អ៊ីស្លាម៉ាបាត ៖ មេបញ្ជាការកងទ័ពប៉ាគីស្ថាន លោក Asim Munir នៅថ្ងៃ ព្រហស្បតិ៍ បានជំរុញឱ្យអ៊ីរ៉ង់ប្រើប្រាស់ឥទ្ធិពលរបស់ខ្លួន ដើម្បីបញ្ចុះបញ្ចូល និងទប់ស្កាត់ក្រុមឧទ្ទាមហ៊ូធីនៅប្រទេសយេម៉ែន កុំឱ្យវាយប្រហារលើហេដ្ឋារចនាសម្ព័ន្ធ និងរោងចក្រថាមពលរបស់អារ៉ាប៊ីសាអូឌីត។ ការជំរុញរបស់ប្រមុខកងទ័ពប៉ាគីស្ថាន ធ្វើឡើងតាមរយៈការសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi ចំពេលដែលប្រមុខការទូតកំពូលអ៊ីរ៉ង់រូបនេះ កំពុងបំពេញទស្សនកិច្ចនៅប្រទេសចិន។ បើតាម Anadolu, កិច្ចសន្ទនានេះ បានផ្តោតសំខាន់លើស្ថានការណ៍ក្នុងតំបន់ ការវាយប្រហាររបស់ក្រុមឧទ្ទាមហ៊ូធី និងការចាប់ផ្តើមឡើងវិញនូវការចរចាដោយផ្ទាល់រវាងសហរដ្ឋអាមេរិក និងអ៊ីរ៉ង់ ដែលបានជាប់គាំង។ ឆ្លើយតបការអំពាវនាវរបស់ភាគីប៉ាគីស្ថាន រដ្ឋមន្ត្រីការបរទេសអ៊ីរ៉ង់បានបង្ហាញក្តីសង្ឃឹមយ៉ាងវិជ្ជមាន ប៉ុន្តែមិនទាន់មានការផ្តល់ព័ត៌មានលម្អិតបន្ថែមនោះទេ។ យ៉ាងណា កន្លងមក អ្នកនាំពាក្យក្រសួងការបរទេសអ៊ីរ៉ងធ្លាប់បានបញ្ជាក់ថា ទីក្រុងតេហេរ៉ង់មិនជ្រៀតជ្រែកក្នុងកិច្ចការផ្ទៃក្នុងរបស់ប្រទេសយេម៉ែនឡើយ ដោយចាត់ទុកក្រុមឧទ្ទាមហ៊ូធីជាតួអង្គឯករាជ្យ។ ការជំរុញរបស់ប៉ាគីស្ថាននេះដែរ ត្រូវបានធ្វើឡើងបន្ទាប់ពីមានការស្ទាក់ចាប់យន្តហោះដ្រូនមួយគ្រឿង ដែលគេសង្ស័យថា ជារបស់ក្រុមហ៊ូធី នៅជិតទីក្រុងបរិសុទ្ធ Mecca ក្នុងប្រទេសអារ៉ាប៊ីសាអូឌីត។ ការវាយប្រហារនេះ បានបង្កឱ្យមានការខឹងសម្បារពីសហគមន៍អន្តរជាតិ រួមទាំងបណ្តាប្រទេសមូស្លីមផងដែរ។ ប៉ុន្តែភ្លាមៗ ក្រុមឧទ្ទាមហ៊ូធីបានប្រកាសច្រានចោល៕ ប្រភព ៖ Anadolu ប្រែសម្រួល ៖ ឈឹម ទីណា

មូស្គូ ៖ ប្រមុខការទូតកំពូលរុស្ស៊ី បានចោទប្រកាន់កាលពីថ្ងៃ ព្រហស្បតិ៍ ថា ប្រទេសលោកខាងលិចកំពុងត្រៀមខ្លួនធ្វើសង្គ្រាមជាមួយរុស្ស៊ី ខណៈព្យាយាមផ្សព្វផ្សាយនូវអ្វីដែលខ្លួនហៅថា “រឿងមិនពិត” អំពីការគំរាមកំហែងរបស់ទីក្រុងមូស្គូ។ បើតាម Anadolu, រដ្ឋមន្ត្រីការបរទេសរុស្ស៊ី លោក Sergey Lavrov អះអាងថា រុស្ស៊ីមិនមានបំណងវាយប្រហារអឺរ៉ុបឡើយ ប៉ុន្តែជម្លោះណាមួយដែលបង្កឡើងដោយការវាយប្រហារពីសំណាក់បណ្តាប្រទេសអឺរ៉ុប នោះនឹងមានលក្ខណៈខុសគ្នាទាំងស្រុងពីសង្គ្រាមអ៊ុយក្រែន