កូរ៉េខាងត្បូង៖ មន្ត្រីកូរ៉េខាងជើង និងមន្ត្រីកូរ៉េខាងត្បូង តាមសេចក្តីរាយការណ៍បានព្រមព្រៀងគ្នានៅក្នុងកិច្ចពិភាក្សាយោធាលំដាប់ទូទៅមួយ កាលពីថ្ងៃចុងសប្តាហ៍មុននេះ ដើម្បីដកប៉ុស្តិ៍ការពារនៅខ្សែជួរមុខមួយចំនួននៅតាមព្រំដែន។ ក្រសួងការពារជាតិកូរ៉េខាងត្បូងបាននិយាយថា ប្រទេសកូរ៉េទាំងពីរបានព្រមព្រៀងគ្នាបិទប៉ុស្តិ៍ការពារចំនួន១១កន្លែងនៅតាមព្រំដែន និងដកកងកម្លាំងប្រដាប់អាវុធ ព្រមទំាំងសម្ភារៈយោធានៅតាមបណ្ដាប៉ុស្តិ៍ទាំងនោះ ក្នុងខែធ្នូខាងមុខ ។ ក្រៅពីនេះ មន្ត្រីយោធាជាន់ខ្ពស់កូរ៉េខាងជើង និងកូរ៉េខាងត្បូងក៏បានរៀបចំធ្វើកិច្ចពិភាក្សាគ្នាកាលពីសប្តាហ៍មុនផងដែរ ដើម្បីពិភាក្សាពីវិធានការអនុវត្តនូវកិច្ចព្រមព្រៀងយោធាដែលមេដឹកនាំនៃប្រទេសទាំងពីរបានចុះហត្ថលេខានៅជំនួបកំពូលក្នុងខែកញ្ញាកន្លងទៅ ៕

សហរដ្ឋអាមេរិក៖ ប្រធានាធិបតីអាមេរិកលោក ដូណាល់ ត្រាំ បាននិយាយនៅថ្ងៃសៅរ៍ចុងសប្តាហ៍មុខនេះថា រូបលោកនឹងធ្វើដំណើរទៅកាន់ទីក្រុង ភីតស៊្បឺក រដ្ឋ ផេនស៊ីលវ៉ានៀ បន្ទាប់ពីកើតមានករណីបាញ់ប្រហារដ៏អាក្រក់មួយ ដែលបណ្តាលអោយមានមនុស្សស្លាប់ និងរងរបួសជាច្រើន។

អង់គ្លេស៖ ម្ចាស់ក្លឹបបាល់ទាត់ Leicester City គឺលោក វិឆ័យស្រីវឌ្ឍនាប្រាផា​ (Vichai Srivaddhanaprabha) ត្រូវបានក្លឹបទទួលស្គាល់ហើយថាបាន បាត់បង់ជីវិតហើយ នៅក្នុងគ្រោះថ្នាក់ធ្លាក់ឧទ្ធម្ភាគចក្រ នៅក្រោយការប្រកួត Premier League ជាមួយក្រុម West Ham United កាលពីយប់ថ្ងៃសៅរ៍ នៅក្បែរកីឡដ្ឋាន King Power Stadium ក្នុងប្រទេសអង់គ្លេស។

សហរដ្ឋអាមេរិក៖ ទីប្រឹក្សាសន្តិសុខជាតិអាមេរិក លោក ចន បូលតុន បាននិយាយនៅថ្ងៃសុក្រសប្ដាហ៍នេះថា សេតវិមាននាពេលថ្មីៗនេះ ទើបបានធ្វើការអញ្ជើញជាផ្លូវការឲ្យប្រធានាធិបតីរុស្ស៊ី លោក វ្ល៉ាឌីមៀរ ពូទីន ធ្វើទស្សនកិច្ចសេតវិមាន។

អ៊ីស្រាអែល៖ មន្រ្តីយោធាអ៊ីស្រាអែលបាននិយាយនៅថ្ងៃសៅរ៍នេះថា ពួកគេបានធ្វើការវាយប្រហារទីតំាងស្តុកអាវុធចំនួន២កន្លែង មូលដ្ឋានចំនួន៥កន្លែង ជំរុំហ្វឹកហាត់កងទ័ព , ផ្លូវរូងក្រោមដី និងទីតំាងឃ្លំាមើលមួយទៀត ក្នុងចំណោមគោលដៅរបស់ក្រុមសកម្មប្រយុទ្ធហាម៉ាស់នៅក្នុងតំបន់កាហ្សាស្រ្ទីប។

