មូស្គូ ៖ រុស្ស៊ីទើបប្រគល់សាកសពទាហានចំនួន ១.២០០នាក់ផ្សេងទៀត ដែលបានពលីជីវិតក្នុងសមរភូមិទៅឲ្យភាគីអ៊ុយក្រែន។ មានការដោះដូរទាំងឈ្លើយសឹកអាយុក្រោម ២៥ឆ្នាំ ឬទាហានរងរបួស និងមានជំងឺជាច្រើនរួចមកហើយ រវាងភាគីជម្លោះទាំងពីរ ក្នុងពេលប៉ុន្មានសប្តាហ៍មកនេះ។ យោងតាមប្រភពពីសារព័ត៌មាន RT កាលពីថ្ងៃអាទិត្យ អ៊ុយក្រែនមិនបានប្រគល់សាកសពកងទ័ពរុស្ស៊ីណាមួយមកវិញ នៅក្នុងការដោះដូរចុងក្រោយនេះទេ។ ដោយឡែក រុស្ស៊ីក៏បានសម្រេចចិត្តជាឯកតោភាគី ធ្វើមាតុភូមិនិវត្តន៍សាកសពទាហានអ៊ុយក្រែនជាង ៦.០០០នាក់ដែលត្រូវបានសម្លាប់ ស្ថិតក្រោមហេតុផលមនុស្សធម៌ផងដែរ។ ការផ្លាស់ប្តូរឈ្លើយសឹករវាងភាគីទាំងពីរបានធ្វើឡើងនៅថ្ងៃចន្ទ អង្គារ ព្រហស្បតិ៍ និងថ្ងៃសៅរ៍ សប្តាហ៍មុន ប៉ុន្តែទាំងរុស្ស៊ី និងអ៊ុយក្រែន មិនបានបង្ហាញតួលេខជាផ្លូវការ នូវចំនួនអ្នកទោសដែលពួកគេបានប្រគល់ និងទទួលនោះទេ។ បើតាមជំនួយការរបស់ប្រធានាធិបតីរុស្ស៊ី គឺលោក វ្ល៉ាឌីមៀ មេឌីនស្គី គិយមកទល់ពេលនេះ អ៊ុយក្រែនបានប្រគល់សាកសពទាហានរុស្ស៊ីត្រឹមតែចំនួន ២៧នាក់ប៉ុណ្ណោះ។ ក្នុងអំឡុងការចរចានៅទីក្រុងអ៊ីស្តង់ប៊ុល ប្រទេសតួកគី កាលពីថ្ងៃទី២ ខែមិថុនា គណៈប្រតិភូមកពីរុស្ស៊ី-អ៊ុយក្រែន បានឈានដល់ការឯកភាពគ្នាដោះដូរឈ្លើយសឹកជាបន្តបន្ទាប់ ដោយផ្តោតជាចម្បងលើពលទាហានរងរបួសធ្ងន់ធ្ងរ ឈឺ និងអាយុក្រោម ២៥ឆ្នាំ៕ ប្រភព ៖ AFP ប្រែសម្រួល ៖ ឈឹម ទីណា

បរទេស ៖ បេសកជនអាមេរិកបាននិយាយ នៅថ្ងៃចន្ទនេះ ថា អគារស្ថានទូត របស់អាមេរិក ប្រចាំទីក្រុង Tel Aviv ប្រទេសអ៊ីស្រាអែល រងការខូចខាត ដោយសារការវាយប្រហារបាញ់មីស៊ីល របស់អ៊ីរ៉ង់។ លោក Mike Huckabee ឯកអគ្គរដ្ឋទូតអាមេរិកប្រចាំប្រទេសអ៊ីស្រាអែល បាននិយាយថា អគារស្ថានទូត បានរងការខូចខាតបន្តិចបន្តួច ពីការវាយប្រហារ ដោយកាំជ្រួចរបស់អ៊ីរ៉ង់ដែលនៅក្បែរនោះ តែលោករាយការណ៍ថា មិនមានរបួសដល់បុគ្គលិកអាមេរិកឡើយ។ អ៊ីរ៉ង់បានបាញ់កាំជ្រួច លើទីក្រុងមួយនេះ របស់ប្រទេស អ៊ីស្រាអែល នៅព្រឹកថ្ងៃចន្ទនេះ បន្ទាប់ពីអ៊ីស្រាអែលបានវាយប្រហារលើគោលដៅយោធាជ្រៅ ក្នុងប្រទេសអ៊ីរ៉ង់ ដោយភាគីទាំងពីរ បានគំរាមកំហែងថា នឹងមានការបំផ្លិចបំផ្លាញ បន្ថែមទៀត។ លោក Huckabee បាននិយាយ នៅបណ្តាញសង្គម X ថា «ការខូចខាតបន្តិចបន្តួច ពីការវាយប្រហារដោយកាំជ្រួចរបស់អ៊ីរ៉ង់ នៅជិតសាខាស្ថានទូត នៅ Tel Aviv ប៉ុន្តែ គ្មានរបួសដល់មន្ត្រីអាមេរិកទេ»៕ ប្រភពពី AFP ប្រែសម្រួល៖ សារ៉ាត

បរទេស ៖ អ៊ីរ៉ង់បានអះអាងថា អំឡុងការវាយប្រហារ របស់អ៊ីស្រាអែល ៣ថ្ងៃជាប់ៗគ្នា បានបណ្តាលឲ្យមានមនុស្សស្លាប់ ២២៤នាក់ និង របួស១,២០០នាក់ ផ្សេងទៀត។ ក្រសួងសុខាភិបាលអ៊ីរ៉ង់ បានបង្ហាញរបាយការណ៍នេះ កាលពីថ្ងៃអាទិត្យ ពោលគឺបន្ទាប់ពីមានការវាយប្រហាររបស់អ៊ីស្រាអែល ចាប់តាំងពីថ្ងៃសុក្រមកម្ល៉េះ។ ជាការកត់សម្គាល់ កាលពីថ្ងៃអាទិត្យ យោធាអ៊ីស្រាអែលបាននិយាយថា កម្លាំងទ័ពអាកាសរបស់ខ្លួនបានវាយប្រហារអាកាសយានដ្ឋាន Mashhad នៅភាគខាងកើតឆ្ងាយ របស់ប្រទេសអ៊ីរ៉ង់ ដែលធ្វើឱ្យវាក្លាយជាការវាយប្រហារ ចម្ងាយឆ្ងាយបំផុត នៃជម្លោះ ជាមួយនឹងគោលដៅ ប្រហែល ២,៣០០គីឡូម៉ែត្រ ពីអ៊ីស្រាអែល។ យ៉ាងណាមិញ ជាការសងសឹក អ៊ីរ៉ង់ក៏បានវាយប្រហារតបត ក្នុងនោះ ការបាញ់កាំជ្រួចមីស៊ីល ទៅលើអ៊ីស្រាអែល កាលពីចុងសប្តាហ៍ បានសម្លាប់មនុស្ស១០នាក់ រួមមានទាំងកុមារ ជាហេតុនាំឱ្យមនុស្សស្លាប់សរុបនៅអ៊ីស្រាអែល កើនដល់១៣នាក់ និង ៣៨០នាក់ទៀត រងរបួស៕ ប្រភពពី AFP ប្រែសម្រួល៖ សារ៉ាត

បរទេស ៖ មនុស្សម្នាក់បានស្លាប់ បន្ទាប់ពីកើតមានគ្រោះរញ្ជួយដី កម្រិត៦.១រិចទ័រ នៅប្រទេសប៉េរូ ជាប្រទេសស្ថិតក្នុងតំបន់ អាមេរិក ខាងត្បូង កាលពីថ្ងៃអាទិត្យ។ មជ្ឈមណ្ឌលជាតិរញ្ជួយដីប្រទេសនេះ បានអះអាងថា មានការវាយប្រហារភ្លាមៗ នៅមុនថ្ងៃត្រង់ ហើយមានចំណុចកណ្តាល គឺប្រហែល៣០គីឡូម៉ែត្រ ពីទីក្រុង Callao ដែលជាទីក្រុងកំពង់ផែ ក្បែររដ្ឋធានី Lima។ នគរបាលជាតិ បាននិយាយថា បុរសម្នាក់បានស្លាប់ នៅក្នុងទីក្រុង Lima នៅពេលដែលជញ្ជាំង បានធ្លាក់ទៅលើរថយន្តរបស់លោក ក្នុងពេលកំពុងបើកបរ។ ប្រធានាធិបតីប៉េរូ លោកស្រី Dina Boluarte បានអំពាវនាវឱ្យប្រជាពលរដ្ឋ រក្សាភាពស្ងប់ស្ងាត់ ដោយលើកឡើងថា មិនមានការព្រមាន អំពីរលកយក្សស៊ូណាមិ នោះទេ។ ប៉េរូ ដែលមានប្រជាជនចំនួន ៣៤លាននាក់ ជាមធ្យម មានការរញ្ជួយដី យ៉ាងហោចណាស់ ១០០ ដង ក្នុងមួយឆ្នាំ។ កាលពីឆ្នាំ១៩៧០ ធ្លាប់កើតមានរញ្ជួយដីដ៏ធំ ក្នុងប្រទេសនេះ ស្លាប់មនុស្សប្រហែល ៦៧,០០០នាក់៕ ប្រភពពី AFP…

ម៉ានីល ៖ ហ្វីលីពីនបានទិញយន្តហោះចម្បាំងធុនស្រាល FA-50 Block 70 ចំនួន ១២គ្រឿងពីក្រុមហ៊ុនកូរ៉េខាងត្បូង Korea Aerospace Industries, Ltd. (KAI) ដែលនេះជាផ្នែកមួយនៃកម្មវិធីធ្វើទំនើបកម្មកងកម្លាំងប្រដាប់អាវុធហ្វីលីពីន។ ក្រសួងការពារជាតិហ្វីលីពីនបានឲ្យដឹងថា កិច្ចសន្យាទិញយន្តហោះចម្បាំង ដែលមានតម្លៃជាង ៧០០លានដុល្លារនេះ ត្រូវបានធ្វើឡើងជាផ្លូវការកាលពីដើមខែនេះ។ យោងតាមក្រសួងការពារជាតិហ្វីលីពីន ក្រៅពីការទិញយន្តហោះចម្បាំង ទីក្រុងម៉ានីលក៏បានទិញឧបករណ៍បេសកកម្ម, ជំនួយផ្នែកដឹកជញ្ជូនរួមបញ្ចូលគ្នា, ប្រព័ន្ធព័ត៌មានបណ្តុះបណ្តាល និងភស្តុភារផងដែរ។ យន្តហោះចម្បាំង FA-50 Block 70 តំណាងឱ្យការវិវត្តន៍ចុងក្រោយបំផុតនៃត្រកូលយន្តហោះចម្បាំង FA-50 ដែលមានលក្ខណៈពិសេស ឆ្លើយតបផ្នែកអាកាសចរណ៍ទំនើប និងប្រព័ន្ធរ៉ាដាទំនើប ពិសេសលើកកម្ពស់ប្រតិបត្តិការប្រយុទ្ធ។ ក្រសួងការពារជាតិហ្វីលីពីន បានឲ្យដឹងទៀតថា ការដឹកជញ្ជូនយន្តហោះចម្បាំង ដែលបានបញ្ជាទិញ នឹងត្រូវធ្វើឡើងជាដំណាក់កាលបន្តបន្ទាប់ក្នុងរយៈពេល ៥ឆ្នាំខាងមុខ ហើយរំពឹងថានឹងបញ្ចប់ទាំងស្រុងនៅឆ្នាំ២០៣០៕ ប្រភព ៖ AFP ប្រែសម្រួល ៖ ឈឹម ទីណា

សេអ៊ូល ៖ ប្រធានាធិបតីកូរ៉េខាងត្បូង លោក Lee Jae-myung បានដាក់ចេញបទបញ្ជាមួយ ក្នុងគោលបំណងទប់ស្កាត់ និងដាក់ទណ្ឌកម្មជនទាំងឡាយណា ដែលបង្ហោះប៉េងប៉ោងផ្ទុកខិត្តប័ណ្ណរិះគន់កូរ៉េខាងជើង និងរបបដឹកនាំលោក គីម ជុងអ៊ុន។ អ្នកនាំពាក្យប្រធានាធិបតីកូរ៉េខាងត្បូង លោកស្រី Kang Yu-jung បាននិយាយនៅក្នុងសន្និសុទកាសែតមួយថា រដ្ឋាភិបាលបានទទួលរបាយការណ៍ថា មានពលរដ្ឋមួយក្រុមបានបង្ហោះខិត្តប័ណ្ណតាមប៉េងប៉ោងយ៉ាងអាណាធិបតេយ្យ ឆ្លងព្រំដែនអន្តរកូរ៉េ ចូលទៅក្នុងទឹកដីកូរ៉េខាងជើងកាលពីព្រឹកថ្ងៃសៅរ៍។ លោកស្រី Kang បន្ថែមថា ក្រុមពលរដ្ឋ និងបុគ្គលដែលហោះហើរខិត្តប័ណ្ណប្រឆាំងកូរ៉េខាងជើងនៅតាមព្រំដែនមុនថ្ងៃនោះ នឹងត្រូវទទួលទោសតាមច្បាប់កំណត់។ អ្នកនាំពាក្យរូបនេះបានគូសបញ្ជាក់ថា រដ្ឋាភិបាលរបស់លោក Lee នៅតែប្រកាន់គោលជំហរថា ការបង្ហោះ និងចែកចាយខិត្តប័ណ្ណប្រឆាំងកូរ៉េខាងជើងដោយខុសច្បាប់ គួរតែត្រូវបានបញ្ឈប់ ព្រោះវាអាចប៉ះពាល់ដល់ជីវិតរស់នៅប្រចាំថ្ងៃ និងសុវត្ថិភាពរបស់ប្រជាជននៅតាមតំបន់ព្រំដែន ពិសេសបង្កើនភាពតានតឹងផ្នែកយោធានៅលើឧបទ្វីបកូរ៉េ។ បើតាមលោកប្រធានាធិបតី Lee បានបញ្ជាឱ្យក្រសួងពាក់ព័ន្ធទាំងអស់ បង្កើតវិធានការទប់ស្កាត់ និងដាក់ទណ្ឌកម្មលើជនឡាំងឡាយណា ដែលចែកចាយខិត្តប័ណ្ណ ដោយលោកគ្រោងនឹងពិភាក្សាអំពីវិធានការដ៏ទូលំទូលាយប្រឆាំងនឹងបញ្ហានេះ នៅថ្ងៃចន្ទដើមសប្តាហ៍ក្រោយ៕ ប្រភព ៖ ស៊ីនហួរ ប្រែសម្រួល ៖ ឈឹម ទីណា

ព្យុងយ៉ាង ៖ នៅពេលចុះត្រួតពិនិត្យរោងចក្រឧស្សាហកម្មយោធា ប្រមុខរដ្ឋកូរ៉េខាងជើង លោក គីម ជុងអ៊ុន បានជំរុញឱ្យពន្លឿនការផលិតគ្រាប់ផ្លោងឆ្លើយតបតម្រូវការក្នុងសង្គ្រាមសម័យទំនើប។ ទីភ្នាក់ងារសារព័ត៌មាន KCNA រាយការណ៍ថា លោក គីម ជុងអ៊ុន បានអះអាងថា បើសិនយើងចង់បង្កើនការផលិតគ្រាប់ផ្លោងថ្មីមានកម្លាំងខ្លាំង បំពេញតម្រូវការក្នុងសង្គ្រាមសម័យទំនើបនោះ យើងត្រូវតែព្យាយាមពង្រីក និងពង្រឹងសមត្ថភាពផលិត ពិសេសរៀបចំដំណើរការផលិតឱ្យកាន់តែត្រឹមត្រូវ និងបង្កើនផលិតកម្មយន្តហោះដ្រូនជានិច្ច។ លោក គីម បានជំរុញបែបនេះ ក្នុងកំលុងពេលចុះពិនិត្យមើលវឌ្ឍនភាពនៃការផលិតគ្រាប់ផ្លោង នៅក្នុងឆមាសទីមួយនៃឆ្នាំ២០២៥ និងចំពេលមានសេចក្តីរាយការណ៍ជាបន្តបន្ទាប់ អំពីការបញ្ជូនកងទ័ពកូរ៉េខាងជេីង និងអាវុធទៅជួយដល់រុស្ស៉ីក្នុងសង្រ្គាមអ៊ុយក្រែន។ យោងតាមរបាយការណ៍របស់ក្រុមត្រួតពិនិត្យទណ្ឌកម្មពហុភាគីរបស់អង្គការសហប្រជាជាតិ បានឲ្យដឹងថា កូរ៉េខាងជើងបានផ្គត់ផ្គង់ដល់រុស្ស៉ី នូវគ្រាប់ផ្លោងជាង ២០.០០០គ្រាប់កាលពីខែឧសភា៕ ប្រភព ៖ រ៉យទ័រ ប្រែសម្រួល ៖ ឈឹម ទីណា