ណៃពិដោ ៖ ប្រជាជនមីយ៉ាន់ម៉ារាប់រយគ្រួសារត្រូវបានចាប់បង្ខំឲ្យចាកចោលផ្ទះសម្បែងរបស់ពួកគេតាមក្បួនឡានភៀសខ្លួន កាលពីថ្ងៃសៅរ៍ ដើម្បីគេចចេញពីការប្រយុទ្ធគ្នារវាងយោធា និងកងទ័ពព្រៃប្រឆាំងរដ្ឋប្រហារ។ យោងតាមអ្នកស្រុក និងក្រុមអ្នករៀបចំការភៀសខ្លួន បានឱ្យដឹងថា ការប្រយុទ្ធគ្នាយ៉ាងខ្លាំងក្លាកំពុងផ្ទុះឡើងចាប់តាំងពីថ្ងៃចន្ទ នៅជុំវិញភូមិ សាំងណាងខា ក្នុងរដ្ឋសាន ភាគខាងកើត។ លោក Khun Pyae Linn ដែលជាអ្នកនាំពាក្យរៀបចំកិច្ចប្រឹងប្រែងជម្លៀសប្រជាជន បាននិយាយថា ប្រតិបត្តិការសង្គ្រោះប្រជាជននៅតែបន្ត ហើយយើងរំពឹងថា នឹងមានអ្នកភូមិជាង ១.៥០០នាក់ត្រូវបានជម្លៀសទៅកាន់ទីជម្រកសុវត្ថិភាពជាបណ្តោះអាសន្ន។ បន្ទាប់ពីសង្រ្គាមរយៈពេល ៤ឆ្នាំ យោធាមីយ៉ាន់ម៉ាបានងាកទៅពង្រឹងពលទាហានរបស់ខ្លួន ក្រោយបាត់បង់ទឹកដីអស់ជាច្រើន ក្រោមថ្វីដៃកងទ័ពព្រៃប្រឆាំងនឹងរដ្ឋប្រហារ ព្រមទាំងអង្គការប្រដាប់អាវុធជនជាតិភាគតិច។ គួរកត់សម្គាល់ ប្រទេសមីយ៉ាន់ម៉ាត្រូវបានបំផ្លាញដោយសារសង្រ្គាមស៊ីវិលជាច្រើន ចាប់តាំងពីយោធាបានធ្វើរដ្ឋប្រហារដណ្តើមអំណាចនៅក្នុងឆ្នាំ២០២១ ដែលបណ្តាលឱ្យមនុស្សជាង ៣.៥លាននាក់ត្រូវបង្ខំចិត្តភៀសខ្លួន នេះបើយោងតាមតួលេខរបស់អង្គការសហប្រជាជាតិ៕ ប្រភព ៖ AFP ប្រែសម្រួល ៖ ឈឹម ទីណា

ហ្សេរុយសាឡឹម ៖ នាយករដ្ឋមន្ត្រីអ៊ីស្រាអែល លោក Benjamin Netanyahu បានគំរាមកាលពីថ្ងៃសៅរ៍ថា អ៊ីស្រាអែលនឹងវាយលុកគ្រប់គោលដៅទូទាំងប្រទេសអ៊ីរ៉ង់ ដើម្បីផ្តួលរលំរបបដឹកនាំនៃមេដឹកនាំកំពូល Ayatolla ពិសេសកម្មវិធីនុយក្លេអ៊ែរអ៊ីរ៉ង់។ លោក Netanyahu បាននិយាយនៅក្នុងសេចក្តីថ្លែងការណ៍តាមវីដេអូមួយ នៅថ្ងៃទីពីរនៃយុទ្ធនាការផ្លូវអាកាសរបស់អ៊ីស្រាអែល ដែលផ្តោតលើទីតាំងយោធា និងនុយក្លេអ៊ែរអ៊ីរ៉ង់ថា យើងនឹងវាយប្រហារគ្រប់ទីតាំង និងគ្រប់គោលដៅទាំងអស់ នៃរបបដឹកនាំលោក Ayatolla។ នាយករដ្ឋមន្ត្រីអ៊ីស្រាអែលរូបនេះ បានសង្កត់ធ្ងន់ថា យើងបានដោះស្រាយការវាយប្រហារយ៉ាងពិតប្រាកដ ចំពោះកម្មវិធីនុយក្លេអ៊ែររបស់អ៊ីរ៉ង់ ចាប់តាំងពីថ្ងៃសុក្រមក។ អ៊ីស្រាអែល កាលពីថ្ងៃសុក្រ បានបញ្ចេញយន្តហោះចម្បាំងប្រមាណ ២០០គ្រឿងវាយប្រហារលើទីតាំងជាង ១០០កន្លែងទូទាំងប្រទេសអ៊ីរ៉ង់ រួមមានទាំងរោងចក្រនុយក្លេអ៊ែរ រោងចក្រមីស៊ីលបាលិស្ទីគ ប្រព័ន្ធរ៉ាដា និងប្រព័ន្ធបាញ់មីស៊ីលជាដើម។ ក្នុងនោះមេបញ្ជាការយោធាកំពូលៗ និងអ្នកវិទ្យាសាស្ត្រជាច្រើននាក់របស់ប្រទេសអ៊ីរ៉ង់ ត្រូវសម្លាប់៕ ប្រភព ៖ AFP ប្រែសម្រួល ៖ ឈឹម ទីណា

មូស្គូ ៖ ប្រធានាធិបតីរុស្ស៊ី លោក Vladimir Putin នៅពេលនិយាយទូរស័ព្ទជាមួយមេដឹកនាំអាមេរិក លោក Donald Trump កាលពីថ្ងៃសៅរ៍ បានថ្កោលទោសប្រតិបត្តិការយោធារបស់អ៊ីស្រាអែលប្រឆាំងអ៊ីរ៉ង់ និងសម្តែងការព្រួយបារម្ភពីហានិភ័យកើនឡើងភាពតានតឹងនៅមជ្ឈិមបូព៌ា។ ជំនួយការវិមានក្រឹមឡាំង លោក Yuri Ushakov បានប្រាប់អ្នកកាសែតថា លោក Putin បានថ្កោលទោសការវាយប្រហាររបស់អ៊ីស្រាអែលប្រឆាំងនឹងអ៊ីរ៉ង់ និងបានសម្តែងការព្រួយបារម្ភយ៉ាងខ្លាំង ចំពោះលទ្ធភាពនៃការកើនឡើងជម្លោះ ដែលបង្កផលវិបាកពុំអាចព្យាករបាន សម្រាប់ស្ថានភាពទាំងមូលនៅទូទាំងតំបន់មជ្ឈិមបូព៌ា។ លោកប្រធានាធិបតី Trump បានបង្ហោះសារលើបណ្តាញសង្គម Truth Social ថា លោក Putin មានអារម្មណ៍ដូចខ្ញុំដែរថា សង្គ្រាមរវាងអ៊ីស្រាអែល និងអ៊ីរ៉ង់នេះ គួរតែបញ្ចប់ និងថា ជម្លោះរុស្ស៊ី-អ៊ុយក្រែន ក៏គួរតែបញ្ចប់ដែរ។ លោក Trump និយាយថា លោក និងលោក Putin ភាគច្រើនពិភាក្សាអំពីបញ្ហានៅមជ្ឈិមបូព៌ា ហើយបានចំណាយពេលតិចជាងមុន និយាយអំពីសង្រ្គាមអ៊ុយក្រែន។ បើតាមលោក Ushakov លោក Putin បានប្រាប់មេដឹកនាំអាមេរិកថា រុស្ស៊ីបានត្រៀមខ្លួនរួចជាស្រេច…

ភ្នំពេញ ៖ ភាគីថៃបាននិយាយនៅថ្ងៃសៅរ៍នេះថា កិច្ចពិភាក្សាជាមួយប្រទេសជិតខាងកម្ពុជា « មានការរីកចម្រើន » ក្នុងការដោះស្រាយជម្លោះ ព្រំដែនដ៏រ៉ាំរ៉ៃ ដែលកាលពីខែមុន បានបណ្តាលឲ្យមានការប៉ះទង្គិចគ្នា នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។ ក្រសួងការបរទេសថៃ នៅថ្ងៃសៅរ៍នេះ បាននិយាយថា កិច្ចប្រជុំរវាងភាគីថៃ និងកម្ពុជា បានធ្វើឱ្យមានវឌ្ឍនភាព ក្នុងការកសាងការយល់ដឹងគ្នាទៅវិញទៅមករវាងប្រទេសទាំងពីរ។ អ្នកនាំពាក្យក្រសួងការបរទេសថៃ លោក Nikorndej Balankura បាននិយាយនៅក្នុងសន្និសីទសារព័ត៌មានថា កិច្ចសន្ទនាការទូតនៅតែជាមធ្យោបាយដ៏មានប្រសិទ្ធភាពបំផុត ដោយបន្ថែមថា កិច្ចពិភាក្សានឹងប្រព្រឹត្តទៅបន្តទៀតនៅថ្ងៃអាទិត្យស្អែកនេះ។ សូមបញ្ជាក់ថា នៅវេលាម៉ោងជិត៤រសៀលថ្ងៃទី១៤ ខែមិថុនា ឆ្នាំ២០២៥នេះ កិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) កម្ពុជា-ថៃ នៅរាជធានីភ្នំពេញ ថ្ងៃដំបូងត្រូវបានបិទបញ្ចប់បណ្ដោះអាសន្ន ដោយភាគីទាំងពីរកម្ពុជា-ថៃ នឹងបន្ដកិច្ចប្រជុំនៅវេលាម៉ោង៩ព្រឹក ថ្ងៃទី១៥ ខែមិថុនា ឆ្នាំ២០២៥ស្អែក។ កិច្ចប្រជុំនេះ ភាគីកម្ពុជាដឹកនាំដោយឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន ចំណែកភាគីរដ្ឋាភិបាលថៃ តំណាងដោយឯកឧត្តម ប្រាសាស ប្រាសាសវិនិច្ឆ័យ (Prasas Prasasvinitchai) ទីប្រឹក្សាក្រសួងការបរទេសទទួលបន្ទុកកិច្ចការព្រំដែន។…

បរទេស ៖ រដ្ឋដែលមានអាវុធនុយក្លេអ៊ែរក្នុងដៃ បានចំណាយប្រាក់ជាង ១០០ពាន់លានដុល្លារ ទៅលើឃ្លាំងអាវុធបរមាណូរបស់ពួកគេកាលពីឆ្នាំ២០២៤។ យុទ្ធនាការអន្តរជាតិ ដើម្បីលុបបំបាត់អាវុធនុយក្លេអ៊ែរ (ICAN) បានបញ្ជាក់ថា ឆ្នាំមុន ចក្រភពអង់គ្លេស ចិន បារាំង ឥណ្ឌា អ៊ីស្រាអែល កូរ៉េខាងជើង ប៉ាគីស្ថាន រុស្សី និងសហរដ្ឋអាមេរិក រួមគ្នាចំណាយប្រាក់ជិត ១០ពាន់លានដុល្លារ ច្រើនជាងនៅឆ្នាំ២០២៣។ ICAN ដែលមានមូលដ្ឋាននៅទីក្រុងហ្សឺណែវ បានឈ្នះរង្វាន់ណូបែលសន្តិភាពឆ្នាំ ២០១៧ សម្រាប់តួនាទីសំខាន់របស់ខ្លួន ក្នុងការព្រាងសន្ធិសញ្ញាស្តីពីការហាមឃាត់អាវុធនុយក្លេអ៊ែរ ដែលបានចូលជាធរមាននៅឆ្នាំ ២០២១។ យុទ្ធនាការ ICAN បាននិយាយនៅក្នុងរបាយការណ៍ប្រចាំឆ្នាំរបស់ខ្លួនថា សហរដ្ឋអាមេរិកតែមួយប៉ុណ្ណោះ បានចំណាយលុយចំនួន ៥៦,៨ពាន់លានដុល្លារក្នុងឆ្នាំ២០២៤ បន្ទាប់មកប្រទេសចិនចំនួន ១២,៥ពាន់លានដុល្លារ និងចក្រភពអង់គ្លេសចំនួន ១០,៤ពាន់លានដុល្លារ៕ ប្រភព ៖ AFP ប្រែសម្រួល ៖ ឈឹម ទីណា

មូស្គូ ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន ចាត់ទុកយន្តហោះដ្រូនពិឃាតបានដើរតួយ៉ាងសំខាន់ក្នុងសង្គ្រាមអ៊ុយក្រែន ហើយបានជំរុញឲ្យពន្លឿនការអភិវឌ្ឍ និងការដាក់ពង្រាយកងកម្លាំងយានដ្រូននៅក្នុងជួរយោធា។ លោក ពូទីន បាននិយាយនៅក្នុងកិច្ចប្រជុំស្តីពីការអភិវឌ្ឍអាវុធថា បច្ចុប្បន្ន យើងកំពុងបង្កើតកងទ័ពនៃប្រព័ន្ធគ្មានមនុស្សបើក ជាផ្នែកដាច់ដោយឡែកនៃយោធា