រុស្ស៊ី៖ មន្រ្តីយោធារុស្ស៊ីបានគូសបញ្ជាក់ថា ប្រជាជនស៊ីរីជិត១,៥លាននាក់ ដែលបានភៀសខ្លួនទៅក្រៅប្រទេស និងនៅក្នុងប្រទេសនោះ បានវិលត្រឡប់មកកាន់ផ្ទះសម្បែងរបស់ពួកគេវិញហើយ ក្រោមជំនួយគាំទ្រពីសហគមន៍អន្តរជាតិ។ នៅក្នុងកិច្ចប្រជុំអន្តរក្រសួងពាក់ព័ន្ធនឹងស្ថានភាពជនភៀសខ្លួនស៊ីរី នៅថ្ងៃពុធសប្ដាហ៍នេះ តំណាងរុស្ស៊ីទទួលបន្ទុកជនភៀសខ្លួនស៊ីរី លោក យ៉េវហ្គែនី អ៊ីលយីន បានអះអាងថា ប្រជាជនស៊ីរី២៥០,០០០នាក់ ដែលបានរត់ភៀសខ្លួនទៅក្រៅប្រទេសដោយសារសង្រ្គាមនោះ បានវិលត្រឡប់មកកាន់ប្រទេសស៊ីរីវិញហើយ។ លោក អ៊ីលយីន បានបន្ថែមទៀតថា ការធ្វើមាតុភូមនិវត្តន៍នេះ ធ្វើឡើងដោយសារតែមានកិច្ចខិតខំប្រឹងប្រែងពីសហគមន៍អន្តរជាតិ ខណៈសាលារៀន ហាងទំនិញ ស្ថានីយផ្គត់ផ្គង់ទឹកស្អាត អគ្គិសនី និងមន្ទីរពេទ្យ រួមទាំងហេដ្ឋានរចនាសម្ព័ន្ធជាច្រើនត្រូវបានស្ដាឡើងវិញនៅតាមតំបន់រំដោះចំនួន២១៦កន្លែង៕ម.ន

សហរដ្ឋអាម៉េរិក៖ នាយករដ្ឋមន្រ្តីជប៉ុន លោក ស៊ីន ហ្សូអាបេ បានរៀបចំសន្និសីទសារព័ត៌មានមួយ ក្រោយចូលរួមជំនួបកំពូលរបស់លោកជាមួយប្រធានាធិបតីអាម៉េរិក លោក ដូណាល់ ត្រាំ នៅក្នុងទីក្រុងញ៉ូវយ៉ក នៅថ្ងៃពុធម្សិលមិញនេះ។

សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ បានព្រមានបណ្តាប្រទេសដែលរំលោភបំពាន ក៏ដូចជាប្រឆាំងនឹងការដាក់ទណ្ឌកម្មរបស់អង្គការសហប្រជាជាតិទៅលើប្រទេសកូរ៉េខាងជើង។ ការព្រមាននេះ ធ្វើឡើងក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិលើកដំបូងនៅក្នុងទីក្រុងញ៉ូវយ៉ក នៅថ្ងៃពុធសប្តាហ៍នេះ។ ទន្ទឹមគ្នានោះ បណ្តាមេដឹកនាំកំពូលៗជាច្រើនបានធ្វើកិច្ចពិភាក្សាគ្នាស្តីអំពីកិច្ចខិតខំប្រឹងប្រែង ដើម្បីទប់ទល់នឹងការរីករាលដាលនៃគ្រឿងសព្វាវុធដែលបង្កការបំផ្លិចផ្លាញទ្រង់ទ្រាយធំ ក្នុងនោះរួមមានអាវុធនុយក្លេអ៊ែរជាដើម។

