្ងៃទី០៣ ខែវិច្ឆិកា លើដែនទឹកអន្តរជាតិដែលនៅក្បែរៗគ្នា។

សហរដ្ឋអាម៉េរិក៖ រដ្ឋមន្ត្រីការពារជាតិអាមេរិកលោក ជែម  ម៉ាត់ទីស បានលើកឡើងថា ប្រធានាធិបតីស៊ីរីលោក បាសា អាល់ អាស្សាដ នឹងត្រូវអស់អំណាចនៅថ្ងៃណាមួយជាមិនខាន ដោយសារតែលោកបានបាត់បង់ទំនុក ក៏ដូចជាការគំាទ្រពីប្រជាជនស៊ីរី និងសហគមន៍អន្តរជាតិ។

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ បានធ្វើទស្សនកិច្ចនៅវិហារជ្វីហ្វមួយ ក្នុងទីក្រុងភីតស្បឺក រដ្ឋផេនស៊ីលវ៉ានៀ នៅថ្ងៃអង្គារ៍ម្សិលមិញនេះ កន្លែងដែលមនុស្ស១១នាក់ត្រូវបានគេបាញ់សម្លាប់កាលពីចុងសប្តាហ៍ ក្នុងការវាយប្រហារប្រឆាំងនឹងជនជាតិជ្វីហ្វ ខណៈក្រុមអ្នកតវ៉ាជាង១,៥០០នាក់ បានប្រមូលផ្ដុំនៅក្បែរនោះ ដើម្បីបញ្ជាក់ឱ្យដឹងច្បាស់ថា ពួកគេមិនស្វាគមន៍លោក ត្រាំ នោះទេ។

អ៊ីរ៉ង់៖ នៅមុនប៉ុន្មានថ្ងៃដែលទណ្ឌកម្មថ្មី នឹងត្រូវដាក់លើការនាំចេញប្រេងអ៊ីរ៉ង់ចូលជាធរមាននោះ រដ្ឋាភិបាលក្រុងតេហេរ៉ង់បានលើកឡើងថា ទណ្ឌកម្មរបស់សហរដ្ឋអាម៉េរិកប្រឆាំងអ៊ីរ៉ង់ នឹងមានផលវិបាកដ៏អាក្រក់ សម្រាប់សណ្ដាប់ធ្នាប់ពិភពលោក។

ឥណ្ឌា៖ មន្ត្រីប៉ូលិសរាប់ពាន់នាក់បានយាមការពាររូបចម្លាក់ដ៏ធំជាងគេបំផុតនៅលើពិភពលោក មុនពេលពិធីបើកសម្ពោធរូបចម្លាក់ដោយនាយករដ្ឋមន្ត្រីឥណ្ឌា លោក ណារិនដ្រា ម៉ូឌី នៅថ្ងៃពុធនេះ (ម៉ោងក្នុងតំបន់) ដោយមានការរំពឹងថា មានការតវ៉ារបស់ប្រជាជនដែលមានការខឹងសម្បារ ដោយសារតែពួកគេត្រូវបានបង្ខំចិត្តផ្លាស់ទីលំនៅ ដោយការធ្វើរូបចម្លាក់ដ៏ធំសម្បើមនេះ និងការចំណាយប្រាក់សន្ធឹកសន្ធាប់ដើម្បីសាងសង់វា ខណៈពួកកសិករកំពុងជួបបញ្ហាថវិកា និងការខ្វះទឹកផលិតកសិផល។