សហរដ្ឋអាម៉េរិក៖ លោក Richard DeVaul ប្រធានក្រុមហ៊ុន Google X ដែលជាបុត្រសម្ព័ន្ធនៃក្រុមហ៊ុន Google ជាក្រុមហ៊ុនបច្ចេកវិទ្យាដ៏ធំនៅសហរដ្ឋអាម៉េរិកនោះ បានសម្រេចចិត្តលាលែងចេញពីតំណែងហើយ បន្ទាប់ពីសារព័ត៌មាន New York Times កាលពីសប្ដាហ៍មុនបានចេញផ្សាយថា នាយករូបនេះបានរំលោភបំពានផ្លូវភេទលើអ្នកស្ត្រីម្នាក់ ដែលបានសុំដាក់ពាក្យចូលធ្វើឱ្យក្រុមហ៊ុនមួយនេះ។ ប្រធានក្រុមហ៊ុន Google X រូបនេះសម្រេចចិត្តលាលែងចេញពីតំណែងហើយ ដោយមិនទាមទារប្រាក់អតីតភាពឡើយ។ ក៏ប៉ុន្តែលោក DeVaul មិនទាន់ធ្វើអត្ថាធិប្បាយណាមួយនៅឡើយទេ។ គួរបញ្ជាក់ថា Google X គឺជាក្រុមហ៊ុនស្រាវជ្រាវ និងអភិវឌ្ឍន៍ត្រូវបានបង្កើតឡើងដោយក្រុមហ៊ុន Google កាលពីឆ្នាំ២០១០ ហើយមុនចូលបម្រើការងារឱ្យក្រុមហ៊ុន Google លោកធ្លាប់ធ្វើបុគ្គលិកផ្នែកវិទ្យាសាស្ត្រជាន់ខ្ពស់ នៅក្រុមហ៊ុន Apple៕ម.ន

ចិន៖ ស្ពានវែងឆ្លងសមុទ្រវែងជាងគេលើពិភពលោកស្ថិតក្នុងប្រទេសចិនភ្ជាប់ពីហុងកុង ទៅស៊ូហៃ ទៅម៉ាកាវ ត្រូវបានគេឃើញថា មានចរាចរឆ្លងកាត់អំឡុងចុងសប្តាហ៍ដំបូង ពោលគឺក្រោយពេលបើកឲ្យឆ្លងកាត់ជាផ្លូវការ កាលពីថ្ងៃទី២៤ តុលា ២០១៨។ ប្រភពព័ត៌មានពី CGTN បានចេញផ្សាយកាលពីម្សិលមិញថា អំឡុងពេលប៉ុន្មានថ្ងៃមកនេះ មានមនុស្សឆ្លងកាត់ប្រមាណ៧៨០០០នាក់ ហើយចំនួនយានជំនិះឆ្លងកាត់វិញមានប្រមាណ៣០០០គ្រឿង គិតត្រឹមថ្ងៃទី២៨ តុលា ២០១៨។ សូមរម្លឹកថា កាលពីថ្ងៃទី២៣ តុលា កន្លងទៅ លោកប្រធានរដ្ឋចិន ស៊ី ជិនភីង បានអញ្ជើញជាអធិបតីសម្ពោធស្ពានឆ្លងសមុទ្រវែងជាងគេលើពិភពលោកមួយនេះ មុនពេលដាក់ឲ្យប្រើប្រាស់ជាផ្លូវការ នៅថ្ងៃទី២៤ តុលា។ ស្ពានមួយនេះមានប្រវែង៥៥គីឡូម៉ែត្រ ចំណាយថវិកាសាងសង់អស់១៥៧៣០លានយន់ ឬប្រមាណជាង២ពាន់លានដុល្លារ ដោយចំណាយពេលសាងសង់អស់រយៈពេល៩ឆ្នាំ៕ម.ន

សហរដ្ឋអាម៉េរិក៖ ថ្លែងក្នុងបទសម្ភាសន៍មួយ ប្រធានាធិបតីអាម៉េរិកលោក ដូណាល់ ត្រាំ បានគូសបញ្ជាក់ថា រដ្ឋាភិបាលក្រុងវ៉ាស៊ីនតោនមានគម្រោងសាងសង់ទីក្រុងតង់សម្រាប់ជនអន្តោប្រវេសន៍ ដែលកំពុងធ្វើដំណើរឆ្លងកាត់ប្រទេសម៉ិកស៊ិកតាមផ្លូវពីអាម៉េរិកកណ្តាល។

