ន័រវេ៖ កម្លាំងទាហានប្រទេសសមាជិកអង្គការ NATO បានទៅកាន់ប្រទេសន័រវេ ដើម្បីចូលរួមធ្វើសមយុទ្ធជាទ្រង់ទ្រាយធំបំផុតមិនធ្លាប់មានពីមុនមក ដែលមានឈ្មោះថា ត្រាយឌេន ជាំងឆឺ មានយុទ្ធសាស្ត្រទប់ស្កាត់ការគំរាមកំហែងពីរុស្ស៊ី។ ជាមួយគ្នានេះ រុស្ស៊ីបានថ្កោលទោសការធ្វើសមយុទ្ធជាទ្រង់ទ្រាយធំរបស់ណាតូ បើទោះបីកន្លងមករុស្ស៊ីក៏បានធ្វើសមយុទ្ធទ្រង់ទ្រាយធំបំផុតមិនធ្លាប់មាន ក្រោយសង្គ្រាមត្រជាក់ដូចគ្នា គឺសមយុទ្ធ  Vostok 2018 ដោយមានកម្លាំងទាហានជាង៣សែននាក់  ព្រមទំាងទាហានចិន និងម៉ុងហ្គោលីចូលរួមផងដែរ។

ហ្វីលីពីន៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ បានប្រកាសដកតំណែងរាល់មន្ត្រីការិយាល័យគយទាំងអស់ ក្នុងនោះរួមមានទាំងប្រធានការិយាល័យ ដែលការព្រមាននេះ ធ្វើឡើងក្រោយទីភ្នាក់ងារគយបរាជ័យក្នុងការចាប់គ្រឿងញៀនរាប់តោន។

ចិន៖ អំឡុងពេលនៃការស្វាគមន៍ដំណើរទស្សនកិច្ចផ្លូវរដ្ឋដ៏កម្ររបស់នាយករដ្ឋមន្ត្រីជប៉ុនលោក ស៊ីនហ្សូ អាបេ មកកាន់ទីក្រុងប៉េកាំងនោះ ប្រទេសចិន បានអះអាងថា ខ្លួនមានឆន្ទៈក្នុងការលើកស្ទួយទំនាក់ទំនងជាមួយប្រទេសជប៉ុនឡើងវិញ ប្រកបដោយសុខុមាលភាព។

សហរដ្ឋអាម៉េរិក៖ ក្រុមហ៊ុនដ៏ធំនៅអាម៉េរិក Google កាលពីម្សិលមិញ បានសម្រេចបណ្តេញបុគ្គលិករបស់ខ្លួន៤៨នាក់ ក្នុងរយៈពេល២ឆ្នាំ្នកន្លងមកនេះ រួមមានទាំងមន្ត្រីជាន់ខ្ពស់ផងដែរ ពាក់ព័ន្ធនឹងករណីការរំលោភសេពសន្ថវៈ ដោយលើកឡើងថា ជាទង្វើដែលចេះតែកើនឡើង ក្នុងក្រុមហ៊ុន នេះបើតាមការចេញផ្សាយរបស់សារព័តមាន Channelnewsasia។

សហរដ្ឋអាម៉េរិក៖ ថ្មីៗនេះ ក្រៅពីអតីតប្រធានាធិបតីអាម៉េរិក អូបាម៉ា និងអតីតរដ្ឋមន្ត្រីការបរទេស ហ៊ីឡារី គ្លីតុននោះ កញ្ចប់គួរសង្ស័យជាបន្តបន្ទាប់ដែលមានផ្ទុកនូវគ្រឿងផ្ទុះកែច្នៃ ក៏ត្រូវបានផ្ញើទៅកាន់ផ្ទះ និងការិយាល័យនៃអ្នកនយោបាយល្បីៗនៃគណបក្សប្រជាធិបតេយ្យអាម៉េរិកនោះ ត្រូវអាជ្ញាធរស្ទាក់ បាននិងរកឃើញថា មានអាស័យដ្ឋានផ្ញើទៅកាន់អតីតអនុប្រធានាធិបតីអាម៉េរិក លោក Joe Biden និងលោក Robert De Niro ដែលជាតារាសម្តែងជើងចាស់ក៏ដូចជាអ្នករិះគន់ម្នាក់របស់លោក ដូណាល់ ត្រាំ ប្រធានាធិបតីអាម៉េរិកបច្ចុប្បន្ននេះ។

ក្រិក៖ សារព័ត៌មានស៊ីនហួររបស់ប្រទេសចិនបានចុះផ្សាយថា គ្រោះរញ្ជួយដីក្នុងកម្រិត ៦.៨រ៉ិចទ័រ បានវាយប្រហារលើ តំបន់ឆ្នេរនៃប្រទេសក្រិក នៅព្រឹកថ្ងៃសុក្រនេះ។ ទីភ្នាក់ងារស្ទាបស្ទង់ភូមិសាស្ត្រអាម៉េរិក USGS គ្រោះរញ្ជួយដីនេះ មានកម្រិត៧.០រ៉ិចទ័រ តែបានទម្លាក់កម្រិតវាមកនៅត្រឹម ៦.៨រ៉ិចទ័រវិញ។ ចំណែកឯវិទ្យាស្ថានគ្រោះរញ្ជួយដីក្រិក ក៏បានអះអាងដែរថា គ្រោះរញ្ជួយដីនេះមានកម្រិត៦.៤រ៉ិចទ័រ និងមានចំណុចរញ្ជួយនៅចម្ងាយ៥០គីឡូម៉ែត្រពីភាគខាងត្បូងកោះ Zakynthos ហើយមិនតែប៉ុណ្ណោះវាក៏រំញ័រដល់រដ្ឋធានីអាតែន តំបន់ខ្លះនៃប្រទេសអ៊ីតាលី ម៉ាល់តា អាល់បានី និងលីប៊ីផងដែរ។ ក៏ប៉ុន្តែភ្លាមៗ មិនទាន់មានសេចក្ដីរាយការណ៍ពីការបំផ្លិចបំផ្លាញ ឬជនរងគ្រោះនៅឡើយទេ៕