និងបញ្ចប់ទៅវិញយ៉ាងលឿនបំផុត។ លោក Lavrov ដែលមានវ័យ៧៦ឆ្នាំរូបនេះបញ្ជាក់ថា រុស្ស៊ីមានសមត្ថភាពឆ្លើយតបចំពោះបញ្ហាប្រឈមខាងក្រៅ ដែលលោកចាត់ទុកថា ប៉ះពាល់ដល់សន្តិសុខជាតិរបស់ទីក្រុងមូស្គូ។ ជាមួយគ្នានេះ លោក Lavrov បានបង្ហាញភាពខុសគ្នារវាងសហរដ្ឋអាមេរិក និងអឺរ៉ុប ដោយអះអាងថា ទីក្រុងវ៉ាស៊ីនតោននៅតែមានឆន្ទៈរក្សាការសន្ទនាជាមួយរុស្ស៊ី ទោះបីមានការខ្វែងគំនិតគ្នាខ្លាំងក៏ដោយ។ លោក Lavrov សង្កត់ធ្ងន់ថា រុស្ស៊ីនៅតែបើកទ្វារចំហ ចំពោះការសន្ទនាប្រកបដោយអត្ថន័យ ជាមួយគ្រប់ភាគីដែលមានឆន្ទៈចូលរួម ហើយមិនចង់ឱ្យមន្ត្រីបរទេសមករុស្ស៊ី ដើម្បីតែធ្វើការរិះគន់ជាសាធារណៈនោះទេ។ យ៉ាងណា ជើងខ្លាំងការទូតចាស់វស្សារូបនេះ ទទួលស្គាល់ថា ការសន្ទនារវាងរុស្ស៊ី និងសហរដ្ឋអាមេរិកនៅពុំទាន់នាំឱ្យមានការផ្លាស់ប្តូរជាក់ស្តែងណាមួយនោះទេ ហើយលោកក៏មិនរំពឹងថា នឹងមានការផ្លាស់ប្តូរយ៉ាងឆាប់រហ័សក្នុងពេលដ៏ខ្លីខាងមុខផងដែរ៕ ប្រភព ៖ Anadolu ប្រែសម្រួល ៖…

ភ្នំពេញ៖កម្ពុជាបានទទួលធ្វើជាម្ចាស់ផ្ទះរៀបចំវេទិកាថ្នាក់តំបន់ស្តីពីយុទ្ធនាការប្រយុទ្ធប្រឆាំងព័ត៌មានក្លែងក្លាយ ស្របគ្នានឹងការប្រកាសការប្រកួតប្រជែងជ័យលាភីអ្នកផលិតមាតិកាប្រយុទ្ធប្រឆាំងព័ត៌មានក្លែងក្លាយឆ្នាំ២០២៦។ព្រឹត្តិការណ៍នេះមានការចូលរួមពីអ្នកសារព័ត៌មានមកពី៤ប្រទេសផងដែរ។ វេទិកាថ្នាក់តំបន់ស្តីពីយុទ្ធនាការប្រយុទ្ធប្រឆាំងព័ត៌មានក្លែងក្លាយ បានប្រារព្ធឡើងកាលពីថ្ងៃទី១៧ ខែកញ្ញា ឆ្នាំ២០២៦​​ក្រោមគម្រោងកិច្ចសហប្រតិបត្តិការ«តំបន់មេគង្គ-ឡានឆាង» ដោយ​មានការចូលរួមពី​អ្នកសារព័ត៌មានមក​ប្រទេសចិន ឡាវ មីយ៉ាន់ម៉ា និងវៀតណាម ដើម្បីកសាងបណ្តាញអ្នកសារព័ត៌មាន និងអ្នកផលិតមាតិកា ប្រកបដោយ​ទំនួល​ខុសត្រូវខ្ពស់ លើកកម្ពស់ទំនុកចិត្តសាធារណៈលើប្រភពព័ត៌មានច្បាស់ការណ៍ ព្រមទាំងពង្រឹងភាពធន់របស់​សង្គមជាតិ ក្នុងការប្រយុទ្ធ ប្រឆាំងព័ត៌មានក្លែងក្លាយប្រកបដោយប្រសិទ្ធភាព។ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន មានប្រសាសន៍ថា «វេទិកាថ្ងៃនេះ គឺជាការបន្តដំណើរពិភាក្សាទៅមុខទៀត។ យើងកំពុងបោះជំហានពីកិច្ចសន្ទនាទៅកាន់កិច្ចសហប្រតិបត្តិការជាក់ស្តែង