សហរដ្ឋអាម៉េរិក៖ រដ្ឋមន្ត្រីការបរទេសអាម៉េរិកលោក ម៉ៃ ប៉ុមប៉េអូ បានធ្វើការអំពាវនាវឱ្យមានការបញ្ឈប់ជាបន្ទាន់ ការវាយប្រយុទ្ធគ្នាទាំងឡាយនៅប្រទេសយ៉េមែន ហើយថា ការចរចាបញ្ចប់សង្រ្គាមស៊ីវិលដឹកនាំដោយអង្គការសហប្រជាជាតិ គួរតែត្រូវធ្វើឡើងនៅខែវិច្ឆិកាខាងមុខនេះ។ សូមរំលឹកថា សង្រ្គាមស៊ីវិលនៅយ៉េមែនបានផ្ទុះឡើងកាលពីខែមីនា ឆ្នាំ២០១៥កន្លងទៅ និងបានសម្លាប់ជីវិតមនុស្សរាប់ពាន់នាក់ ស្របពេលប្រជាជនយ៉េមែនជាងពាក់កណ្ដាលនៃប្រជាជនសរុបកំពុងប្រឈមមុខនឹងគ្រោះអត់ឃ្លានធ្ងន់។ ការអំពាវនាវរបស់ប្រមុខការទូតអាម៉េរិករូបនេះ ធ្វើឡើងនៅក្នុងសេចក្ដីថ្លែងការណ៍មួយដែលចេញផ្សាយកាលពីថ្ងៃអង្គារ៍សប្ដាហ៍នេះ ដោយបានបញ្ជាក់បន្ថែមថា ការវាយប្រហារដោយគ្រាប់មីស៊ីលពីសំណាក់ក្រុមឧទ្ទាមហ៊ូទី គាំទ្រដោយអ៊ីរ៉ង់ប្រឆាំងនឹងអារ៉ាប៊ីសាអូឌីត ក៏ដូចជាអេមីរ៉ាតអារ៉ាប់រួម គួរតែត្រូវបញ្ឈប់ រីឯការវាយប្រហារតាមផ្លូវអាកាសរបស់ក្រុមចម្រុះអារ៉ាប់ដឹកនាំ ដោយអារ៉ាប៊ីសាអូឌីតទៅលើតំបន់ទីប្រជុំជនក្នុងប្រទេសយ៉េមែន ក៏គួរតែត្រូវបញ្ឈប់ដូចគ្នាផងដែរ៕

ដាណឺម៉ាក៖ រដ្ឋាភិបាលដាណឺម៉ាកនៅក្នុងថ្ងៃអង្គារសប្ដាហ៍នេះ បានចោទប្រកាន់ទីភ្នាក់ងារស៊ើបការណ៍សម្ងាត់អ៊ីរ៉ង់ថា កំពុងរៀបចំផែនការសម្លាប់សកម្មជនអ៊ីរ៉ង់ម្នាក់នៅលើទឹកដីរបស់ប្រទេសខ្លួន។

ឥណ្ឌូណេស៊ី៖ រដ្ឋមន្ត្រីដឹកជញ្ជូនឥណ្ឌូណេស៊ីលោក Budi Karya នៅថ្ងៃអង្គារម្សិលមិញ បានចេញបញ្ជាឱ្យក្រុមហ៊ុនអាកាសចរណ៍នៅក្នុងស្រុកចំនួនពីរ គឺក្រុមហ៊ុន Lion Air និងក្រុមហ៊ុន Garuda ត្រួតពិនិត្យរាល់យន្ដហោះ Boeing 737 Max របស់ពួកគេ ខណៈអាជ្ញាធរកំពុងបន្តស៊ើបអង្កេត និងតាមរកសាកសព ឬអ្នកអាចរស់រានមានជីវិតក្នុងគ្រោះថ្នាក់ធ្លាក់យន្ដហោះរបស់ក្រុមហ៊ុន Lion Air ជាមួយមនុស្សសរុប១៨៩នាក់ ដែលត្រូវបានគេសន្និដ្ឋានថា អាចនឹងស្លាប់ទាំងអស់។ សូមរំលឹកថា យន្ដហោះ Boeing 737 MAX 8 មានជើងហោះហើរលេខ Flight JT-610 របស់ក្រុមហ៊ុន Lion Air ត្រូវបានគេរាយការណ៍ថាបានធ្លាក់នៅក្នុងដែនសមុទ្រនៃកោះ ការ៉ាវ៉ាង ស្ថិតនៅលើខេត្តជ្វា ក្រោយហោះឡើងបាន១៣នាទី ចេញពីទីក្រុងហ្សាការតា ក្នុងដំណើរផ្លូវឆ្ពោះទៅកាន់ទីក្រុង ផាងកាល់ ភីណាង លើកោះ បាងកា នៃប្រជុំកោះស៊ូម៉ាត្រា។ យន្ដហោះនេះ មានផ្ទុកមនុស្សសរុប១៨៩នាក់ ក្នុងនោះមានមនុស្សវ័យជំទង់១៧៨នាក់ កុមារម្នាក់ ទារក២នាក់ ពីឡុត០២នាក់…

សហរដ្ឋអាម៉េរិក៖ អ្នកពាក្យសេតវិមានលោកស្រី សារ៉ា សាន់ឌើ បាននិយាយថា រដ្ឋបាលរបស់ប្រធានាធិបតីអាម៉េរិកលោក ដូណាល់ ត្រាំ កំពុងតែពិចារណានូវចំណាត់ការដែលអាចទៅរួច ដើម្បីជាការឆ្លើយតបទៅនឹងការសម្លាប់អ្នកកាសែត អារ៉ាប៊ីសាអូឌីត លោក ចាម៉ាល់ ខាហ្សូកជី។

ហ្វីលីពីន៖ ប្រធានាធិបតីហ្វីលីពីនលោក រ៉ូឌ្រីហ្គោ ឌូទ័រតេ នៅថ្ងៃច័ន្ទម្សិលមិញនេះ បានបង្ហាញឆន្ទៈរបស់លោក ក្នុងការខិតខំប្រឹងប្រែងរួមគ្នាជាមួយប្រទេសចិន ដើម្បីពង្រឹងកិច្ចសហប្រតិបត្តិការនៅក្នុងវិស័យថាមពល និងហេដ្ឋារចនាសម្ព័ន្ធជាដើម ។ ថ្លែងក្នុងជំនួបពិភាក្សាជាមួយរដ្ឋមន្រ្តីការបរទេសចិន និងជាទីប្រឹក្សារដ្ឋចិនលោក វ៉ាង យី ដែលកំពុងបំពេញទស្សនកិច្ចនៅក្នុងប្រទេសហ្វីលីពីន លោក ឌូទ័រតេ បានគួសបញ្ជាក់ថា រដ្ឋាភិបាលក្រុងម៉ានីលមានក្តីសង្ឃឹម និងជឿជាក់ថា ចិនបន្តផ្តល់ការគំាទ្រ និងផ្តល់ជំនួយក្នុងការអភិវឌ្ឍន៍តំបន់ មិនដាណាវ ហើយលោក ឌូទ័រតេ ក៏បានសម្តែងនូវការពេញចិត្តជាខ្លំាងជាមួយនឹងការអភិវឌ្ឍន៍នៃទំនាក់ទំនងទ្វេភាគីរវាងប្រទេសទំាងពីរ ។

ជប៉ុន៖ នាយករដ្ឋមន្រ្តីឥណ្ឌាលោក ណារិនដ្រា ម៉ូឌី និងសមភាគីជប៉ុនលោក ស៊ីនហ្សូ អាបេ បានព្រមព្រៀងគ្នាស្វែងរកឱកាសបង្កើនកិច្ចសហប្រតិបត្តិការកាន់តែស្អិតរមួតនៅក្នុងវិស័យយោធា និងសេដ្ឋកិច្ចកាលពីថ្ងៃច័ន្ទម្សិលមិញនេះ ក្នុងអំឡុងកិច្ចប្រជុំកំពូលប្រចំាឆ្នំាជប៉ុន-ឥណ្ឌាលើកទី១៣ ។

ឥណ្ឌូណេស៊ី៖ អាជ្ញាធរឥណ្ឌូណេស៊ីបានបញ្ជាក់ថា ក្រុមអ្នកជួយសង្គ្រោះបានស្រង់យកសាកសពមនុស្សកើនដល់១០នាក់ហើយ ចេញពីទឹកសមុទ្រ ទីដែលយន្តហោះដឹកអ្នកដំណើរមួយគ្រឿងបានធ្លាក់ទៅក្នុងសមុទ្រ នៅជិតរដ្ឋធានីហ្សាការតា កាលពីថ្ងៃច័ន្ទសប្តាហ៍នេះ ខណៈមនុស្សទាំង១៨៩នាក់ត្រូវគេសន្និដ្ឋានថា បាត់បង់ជីវិតទាំងអស់ ។ យន្ដហោះ Boeing 737 MAX 8 មានជើងហោះហើរលេខ Flight JT-610 របស់ក្រុមហ៊ុន Lion Air មានផ្ទុកមនុស្ស ១៨៩នាក់ ក្នុងនោះរួមមានមនុស្សវ័យជំទង់ ១៧៨នាក់, កុមារម្នាក់, ទារក០២នាក់, ពីឡុត ០២នាក់ និងក្រុមសហសេវិក ០៦នាក់ផ្សេងទៀតបានបាត់ចេញពីប្រព័ន្ធរ៉ាដា នៅអំឡុងពេលហោះហើរពីរដ្ឋធានីហ្សាការតា ទៅកាន់ទីក្រុង ផាងកាល ភីណាង (Pangkal Pinang) កោះ បាងកា (Bangka) របស់ឥណ្ឌូណេស៊ី ។