តួកគី៖ ក្រុមរដ្ឋអាជ្ញាតួកគីបានរៀបចំសំណើធ្វើបត្យាប័នជនសង្ស័យ១៨នាក់ ពី អារ៉ាប៊ីសាអូឌីត មកកាន់ទីក្រុងអង់ការ៉ា ដើម្បីដំណើរការក្ដីតាមច្បាប់តួកគី ជុំវិញសំណុំរឿងឃាតកម្មលើអ្នកសារព័ត៌មាន លោក ចាម៉ាល់ ខាហ្សូកជីក្រោយប្រធា នាធិបតីតួកគីលោក តាយយីប អឺដូហ្កាន់ បានជម្រុញឱ្យទីក្រុងរីយ៉ាដបង្ហាញមុខមេក្លោង ដែលនៅពីក្រោយអំពើឃាតកម្មនេះ។

រុស្ស៊ី៖ មន្ត្រីទូតជាន់ខ្ពស់រុស្ស៊ីលោក អាន់ដ្រៃ បេឡូសូវ បានទទួលស្គាល់ថា រុស្ស៊ីពិតជាកំពុងត្រៀមខ្លួនសម្រាប់សង្រ្គាមពិតប្រាកដមែន ហើយថា ការសម្រេចចិត្តដកខ្លួនជាឯកតោភាគីរបស់សហរដ្ឋអាមេរិក ចេញពីសន្ធិសញ្ញាអាវុធនុយក្លេអ៊ែរ INF ក៏មានន័យផងដែរថា ទីក្រុងវ៉ាស៊ីនតោនកំពុងត្រៀមខ្លួនធ្វើសង្រ្គាម។

សហរដ្ឋអាមេរិក៖ ក្រសួងយុត្តិធម៌អាមេរិកបានឱ្យដឹងថា បុរសម្នាក់ឈ្មោះ ស៊ីសារសាយយ៉ុក ដែលត្រូវបានទីភ្នាក់ងារ FBI ចាប់ខ្លួនពីបទសង្ស័យថា មានជាប់ពាក់ព័ន្ធនឹងការបញ្ជួនកញ្ចប់គ្រាប់បែកច្នៃទៅកាន់អ្នកនយោបាយ និងបុគ្គលល្បីៗនោះ ត្រូវបានគេចោទប្រកាន់ពីបទឧក្រិដ្ឋ៥ករណី ហើយអាចនឹងត្រូវប្រឈមមុខជាប់ពន្ធនាគារ៤៨ឆ្នាំ។

សហរដ្ឋអាម៉េរិក៖ អ្នកនាំពាក្យសេតវិមានលោកស្រី សារ៉ា សាន់ឌើ បានបញ្ជាក់ ថា នាយកទីភ្នាក់ងារស៊ើបការណ៍សម្ងាត់ CIA លោកស្រី ជីណា ហាស្ពែល បានចូលរាយការណ៍ប្រាប់ប្រធានាធិបតីអាម៉េរិកលោក ដូណាល់ ត្រាំ អំពីដំណើរទស្សនកិច្ចរបស់លោកស្រី ទៅកាន់ទីក្រុងអង់ការ៉ា ប្រទេសតួកគី ដើម្បីពិនិត្យមើលស្ថានការណ៍ជាក់ស្តែង ពាក់ព័ន្ធនឹងការស្លាប់របស់អ្នកកាសែតជនជាតិអារ៉ាប៊ីសាអូឌីត លោក ចាម៉ាល់ ខាហ្សូកជី។

ឥណ្ឌា៖ មន្រ្តីសុខាភិបាលឥណ្ឌាបានបញ្ជាក់ថា ការរីករាលដាលនៃវីរុស ហ្ស៊ីកា បានកើនដល់ចំនួន ១៤០ករណី ហើយមកទល់ពេលនេះនៅរដ្ឋ រ៉ាចាស្ថាន (Rajasthan) ភាគខាងលិចប្រទេសឥណ្ឌា។ បើតាមមន្រ្តីសុខាភិបាលឥណ្ឌា បច្ចុប្បន្នពេលនេះ ចំនួនករណីឆ្លងវីរុស ហ្ស៊ីកា នៅក្នុងរដ្ឋរ៉ាចាស្ថាន កំពុងឈរនៅត្រឹម១៤០ករណី ដោយជាចម្បងបានកើតមានឡើងនៅទីក្រុង ចៃភើ ហើយអ្នកជំងឺភាគច្រើនជាពលករចំណាកស្រុក។ ឆ្លើយតបនឹងបញ្ហានេះ ក្រសួងសុខាភិបាលឥណ្ឌាបានបញ្ជូនក្រុមការងារពិសេសទៅកាន់រដ្ឋភាគខាងលិចនេះ ដើម្បីរៀបចំការតាមដានស្ថានការណ៍ជាប្រចាំនៅក្នុងរដ្ឋ និងត្រៀមចាត់វិធានការនានាដែលចាំបាច់។ សូមបញ្ជាក់ថា នេះគឺជាការផ្ទុះករណីវីរុស ហ្ស៊ីកា លើកទីបីហើយ នៅក្នុងប្រទេសឥណ្ឌាគិតចាប់តាំងពីខែមករា ឆ្នាំ២០១៧ ។