សហរដ្ឋអាម៉េរិក៖ ទីប្រឹក្សារដ្ឋ និងជារដ្ឋមន្រ្តីការបរទេសចិន លោក វ៉ាង យី បាននិយាយថា គោលជំហររបស់ភាគីទាំងអស់ដែលចូលរួមកិច្ចប្រជុំថ្នាក់រដ្ឋមន្រ្តីការបរទេសលើបញ្ហានុយក្លេអ៊ែរអ៊ីរ៉ង់ ត្រូវបានប្រកាន់យ៉ាងម៉ឺងម៉ាត់ខ្ពស់ ហើយមតិរួមថ្មីមួយត្រូវបានបង្កើតឡើង។

រុស្ស៊ី៖ យោធារុស្ស៊ីនៅក្នុងថ្ងៃពុធសប្តាហ៍នេះ បានដាក់ពង្រាយប្រព័ន្ធការពារមីស៊ីលបាស់សិន នៅតំបន់ឆ្នេរ ស្ថិតនៅលើកោះកូតែលនី ក្នុងសមុទ្រ ឡាបតែវ នៃមហាសមុទ្រអាក់ទិក។ តាមរយៈខ្សែអាត់វីដេអូដែលចេញផ្សាយដោយក្រសួងការពារជាតិរុស្ស៊ីនៅថ្ងៃពុធម្សិលមិញនេះ បានបង្ហាញពីសកម្មភាពសាកល្បងបាញ់មីស៊ីលប្រឆាំងនាវា រ៉េអាក់ស្យុង ដែលមានល្បឿនលឿនជាងសំឡេង អននីគ ជាច្រើនដើម។ ក្រសួងការពារជាតិរុស្ស៊ីបានឱ្យដឹងថា ការបាញ់សាកល្បងមីស៊ីលនេះដែរ គឺជាផ្នែកមួយនៃសមយុទ្ធយុទ្ធសាស្រ្តរបស់កងទាហានជើងទឹកភូមិភាគខាងជើង នៅលើកោះក្នុងសមុទ្រអាក់ទិករបស់រុស្ស៊ីមួយនេះ។ ស្របពេលជាមួយគ្នានោះដែរ រុស្ស៊ីបានដាក់ពង្រាយប្រព័ន្ធការពារមីស៊ីល រ៊ូបេស នៅលើកោះកូតែលនី ផងដែរ៕

អ៊ុយក្រែន៖ យោធាអ៊ុយក្រែនបានធ្វើតេស្ដដោយជោគជ័យនូវប្រភេទរថពាសដែកទំនើបចុងក្រោយបំផុតមួយរបស់ខ្លួនឈ្មោះ ឡេវ  ដែលអាចនឹងត្រូវបានប្រើប្រាស់ក្នុងការសណ្តោង និងជួសជុលបរិក្ខារយោធាដែលរងការខូចខាតនៅក្នុងសង្រ្គាម ស្របពេលដែលប្រទេសអឺរ៉ុបខាងកើតមួយនេះ នៅតែកំពុងមានភាពតានតឹងនៅឡើយជាមួយរុស្ស៊ី។