មីយ៉ាន់ម៉ា៖ កម្មវិធីប្រកួតបវរកញ្ញាអន្តរជាតិឆ្នាំ២០១៨ ឬ Miss Grand International  2018 ដែលធ្វើឡើងនៅប្រទេសមីយ៉ាន់ម៉ា ត្រូវបានបញ្ចប់ហើយ នៅរាត្រីថ្ងៃទី២៥ ខែតុលា ឆ្នាំ២០១៨នេះ ដោយបវរកញ្ញាដែលគ្រងម្កុដឯកសម្រាប់ឆ្នាំនេះ គឺកញ្ញា Clara Sosa មកពីប្រទេសប៉ារ៉ាហ្កាយ។ ទម្រាំតែឆ្លងផុតពីវគ្គមួយទៅវគ្គមួយ មិនមែនជារឿងងាយស្រួលនោះទេ សម្រាប់ជោគវាសនានៃការមានឱកាសគ្រងម្កុដរបស់ «Miss Grand International 2018» ខណៈពួកគេបានឆ្លងកាត់ការប្រកួត ដោយមានបេក្ខនារីមកពីច្រើនប្រទេស។ សម្រាប់កម្ពុជា គឺពិតជាមានមោទនភាពយ៉ាងខ្លាំង ដែលបេក្ខនារីតំណាងជាតិរបស់ខ្លួនបានជាប់មកដល់វគ្គផ្តាច់ព្រ័ត្រនេះ។

សហរដ្ឋអាម៉េរិក៖ វីដេអូរបស់ AiirSource Military ត្រូវបានបង្ហោះ ដោយយន្តហោះយោធាអាម៉េរិក ប្រភេទដឹកជញ្ជូន C-17 បានទម្លាក់ឡានយោធាមួយគ្រឿង ក្នុងអំឡុងការធ្វើតេស្ត ទាក់ទងនឹងការដឹកជញ្ជូនទំនិញតាមអាកាស នៅរដ្ឋ North Carolina កាលពីពេលថ្មីៗនេះ។ យ៉ាងណាក៏ដោយ ការធ្វើតេស្តនេះហាក់មិនសូវទទួលបានជោគជ័យប៉ុន្មានឡើយ ដោយសារតែពួកគេបានទម្លាក់ឡានចូលទៅក្នុងតំបន់ព្រៃដាច់ស្រយាល ឆ្ងាយជាងគោលដៅត្រូវទម្លាក់ ១១គីឡូម៉ែត្រ។ មន្ត្រីយោធាទទួលបន្ទុកការធ្វើតេស្តនេះឈ្មោះថា Mike Burns បានប្រាប់សារព័ត៌មាន CNN ថា ឡានបានទម្លាក់មុនពេល ប៉ុន្តែគ្មានការបង្កជារបួស ឬខូចខាតធ្ងន់ឡើយ គ្រាន់តែបាក់ដើមឈើប៉ុន្មានដើមប៉ុណ្ណោះ។

សហរដ្ឋអាម៉េរិក៖ មន្ទីរបញ្ចកោណត្រូវបានគេរំពឹងថា នឹងដាក់ពង្រាយកងទ័ពប្រមាណ៨០០នាក់ទៅកាន់ព្រំដែនអាម៉េរិក និងម៉ិកស៊ិក បន្ទាប់ពីប្រធានាធិបតីអាម៉េរិកលោក ដូណាល់ ត្រាំ បាននិយាយថា យោធានឹងជួយដោះស្រាយភាពអាសន្នរបស់ជាតិ ហើយបានអំពាវនាវឱ្យក្រុមជនចំណាកស្រុកវិលត្រឡប់ទៅក្រោយវិញ។

ចិន៖ សូមរំលឹកថា សារព័ត៌មានអាម៉េរិក New York Times រាយការណ៍ថា ចិន និងរុស្ស៊ីកំពុងព្យាយាមលួចស្ដាប់កិច្ចសន្ទនាតាមទូរសព្ទដៃ iPhone ផ្ទាល់ខ្លួនរបស់ប្រធានាធិបតីអាម៉េរិកលោក ដូណាល់ ត្រាំ។ ប៉ុន្តែលោក ដូណាល់ ត្រាំ បានច្រានសេចក្ដីរាយការណ៍របស់ប្រព័ន្ធផ្សព្វផ្សាយនេះ ដោយហៅវាថាជា Fake News ខណៈរុស្ស៊ីក៏បានទាត់ចោលសេចក្ដីរាយការណ៍នេះដែរ។