ពីការឆ្លើយតបទៅកាន់ការការពារ និងពីគំនិត​ផ្តួចផ្តើមដាច់ដោយឡែកទៅកាន់ភាពធន់រួមគ្នា និងកាន់តែរឹងមាំ។ ទន្ទឹមនឹងការជជែកវែកញែកក្នុងអង្គវេទិកា ក៏ការរៀបចំកម្មវិធីប្រកួតប្រកួតពានរង្វាន់អ្នកផលិតមាតិកាប្រយុទ្ធប្រឆាំង​ព័ត៌មានក្លែងក្លាយព្រមគ្នាផដែរ។ បើតាមឯកឧត្តមរដ្ឋមន្រ្តីក្រសួងព័ត៌មាន បញ្ជាក់ថា ជាផ្នែកមួយដ៏សំខាន់នៃវេទិកា​ថ្ងៃនេះ។ ឯកឧត្តមលើកឡើងថា​យើងមិនត្រឹមតែពិភាក្សាអំពីបញ្ហាប្រឈមប៉ុណ្ណោះទេ ប៉ុន្តែយើងកំពុងទទួលស្គាល់និងចាត់​ទុកអ្នក​សារព័ត៌មាន អ្នកជំនាញប្រព័ន្ធផ្សព្វផ្សាយ អ្នកផ្ទៀងផ្ទាត់ការពិត យុវជន និងអ្នកផលិតមាតិកា ជាផ្នែកមួយដ៏​សំខាន់ក្នុងការប្រយុទ្ធប្រឆាំងព័ត៌មានក្លែងក្លាយ»។ ឯកឧត្តមរដ្ឋមន្រ្តី បន្តថា បរិយាកាសព័ត៌មានសកលលោកកំពុងផ្លាស់ប្តូរយ៉ាងលឿន។ បច្ចេកវិទ្យាឌីជីថល បណ្តាញសង្គម និងបញ្ញាសិប្បនិម្មិតឬអេអាយ (AI) បានបង្កើតឱកាសជាច្រើនសម្រាប់ការអភិវឌ្ឍ នវានុវត្តន៍ ការអប់រំ ការចូលរួមរបស់​សាធារណជន ការចែករំលែកចំណេះដឹង និងការភ្ជាប់ទំនាក់ទំនងរវាងប្រជាជននិងប្រជាជន។ ទន្ទឹមនេះ បច្ចេកវិទ្យាក៏បាន​បង្កផលប៉ះពាល់ថ្មីៗផងដែរ។…

កូប៉ិនហាក ៖ លោកស្រី Ursula von der Leyen ប្រធានគណៈកម្មការអឺរ៉ុប បានថ្លែងថា នៅថ្ងៃព្រហស្បតិ៍នេះ លោកស្រីនឹងស្នើច្បាប់មួយទៅកាន់បណ្តាប្រទេសជាសមាជិក ដើម្បីកំណត់ការចូលប្រើប្រាស់បណ្តាញសង្គមសម្រាប់កុមារដែលមានអាយុក្រោម ១៥ ឆ្នាំ។ បើតាម NHK, លោកស្រី ប្រធានគណៈកម្មការអឺរ៉ុប បានលើកឡើងពីចំណុចនេះ នៅក្នុងសុន្ទរកថាស្ដីពីស្ថានភាពសហភាព ឬ State of the Union នៅទីក្រុង កូប៉ិនហាក ប្រទេសដាណឺម៉ាក កាលពីថ្ងៃពុធ។ លោកស្រី Von der Leyen បានសង្កត់ធ្ងន់លើភាពចាំបាច់នៃការកំណត់អាយុសម្រាប់ការប្រើប្រាស់បណ្តាញសង្គម។ លោកស្រីបានមានប្រសាសន៍ថា «ទាំងយប់ ទាំងថ្ងៃ ឪពុកម្តាយបានឃើញពីផលប៉ះពាល់អវិជ្ជមាន ដែលរួមមានដូចជា ការបាត់បង់ដំណេក ការថប់បារម្ភ និងសូម្បីតែការធ្វើបាបខ្លួនឯង»។ លោកស្រីបានបន្ថែមថា «ក្នុងករណីជាច្រើនកំពុងកើនឡើងនោះ, ថែមទាំងឈានទៅដល់សោកនាដកម្មដែលបណ្តាលឱ្យបាត់បង់ជីវិតទៀតផង»។ យោងតាមសំណើនេះ, ការប្រើប្រាស់បណ្តាញសង្គមនឹងត្រូវបានហាមឃាត់សម្រាប់កុមារដែលមានអាយុក្រោម ១៣ ឆ្នាំ។ ចំណែកកុមារដែលមានអាយុ ១៣ និង ១៤ ឆ្នាំ នឹងត្រូវបានអនុញ្ញាតឱ្យបង្កើតគណនីបានលុះត្រាតែមានការត្រួតពិនិត្យពីឪពុកម្តាយ…