អាហ្វហ្កានីស្ថាន៖ ក្រសួងការពារជាតិអាហ្វហ្កានីស្ថានបានឱ្យដឹងនៅក្នុងថ្ងៃពុធនេះថា ពួកឧទ្ទាមរដ្ឋអ៊ីស្លាម IS ចំនួន១៤នាក់ត្រូវបានសម្លាប់ ដោយការវាយប្រហារតាមដែនអាកាសនៅខេត្ត គុនណា ភាគខាងកើតប្រទេស។ បើតាមសេចក្តីថ្លែងការណ៍របស់ក្រសួងការពារជាតិអាហ្វហ្កានីស្ថាន កងទ័ពអាកាសរបស់ប្រទេសខ្លួនបានបើកការវាយប្រហារតាមផ្លូវអាកាសទៅលើទីតាំងរបស់ក្រុមសកម្មប្រយុទ្ធរដ្ឋអ៊ីស្លាម IS នៅឯសង្កត់ ឆោខេ និងដារ៉ា អ៊ី ពេច ក្នុងរយៈពេល២៤ម៉ោង ដែលជាលទ្ធផលនោះ បានផ្តាច់ជីវិតពួកឧទ្ទាមរដ្ឋអ៊ីស្លាម១៤នាក់។ គួរបញ្ជាក់ថា គុនណា ដែលជាខេត្តតំបន់ភ្នំនេះ មានចម្ងាយប្រហែល១៨០គីឡូម៉ែត្រភាគខាងកើតរដ្ឋធានីកាប៊ុល គឺជាទីតំាងកើតមានការប៉ះទង្គិចគ្នាដោយអាវុធរវាងកងកម្លាំងសន្តិសុខរដ្ឋាភិបាល និងពួកសកម្មប្រយុទ្ធរដ្ឋអ៊ីស្លាម IS ជាបន្តបន្ទាប់។ ពាក់ព័ន្ធនឹងសេចក្តីថ្លែងការណ៍របស់ក្រសួងការពារជាតិអាហ្វហ្កានីស្ថានខាងលើ ក្រុមភេវរកររដ្ឋអ៊ីស្លាម IS ដែលត្រូវបានបង្កើតឡើងនៅក្បែរខេត្តណាងហ្គាហា កាលពីដើមឆ្នំា២០១៥មកនេះ មិនទាន់ចេញមុខឆ្លើយតបចំពោះរបាយការណ៍នេះនៅឡើយនោះទេ៕

ឥណ្ឌា៖ ក្រសួងការពារជាតិឥណ្ឌាអនុញ្ញាតឲ្យទិញម៉ាស៊ីនរហូតដល់១០០០គ្រឿង សម្រាប់រថក្រោះធុន T-72 ដែលបង្កើតឡើងតាំងពីជំនាន់សម័យសូវៀត ដើម្បីបង្កសក្តានុពលនៃវិស័យការពារជាតិរបស់ប្រទេសខ្លួនបន្ថែមទៀត។

វេណេស៊ុយអេឡា៖ ក្រសួងហិរញ្ញវត្ថុអាម៉េរិកបានប្រកាសថា ប្រទេសខ្លួនបានសម្រេចដាក់ទណ្ឌកម្មថ្មីទៀតប្រឆាំងនឹងវេណេស៊ុយអេឡា តាមរយៈការដាក់បញ្ចូលឈ្មោះលោកជំទាវទី១ ដែលជាភរិយារបស់លោកប្រធានាធិបតី នីកូឡាស់ ម៉ាឌូរ៉ូ រួមជាមួយនឹងមន្រ្តីកំពូលៗមួយចំនួនទៀតទៅក្នុងបញ្ជីខ្មៅ។

សហរដ្ឋអាម៉េរិក៖ លោកប្រធានាធិបតីសហរដ្ឋអាម៉េរិក ដូណាល់ ត្រាំ ទទួលបានការសើចចំអកដោយហួសចិត្ត ពីបណ្តាមេដឹកនាំពិភពលោក ក្នុងពេលលោកថ្លែងសុន្ទរកថា នៅមហាសន្និបាតអង្គការសហប្រជាជាតិ នៅទីក្រុងញ៉ូវយ៉ក សហរដ្ឋអាម៉េរិក កាលពីថ្ងៃទី២៥ កញ្ញា ២០១៨ ម្សិលមិញនេះ។ លោកត្រាំ បានប្រាប់បណ្តាមេដឹកនាំពិភពលោកថា សេដ្ឋកិច្ចរបស់សហរដ្ឋអាម៉េរិកកំពុងរីកចម្រើនខ្លាំងណាស់ ដែរមិនធ្លាប់មានទេ ក្នុងប្រវត្ថិសាស្ត្រ។ លោកត្រាំអះអាងថា រដ្ឋបាលរបស់លោកសម្រេចបានជោគជ័យដ៏ធំនេះ ដោយចំណាយពេលមិនដល់២ឆ្នាំផង ពោលគឺបើធៀបនឹងអាណត្តិដឹកនាំអាម៉េរិកមុនៗ គឺស្ទើរតែគ្មាននរណាដូចរដ្ឋបាលរបស់លោកបែបនេះទេ៕