ហើយយើងត្រូវតែធានាឲ្យមានការដាក់ពង្រាយ និងការអភិវឌ្ឍប្រកបដោយគុណភាពខ្ពស់ និងឆាប់រហ័ស។ ប្រធានាធិបតីរុស្ស៊ីរូបនេះបន្ថែមថា ដ្រូនមានសមត្ថភាពបំផ្លាញរថពាសដែក ប្រព័ន្ធទំនាក់ទំនង ការដឹកជញ្ជូន និងកម្លាំងទ័ពរបស់សត្រូវ។ ឥឡូវនេះ ប្រតិបត្តិករយន្តហោះដ្រូនរបស់យើង ទទួលខុសត្រូវចំពោះផ្នែកសំខាន់រហូតដល់ ៥០ភាគរយនៃសម្ភារៈ និងបរិក្ខាររបស់សត្រូវដែលត្រូវបានបំផ្លាញ និងខូចខាត។ ដោយឡែក ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ចាប់តាំងពីការផ្ទុះសង្រ្គាមនៅក្នុងខែកុម្ភៈ ឆ្នាំ២០២២ ក៏បានសង្កត់ធ្ងន់លើសារៈសំខាន់នៃការអភិវឌ្ឍការផលិតយន្តហោះដ្រូនក្នុងស្រុក។ យន្តហោះដ្រូនពិឃាតបានដើរតួនាទីឈានមុខគេនៅលើសមរភូមិ សម្រាប់ភាគីទាំងសងខាង នៅក្នុងសង្គ្រាមរយៈពេលជាងបីឆ្នាំ ដែលរុស្ស៊ីចូលលុកលុយទឹកដីអ៊ុយក្រែន។ ក្រៅពីការប្រើប្រាស់ប្រយុទ្ធដោយផ្ទាល់ យន្តហោះដ្រូនក៏ត្រូវបានប្រើប្រាស់យ៉ាងទូលំទូលាយសម្រាប់ការឈ្លបយកការណ៍ សង្គ្រាមអេឡិចត្រូនិក ការរុករករ៉ែ និងការដោះមីនផងដែរ៕ ប្រភព ៖ រ៉យទ័រ ប្រែសម្រួល ៖ ឈឹម ទីណា

បរទេស៖ កាលពីថ្ងៃសុក្រ ទី១៣ ខែមិថុនា យន្តហោះមួយគ្រឿង របស់ក្រុមហ៊ុនអាកាសចរណ៍ឥណ្ឌា Air India ដឹកអ្នកដំណើរ ១៥៦នាក់ បានចុះចត ជាបន្ទាន់ នៅអាកាសយានដ្ឋាន ភូកេត ប្រទេសថៃ ក្រោយពេលរងការគំរាម បំផ្ទុះគ្រាប់បែក នេះបើតាមការចុះផ្សាយ របស់ទីភ្នាក់ងារព័ត៌មាន CNA។ ហេតុការណ៍នេះ បានកើតឡើង ក្រោយមួយថ្ងៃ ដែលមានឧបទ្ទេវហេតុ ធ្លាក់យន្តហោះ របស់ក្រុមហ៊ុនមួយនេះដូចគ្នា កើតមានក្នុងទីក្រុង Ahmedabad នៃប្រទេសឥណ្ឌា កាលពីថ្ងៃព្រហស្បតិ៍ ដែលបណ្តាលឲ្យអ្នកដំណើរ ជាង២៤០នាក់ បានស្លាប់។ អាជ្ញាធរអាកាសយានដ្ឋានថៃ បាននិយាយថា ជើងហោះហើរ AI 379 បានប៉ុនប៉ងចាកចេញ ពីប្រទេសថៃឆ្ពោះទៅ កាន់ រដ្ឋធានីញូវដែលី របស់ប្រទេសឥណ្ឌា ស្រាប់តែទទួលការគម្រាមកំហែង ដោយគ្រាប់បែក នៅលើយន្តហោះ ទើបធ្វើការចុះចត ជាបន្ទាន់ នៅលើកោះ ភូកេត។ យ៉ាងណាមិញ មន្ត្រីអាកាសយានដ្ឋានថៃអះអាងថា អ្នកដំណើរទាំងអស់លើយន្តហោះ ត្រូវបានជម្លៀសចេញ ដោយសុវត្ថិភាព។…