មូស្គូ ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃពុធ បានអំពាវនាវដល់ប្រជាជន ឲ្យចូលរួមការបោះឆ្នោត នាពេលខាងមុខ ដើម្បីបង្ហាញពីភាពឯកភាពគ្នាជាមួយនឹងប្រទេសជាតិ។ ប្រទេសមួយនេះចាប់ផ្តើមរៀបចំការបោះឆ្នោតសភា ដែលមានរយៈពេលបីថ្ងៃ ចាប់ពីថ្ងៃសុក្រ ស្អែកនេះ ដើម្បីជ្រើសរើសសមាជិកសភាជាន់ទាប ឬ State Duma ដែលមានអាសនៈចំនួន ៤៥០ ហើយស្ថាប័ននេះតែងតែអនុម័តគំនិតផ្តួចផ្តើមនានារបស់វិមានក្រឹមឡាំងដោយស្មោះត្រង់។ នៅក្នុងសុន្ទរកថាទៅកាន់ប្រជាជាតិ, លោកប្រធានាធិបតីបានអំពាវនាវឱ្យប្រជាជនរុស្ស៊ីចេញទៅបោះឆ្នោត និងបង្ហាញពីភាពឯកភាពគ្នាជាមួយប្រទេសជាតិ។ លោក ពូទីន ចាត់ទុកការបោះឆ្នោត នាពេលខាងមុខនេះថា នឹងក្លាយជា «ការរួមចំណែករួមគ្នាឆ្ពោះទៅរកជ័យជម្នះរបស់រុស្ស៊ី» ទាំងនៅលើសមរភូមិ និងក្នុងការប្រឈមមុខដាក់គ្នាជាមួយគូប្រជែងនយោបាយរបស់ប្រទេស។ បើតាម AFP, នេះគឺជាការបោះឆ្នោតសភាលើកដំបូង ចាប់តាំងពីប្រទេសរុស្ស៊ីបានបើកប្រតិបត្តិការសង្គ្រាមទ្រង់ទ្រាយធំនៅអ៊ុយក្រែន កាលពីខែកុម្ភៈ ឆ្នាំ២០២២។ ការបោះឆ្នោតដែលស្ថិតក្រោមការគ្រប់គ្រងយ៉ាងតឹងរ៉ឹង ត្រូវបានវិមានក្រឹមឡាំងចាត់ទុកថា ជាឧបករណ៍វាស់ស្ទង់មតិសាធារណៈជុំវិញសង្គ្រាមជាមួយអ៊ុយក្រែន ដែលកំពុងអូសបន្លាយចូលដល់ឆ្នាំទី ៥ ហើយនោះ។ ប្រព័ន្ធនយោបាយត្រូវបានគ្រប់គ្រងយ៉ាងតឹងរ៉ឹង ហើយគេរំពឹងយ៉ាងទូលំទូលាយថា គណបក្សកាន់អំណាច «United Russia» ដែលទទួលបានការគាំទ្រពីលោក ពូទីន នឹងបន្តរក្សាឥទ្ធិពលរបស់ខ្លួន៕ ប្រភព ៖…

សាណាអា ៖ ក្រុមឧទ្ទាមហ៊ូធី ប្រកាសអះអាងពីការបាញ់ទម្លាក់យន្តហោះចម្បាំង F-15 មួយគ្រឿងមានតម្លៃប្រហែល ១០០ លានដុល្លាររបស់កងទ័ពអាកាសអារ៉ាប៊ីសាអូឌីត នៅលើដែនអាកាសខេត្ត Marib ប្រទេសយេម៉ែន។ ភ្លាមៗ ខាងភាគីអារ៉ាប៊ីសាអូឌីតនៅពុំទាន់ធ្វើការឆ្លើយតបចំពោះការអះអាងរបស់ក្រុមឧទ្ទាមហ៊ូធីនៅឡើយទេ។ បើតាម Jerusalem Post, អ្នកនាំពាក្យយោធាក្រុមហ៊ូធី លោក Yahya Saree បានអះអាងកាលពីថ្ងៃ ពុធ ថា យន្តហោះចម្បាំង F-15 