ហាណូយ ៖ ព្យុះទីហ្វុង Wutip បានពាំនាំភ្លៀងធ្លាក់ខ្លាំងបង្កជាទឹកជំនន់ធ្ងន់ធ្ងរជន់លិចភាគកណ្តាលប្រទេសវៀតណាម នេះបើតាមការបញ្ជាក់របស់គណៈកម្មាធិការជាតិ ទទួលបន្ទុកបង្ការ និងគ្រប់គ្រងគ្រោះមហន្តរាយធម្មជាតិកាលពីថ្ងៃសុក្រ។ ទឹកជំនន់បង្កឡើងពីព្យុះទីហ្វុង Wutip បានជន់លិចផ្ទះសម្បែងប្រជាជនជាង ៨០០ខ្នងនៅក្នុងទីក្រុង Da Nang និងខេត្ត Quang Nam ខណៈដែលផ្ទៃដីស្រែចំការ និងដំណាំជាង ៥៨.០០០ហិកតានៅទូទាំងតំបន់ត្រូវលិចទឹក។ រីឯទីក្រុង Hue ក៏បានរងការជន់លិចធ្ងន់ធ្ងរផងដែរ ដោយផ្លូវជាច្រើនខ្សែនៅទីតាំងប្រវត្តិសាស្ត្រ Imperial បានលិចនៅក្រោមទឹកកម្ពស់ជាងកន្លះម៉ែត្រ។ បើតាមរបាយការណ៍ ទូកនេសាទចំនួន៦គ្រឿងត្រូវបានគេរាយការណ៍ថា បានលិច ឬខូចខាតនៅក្នុងខេត្ត Quang Binh និងទីក្រុង Da Nang ។ យោងតាមទីភ្នាក់ងារសារព័ត៌មានវៀតណាមបានឱ្យដឹងថា ប្រជាជនរាប់ពាន់គ្រួសារនៅតំបន់ភ្នំនៃខេត្ត Quang Tri ត្រូវបានជម្លៀសចេញពីតំបន់ដែលងាយប្រឈមមុខនឹងហេតុការណ៍បាក់ដី។ ចំណែកជើងហោះហើរប្រហែល ២០ជើងទៅមកពីតំបន់ភាគកណ្តាលប្រទេសវៀតណាម ត្រូវបានពន្យារពេល ឬលុបចោលតែម្តង ដោយសារឥទ្ធិពលព្យុះទីហ្វុងទីមួយនៃឆ្នាំនេះ៕ ប្រភព ៖ ស៊ីនហួរ ប្រែសម្រួល ៖ ឈឹម ទីណា

តេហេរ៉ង់ ៖ ថ្លែងក្នុងទឹកមុខខឹងសម្បារជាខ្លាំង ប្រធានាធិបតីអ៊ីរ៉ង់ លោក Masoud Pezeshkian បានប្តេជ្ញាថា នឹងធ្វើឲ្យអ៊ីស្រាអែលស្តាយក្រោយ ចំពោះវិធានការដ៏ល្ងង់ខ្លៅរបស់ខ្លួន ដោយលោកចង់សំដៅលើការវាយប្រហារអ៊ីរ៉ង់ កាលពីថ្ងៃសុក្រ។ លោក Pezeshkian បានបង្ហោះសារលើបណ្ដាញសង្គម X ថា ការឆ្លើយតបស្របច្បាប់ដ៏ខ្លាំងក្លារបស់អ៊ីរ៉ង់ នឹងធ្វើឲ្យសត្រូវស្ដាយក្រោយ ចំពោះវិធានការដ៏ល្ងង់ខ្លៅរបស់ខ្លួន។ ប្រធានាធិបតីរូបនេះ បានសង្កត់ធ្ងន់ទៀតថា យើងជំរុញឲ្យប្រជាជនរបស់យើងជឿជាក់លើថ្នាក់ដឹកនាំ ហើយផ្ដល់ការគាំទ្រ ពីព្រោះប្រជាជន រួមទាំងមន្ត្រីអ៊ីរ៉ង់ នឹងមិននៅស្ងៀមឡើយ ចំពោះមុខឧក្រិដ្ឋកម្មនេះ។ ប្រតិកម្មធ្ងន់ៗរបស់លោកប្រធានាធិបតី Pezeshkian កើតឡើងក្រោយអ៊ីស្រាអែលបានបើកការវាយប្រហារតាមអាកាសប្រឆាំងអ៊ីរ៉ង់ នាព្រឹកថ្ងៃសុក្រនេះ ដោយផ្តោតលើទីតាំងនុយក្លេអ៊ែរ និងយោធា ហើយបានសម្លាប់មេបញ្ជាការជាន់ខ្ពស់ និងអ្នកវិទ្យាសាស្ត្រនុយក្លេអ៊ែរមួយចំនួន៕ ប្រភព ៖ AFP ប្រែសម្រួល ៖ ឈឹម ទីណា