ត្រូវបានបាញ់ទម្លាក់ដោយប្រើ មីស៊ីលពីដីទៅអាកាស (SAM) ដែលផលិតក្នុងស្រុក។ យ៉ាងណា លោកមិនបានបញ្ជាក់ថាតើហេតុការណ៍នេះ កើតឡើងនៅពេលណាទេ ប៉ុន្តែអះអាងថា យន្តហោះរបស់កងទ័ពអាកាសអារ៉ាប៊ីសាអូឌីតបានធ្វើការវាយប្រហារតាមអាកាសច្រើនជាង ៤៥០ លើក នៅក្នុងសប្តាហ៍នេះ។ លោក Saree បន្ថែមថា ក្រុមប្រដាប់អាវុធរបស់ខ្លួន បានរារាំងក្រុមយន្តហោះចម្បាំងចំនួនពីរក្រុម រួមមានយន្តហោះចម្បាំង F-15 និង Eurofighter Typhoon ហើយកំពុងស្វែងរកទីតាំងធ្លាក់របស់យន្តហោះ F-15។ ទន្ទឹមគ្នា អ្នកនាំពាក្យរូបនេះ បានច្រានចោលការចោទប្រកាន់ថា ក្រុមហ៊ូធីបានវាយប្រហារគោលដៅនៅទីក្រុង Mecca ដោយយន្តហោះដ្រូន…

មូស្គូ ៖ ប្រទេសរុស្ស៊ី ព្រមានធ្ងន់ៗថា ការដាក់ពង្រាយអាវុធក្នុងគន្លងតារាវិថី អាចនឹងបង្កើនហានិភ័យនៃការប្រណាំងប្រជែងអាវុធ ជាពិសេសការផ្ទុះសង្គ្រាមក្នុងលំហអាកាស។ បើតាម The Star, អនុរដ្ឋមន្ត្រីការបរទេសរុស្ស៊ី លោក Sergei Ryabkov បានអះអាងកាលពីថ្ងៃ ពុធ ថា ពិភពលោកនៅមានពេលវេលាគ្រប់គ្រាន់ ដើម្បីទប់ស្កាត់ការប្រណាំងប្រជែងអាវុធក្នុងលំហអាកាស តាមរយៈការបង្កើតសន្ធិសញ្ញាអន្តរជាតិ ដែលមានកាតព្វកិច្ចផ្លូវច្បាប់ ដើម្បីហាមឃាត់ការដាក់ពង្រាយអាវុធវាយប្រហារនៅក្នុងលំហអាកាស។ ជាមួយគ្នានេះ លោក Ryabkov បានអំពាវនាវឱ្យសហរដ្ឋអាមេរិក និងប្រទេសលោកខាងលិចបោះបង់ការស្ទាក់ស្ទើរ និងចូលរួម ក្នុងការបង្កើតក្របខណ្ឌអន្តរជាតិ ដើម្បីកាត់បន្ថយហានិភ័យនៃជម្លោះប្រដាប់អាវុធក្នុងលំហអាកាស។ ការអំពាវនាវរបស់រុស្ស៊ី ធ្វើឡើងបន្ទាប់ពីមេបញ្ជាការកងទ័ពអវកាសអាមេរិក លោក Douglas Schiess ប្រកាសថា កងទ័ពអវកាសអាមេរិកកំពុងប្រតិបត្តិការអាវុធនៅក្នុងគន្លងតារាវិថី ដើម្បីការពារកងកម្លាំងចម្រុះពីការវាយប្រហារតាមលំហអាកាស។ រុស្ស៊ីដែលជាមហាអំណាចអវកាសកំពូលមួយ ក្នុងចំណោមមហាអំណាចទាំងបីរបស់ពិភពលោក បានជំរុញគំនិតបង្កើតសន្ធិសញ្ញាអន្តរជាតិដែលហាមឃាត់ការប្រើប្រាស់ ឬការគំរាមកំហែងប្រើកម្លាំងប្រឆាំងនឹងវត្ថុអវកាសជាយូរមកហើយ។ ទោះជាយ៉ាងណា កិច្ចចរចានៅតែជួបភាពជាប់គាំង ដោយសារការខ្វះទំនុកចិត្ត និងការចោទប្រកាន់គ្នារវាងរុស្ស៊ី និងសហរដ្ឋអាមេរិក៕ ប្រភព ៖ The Star ប្រែសម្រួល ៖ ឈឹម ទីណា